قصيده بحق الامام{علي ابن الحسين السجاد}{عليهما السلام}
****
ماانسا ضيم همومي**من عندي سلبت نومي
ذيج الصور مافاركت بالي وعيوني
****
همومي مامرت ابد منها اعلى واحد
عذبتني وسهرتني والله شاهد
الحزن مو وياي يمشي وكلبي كاعد
عاف هاي الناس كلها وبيه لابد
بالكوه اخلص يومي**اخذت الدنيه علومي
ذيج الصور مافركت بالي وعيوني
****
خمسه وتلاثين عام من المصيبه
وانه نار حشاي مستعره ولهيبه
اقل ماعنها اكول اشكد رهيبه
الهسه زينب بت علي بعيني غريبه
اكعد واسولف بيها**من انذبح واليها
ذيج الصور مافاركت بالي وعيوني
****
من ركبتي السلسله الجفين اديها
تبجي لمصابي وانه ابجي عليها
والله من اسمع بواجيها ونعيها
باعز ماعندي المنيه ارد اشتريها
هاي العلي رباها**يحجي الشمر وياها
ذيج الصور مافاركت بالي وعيوني
****
يسبها اسمعه ويرجع يشَتِم عليه
ابن ذاكه الغادر السب الزجيه
هاللعين الناصبي ابن الناصبيه
يضحك من يشوف الاحبال ابديه
يشمت بدم جروحي**والناكه تبجي النوحي
ذيج الصور مافاركت بالي وعيوني
****
غربتي وعلتي ودمعتي واليتامه
تركت بعيني صورها شجم علامه
ليلي جنت من المصايب ماانامه
صعبه ياناس النذل يولي النشامه
بلكوه اجر انفاسي**واستحي ارفع راسي
ذيج الصور مافاركت بالي وعيوني
****
مثل زخ المطر واكثر دمعي يجري
وكسرة حسين اعله عمي انكسر ظهري
انه البين ازلام اميه طاح قدري
شلون لي هسه انه عايش والله مدري
زين العباد وحالي**خله الحجر ينعالي
ذيج الصور مافاركت بالي وعيوني
****
صعبه عالعنده شرف ينظر خواته
مجتفات ميسرات من الشماته
والله شفت الغيري ماشافه بحياته
شسوه بيه الحزن هو ونايباته
مثل الشمر الامي**تركض ركض كدامي
ذيج الصور مافاركت بالي وعيوني
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده اربيعنيه
****
اجيت من الخرابه*بحزن كلبي وعذابه
اسولفلك مصابه**يبو كلب الحنين
****
اجيتك والكلب دامي وحزن ماينوصف هضمه
درب اللي مشيته بعيد بيه مارحم ظلمه
سهرني ليالي طوال ولاراعى إلي حرمه
اقل مااوصف همومه مصيبه ونايبه عُظمه
يبو اليمه وغلاتك*مدامع نايباتك
نكسر كلبي بمماتك**يبو كلب الحنين
****
من يوم الطحت يحسين وانه الدمعه بعيوني
جمر ينزل عله خدودي يخويه وذبل جفوني
انهدم حيلي انكسر ظهري حسين وخابت اضنوني
ياريتك لو عدل وتشوف الك رديت انه شلوني
غريبه ودمعي يجري*وعليه ماكو خدري
الونيني ذبني صبري**يبو كلب الحنين
****
كل ليله العلي مرت مصايبها تذوب الروح
عَلَي شابت نجوم الليل وعلى مصابي تون وتنوح
ابكثُر أَلالف وتسعميه نزلت بالدليل اجروح
يسيره اعله الهزل امشي وانت اعله الرمح مذبوح
يعاندي اليشيلك*على الناكه يميلك
تعبت وانه اشتكيلك**يبو كلب الحنين
****
من عفتك على التربان غريب موذر مسلب
وراسك يابعد اهلي من دم نحرك مخضب
تولوني بني سفيان يبن امي وبعد اعجب
تصيح الناس من إِنمر اجت زينب اجت زينب
تصيح وانه ابجي*واحيرن المن اشكي
مراري وحالي يحجي**يبو كلب الحنين
****
من خربه لعد خربه يودوني وانه مجتفه
وتتفرج عليه الناس الاعرفه واللي ماعرفه
القصر يزيد دخلوني وضعني الوادم تحفه
اذا ينشف دمع حزني هذا جرحي مايشفه
يمد ايده اعله نحرك*وضرب شاهدته ثغرك
وسأل جاوينه صدرك**يبو كلب الحنين
****
احترك كلبي يبو السجاد والله بعيني من شفته
