يا نبي الرحمه يا سر السمه
الدين عاش بأسم والدفاطمه
~~~
الدين عاش بأسم خاتم الانبياء
شكثر انطه اجروح واتحمل عناء
اليوم مفجوعه بمصابك هالسماء
والأرض حزنانه كلها وهايمه
~~~~~
يالترف طبعك ولا مثله طبع
يا ثكلها جدامك الما تنسمع
يا سلاسة حجيك بنص الربع
زمرة الأحقاد ذيج الضالمه
~~~~~
خلصت ناس شكثر من الضلام
ناس جانت لا حلال ولا حرام
بيا مكان تروحله تخضر كلام
ايقضت ذيج العقول النايمه
~~~~
يالي شخصك بالوصف ما ينوصف
يالي خيرك فايض وكلك عطف
ابيتك القران خط اول حرف
وكمله بعدك علي حامي الحمه
~~~~
للفقير اتصير يالهادي وطن
واليتيم اتحسبه جن مثل الحسن
انطيت كلشي وثبت هالدين بعلن
وأسست بيت الكساء الفاطمه
~~~
سيد محسن الجابري

((شهيد الحب محمد))


بده بيك الحزن مُــــنذَ الولاده
لحد ما حطت أعليك الشهاده
لحد كلمةّ اليهجر من شياطين
وصار الوهم عد اهـــل العباده

محمد .. روح الايــمان
محمد .. كان مـــا كان
محمد .. مات عطشان .. محمد

محمد .. عـــروةّ الدين
محمد .. طف الحسين
محمد .. جـرح السنين .. محمد

ابو فاطم .. ابو القاسم .. الروح الاحمديه
بتقاسيمه .. حرگ خيمه .. وزينب ياسبيه

شهيد الحب محمد ...
"""""""""""""""""""""""""""""""""""''''''''''

لأن بحيدرى مــــولاي مِـــهتم
ضريبةّ حُــــبك وگلبك تسمم
اول شيعي لجل الحب يذبحوّ
اليحب المرتضى يتــوشح بدم

شيعي .. وجرحه ملچوم
شيعي .. ومـــوته محتوم
شيعي .. وضلمته الگــوم .. محمد

شيعي .. وصاحب اسرار
شيعي .. وأمــــره مختار
شيعي .. إيــــــوالي كرار .. محمد

ابو البيعه .. ابو الشيعه .. مُبَلغ للرساله
الحب شمره .. من ابوالزهره .. عرفنا من خلاله

شهيد الحب محمد ...
"""""""""""""""""""""""""""""""""""''''''''''

اذا تكـــبر دمعتك والجرح وين
حبيبي أتصيحله كرار ابوحسين
أنه أبلياك طير ومـــاله جنحين
لو ما أنــــته مدري الوادم منين

دمعتي .. تخضر جروح
دمعتي .. أنسان مذبوح
دمعتي .. بيــدك أتروح ... محمد

دمعتي .. تحـــبك هواي
دمعتي .. أتشوفك الماي
دمعتي .. هــــــا يرجواي .. محمد

علي أنته .. العشگـ صنته .. شبابي ويا مشيبي
أودنك .. احبنك .. يبو زينب حبيبي

شهيد الحب محمد ...

"""""""""""""""""""""""""""""""""""''''''''''

من صار الحـــسن گلبك تألم
دمعتك طاحـت وسرك تكتم
الزهره أتعاين بخدينك دموع
وتگلها الولد هذا يذبحه السم

يذبحه .. وسره مفضوح
يذبحه .. وگلبه مجروح
يذبحه .. ويغدي مذبوح .. محمد

يذبحه .. بخنجر الويل
يذبحه .. والشمس ليل
يذبحه .. ومايضل حيل .. محمد

ظل ينعه .. بيا دمعه .. الحسن ريحانه روحه
والزهره .. تجر حسره .. وتّناغي بجروحه

شهيد الحب محمد ...

