الى مولاي الباقر ع

أجريلك ادموع العين وي لاه
گلبك سيدي اشچم نار وَيلاه
بالطف عله حسينك صحت ويلاه
وجبت عمرك تون عالغاضريه

الليالي والمحن عاشَرَت مُرهن
وگلبك للنوايب صار مرهن
عَمَّاتك اگبالك شِمر مَرهن
على الوليان وادموعك جِرِيَّه

سيد علي الموسوي.

((ابن الهيل))

رغم بس راس .. بس مجنونه بيك الناس
رغــم مـذبـوح .. بس انته تفيض أحساس
انت الهيل وابن الهيل
وبعيـونك سـواد الليل ...

"""""""""""""""""""""""""""""""""""''''''''''

اريد ابكيفي اصورنك
مـــو مذبوح ارسمنك
ولا اوصــــــل للمثلث
اخجل خاف الچمنك

يعگال راس الدنيه دوم أمبختر
يــــانضرةّ الله ابنضرتك نتصور
خليني اتصور صدر غيــر سهام
مااريد اسولف عالرمح لو منحر

يـ انته هواي .. يامـــــاي وصرت للماي
رايح جـــاي .. وانته من الشموس فياي
حيلك وزع اشگد حيل
وبــعيونك سـواد الليل ...

"""""""""""""""""""""""""""""""""""''''''''''

أرسمــك لابس الغتره
وشگد حلوه لو خضره
وخطــــارك يبو اليمه
تصبلهم غده الـــزهره

بثوآب امك تفرش السفره جناح
واليطب دارك يغلا وشگد يرتاح
معزب چريم وماتمن من انطيت
حتى الزرع بسمك انشدو الفلاح

نورك هـاج .. ادري شمالها الحجاج
كعبه وبيت .. هنـانه ابكرله المعراج
يالماتعرف انت المَيل
وبعيونك سواد اللـيل ...

"""""""""""""""""""""""""""""""""""''''''''''

بالحب بيتك اتفرشه
بهيــده بهيده تتمـشه
والعاشگ مشـاهدكم
لازم ينـــصبغ رمــشه

سليمان علمته الكلام من اسنـين
وخليــــته وي الطــير يتــكلم زين
تسبيح حــتى الطير لـو سبح گال
مولاي ابو السجاد وحسين حسين

گلي شلون .. چــا هو الجنون جنون
المـايدرون .. حّسين بسورةّ الماعون
أرسمك ماكو يمك خيل
وبعيــــــونك سواد الليل ...

"""""""""""""""""""""""""""""""""""''''''''''

أقَـــــرب صورتك وأبعِد
بس گـــلبي شكثر ينشد
يفز حتى الضوه الطافي
يــــم عـــــباس اذا تگعد

تتسابگ النجمـــات وتـــــريد اطيح
وتوصل مسافه وتستحي اتمر الريح
وانـــــته تگــله يـــاگمر شوف الگاع
فرحانه من اجدامك ابنشوه اتصيح

خويه الزين .. تعـــال ادنه طب بالعين
اشمك وين .. وآنه حسين وانته حسين
تحت چفك نجوم سهيل
وبعيــــــونك سواد الليل ...

"""""""""""""""""""""""""""""""""""''''''''''

أطار الصـــوره شـو شيب
رسمتك تحچي وي زينب
وتّــــگلك يبـعد الـــــروح
وجفنك بالعشــگ حدب

ومخالف الضلع ابضلع من تحچون
محد سمعكم اضــن جاي اتخلقون
عود انه أرسم والــــقلم ظل محتار
ثاري اعله گلبي ياحسين اترسمـون

شنـهو الصار .. طلعت من صوركم نار
شفت اخيام .. وبـــالصوره يتامه ازغار
ضعن بالغربه ناوي الشيل
وبعيــــــونك ســواد الليل ...