يتبختر على راسك وعليه يأشر بعِصته
بالمجلس شتمني هواي شطت من شفته وسمعته
رفعو راس ابو فاضل اريد إكباله اطك اخته
احس بسمانه وكعت*يخويه وروحي طلعت
وعِيونه عليه دمعت**يبو كلب الحنين
****
صحت وسفه والف ياحيف المثله عليه يتعده
بعد ذاك العمر كله اطيح واوكع بشده
تمنيت الزمان يعود وجفه يرجع الزنده
ابو فاضل يكوم عليه قصره بيمنته يهده
ابن ليث العشيره*اخويه وكله غيره
انذبح وانه اسيره**يبو كلب الحنين
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده كعديه اربعينه
****
يحسين يحسين زينب اجت يحسين
ماتنحمل بلواها گوم انهض تلگاها
زينب اجت يحسين
****
زينب من اليسر رجعت گوم وتلگه ظعنهه
اجت بس اشلون جيه مارحم بيهه زمنها
اثنعش طعنه الطعن صدرك رجع من بعدك طعنها
ردت اميره ابلا عرش*تنصدم بيهه وتندهش
يحسين حضرلك نعش*ميته جتك من محنها
بعدين بعدين تحجي الك بعدين
بلچي ابشوفتك تهده**وتنسه الغربه والوحده
زينب اجت يحسين
****
اربعين من الليالي مرت اعله الهاشميه
هيه موذيچ العفتها لوعوها ال اميه
هزل وسياط ومآسي اي وحگ ضلع الزچيه
من اچفوفها ايسيل الدمه*وعالشفه اثار الضمه
مو چنها بت حامي الحمه*عنها گالو خارجيه
بالعين بالعين ماظل دمع بالعين
محنية ظهر رجعت**مو ذيچ الامس طلعت
زينب اجت يحسين
****
بت علي الكرار زينب سكنوها بالخرايب
امخدرة الله العقيله عيشوها بالمصايب
حسين مو ليله ليالي ونامت اختك عالترايب
لمن عفتها الناصبي*لوع متنها بالسبي
يحسين عاين عالعبي*وقيس من عدها النوايب
بونين بونين راحت واجت بونين
خاف اتموت من توصل**صار الماردت يحصل
زينب اجت يحسين
****
من الصبح لليل اخيتك بالسياط ايلوعوها
وامك الزهره الزچيه گبالها شگد شتموها
هزل وغربه وسلاسل والعساكر ماروعوها
والاشد من كل معضله*ومن كل مصايب كربله
زينب وهاي العايله*عله الوادم فرجوها
يحنين يحنين عندك علم يحنين
بنت ابيوت عَّفَتهه**وكل الناس شافتها
زينب اجت يحسين
****
ادموعها من البچي نشفت شتبچي ماادري اعله گبرك
بالدرب شبعت مصايب تسكت يبچيها ذكرك
ليل ونهار العقيله حسين مافارگها نحرك
لو گلب عدها من صخر*من الضيم چاطگ ونفجر
شسوه شعمل بيها القدر*اليوم علي مر تخبرك
ومنين ومنين تبدي منين ومنين
تجيلك مصايبها**مأسيها ونوايبها
زينب اجت يحسين
****
الگبل زينب ياوسافه الليل ماشايف خدرها
علي ليگدام يمشي وسيفه لابد يم خدرها
والوره العباس بيده يدنگ ويمسح اثرها
وانت عليك الميسره*وعاليمنه راعي المفخره
ياوسفه هسه اميسره*وحارت الحيره بامرها
للبين للبين كلكم رحتو للبين
وراحت للغرب هيه**الارض الشام مسبيه
زينب اجت يحسين
****
ردت ابيوم اربعينك والسهر ذبل جفنها
الشمس غيرت وجهه وازرگ ووارم متنها
عزها والهيبه وعرشها هوت من عافتك منها
گوم انصب الاختك*خيم خل تستراح من الالم
وانسه معاناة السهم*وعالمشرعه ودي العلم
گله للعباس زينب**رجعت ابهمهه ومحنها
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده نزله اربعينيه
****
يعباس عد من ودعت زينب يعباس
تقبل تنولي بعدك ينوماس
غريبه ولااخو عدها يانبراس
****
ارد أَنشدَك لمن رحت وام الخدر عفتها
وانته الذي لمن اجيت يابو الوفه كفلتها
من المدينه لكربلا وياك بفخر جبتها
لو بس ترد من عالنهر وباللي جره شفتها
