شوط كربلائي ( للخدام)

مشينه احنه اعله درب حسين ومشينه بشوره وبامره
وهاي الخدمه والخدام برعـــاية فاطمـــه الزهــــره
_______________________________
من حسين شفنه هواي بس مانحچي للوادم
عجايب موقليله هواي بين حسين والخادم
مايعرف شنو الخدمه البهلخدمه ماهايم
وميهمنه اليريد ايلوم خلي يلومنه اللايم

ميهمنه الحچه اعلينه
يعمي بهمنه خلينه
المهم حسين راضينه
تسوه الدنيه ياهالناس من حسين لو نظره
________________________________
حسين الشالنه امن الگاع فوگ الغيم خلانه
الخادم عادتاً مذلول بس حسين علانه
گبل چنه احنه المتيهين بس بالخدمه دلانه
دنيا واخره ياناس حسين الواگف ويانه

بالمحشر يحامينه
وبالدنيا يدلينه
حسين وما يخلينه
دنيا واخره ياناس حسين الخادم ايحضره
________________________________
كلشي بهالعمر عفناه وعقدنه لهالامر نيه
وعمرنه صار ياهالناس محرم واربعينيه
كلشي يهون بس همنه خدمتنه الحسينيه
مانحضر عزاء اشلون وزينب تمشي مسبيه

انطينه بهالدرب كلمه
ابد منعوف ابو اليمه
وهنياله الكتب اسمه
بسجل حسين ابو السجاد وفاز بخدمة العتره
________________________________
متفضل علينه هواي من خدام صرناله
اليكنس واليوزع ماي الشاعر والي يقراله
هنياله اعله هالخدمه سبع مرات هنياله
هايه نعمة النعمه نقطه يحطها في باله

حسين وعشنه من خيره
ونمشي بفخر تقديره
ونحبه ومانحب غيره
نضل وياه لحد الموت ولاماتطفه هالجمره
_______________________________
بس الخادم ايحسها لذة خدمته هايه
بمحرم روحه مشدوده ويه شدة الرايه
روحه تذوب بالمجلس لمن يسمع اقرايه
ونظره ايتاني من حسين عنده هاي اهم غايه
حسين وكلنه طوع امره
منه انتاني بس نظــره
ونظرة فاطمه الزهـــره
واليوم الحشر ياناس تضل بصدورنه العبره
_______________________________
✍️احمد علي البغدادي
محرم الحرام 1446 هـ

الاداء احمد علي البغدادي

ها  يروحي راحت أيامي الجميلة
هم يعود حسين لبنيته العليله
،،،،،،،،،،،،،،،،،،،،،،،،،،،،،،،،،،،
إي يروحي الورد لو گطعو ضواه
وش يفيده النده لو يكثر نداه
باچر إيرد الورد يحضن ثراه
ذابل إعلل گاع ويعاتب سماه


للضياع الدنيه تمشي للضياع
للوداع الورد حضر للوداع
إبخاطر المكسور عطره يشتكيله
،،،،،،،،،،،،،،،،،،،،،،،،،،،،،،،،،،،
ها  يروحي راحت أيامي الجميلة
هم يعود حسين لبنيته العليله
،،،،،،،،،،،،،،،،،،،،،،،،،،،،،،،،،،،
طفله وشلون بگليبچ حنون
ورده وتورد حياتچ من يجون
هاذه حالچ وين تالي بل ضنون
يبس عودچ خاف ايامچ تخون

للوصال إيحن دليلچ للوصال
إو عل دلال إينوح گلبچ عل دلال
يشهد الله اشلون دمعاتچ ذليله
،،،،،،،،،،،،،،،،،،،،،،،،،،،،،،،،،،
ها  يروحي راحت أيامي الجميلة
هم يعود حسين لبنيته العليله
،،،،،،،،،،،،،،،،،،،،،،،،،،،،،،،،،،،
ميته يا روح  تعانين إلمحن
كافي گتلچ ذاب. گلبچ ونسحن
هايمه  ليلچ  يغذيچ إبشجن
چم جرح ماطاب شو بيچ امتحن

