وحيده بدارهم والضيم ياحالي 

ــــــــــــــــــــــــــــ

راحو ماخذوني ولا علي نشدو
من غبشه فجر برحالهم شدو 
لا طارش ولا مكتوب الي ودو
هلي لطف مشو والبيت ضل خالي


..........

وين اهل  المحنه  الحلو  ملكاهم
تسوه الدنيه عندي الكعده وياهم
انطر نصين  كلبي  بيوم فركاهم
وضلت بس دمعتي بعيني تلالي


...........

راحو ونكضت ايامنه الحلوه 
الدنيه بلا اهل وخوان ماتسوه
شوف فراكم يحبابي اشسوه 
مكسورة ضهر والدمعه تبرالي 

......

وين اهل المحنه وذيج كعدتهم 
وهم ترجع بعد للدار لمتهم 
راحو من اديه ولا خبر عنهم 
وجن فراكهم تاليته جتالي 

..........



الشاعر 
مصطفى الحسني

ألحان ناجي القرناوي.جديد ..

وحيده بدارهم والضيم ياحالي

بقلم ...مصطفى الحسني

رئيسية ....العليله عليها السلام


كون يمچ تبقى دوم العافيه
لمّي يا عمه الدموع الدافيه
يا عليلتنه... اطويله رحلتنه...2
  يا عليلتنه
.....
يا ريحة هلي و اسمچ اسم امي
عمْتچ زينب آنه اتگرْبي يمي
بدال اهدومچ ادموع الحزن لمّي
تره وضعچ يزيد الهم عله همي

هاي رحلتنه أظنها اطويله
وانتي ياعمه تراچ اعليله
ما تحمليها... موتتچ بيها
يا عليلتنه
.....
تعاي وخل انشف دمعة اعيونچ
واعذريهم عمامچ ما يركبونچ
تره اليسبونه حتما ما يرحمونچ
وعليلة انتي واخافنهم يضربونچ

عن بقائچ عمه لا تشكيلي
وينچ اوين السبي گليلي
ما يرحمونچ... من يضربونچ
يا عليلتنه
......
اذا باچر توّلّونه وتفرهدنه
اضمچ وين لو بأرض الفله اشردنه
واخاف اعليچ لو بالظلمة مگعدنه
واذا صابچ عطش والماي ما عدنا

هالمصايب انتي لو شفتيها
وي رقيه يصير موتچ بيها
تزيد آهاتچ... فوگ مأساتچ
يا عليلتنه
....
الحنين يموت لو عنه مشوا اهله
لچن تصعب يعمه اعليچ هالرحله
ومصايبها التدور اعلينا مو سهله
للتوديع اخذي من الابو مهله

گبل لا تعمي البواچي اعيونچ
تزودي من شوف اليحبونچ
لو مشوا عنچ... ما يخف حزنچ
يا عليلتنه
......
لا تبچين ويزيد المرض علْتچ
كون يصير وسط اعيوني چا شلتچ
وابضعن الفواطم بيدي حملّتچ
لچن  مسبيه ويّاهن تخيلتچ

بالسبي يا عمه تنسل روحچ
وين ما رحتي السياط تلوحچ
عوفي احلامچ... حيري بآلامچ
يا عليلتنه
......