"""""""""""""""""""""""""""""""""""''''''''''

من صار الحســـين ودمعه يشتد
اول مجـــــلس ينصــبه محــــمد
ظل أيصيح ابني حسين عطشان
وليش الحـــــافر بصــدرك تعمد

حوافر .. تاكل أصدور
حوافر .. حــاقده أثور
حوافر .. يوم عاشـــور .. محمد

حوافر .. تذبح أزغار
حوافر .. والخـيم نار
حوافر .. مـن بدر ثار .. محمد

ظل ينحب .. على زينب .. من تصعد هزيله
بيا حيره .. بيا ديره .. ياهو التشتكيله

شهيد الحب محمد ...

عبد زينب
محمد الابراهيمي

لحن(شهيد الحب محمد)
بصوت
ملا خالد الفيصل

مُصابك يا رسول الله جَرِح بينه
ونِظَل ننعاك للمحشر يهادينه
---------------
المُصابك يا رسول الله تهل العين
سمّ الصاب چبدك صاب چبد الدين
عجيبه شلون لحدودك تدنّه البين
وانت لخدمتك هل كون تكوينه
---------------
الخِدِمتك صوّر المعبود هذا الكون
وسِر تكوينه صار بهيبتك مكنون
شلون السم يطر چبدك يطه شلون
صِدَع گلب الهُده وگطّع شرايينه
---------------
عليك الدنيه ناحَت من گبُل فرگاك
ونْشگ الگمَر لمصيبتك ينعاك
خَذِت روح السعاده من رحت وياك
اوتِرَكتِ الحزن من بعدك يسلينه
--------------
تركت شچم گلب عگبك يبو العتره
مهموم ابضلوعه امكسّره العَبره
يريت تشوف عگبك لوعة الزهره
دين الله اويه دمعتهه بِچت عينه
----------------
دِرَت منهو التآمَر يدس ليك السم
رايد عگبك بهل أمّه يتحكّم
دِرَت عگبك ضِلع مِن عدهه يتهشّم
ودِرَت رحم الامامه يفگد اجنينه
----------------
مو سمّ اليهوديّه الفُطَر چبدك
سم حِقد امّتك حين اصبحت ضدك
يبو الزهره گبُل ما تنزِل بلحْدك
الطاغي اتأهّب وجمّع شياطينه
-----------------
اجتمعوا عل خلافه زمرة الظلام
وغصبوهه ابسيوف الحقد والاجرام
بِنَوا ذيچ السقيفه وهِدموا الاسلام
وعِملـوا عَكِس دين الله اوقوانينه
-----------------
ودار الچنت يا سيد الرسل بيهه
تستأذِنهه من تدخل مبانيهه
عگب عينك فلان اتهجّم اعليهه
وخالَف نهجك السامي ومضامينه
-----------------
ظلموا بضعتك يل مصطفى المختار
وسِگط محسنهه لمّن هجموا اعلى الدار
ضِلِع منهه انكسر يل هادي بل بسمار
اوّصيّك بل وصيّه امچتّفه ايمينه
---------------
هذا الصار غير الطعن والتجريح
طِعنوا بالحقيقه بحجة التصحيح
اوصُفَت عترتك يل هادي بمهبّ الريح
ومِن مأساتهه امتدّت مآسينه
----------------
حِجبوا كل حقايقهم عن الأجيال
والتاريخ كتبوه ابْقلم دجّال
صُفَت امّتك يل هادي اعلى هذا الحال
ما تدري الطريق لسُنّتك وينه
----------------
عقيل الكاظمي

