الاداء ملا ستار الصالحي

قصيده
لسعيد بن جبير

لوما حب الزهره مالي جروحك
جان ما رخّصت للحكَ روحك
ونعم يل اسمك سعيد .. اخره ودنيه سعيد
ـــــــــــ
هي فطره .. حب علي وفاطمه من يوم الازل
وانت ادره ..القصيده شتنفع ابلا مستهل
جنت تقره ... بلايه حب حيدر فلا ينفع عمل
الينطي نحره ...بشرف يبقه ولا يبايع للجهل
بجبهتك طول الزمن مكتوبه
يال لثارات الي سلبوا ثوبه
تنصر حسينك تريد .. اخره ودنيه سعيد
ـــــــــــ
عالم انت ...وحيّرت كل الخلك بعلومك
ما تركته ...منهج الكرار ابد من يومك
جي عرفته ...هو حق وجهلت ناس تلومك
والمحنته ... ياسعيد امغيّرات ارسومك
بطول عمرك جنت لا متبالي
تصيح بس حيدر علينه الوالي
يل جنت تلعن يزيد .. اخره ودنيه سعيد
ـــــــــــ
والمواقف ...كلمة الحك ابوجه طاغوتهه
والي خايف ... هواي ما ينسمع جانت صوتهه
وانت حالف ... الجلمه فرصه الروح عيب تفوتهه
وانت عارف ...تحيى ناس امنجل حيدر موتهه
خوفه بالحجاج اجت من يومك
واعله سيفه انتصر نزف ادمومك
وصرت بالنهج شهيد .. اخره ودنيه سعيد
ـــــــــــ
عالي شانك ...ومرقدك ضل عامر بزوارك
وبأمانك ... ينتهل من حضرتك خطارك
وبمكانك ... للسمه ضل تسطع ابأنوارك
يل زمانك ... حيّريته ابعلمك واسرارك
يا رمز عالي بنظرنه انشوفك
نعتني المرقدك والله انطوفك
واليزورك من بعيد .. اخره ودنيه سعيد
ـــــــــــ
حصّلتهه ... المنزله جاي دمعتك عالضامي
ومن نلتهه ... صحت لجل السبي كل الامي
واهملتهه ... الدمعه عل صاحت الحكَوا اخيامي
وجن شفتهه ... تنادي عالتل كَوموا لمَوا ايتامي
الليل تبجي عالمشت مسبيّه
وتلطم اشما تذكر الترجيّه
وجيف جرحك ما يهيد .. اخره ودنيه سعيد
ـــــــــــ
الشاعر محمد حسن ضيغم

عل لحن قصيدة انه خايف الليالي الفاطميه
لذكر سعيد بن جبير

هل مصيبه ... جمرة ظلت مسعره ابكَلب الموالي
هل مصيبه .. ياسعيد اعليك دمع الشيعه هالي
ــــــــــ
هذا طبع اليعشك الزهره الزجيه
واليوالي بمنهجه حامي الحميه
لازم ايضل دمه للعالم قضيه
احنه شيعه ونبقه شيعه رافضيه
هل مصيبه ... اتحاربينه جي علينه هو والي
هل مصيبه .. ياسعيد اعليك دمع الشيعه هالي
ــــــــــ
يل عشت كل عمرك ابحبّك لحيدر
من علم حيدر علي علمك تنوّر
صار حب حيدر الك شريان الابهر
واليبغضك يا سعيد انعرفه منكر
هل مصيبه ... تجهلك بعض الخلك لا ما تبالي
هل مصيبه .. ياسعيد اعليك دمع الشيعه هالي
ــــــــــ
ندري بالحجاج ذليته ابكلامك
وناقشيته وارتفع حتما مقامك
وبجوابك فرّحة مهجة امامك
يلّي بس الحيدرك معلن غرامك
هل مصيبه ... محاربينك جي كلت حيدرنه غالي
هل مصيبه .. ياسعيد اعليك دمع الشيعه هالي
ــــــــــ
لان شيعي حللوا دمّك خصومك
وعل ارض وبلا سبب سالت دمومك
واحنه ماننسه ابد ذكرات يومك
نعيش حزنك والجرح شايل همومك
هل مصيبه ... تبقه حتما عاليه بعلو المعالي
هل مصيبه .. ياسعيد اعليك دمع الشيعه هالي
ــــــــــ
يل نصبت اعله السبي والطف عزيه
وجانت الحركَ الخيم عينك جريه
اليوم الك مأتم نصبنه ابهل مسيه
بيك جينه انواسي حماي الحميه
هل مصيبه ... صحت هي الغيّرت ياشيعه حالي
هل مصيبه .. ياسعيد اعليك دمع الشيعه هالي
ــــــــــ
الشاعر محمد حسن ضيغم

