قصيده عكيلي بحق السيد محمد عليه السلام
****
سيد محمد راعي الغيره
****
عباس الثاني يلقبونه
صكار عداه يسمونه
من كل الكون يزورونه
شابع كل الوادم خيره
****
مايتوصف عزمه وزوده
بيرغ للعز وانشوده
الكلمن ضايع حكه يعوده
رفعت راس الطيب سيره
****
تشهد وكفاته وافعاله
ماتطفى انواره التتلاله
الينخاه يغير احواله
سكان الحك بيده يديره
****
عن زوده تسولف وكفاته
هوايه وماتنعد شاراته
سيد حيد وطاهر ذاته
متهمه جبيره ولصغيره
****
واضح مايتطمس دوره
كل ليل يضويه بنوره
من عباس الكافل صوره
ماواحد يعرف تفسيره
****
هيهات يخيب اليتعنه
ويدك بابه ويطلب منه
ينطي شماراد ويتمنه
ميعوف الينخاه بحيره
****
تحل الماتنحل جفوفه
شمس الله تنزل وتطوفه
عميه عيون اللي متشوفه
خسران الضيع تقديره
****
خادم اهل البيت الشاعر
السيد هاشم قاسم سعود البلداوي
١٤٤٥ ه

قصيده ميمر مقطع بحق{سبع الدجيل سيد محمد}{عليه السلام}
****
من اسالك وتوسلك متردني ابد شكراً الك
باب الحوائج الكاك كلما اطيح بشده
****
تارس عيوني وكلبي بالحنيه
واشواكي ماليها قصص ورديه
شما ردت تنطيني بلا منيه
نبع الوفه كلك دفه جفوفك سوالف هادفه
كلبي بحزن من ينضام شاراتك اللي تسعده
****
يابو المكارم خيرك مغطيني
يفرغني دهري وجودك اليمليني
ومن المخاطر سيدي تنجيني
مثل الشمس فضلك احس الهسه والجايني وامس
سرك حير هاذا الكون ماي وخيرك شيعده
****
سبع الجزيره المايوصفك واصف
وايايه بالشدات اشوفك واكف
منك كبل لاسامع ولاشايف
سيد وفي ماتنخفي نارك ابد ماتنطفي
يتباها بيك الديوان بابك ابد متسده
****
دلالك ابد ياسيدي ماتبرد
يبن الامام الهادي ضيوفك تشهد
بكد النجم شارات الك ماتنعد
انته الضوه وانته الهوه والشمس والكمره سوه
ياشيخ وتربات شيوخ الجايك محال ترده
****
كلك مواقف يافخر يانبراس
راسي نرفع بيك انت يارفعت راس
بابك وشباجك وعطرك ينباس
جود وعزم يابو العلم تاج اعله هامات الزلم
ياسيد محمد ولله هواي الحجي شيسرده
****
زينة الدنيه مكبعه بشاراتك
والفقره كلها تنعم بخيراتك
تحل العكد يابو الفرج نظراتك
الحبك ربح مصدر فرح للي بسهم هم نجرح
متخيب اللي ينخاك توكف وياه تسنده
****
خادم اهل البيت عليهم السلام
الشاعر السيد{هاشم قاسم الداودي البلداوي}
١٤٤٥

قصيده بحق استشهاد الامام {علي الهادي}{عليه السلام}
****
بعد يا دنيا الي شخليتي
خذتي روحي وخذتي شمعة بيتي
وين اروح بحالي وين*راح ابو كلب الحنين
****
دكليلي يا دنيه شعندج ويايه
خليتي دمعتي تنزل دمايه
انه الايه ابن ايه وابو الايه
اخذتي روحي انتي وشجرة فيايه
من اخذتي والدي وعفتيني
بين اه و اه عيشتيني
غربه راح اكضي السنين *راح ابو كلب الحنين
****
اليفاركله غوالي الدمعه شتنفعه
الليالي الحلوه ليش تعدي بسرعه
يضل بس الحزن و الونه والدمعه
العمر و بلا ابو يا دنيا شيجرعه
اليوم هو وبل امس سبع الدجيل
والنوايب زرعت بنص عيني ليل
بعد شيفيد الونين*راح ابو كلب الحنين
****
حاجيني يا دنيه بيا الم ننعه
اذا راح العزيز وندري شيرجعه
علي الهادي ابويه ودنيتي الوسعه
راح وظل ظلامي بلا ضوه الشمعه
هوايه احتاج الابويه هوايه
راية الله وصرت ادور رايه
والمعين بلا معين*راح ابو كلب الحنين
****
بعد حنيتة وين الكالي حنيه
ثوب من الحنان مفصل عليه
بامان اشعر اذا حط اديه بيديه
وانسه الالامي كلها شبيه ما بيه
روحي من الفرح جن طير و تطير
انه امير ولازم جفوف الامير
مو ابو الافاركته دين*راح ابو كلب الحنين
****
بني العباس منه ليش حرموني
وحزين اكضي العمر بخلافه خلوني
الف يا ريت اليه بداله سموني
اذوني شكثر بمصابه اذوني
انه ابنه الحسن نار فادي
ابد ما تطفه عله سم الهادي
واكضي كل عمري حزين*راح ابو كلب الحنين
****
الابن لو مات ابيه ينهدم بيته
وما يسمع بعد جلمات حنيته
وانه اليوم ابويه لكبره وديته
و تراب الكبر بجفوفي هليته
راح كلشي ونتهه بهاليله
راح اضل طول العمر ابجيله
هو جان العيني عين*راح ابو كلب الحنين
****
خادم اهل البيت عليهم السلام
الشاعر السيد {هاشم قاسم سعود البلداوي}

