بالباب عصروها .. ونّت يسمعوها 
ضلعين كسروها
▪️▪️▪️▪️▪️
فزعوا ثلثميّة شخص .. كل واحد ايهاجم
قائدهم الظالم .. گلهم وإن فاطم
من صارت الهجمه غدر ..
▪️▪️▪️▪️▪️
يدفع الباب ابقوّته .. واتگلّه انه الزهره
ابْصوت الضلع كسره .. ايجاوبها بالسطره
يا من تناشد عالكسر
▪️▪️▪️▪️▪️
بالباب صاحت فاطمه .. يا بويه ما تحضر
يا حمزه يا جعفر .. اوما ناشدت حيدر
صوت ابو طالب يعتذر
▪️▪️▪️▪️▪️
طاح الجنين امن الدفع .. اومن شدّة الضربه
بيها وگف گلبه .. اوموتته بالعتبه
وامّه مدامعها حمر
▪️▪️▪️▪️▪️
شافت المحسن عالأرض .. أمّ اولبنها اتحن
واتنادي واهيه اتون .. لا تسحگ المحسن
واتشوف كاروكه جمر
▪️▪️▪️▪️▪️
زينب تشاهد فاطمه .. بالباب من تنحب
چَنّ الخيم تلهب .. ويلي على زينب
ويْ فاطمه چنها الظهر
▪️▪️▪️▪️▪️
دمعة احسين الفاطمه .. بعيونها اتلالي
ايْرد المهُر خالي .. واموذّر الغالي
مو عصره لا ذَبْح اويسر
▪️▪️▪️▪️▪️
زينب تنادي اعله الهزل .. عبّاس يعيوني
ترضه يذلّوني .. للشام يهدوني
كل جرح يبدي من أمر
▪️▪️▪️▪️▪️
#اللهم_عجل_لوليك_الفرج

✒️الشاعر : زين العابدين المرياني

الاداء ملا باسم الكربلائي

قصيدة بالسان حال مولاي صاحب العصر والزمان عج



يا أهل العزائات ..قليلة تلث روايات

يلا شدوا الحيل ياأهل اللطم
تلث روايات ونشد بيها العزم
جن محرم اگبل وحرگ الخيم
توسط المجلس يخادم لا تهم
الزهره ام الكرمات. قليلة تلث روايات

انه ووياكم ابنها بالدمع
نبجي لزهراء مكسورة ظلع
تگلي يالمهدي يوميه انوجع
لوسمعت حسين گلبي ينفجع
ماننساج هيهات... قليلة تلث روايات

يلا يااهل العزه ماضل وكت
تلث روايات وقليلة من صحت
حگي من الطم عليها ومن نحت
بت محمد وسفه ياضالم تعت

گلبي انترس طعنات... قليلة تلث روايات


لافته مدگوگه كون بكل درب
اسم يازهراء مكسورة گلب
وكون في كل بيت مجلس ينصب
وبحضورج يم حسن دمعي يصب
حسره وحزن واهات... قليلة تلث روايات


بالروايه الثالثه اه يم حسن
تحزموا خدامج المدمع مزن
تحضرت هيئاتها تصيح بحزن
ليش گبر ام الحسن مابي صحن
خدي نترس دمعات... قليلة تلث روايات


✍باقر جبار الشويلي

اهدي ثوابها الئ مولاي صاحب العصر والزمان عج
بنية شفاء ولدي

الاداء ملا محمد الدبي

ابوذية

لسان حال مولاتي الزهراء ع

الخلاني اصيحن آه وي آه
الدفع بابي بحقد وبنار وياه
الكسر ضلعي إليه عتاب وياه
انتلاگه والحكم رب البريه


خادم الزهراء عليها السلام
سيد غالب الرضوي الكربلائي

ابوذيات
على لسان السيده زينب ع


تـراهـي الـوالـده ايـشّـيـب  .. بُعدهه
واحـس الـدنيـه مـا تـسـوه .. بعدهه
لـلـعــشـريــن مـا وصـلــت  .. بعدهه

انسطر خدهـه وأجـت لـيـهـه المنيـه

*-----------------------*------------------*

بـالـدمــعــه اسـلـي الـعـيـن  .. وَلـهـه
وعــلـــه امــي الــعــزيــزه  ..  وَلـهـه
اقـيـمـن مـأتــم بـكــل يـوم .. وَلـهـه

تـضـل لـلـمـوت دمـعـاتـي جـريــه

*-------------------------*----------------------*

✍خادم الزهراء ع
الشاعر رعد الجريخي

مِـنْ لِگيتِ ابَّـاب ابُو الحَمْلَه دَمِعْ
اتْأكَّدِتْ مِنْ فَاطِمَه كِسْرَوا ضِلِعْ
اِوْ مِنِ الدَّمِّ المَنْثُورْ اتْأكَّدِتْ خَدْ مَسْطُورْ
ـــــــــــــــــــــــــــــــــــــــــــــــــــــــــــــــــ
طَالَعِتْ تَـارِيـخْ مُـؤلِـمْ مِـنْ قِـريـتَـه
بَعَدْ مَا غَابِ النَّبِيْ اِوْ حَانَتْ مِنِيتَه
وَسْفَه حِيْدَرْ يِـحْتِرِگ بِـالنَّارْ بـيـتَـه
اِوْ عَلَى العِتْبَه طَايحِ المِحْسِنْ لِگيتَه

