گومي طوعه وندعيله     بعمه حيدر شدي حيله
اسم حيدر من يسمعه     يگلب السبعه عله سبعه
هذا مسلم     هذا مسلم
****    
لا فتى الا علي بالدنيه معلوم
ولا فتى بالكوفه الا مسلم اليوم
طوعه صاحتله الدرب بالخيل ملزوم
شد عليها وظل يذب الگوم عالگوم

غاصت الكوفه بأهلها      والشدد مسلم يحلها
والقصر رايد يقلعه     ويطبگ السبعه عله سبعه
**        
لبس درعه الهاشمي وضيگ لثامه
وبعد ساعه واقره عالكوفه السلامه
هذا يوم الموت لو يوم القيامه
صاح حي عله الحسين وعالكرامه

ما رجف گلبه وتردد    وظل ينادي يامحمد
ضاگت عليهم الوسعه     ويطبگ السبعه عله سبعه
*****
هاي وادم خانت وباعت ذممها
ولا تثق بناس ما حفظت قيمها
عليها مسلم صال والرايه لزمها
ظلت من الخوف تتدافع زلمها

عن امامي وديني اقاتل    خانته الودت الرسائل
خانته الگالت نتبعه     ويطبگ السبعه عله سبعه
**
الليله مسلم وحده حاير گومي شجعيه
وبمراجل عمه ابو الحسنين ذكريه
شرايح بهاي الزلم شيسوي شوفيه
وعلي مسلم وحده هذا الجيش يفنيه

ما تهمه هالكتايب     جنه جده ابو طالب
جيش كامل ما يرجعه      ويطبگ السبعه عله سبعه
***
نزل ووجوه الزلم خلاها صفره
علي صاح وظل يذب عشره عله عشره
هذا مسلم بالحرب محد يگدره
لو زعل مو مرحب العسكر يشطره

كلها ترجف من خياله      يشبه حسين بقتاله
والعهد بالدم يوقعه     ويطبگ السبعه عله سبعه
***
اده مسلم دوره بالكوفه بجداره
ومن برز چنه علي بدرعه وفقاره
حسين گله مسلم انطيك البشاره
ايصير گبرك اعله من قصر الاماره

يرتفع باجر مقامك    اهواي راضي عليك امامك
يدخل الجنه اليتبعه      ويطبگ السبعه عله سبعه
**
تمت
ميثم العمري

الاداء ملا امير الفتلاوي

للسيدة حميدة ع لسان حال السيدة زينب ع


گومَّن يا بنـــات حســـــين وَيَّايه
عدچن يم حميدة مجلس اقراية
و انـــتي يا رقية
شادود العــزية
ـــــــــــــــــــــــــــــــــــــــــــــــــــــ
مــن الكوفة مـــــرسال و خبر جانه
مسلم يبَس عـوده و ذبلت أغصانه 
ظلـــــــــت وردة منــه تمشي وَيَّانه
حميدة هواي گال حســـين حزنانة

مــــا بطلت مناحة تريد والدها
امشَّن عالمصيبة خل نساعدها
محتاجة المسية
شادود الـــــعزية
ـــــــــــــــــــــــــــــــــــــــــــــــــــــ
مكسورة گلب بالخيمــــــــة تتلوه
مخـــــــنوگة و تـجــر انفاسها گوة
ما ظنها بعـــــــــد من الدمع تروه
باگوا مــن عُمـــرها سنينها الحلوة

روحن يمَّها افتحـن للعزه ساحة
و خلنها ابوسطچن تلطم ابراحة
ما تحمل أذية 
شادود العزية
ـــــــــــــــــــــــــــــــــــــــــــــــــــــ
تجـري اعله الابو دمعتها محنية
عمت عيني وگع ما شــارب امَّيه
اريدنچن تســـــــون يمها لطمية
بلكت تستراح و تهـــــجع اشوية

وحيدة لا تحس والدها خلاها
يعمَّة اتشاركن باللـوعة وياها
مكسورة خطية
شادود العــزية
ـــــــــــــــــــــــــــــــــــــــــــــــــــــ
صوبين الدمـــــــــع بالحرگة صبَّنه
و بالطـور العــــراقي جــــذّبن الونة
مُلاية انتي صيري عمــــــة يا سكنة
و انتن يالبقيـــة اللـــــــــطم شدَّنه