قصيدة بذكرى ٱستشهاد الإمام {علي الهادي} {عليه السلام}
****
عين التشوف احبابه*ماتت ٱبجرح مصابها
ٱشتنتظر يافرحه لتدگ بابها
****
عين ٱلتفارك غوالي تعيش وحشه
مثل ليل الشتا اللي مذبوح غبشه
ٱتموت موتة طير باكو منه عشه
ومايصحله جف يجي ويشيل نعشه
بغربه ٱليفارك روحه*تنعه اعله روحه جروحه
وتذب للشامت دمعته حجابها
ٱشتنتظر يافرحه لتدگ بابها
****
مو مصيبه شافت عيوني المصايب
شاب انه وشيبيت بشيب شايب
مات ابويه وشفت من بعده العجايب
اكعد وامشي وانام اعله النوايب
عالخد دمعتي ساجبه*وروحي اعله روحه ناحبه
المن احتارت توجه اعتابها
ٱشتنتظر يافرحه لتدگ بابها
****
بالامس فاركني اخويه وكسر ظهري
سيد محمد عضيدي وبيه يدري
خله دمع مصيبته اعله خدودي تجري
وكلت بلكي بوجه ابويه يكضي عمري
واليوم ابويه عافني*راده الاجل مارادني
ماتت امنيتي بونين اعتابها
ٱشتنتظر يافرحه لتدگ بابها
****
علي الهادي جان كلشي وجنت اشوفه
ليل دافي وشوكي واحلامي تطوفه
هو ابويه الغالي هو شلون اعوفه
وجرح نسيانه غميج بيش اروفه
الموت كون انحاسبه*مو بالدموع انعاتبه
شكثر منه اعزاز اخذ ماجابها
ٱشتنتظر يافرحه لتدگ بابها
****
العين عميه تصير من تفكد ضواها
من ظلام النوح تتنفس هواها
جمر ضيم النايبه يلهب وراها
وبالمكابر سكن بلسمها ودواها
ٱمصيبة رحيله ٱمصيبه*راح وبعد شيجيبه
العِشَكْ كاع المكبره وترابها
ٱشتنتظر يافرحه لتدگ بابها
****
والدي الغالي ابو روح الحنينه
الشال رحمة الله كلها ابين عينه
من صرت ما أسمع آهاته وونينه
كمت اسال روحي منهو المات بينه
كلي انتهيت بموته*من مات ابويه وصوته
وروح التصير المنيه صوابها
ٱشتنتظر يافرحه لتدگ بابها
****
الأقره جنت بعينه مستقبل حياتي
ٱدفنته بيدي و ٱدفنت وياه ذاتي
الأنحسد وياه جنت من امنياتي
فاركاني وبيه شمتت نايباتي
كلش عيوني خايفه*بالينتظرها عارفه
ٱليمها ظل بس الذي مو حابها
ٱشتنتظر يافرحه لتدگ بابها
****
خادم اهل البيت عليهم السلام
الشاعر السيد {هاشم قاسم سعود البلداوي}

قصيده موشح بمناسبة استشهاد{علي الهادي}{عليه السلام}
****
ظلمه سامراء هاي الليله
مات ضيها الي يعدل الميله
****
ظلمه صارت والعويل بكل مكان
ولبس ثوب الحزن هالليله الحنان
والمصيبه ضيعت حلم الامان
والصبر نايبته هدت حيله
****
علي الهادي طاح مسموم الجبد
بجف غدر متروس باثام الحقد
عبدلله المايصح مثله عبد
طاح والونه وسف ترتيله
****
مصيبته شيبت عرش الله العضيم
شسوه بي وشعمل ياحيف الزنيم
ينولي صعبه الكريم من اللئيم
كلشي ياخذ منه ماينطيله
****
الهادي ابن المرتضى عقد الوله
عله مصابه عيوني كون اهملها اله
وون ون عليه مثل ون كربله
دمعي ميكفي عليه ابجيله
****
عله همه بجت من دم السماء
ونصبت الاملاك لمصابه العزاء
الجان مالي الناس احساس ووفاء
للكبر هاي المسيه تشيله
****
يعين الله بهالمسه ابنه الحسن
اشلون شد عليه ماأدري الجفن
بعد مثله وين يلكاله وطن
يرد عنه الراد بيه العيله
****
المثله الف ياحيف ينضم بكبر
وبلنياح تصير خاتمة العمر
ابو البيت البيته ميعود ويمر
هوايه صعبه وهاي حيل ثجيله
****
عمت عيني عليه سموه بالغرب
والنواصب علنو عليه الحرب
شاب من مصابه واهواله الكلب
هاذه ابن حامي الحمه ودخيله
****
خادم اهل البيت عليهم السلام
الشاعر السيد{هاشم قاسم الداودي البلداوي}
١٤٤٥هجري