أنْظُرِ ابَّابِ الوَحِيْ نَارِ اِوْ جَمُرْ
الله يِلْعَنْ مَـنْ فِعَلْ هَـذَا الأمُـرْ
مِنْ عِرَفْتِ المَغْدُورْ اتْأكَّدِتْ خَدْ مَسْطُورْ
ـــــــــــــــــــــــــــــــــــــــــــــــــــــــــــــــــ
وِ اشْكِثُرْ وَصَّـه مُحَمَّدْ بِـالصَّحَابَه
لِاكِـنْ اِنْقِلْبَوا قَبِلْ مَـيْـجِـفْ تُـرَابَـه
بَـشَـرْ ظَاهِرْهُمِ اِوْ بَـاطِـنْـهُـمْ ذِيابَه
لو بَشَرْ مَا هِجْمَوا اِوْ حِرْگولَه بَابَه

ابَّـابْ خَـيْـبَـرْ مَـا طِلَـع مِنْهُمْ شَـهِـمْ
ابَّابْ ابُوالحَمْلَه اشْعَجَبْ صَارَوا زِلِمْ
وِ ابْدِمُوعِي التْفُورْ اتْأكَّدِتْ خَدْ مَسْطُورْ
ـــــــــــــــــــــــــــــــــــــــــــــــــــــــــــــــــ
إجَو لِلدَّارِ اِوْ بِـدَتْ نَـارِ الـجَرِيمَه
اشْگدْ لَئِيمِ اليهْجِمِ اِوْ يِكْتِلْ يَتِيمَه
مَـا رِعَه حُـرْمَة مُحَمَّدْ لَا حَـرِيْـمَـه
يِأمُرِ ايْحِرْگُونْ هَـالـدَّارِ الكَرِيمَه

رِجْعَوا ايْطِلْبُونْ مِنْ عِنْدَه الإذِنْ
بِيهَا فَاطِمْ گالَوا اِوْ گلْهُمْ وَ إنْ
امْنِ الكَلَامِ المَأثُورْ اتْأكَّدِتْ خَدْ مَسْطُورْ
ـــــــــــــــــــــــــــــــــــــــــــــــــــــــــــــــــ
الزَّهْرَه خَلْفِ البَابْ مِنْ لَاذَتْ عِصَرْهَا
طَگ ضِلِعْهَا اِوْ نَامْ بِسْمَارِ ابْصَدِرْهَا
مُـؤمِـنَـه اِوْ كِلْ هَذَا جَارِعْتَه ابْصَبُرْهَا
لَچِنْ مِنْ شَافَتْ عَلِيْ امْگيَّدْ قِـهَـرْهَـا

اتْصِيحْ يَافِضَّه تَرَه ضِلْعِيْ اِنْهِشَمْ
اِوْ بَـعَـدْ مَـا بِـيَّـه أگُـومِ امْـنِ الألَـمْ
مِنْ گلُبْهَا المَجْمُورْ اتْأكَّدِتْ خَدْ مَسْطُورْ
ـــــــــــــــــــــــــــــــــــــــــــــــــــــــــــــــــ
خَلِفْ حِيْدَرْ طِلْعَتْ اتْنُوحِ ابْهَضُمْهَا
خَايفَه الزَّهْرَه يِكِتْلُونِ ابِـنْ عَـمْـهَـا
ويلِيْ رَدْ قُنْفُذْ عَلَى خَـدْهَـا لِطَمْهَا
انْصُبْغَتْ اچْفُوفَه اللَّعِينَه ابْجَارِيْ دَمْهَا

ابْسوطْ مِنْ ضِرْبَوا مَتِنْهَا اتْلَوِّعَتْ
غيرْ تِگلُبْهَا الأرِضْ بَسْ لو دِعَتْ
مِنْ قِرِطْهَا المَكْسُورْ اتْأكَّدِتْ خَدْ مَسْطُورْ
ـــــــــــــــــــــــــــــــــــــــــــــــــــــــــــــــــ
سَاعَه لَنْ حِيْدَرِ امْعَاوِدْ بِالسَّلَامَه
طِلَعْ مِنِّ المَسْجِدِ ايْعَدْلِ العِمَامَه
ظَلَّتِ اتْغَطِّي الوَجِهْ فَاطِمْ أمَامَه
خَافْ لَا يِنْظُرْ عَلَى خَدْهَا عَلَامَه

حِيْدَرِ ايْعَاينْهَا مَحْنِيَّه اِوْ تِوِنْ
يَعْنِيْ مَا تِگدَرْ بَعَدْ تِخْفِيْ الحِزِنْ
صَاحْ حِيْدَرْ مَذْعُورْ اتْأكَّدِتْ خَدْ مَسْطُورْ
ـــــــــــــــــــــــــــــــــــــــــــــــــــــــــــــــــ



كرَّار حيدر الخفاجي

اميره بكل عصر زهرة..عصرها
وبين الباب والحايط ..عصرها
صلاة الظهر صلتها.. وعصرها
بضلع مكسور وبدمعه جريه

#ابوذيه
الشاعرعباس فاضل الشمري