الاداء ملا مؤيد السراي

قصيده بمناسبة استشهاد الإمام الجواد عليه السلام

بجبد الجواد السم صبح ناكع
ننعى بلطمنه الزاهد الخاشع
الليله الكلب موجوع       يا عيني سيلي دموع
ننعى بلطمنه الزاهد الخاشع
**
صار الكلب من الالم يتزايد بدكته
وجهي انترس من الدمع والبسمه عايفته
موت الجواد تشابهت بحسين سالفته
مثل الحسين اعله الارض ما شيعو جثته

نفس الحسين تشابهت قصته
بس جسمه ماكو خيول ساحكته
والراس ما مكطوع        يا عيني سيلي دموع
ننعه بلطمنه الزاهد الخاشع
**
الليله الصدر لبن الرضا خليه يتخسف
والما لطم لمصيبته شله بعد بالجف
هالثوب كون من الدمع هالليله ما ينشف
عاشور عاد بداخلي وبدمعي عاد الطف

يا عظم هاي الليله بفادي
جني اشوفن ذبحو اولادي
غير الدمع ممنوع     يا عيني سيلي دموع
ننعه بلطمنه الزاهد الخاشع
**
عاش بمعانات وظلم واحزان ممتده
حتى الهوى بنص ريته بلكوه يتعده
وظلت تأذي بداخله قصة ذبح جده
يذكر عظام مكسره بالخيل منمرده

هاي القضيه إللي اجرحت كلبه
كلما ذكرها ومدمعه صبه
عاش بكلب مفجوع         يا عيني سيلي دموع
ننعه بلطمنه الزاهد الخاشع
**
لمن بجسمه السم سره وتطلع بدت روحه
فوك السطح كوه صعد يمشي على اجروحه
حتى يواسي حسين وتظل جثته مطروحه
استشهد وماكو من اهله واحد يمه وينوحه

عاش بظلم مات بوطن غربه
شحال الإمام الهادي من عكبه
بكلبه الالم مطبوع        يا عيني سيلي دموع
ننعه بلطمنه الزاهد الخاشع
**
ظل عالسطح مطروح محد يوصل الداره
محد نشد عن غيبته من انكطعت اخباره
لا مسلم المفتقده لا عنه نشد جاره
بس الحمام يمر عليه ويحوم باكتاره

يمته يشيل المهدي بتاره
ومن النواصب ياخذ بثاره
يرجع الحق ارجوع         يا عيني سيلي دموع
ننعه بلطمنه الزاهد الخاشع
**
جعفر عطيه البزوني

أبوذيات للامام الجواد (عليه السلام )


دمــوعك عالجـــواد اليــــوم ..... سلهه
وعلى أمصابه اليالي أبحزن ..... سلهه
سيوف السم زمانه أشلــون ..... سلهه
وحزّن جبـــدته وأصـــبح رميــــه
***
الزمـــن تعبنـــي ويكلـــي لعتباك
جواد انته وكصد جدمي لعتبـــاك
لنوح لليله يـــــم بابـــــك لعاتبـك
أريدك بالشدد سور أنته أليـــــه
***
على مصاب الجـواد ألون ..... لــــونه
ومصابه أهـــروش دلالي ..... لــــونه
بحــر بجفوني يالســـامـع ..... لـو أنه
أصبه أعليه دمع حد المنيــــه

**
الشاعر
موسى البديري

لاستشهاد الإمام محمد الجواد عليه السلام. ( عگيلي )

يابوالهادي جمر غيابك . چواها بنيران أحبابك
يابو الهادي جمر غيابك

ايامك من غربه الغربه.
مفارگ خلانك والصحبه
جابوك البغداد برهبه .
لاعن شوره ولاعن رغبه
ملتمه الحراس ابابك

يالهجه الي عدهم ترهم
غير السيف.وجريان الدم
جلمود گلوب الماترحم
يم دارك عسكرهم ملتم
ماعدهم غير استجوابك

چم خطه الدرسوها بخطه
بالتهديد وفرض السلطه
يلمالك وياهم غلطه.
بجلد الريم الذيب تغطه
بحد السيف يريد اعتابك

بمنطق سلبي وسابق فكره
ظل الحاكم حقده بصدره
يوم الجمع ذيچ الزمره.
كل عالم رد حاير بأمره
خجلهم علمك وادابك

ياتاسع أنوار العترة.
رادوا تضعف يبن الزهره
علمك اصبح الهم عثره.
غير السم ماعدهم فكره
مصاب الزهره اليوم مصابك