قصيده كعديه بمناسبة استشهاد الامام علي الهادي السلام

‎هاي دون المصايب المتني
‎سهرتني نوايبها وحنتني
‎ذبحت من الكفه روحي والها مايستجن نوحي
‎بسهم جاتل رمتني وصوبتني
*
‎هالمصيبه ونايبتها الكسرت نصين ظهري
‎كلشي اخذت هي مني وعافت دموعي اللي تجري
‎تعبتني وذبلتني وشعلت بنيران صدري
‎يبست وردات الامل والضوه بنص عيني انجتل
‎من دنه من للهادي الاجل ويه روحه اخذ عمري
‎هو ابويه وضوه عيوني ومناها
‎الدنيا هاذي بعد عينه شوراها
‎مابقه كل خير بيها ولادليلي يحن عليها
‎بعد موت الهادي للهم سلمتني
****
‎عاش عمره شلون عيشه من المصايب للمصايب
‎فرحه ماشاف بحياته يكعد ويغفه بنوايب
‎سنينه بالحسره كضاها بسن شبابه وصار شايب
‎مغوركه عيونه بدمعته زلام العده مارحمته
‎نجوم الظهاري راوته مايحبونه النواصب
‎سكنوه ياالف حيف بخرايب
‎بعيد عن اهله ووجوه الكرايب
‎للغرب اجبار ودوه والبغض فوكاه صبوه
‎لوعتني همومه ونحلتني
****
‎جانت الايام تمشي وحال ابويه يسوء اكثر
‎من السلاطين اللعينه اتعذب اتلوع اتمرمر
‎تكبر سنينه الشريفه وجان حزنه وياه يكبر
‎من الالم لاصبحه صبح والليل لو مر ينذبح
‎مثل الذي بظهره رمح وبالدليل يبات خنجر
‎بعيني شفته ودمع عينه يتهاله
‎وبانت آلامه واحزانه بخياله
‎هذا حاله اكبالي اشوفه وياجرح مدري اروفه
‎شاب لسه وهمومه طيحتني
***
‎سجن تضيك وملامه والدي خلص حياته
‎لحظه مانشفت دموعه يبجي ظل الحد مماته
‎الجبل مايحمل همومه ثجيله جانت نايباته
‎اذته الظلام شكثر للفعل ماعدها عذر
‎بجه دمه عيون الصبر وفرحت بحاله الشماته
‎جان مايشتكي بس الصلاته
‎لله يحجي ويسولف امنياته
‎ياهو العليه التماده وكفر باياته ووداده
‎السلِبت ابنة محمد سلبتني
****
‎بعد ذاك الويل كله ماطفت نار الاعادي
‎اتعنته بليل المنيه ويتمت شوكي وودادي
‎طفت انواره الزهيه وطاح غدرا علي الهادي
‎فطرت كلبي النايبه ودمعاتي عالخد ساجبه
‎وكل امنياتي لاهبه وصرت وحدي اصرخ وانادي
‎راح ابويه وبعد ياهو اليجيبه
‎لادوه يصحله ومئيس طبيبه
‎للكبر راح بدموعه ونار ملتهبه بضلوعه
‎ساعة افراكه عن بيتي سبتني
***
‎غمضت عينه بديه وسبلت ايده بنحيبي
‎والدي وروحي وشمعتي واغله كل ناسي وحبيبي
‎انحرم من وكت منه قسمتي هايه ونصيبي
‎هليت فوكاه الترب بيديه والمدمع يصب
‎وظليت وحدي بالغرب احترك كلي بلهيبي
‎ضاكت بعيني من بعده الوسيعه
‎وكلشي ماخلت عليه الفجيعه
‎وين اروح بهالرزيه وهو ياهو الظل اليه
‎وصرت ماشوف نوايبها عمتني
****
‎صوت اسمعه يصيح باذني يالحسن شو صرت وحدك
‎حاير بهمك وحزنك والدموع مغطيه خدك
‎راح ابوك الجان كلشي وهسه ماظل كلشي عندك
‎يالحسن ياهو الظل الك راح اللي جان مدللك
‎واغله شخص جان بهلك بلا ابو هالدنيا وحشه
‎وتصف دوم ويه اليضدك
*
السيد هاشم قاسم سعود البلداوي

هوسات بحق الامام امير المؤمنين علي بن ابي طالب عليه السلام
*****
شك حلوك حيدر ويه شك البيت
بيه حكي ترا شما كلت وشغاليت
بفخر عالدنيا كلها بسيدي تباهيت
وهنيالي بحيدر هنيالي
****
ابو الحسنين اميري القلع بيده الباب
ناصر دين الله وهازم الاحزاب
ينعاب الزمن بس هو ماينعاب
يلقبونه بالموت الحتمي
****
فوك الكل تعاله بزوده راعي الزود
ابولحملات هاذا الماتحده حدود
نطاه كلشي الاله الخالق المعبود
سكان الكونين ابأيده
****
وعلي البايع علي للموت مايخسر
وعلي هوه الشفيع ابساحت المحشر
وعلي هوه العقل والكلب والابهر
ويدور الكون بجفينه
****
علي اول خليفه اتنصب من الله
امير عله الخلك رب العله ولاه
مد جفينه اله وفوك البشر علاه
نتباها مو حكنه بهايه
******
متهمنه الشماته تكول لو متكول
معقول الامر لوعدها مامعقول
افظل من علي بس النبي المرسول
سادتهم فدوه يروحوله
******
يكفرونه ويذبحونه ويسيل الدم
علي منعوفه ابد والماقبل يحلم
نثبة عالولايه وابد مانهتم
قران وتحيينه اياته
******
علي يبقه الامام انقدسه ونطيعه
ونبيع الدنيا كلها وعلي منبيعه
بكل صبح ومسيه نجدد البيعه
ونموت احنه ونحيه وياها
******
محمد يشهد النه ويشهد المهدي
الوديان وجبال وهور والبردي
شما صبح زمان علينه لو يغدي
خدامه انظل احنه وشيعه
******
حبنه مايموت ولايموت الصوت
بعلي نهتف نظل وحك علي للموت
نسحك عاليضده وعالمنايه انفوت
ومندنك هام العدوانه
*****
مثل السعفه يرجف مني عدواني
اسد علساتر بكل وكت يلكاني
مادام انه عندي علي السسيتاني
يازلمه اليوصل لحدودي
******
حشد عندي زلم والله وزلم نيبه
تفرض من تريد الهيبه عالهيبه
بحلك الموت حكنه لو هو تجيبه
متهاب الموت اهل الغيره
[الشاعر السيد هاشم قاسم البلداوي ]
١٤٤٥هجري

