ياعلي ابن موسى الرضا
...
امامي غرامي وهيامي
يبو احلى الاسامي
الولاده عباده وسعاده
كرم والله وزياده

كبل مااذكر اسمك يا حناني
سبع مرات يتوضه لساني
محب لزيارتك يالضامن آني
واليه بمشهدك اجمل اماني
اشوكت هذا الحلم
جوازي ينختم .. وازورك سيدي
ياعلي بن موسى الرضا
...
اكلمك ارسمك واشمك
عبد خليني يمك
ربيبك حبيبك قريبك
واصير ابن شبيبك

وتسولفلي عله احسين وجماله
وتظمني مثل ذيچ الغزاله
اشاره انطيني منك لورساله
يعيد الخير وامتاني هلاله

ضريحك كعبتي
اعله بابك سجدتي..يسلطان العشك
ياعلي بن موسى الرضا
...
ودادي ومرادي وانادي
الرضه سر اعتقادي
يجنه ومحنه تلمنه
الك هذا حفلنه

علكنه اشموعنه بضوء المناره
ولادة حظرتك اول بشاره
البشاره الثانيه انريد الزياره
تجاره حبك ومابي خساره

نريدك ياسحر
تسهل هالامر.. والفرحه تكتمل
ياعلي بن موسى الرضا
....
تهاني وأماني وصواني
شمع جايبلك آني
حظوري سروري الشعوري
يمن بيدك اموري

حظوري ابمحفلك واجب عليه
يبو الكبه الجميله الرضويه
الليله اربعطش شمعه ضويه
تنور اكلوب كل الجعفريه

يكامل بالوصف
احبك واعترف... مالكني بالغرام
ياعلي ابن موسى الرضا
....
مزارك مدارك مبارك
واريد اسكن جوارك
زماني نفاني ولواني
دخيل اعيونك آني

العاشك أنته محبوبه وانيسه
تشوفه الوحده وتصبح جليسه
العالم كله حب وانته رئيسه
حنانك يالرؤوف اشلون اقيسه

يرحمه أمن السمه
يشمعة فاطمه.. بابك يضل مناي
ياعلي ابن موسى الرضا
...

اللهم عجل لوليك الفرج

محمد الجماسي

الاداء ملا امير الفتلاوي

((بيا شوگ))

ضعت بيا شوگ
ويم بابك عيونك تلگاني
بالحب محـروگ
ويحسين وأسمك بلساني
ويااترف حب وعشت ويا
كلشي آنه انسه ومـا انسا ...

"""""""""""""""""""""""""""""""""""''''''''''

بصحوتي
يحسين بنومتي
مافارگ دمعتي .. وحاجتي بس الك
طلبتي
يالتدري بالطلبتي
بالمجلس حسرتي .. وانته بس اسئلك

اسئلك جاهل واجالك تايه بهذا الزمن
تـــايهّ من ايد امه آنه وانته يالحضنك وطن
انطيني ايدك ياغرامي سيدي بروح الحسن

خلينــي وياك
وبسمك ياريت واتسمه
وبحبي انخاك
مخنوگ وأسمك اشتمه
وبس انته الگلبي شگد حاچا
كلشي آنه انســــه ومــا انـسا ...

"""""""""""""""""""""""""""""""""""''''''''''

بيا حلم
اتمناك بحلم
وانضرلك تبتسم .. ياحبيبي وانسعد

مو هدم
مو مسلوب الهدم
وعيله وزينب تلم .. والكفر صارت تهد

هيچي امنيتي وحلمها مو جرح فوگ الرمح
شگد تمنيت آنه اشوفك صوره مابيها جرح
مو اشوفك صوره طايح والعده صاحو ذبح

ياحلمي وليش
مو هذا الطايح معشوگي
وملتم الجيش
ويگـــــــطع بيه وبعروگي

بكل طعنه وگلبي يصيح احا
كلشي آنـه انســـه ومـــا انسا ...

"""""""""""""""""""""""""""""""""""''''''''''

بخدمتك
كل وكتي بخدمتك
وما فارگ حضرتك .. ودمعتك تسوه العمر

خيمتك
كل فكري بخيمتك
وبنصـــــــها عيلتك .. وجمرتك تچوي الجمر

عيله محبوسه بخدرها وتستحي من الركض
تركض ومجبوره تركض يا ما طاحت عالارض
صلوّ بفرض الشهاده وصلوّ بحبك فرض

بالحب مسموح
من تنطي چفوفك للجمره
الصاير مذبوح
يتـــــباها بحبك كـل مـــره
ويصيح بجرحك موتي الگا
كلـــشي آنــه انسه وما انسا ...

