الاداء ملا بلال الحربي

رسول الله رسول الله محمد يا رسول الله
::::::-----::::::
اولهم محمد كال الله الوصه بالعتره
اضلم كل ضوه الدنيا وناحت فاطمه الزهره
تنوح ارض وسمه وياها يحزن عالم بأسره
املاك السمه بهل يوم تبجي اعليك بالعبره
:::::-----::::::
زلزال الارض بيها موتك يا رسول الله
يمن خطيت دين الله بسمك تكمل القبله
خاتم للنبوه انته يغيب اعلينه مو سهله
اليوم العالم بأسره ينعه ويلطم الاجله
:::::----::::::
اجينه يا ابو الزهراء نحمل ضيم دنيانه
نشكيلك هضمنه اليوم اجينه بروح حيرانه
جور وضلم هاي اعداك الماترحم يمولانه
مصابك يارسول الله تنوح السمه المبجانه
:::::-----::::::
فكدك مو سهل والله علينه لا تضن فكدك
شوف شلون ديانه لعبت بينه من بعدك
انته البل عرش صوتك انته الباري اليودك
مثلك ما يصح مولاي لا قبلك ولا بعدك
:::::-----:::::
اول بالرسل اول خلافك موحشه الدنيه
محمد يا رسول الله بحبك صادق النيه
وكتنه الما رحم بينه تعال وشوف تاليه
الما بطل دمع عيناه حيدر عينه جاريه
:::::----:::::
حسن صالح العيساوي

‏مقطع صوتي من حسن صالح العيساوي

راية رفت بالحرم .... يا رسول الله
بسمك انباهي الامم .... يا رسول الله

....
راية رفت بل الاعالي تحمل اسمك
اتعزي بنتك فاطمة الوادعت رسمك
يارسول الله اعلى بابك باقي رسمك
الله يلعن كل شخص يالهادي سمك

السمموك بمعرفة  .... يا رسول الله
نورك الطاهر خفة  .... يارسول الله
...   

يالحيت الدين بسمك والله نهواك
عايش بوسط الضماير ما نسيناك
اشما يعادينة الزمن باقين وياك
صرخة الاحرار ثورة تسمع اعداك

ثارك ابوسط الكلب .... يا رسول الله
عايش وما ينشطب .... يا رسول الله
.......
يا شمس رب الجلالة الضاوي نورك
للأبد ما يخفى عل الاسلام دورك
رحمة الله اجسدت كلهة بظهورك
الف هنيالة الوصل كبرك يزورك

لجلك الكون انخلق ... يا رسول الله
اي وحك رب الفلق ... يا رسول الله

........
يارسول الله لضريحك نوصل ازحوف
بلمدامع والبواجي كبرك نطوف
مايمنعونه النواصب عينك اشوف
احنه تربات الكفيل الرجف الخوف

نسحك ابصدر الرجس ....  يارسول الله
لجلك انضحي النفس .... يارسول الله

........
مثل عاشر من محرم نحي ذكرك
والمواكب تنصب هيج على دربك
ابد ما خاب اليخدمك خدم ربك
دنيه فاز واخره كل شخص حبك

جنة الله جنتك .... يارسوك الله
يا شفيع الامتك ..... يا رسول الله
.......

الحمدلله رب العالمين
اللهم صل على محمد وال محمد
موسى الخادم

الاداء ستار الصالحي

من قال هجر   واللهِ كفر 
..
بعده اخضر اتراب النبي
واتأزم  اخلافه الوضع 
بس غمض عيونه ومشه 
بانت معادنها الربع 
هلّو تره بكرسي الحكم 
ماهلو اعليه الدمع 
الشاهد تره بكلمة " وإن "
والشاهد  بكسر الضلع

للضلعِ كَسَر    والله كفر
....
الصاحب الكلبه وصخ
مايطهر ابأكبر بحر 
والي اجاك ابمصلحه 
مايلزم اخلافك ظهر 
اشلون اذا حاقد اجه 
شيسوي لو فرصه اتحظر
منهو الجمع بيده الحطب
ومنهو الي عن حكه صبر 

من كان اشر   والله كفر 
....
تكول الكُتب مابينو 
اصحاب النبي بجنازته 
ذِكرت علي وبس جم شخص
النزلوه بحفرته 
هل بالسيقفه اتجمعو 
مأتم قروه لمصيبته !
ام الخلافه إلي اهم 
عدهم اهم من دفنته 

من مِنهم آصر   والله كفر
.....
خلونه نتكاشف حجي
والي ذكرناه ابسند
والمارضه والماقنع 
يوم الحشر عدنه وعد 
باجر نباوع للنبي 
ومنهو على ايمينه كعد 
وباجر يبان البي دغش 
والي كضه عمره حسد 