بل ليالي إيضيج خلگچ بل ليالي
حزن عالي أحتله گلبچ حزن عالي
والسهر بچاچ بليالي الطويله
،،،،،،،،،،،،،،،،،،،،،،،،،،،،،،،،،،،
ها. يروحي راحت أيامي الجميلة
هم يعود حسين لبنيته العليله
،،،،،،،،،،،،،،،،،،،،،،،،،،،،،،،،،،،
فارگوچ احباب والفرگه عذاب
فوگ عينچ ليش بس واگف ضباب
للحرب راحو شيبان إو شباب
لاخبر ودو ولا جالچ كتاب

بل حنان احترگ رسمچ بلحنان
هلزمان الصعب يجرح هلزمان
إوهل نوايب هاي ماضنهه قليله
،،،،،،،،،،،،،،،،،،،،،،،،،،،،،،،،،،،
ها يروحي راحت أيامي الجميلة
هم يعود حسين لبنيته العليله
،،،،،،،،،،،،،،،،،،،،،،،،،،،،،،،،،،،
ها يروحي. الجرح شو سكته كبر
عل عليله الحزن لحشاهه عبر
إبنيه وحدچ والحبايب بل سفر
إو مايصح إدواچ شو چنه ندر

بل مرار العمر خلص بل مرار
عل ديار إيحوم موتچ عل ديار
إو چنه يومچ حان وتحضر رحيله
،،،،،،،،،،،،،،،،،،،،،،،،،،،،،،،،،،،
ها يروحي راحت أيامي الجميلة
هم يعود حسين لبنيته العليله
،،،،،،،،،،،،،،،،،،،،،،،،،،،،،،،،،،،


حيدرناصر شداد

أداء ملا عدي الربيعي

قصيدة للعليله ع


كاعدة بابك واتاني .. هلبت ايردك زماني

بويه بويه ..... بويه بويه

ماكلت عندي عليله بداري
هيج صارت ماتهم لخباري
ابد ماتطفئ يـــغالي ناري

ليش ابويه ماخذاني... هلبت ايردك زماني

بويه بويه .... بويه بويه


بويه من يوم الرحت اذيتني
سكته تالي اليل اون خليتني
شنهي ياغالي بعجل مـليتني

وحدي بفراكك اعاني... هلبت ايردك زماني


حيل مشتاكه تشوفك عيني
ياهو يمك يلـــولي يـوديني
وين الگه مثلك يـواسـيني

شلون اذا كلبك نساني...هليت يردك زماني

بويه بويه... بويه بويه


ياحنين شعطلك شو مــــااجيت
كون تدري ياحبيبي شكد بجيت
دورت مـــــــثلك يغالي مالگيت

وين الگه حسين ثاني.. هلبت يردك زماني


صورتك بعيوني ما انساها
وين ما التفت صرت الكاها
حيل توجع يلولي ذكــراها

دهري بفراكك رماني... هلبت يردك زماني


كلمات
الشاعرة هبه الموسوي
صاحبة ديوان "تراث الطف//حلم مذبوح"

كاعده ابالك واتاني
هلبت يردك زماني

كلمات الشاعرة/ هبه الموسوي

بصوت. مسلم المطيري

فاطمة العليله

كل البــنات اويه الابو  گعدن يلعبن
بس انه دمعـاتي على  خدي يصبن
يگولن.  هاي الماخـذوها
يگولن.  ماموجود ابوها
كل البنات
°°°°°°°°°°°°°°°°°°°°°°°°°

خيــــعون الابوهـا اويـاها ليليه
ويضمها اعله صدره الكله حنيه
الابو مثل الدعاء لوجبنه طاريه
خيمه وتســــتراح التگعد ابفيه

يوجعني گلبي اشما شفت اب وي بناته
چا ماخـــــذاني والدي اويه امــــدللاته
انوحن ـ  روحـي عـذبوها
انوحن ـ  والونه اسمعوها
كل البنات
°°°°°°°°°°°°°°°°°°°°°

اذا عـن الدلال ايســــولفن يمي
اذكـــر لمت اهلي اوالدي وعمي
يخلص ليلي بالون وغرگ بهمي
ليليه عليهم يحــــــــــترگ دمي