الاداء ملا احمد السالمي

استشهاد الرسول الكريم ص
بالحزن نجريها الدمعه _ هالليله نواسيها البضعه
◇◇◇◇
ليلت حزن ليلت نوح
كلب ام الحسن مجروح
وياها يبجي حتى الوح
كلشي بجه اله ونعه_هالليله نواسي البضعه
◇◇◇◇
يافاطمه يم الحسن
شو كلبج اليله انطعن
مهضومه ودموعج حجن
والكون تغير ابوضعه _هالليله نواسي البضعه
◇◇◇◇
ياناس كالتها النبي
مسموم ياشيعه اكتبي
وبفكده كمت احبي حبي
وبيه ضاكت الوسعه_هالليله نواسيها البضعه
◇◇◇◇
عكب النبي آه شجره
حيدر الطاغي مرمره
وبداري النار موجره
وبعد خبرهم اسمعه_هالليله نواسيها البضعه
◇◇◇◇
يابويه ضلعي انكسر
وابيتي فوكاها انصطر
مايسوه يابويه العمر
وياك الامان انودعه _هالليله نواسيها البضعه
◇◇◇◇
بعده النبي بالمغتسل
يابويه والحق انقتل
وعلينه يتجاسر نذل
وحنا المخلوقه النا السبعه_هالليله نواسيها البضعه
احمد السالمي
◇◇◇◇

الاداء ملا احمد السالمي

قصيدة أستشهاد سيد الكون سيدي ومولاي أبا الزهراء محمد صلى الله عليه وعلى آله


دفنوني وياه شلون أحمل الآه
خلوني يمه وخل أشمه وأبچي سكته
هايـل تشيعـون لا لا تسرعـون
بعيوني حسره وأرد أخبره بحال بنته

<> ➖ <> ➖ <> ➖ <>

أنـه صغـيـره والـهـجـر مـابـيـه حيله
والـدللانـي اليـوم رايـد يـگضـي ليله
وين آنه أشوفه ومن زماني أشتكيله

يضل گلبي يشتاگ ياذيني الفراگ
متعوده أشبگه وجفني أطبگه لو شبگته
هايـل تشيعـون لا لا تسرعـون
بعيوني حسره وأرد أخبره بحال بنته

<> ➖ <> ➖ <> ➖ <>

گولولـه فاطمة الزچيه أحچايـه عدها
ذيـج الليالي الحلـوه گـلولـه أشيـردها
يرضه بمكان البوسه دمعات أعلخدها

كل عمري أوياه مو سهله وأنساه
كل ذكرى منه بصدري ونه من خسرته
هايـل تشيعـون لا لا تسرعـون
بعيوني حسره وأرد أخبره بحال بنته

<> ➖ <> ➖ <> ➖ <>

راح أدفن الفرحه ودلالي أبيت الأحزان
ومن أرجع بآه ودليلي يرد خسران
ثوب أسود مطرز خساره ويبقى نيشان

مو سهله عالروح من والدي يروح
وأصبح يتيمه والهضيمه يموت شفته
هايـل تشيعـون لا لا تسرعـون
بعيوني حسره وأرد أخبره بحال بنته

<> ➖ <> ➖ <> ➖ <>

مـو غالي عمري چان أبويه هوه غالي
عود آنه أودعه ماخطر يـوم أعله بالي
أبچي أعله حاله لو بعد أبچي اعله حالي

يابويه مسموم ومتغيره الرسوم
ويـوصي بيـه والمـنيـه بسرعه أجـتـه
هايـل تشيعـون لا لا تسرعـون
بعيوني حسره وأرد أخبره بحال بنته

<> ➖ <> ➖ <> ➖ <>

ويلي أعله گلبي لو طفح شوگي وحنيني
وسنيني من تخلص عذاب ومايجيني
لو حرگوا الباب وأجت صطره أعله عيني

من يخلص اليوم من باچر الگوم
ينكشف سرها وكل غدرها إلي علمته
هايـل تشيعـون لا لا تسرعـون
بعيوني حسره وأرد أخبره بحال بنته

<> ➖ <> ➖ <> ➖ <>

للشاعر الحسيني علي القريشي