ياخمسه وعشرين اسنينك.
ناذرهن للباري ودينك
وسفه العدوان مخلينك
ظلمه ورهبه الدنيا بعينك
بالقوة الحاكم من جابك

من سموه وسدوا بابه
مايدرون أهله وأصحابه
مثل حسين ونار مصابه.
حسين بسهم الطف صوابه
وانته بسهم السم صوابك

الشاعر حسن لعيبي الحريشاوي

أرد اعطش اهواي   (الجواد) ع

ما اشـــــرب الماي     ارد اعطش اهواي
تجويني جمـــرات الشمس     كون بجروح احسين احس
أرد اعطش اهواي
***
ريض يموتي لاتجــــــي  هونك عليه
آنه الجواد واعلــــــــــم بهــاي المنيه
ارد اقره مجلس فاتحه وانصب عزيه
خل يحترك كَلبي جمـــر عالغاضريه
ريضلـــــي يابين       ارد ابجي لحسين
بجمر الخيم اجوي النفس     كون بجروح حسين احس
ارد اعطش اهواي
***

خلي اصعد الدار وتجي تاخذهــه روحي
واعيوني اكللهن دمع لحســــــــين فوحي
عالكاع اتمدد واحن وانعــــه اوي نوحي
مسموم صح بلكي الشمس تلجم جروحي
نشــــفت لهاتي            وصـــلت وفاتي
خنكَه الهوى وجن منحبس    كون بجروح احسين احس
ارد اعطش اهواي
***
خل ريجي يبس والعطش اشعر مراره
حسين بصحاري نينوى بحـر المعاره
عريان جسمه اعله الرمل ملتهبه ناره
عينه على اخيامه بجه ودمعه ايتجاره
من سحكَته الخيل        ماظله كــل حيل
طاحتله بالحافــــــر رفس   كون بجروح احسين احس
ارد اعطش اهواي
***
مايمي خيل وانسحك حــيل اعله ظهري
واتكَلب الكثر الرفس ويلي اعله صدري
لاعندي خيمـات ونســه وينسلب خدري
لايمي زينب تنسبي و تشــــدهلي فكري
ماعندي خيمات            وتركض سبيات
من ربي ادعــــــي والتمس   كون بجروح حسين احس
ارد اعطش اهواي
***
ماشافت اعيوني حـــــــرك خيمة بناتي
ولاسمعت اذاني بجي وصيحت خواتي
ولاخنصري مني انكطـع واخذو عباتي
مطروح ابقه اعله السطح حتى ابمماتي
ولا اختي عالنوك                 مســـبيه بالسوك
واليحدي بالناكه رجس    كون بجروح حسين احس
ارد اعطش اهواي
***
الشاعر ابو علي الركابي

أداء الرادود مصطفى الذهيباوي

✍موسى البديري

الاداء ستار الصالحي

وحده مات ابن الرضا وحل الظلام
صايم وبلسم فطر تاسع أمام

*****

يا مصيبة چبدك وچبد الحسن
ويلي يلمسموم شمسوي الزمن
العاشت بخيرك وچنت الها الوطن

سَمًتك بس هيه من اصل اللئام
صايم وبلسم فطر تاسع أمام

**

فوگ سطح الدار يا نوم العليل
والشمس توصله چن طبت دخيل
يا جواد الدنيا وياكم تميل

وفتحت الذرعان لاولاد الحرام
صايم وبلسم فطر تاسع أمام

*

هم ثلث تيام محد غسلاه
مثل جده حسين لكن ويلي آه
تحت حافر خيل ما طحنو گفاه

ولا رماح الكسرن حتى العظام
صايم وبلسم فطر تاسع أمام

****

يا مصايبكم عظيمه وراتبه
بين مسموم وذبيح النايبه
يا صريع دموع تلهب ساكبه

يا عزاء ارواحنه لذيچ الخيام
صايم وبلسم فطر تاسع أمام

****

آه من هلدنيا من ضيم الدهر
تظلم الاشراف والعدهم أثر
فتنه قلة زادهه وطول السفر

شما حچينه يضيع وياهه الكلام
صايم وبلسم فطر تاسع أمام

****

ويلي دليني الظلام بعيني صار
من خبر موت الجواد بگلبي نار
ها يمن گبرك صبح قبله ومزار

قاضي حاجات البشر يبن الكرام
صايم وبلسم فطر تاسع أمام


كلمات الخادم / رعد الفريجي
ذي القعده 1444

الاداء مصطفى الذهيباوي