قصيده بحق امير المومنين عليه السلام
عنك شرد اسولف يالمخرس الليل
يالمحير اليحبك واليضدونك
يالمسكت حلوك. الموت خايف جان
منهم يقترب ويلوذ بمتونك
من تدخل حرب يتزلزل الميدان
الإنس والجِنه جانو مايصدونك
يم سيفك اليدنه ينقسم نصين
والفارس يطيح بخزرة عيونك
بطل وكت المزامط علي ماتنقاس
السمه والكاع حيدر مايحدونك
واذا عالطيب اسولف انحنيلك كون
تبجي جيوش والفقره يبجونك
خيرك جان شابع حتى اليكرهوك
تشبعهم جنت وتبوس ماعونك
وتبات بلا عشه واطفالك ٱيونون
وتتبسم جنت والكل يشوفونك
متحير شوصفك ياعلي الكرار
وياجلمات اجمعها ويوصفونك
انت الأنبياء والرسل حارو بيك
بس الله ومحمد علي يعرفونك
**
الشاعر | السيد هاشم قاسم سعود البلداوي

قصيده موشح بحق السيده زينب عليها السلام
****
صعب حيل اعله البشر يوم الاجل
ويصعب اكثر عَلّي ماعنده اهل
****
والله مدري منين ابدي بالحجي
على بالي صور كل شي ماتجي
اخذ مني الحيل والبال البجي
وشمسي غابت والكمر نوره افل
****
اصفن وحسباتي يم زينب تروح
وتصب حسراتي ملح فوك الجروح
كون مو بس ابجي وعليها انوح
كون اون ون ينضرب بيه المثل
****
دنه ليها الموت بديار الغرب
ونايبتها الشيبت حتى الكلب
لا اخو لا ابن لا مدمع يصب
مأيسه مضلومه ماعدها امل
****
موسده على القبله بنت الطيبين
وعينها تتلفت يسار ويمين
يدك بلكي الباب ويفوت الحسين
اتشوفه اخر مره رادت عالاقل
****
تموت مرتاحه بعد ذاك الحزن
ونوحها الماهده يهده ويستجن
وتشفه كل جروحها من تندفن
بشوف وجه حسين مايبقه وجل
****
عدل لو بعده ويشوف ام الخدر
يحترك كلبه وعليها وينفطر
واكثر من الطف ضلوعه تنكسر
من يشوف عله العزيزه الي حصل
****
اشد من جروحه ومصاب العطش
واشد من جسمه العلى الغبره نفرش
من يشوف اخته غريبه على النعش
يموت موت الي الف مره انجتل
****
زينب الجانتله اعز من الهوه
واغلى من عيونه واغلى من الضوه
بالغرب معلوله ما الها دوه
مو دمع دم على حال اخته همل
****
ياحلاها من يطب ويه الكفيل
حسين ابن حامي الحميه والدخيل
تنسه زينب كل حزنها والعويل
وتبره من البيها وتطيب العلل
*
خادم اهل البيت عليهم السلام
الشاعر السيد هاشم قاسم سعود البلداوي
١٤٤٥هجري

قصيده بحق زينب عليها السلام
****
مناطرين .. انه وشواكي ودمع عيني سوه
مناطرين ..وعلى حالتنه بجه حتى الهوه
حملي مطروح ** تبجي الجروح
وعلى حالتنه بجه حتى الهوه
****
على فراش الموت ودموعي جريه
ابجي ومضيعه الذي يبجي عليه
بعيده عن اهلي وقريبه من المنيه
وانه غير دموعي شنهو يصح بديه
والعيون .. تمنت تشوفلها لو واحد يجي
والعيون .. وتنسه ضيم الماضي وهموم البجي
وصوتي مبحوح ** تبجي الجروح
وعلى حالتنه بجه حتى الهوه
****
لااخو لا اب و لا ام بقو عندي
لا كرايب لا اهل لا يمي ولدي
قسمتي بالدنيا هاذي وهذا وعدي
عشت وحدي وراح اموت اليوم وحدي
مدري ليش .. هالمصايب كلبي دوم اتعذبه
مدري ليش ..حتى يوم الموت اموت بنايبه
دمعي مسفوح ** تبجي الجروح
وعلى حالتنه بجه حتى الهوه
****
اه يزينب ماكو اليصيحون يمي
زيدت بيه المصيبه وزاد همي
مناطره ومدده للموت جسمي
بلا اخو لا ابن يصرخ ماتت امي
والدموع .. عله خدودي طايحه من الحزن
والدموع .. تجري من عيني وعله مصابي تون
الحزني والنوح تبجي الجروح
وعلى حالتنه بجه حتى الهوه
****
انه حسبالي بمنيتي تهده الالالم
وبعد ذاك الحزن عيني تغفه وتنام
انسه ضيم البيه كله وذيجي الايام
وبعد ما تلجمني صورة حرك الخيام
يا حرام.. يا وسف زادت عليه محنتي
ياحرام .. والمواجع ضاعفتلي مصيبتي
شوفي مشبوح تبجي الجروح
وعلى حالتنه بجه حتى الهوه
****
روحي من تطلع منو يغمضلي عيني
ينوح ياهو وياهو الي يسبل اديني
بيا وجه ارتاح من نوحي ونيني
وانه ماظل عندي الانتظره ويجيني
نايمين .. عزاز كلبي ياوسافه بالترب
نايمين .. بالغرب وانه انتظرهم بالغرب
ذابت الروح تبجي الجروح
وعلى حالتنه بجه حتى الهوه
****
ادري بالعباس اخويه كله غيره
حاشه ما يقبل اطيح بهيجي حيره
مرتين امشي ميرضاها اسيره
عليه هاي هواي وعليه جبيره
منه اريد .. يشيل نعشي ويرد بيه الكربله
منه اريد .. هناك يدفني واموت مدلله
بعطره اليفوح تبجي الجروح
وعلى حالتنه بجه حتى الهوه
****
العزيز شتسوه عزته بلايه اهله
عاليالي والدموع يصير عله
ينسه عيده والونين يصير خله
وصبر صبره يجزع بساع ويمله
من يموت .. عين مايلكه التصب عليه دمع
من يموت .. مايصح اعله الكبر يشعل شمع
شوكي مذبوح تبجي الجروح
وعلى حالتنه بجه حتى الهوه
****
لخادم اهل البيت عليهم السلام
الشاعر السيد هاشم قاسم سعود البلداوي

