مقدمه / ام البنين عليها السلام 2024

ام البنين تصيح يحسين. يبني جاوبني
رايح يغالي بهالظعن وين. يبني جاوبني
______________________
طلع ظعن الحسين بهيبته وقدره
بقيادت مهجة الهادي ابوالعتره
لن ام البنين تصيح بالعبره
اودعك انتظرني يا ضنه الزهره

تاخذني لو لا ياضوه العين. يبني جاوبني
رايح يغالي بهالظعن وين. يبني جاوبني
______________________
اودعك ياحُسين وتنزف جروحي
گبل لا تمشي ريت الموت اخذ روحي
بده لآلامي دمعي المانشف يوحي
لا دمعي النفعني ولا نفع نوحي

صبر الزجية يحصل منين. يبني جاوبني
رايح يغالي بهالظعن وين. يبني جاوبني
______________________
رحت عني وبقيت بدمعتي وحزني
ظلمه بلا ضواك الدار تخنگني
ابد ما حسّبت فد يوم تتركني
دمعتي عليك ما تنشف بعد يبني

بعدك شداوي جرح جرحين يبني جاوبني
رايح يغالي بهالظعن وين. يبني جاوبني
______________________
ألك ربّيت يبني اربع اولادي
فدوه لشوفتك بس اخذ مرادي
اواسي بولدي امك بضعة الهادي
ارفع راسي بيهم بالحشر غادي

كون بدماهم اوفي بالدين. يبني جاوبني
رايح يغالي بهالظعن وين. يبني جاوبني
______________________
بقيت احسب ليالي ونتظر جيتك
يروح الزهره ترجع يمته ناطرتك
وحيد بلا عضيد بهاي ما عفتك
اخو يوفي بعهوده وياك سلمتك

بس لا بخل ما ضحّه چفين. يبني جاوبني
رايح يغالي بهالظعن وين. يبني جاوبني
_____________________
عكب طول انتظاري عليك والحسره
لن بشر ابنَ حذلم هيّج الجمره
صاح حسين يا ناس انگطع نحره
الخيل بكربله داست على صدره

صح باقي وحدك مالك امعين. يبني جاوبني
رايح يغالي بهالظعن وين. يبني جاوبني

سيد زيد الفحام
________________________________________________

نزلة ام البنين عليها السلام 2022

وصيتي يابنيني
تخدمون _ تنصرون _ ابواليمّه وبنينه
..........

ولّدي يا حيّاكم _ عندي كلمه وياكم _ امكم وسمعوني
حسين لتعوفونه _ اخوته وتفدونه _ اغله من عيوني
هوه عمري وروحي _ يشفي كل جروحي _ بهالأبن خيعوني

كل ابن من عدكم الربّيته
للحبيب حسين فدوه انطيته
كلكم تضحّون لجل عيونه
وشعر بتقصير ما وفّيته

يولّدي يانشامه
تضحّون _ تنصرون _ ابواليمّه وبنينه
.............

جنّة الله ونوره _ وآيته ودستوره _ حسين يا اولادي
الله عظّم شانه _ قارنه بقرآنه _ هذا روح الهادي
من عطائه وجِوِده _ هيبتي الموجوده _ شارتي ومرادي

حسين جبرائيل خادم بيته
أليخدمه الله يرفع صيته
يالله شدّوا حزامكم يولادي
انتوا صفوة حيدر وتربيته

اخدموه للمنية
توافون _ تنصرون _ ابواليمّه وبنينه
..........

للسفر شد حيله _ اخذ كل العيله _ يالله شدوا حزامه
صيروا انتو عيونه _ سور يحمي ضعونه_ رفرفوا بعلامه
من يمر طاريكم _ خل يزامط بيكم _ بالحرب گدامه

تفتخر ام البنين بزودكم
بكربله ياولّدي وفوا عهودكم
دون ابواليمه حبيب الهادي
بذلوا بالميدان كل مجهودكم

يفتيان الهواشم
تگدرون _ تنصرون _ ابواليمّه وبنينه
...........

گام ابنها الهيبه _ حيدر بتنصيبه _ هاشمي ودگ صدره
ما يذل عباسچ _ يُمّه ارفع راسچ _ من علي هالشمره
في سبيل حسيني _ انطي چفي وعيني _ آني الزم ظهره

ابنج العباس گد حچايتي.
عالنهر باجر ترفرف رايتي.
آل امية بكربله افنيهم
زينب وكل الحرم بحمايتي.

شهم گد الكفاله
تلبّون _ تنصرون _ ابواليمّه وبنينه
...............