يجيدوم زينب بالحزن طاحت يجيدوم
اجت لو ما اجت يمك هالعلوم
واخوك حسين ظل عاري بلا هدوم
****
ضلت غريبه ام الخدر تتمنه لو تجيها
لمن مشيت ومرجعت حاط الكفر عليها
الحرمه تعاشر بس حزن من ينذبح وليها
المن تروح وتشتكي لو جتفو اديها
والاجرام عليها حوط بشركه والاجرام
واختك حايره ظلت بالايتام
فَرو بالعره من بعد الخيام
****
ظلت وحيده والشمر ليها عتنه وسباها
سب وشتم طول الدرب لمن مشه وحداها
ورم متنها من الضرب وبلا رحم ولاها
المن تروح وتشتكي ضل عالترب حماها
والاحساس راح اعله الهزل مسبي والاحساس
يحدي بناكته ياحيف الارجاس
شكد رادك ترد وترد الانفاس
****
شحجي وشسولفلك بعد عن زينب وضعها
بس راح اكلك من رحت لا مانشف دمعها
هاي العزيزه ام الخدر شكد الشمر دفعها
لو صاحت بأسمك يجي وفوك الوجه صفعها
يوفاي يحاجيها الشمر تقبل يوفاي
شامت بالدمع فرحان بالجاي
وزينب مستحها مشيب الراي
****
ورم متنها من الضرب وفوك الضرب شتمها
وزجر  وخوله وحرمله الكل حوطة حرمها
الراسك تصد وتشتكي وتكله عن هضمها
بس بالدموع اتناشدك وكلما حجت لطمها
يصيحون زينب لاتحشمينه يصيحون
مات الكافل ضعونج يكولون
يفرحون بدمعها شكد يفرحون
****
للكوفه والشام العجب زينب تطب اسيره
عاشت عمر ام الخدر بت حيدره اميره
تدخل دواوين الزلم يابا الفضل جبيره
ترضاها يابو المرجله يا هيبة العشيره
بالعيون جفت مابقت دمعه بالعيون
شابت من هضمها رموش الجفون
تون والكل على ونته يضحكون
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده اربعينيه ولائيه
****
كل الغياره**بهاي الزياره
تكصدلك بدمع العين * بيوم اربعينك يحسين
يابو الحياره ** بهاي الزياره
****
يحسين ياسيد شباب الجنه
انت الاماني غيرك شتتمنه
يابو علي انشوف الانس والجنه
من كل كتر مولاي الك تتعنه
اكبر حلمها ** ياطب المها
تمشي بطريقك حفاي * لو عل جمر يامولاي
ماكو خساره ** بهاي الزياره
****
متظل ديانه ولاتظل قوميه
يوم اربعينك تعتنيلك هيه
كل ألطوائف شفنه تمشي اسويه
بدربك الطاهر ياابو الحريه
يبن الحميه ** وروح الزجيه
يموحد القوميات * لاماتعوفك هيهات
حتى النصاره ** بهاي الزياره
****
موعجبه يبن المصطفى مو عجبه
يمك الزاير مايحس بالغربه
وغيرك منو يوحد العالم دربه
ورب العلى اعله الحاربه يشن حربه
يابعد اهلنه ** يابو المحنه
عوضك ربنه وجازاك*ضحيت اله وكلشي انطاك
فوز وتجاره ** بهاي الزياره
****
مشايه تتعنالك اصغار اكبار
اتدوس اعله خشم الحاربك والاخطار
لا حر يهمها ولا برد لا اشرار
تمشي الك يابو علي ليل انهار
كبرك مُناها ** وعزها ورجاها
زايرك مايعرف خوف*يتعنه للطف زحوف
يترك دياره ** بهاي الزياره
****
يحسين شايلك عشك ما ينقاس
ياجنة الفردوس ياتاج الراس
يابو علي ومايهتم بحجي الناس
للموت يبقه وياك مثل العباس
ناره اعلى زينب** للحشر تلهب
يمشي ويهل الدمعات*بعيونه دمعتها تبات
ليله ونهاره ** بهاي الزياره
****
درب الله دربك والجنان بكبرك
يخسر الدنيه واخره اللي ايخسرك
يحارب الضدك ينصر اللي ينصرك
ريت اللي خله الخيل تسحك صدرك
يشوف بعيونه ** عابس جنونه
جندلك اشكد انصار * كلها اتصيح الثار الثار
وتاخذ بشاره ** بهاي الزياره
****
خادم اهل البيت عليهم السلام
الشاعر السيد{هاشم قاسم الداودي البلداوي}