قصيده نزله بحق السيده زينب عليها السلام
****
يالعقيله يلعقيله
يالعقيله يلعقيله

يمفخرة البطوله يلعقيله
فخرج من ينوله يلعقيله
يتربات الحموله يلعقيله
يالمحيره الرجوله يلعقيله
من يصلها من يصلها
الج كومة مواقف من يصلها
منو المابيها عارف من يصلها
شهد بيها المخالف من يصلها
شيخه وبت مضايف من يصلها
والصميده والصميده
شرف انتي واميره والصميده
فخر كل العشيره والصميده
بعين الكل جبيره والصميده
الشدد يمج زغيره والصميده
كل شموخج كل شموخج
وحك راس ابوفاضل كل شموخج
عله فوك المراجل كل شموخج
بنت واخت البواسل كل شموخج
اكيد من الله نازل كل شموخج
هيبه انتي هيبه انتي
نجوم السمه تشهد هيبه انتي
ابد ميشبهج احد هيبه انتي
العلى باسمج تمجد هيبه انتي
زينب بت محمد هيبه انتي
غيرة الله غيرة الله
يبت حيدر حجابج غيرة الله
مكتوبه على بابج غيرة الله
ذهابج وابأيابج غيرة الله
وبجت دم المصابج غيرة الله
للثريه للثريه
وحك القتل مرحب للثريه
صعد اسمج يزينب للثريه
مثل بلعفه يضرب للثريه
شموخج انتي مذهب للثريه
كبريائج كبريائج
نفس حامي الحميه كبريائج
يذل كل ال أميه كبريائج
يضوي الدنيه ضيه كبريائج
سحك عالناصبيه كبريائج
للمنيه للمنيه
نظل نصيح باسمج للمنيه
قسمنه بضلع امج للمنيه
خدم كل احنه يمج للمنيه
شرف النه نخدمج للمنيه

خادم اهل البيت عليهم السلام الشاعر السيد هاشم قاسم سعود البلداوي
١٤٤٥هجري

قصيدة القائيه بحق السيدة زينب ( عليها السلام )
*
زينب من اذكرج واجب ابجي دموم
اقرالج فرح مولاتي ما اكدر
شتصور فرح من شافج الكرار
عله راسه لطم من شافج اتصور
شافج بالمهد وبعينه جان يشوف
مصايب كربلاء ولوعة المنظر
وعلى كصتج كتب ام المصايب هاي
مثل امها الزجيه الطاهره واكثر
ولاتبجين كلج ضمي هالدمعات
تنتظرج دموع هواي عالمنحر
تنتظرج يتامه بظلج يلوذون
ويم خدرج يزينب تحتمي الخدر
وانتي الوحدج لا اهل لاخوان
لافزاع عنج يدفع العسكر
ثيابج تحترك ومتونج مورمات
وخيام الشرف بالنار تتوجر
زينب والصراخ يفزز الميتين
كلشي بمسه العاشر غاد يتغير
اخوتج واهل بيتج كلهم يموتون
ولحمهم عالرمال الصحره يتطشر
وحبال ونياك وضيم يردف ضيم
وعليج الماله دين هناك يتأمر
وتتفرج عليج الكوفه واهل الشام
يشتم بيج ذاك وذاكه يتنمر
يزينب شرد اسولف والكلام هواي
ماناسي الجرالج زين اتذكر
لذلك يالعقيله بمحنتج احتار
واشب بنار كُلي وكلبي يتفطر
يبنت المصطفى يابضعة الكرار
بيج من ارد افكر دمعي يتفجر
دورت بحياتج فرح شو ملكيت
لكيت الفرح نفسه عليج يتحسر
لذلك مايهمني الكال والماكال
اكتبلج فرح مولاتي ما اكدر
****
خادم اهل البيت ( عليهم السلام )
الشاعر ( السيد هاشم قاسم سعود البلداوي )
1445هجري