الشاعر الشاب حسام ناجي الحلي




ليلة ٣/محرم الحرام /١٤٤٦هجري
الأربعاء 10\7\2024
#قصائد__محرم_١٤٤٦_ه‍

بصوت خادمكم الرادود ابو هاشم
الربيعي

قصيدة...<  > بحق السيده فاطمه العليله ع


اول مكاتيب الحزن ....ظلت عليله ابدارهم ...
اول مكاتيب الحزن.... ماتدري شنهي أخبارهم ...
*
عافوا ثريه من النجم
يوم الي حاديهم سره.
نادت مجافيهم دمع
عدكم عليله مناطره.
يابويه ما تدري العصر
وحشه ابمنازلكم تره.
ارسم على الحايط صور
وتسله وي ظحكاتكم..
اول مكاتيب الحزن.... ظلت عليله ابدارهم
---------------------
طفوا الشمع خليني اون
ما ادري ضي عيني طفه.
اخذوني خرخاشه طفل
لعبدالله اصيرآ لو غفه.
اخذوني سالوفت درب
لو چلچل الليل وصفه.
يابويه ممشه ولا رچب
مابيهه حيل اغيابهم..
اول مكاتيب الحزن..... ظلت عليله ابدارهم
--------------- --------
يابويه مو تدري الورد
يوكع اذا جافا النده.
محتاره ومضيعه الفكر
ما ادري العليكم سده.
هدهد سليمان ورجع
وانتم ولا منكم بده.
يعرابي اخذ مني العتب
سلمه الهلي بمصارهم..
اول مكاتيب الحزن .... ظلت عليله ابدارهم
-------------------
مصباح عاشر من وصل
مكتوب من عد فاطمه.
وحسين واكف وحده
لأمن اخوته ولا حمه.
يقرأ بمكاتيب العتب
امناشدها عنهم المه.
ما تدري بالصار وجره
نذروها لله اعمارهم..
اول مكاتيب الحزن .... ظلت عليله ابدارهم
---------------------
يفرش ضوه اعيونه الدمع
ضل واگف وشايل عزم
هدو عليه چنهم درو
ثاري العده عدهم علم
جر صارمه وبيه انتخه
يجرف مثل سيل العرم
ديدن علي بيه انوجد
لاذو جبن بكتارهم
اول مكاتيب الحزن ... ظلت عليله ابدارهم
------------------ -------
زينب مشت للعلگمي
گبل المسيه ولا مست
تتعثر امضيعه الدرب
صاحت يعباس وبچت
ترضه اختك ابنص الزلم
لا نامت ولا هودت
اگعد يدردام الحرب
خل نايحه بديارهم
اول مكاتيب الحزن ... ظلت عليله ابدارهم
------ ---- ---- ---- --- ---
ناده عليهن يلله خل
نمشي وراچن چم سبي
ركضن مثل ركض الگطه
مالحگن لبس العبي
وحده تركب عل الهزل
وحده تشم نحر الولي
بهدومهن ريحت حرگ
يشكن لربهن نارهم
اول مكاتيب الحزن .. ضلت عليله ابدارهم
---------------------------------------------------

كلمات
حسن الجحيشي

قصيدة الى مولاتنا فاطمه العليله

حيل تعبتك يكلبي وياهم
راح اموتن من كثر فركاهم
عيني عله الباب // واترجه الاحباب

بدمعي اخط كمت المسافه    واذرع بشوكي الدرب
ذابت اشموع انتظاري    وفرحتي انباكت غصب
يازمن ليش الاحبهم          راحو الديرت غرب
هاجرو وبعدو عني       وضلت ادموعي تصب
ليش المفارك اعز احبابه
تكثر اجروحه ويهيج اصوابه
عذبني الغياب // واترجه الاحباب

انه يا كلبي العليله        الفرفحت مثل الحمام
جنت اعوفن حضن امي     وبحضن زينب انام
فوك خدي انتفض دمعي   اوسوت اشواكي اعتصام
وفاضت بروحي المشاعر   واعجزت عن الكلام
هاي ما جانت يكلبي ابالي
ينذبح حلمي وتخيب آمالي
شيفيد العتاب // واترجه الاحباب
*
اهلي عافوني وحيده    وانطر اضعون السفر
جان كل ضني يجوني   وللاسف محد حضر
فاركوني اعزاز كلبي   وشاب راسي امن القهر
نار المصايب جوتني   ودمعتي راحت هدر
وين ابوي الجان يتلكاني
ليش راح وانتضر خلاني
متصوبه اصواب // واترجه الاحباب
*







افرشت سجادت صلاتي   وحاله جانت حالتي
وندعيت الله بحنيني    وكامت تصب دمعتي
جم حلم ميت لكيته       اباب عتبت صفنتي
اشلون انام اليل مدري   والله حيره حيرتي
جني بالدنيه فلا موجوده
العدها ابو ثاري صدك محسوده
ضل دمعي سجاب // واترجه الاحباب

اصبحت دار اهلي وحشه   وخيم اعليها الحزن
وضهري من كثر المصايب    انحنه مثل الغصن
من مشو ماتت ضحكتي   وما غمض لحضه الجفن
ليش المفارك حبيبه    براحه يشعر من يون
انه من الدنيه خوفي اعليهم
بروحي لو بيدي يصح اشريهم
عافوني الاطياب // واترجه الاحباب
*
اشتهي كلمت تعالو    كمت من كد ما الح
غصت اعيوني بصورهم   والجرح خلف جرح
شوغت المخنوك تكتل   مثل طير بلا جنح
كون اشمهم هوه اعذيبي   واشبك بشوكي الصبح
اهلي بديار الغرب خلوني
ليش كلولي نجي وما جوني
ولا ودو اكتاب // واترجه الاحباب

تمت
تحسين الخفاجي

الاداء ملا مسلم الكلابي

محتام الگلب ويريد ملگاهم
راحو والنواظر راحت وياهم
محتام الگلب..