لامنها مفر    والله كفر
....
يل حاير ابهل مسأله   
مو عاطفه واتبع عقل 
تريد اتعرف منهو الاصح  
دور صحيحينك عدل
تلكه الاحاديث وبعد 
تلكه الحجي الماينعقل 
ادري صعب تقنع لجن
انت اسأل وكتبك تحل 

نادته سقر    والله كفر
....
يامن خنت دين النبي 
يوم الحشر اين المفر
ماينطقُ عن الهوى 
كال الله وتكله هجر 
اترد على الله احجايته 
والرد على ربه كفر
احمد وصل للمنتهى 
وانت الي توصل يم سقر 

من فيه غدر    والله كفر
.....
يامن صحت يهذي النبي 
بدين النبي يعني اكفرت 
والكل ضمير اترِك حُكم
ها يالصحابي اشبينت 
مصلحجي جنت ابصحبتك  
بكرسي الخلافه استطمعت 
شقيت الاسلام بعصى 
مو موسى وبهاي افلحت 

والخافي أَمَر   والله كفر 
...زهير الابراهيمي

الاداء ستار الصالحي

قصيدة لاستشهاد الرسول ص

البگه براسك بهاي الليله مهدينه
بحزن نرفع الك خالص تعازينه
...................

نعزيك بحزن ياخاتم العتره
عله المختار جدك بالگلب جمره
چم مقتل الك يبن الحسن نقره
شبع كلبك مصايب الله اليعينه
.....................

بس انته الوحيد الكسرته بروحه
التتلاشه فرحته وتكثر اجروحه
يمهدي امنياتك كلهه مذبوحه
وعمرك بالهموم اتخلص اسنينه

………..

من يوم اربعين حسين والدمعه
بعدنه بثوب الاسود والحزن ينعه
اجه مصاب الرسول وصوتنه تسمعه
ونظل وياك ماتخلص بواچينه
......................

غريب ومن غربتك گلبك اتفطر
ويوميه عزه لهلك تجي وتحضر
وهلليله اعله جدك ينحب المنبر
محمد غاب نوره وغمضت عينه
........................

الليله نواسي اجينه عيونك الحمره
ونواسي الزجيه الطاهره الزهره
محتاجتك ماي كلبونه الصحره
عله دروبك نريد اللي يدلينه
.....................

دلينه اعله دربك وين نتعنه
يمهدي هل وكت كل خير مامنه
هل دنيه بوجودك احله من جنه
يكل الخير يملوحة محاچينه
..................

خسارتنه الچبيره بفكد ابو القاسم
ويظل هذا العزاء بنظرتك دايم 
الى ساعة ظهورك سيدي القائم
من ترفع الرايه وانته تحدينه

………

نسألكم الدعاء
حسين صادق العقابي

الاداء ستار الصالحي

للزهره الليله انواسيها
    للزهره الليله انواسيها


#######################

     ظلت اتنوح اعله امصابه
     ودمعتها  تجري   سچابه
     شيصبرها  عگب   اغيابه
     وحشه الدنيه من واليها
      للزهره  الليله  انواسيها


######################

     من سمهم چبدك مالومه
     وحيلك  بايد  مابي  گومه
     بنتك   اخلافك    مهظومه
     لمصابه الدمعه تجريها
      للزهره الليله انواسيها


#######################

      رايح   يابويه     ابهل ليله
     ولفراگك ظل تبچي العيله
     حيدر دمعه اعليك ايسيله
      ياوسفه  رايح   هاديها
     للزهره الليله انواسيها


#######################

    اصرخ لمصابك كل يوم
    شحجيلك يابويه اهموم
     وضلوعي كسرتها الگوم
     والكسره منهو يداويها
     للزهره الليله انواسيها

######################

    اصحابك خانت بالعتره
    ضلعين  كسرو   للزهره
     وطف حسين الداسو صدره
    والجمره  ياهو  يطفيها
     للزهره الليله انواسيها


#######################

     ياحزن  احجي  يالمختار
     محسن وگعو اباب الدار
     وكتلو   عبدالله   الاشرار
     چم لوعه ابروحي اخفيها
     للزهره الليله  انواسيها


######################

     و بگلبي   التهبت   نارين
      نار   ابابك  شبها   البين
      ونار الشبت بخيام حسين
      ولسه ظلت   تسعر  بيها
       للزهره الليله انواسيها


#######################

       بحبال    الكرار      انگاد
       وبعده اتحولت  للسجاد
        من جتفوه  گوم  ابن زياد
        تدري بويه وتعلم بيها
        للزهره الليله انواسيها


######################

      چبدين   اصوب   بصواب
      چبد  الحسن   بسم  ذاب
      وچبد حسين بسهم انصاب
      سهمين  ابگلبي  راميها
       للزهره الليله انواسيها


######################

     راسين صابت  هالناس
     صوبو  حيدر  أول راس
     والثاني  راس   العباس
      والعيله منهو يحاميها
      للزهره الليله انواسيها


######################


الشاعر علي غني الصفار الحلي

الاداء ابو هاشم الربيعي