قصيده نزله بحق{موسى ابن جعفر}{عليهم السلام}
****
باب الحوائج للموت ماننسه يوم مصابه
****
ماننسه والخمسه سادات البشر
والتسعه والسبعه والشمس وكمر
بالحسره بالعبره وبليل السهر .
ولوعاته ودمعاته الون الها الصخر
نايبته شعلت نيران ماتنطفي لهابه
****
اذانه وخلانه بس نبجي ونون
مانشفت لاجفت دمعات الحزن
وناته واهاته لا ماتستجن
موضوعا بموضوعا من سجن السجن
موطن وبيت وعنوان صار السجن محرابه
****
لااجرم لااظلم لاعنده ذنب
من الناهب والناصب حقه ينسلب
اياما كدامه ظلماً تنصلب
افكاره وانواره منهلهن عذب
فَضَله رب الارباب ايات اله بكتابه
****
ويانه وبدمانه تسري محبته
ونتنه وحسرتنه كلها لونته
مانهتم بلي ذم والما رادته
منساوم ونقاوم ناس العادته
المايرضه نتعنا عليه ويانه طب بطلابه
****
نهديله ونبجيله مو دمعه دمه
مسفوحه للوحه وحك حامي الحمه
لجروحه ولروحه والهالمظلمه
عين الكل من تمل كون الها العمه
هاي مدامع والله الابن نبي سجابه
****
بالمجلس من نجلس كل احنه سوه
وحك جده السم جبده نصير احنه دوه
الالامه وحلامه نتناثر ضوه
بلامنه نتعنه نسد حتى الهوه
غصبن على الميقبلون نحضر وننعا غيابه
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده نزله بحق الامام{موسى ابن جعفر الكاضم}{عليه السلام}
****
ياسيدي ياسيدي ياموسى بن جعفر
ياسيدي ياسيدي وياك للمحشر
****
شيعتك تدرينه عالحب تربينه
وقعنه بدمانه عشرتنه للموت
عايش نبض بينه. نورك يوالينه
صوت بضمايرنه مايعتليه صوت
خدامك واحبابك ياسيدي انصارك
وفايه وكفايه ماتنسه ابد ثاره
طول العمر. طول العمر وحسين للمنحر
****
يااغله كل غالي يااول وتالي
ماينوصف حبك لاولله هيهات
نبض الكلب انته ياسيدي وجنته
مرقدك قبلته والدكته دكات
ياهوه للريه يابلسم لبلسم
من دونك مايسوه بالعيشه ماينعم
انته الامل انته الامل والنبض والابهر
****
مثل السمه خيرك هوه انته مو غيرك
للسمه ولارض ماليها اشواك
شمسك شمس غيره هل كوكب تنيره
موصدف تتلاله هيج انته محلاك
نتغنه بحروفك ياجنة الجنه
انوارك واياتك للمنهضم حنه
يبن النبي يبن النبي. والنبأ والكوثر
****
الناصبك وينه افكاره وبنينه
سلطته هيبته ماالهن مجان
اي ذكر ماعنده. لاهو لاولده
لافكر ينذكر مضله عنوان
وهاذه انته يالكاضم عالسمه تتعاله
ياموسى ابن جعفر عنوان يتلالا
مثل الكمر مثل الكمر . احله بعد وانوار
****
السم جبدتك بيده مو هاذا ليريده
حسب بموتتك تنسي الملعون
من كبره لويطلع وصد كبتك تلمع
ينصدع من يرد للدنيا هارون
يالكاضم لو شاهد زوارك بعينه
هالناصب هالحاقد ثق يكفر بدينه
هالناصبي هالناصبي هالوغد والاذعر
****
من حكنه نتباها يبن علي وطه
يافخر والفخر من عندك يغار
حبينه افعالك دم نبجي الحالك
للاجل منعوفك انصارك احرار
تعلمنه من عندك هالصبر والهمه
كل شيعي للمحشر باصملك بدمه
لزيارتك لزيارتك تمشي متتاخر
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده موشح بحق الامام{موسى ابن جعفر الكاظم}{عليه السلام}
****
ياصبر عندك ياامام الصبر
وبالهضم والضيم كضيت العمر
****
اشفت من عمرك يبو طلبه اشفت
وانته بين الغربه والحسره عشت
مدري جم موته كبل موتك متت
والعسر عندك فلا مره اليسر
****
انته روح المصطفى وسابع امام
السلام انته ولا عشت بسلام
عذبوك بلا سبب ولد الحرام
لاذنب عندك ولاعدهم عذر
****
دورت عن فرح يمك مالكيت
وين ماامشي اشوفك دم بجيت
عشت وحدك المن الهمك شكيت
وجان غير الحزن يمك مايمر
****
كضيت ايامك غريب وبالسجون
لاكرابه لاحبايب لابنون
عالنوايب تكعد وتغفه العيون
وكلبك الطيب احر من الجمر
****
امكيديك وحالك يبجي السمه
سيدي ومن كل كتر تنزف دمه
ويشتمون كبال عينك فاطمه
هاي كسره الي ابد ماتنجبر
****
على حسين تنوح من يعطشوك
وعلى زينب تون من يكيدوك
يعينها الله تصيح من يشتموك
ودمع عينك على وجناتك يدر
****
السجن والسندي نفس زجر وشمر
النهج واحد جانو ونفس الفكر
دينهم دين المذابح والغدر
هذا واقع حال ابد ماينعبر
****
الف لعنه على هارون اللعين
بالسجن خلاك ايام وسنين
ونته بن حيدر امير المؤمنين
قطعاً ويه بليس باجر ينحشُر
****
غير جتلك جان كلشي مايريد
سمك وللجسر شالوك العبيد
فتوه هذا الباغي ماخذ من يزيد
كفر بيك وآمن بدين الكفر
****
لعنت الله عليه كل صبح ومساء
فجع بيك اهل الارض واهل السماء
على عناده نقيم الك هاذا العزاء
وزحف نتعنه ونجيلك للكبر
****
بجت دم عليك عين الرافضا
لرُفض نهجك يبو طلبه أتناهضا
نبقه لمصابك نون يابو الرضا
لحد ما النه يرد راعي الامر
****
يرجع النه ويزرع دروبك ورد
بذن الله ابو صالح من يرد
يبيد كل الحقد والحك يسترد
عله نار الشوك كلنه ننتظر
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيدة بحق الامام{الكاظم}{عليه السلام}
****
بالكاظميه ** ويلي شرزيه
الكون نصدع * بيها نفجع * ويلي شرزيه
****
هالمصيبه البجت عيون السماوات
وناح عرش الله عليها وكل الايات
صعب ماينسي همها ابد هيهات
موسى ابن جعفر الصادق بالسجن مات
بالغربه وحده ** لااهل عنده
يدمي الكلب * كلش صعب * يهل الحميه
****
كضى كل عمره غريب ودمعه يجري
وناره ظلت للمنيه بصدره تسري
على مصابه لو اكضي سنين عمري
انحب عليه واللطم يكسرلي صدري
وليلي ونهاري ** ماتطفه ناري
مايستجن * بيه الحزن* لاولزجيه
****
ضيمه مامر عالوجود وشافه انسان
ابو طلبه للحزن صار اسمه عنوان
مات مثل حسين وحده وعلى التربان
لا مناصر لامعين بين عدوان
هاي المصيبه ** كلفه ورهيبه
عاش بظلم * مات بهظم * شبل الحميه
****
اشسوه ببن المصطفى وشعمل هارون
بجى دم موسى ابن جعفر من العيون
ياذنب عنده ورماه بنص السجون
وعيشه بضيم اليشيب رمش الجفون
مارحم حاله ** ونسبه وخصاله
بدينه كفر* سم وغدر*ابن الدعيه
****
جيوش عنده اللي تحقق امنياته
وبالقصور العاليه خلص حياته
شعنده جان الكاظم ورايد مماته
وحيل جان يخاف من صومه وصلاته
سلاحه سبحته **والدرع عمته
غيرة علي * عنده الولي* وسيد البريه
****
جان بيه يشوف اوصاف الصميده
وسبحته جن ذو الفقار اتكول بيده
لله يدري لو دعاه ورفع ايده
خيبر ابغداد ابو طلبه يعيده
ميرد دعوته ** ربنه وطلبته
وراعي العلم*يمطر حمم*عالناصبيه
****
اجه امر الله واخذ مولانه للبين
ومات مسموم الولي ودموعه بالعين
دين يطلبنه الامام ونوفي هالدين
اله نبجي عليه مثل مانبجي لحسين
للمات مسموم**دم نبجي كل يوم
هذا العهد*دوم وابد*صبح ومسيه
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده موشح بحق{ابو طالب}{عليه السلام}
****
الله بالقران نزلها ويكول
العم ابو ولله يصحاب العقود
****
وابو طالب شهم من نسل الكرام
صار للهادي ابو عم وسلام
ينام جان وهو يسهر ماينام
قدم سنينه فدائاً للرسول
****
موقفه ماينسي لا مستحيل
هوايه صار بزمن بي كلش قليل
اليوكف ويه المصطفى وللحك يميل
وماسمع حجي الملامه والعذول
****
للنبي دك صدره كله مايلي
عله جتافي تصير يبني وتعتلي
وفه وكفه الحيد ابو حيدر علي
وفي وللحك والعدل دومه ميول
****
وكف ضد الكل ولاخاف العدد
حزام ظهر المصطفى وعون وسند
الموت كال اهون ولا خون العهد
ولا اسلم ابن اخويه للقتول
****
الدين ليهسه مدين الوكفته
أَمَن بدين النبي وشد رايته
يصون رحمه ودينه جانت غايته
نقطه بيضه وكفته لا ماتزول
****
ابو طالب فخر كل المسلمين
فده بجاهه وروحه واهله والبنين
فضله ماينساه عند العالمين
والمواقف تشهد وناس العدول
****
مثل شمس الصيف لامع بالسمه
والنعم من عنده راعي الموزمه
هو البظهره علي حامي الحمه
بكيفه عالعدوان ابو الكلفه يصول
****
ابن سادات العرب هالهاشمي
بظهره جان الدين كله يحتمي
المايشوفه كلبه وعيونه عمي
يرعب بصيته العساكر والخيول
****
مايهمنه عنه شيكول اللئيم
الكفره هذه ابن باغي وزنيم
ابو طالب زلمه ياشيعه عضيم
الجبل والوديان تشهد والسهول
****
عالي شانه هواي واحنه نقدسه
الشرك للطاهر ابد مينجسه
للبواسل قدوه دومه ومدرسه
الدنيه ماتنسه مقامه شما تطول
****
خادم اهل البيت عليهم السلام
الشاعر السيد{هاشم قاسم الداودي البلداوي}
١٤٤٥هجري