عبد زينب
محمد الابراهيمي

بصوت
ملا سيف اللامي

انه شيعي وافخر ابنص ناسي
من علي ماخذها رفعة راسي
🏴🏴🏴🏴🏴🏴🏴🏴
من حيدر وارثها هاي المرجله
بس حيدر ياعالم ناسه معدله
واحدهم بالغيره الكون يزلزله
رافع راس الشيعه لا مو بس هله
بالشجاعه حيدره مقياسي
من علي ماخذها رفعة راسي
🏴🏴🏴🏴🏴🏴🏴🏴
شيعيتي قدسيتي كل عمري افتخر
ذبحوني وقتلوني ودمي الينتصر
اشما باقي بهالدنيا اشگد عندي عمر
كل اسنيني لحيدر انطيهن نذر
حيدره عايش ابنص انفاسي
من علي ماخذها رفعة راسي
🏴🏴🏴🏴🏴🏴🏴🏴
خل يسمع هالكلمه مني الناصبي
مااجامل لوكلمه اتمس بيت النبي
يالجدك يم حيدر ضل يحبي حبي
وهسه احفاده اگبالي شو لبسو عبي
وين اساسك وانه ثابت ساسي
من علي ماخذها رفعة راسي
🏴🏴🏴🏴🏴🏴🏴🏴
لتحاول يلمبغض تندگ بالخدم
اطلع خلي انشوفك شوماكو عدم
روح ارجع للدزك خل يشبع ندم
گله ايامك راحت ماتحرگ خيم
والخدم ذلوك خافن ناسي
من علي ماخذها رفعة راسي
🏴🏴🏴🏴🏴🏴🏴🏴
الجنه للشيعه محسوم الامر
وانته اگبال الباري حضرلك عذر
بيش اتواجه ربك يالطبعك غدر
متصيرلكم جاره احفاد الشمر
وانه عايش حيدره بحساسي
من علي ماخذها رفعة راسي
🏴🏴🏴🏴🏴🏴🏴🏴
✍️احمد علي البغدادي..

الاداء احمد البغدادي

📜 القصيدة: الباقر (رحلة عذابي )
🎤 أداء: مسلم الوائلي
🖋 كلمات: علي أكبر الغرابي
~~~~
اليرسمني صورة بخياله ويشوف الباقر
يلگاني دمعه اعله دمعه بهذاك العاشر
الرايد جوابي .. ويعرف مصابي
رحلة عذابي  .. من كربله
~~~~~
للينشدني كون بخير
عن يا خير وشلونه
انه ابن الحرگوا اخيامه
ورماد النار بعيونه
انه ابن الماله فزعه وراي
وزراگ السوط بمتونه
انه الماله عرف بالشام
وانه الكلهم يشتمونه

انه الماله بيرغ فزعله وگرابه
وبنات النبوه تلمهن خرابه

ذيج الخرابه وصورها تعيش ابالي
وشهگت رقيه شفتها اعله راس الغالي
اليسمع عتابي .. ويعرف مصابي
  رحلة عذابي .. من كربله
~~~
انه العاش بظهر عاشور
وعمامه اگباله مذبوحه
انه الماشي ويه راس حسين
من جروحه لجروحه
انه ابن الماله شربت ماي
وفاضت بالعطش روحه
انه الحامه اعله خدره وخاف
عين الشامت اتلوحه

شفت صورة صورة بهذيج الظهيره
وكت والله جدي نشيعه بحصيره

واليصعب اكثر علينه والمبجينه
شفنه اليسلب خيمنه يشتم بينه
والدم خضابي .. ويعرف مصابي
   رحلة عذابي .. من كربله
~~~~~~
ما بين الخيم والنار
وبين الباگوا احلامي
افك من هاي اطيح بهاي
والگه الخيل جدامي
وركضنه اندور اعله حسين
ضامي يصبر بضامي
وصوت من الخدر لحسين
خويه احترگت اخيامي

عله التل تحشمه بهذيج المشاعر
ويگوم ويطيح اعله وجهه ويكابر

ما بين اخوها وخيمها شفتها احتارت
بين اليتامه التلمها وعليها اندارت
اليبجي اعله بابي .. ويعرف مصابي
       رحلة عذابي .. من كربله
~~~~~
زجر ما خله عدنه امتون
ما تنزف ولا تدّي
وعله اعناد العطاشه يگوم
يترس ماي ويبدي
ويجرنه ويضحك الحداي
ويگل الزينب اتعودي
الأول من يطيح انطيح
شسوه بحالنه اليحدي

اعله رايه مشينه وگعدنه اعله رايه
الينشده علينه يگول السبايه

يالخارجيه اعله زينب يصيح الحادي
ولا شفنه واحد يسكته وضميره ينادي
اليرسم شبابي .. ويعرف مصابي
   رحلة عذابي .. من كربله
~~~
رغم ما عمري خمس سنين
بس الشفته بالعاشر
ما يگدر يرسمه انسان
مهما حاول يسافر
ياهو المثلي شاف حسين
ملعب صدره للحافر
وياهو المثلي شاف شلون
من ظل وحده وحاير