دم أويه الدمع كـــون الجفن ينبع
و اريدن باللطم لحم الصدر يوگع
ذوبن بالــرزية
شادود العزية
ـــــــــــــــــــــــــــــــــــــــــــــــــــــ
چلمة بويه لاحـــــد يمها تحچيها
من تسمعها منچن ينغمي اعليها
عنهـــا لا تغفلــــــن و اعتنن بيها
و اذا عالعين لطمت كضَّن ايديها

سَمعَّنها كــــــــلام ايطَيب الخاطر
واسنها اوتواسيچن ظــــــــهر باچر
بطف الغاضرية
شادود العـــزية
ـــــــــــــــــــــــــــــــــــــــــــــــــــــ
لابو ابراهـــــيم خلـي اعيــــونچ تعمه
سفــير حسين هـــــذا الغالي ابن عمه
طاح امن القـــصر فوگ الارض جسمه
و عالحيطان نَثَّر لحــــــــــمه وي دمه

مجتوف ارتمه و امـربطه اچتافه
يابس ريجه و الدم تارس اشفافه
نيرانه ســــرية
شادود العزية
ـــــــــــــــــــــــــــــــــــــــــــــــــــــ
الحمدلله
علي حسين الكناني

الاداء ملا امير الفتلاوي

الليلة انودع المحروگ بالخيمة
ابو الصادق الشاف امراكض الهيمة
ــــــــــــــــــــــــــــــــــــــ
گضى نحب الامام بكسرت الخاطر
يعين الله اليشوف اشصار بالعاشر
شاف حسين جدة يدوسه الحافر
گبل السم يموت الزلمة من ضيمة
ــــــــــــــــــــــــــــــــــــــ
مات اللجمتة سحگتة اعالجمرات
وگلبة منلجم من طلعت العمات
بنص ذاك الفلة ما تنضم العثرات
اشيضم المستحة لو فارگ الشيمة
ــــــــــــــــــــــــــــــــــــــ
انتقلت روحة بس ظلت اجروح الشام
هذن اسرار گلبة المالهن مضمام
الحرم گدام عينه بالخرابة تنام
نار الشام ماظن تطفي بالغيمة
ــــــــــــــــــــــــــــــــــــــ
راح وما تروح اثارة من ظهرة
لسع السوط جان ايفزز العبرة
تهون الطگة عالحر لجن عالحرة
يرفض كل متن للسوط تسليمة
ــــــــــــــــــــــــــــــــــــــ
رحل وبس السبي ما رحل من بالة
ويذكر شكو خطوة بجفه احبالة
والسجاد حاير جان بعيالة
ويطگون اب ابوه المالهم قيمة
ــــــــــــــــــــــــــــــــــــــ
سمو جبدة لاجن مو جديد السم
ينسم من يشوف الراس يگطر دم
الرمح خلة الاگلوب امفرفحة من الهم
الگلب ما يطفة من يحترگ مو خيمة

حسين حيدر الموسوي

نعي عن استشهاد الامام الباقر (عليه السلام )
**


بداية   عمرك   بطف  تبدي  واويلاه
طفل وگبال عينك    شفت  ما شفته
العاشر  مر عليك   شلون  يا   مولاي
يا سيدي   الباقر     تذبح     السكته
شفت بعيونك الاكبر    زغر  بسيوف
وعليه  ارماح چلت    فوگ خاصرته
مر بيك الكفيل  الراح  بس من  راح
كسر  ظهر   الحسين   وگلب عايلته
حالك حال  سكنه  الواعداهه ومات
وظلت    واگفه    ويرجع   امناطرته 
شفت   وداع  زينب للحسين  شلون
باخر  لحظه  چانت  حيل   شابگته ؟
سمعت اضلوع تتكسر  بعيد  هناك  ؟
شفت حسين خيل  وناس  ساحگته ؟
دورت  اعله خنصر  من اديه مبتور ؟
ولو    هيه   السيوف    بعيد   ناثرته
حسين شلون حاله وهالسؤال أجزيه
مولاي احچي بله  شلون حال  اخته ؟
زينب  شنهي ركضت طاحت اعللگاع
راحت   يم  اخوهه  وعون    عابرته ؟
ما  لحگت  تنوح    گباله    وتحاچيه
لان   بالحجر    هاي   الناس    دافنته
اه   يا حزن   زينب   يا  جرح  عاشور
مو  وكته  العمر  بس الحزن      وكته
يا   درب السبايا  ويا     ونين   الشام
ويا    گلبك  الدامي وموت     سالفته


كلمات الخادم  /  رعد الفريجي

.