موشح اربعينية
****
حسين زينب جتك اتعنالها
اعليك امك گوم شاهد حالها
****
حسين بس عاين عليها وشوفها
لسه اثار الحبل بچفوفها
اسألها چم ليله اسهرت من خوفها
باتت ووجه الشمر يبرالها
****
حسين زينب هيه مو ذيچ القبل
اتغيرت وتغير اهوايه الشكل
زين ماماتت يخوها من الچتل
والزجر نجم الظهر راوالها
****
حسين ذبحة منحرك عندك تهون
لو ترد انفاسك وذيچ العيون
نظره منك لو تحط فوگ المتون
اتموت من الحصره فوگ اخيالها
****
التمشي وي چتال اخوها شتنتظر
ينمرد دلالها مو ينكسر
هيه لحظه وداعتك ما تستقر
هوه جتال الاخو جتالها
****
من طحت يحسين راحت عالهزل
والمصيبه اليحدي بالناگه النذل
انت ادره بهاي موقف مو سهل
الزمن بعدك كلشي ماخلالها
****
زينب من خيالها تگطر نده
مو جريمه تمشي مابين العده
اتأذي ام الخدر اي متقصده
روعتها وروعت اطفالها
****
گوم لختك لاتموت عله الگبر
وصلت الارض الطفوف بلا صبر
ماتت الدمعات بچفوف العذر
شاب كلب الحجر من اهوالها
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده موشح ولائيه
****
عالعهد يحسين ماننسه العهد
خدم وانصارك نظل وللابد
****
يبو اليمه يبن حماي الحمه
وقعينه العهد وياك بدمه
وحك غلاتك سيدي وحب فاطمه
الباري من سابع سمه علينه شهد
****
مانعوفك لو يصير شما يصير
انت غايتنه وحلمنه والمصير
ندري حظ اليخدمك كلش جبير
ومايخيب اليدك بدروبك وتد
****
والله نتباها بخدمتك عالامم
نور وتضوي يبو اليمه الظلم
خسر دنيا واخره المنها انحرم
ماأله باجر شفيع ولاسند
****
لانمل منك ولاملينه
ياحسين وخيرك مغطينه
لو نعوفك غيرك شينطينه
وياهو غيرك خدمته تنطي مدد
****
يحس بيك حسين حتى المايحس
بكل زمان تشعشع حروفك شمس
انت اعز من عدنه واغله من النفس
والك نفدي ارواحنه وحته الولد
****
يبن بنت المصطفى وخير العمل
تضيك بينه الدنيه ونشوفك امل
ذكرك الدكتور ويشافي العلل
والتعب وياك احله من الشهد
****
يسوه جنة عدن يحسين الجلوس
بالمجالس سيدي تطيب النفوس
هي كل العافيه واعظم دروس
عالم تسوي اللي يرضع بالمهد
****
كلشي يمك يبو اليمه يختلف
الكلف عد الغير عندك مو كلف
بنص جهنم مسكنه اللي ينحرف
عن طريقك يبو الغيره والمجد
****
مايهمونه العواذل والخصوم
مثل شمس الصيف نتحده الغيوم
انت والدنه وعلى كبرك نحوم
وابد مايمنعنه عن كبرك احد
****
قائد وسيد امير انت وملك
كفر والله اليبغضك واعظم شرك
غالي عند الله دم الينسفك
من اجل حبك يروح المعتقد
****
انذرنه هاي ارواحنه من اجلك سبيل
نموت من اجلك الف موته قليل
مستحيل نعوف دربك مستحيل
وحك اهاتك يبو اليمه وعد
****
احنه مو مثل الذين كاتبوك
واعدوك وخالفوك وحاربوك
شيعتك نبقه ونذم الناصبوك
ونلعن العافك يبو اليمه وشرد
****
يالثاراتك ننادي يالولي
بنارنه العاداك باجر يسطلي
شرفتنه خدمتك يابو علي
غيرك احنه شعدنه ياطير السعد
****
خادم اهل البيت عليهم السلام
الشاعر السيد {هاشم قاسم سعود البلداوي) ١٤٤٥ هجري

قصيده اربعينيه                         
****
يالعقيله يكوي حيلج الله ورسوله
ليش اشوفج هذا حالج دموعج هطوله
****
شكلج اتغير يزينب ليش اشوفه
مو هذاك الجان ما ودي اعوفه
وليش بدرج شايب وشايخ كسوفه
وعلى جرحج منكتب خويه شيروفه
شنهو صاير زينب احجي ليش الاذيه