ياطفله مثلي اتعــــــذبت بفراگ اهلها
ومن شوفت عزاز الگلب گطعت املها
تناطر .. لكن ما اجــوها
تناطر .. بالدار اتركــوها
كل البنات
°°°°°°°°°°°°°°°°°°°°°

يجن يمي ويســـــألن عن اخياتي
وتكــبر حســـــرتي وتزيد لوعاتي
گلبـــي ايذوب امن اذكر عزيزاتي
ماضن طفله عاشت نص معاناتي

كل غايب الاهله رجـع بس انه أتاني
لارد ضعـــنهم لاخـــــبر منهم اجاني
يوحــشة .. داري المــا لفوها
بالاحزان .. مــن راحو ملوها
كل البنات
°°°°°°°°°°°°°°°°°°°°°°°

ما اطلــــــع والعب وي البحـــــلي
ماضل عندي واهس فارگت خلي
ارد مــــــن يستقر بينه الامر گلي
ولحد هسه ولا مرســـــال واصلي

ماادري شنهو العطله مرسال الاحباب
ضلـيت اركض عالهـوه لو حـرك الباب
يروحي .. حنت عل جفوها
يروحي .. كلش مرمــــروها
كل البنات
°°°°°°°°°°°°°°°°°°°°°

جفو نور البصـــر والدنيه خذلتني
على جمرة هجرهم امشي خلتني
تضعضع حيلي والحسبات سلتني
ومن كثــــر البواچي الناس ملتني

اتحير دليلي ونهظم عگب العزيزين
لايمي زينب لاعلي لا والدي حسين
بالوداع .. روحي حيروها
بالوداع .. عله چملـــــوها
كل البنات
°°°°°°°°°°°°°°°°°°

✍الخادم
كامل السعيدي

يوم العليله    نزال

ويلي ياجرح العليله  وحالها
طاح يم عتبت الباب اخيالها
،،،،،،،،،،،،،
طفله وبهاذ الوداع اتعذبت
ورده وبضعن الغوالي تعلقت
مارجع منكم خبر يهل البخت

طاحت ومحد اجاها وشالها
،،،،،،،،،،،،،
فاطمه وعاشت مصايب فاطمه
لوعت افراك وجرح يكَطر دمه
صرخه بيها اتفزز املاك السمه

ومايرد حسين يتراوالها
،،،،،،،،،،،،،
تعبتها الدنيه وفراكَ الأهل
لا نشد واحد عليها ولا سئل
طفله ماتدري بعزيز الله نجتل

دمعه ودموم انترس مرسالها
،،،،،،،،،،،،،
للأسف محد خذاها ويالضعن
مادرت ضلو اهلها ابلا وطن
دارت اعليها المصايب والزمن

تبجي سكته ولابشر يقرالها
،،،،،،،،،،،،،
ويلي ياجرح العليله شكَد كلف
دنيه غربه ومابقه واحد عرف
محد اليرحم وضعها المختلف

يهدم الدنيه الدمع وجبالها
،،،،،،،،،،،،،
شتاكَت العبدالله ولذاك المهد
وتستمع  كلمت  دللو  للولد
راحت ومايرجع الغالي بعد

باقي يم عبدالله كلش بالها

ابوفايز الزافضي

[[ خليني اودع حسين ]]




العليله ع مخاطبة الحادي الذي

سار بضعن الحسين ع





ريض يحادي الـنوگ   وگفّلي الضعـون
خليني اشبــع شوف  من حلــو العيون

ماخـذهم اللا ويـــن
خليني اودع حسين
◾◽◾◽◾◽◾◽◾◽

من امس گلبي لچمني وما دريت شضام
اثــــاري اليوم اكو مجافه وجفن مينـــام
اخذوني صـحت وارضــه بسبي وبشـــام
واتحـــمل اذيـــــة وحــــرگ مال اخيـــام

مانمت طول الليل   ومتحمله اشكال
وارقيــه انشدهـــا    الـــوالد شگـــال

وتگــــلي ماترحيـــن
خليني اودع حسين
◾◽◾◽◾◽◾◽◾◽

اباوع بالوجـــــوه واتنـــه الــيگلّي
ويانه يالعليــــله اهتمي واتوكــلي
بلايه وجــــه ابويه بدنيتي شـــلي
وانه بيه المرض يالحادي شمخلي