من گبل ميلادك _ يبني حيدر رادك _ تنصر ابنه الغالي
امّك موصّايه _ يالله شيل الرايه _ خل ترف بالعالي
وزينب اختك جِلِها _ انت تتكفلّها _ خادم الهه بدالي

يابوفاضل بيك ارفع راسي
ادري كدها وماتخيب احساسي
ضحّي بچفوفك لخوك وزينب
خل تسولف بيك اهلي وناسي

كفيل الهاشمية
تربحون _ تنصرون _ ابواليمّه وبنينه

سيد زيد الفحام
________________________________________________

رئيسية ام البنين عليها السلام 2022

محروس بالله امن الخطر يمسافر بليل
بعيوني لجــروحك اثـر والمدمع يسيل
عين الله ترعاك.
ماذيني فرگاك والمدمع يسيل
...................

ام البنين الاربعه _ بضيم الدهر متگبّعَه _ منك حرمني
يالسافرت وين السفر _حاچيني ياضي البصر _فگدك هضمني

بسلامه تعود ادعيلك يبوالسجاد
فدوه لشوفتك يبن النبي الأولاد
المثلك كل وكت مثل الهوى ينراد
گلت صبري بغيابي والصبر ما فاد

ضحيتلك اربع ولِد لو اكثر انطيك
تدريني وفّاية وعلي ما ابخل عليك
اتمنّه ويّاك
ماذيني فرگاك            والمدمع يسيل
...................

يا اغله من ولّدي وأهم _ دنيايه من بعدك وهم _ ياسلوة الروح
لمن رحت راح الامل _ يالماخذ وياك الاهل _ عايفلي لجروح

شكُر للباري اسجد كل فجر لو طر
بخدمّتك عمري خلّصته يبوالأكبر
شفت منك عطف طيبه وبعد اكثر.
تعاملني مثل امك اذا احضر

فراگك مثل سيف ويحز ببتوت گلبي
وعيوني بغيابك طفت ما شوف دربي
ما اكدر انساك
ماذيني فرگاك            والمدمع يسيل
..........

اربع بنيني بخدمتك _ يحسين يبني وفدوتك _ وكت المنية
عباس شايل رايتك _ وصّيته يكفل عيلتك _ بالغاضريه

حزام لظهرك العباس ربّيته
ودونك بالمنية يضحّي وصّيته
وفه وطيبه وشجاعه وخوّه غذّيته
كافل زينب ومن زغره سمّيته

منذور الك يابوعلي من زغره عباس
فدوه الچفوف التنگطع وي طبرة الراس
متكفّل ألواك
ماذيني فرگاك            والمدمع يسيل
.............

ضلّيت اتاني عله الدرب _ مستعره نارك بالگلب _ ليله عله ليله
يوليدي يمته المُلتَقَه _ منكم ولا واحد بقَه _ بسّ العليله

تنشدني عليك وآني انشدها
تعال وشوف فاطمتك يوالدها
طفله وفگدك الضاهدني ضاهدها
تبچي وبالواچي دوم اساعدها

يحسين آني وطفلتك ننتظرك تعود
نحسبلك ودمع الحزن يحفر بلخدود
يالچنّه بحماك
ماذيني فرگاك            والمدمع يسيل
...................

بهالحاله لن صوت اعتله _ يروي اللّي صار بكربله _ رجّ المدينه
بِشر ابن حذلم من وصل _احچيلي ناديته شحصل _ ببني وبنينه

يگلّي عظّم الله اجرج بعباس
گتله خبرني ياناعي بأعزّ الناس
صاح بصوت مفجع يجرح الاحساس
ابواليمه انذبح بالخيل جسمه انداس

هد حيلي يوليدي وطحت يا اغله الاحباب
ألطم عله الراس وصحت من عُظم لمصاب
فجعوني بدماك
ماذيني فرگاك            والمدمع يسيل
...................

گالولي راسك عالرمح _ ما بي كتر سالم يصح_ تنزف دمائه
جسمك تگطّع بالذبح _ الف وتسعميّة جرح _ سلبوا ردائه

ردت يحسين يبني بكربله يمك
اشربك ماي لو اتخضّب بدمك
اسوي فياي وحمي من الشمس جسمك
اردّ الخيل عن لا تسحگ بعظمك

ما همني جرح الاربعه بيهم اواسيك
اتمنّه يمك من طحت اگعد وداويك
مهضومه بجفاك
ماذيني فرگاك            والمدمع يسيل

سيد زيد الفحام
__________

مقدمة ام البنين عليها السلام

آنه ام البنين ابچي وأون سكته
عله وليدي المشه وللموت ودّعته
........

حزن يعگوب حزني واكثر جروحي
لا تنشف دمعتي ولا هجع نوحي
بنار الفرگه تطفه وتشتعل روحي
وبنيني الاربعه من راح سلّمته
........