جنتي ورده ورده حلوه رجعتي سبيه
****
لسه اتذكر يزينب يوم الوداع
إباب المخيم يزينب طحنه عالكاع
انته كتيلي السفينه وفييك شراع
خدر اختك لو رحت للشمر ينباع
وانه كتلج يختي صبري شنهو اللي بيدي
مثلج اصبر عالمصيبه وكطعة وريدي
****
من اجه يمي الشمر خويه ودنالي
روحي يمج جانت ويم الغوالي
من الكفه حز نحري وانه ما ابالي
مو عله بالي شيسوي انتي عله بالي
رفس صدري وكطع نحري وما عفتج آني
هو يضحك واني ابجي ويبجي حناني
****
عوفي همي زينب واحجيلي عنج
بالمصايب عشتي من بعدي اظنج
انه راح اسكت واريد اسمعها منج
ليش بس تبجين يمي وعالي ونج
حيراني هذا حالج ويلي شمصيبه
كبر سنج شعرج ابيض ولله عجيبه
****
ليش متنج ازرك وعينج دميه
ليش محنية ظهر دحجي اليه
ليش دمعاتج تصب ردي عليه
وليش ويه الضعن ماجتي رقيه
جاوبيني كلميني عل مر بهلنه
بسطرة امي ودم ابويه وراعي المحنه
****
شنهو مامشتاكه يازينب لبوها
روحي تنشدكم عليها جاوبوها
الفركه والشوك عله بنتي عذبوها
لا تكوليلي مثلكم سلبوها
انتضرها لحضه لحضه بلجن تجيني
هالعزيزه يمته ترجع ويسكت ونيني
****
بقت بالشام لوحدها بالخرابه
هذا انه الما جنت حاسب حسابه
اتخاف من الليل هيه ومن عذابه
ياهو ليجاوبها اذا صاحت يايابه
هسه المن ابجي دمعي وانعه بحسرتي
مدري اللكم مدري الها مدري لغربتي
****

خادم اهل البيت عليهم السلام
الشاعر السيد{هاشم قاسم الداودي البلداوي}
١٤٤٥ هجري

قصيدة تجليبه اربعينيه
****
للطف احدي بينه وامشي ياجمال
نزور اكبور اهلنه المانساها البال
****
زينب من على الناكه ابحزن نادت
ليالي احزان ضيمي بهل مسه عادت
من وصلت الطف جروحها هاجت
وتِذَكرَت من خذوها مجتفه بحبال
****
اجت بالاربعين ونارها يانار
وكتها انذار بيها وماشت الفجار
بعد ذاك الخدر ومحافف الاخيار
ولوها اهل الرجس والحقد والانذال
****
مشتاكه شكثر الهم يحادي العيس
ليالي هوايه مرت وي جنود ابليس
حن كلبي لخوتي وعلي والعريس
فركاهم هدمني وغيرالي الحال
****
مابطل ونيني ولاجفيت النوح
انه المكسوره خاطر والكلب مجروح
رحت وجيت تدري وداعت المذبوح
مثل زخ المطر دمع الحزن همال

****
ارد الهم اسولف عالجره بيه
وراويهم اثر ضربات العليه
ارتاحو هما وانه مشيت مسبيه
وكل لحظه انرمي بميت سهم جتال
****
اشتاكت روحي الهم والله ياحداي
للنحره نذبح والطاح يم الماي
خلاني هجرهم لافكر لاراي
مدري شلون رحت وجيت بالاطفال
****
يحداي الضعن والزهره مشتاكه
كمت احجي ويه روحي واسال الناكه
اون بسكوت والنيران حراكه
على فراك الحسين وفركت الكفال
****
خدري انداس من عافوني والاحساس
وشيب بالهجر دلالي كبل الراس
ما ادري شعجب ماخمدت الانفاس
وما مت ابحسرتي هالبعد من طال
****
اريد اكصد وراوي حالتي الهم
وبيه شسوه من امشيت جاتلهم
اهل الغيره وادري الصار يا لمهم
شوفني بجفاهم هل الزمن اهوال
****
ويه الروس اتمنه ادفن عيوني
وماعاين بعد وانظر على متوني
ماتدري من اصدهن سبي يسبوني
وديني ارد اسولف ضيم ما ينشال
****
خادم اهل البيت عليهم السلام
الشاعر السيد{هاشم قاسم الدادوي البلداوي}

قصيده كعديه بمناسبة استشهاد{الرسول محمد}{صلى الله عليه والهِ وسلم}
****
من بعد عينك يموت الصبر
والدمع والدمع ينزل جمر
الفكدك وبلواه ** يارسول الله
والدمع والدمع ينزل جمر
