مايلة دنياج زينب مايلة
واشكثر لوعات روحج شايلة
.................

زينب الله ايساعدچ ابدي الكلام
زين بعدچ عايشة ابذبح الأمام
الهسة بذنج صوت كسرات العظام
شلون نمتي ابليل وانتي بلا خيام

وحدج تظلين مو متخايلة
مايلة دنياج زينب مايلة
...................

والله شفتي الضيم كلة ابكربلة
البيچ ماكو انسان ضيمچ شايلة
صبرچ انتي ايوب مايتحملة
ابعينچ الخوان شفتي امچتلة

دنيتچ وانذال ضدچ عايلة
مايلة دنياج زينب مايلة
....................

زينب الله يساعدچ نص نينوه
حايرة بنسوان واطفالچ سوه
شمس تكتل والهوه حار الهوه
وجدمج ابگد ماتركضين انچوه

من السياط دموم متنچ سايلة
مايلة دنياج زينب مايلة
......................
حيل تعبانة ابركض ذاك الصبح
وعين عدوانج مثل ملح ابجرح
ابعينچ اتشوفين اخوتچ عالرمح
ابليل وحشة وگلبچ اشگد منذبح

وسفة صوبچ هالعساچر صايلة
مايلة دنياج زينب مايلة
......................

انتي وي  اطفال بيديكم حبل
بعينج اتبارين جم طفلة وطفل
شمر سب بيج اشكثر والله نذل
ابلاية هودج صاعدة فوگ الهزل

ماشية الدار الغرب بالعايلة
مايلة دنياج زينب مايلة
.....................

الشام اه يالشام خله بيچ اثر
شفتي بيهه الضيم متي من القهر
بماي حار استقبلوچ وبالحجر
فرروج ابسوگ من احقر بشر

اعليج كل الشام شو متحايلة
مايلة دنياج زينب مايلة
..........................

الخادم عمار الساعدي
ونسالكم الدعاء

☘قصيده للهلال ☘

هلالك لالفه يهلال عاشور
افكد بيه اخوتي الچنهم بدور

هلالك لالفه هلال المصايب
وين البيه محنه بيك غايب
وانه خلافهم شفت العجايب
راح الفرح وياكم يلصكور....
هلالك لالفه يهلال عاشور

شهر الشوم ريته لا لفانه
اجه كل الحزن من هل واجانه
مابي كل رجا وحسين خانه
ماظنيت بينه الدنيه اتدور....
هلالك لالفه يهلال عاشور

اريد اعاتبك ياشهر الفراك
ابد ما فكرت لفراك حراك
كلبي لكافلي يهلال مشتاك
ليش بعاشرك واتهدم السور...
هلالك لالفه يهلال عاشور

جانو سور النه وكلهم اعزاز
تدري الاخت دوم اخوتها تنعاز
من يوم المشوا والعدو يمتاز
ذوله اليعدلون الحكم والشور....
هلالك لالفه يهلال عاشور

همه اولاد حيدر والحچي الهم
يخسر دنيته كلمن يضدهم
على مر الزمن لمن تعدهم
همه الساكنين البر والبحور.....
هلالك لالفه يهلال عاشور

١/محرم/١٤٤٣
✍ بقلم شاعرة اهل البيت عليهم السلام
       ☘ام فراس الساعدي ☘
غير مبري الذمه لكل من يغيير الاسم
او ياخذ كلمات القصيده وينسبها اليه

