ناجي القرناوي....

تمشي اشلون يالمصطفى
ينعه الكون يالمصطفى


بقلم ....رعد الجريخي

ابوذيات لاستشهاد النبي الاكرم محمد ص

         اعله ابو الزهره دمع العين ينسال
         وگلبي  عليه  من  الهضم   ينسال
         وينه  الگال  يهذي  اعليه   ينسال
         خصمه بالحشر سيد البريه

#######################

        سيلي  يادموع  الحزن   تنصاب
        وعلى سيد البشر هليوم تنصاب
        عگبه فاطمه ابچم سهم تنصاب
        بسبب بغض السقيفه وآل أميه

#######################


        فجيعه وصابت الأمة  نبينه
        وحسافه بالغدر ينسم نبينه
        خصيمه  بالحشر  طه  نبينه
         ابجهنم مقعده وناره سريه


#######################


        أبابك يبو الزهره العدو وجر
        كومة حطب جاب ونار وجر
        الباب ابدفع نوبه ونوبه بالجر
         ابجفه وهشم اضلوع الزجيه

######################



الشاعر علي غني الصفار الحلي

الاداء ابو هاشم الربيعي

نعي
الزهراء ع اتخاطب رسول لله  ص


يـبـويـه صـورتك بـالـعـين    ظـلـت والــدمـــع جـــاري
تـمـنـيـت انــدفــن ويــــاك    يـغـالـي ورحـمــة الـبـاري
أيـــام الــفـــــرح راحــــت    وبـگـيـت اتــلــوّع بـنـاري
يـالـهـادي اشـبـقــه عـنـدي    ريـتـك تـســمــع اخـبـاري


بـدمــوع الـحــزن ظـلـيـت    يـبـويـه وصـورتـك سـلـوه
اطـيــوفــك تـمـر عـالـبــال    وذيــچ  ايـامـنـه  الـحـلـوه
عـفـتـنـي بـلـوعـتـي بـويـه    و گـلـبـي بــنــارك اتــچـوه
مـا ٱريــده الــعــمــر بـعـدك    يـغـالـي وابـــد مــا يـسـوه


يــتــيــمــه بـغـيـبـتـك انـه    وجـنـاحـه الــحــزن مـــده
دارك مــوحــشــه وظـلـمـه    فــجــئــه ونــورك اتــبــده
افــراگــك جـــرح روحـــي    والــحـيــل الــبُــعــد هــده
أتـــذّكــــر چـــنــت ويـــاك    حــلــوه وغـالــيــه الگـعـده

                           *---------------*---------------*

✍خادم الحسين ع
الشاعر رعد الجريخي

الاداء ستار الصالحي

فزاعية للرسول ص الشاعر قاسم الساعدي المندلاوي
*****
يا أبا القاسمِ قد أضحى العداء
للذي خالفكم خيرَ رداء
*****
يا أبو الزهره اليضدونك علن
منهم الإلحاد والشرك انعلن
خالفوا قانونك وكل السنن
نَكَثوا العهدَ وميثاقَ الولاء
***
اتعاهدوا عالباطل وبصعب ظرف
فعل غادر أله ما يوجد وصف
بس غبت يا سيدي الباطل هتف
بايعونا نحن أصحابُ الوفاء
***
گالوا القرآن هوه افضل حكم
بين دفاته نهج حر انرسم
انجمعوا ابأرائهم أدوا قسم
وعلا للغدرِ للظالم لواء
******
أخذوا الناس ابخديعة وبمكر
وهاذي أول سابقه نحو الخطر
ألهم ايحسبونه نبراس وفخر
حُكمُهم أضحى لنا أقسى بلاء
******
باب ضد هالعتره مولاي انفتح
وصار يوم المؤتمر أصعب جرح
ومبدأ الحق ابعناوينه انذبح
أثكَلوا أمَهمُ خيرَ النساء
******
كسُر ضلع الفاطمه أول عمل
منهم ومهضومه وافاهه الاجل
هالفعل ينحسب من عدهم عدل
حِفظُ دينِ المصطفى كان الغطاء
****
وبالتأمر طاح ابو الحمله غدر
ابسيف المرادي تنفذ هالامر
والحسن چبده الطهور اصبح وذر
قد قضى بالسُمِ نسلُ الأتقياء
****
وبعد شاهد واقعة يوم الطفوف
صار ضد حسين هالعسكر الوف
وذروه عطشان وبحد السيوف
وَارتوت اسيافُهُم منه دماء
*****
إنته أفضل مكرمه من الأله
فاز كلمن إنته نوره ومقتداه
وخاب من للباطل ايرفرف لواه
ورئا الباطل في أهلِ الكساء

الاداء جواد الغرباوي

🔻استشهاد الرسول الأعظم
محمد صل الله عليه وآل وسلم

الزهراء عليها السلام
ظلم 💔
ـــــــــــــــــ ❁ ❁ ❁ ــــــــــــــــــ

ظلم  .. بعدك يبويه بكل حقد داري يحركون
ظلم .. ما تطفه ناري بغيبتك وتصب العيون

واطفيها ناري بدمعتي
واشكيلك انه بحسرتي
بعـدك شفت يا خيمتي
ظلم ..

ـــــــــــــــــ ❁ ❁ ❁ ــــــــــــــــــ

يابويه فگدك من رحت شمسوي بيه
مـن غمضت عيـنك تـره دارو   عليه
بابي احترگ والنار اجت حرگة اديه
ما رف ابـد الهـم گلب وگالـو خطيه

حچي.. يابويه شحجيلك بعد بعيوني دمعي
حچي.. حرمه ويتيمه بلا ابو وما اكدر ادعي

ريتـك تشـاهـد حالـتي
واشكيلك انه بحسرتي
بعـدك شـفت يا خـمتي
ظلم ..