****
عني لاتمشي يبويه الخاطر الله وخاطر امي
عاين الحالي دخيلك نشف من الخوف دمي
حسبت بحسابي تبقه بويه كل العمر يمي
انت الوطن وانت المدد ** وانت المحامي والسند
والوالد انت والولد ** والعشيره وبني عمي
انت كوني ودنيتي والاهل
من وكت من وكت جاك الاجل
ماجنت اتناه ** يارسول الله
والدمع والدمع ينزل جمر
****
يالجنت كلشي اليه بكد محبة الله احبك
جنت مو بس والد انت جنت انفاسي احسبك
تروح وتخليني وحدي شلون بويه انطاك كلبك
وياك اخذني للكبر ** ماريد اعيش بهالعمر
صعبه اتاني وماتمر ** وعيني ماتشبح الدربك
اصبر شلون على فراكك انه
والله والله فلا طَوِّل سنه
موتك شينساه ** يارسول الله
والدمع والدمع ينزل جمر
****
شكد كوابيس بحياتي جانت تمر اعله بالي
ماتهز لو شعره مني وجنت بيها ماابالي
بويه مادام انت يمي الهوه مايلمس دلالي
حيلي يبو الزهره انهدم ** وشيبت كلي من الالم
كلبي انرمه بثاني سهم ** وصرت انحف من خيالي
مايكفيني من تمشي الحزن
نوحي نوحي شيسَكته من احن
مصابك شينعاه ** يارسول الله
والدمع والدمع ينزل جمر
****
روح خلاف عينك. كلي يابدر العشيره
الكل نوايب دهري اصبح من تفاركني اسيره
وانه عشت وياك عمري. مدلله وحره واميره
مايرحم بحالي الدهر ** من مُر يوديني الامر
ترضاها ياراعي ألفخر** بعد هالنظره الاخيره
ياحبيب الله ويمرني العجب
بابي بابي يحركوها بحطب
وهذا مااتناه ** يارسول الله
والدمع والدمع ينزل جمر
****
منين اجيب منين بويه. للظلام الجاي كمره
خوف والام ومخاطر والمدامع تهل جمره
بليل من ينشال نعشك مستحيل نشوف فجره
بعدك فلا يمرني السعد ** يلنمت بحضان الوعد
من الجاي شتنطر بعد ** منه يازهرة الزهر
تدري فكدك ابد ماينحمل
والله والله عليه مو سهل
للكلب دماه ** يارسول الله
والدمع والدمع ينزل جمر
****
والله لو بيدي يبويه اله انه وياك امشي
وسوه من البيت يطلع نعشك الطاهر ونعشي
انهدم حيلي وضاع صبري وبانت الفركه اعله رمشي
نوحي اعله مصابك فرض ** ودموعي تترسها الارض
يااغله عندي من النبض ** بفركتك ماظلي كلشي
****
خادم اهل البيت عليهم السلام
الشاعر السيد{هاشم قاسم الداودي}

قصيده موشح بمناسبة استشهاد{الرسول محمد}{صلى الله عليه والهِ وسلم}
****
بهالمسه حيدر جليس بداره
يحچي للزهره بدمع يتجاره
****
رجع من الدفن مكسور الظهر
الكسر ظهر الموت هالليله انكسر
اخذ منه اعز محبوب القدر
وظل ابو الحسنين تلهب ناره
****
يگلها للزهراء هادينه رحل
وحيلي يم الحسن بفراگه انحل
چني يالزهراء مو ذاك الفحل
وانه من الله الولي وبتاره
****
ادفنته يالزهره واجيت بلايه راي
الشالني بعيونه خليته وراي
بچت كل السمه من ونّي وبچاي
بچفي يالزهره دفنت انواره
****
ادفنت ويه الغالي روحي وهبيتي
هو ابن عمي وحبيبي ومنيتي
حزام ظهري وعوني هو ودنيتي
غاب عن عيني وبقت اثاره
****
چان مالي البيت كله بالحنان
وسور زودي العالي هو والامان
فرق ابيناتنه حيف الزمان
المثله ياوسفه بگبر يتواره
****
شلون يم حسين نصبر عالغياب
وابو القاسم هالصبح تحت التراب
والربع انيابهم مثل الذئاب
مدري يالحظه تشن الغاره
****
بعد متدك بابنه چفوفه ابد
منين نطلب بعد بالشده مدد
مثل گلبچ گلبي يالزهره انمرد
والسقيفه بلا رحم غداره
****
خلي ننسه الماضي كله والدلال
مايرد لينه بعد لا لا محال