نهض مسلم تلثم        وتلون سيفه بالدم

تنخه بيا علي             تنخه بيا علي
*****
سحب سيفه وتوضه ونتده يا راعي الكلافه
يقتال العرب ياعمي يا سيد الخلافه
وحيد وماله ناصر والعطش يبس شفافه
صفه بديره غريبه بوحده والله حسافه

شهر سيفه وندبهم           وذبح خيرة زلمهم

تنخه بيا علي           تنخه بيا علي
*****
اصيل وابن اصايل طيب وطاهر حليبه
خنك ريت هواهم والشرد منهم يصيبه
علي معلمه المعارك والحرب عرسه ونصيبه
حمت والحومه صارت حمره من شدت لهيبه

اصيل وسيفه غاضب           لوه بجفه الشوارب
تنخه بيا علي             تنخه بيا علي
*****
فتح باب المعارك ورتجز وسط العساكر
شمر جثه اعله جثه وصفن عقول العشاير
ولا زين التدنه لمسلم ومن يمه عابر
اليجي ويوصل حدوده خل يحسب راسه طاير

الكتايب كلها تخضع       الكرب يمه يتكطع
تنخه بيا علي               تنخه بيا علي
*****
سليل من الهواشم بالفخر والغيره مجده
تسرفن للمعصيه وارتجز واحزامه شده
تخاوه ويه المنايه وزعل السيف اعله غمده
نزل طول وعرض بيهم ولا واحد يرده

بلا خوذه يقاتل           ملك للحومه نازل
تنخه بيا علي               تنخه بيا علي
*****
بجت عين اليالي وطفو انوار المدينه
وبده يستنكي بيهم يذبح الي وينه وينه
صبغ دربه بدماهم والنعم سلمت يمينه
صفت بس بالاشاره انتبه بالك يجينه

هلك جيش بجموعه          تهلهل يمه طوعه
تنخه بطا علي               تنخه بيا علي
*****
عذر ما خله ليهم بارز القاده وذبحها
ونعم يابو حميده خالط الليل وصبحها
يمنبع للشهامه وريحت الغيره وملحها
خزر عين التجي بعينه وتناوشها وشلعها

ذبح جا باها ما مل         السبع يمه يتزلزل
تنخه بيا علي                تنخه بيا علي
*****
الشاعر عبدالله علوان

افنيهم والحسين والحسين ياطوعة
……
مااهم وكت الحرب طبعي اكلبها كلب
مسلم بيوم اليطب صولتة معروفة
فرحي بية وهلهلي ايصيح كلمن صد الي
هالبطل حيدر علي شرجعة للكوفة

يلاكوني ولاهات ولاهات مسموعة
.افنيهم والحسين والحسين ياطوعة
……
عندي مايعني العدد افرح بيوم الشدد
هاشمي وكلبي استعد ياهو اليلاكيني
سيفي غازل يمنتي ياهو يحمل ضربتي
الجيش اسمعة كلمتي مااعوف حسيني

صرخاتي باالافكار بالافكار مطبوعة
افنيهم والحسين والحسين ياطوعة
……
وية الحرب ماافترك كلبي بالغيرة يدك.
السيف يعشكني عشك ويطرب اعلة حساسي
جني سبع الكنطرة الدنيا بية محيرة
تعملت من حيدرة ماادنك راسي

ينضروني ولانفاس ولانفاس مكطوعة
افنيهم والحسين والحسين ياطوعة
……
بالجثث املي الارض موقفي اصبح فرض
ارفض الذلة رفض بالخطر مابالي
يوم الملاكة حلة وسيفي اسلة ابيا هلة
بدت منا كربلة وتستمر للتالي

يبرزولي وباالكلوب وباالكلوب جم لوعة
. افنيهم والحسين والحسين ياطوعة
……
تعلمت واني طفل لااساوم لااذل
بس للحسين امتثل هذي تربيتي
الماعرف خل يعرفة. امري واضح ماخفة
فدوة لبن المصطفة انذبح امنيتي

تبعوني ولاعذار ولاعذار ممنوعة
افنيهم والحسين والحسين ياطوعة
……
سيد معتز الحسيني

الاداء ملا عدي الربيعي