محتام الگلب ينشد على احبابه
ما منهم خبر ويهود مصابه
چم غالي وعزيز الطول غيابه
الراحو كل اهلها وين تلگاهم
محتام الگلب ويريد ملگاهم


ياهو الها البگت من دون واليهه
ومن الناس ياهو الينشد إعليهه
لو ظلت تظل هيه وبواچيهه
وكلما عاينتهم بالجفن ماهم
محتام الگلب ويريد ملگاهم


كلما عاينتهم خالية عيوني
يالما گالهه الله هنا يخلوني
ما ظني بسفرهم لحظة ينسوني
درب البي مشو لاوين وداهم
محتام الگلب ويريد ملگاهم


لاوين المشو يا ناس عن عيني
ما منكم على احبابي اليدليني؟
لليلفي بخبر خل ياخذ سنيني
سنين الي بگن والروح تفداهم
محتام الگلب ويريد ملگاهم


افدي سنين عمري الجايب بشارة
وراعي البيت يصبح وانه خطاره
لو گال التركني راجع لداره
افرش هالگضت بدروب ممشاهم
محتام الگلب ويريد ملگاهم


افرش لو لفوني إعلى الدرب روحي
وبيهم تشفه ريت المنهم جروحي
بس خلهم يجوني وينگطع نوحي
خلص هالصبر والروح تنعاهم
محتام الگلب ويريد ملگاهم


✍️منير السعد

#محرم1446هـ

فاطمه العليله


رساله .. ودّو الحبيبي
رساله .. ابدمعي ونحيبي
بعد التحيه والسلام
گلوله شخبار الخيام
رساله
ــــــــــــــــــــــــــــــــــــــ
مساكم الله بالخير
عدكم طفل مثل الطير
چان اشحلاته

ما ادري بخبار الراح
مرتاح لوما مرتاح
اشصار بحياته

شو جاي اشم ريحة نار
گلولي بالطف اشصار
استر هلي ياستار
ورجع الغايب للدار


اتاني .. منهم بشاره
اتاني .. بس ابحراره
ماتحمل اسكينه الظلام
گلوله شخبار الخيام
رساله
ــــــــــــــــــــــــــــــــــــــ
مساكم الله بالماي
يالعطشيتوني اهواي
بس ابقه احبكم

يوميه اشم عطر ارماد
مثل الهوه رايح راد
يمشي ابدربكم

من رحتو راح اچم حيل
وما نعست عيني ابليل
يوصلني يم باب الدار
ترس الاذن صوت الخيل


لچمني .. صوت الحوافر
لچمني .. هـل من مناصر
معقوله ظل وحده الامام
گلوله شخبار الخيام
رساله
ــــــــــــــــــــــــــــــــــــــ
مابين الاربع حيطان
ساجني وانته السجان
واقيودي دمعه

الحضنك يبويه اشتاگيت
حكّتني أذاني وحنيت
صوتك اسمعه

نذراً عليّ يالعطشان
لو موعد ارجوعك حان
كل يوم اثوبلك ماي
واطلع واحني البيبان


تجيني .. كون ابسلامه
تجيني .. بس بابتسامه
وابحضنك اتلم الحمام
گلوله شخبار الخيام
رساله
ــــــــــــــــــــــــــــــــــــــ
الليله الگمر مابي نور
بس لا بو فاضل مطبور
طمنوني عنه

اتمنه هسه العبّاس
بچفوفه يمسح عالراس
بس ابمحنّه

من عمي جيبولي امراد
الليله الالم بيه أزداد
ايطيبني بس شي واحد
رجعولي اخوي السجاد


عليله .. وانتم شفائي
عليله .. وهذا بلائي
جيبولي زينب خل انام
گلوله شخبار الخيام
رساله
ــــــــــــــــــــــــــــــــــــــ
سلمولي عالعلويات
گلولهن مشكورات
عفتني وحدي

ماقصّر اوياي احسين
عالناگه اصعد مرتين
وايگلي ردي

حادي الضعن يمشي ابساع
والطفله مومال اوداع
طيّحني رجّاف الخوف
گطرة مطر فوگ الگاع


وحيده .. والوحده صعبه
وحيده .. والدنيه غربه
وادموعي عالخد ازدحام
گلوله شخبار الخيام
رساله
ــــــــــــــــــــــــــــــــــــــ
وحده الحسين بعاشور
وحس بگلبهه المكسور
من فارگوهه

يقره ابرسالتهه ابشوگ
محروگ حن المحروگ
ابنيه وابوهه

يركض اجه عالخيمات
والتمّن العلويات
كَلهن عليلتنه اتگول
بيتي انترس ملايات


نواعي .. يوميه عندي
نواعي .. امن الغبشه تبدي
ياريحة اهلي والعمام
گلوله شخبار الخيام
رساله