تنتظرنه احزان متمر عالخيال
الجاينه عندچ علم باسراره
****
خادم اهل البيت عليهم السلام
الشاعر السيد {هاشم قاسم الداودي}

قصيده بمناسبة استشهاد{الرسول محمد}{صلى الله عليه واله وسلم}
****
شلون اصبر شلون *شيصبر العيون * لو رحت عني
يالهادي ما اتحمل ***خاف الوضع يتبدل
لو رحت عني**لو رحت عني
****
يبو الزهره تلوحلي انه احسك
واحس تنعه الي يالمصطفى نفسك
لو موتك خذك مني وكسف شمسك
وما شوفك بعد لا ينسمع حسك
شلون اصبر بهاي *ومو انت وياي *لو فارگتني
لو غمضتها عيونك*** ما اگدر انه بدونك
لو رحت عني**لو رحت عني
****
انه حيدر علي الكرار ووصيك
اخويه انت وحبيبي وانه هم خيك
چنت بالموزمه فيي وانه فيك
صعبه عليه صعبه لو شفت ضيك
ما بين التراب *يا اغلى الاحباب *وانت اغلى مني
يالعشت بين اچفوفك*** عيني بعد متشوفك
لو رحت عني**لو رحت عني
****
مااصبر وحگ صبرك على فرگاك
وشيسوه العمر ياسلوتي بلياك
يريت الموت ياخذني وروح وياك
ولا بعدك اظل ابلوعتي انعاك
ولا اگضي السنين *بعدك بالونين *وميكفي وني
بس الحزن يبقالي***والعمر ما يحلالي
لو رحت عني**لو رحت عني
****
مو من الهوه انفاسي من عطرك
وتربيت بجوارك سيدي وحجرك
وانسه احزاني من اغفه على صدرك
ابن عمك اخوك ونفسك وصهرك
يالفرگتك ويل *لو چلچل الليل *يبچيلي حزني
دمعي ودموع الزهره ***ينزل ونين وحسره
لو رحت عني**لو رحت عني
****
لو هانت عليك ايامي وايامك
تتركني وتروح بلوعة آلامك
هاي الزهره بنتك هيه گدامك
ذبلت من بجيها زهرة احلامك
عاين عالخدود *هاي انت موجود *وحضنك يضمني
فاطمه هاي بنيتك *** گللها عن اوصيتك
لو رحت عني**لو رحت عني
****
عذراً يارسول الله انه اتعذر
اگللها بوصيتك صعبه ما اگدر
شگللها ضلعها گبالي يتكسر
وانه انظر عليها بدمعي واتحسر
هذا انه محتار* بهذي يمختار* والظهر محني
والزهره ما تدريني ***انت الذي موصيني
لو رحت عني**لو رحت عني
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده بمناسبة استشهاد{الرسول محمد}{صلى الله عليه واله وسلم}
****
فرگتك فرگتك والله سبتني
فرگتك فرگتك لمن عفتني
صعبه عليه وانه الزچيه
****
يابويه عني من رحت والله نسبيت اسبايه
ماشفت لو مره الفرح عشت بهظم دنيايه
لادهري يرحمني صفه ولا صحبتك وفايه
حرت انه انوح لفرگتك لو انحب عله دمايه
بضعتك بضعتك ولله سبوها
بضعتك بضعتك بعدك ولوها
صبح ومسيه وانه الزچيه
****
شفت المصايب والحزن من امتك يالهادي
عيشوني باهات ودمع ونار التشب بفادي
بوادي الحزن بويه سرت وتسير هيه بوادي
لو صحت بسمك انضرب يابويه وشما نادي
صحبتك صحبتك بويه جفوني
صحبتك صحبتك لاما رعوني
شفت الاذيه وانه الزچيه
****
ايامي بعدك تنحسب تسعين ابد مو اكثر
تسعين الف چنها گظن اكثر بعد اتصور
عصروني بالباب وطحت والضلع مني اتكسر
غير المنيه ماردت والها گمت اتنطر
محنتي محنتي تكتل محنتي
محنتي محنتي بجت دمعتي
همنه سويه وانه الزچيه
****
بعيوني كلشي تصورت وحدي اظل مذهوله
وحدي انوح عله الگبر جايز اظل معقوله
بس انشتم لو انضرب ومكدره ومنحوله
ماچانت إبالي ابد شفت العجب من ذوله
سَبِتَك سَبِتَك انه سمعتها
سَبِتَك سَبِتَك بعيني شفتها
ويلي شرزيه وانه الزچيه
****
بالباب من هجمو لذت ودموعي تنزل حسره
والنذل من عاين علي زيد عليه العصره