"""""""""""""""""""""""""""""""""""''''''''''

عالهزل
ياهيه العل هزل
هاي الــلا ماتذل .. بالعشگ صارت نبي

والحبل
چفها ذل الحبل
بالحب لا ما تمل .. للمحب فدوه السبي

واليحب يتبع حبيبه حتى لو صعب الدرب
حتى لو من بيته يطلع حتى لو هم ينضرب
زينب وشامخ عشگها للقصر صارت تطب

الحد التابوت
ماعافت حبها ودمعتها
ومابعد الموت
بالجنه تظل قرايتها
وتگول حسين الصار اشلا
كلشي آنه انسه ومــا انسا ...


عبد زينب
محمد الابراهيمي

الاداء ملا احمد المجلي القلعاوي

مجلس عزائك  عايش  بخيره
ما عندي غيره و لا ردت غيره
مجروح ادگ ابابك
رايد دمع  لمصابك
################
يالماگل اخدودك رمل
                        و حر الشمس فيالك
بمجلس عزائك سيدي
                         الطم و اريد اقرالك
و رايد بعد ابچي صدگ
                       و انحب و ادگ لحالك
عطشانة عيني للدمع
                       بگد ما  عطش  دلالك

مجمورة تلهب بسمك اجروحي
و  لمن  تذكرك  تختنگ  روحي
اطلب طلب بثوابك
رايد  دمع  لمصابك
ما عندي غيره و لا ردت غيره
###################
ما انسى لحظة مصيبتك
                        و ادريك ما تنساني
عن صافي نية بس الك
                       صليت فرض احزاني
ممنون منك سيدي
                       بگلبي گلت و الساني
الفضل كله لمجلس
                       صاحب بخت سواني

طير  المجالس   اهلي  سموني
لنِّي بخدمتك   عالي    شافوني
يالما نسيت احبابك
رايد  دمع  لمصابك
ما عندي غيره و لا ردت غيره
‏####‎################
الخدمة عندي اكبر شرف
                         لابسها تاج اعله الراس
من حقي اذا بيها افتخر
                           كلها ترافة و احساس
بس لازم احصل عالشرط
                          حتى اختلف عن الناس
كاس  الوفى  اتذوقه
                         من چف  ادين  ام عباس

مثل ام عضيدك ارد اضحيلك
و بگد   دمعها   رايد   ابچيلك
فدوة رحت  لترابك
رايد   دمع لمصابك
ما عندي غيره و لا ردت غيرك
‏##################‎###
من اختنگ تصبح هوى
             و لو اعطش تصير الماي
اسمك سلب مني الفرح
             يا سبب نوحي و مَبچاي
مرات اشوفنك ضوه
                تارس  دليلي و عيناي
و مرات اشوفنك جرح
                ياگل و  يشرب  وياي

عايش حبيبي جرحك ابالي
تبراله عيني و عينه  تبرالي
ما يشفى جرح اصوابك
رايد   دمع     لمصابك
ما عندي غيرة و لا ردت غيرة
#######################
انطيني من طولك جرح
                        رايد  احس   بالامك
يا ليتني ابطفك چنت
                     تسحگ عليَّ بچدامك
بالف و تسعمية گلب
                      انزف  هضم  جدامك
و بحافر الخيل انمرد
                      و احترگ مثل اخيامك

يا ريته  مني  ينسلب   ثوبي
و عالگاع انام ابدال محبوبي
ريت انخضب بخضابك
رايد   دمع    لمصابك
ما عندي غيره و لا ردت غيره
####################
دمعة مصابك سلوتي
                      تجلي المرارة البيه
افرح اذا ابچي الك
                      و استلذ باللطمية
لغيرك اذا اگصد عزه
                     تختلف عندي النية
لمجلسك تاخذني رگض
                      غصباً عليَّ  رجليه

مجلس عزائك  عالارض. جَنة
و مثل العسل ما ينشبع منه
باقي انتظر لجْوابك
رايد  دمع  لمصابك
ما عندي غيره ولا ردت غيره
####################
الحمدلله
علي حسين الكناني

1441هـ

الاداء ملا امير الفتلاوي

لكيتك بين الف خيال يحسين.
صدرك للحوافر صار تجوه
ترفس واليذبحك سيفه مثلوم.
لو سيفه عدل ويذبحك اشوه
يمن كثر السحك ماضلت خدود.
خربت كل معانيك الحلوه
هواي جروح بيك نشدهه وتطيب.
بس السهم البعينك والله بلوه

ومن الضهر لليل. تسحك عليك الخيل.
حيل انسحك عطشان. بس بلذبح مو حيل

#######

دورنه ولكينه الضاعن ويل الخيل.
بس ياخويه اصبعك مالكيناه
هيه المشكله هواي التفرهد بيك
والبايك هدومك ماعرفناه
ادورك بلحجر واسمعهم يكولون
شتدورين وابن امج سحكناه
حركو كلب اخوي بصفه ويصيحون
اختك طلعت وبيتك حركناه