ـــــــــــــــــ ❁ ❁ ❁ ــــــــــــــــــ

لمـن وگع مـني الطفل وبخـدي سطره
ماعايـش ايامه وخـلص بالعتـبه عمره
كلما يجي ابالي اختنگ تخنگني عبره
ذبلنـي يـابويه الـوكت عايـفـني زهـره

متت.. ذبـلانه ابقـه بروحتك ظل عودي محني
متت..يابويه اجوني بكل حقد كسرولي غصني

بفگدك متـت ياشجرتي
واشكيلك انه بحسرتي
بعدك شفت يا خيمتي
ظلم ..

ـــــــــــــــــ ❁ ❁ ❁ ــــــــــــــــــ

يالكاسر جناح الگلب كسـره شيضمده
ذابحني يـا بويه البعد چـي  ماكو رده
مجبـوره ظـميـت الدمـع عـالخـد تبده
مثل الحمامه بچف طفل ما منه شرده

خنگ.. بجفـوفه يكسرلي ضـلع لمن خنگني
خنگ.. خلاني اطيحن عالارض لمن سطرني

انه طحت مـن سطرتي
واشكيلك انه بحسرتي
بعدك شفـت يا خيمتي
ظلم ..

ـــــــــــــــــ ❁ ❁ ❁ ــــــــــــــــــ

هم شايف بنية نبـي وكسـرو ضلعها
وتنـادي يافـضه بقهـر مـحد سمـعها
معقوله ما كسرة كلب جف الصفعها
مقهوره ويظل عالوجن ينزل دمعها

تهل .. دمعاتي مـن بعـدك نهر مايهده يجري
تهل .. يابويه بس نوح ودمع خلصته عمري

ودموعي حفرت وجنتي
واشكيـلك انـه بحسرتي
بعـدك شفـت يا خيمتي
ظلم ..

ـــــــــــــــــ ❁ ❁ ❁ ــــــــــــــــــ

ابشع جريـمه تسجلت يوكع جنيني
كلـما امـر بالباب احس يكثر ونيني
ما اريد اشوفن عتبته اعميها عيني
يابويه ردتك بالحلم اغـفه وتجيني 

حلم .. يالشوفتك صارت حلم اغفه واشوفك
حلم .. يا ريته ما يخلص ابد ما اريد اعوفـك

ما اريد افز مـن نومتي
واشكيلك انه بحسرتي
بعدك شفـت يا خيمتي
ظلم..

ـــــــــــــــــ ❁ ❁ ❁ ــــــــــــــــــ

خلينـي اشمك ياهـوه واترسها ريتي
يا نسمه مـن صوب الكبر لمن اجيتي
حملتي ريحة والـدي وبيـها اعتنيتي
يا نسمه بنفاسي اختنگ لمن مشيتي

هوه .. ما اريد اشم نسمة هوه ما بيها عطرك
هوه .. لمـن يجي ردته يمـر بويه اعلـه كـبرك

عطرك اريـده بشهگتي
واشكيلك انه بحسرتي
بعدك شـفت يا خيمتي
ظلم..
ـــــــــــــــــ ❁ ❁ ❁ ــــــــــــــــــ

🖊️كلمات

عباس فاضل الشمري

الاداء جواد الغرباوي

قصيده بحق الرسول الكريم (ع)




الليله الزهره اتودعه
واعله الوالد تنعه
وتنادي بيا دمعه
يابويه    يابويه
١

العاشت روحه بين الناس گعدت يمه بالدمعه
الزهره اتگله احچي وياي خل اشبع حچي وانعه
يسمعها ويحس محتار الزهره ورايده اتسمعه
يحرك بيها صوته احساس أبوها گبل لتودعه

تنظرله وتتأمل
وتشم بي لا ترحل
ابنيتك ما تتحمل
يابويه    يابويه
٢

خل نسمع وحي الارواح من تتلاگه حنيه
الزهره والنبي روحين يتلاگن ابفد  نيه
لا تحرمني نظراتك يبويه وعاين اعليه
خليني بوداع الموت اشبع منك اشويه

بين وداعك روحي
تنزف گام جروحي
ادري تحس بنوحي
يابويه يابويه
٣

النبي حاچاها آخر صوت ويعاين مدامعها
راد الدمعه يمسحها بخدها وأيده يرفعها
رفعها وذكر چف ملعون الخد الزهره يصفعها
بين الباب والحايط لمن گام يدفعها

ودموعه التجاره
تنظرله ومحتاره
اتگله وتسعر ناره
يابويه    يابويه
٤

خاف ايسولف الأخبار ألها ويشرح بعبره
خاف ايجيب طاري النار والباب وألم عصره
خاف المحسن ايمر  بيه ويحچي عنه ويذكره
ضل ساكت وينظر  گام الخدها ويذكر السطره

ما راد ايأذيها
يدري اشصاير بيها
والزهره يحاچيها
يابويه    يابويه
٥

سلم للقدر مابين روحه من الجسد تطلع
و روح الزهره عالمسموم بين الآه والمدمع
آخر كلمه نتلاگه گلها وفاطمه تسمع
وعيون النبي بحسرات ألها ايعاين وتدمع

عاينها بنظراته
ويهلن دمعاته
ودعها بحسراته
يابويه    يابويه





لاتنسون والدي ووالدتي وأبني عباس من الرحمه والغفران
خادمكم رياض الرسل الجابري

الاداء جواد الغرباوي