غريبه حياتي العشتها غريبه
مصيبه وبعدها تصح يا مصيبه

ذيج المصيبه شفتها تعيش بروحي
الرايد جوابي يشوفه بدمعتي ونوحي
اليقره بكتابي .. ويعرف مصابي
  رحلة عذابي .. من كربله
°°°°°°°°°°°°°°°°°°°°°°°°°°°°°°

الاداء ملا مسلم الوائلي

📜 القصيدة: وصلوها الحميدة
🎤 أداء: مسلم الوائلي
🖋 كلمات: محمود الموسوي
~~
من مسلم رساله الگلب الحسين
سلملي اعله زينب والصواوين
من الكوفه البعيده .. وصلوها الحميده
سلملي اعله زينب والصواوين
~
اسولف والدمع مرسال العيون
وللطف الرساله الحب خذاها
وصلتله وطلع سكته من الخيام
راح الوحده حسين وقراها
متغيره الكتب مختلفه الگلوب
ما تدرون جيتي شعطلاها
سلملي اعله اخت عباس يحسين
خل تتحمل الضيم الوراها

من حر الرساله وحر الأيام
طاح حسين كله بصف الخيام
والمرسال بيده .. وصلوها الحميده
سلملي اعله زينب والصواوين
~
طب حسين للخيمه وبجه وطاح
مسلم راح يا خيمه من ادينه
ظل ساعه بعبرته وكض الصفاح
الأكبر والرباب الساندينه
وكض عباس ظهره وصاح يحسين
من هاي الرساله تفارگينه
ابن عمك سند بس انه الحزام
وظل ساكت حسين ودار عينه

مكتوبك يمسلم تعب الحيل
ومن هسه عليه التمت الخيل
يالقصدك تريده .. وصلوها الحميده
سلملي اعله زينب والصواوين
~~~
بتك لو درت بالكاتبه تموت
وهي واهس رقيتنه الزغيره
حجيك حار جنك ميت ابساع
طحت من القصر طيحت عشيره
يا واهس حياة حسين والماي
يا ضحكة العباس الجبيره
بين الخيمه والمرسال والخيل
حيرت الحسين شلون حيره

بتك خاف تدري بمسحت الراس
يمكن راح اودي عليها عباس
والحيره الجديده .. وصلوها الحميده
سلملي اعله زينب والصواوين
~~
يا حيرة بناتي وحيرة ألواي
يحرم عگبك الماي النضوگه
يا ركضة حميده وشهگة الوين
ابوي وين ضعنه وين نوگه
تمنيتك يمسلم جاي وياي
گلبي اشتاگلك شيطفي شوگه
تدري حسين بيته اخيام والنار
مو فوگ البنات اطيح فوگه

بتك بلغتها بدمع العيون
نسوان وزلم بالخيمه يبجون
والظلت وحيده .. وصلوها الحميده
سلملي اعله زينب والصواوين
~~~
صارت فاتحه بصيوان الفراگ
وعليك الگمر لطمن خواته
بگد العطش باجي عليك واشتاگ
وعبد الله بجه ونشفت لهاته
مكتوبك وصل شيب اعله المتون
حملك طاح گدام الشماته
تدري الحافر يطشرلي عباس
ياخذ من ابن عمك عباته

وينك يا ابو طاهر يا ضوه العين
ظلت بالخيم بس النساوين
والجثه الشهيده .. وصلوها الحميده
سلملي اعله زينب والصواوين
°°°°°°°°°°°°°°°°°°°°°°°°°°°°°°°°