قصيدة گعدية للإمام {موسى الكاظم}{عليه السلام}
****
يامسجون المثلك چان من صيته ٱيخاف الحاكم
بصبرك وحّدت الأديان من صيته ٱيخاف الحاكم
بالگيد حررت الفكر * بالگيد دومك منتصر
من صيته ٱيخاف الحاكم
****
عنك ٱمنين ٱبدي ٱسولف حاير ٱحجيها ٱبأمانه
ٱمنين ما فكر أشوفك إنت أكبر من مكانه
صبرك المنهاجه ثوره ٱوفكرك أكبر من زمانه

تتحده أفكار الظلم
يمك الأعوج ينتظم
و الما يريدك ينحرم
من لطف الله ٱوجنانه

لليوم ٱتخاف الحكام إسمك يابو الحريه
ويهد ٱعروش الظلام إسمك يابو الحريه
للّيل آياتك بدُر * بالگيد دومك منتصر
من صيته ٱيخاف الحاكم
****
وحدك ٱبطاموره ظلمه أو مايمر الضوه يمك
ٱجروحك ٱتخوف السلاسل ويرسم الحريه دمك
وصوت آهاتك يدوِّي أو صگِر يِصْگُر باليظلمك

ٱمن ٱونينك ٱتخاف العده
ٱو عرش الطغات ٱتهدده
ٱو ٱهل الكراسي الحاقده
كل وكت يرعبها إسمك