بين الزلم صوبين. زينب هوت مرتين
واخوتهه مايدرون. جا مايكوم حسين

#####
اجيتك راكضه والحال مو زين
فحطانه وخنكني رماد الخيام
خويه ارتاحي كلي وكتله يحسين
ياراحه التجيني وكلك سهام.
صعبه اليحجي وبكلبه السهم مكسور
والبعينه سهم مايكدر ينام
لو مسحوكه انه وميته وياك
ولا بت فاطمه تحاوطهه الازلام

بين السحك والنار. ماتت يخويه زغار
ماندري وين نروح. خلاني دهري احتار
######

لاميت واكلك خويه معذور
ولاتكدر تكوم وتمشي وياي
يلعطشان يابس ريجك وذبلان
والينذبح لازم يشرب الماي
والعريان مالازم شمس فوكاه
ولاجواه رمل يرادله فياي
عرفته حسين من ذبحوه مكلوب
متعذب بذبحه مرافس هواي
ويصيح اسمعهه هواي. ياناس اريدن ماي
حر الشمس كتال. مافوك اخوي فياي
######

شتموني وبجيت وكامو يضحكون
مهضومه وعلي مهضومه اجيتك
ماتعرفني يمكن بس يلحسين
هاي التمشي كوه زينب اختك
جا هيه الجبيره علا الركض وين
ركضت ركاض كلساع وجزيتك
عثرت بجثه ابني وكتله ياعون
يمه اعذرني خافن عوريتك

نايم ييمه شلون .وخالك يدور عون
امك غريبه اليوم. والوادم يشمتون


امين السلطان

نايم عالرمل وبحر الشموس
طايح عالوجه والحافر تدوس
زينب يخويه شافت الويل
ليش اعله جسمك تسحك الخيل
*
صدت عيوني اعله صدرك  ماعرفته من گفاك
انت يشتمك هوه الله والرمح كاطع هواك
دارت الخيل اعله جسمك وانت مذبوح بضماك
شسوت بحالي الحوافر حنّت الطف بدماك
بدمك ياشمس وصلت للخيام
عالتل اسمعت تتكسر اعضام
ومنين اجيب لكربله الحيل
ليش اعله جسمك تسحك الخيل
*
من المهر طحت اعله وجهك  ونابت بكلبك سهم
تمطر سهام اعله صدرك  وعينك لراعي العلم
ياغريب شكد جروحك ويا اشد منهن الم
طيحة الكافل تألمك لو اشد حرك الخيم
يا جرح الاشد من هاي الجروح
تلجمني من اشوفك خويه مذبوح
وشلون راح يخلص الليل
ليش اعله جسمك تسحك الخيل
*
كل جرح ينزف لجمني حسين يالكلك جروح
اطلع من الخيمه اركض اصعد اعله التل وانوح
خويه من كل هالمصايب  زين زينب بيها روح
منك لصوب الشريعه حيرتي ليا صوب اروح
كل ذيج الخيول التمت اعليك
ومن ذاك الرمح ماضل نفس بيك
الكاع بالطف رادت اتميل
ليش اعله جسمك تسحك الخيل
*
منهو يفزعلك و احشم  وطاح اخوك عله النهر
كبل ساعه اجيت منه وانت مكسور اظهر
الخيل شبعت سحك منك وانه اشبع بس قهر
وين جانت هاي اليه والله شيبني الدهر
يومك بالغرب مامثله ابد يوم
وياخويه اعله عيني يحرم النوم
طول العمر والمدمع يسيل
ليش اعله جسمك تسحك الخيل
*
راح ارد مكسوره خاطر  وامشي بدروب السبي
خويه حتى الشمس بالطف  غيرت لون العبي
لطبة السوك بقميصك راح اشدن معصبي
حظرولي الناكه هزله واصعد بهيئة نبي
عالناكه اصعدت دلالي محروك
كل لحضه انذبح من طبة السوك
وصوت اليتامه صاحت اتخيل
ليش اعله جسمك تسحك الخيل
*
تمت
احمد الخفاجي

الاداء ملا امير الفتلاوي

▪️خل نواسيها الزجيه... عالجواد ابهالمسيه ▪️

ــــــــــــــــــــــــــــــــــــــــــــــــــــــــ

ابوذيات لاستشهاد الامام محمد الجواد عليه السلام

ثوبك كل رزيه الصبر ورداك
عشرين على خمسه وذبل ورداك
راواك الخليفه الحتف ورداك
يبو الهادي  يبن خير البريه