نزله
أستهلال هلال شهر محرم الحرام
ومصائب أليم واقعة الطف
................
يلا خالننشر سواد النايحه
أو للشهيد حسين ننصب فاتحه
.................
1
نايحه أبكل دار لازم تنعكد
أو تبقه ميراث الولد ولد الولد
جينه ننشد كربله أمضيع النشد
صوتها الكل المسامع واضحه
................
2
أهلال عملة كربله الليله يهل
نبله بيه الحرمله تذبح طفل
شنهو ذنبه أوليدي بالطف ينكتل
أنشلت أيده يا عساه الذابحه
.................
3
جاسم العريس من دم ركبته
أتحنت أجفوفه أو تحنت قامته
الله كان أبعون أمه الشافته
غارك النشمي أبدماه السايحه
................
4
أو يا شبيه الهادي والد فاطمه
علي يبن حسين راعي الغانمه
وذره يم وذره أبنوايا أمسممه
كطعت جسمه السيوف الجارحه
. ................
5
أنصار سبعين أو عله سبعين ألف
يا زحف هاليوم زحفو يا زحف
سيف يم السيف والجتف أبجتف
الكطعت المنحر معادن صالحه
.................
6
النصرة المظلوم أبن عقد الوله
أمن المدينه اليوم وصلت قافله
خلو نحيي أمصاب عملة كربله
واليناصبنه العداوه أنواكحه
.................
7
أهلال شهر أحزان مهشوم الصدر
أمكطع الأوداج من سيف الشمر
عاود ألنه اليوم والرايد أجر
خاليصيح أو يانه نفس الصايحه
.................
8
فوك تل الزينبي بت فاطمه
أتنادي يا عباس عالخد لاطمه
جسم أخوك حسين غارك بالدمه
أونظرة العسكر لخيتك جارحه
..................
9
أبكربله أنحور الهواشم تجري دم
هذا يوم البيه تتسامه القيم
اليخدم المجلس بجه الصدره لطم
باجر أبهول القيامه الرابحه
...................
10
أبغيره شيعيه العجل ثم العجل
نندب المهدي يبن خير العمل
طولت بالغيبه منينه أبأأمل
وجهك أنماسي نحب ونصابحه
..................
خادم أهل البيت
الشاعر : أسماعيل الجوراني

لحن وأداء الرادود الحسيني ابوجليل الدردوشي

📜 القصيدة: محرم جاي
🎤 أداء: مسلم الوائلي
🖋 كلمات: محمود الموسوي
~~~~~~~~~~~~~~~~~~~~
عاده وعدنه فوگ البيت لازم نرفع الرايه
يحسين ومحرم جاي والخدمه والمشايه

واحسيناً واحسيناً ... واحسيناه
~~~~~~~~~~~~~~~~~~~~
عاده عدنه يا حسين بيتنه يخضر ونين
... من يجينه العاشر
وبخدمتك يا أمام موكب الحب والغرام
... ينصبلك باجر

عاده انعلگ الرايات ثارك هذا كل عام
اسود تلبس اعله حسين بالمجلس الخدام
عشاگ المجالس هاي ما گطعوا اللطميه
يحسين العمر محلاه من يگضي بحسينيه

واحسيناً واحسيناً ... واحسيناه
~~~~~~~~~~~~~~~~~~~~
بينه حب نحضر عزاء والعشگ من كربلاء
... هالخدم مجنونه
انته يا اجمل امير ملك بالخدمه اليصير
... الخادم يسمونه

كلما نحضر اقرايات بينه يخضر الشوگ
عشاگ ونحب حسين وهو احله معشوگ
يا محله الزياره وياك نحرك لازم انزوره
باجر گلبي عالشباج كون ايخلص انذوره

واحسيناً واحسيناً ... واحسيناه
~~~~~~~~~~~~~~~~~~~~
عدنه بالخدمه امنيات يا عشگ هاي الحياة
... نخدم اتخلينه
يا حلاتك يالحبيب انته مذبوح وطبيب
... ترابك يداوينه

يا ماي وصرت عطشان عاري وتطي الفياي
زمزم ينتظر كل عام منك يشرب الماي
ياهو العنده مثل حسين خادم يفتخر باسمه
واليخدم لأبو السجاد هذا الينحسب زلمه

واحسيناً واحسيناً ... واحسيناه
~~~~~~~~~~~~~~~~~~~~
يا فرض كلما نزور غيره نلطم عالصدور
... يمك احله ازياره
يالصفاتك معجزات الله خلالك صفات
... وانته كل اسراره

اسمك عالگمر مكتوب تنطي الگمره الاحساس
يا محله ضواك حسين جنه عيون عباس
نحرك قبلة العشاگ ونصلي عله عيونك
جم عابس الك مجنون واللطامه يردونك

واحسيناً واحسيناً ... واحسيناه
~~~~~~~~~~~~~~~~~~~~
يا سراط العاشقين بسمله اسمك يا حسين
... وانته فوگ البسمله
يا هواك البي جمال انته ايات الجلال
... تقره بسمك كربله

حطنه بمجلسك للموت لو تابوت بالباب
نخدم حته لو ميتين بحسينيتك اتراب
ما عفنه اللطم عادات والفطره لگيناها
بينه من الزغر يحسين هاي الخدمه محلاها