بحضينه انام الليل   ولطوله  اشتاگ
فوگ المرض والاه    چملــني الفراگ

وينه الـيونس العين
خليني اودع حسين
◾◽◾◽◾◽◾◽◾◽

يحادي اشبع ردت من ريحــة الجنه
و اوادع سلـوتي البيهم چنت اهنـــه
وطلب عندي ردت عبدالله اشوفـنـه
ويضــــل وياي ويونـــّســـني اتمـــنه

صبح ومسـه امن اشتاگ    عبدالله اشمه
بـس الزغيـــــر يمـــــوت    لو فارگ امــه

رحمـوني يالمـاشين
خليني اودع حسين
◾◽◾◽◾◽◾◽◾◽◾

من دون الخوات حسين عايفني
معقــــولة ابوي الـغالي ميــحبني
حگي امـــن الدمع لو بلـلت ردني
راح وعگبــــــه ياهـو اللي يدللني

يافطمه گلــي    بطلي نحيبچ
الاكبر نوديــه    يمنه يجــيبچ

يالحادي بيه اونــين
خليني اودع حسين
◾◽◾◽◾◽◾◽◾◽

ترضه ارجع يحادي مدنگه من الناس
ومهضومه ارد و بســكـته ادگ الراس
عيني بعين عـمي وانمليـت احــساس
اتنـطـــــر تعالـــي من حلــگ عبـــاس

شابـــگني وگــــلــــي   يبنيتي اسمعي
معلــولـــــه متگدرين  للبيــت ارجعــي


حاچيلي المغربـــــين
خليني اودع حسيــن
◾◽◾◽◾◽◾◽◾◽◾







         عبد العليلـه
✍حيدر ابو كيان الفاطمي

لطميه للعليله عليها السلام
على طور انخاج ياام البنين
للشيخ سعيد المعاتيق

المستهل👇👇

لاوين يهلي مسافرين
لاوين يهلي مسافرين

.❥✿┈┈• °{🌸} • ┈•✿❥

راحو لارض البلايا والمحن
عافو ابنيتهم بأرض الوطن
نادت الله وياك بدموع وشجن

ودعتك الله ياحسين
لاوين يهلي مسافرين

.❥✿┈┈• °{🌸} • ┈•✿❥

ارد اروح وياكم إنه لكربلا
والله فرگاكم ابد مااحمله
من ينشف لي دموعي الهامله

وعيوني حمره من الونين
لاوين يهلي مسافرين

.❥✿┈┈• °{🌸} • ┈•✿❥

ماسمعت بابو يعوف ابنيته
والگلب مهموم ويجر حسرته
جاوباها حسين وتهل دمعته

يابويه لاتتالمين
لا وين يهلي مسافرين

.❥✿┈┈• °{🌸} • ┈•✿❥

تحجي والدمعه على خدها تسيل
خل اروح وياكم اسرجلك الخيل
وافرش فراشك اذا هود الليل

بس لاتخلوني بانين
لا وين يهلي مسافرين

.❥✿┈┈• °{🌸} • ┈•✿❥

بويه لتخليني واتروح العراق
والهضم بگليبي ابدن مايطاق
هاي ارض الغدر وابلاد النفاق

ماعدهم ايمان ويقين
لاوين يهلي مسافرين

.❥✿┈┈• °{🌸} • ┈•✿❥

كتبت كتاب العليله بالدموع
تبجي عالحسين وإخوانه وتلوع
تگول گلبي والله بفراگك جزوع

انتظرك بشوگ وحنين
لاوين يهلي مسافرين

.❥✿┈┈• °{🌸} • ┈•✿❥

واعدتني يرجع الأكبر الي
وبيدة ياخذني ويعدل محملي
لااجه العباس ولا الأكبر علي

وگليبي مهموم وحزين
لا وين يهلي مسافرين

.❥✿┈┈• °{🌸} • ┈•✿❥

الخـ✍️ــادمه ام زيد الشمري

نسال •اللّـہ القبول
ونسالكم الدعاء بتعجيل فرج مولانا صاحب العصر والزمان عج.