يگلبي علجواد اليوم ونهاك
ولا علنوح لحظه اعترض ونهاك
بالسم يبوالهادي  ارداك ونهاك
العاداك وكسر گلب الزجيه

الجواد انته الكرم طبعك وجودك
سبب للناس والدنيا  وجودك
اشرب جيت من كاسك وجودك
يجود وخير بارض الكاظميه

الشاعر حسن لعيبي الحريشاوي
ـــــــــــــــــــــــــــــــــــــــــــــــــــ

لمناسبة  قرب  حلول شهر محرم  الحرام  قصيدة الاشتياق لصاحب الزمان عجل الله فرجه


شيصير   لو     ويانه  تگعد
الغيبه الطويله  تريد موعد
حتى اليسافر  مده   ويرد
مهدي يمهدي  مولاي مهدي
ــــــــــــــــــــــــــــــــــــــ
صفنة    مگابر    وحشة  بيوت
رجفت   وداع    بظهر     تابوت
بها  يا  علي     نتنفس    نعيش
نتعب   سنه   ونطٌلع     الصوت

عاشور  اجانه   ونسأل   شلون
مهدينه  وينه  الظهره   مطعون   
بيا مجلس  بيا    دمعه    يا   آه
كثر   البواچي   ايخرب العيون


هم ينتچي  ولحضات   يهده
ضيم  الطفوف   دموع  خده
كل    ذكرياته    هموم    شده
مهدي يمهدي مولاي مهدي
ــــــــــــــــــــــــــــــــــــــ
يلشايل    الطف    عينك     متاع 
عايش  غريب    ومحني الاضلاع
نشتاگ  الك     ونريدك       اتعود
مامش   مطر     ومتانيه     الگاع

بساعة   المغرب    حيرة  احساس
تلتم    سوية    وتگعد        الناس
كلمن   يرد   لهله     وهلك    وين
ندري    الجواب    ايشل  الانفاس


يم الحسين   أتصير   لچمه
عبد الله   لو    رايد    تشمه
اگطع   نزيفه   وفيض  دمه
مهدي  يمهدي  مولاي مهدي
ــــــــــــــــــــــــــــــــــــــ
خانگ     هواك    هناك    دخان
وركضة  سبايا     بجدم   تعبان
لهسه  بخيمكم    تلهب      بنار
لا ماي  يفزع    كلشي   عطشان

تشوف  الصبح  و الليل  المصاب
والصار  يوم    العصره    والباب
طيحت   كفيل  بدون   الچفوف
وحسين   صار     ابكربله   تراب


نفس الوجع كل يوم    نفسه
من ياهي  يا   مولانه   تنسى
كل  الضماير   موت    خرسه
مهدي يمهدي مولاي مهدي
ــــــــــــــــــــــــــــــــــــــ
اهلا  وسهلا    نكتب  بشوگ
والفرح   من   العين   مبيوگ
ننتظرك   بكل جمعه   مولاي
يلفي السبت والعمر  مخنوگ

دمع   انتظارك    ينزل   أمطار
يمتى  الفرج  يا صاحب  الدار
مسجد السهله  ايحظنك  يريد
صاحب   ثنيه    وكلنه   خطار


بالكوفه  منبر    فوگه تخطب
بثار   الحسين  هناك    تطلب
صب الدمع علمحسن   اتصب
مهدي يمهدي مولاي مهدي
ــــــــــــــــــــــــــــــــــــــ
بس  مر   علينه    الدنيا   صحره
واتصدق   اعله   الكون     نظره
انت   الدوى   الموصوف    للناس
حبك  عجيب (احساس)  (فطره)

الدنيا  بغيابك    دنية     دموع
بس  انتظارك   عدنه  موضوع
بس الله يدري بحاله كل يوم
لل بذنه  يسمع   كسر  الضلوع


نبقى  اعله  موعد  ترجعلنه
واقعنه   يا   حبنه  وحلمنه
نعرفهه   بس  انته   التلمنه
مهدي يمهدي  مولاي  مهدي


كلمات الخادم/  رعد الفريجي
ثوابها الى روح والدتي

شيصير لو ويانه تگعد
الغيبه الطويله تريد موعد
حتى اليسافر مده ويرد
مهدي يمهدي مولاي مهدي

***

صفنة مگابر وحشة بيوت
رجفت وداع بظهر تابوت
بها يا علي نتنفس نعيش
نتعب سنه ونطٌلع الصوت

رمضان اجانه ونسأل شلون
مهدينه وينه الظهره مطعون
يتسحر بيا دمعه يا آه
صوم البواچي ايخرب العيون

هم ينتچي ولحضات يهده
ضيم الطفوف دموع خده
كل ذكرياته هموم شده
مهدي يمهدي مولاي مهدي