الاداء ملا مسلم الوائلي

قصیدة حق مولاتنا  العلیله  (ع) ✍ کلمات انتظار الریاحي


هدحیلی الغیاب          وعیونی  عألباب   

ماضن یعودون             یاگلبی  الأحباب

♡♡♡♡♡♡♡♡


معقوله  اهلک یاگلب  طاوع گلبهم‌

زغیره ومریضه بألنزل  عافوها بتهم

غير المریض ايرید  عد راسه  الیودهم

بس هم  ترکوك اومشو وأبعد ضعنهم


ضعن النوده       چن ماله رده

ایس یگلبي     لاتکثر عتاب


♡♡♡♡♡♡♡♡

لاتکثر  عتابك  بعد عل  العاشرونه

حته  بحلم  ماحنو النه  ولا اجونه

معقوله  هانت عشرتك  گلبي ونسونه

وذاك الشمل راح ومشه  مایذکرونه


ذیج أللیالی       نسوها الغوالي

راحت حسافات    مثل  الهوا الهاب


♡♡♡♡♡♡♡

راحت  حسافه ذیج  لمتنه وشملنه

ویاهم  یگلبي  یامه  سولفنه وگعدنه

بس الوکت  راح   بعد لاضن  یلمنه

وشلون  ینسونه  اللي  چانو دوم یمنه


ینسونه اشلون      بلفرگه  یرضون

بلیاهم نموت        لوطال الغیاب


♡♡♡♡♡♡♡


لو طالت الغیبه یگلبي شلون بینه

نبقه  وحدنه  أخبار اهلك   ماتجینه

لیلك  شيخلصه طویل   یاگلبی علینه

لاتصدگ الفاگد محب  یغمضها  عینه


مایغمض  العین         الفاگدله  غالین

یگضیها  حسرات     وبدمع سچاب


♡♡♡♡♡♡♡♡


خل نستعد  یاگلبی انه ویاك خلنه

ماندری شنهي  الضامه هألدنیه النه

های اللي  ماخلت  اهل واحباب عدنه

باچر نموت واحنه ماشفنها اهلنه

نصرخ یدفان         ماشفنه الحنان

بلك الله ویجون       لاتهل  التراب


♡♡♡♡♡♡♡

✍انتظار  الریاحي
.

📜 القصيدة: وين بضعنكم
🎤 أداء: مسلم الوائلي
🖋 كلمات: رائد الناشي
~~~~~~~~~~~~~~~~~~~~
وين بضعنكم تردون يهل الرحم حاجوني
كون بسفركم تبطون وي الضعن حملوني
~~~~~~~~~~~~~~~~~~~~
وين بسفركم تردون نيتكم بهل عيله
ما گالي عليها حسين ليمت نوه اعله الشيله
خافنه ناسي وما گال يا عمه روحي احجيله
حملت وتريد تروح وي الضعن گليله

يا عمه فدوه اترجاج
گليله وخذيني وياج
ما اريد اضلن بالدار يهل المروه اخذوني
~~~~~~~~~~~~~~~~~~~~
محتاره امشي بيا راي وي روحي ضليت احجي
ما بين اصدگ ما بين مره افرح ومره ابجي
ذبيت كل حيل النوح يم عمتي وگمت ابجي
يا عمه ما يحجي وياي والله ماترهم هجي

يا عمه گتلج حاجيه
ما يحجي وياي شبيه
خافن الوالد زعلان ارضيه بذني عيوني
~~~~~~~~~~~~~~~~~~~~
ماضنه يتركني حسين انه والبيت الخالي
معلوله مو مالت نوح والدي ويدري بحالي
ما اعتقد هذا يصير هاي الاوهام ابالي
وادم تجي عليه وتروح ولتهه ما گلالي

شويه ويجي ويگلي
وي الفواطم حملي
وان شاء الله وياه نروح كفي الدمع يعيوني
~~~~~~~~~~~~~~~~~~~~
جن العيون مصدگات ما بطلن مجراهن
گالن خذه اغراض البيت وحوايجج خلاهن
يا بويه يالب حشاي گلت شعجب تنساهن
شو گلت للعلويات ما گتلي حملي وياهن

يا بويه جنكم ناوين
تخلوني هنا يحسين
حملتوا كل النسوان بس انه خليتوني
~~~~~~~~~~~~~~~~~~~~
يا بويه اخذني اترجاك نار الهجر حراگه
وجهك المتعوده عليه ما اصبر اعله فراگه
افرشلك هناك فراش مـن تكسر المشراگه
وامشي اعله رجليه وياك ما اريد اكلفك ناگه

ما اخذ اغراض هواي
بس العبايه الوياي
وما يعطلكم ممشاي جدامكم تلگوني
~~~~~~~~~~~~~~~~~~~~
جا كون رايد يحسين تتوكل بسم الله
وانه اضل يم باب الدار بنار الفراگ اتگله
ايست ماضن ترضون امشـي وياكم يله
ما لازم انه امشي وياك خليلي بس عبدالله

اعله فراگك يصبرني
برسومك يذكرني
يا بويه متعوده عليه من عنده لتحرموني
~~~~~~~~~~~~~~~~~~~~
ما اريد اضلن بالدار تكتلني بويه الحرگه
ويكتلني حجي الشمات فوگ المرض والفرگه
يا بويه سفرتكم هاي ما بيها امل للملگه
شلون انسه ضحكاتك ذيج وانسه الحضن والشبگه

خليتني بدارك ليش
لحظه بجفاكم ما اعيش
لو صدگ باجر تمشون ميته الصبح تلگوني
°°°°°°°°°°°°°°°°°°°°°°°°°°°°°°°°°°°°