ابن الزهره ابني حسين تاج الراس
ريحانة مُحمّد اغله كل الناس
فدوه لنور وجهه منحر العباس
لو بيدي الأمر والله ما عفته
.........

اخذ حيلي برحيله واخذ شَوف العين
امشي ليا وجه بغيابه ورحل وين
يبني حسين ارجع كافي يبني حسين
گلبي امن المناحة عليك گطّعته
.........

بقيت بلا اهل ياناس من يومه
أمّ بدار ظلمه وروح ملچومه
بقت بسّ العليله وياي مهضومه
ليل انهار تبچي وما هدت بنته
..........

فدوه اولادي كلهم فدوه لعيونه
المهم سالم يردلي ومايغدرونه
ادري بآل امية ما يرحمونه
راح ومارجع عالنار ناطرته
..........

راح حسين منّي ومارجع ليّة
راح الچان ينشد كل مسه عليّة
اقره الفاتحه وادعيله يوميّة
يرجع بالسلامه وگلبي صَبّرته
..........

اخذني الموت ريت ولاسمعته شصاح
ابن حذلم يصيح حسين منكم راح
جسمه عله الوطية وراسه فوگ ارماح
هذا اللي خفت منّه وتوقّعته
.........

يعظّم اجرج الله بولّدج الطيبين
يبن حذلم صحت اخبرني عن حسين
راح حسين لطمي وهلّي دمع العين
عفته بلايه راس وخيل دايسته

سيد زيد الفحام
________

قصائد محرم… نزال
………………………
يايمة ماأوصيك بحسين
يستاهل الݘفين والعين
………………………………..
جازيلي تعبي بوگفتك هاي
اعصر الغيمة لْـۆ طلب ماي
انــة ادري مــاقصرت برباي
راضع وفــة وأدريك وفاي

ناذرتك ألهم والنذر دين
يايمة ماأوصيك بحسين
……………………………………
جايبتك انى تحرس اضعون
أركض ركض لوصاحت ام عون
أختك وظمهة بنص العيون
كل ولدي ألهة فدوة يرحون

لْـۆ حشمت گلهة شتأمرين
يايمة ماأوصيك بحسين
…………………………………….
مخلفة أربعة وماݘني وفيت
كون اربعين مخلفة يا ريت
هوة انة لجل حسين شنطيت
وية ابني اموت شگد تمنيت

ظليت أهم واصفگ باليدين
يايمة ماأوصيك بحسين
……………………………………
إسمع وصيتي يبني عباس
عندي العباية اغلى من الانفاس
من تعطش امطر بالطف احساس
ولحسين ابد مــاتگرب الناس

بجيش أل أمية اگلبهة صوبين
يايمة ما أوصيك بحسين
……………………………………..
لوصاح أخيك يبني أوصيك
تاخذ تحية شما يحاݘيك
أڰبال الزجية ارد افتخر بيك
تدري الزجية أبني تسميك

صح ولدي لاكن عدهة غالين
يايمة ما أوصيك بحسين
……………………………………
صوب الخيم لْـۆ جت السهام
اوگف درع جدام الخيام
عينك واحذرك بالك تنام
ولدي انتم ولحسين خدام

والموت واحد ماهو اثنين
يايمة ماأوصيك بحسين
…………………………………….
بالغيرة اعرفك يبني منعوت
تعيش المواقف لمن تموت
الما عندة أخو مايلگة تابوت
من ينگطع من عندك الصوت

ينتصر دم حسين والدين
يايمة ماأوصيك بحسين
……………………………………
تمت
الْحٍمَدٍ للـّہ
✍خادمكم الأقل… حسين حمدان الدلفي
رزق مولاتي ام البنين ع

الحان ناجي القرناوي...نزله ....نزله

يايمه ماوصيك بحسين
يستاهل الجفين والعين

بقلم ....حسين حمدان الدلفي

عزاء ليلة مولاتي ام البنين عليها السلام
#نزله #شور

يعباس       اسمع الوصيه
يعباس      من امك الوفية
==========
اسمع الراي.    يوفاي        يميزان الشيم
ها يعباس.    ينوماس.     تفيي اعل الخيم
تگطع ادروب. بالحروب    اذا رف العلم
طب على الماي. يالهواي.  يالتنگط قيم

يعباس.     عالي كالثريه
يعباس   من امك الوفية
==========
يبني والجود.    والازنود.      اريدن هايه
بين الاسيوف.   بالاطفوف.   ترف الراية
سيفك انشال.   بالاثگال.    واعرف الغايه
تفدي جفين.     للحسين.     تدگ الثايه