#محمد_الجماسي

#اللهم_عجل_لوليك_الفرج

#محرم1446هـ



ماظن    يردون
غمضت العيون
ماظن  ينام  الفارگ اهله
يا  نومت  المشتاگ  عله
ماظن    يردون

---------------------------------------

كل ظني اروحن ويه الضعون
ظليت     أصدن     لليحملون
عباس  حضر  ناگه لم    عون
ظلو  هلي  أگبالي     يشيلون


ومتانيه   ،، أني    وهدومي     متانيه
ومتانيه  ،،  چلمة ال گومي     متانيه
ما باچيه ،،  مخنوگه   بس   ما باچيه
ما حاچيه ،،  بگلبي النعي وما حاچيه


گلبي  انكسر    من   ظلو   أيودعوني 
وانه انظر   الهم   والدمع      بعيوني
مو    بتكم    آنه اخذوني    لتخلوني
لارض    العراق     هنانه    لتعوفوني

شيحمله    الفراگ
حتى النفس ضاگ
يا  دنيا  بعد  حسين تحله
يا   نومت   المشتاگ  عله
ماظن   يردون


----------------------------------------


يمشون    گام     زغار     وكبار
وانه   ابچي  والدلال     محتار
ترضون  أظل    بوحشة   بالدار
ها  يلمشيتو    أبتكم     اشصار ؟

يعيوني   ،،  اعمن     بعد  يعيوني
يعيوني  ،،  اهلي  ومشو  يعيوني
خلوني   ،،   بداري  وأون  خلوني
خلوني    ،،   محد  ألي     خلوني

بويه   ومعزتك    مالي   حيل  الفرگه
مصدومه  ما  تاخذني  ماني  مصدگه
بويه  ابمحنتك   گلي بس  وين   الگه
من  هسه  اموتن   ما  اظل   مختنگه


يا  وحشة   البيت
من الفرگه   ونيت
شله الغريب بروحه  شله ؟
يا  نومت   المشتاگ  عله
ماظن    يردون

--------------------------------------

سار  الضعن   لارض  البعيده
وگليبي   گام  ايشيل    بيده
يهلي   التركتوني      وحيده
ظليت  دمعي ونوحي اعيده

ترضوهه ،،  وحدي انترك   ترضوهه
ترضوهه ،،  حيل اختنگ   ترضوهه
معقوله   ،،   محد    ألي     معقوله
معقوله   ،،   راح  الضعن    معقوله

كلمن    تروح   وياهه    كافل  غالي
تصعد  على  الناگه  وتروح    أگبالي
وآنه    العليله    الظلت   بلا     والي
هالبيت   بعد  الفرگه  ما      يحلالي

ما  احمل  أبعاد
زاد  الالم    زاد
خله  البعد يا  روحي  خله
يا   نومت     المشتاگ  عله
ماظن   يردون

--------------------------------------

حل    الظلام    بديرة    حسين
ماشين  اهلنه    بعيد     ماشين
راحت   شمسنا   وهلت    العين
دار   الفرح      لا  دار      الونين
 
وابچيلهم ،،  أدعي  لهلي   وأبچيلهم
وابچيلهم ،،  ارفع   أدي    وابچيلهم
وادعيلهم  ،،  بعيني الدمع وادعيلهم
وادعيلهم  ،،  أبچي المسى وأدعيلهم

صعبه اليتركونه  ومرض روحه   يزيد
ميشوف  راحه  وگلبه  ما يرضه  يهيد
شتفيد    دنيا  بلا     أهل     لا   متفيد
يتمنى  موته  اليبقى  بالدار      أوحيد

يمخرب   الگلوب
يا شوگ  الغروب 
ظل    بالعمر    أيام      قله
يا   نومت     المشتاگ  عله
ماظن   يردون

--------------------------------------

بيت وصبح خالي من  الاحباب
غياب     أهل      البيت    غياب
جرح  البعد  لا  ما  برى   وطاب
ظل  الگلب      والعين     علباب

لا  عافيه   ،،  لا من خبر     لا  عافيه
لا   عافيه   ،،  لا  من  متت  لا عافيه
ما دافيه     ،،  راح  الابو     ما  دافيه
ما  دافيه    ،،  بروحي البرد  ما دافيه


كلش    بطو    والروح    تنشد     عنهم 
ياهو     اليودي    العين   رادت    يمهم
بتهم  ترى  ومحتاجه  روحي   اتشمهم
كلهم     ردتهم    يمي    راحو       كلهم


والعين  شتريد
والدهه   البعيد
مشتاگه   بس  ياهو    اليگله
يا   نومت      المشتاگ   عله
ماظن   يردون

كلمات الخادم /  #رعد_الفريجي
محرم الحرام  1446 للهجره
ثوابها الى روح والدتي