نعي لسعيد ابن جبير

بقلم ام حيدر الحمزه الطائيه

🔷🔷🔷🔷🔷🔷🔷🔷🔷🔷🔷

ابجوا السعيد ونوحوا اعليه
ضحه بحياته وما نجازي
الحجاج هد حيله وغدر بي

🔳🔳🔳🔳🔳🔳🔳🔳🔳🔳🔳

گظه العمر ياناس. مهموم
غريب من العده مهظوم
ومن غدرة الحجاج مالوم

🔳🔳🔳🔳🔳🔳🔳🔳🔳🔳🔳

لهله بعد ما توصل علوم
هذا الفراك ايصير لدوم
وكلبه على اهل البيت مالوم

🔳🔳🔳🔳🔳🔳🔳🔳🔳🔳🔳

وين الاهل خل تبجي اعليه
يمه وتغسل الجثه وتواري
توصله لكبره وتلطم اعليه

🔳🔳🔳🔳🔳🔳🔳🔳🔳🔳🔳

يمه وين اليوصل الخبر لهله
ميت ابنهم ماهي سهله
الحجاج متوازي اعلى كتله

🔳🔳🔳🔳🔳🔳🔳🔳🔳🔳🔳

اتحظر لكتله ويقره قرأن
الدهر بالطيبين خوان
خلصوا كلهم ليش الاحنان

🔳🔳🔳🔳🔳🔳🔳🔳🔳🔳🔳

تم بفضل الله وحمده
نسال الله القبول
يا رب نسالك رضاك

بقلم خادمه الزهراء... أمام حيدر الطائي.... بصوت خادمكم سيد سعد الزاملي

ابوذيات عن سعيد بن جبير رضوان الله عليه

انعرف منهو عبد دنياه منحر
ومن برد الوكت من هاب منحر
سعيد الفده لأجل الدين منحر
بحب ال النبي نال الثريه

عندك ياسعيد الصبر عده
وعدوك بس ظلال وجور عده
مشه الحجاج وكته راح عده
وبقه مجدك يبو الروح الوفيه

الشاعر حسن لعيبي الحريشاوي

الاداء ابو هاشم الربيعي

(تابعي اتعرفون)
.....................
ماأهــــم تـدرون ** لوكطعتـــو راسي
تابعـي اتعرفــون ** لوكطعتـــو راسي
,,,,,,,,,,,,,,,,,,
آنــا ابـــن اجبيـــر انــا. كلكــم اتعرفوني
مغرم بحب الصميــده. وأعشكــه تدروني
أبد ماعـوف الاحبــه. حتـــى لــو ذبحوني
هو مالي العين هو. ابغيره تعمه اعيوني
عاشكه ومجنــون** لو كطعتو راسي
,,,,,,,,,,,,,,,,
تابع الحيدر أمامي. وامشـي انـــا بنهجــه
نصبه البـاري علينــه. والي هــــو وحجـه
تدري بطــاه محمـــد , كال اتبعــه وتنجــه
فدوه للكرار راسي. وافدي لجله المهجــه
هسه واتشوفــون ** لو كطعتو راسي
,,,,,,,,,,,,,,,


من حجـــر اتعلــم انــا. كل ولائـي الصادق
وميثـــم التمــــار يبقــــه. بهـالولايـه سابق
كطعو ألسانـه الاعادي. وماسكت ظل ناطق
ابعلـــي اصبـــح كلامـه. وبالكفـــر ماوافـق
بالولـــي مفتــون** لو كطعتو راسي
,,,,,,,,,,,,,,
انا ضد الظلــــم ثائـر. واليجـور انبـدلـــه
حسين علمنـــه بثورتـــــه. مانطــخ للذله
لازم انكــــوم ونجاهــد. من نشاهـــد خله
انصيح ياحجاج اوكف. وظالـم انتـه انكله
كلا يا ملعـــون ** لو كطعتـو راسي
,,,,,,,,,,,,,,,,,
الديــــن بركـاب النشامـه. امنــــــاه بارينه
والنبي وصــه بحديثــــه. والفحـــل والينه
نوكف بوجه اليمسه. انصير شوكه ابعينه
واجب أنثور ونجاهـــد. هـذا حـــق اعلينه
كلكم اتسمعــون ** لو كطعتـــو راسي
,,,,,,,,,,,,,,,,,,,
الشاعر: حيدر كامل العبودي