آيات ٱجروحك قرآن شامه ٱبوجنات الذمه
ٱمن الذِّل ٱتطلع الإنسان شامه ٱبوجنات الذمه
مازال إنت ٱو تستمر * بالگيد دومك منتصر
من صيته ٱيخاف الحاكم
                    ***
ياسجين الچان گبلك صوت ماينسمع صوته
ساكت ٱو عايش الوحده ٱو يرعب الظالم سكوته
إجيوش و ٱعداد و عساكر كلها ترجف من نخوته

ٱبصبرك چنت يابو الرضا
نهج الكراسي ٱتناهضه
ٱستبداده دومك ترفضه
ٱودومك اتحث الصحوته

ٱو توگف ضد الميقبلون و ٱعداء الإنسانيه
ٱو صارو رب ٱو ينعبدون و ٱعداء الإنسانيه
كل يوم تطعن بالغدر * بالگيد دومك منتصر
من صيته ٱيخاف الحاكم
****
إنت مثل حسين نهجك رايد ٱتحرر فكرنه
مانطخ للكرسي هامه ٱو ماندك للذل صدرنه
إبدين الٱستغلال نكفر ٱو أبد منضيّع فرضنه

بس للأسف يبن النبي
سلمنه أمرنه الأجنبي
و الشرف صار ٱبلا عبي
أو صرنه ما ندري بأمرنه

نكره گمنه اللي ٱيصلون ونذم اليدخل جامع
ونحب البالله يكفرون ونذم اليدخل جامع
والجاي أسوء ننتضر * بالگيد دومك تنتصر
من صيته ٱيخاف الحاكم
****
وٱحنه چيف ٱنحبكم ٱحنه أو ماقبلنه بيوم بيهم
عيِّرونه ٱو حاربونه ٱو ماسلمنه من ٱديهم
كُرُه كُرهونه ٱو حياتك چَنه چتالين ٱبيهم

چيف بنهجكم نقتدي
لانكره ٱو لا نعتدي
ينتهي ظلم ٱو يبتدي
ظلم آخر من وليهم

كل همهم بينه ٱيسقطون گدام الغير ٱتذلنه
ٱو حگك من عدنه ٱيغارون گدام الغير ٱتذلنه
وياك نبقه للحشر * بالگيد دومك منتصر
من صيته ٱيخاف الحاكم
****
مثل عن هيئتنه أضرب يا بو طلبه يا ولينه
الما تحبكم شنهو تعمل أو ظلم شيسون بينه
گاع شافونه ٱشترينه گلبوا الدنيه علينه

و ٱمصابك ٱو كسر الضلع
أحچيلك ٱو لا تنفجع
لامونه حته ٱعله الدمع
ٱو يستهِزْءون ٱبچينه

چي تبچي ٱعليكم مولاي حاربو هاي الهيئه
شحچيلك و العندي هواي حاربو هاي الهيئه
و بهاي إحنه نفتخر * بالگيد دومك منتصر
من صيته ٱيخاف الحاكم
****
خادم اهل البيت عليهم السلام
الشاعر السيد{هاشم قاسم الداودي البلداوي}
8 - 2 - 2024 ميلادي
27 - رجب 1445 هجري

قصيدة بمناسبة ولادة الامام العباس هليه السلام

ها يم البنين انولد عباس
اخوي البل شدايد بي اشد حيلي
تانيته اشكثر يايمه والله
هيمني انتظاره ومانمت ليلي
مشتاكه ارد اشوفه وداعة حسين
مايرتاح شوكي وعنه تحجيلي
حجالي عليه حيدر يم البنين
وعن اوصافه كلي وشنهو ينطيلي
خليني ارد اشوف عيونه  حلوات
عليج الزهره يم الوفه سهليلي
احله من الكمر مو بله بضعاف
ماشايفته بس حافظته لكفيلي
اذا يمه انولد كليله عل الباب
اختك زينب وشوفي شيسويلي
يكطع اكماطه بيده ويعتني اركاض
وفي كالولي ميضيع تفاصيلي

حافظني كلش   زين يايمه اخويه
ماينسه لاحاشاه.  هذا ابن ابويه

اي يمه انولد عباس العضيد
اجه الباجر ييمه يصير كفالج
عشر اقمار يم اوصافه تضيع 
عنده اوصاف ابني تفوق لبالج
من ارسومه قريت يحبج هواي
عرك من سمع صوتج يمه ونفاسج
انتفض من سمع بسمج وارتعش عباس
ظل يرعد رعد من شاهد خيالج
شاط من الغضب واشتعل نيران
يدري بضيم كلبج چنه واهوالج
اي كطع اكماطه ودمّعت   عيناه
ودنك مستحه من صرت انه كبالج
هاج اخذي يزينب خله يرتاح
ابو جفوف الكريمه اليرسم امالج
مشتاكتله انتي وهو مشتاك
ادري بشوفته يرتاح دلالج
الف هنيالي ببني اليرفع الراس
وانتي بهيج  اخو يايمه هنيالج

مبخوته آنه بهاي. ياأم البنين
من فدوة اروحن كون لجفوفه الاثنين

أبوذيات بولادة صاحب العصر والزمان الإمام المهدي ( عجل الله تعالى فرجه الشريف )
*
أخذني الشوك من ايدي بلا بال
و اغرد صرت تغريدة بلا بال
يسألوني الفرح واجب بلا بال
أكيد او واجب بهاي المسيه
*
الكون ابكل هله او ناسه وجانه
يصير العيد و افراحه وجانه
أبو صالح لون يرجع وجانه
عليه ارواحنه انطش واهليه
*
الشاعر السيد هاشم قاسم سعود البلداوي
17 - شعبان 1445 هجري
28 - 2 - 2023 ميلادي