واحسيناً واحسيناً ... واحسيناه
°°°°°°°°°°°°°°°°°°°°°°°°°°°°°°°°°°°°

الاداء ملا مسلم الوائلي

📜 القصيدة: هذا محرم جاي
🎤 أداء: مسلم الوائلي
🖋 كلمات: محمود الموسوي
~~~~~~~~~~~~~~~~~~~~
حسين آه حسين آه
~~~~~~~~~~~~~~~~~~~~
بيه الك واهس بجي ولطمه اعله صدري
.... حسين حسين
وكل محرم بيه الك يحسين فزعه
علگت راية حزن سوده اعله بيتي
.... حسين حسين
وحضرت للزهره يا مولاي دمعه

يهل عاشور وابجي الغربة حسين
عليك الطم لطم مثل النساوين
انه العايش غريب وانته عطشان
تمنيت احترگ ويه الصواوين

هذا محرم جاي اتمنه اصيرن ماي
وتبده يم عباس ويمك اطيح افياي
~~~~~~~~~~~~~~~~~~~~
ضعنك بيا ديره يا مولاي شايل
.... حسين حسين
والعليله من الحزن شيب جفنها
من دمعها تنگعت حته الرسايل
.... حسين حسين
غير ابوها الغرباها وشال عنها

بعيد حسين والهم تارس البيت
احني الباب بويه بدمعي لو اجيت
خذت حته الرضيع وگلبي مشتاگ
ولو خالي المهد بس فوگه لوليت

ظليت الولي وصيح عبدالله باجر ذبيح
كاروكه كله اسهام وظلت تهزه الريح
~~~~~~~~~~~~~~~~~~~~
احنه يحسين بغرامك بينه حرگه
.... حسين حسين
حرگة المذبوح ابنها وضاع دمه
واجب اعلينه بمحرم لو بجينه
.... حسين حسين
الله خالقنه اعلمود نسوي خدمه

الهوى باجر غريب مسلبه دخان
العطش ذباح يذبح بيده رضعان
غير انته اعله صدرك تسحگ الخيل
الحجر شفته اعله عينك خله نيشان

باجر تسحگك خيل بالغربه مالك حيل
ثوبك صدگ مسلوب وزينب ضعنها يشيل
~~~~~~~~~~~~~~~~~~~~
شلي بالدنيه الخذت زينب سبيه
.... حسين حسين
والله لو ما خدمتك جا طلگتها
الدنيه سلبت من ابو فاضل جفوفه
.... حسين حسين
دنيه بيها مجتفه اتطيح اعله اختها

شلي بدنيه عليكم حرگت اخيام
وخذت زينب غريبه وطبت الشام
انه مخليها بس للخدمه يحسين
اواسي الزهره بيها كل سنه وعام

بالدنيه المن ضال وزينب بديها احبال
علويه فوگ النوگ وطاري الغرب جتال
~~~~~~~~~~~~~~~~~~~~
انه المحيرني ومتعب سؤالي
.... حسين حسين
جثتك بين الجثث شو ما لگوها
شلون عطرك تارس الطف وانته ماكو
.... حسين حسين
بكل مكان الجثه يمكن طشروها

صدگ هذا الهظمني وتعب الحيل
اثر للجثه ماكو ويه المجاتيل
لگوا آثار جسمك يم الخيام
شكثر يحسين ركضت فوگك الخيل

هذا سؤالي وجاي اطلب طلب مولاي
خل انسحگ يحسين سحگوا عليك هواي
°°°°°°°°°°°°°°°°°°°°°°°°°°°°°°°°°°°°

الاداء ملا مسلم الوائلي

هاي اول ليله وينك يابوصالح
_____________________
الليله الاولى اشلون حالك هالمسيه
وين گاعد هسه وادموعك جريه
اعتقد يمكن رحت للغاضريه
بكربله هسه انته تبچي اويه الزچيه

ارد اسئلك گلي وينك وين رايح
هاي اول ليله وينك يابوصالح
_____________________
ابرضوى ام طوى يالمهدي وينك
ابيا ارض مولاي هسه وتبچي عينك
هسه تبچي لوحدك ياهو اليعينك
ابحالك شسوه يمهدينه ونينك