يعباس.   صاحب الحمية
يعباس.  من امك الوفية
=========
طيح الخيل.  على الخيل.  يتربات الفحل
ذب الازلام.    عالازلام.      اذا جدمك نزل
طيح الروس.  والانفوس.   تراويها الاجل
ادري عباس.   نزل داس.    عساكر من زعل

يعباس         بيدك المنيه
يعباس.       من امك الوفية
==========
طلع الحيف.   على السيف.   تگض اجفوفك
بمتنك الواك.   والوياك      تريد تشوفك
كعبة والماي.   يوفاي.       يضامي يطوفك
دينك حسين   يظل دين.    ثبت معروفك

يعباس.  موقفك هويه
يعباس من امك الوفية
=========
سور الاخيام.   والايتام.     يكافل زينب
التلاگيه.        تخليه.         يتيه المهرب
يسمع الصوت. إجه الموت.  يشوف اليگرب
يمه الاطفال.  والعيال.   عذب خل تشرب

يعباس.      لخاطر الزجيه
يعباس.     من امك الوفيه 
==========
مدرع ونار.     شنو الصار.    تكول الوادم
منهو اليصول.   واليجول     علي جن قادم
القادة تحتار    يمغوار.     تشوف الصارم
لگطع الانفاس. يعباس.     تشوفك عازم

يعباس.     حير ال اميه
يعباس.     من امك الوفية
==========
الشاعر علي النائلي

لشاعر علي النائلي

بصوت ستار الصالحي

ام البنين ع تتمنى لو انها ذهبت لكربلاء ودون الحسين وزينب عليهما السلام قتلت

****

يا يمــه كـون اشبـع ضمّه
و أتغسل أبفيــض الـــدمّه
دونـــك يضنــوة فاطــمـه
حبيبي يا حسين حبيبي يا حسين

*

كــون متعنيه الطفـوف وابـره ضعنـك بالــدرب
ومـن تحنْ للــزهره يبني آنــه أضمــك للگلـب
ادري يبني حسين خايـف مثـل أمــك أنضــرب
الصار بيها ريته بيه والله يبني شگـد صعب
وبعيني يــا ريت أنسطر
ومثــل الــزچيه أنعصـر
وظلعــي بغدرهم ينكسر
حبيبي يا حسين حبيبي يا حسين

*

كـــون ويــاكــم ييمّــه آنـــه رحـــت لكــربلــه
ومثــل زينــب واليتــامــه انسبــي وي العايلـه
كــون ســوط الحره زينـب ابمتني انه استقبله
وكون مـو زينب شتمـها لا شتمنـــي حــرملـه
و بأيــدي يــاريته الحبّل
ودون زينـب عل الهزل
ولا شمــتْ بيــها النــذل
حبيبي يا حسين حبيبي يا حسين

*

كون ضامي اگليبي دونك مــا وصــل گلبك عطش
وكون جسمي الطاح دامي وعالرمل يبني أنفرش
ودون زينب آنــه أنوحن عل الاخــو بليل اهـدعش
شلون وانتــه ابن الزچيه مــا حمل جسمك نعش
دونك يريــت أعلــى الــرمل
أبفيض الدمه جسمي أنغسل
لا والـــي يمّــي ولا أهــــــل
حبيبي يا حسين حبيبي يا حسين

*

كـون دونك آنــه اطيحن رضــت أبصدري الخيــول
وريت صدرك يبني سالم وفوگ صدري اتظل تجول
خــايفه أربــــع بنينــي ما وفـــــو وي البتــــول
باچــر بيوم القيامه شنهو عـــذري وشــرد اگــول
يا وليدي دونك عل الثره
جثتـــي ييمــه امــــوذره
ومن چفي گطعو خنصره
حبيبي يا حسين حبيبي يا حسين

*

ريت بالطف انه وانظر طيحت ابني أعلى النهر
شلون يــا روح الـزچيه صحت يـا خويه الگمر
انته جيشي أحــزام ظهري وانكسر مني الظهر
كون ظهري انكسر يبني ومني محزوز النحـر
يــا يمه محتــاره بحـرم
من حرگوا علينه الخيم
وماكو رفيف مـن العلم
حبيبي يا حسين حبيبي يا حسين

*

كـون مسبيه وأروح أعلــى الهــزل متيسره
دون زينب بالضعينه أدروب وحشه ومقفره
و أوگف أبديوان أميـــه بالحـــرم متحيــره
وتبقه بــت حيــدر أميره معــززه ومقـــدره
وبالطشت راس ابني الگمر
يضـربه يــزيد أعلــى الثغر
ومنــك فـــلا گطعـــو نحــر
حبيبي يا حسين حبيبي يا حسين

*

الشاعر
موسى البديري