ليلة ٢٥/ربيع الاول /١٤٤٦هجري
السبت 28\9\2024 ليلة
استشهاد الصحابي الجليل
سعيد إبن جبير رض
#قصائد__محرم_١٤٤٦_ه‍

بصوت
خادمكم الرادود ابو هاشم
الربيعي

استشهاد سعيد بن جبير (رض)

         ثائــر تســطـــع انـــواره
         تجـــري المدمـــع زواره
         بالاخـبــار ــ اسمه سعيد
         ابن اجبير ــ يــا صنـديد
         تجـــري المدمــــع زواره

ابآخــر ربيــع الأول شلـــون امصــاب
ذكــره شهـــادة تابعـي امن الأصحاب
بهاليـــوم إبـــن اجبيــر ودّعنـه وغاب
نواسي بمصابه المرتضى داحي الباب

        إنشد عــن سـر اعلــومـه
        ناصَــر حيــدر بدمـومــه
        بـــالآثـــار ــ اسمه سعيد
        ابن اجبير ــ يا صنــديـد
        تجـــري المدمــــع زواره

عاصَــر علــي السجّــاد نــال الأمجـاد
أثنــه علـه ابــن اجبيـــر زيــن العُبـّـاد
منــّـه تِعَلـّــــم كـــل علــــوم الإرشــاد
نـــال المجــد مــن تِبَــع نــور الأسياد

       ســـاير بدروب العتـــره
       والحُبهـُــم قدّم عــمـره
       بالأعمـــار ــ اسمه سعيد
       ابن اجبير ــ يا صنـديــد
       تجـــري المدمــــع زواره

ناشِــر علــوم الديـــن ديـــن الاسـلام
فَسّـر كتـــاب البـاري وضـّـح لحـكــام
بســوح العلـــم مامثـل علمه صمصام
والأشــد واجــه جــور وحقـد الظِلام

       ٲهل الباطـــل  معــروفـه
       للشيعـــي لا متـــعـــوفـه
      ظل شنيار ــ اسمه سعيد
      ابن اجبيـر ــ يــا صنديـد
      تجـــري المدمــــع زواره

عـــاش ابعهـــد طاغــي زنيم وغدار
هالطاغيـــه الحجـــاج يحكــم بالنار
صَــب انتقامـــه اعليـــه ســل البتار
ظنـــه سعيـــد ابموتـــه ماتبقه آثـار

      واتخلـــد اسمه و ذكـــره
      الكــل طاغي اصبح عِبره  
      رغم الصار ــ اسمه سعيد
      ابـن اجبير ــ يــا صنديـد
      تجـــري المـدمــــع زواره

سهم الاجل صَوّب صحابي العتره
قَــدّم سعيــد لأجـــل دينــه نحـره
نــال الشهـــاده هذا ناتـــج صبــره
لجله بگلبنه اليـوم حسره و جمره

        ناصر  حيدر  والينـــــه
      امصابــك نار  و تچوينه
      بيوم الثار ــ اسمه سعيد
      ابن جبيـر ــ يــا صنديــد
      تجـــري المدمــــع زواره

يا من حِمَل بسم الرسالــه الرايات
ويامن شِهَر سيف العدل بالثورات
يا سيدي ندريك قاضي الحاجـات
نرجه الشفاعه ومـا تردنـه هيهات

      هـــا يالتخـــدم مولانــــه
      وعيونـــك مــا ينــســانــه
      بذيچ الدار ــ اسمه سعيد
      ابن اجبيـر ــ يا صنــديـد
       تجـــري المدمــــع زواره
٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪٪
الشاعر عمار الراشدي


ليلة ٢٥/ربيع الاول /١٤٤٦هجري
السبت 28\9 \2024 ليلة
استشهاد الصحابي الجليل
سعيد إبن جبير رض
#قصائد__محرم_١٤٤٦_ه‍

ليلة ٢٥/ربيع الاول /١٤٤٦هجري السبت 28\9 \2024 بصوت خادمكم الرادود ابو هاشم الربيعي ليلة استشهاد الصحابي الجليل سعيد إبن جبير رض #قصائد__محرم_١٤٤٦_ه‍