وياهو يقرالك يبوصالح نوايح
هاي اول ليله وينك يابوصالح
_______________________
الليله الله يعين گلبك هل محرم
الليله عينك مومدامع تجري من دم
حيلك الليله عمت عيني تهدم
الحزن شد حيله وعلى بابك تحزم

راح ابو اليمه تشوفه اشلون طايح
هاي اول ليله وينك يابو صالح
_______________________
يعز عليه يهل محرم وانت غايب
شسوت ابحالك يمهدينه المصايب
وين تنصب مجلسك يبن الاطايب
اضن من ثگل المصيبه صرت شايب

عالبقه فوگ الثره من دمه سابح
هاي اول ليله وينك يابوصالح
_______________________
جمعه جمعه گمنه نحسب وانتظرنه
الندبه نقراها الفجر يامنتظرنه
العهد نقراه والعجل مولاي صحنه
ضاگت الوسعه وظهورك هوه املنه

سيدي اشتاقت الك كل الجوارح
هاي اول ليله وينك يابوصالح
_______________________
✍️احمد علي البغدادي
محرم الحرام 1446 هـ

الاداء احمد علي البغدادي

📜 القصيدة: لو راعي عزه
🎤 أداء: مسلم الوائلي
🖋 كلمات: محمد البطحاوي
~~~~~~~~~~~~~~~~~~~~
گبل لا تهل يهلال انه لمصابه راعي
الشايل جرح الحسين ما يحتاج ناعي

يستاهل بجينه اليسمع كل حجينه
انه لمصابه راعي انه لمصابه راعي
~~~~~~~~~~~~~~~~~~~~
انه عايش ويه جرحه بدون موعد
ولي راح حسين منه عيب يگعد
بگلبي من تبرد جمرته حسين يبعد

لو راعي عزه ومجروح لو لا توگف اتعلم
هو حسين يتغير اذا ما ينصب مأتم
خل المأتم يطول مصيبتنه جبيره
طايح عدنه الحسين وانشال بحصيره

غيره ما لگينه يستاهل بجينه
انه لمصابه راعي انه لمصابه راعي
~~~~~~~~~~~~~~~~~~~~
احنه ابونه حسين تدري شعدنه غيره
كلها تمشي وهو يبقه راعي ديره
اليبجي لحسين ابحرگته عنده غيره

هنا يالتلطم اعله حسين ارفع جفك بحيله
طاح حسين من تسمع ما واحد يتجيله
كون عليك يحسين كل الدنيه عاشور
لأن صدرك يمولاي داس عليه حافر

العينه علينه يستاهل بجينه
انه لمصابه راعي انه لمصابه راعي
~~~~~~~~~~~~~~~~~~~~
الي ما مجروح انصحه لا يجينه
احنه يوم حسين ماخذ كل حجينه
احنه راحتنه بلطمنه لو بجينه

احنه الفاگدين حسين لحد يسأل اشبينه
ونة زينب الحوراء عالهزل تاذينه
الما مجروح يا ناس ماعنده قضيه
يدري بيوم الحسين تبجيله الزجيه

عليه شما قرينه يستاهل بجينه
انه لمصابه راعي انه لمصابه راعي
~~~~~~~~~~~~~~~~~~~~
هل عله غيري بمصابه انه خيمه
عندي يوم بدون ذكره جن جريمه
عالتراب حسين نايم يا هظيمه

عالباگوا قميصه شلون تگلي من اللطم كافي
وهي زينب بنص الجيش تركضله اطلعت حافي
تركض ما درت وين شحال الراح اخوها
الوحيده هنا يخدام مسبيه خذوها

اليجرحنه بونينه يستاهل بجينه
انه لمصابه راعي انه لمصابه راعي
~~~~~~~~~~~~~~~~~~~~
الميت وباگوا قميصه بيوم عاشر
وزينب اخته واليتامه بلا مناصر
اليبجي لجله لا تسأله شنهي صاير

اتصور حرم واطفال والعباس مو يمها
البيده حز وريد حسين بدرب الشام يرحمها
الابوها ثبت الدين تميل الهزله بيهن
وكل ما شافن الروس يتعاله بجيهن

حسين الروحه بينه يستاهل بجينه
انه لمصابه راعي انه لمصابه راعي
°°°°°°°°°°°°°°°°°°°°°°°°°°°°°°°°°°°