يگولوله ماتت فاطمه وطاحت تره اعله الغبره
وسمعته من گلهم وإن اليوم الا ابچي الزهره
وردتك وردتك لو تنظرلها
وردتك وردتك شامت كتلها
طاحت رميه وانه الزچيه
****
احمرة عيوني بسطرته ومتوني صارت زرگه
واغصاني صارت يالولي بنار الدمع محترگه
والموت احس مني اقترب والدنيه صارت خنكه
ماأدري من كثر الحزن لو من ونين الفرگه
موتتك موتتك ماحسبتها
موتتك موتتك لا ماردتها
تمنيت اليه وانه الزچيه
****
خادم اهل البيت عليهم السلام
الشاعر السيد {هاشم قاسم سعود الداودي}

موشح للامام {الحسن العسكري} {عليه السلام}
****
على مصاب العسكري واهاته
الكون كله ينحب بوناته
****
ماكو شي ظل مابچه الهذا المصاب
عيش الاكوان كلها بالعذاب
ياذنب عنده ويسمونه الذئاب
الچان متاذيهم حچاياته
****
بيه ماراعو وجاهه ولانسب
عذبوه بلا ذنب وبلا سبب
تبت ايديهم الف نوبه وتب
لوعوه وكفرو باياته
****
عليهم اللعنه تهل صبح ومسه
وعسى لايبقه نسل الهم عسه
لوعو گلب النبي وخير النسه
وبچو عيون الولي وشيباته
****
هالمصيبه الهدت السبعه الشداد
ولبست الدنيا على همها السواد
وعلن عالاكون عرش الله الحداد
والزمان توقفت ساعاته
****
ابو صالح ينعه لوداعه ويون
وعلى مصابه دم بچت عين الحزن
شيبتله النايبه رموش الجفن
طاحت بطيح الابو حسباته
****
مات ابوه الچان اله عون وسند
عيونه متشوفه بعد هيهات ابد
بدون عين الوالد شيسوه الولد
تنولي من  الالم ضحكاته
****
غسل بچفينه هاليوم الوطن
وعگد كل اماله وي عگد الچفن
شيع الحنيه كلها ويه الحسن
ودفن وياه كل حلو بدنياته
****
عالفجيعه المهدي الله يعينه
على همومه ومحنته وونينه
الفگد والد والله فاگد عينه
ومستحيله تنوصف لوعاته
****
شيعته ومنعوفه وحده بمحنته
ابد ماننسه الشهيد وونته
تظل دمعتنه تواسي دمعته
بينه سچين وتكص حسراته
****
يابو صالح مانعوفك مستحيل
ياخليل گلوبنه واعظم خليل
شما نقدملك يبو صالح قليل
ياامل دين النبي وغاياته
****
مانعوفك وحگ امك فاطمه
نهر نصبحلك اذا جاسك ضمه
احنه گاع وعينّه تشوفك سمه
ياحبيب الله وبخت شاراته
****
على حالك مايجف يوم الدمع
نقسم بخد الزچيه والضلع
بكل ظلام شعلنه يالمهدي شمع
وياك عدنه الموت يامحلاته
****
بيوتنه مفتوحه كلها للعزاء
وعينه ننطيها للگصدو وفاء
صحنه يامية هله بااهل الولاء
المانسو روح النبي وماساته
****
سيد محمد يعزب باليجون
وعالدرب طشينه للزاير عيون
بلد متخيبلك بيوم الظنون
وتدري بالبلداوي گد چلماته
****
خادم البلداوي يبقه يعاهدك
مايعوفك يبو صالح وحدك
يقدسك ويعظمك ويمجدك
وباسمك يدوس البغي وقاداته
****
خادم اهل البيت عليهم السلام
الشاعر السيد {هاشم قاسم الداودي}

قصيده كعديه بمناسبة استشهاد الامام {الحسن العسكري} {عليه السلام}
****
يابين بس عوف الوالد *يابين من عنده شرايد
لحظات خليني وياه** ماعيش تدري بالياه
****
شعندك ويه ابن الزچيه. وليش اشوفك انت يمه
شعندك حچيلي الحقيقه. وليش تفتر اعله جسمه
حاير بنوحه ونينه  وجبده متگطع بسمه
اتواسيني بمصابه ردت **شاهدني بيه اتحيرت
بهموم گلبه اتكدرت ** عليك دمعي لا تلچمه
خليه ياموت وعوفه* خليه مالوم اتشوفه
والسم يابين اسباه **ما عيش تدري بلياه
****
اصبر شويه اعله كيفك.  گبل لا تاخذله روحه
خلي تشبع عيني منه.  باچر تعيش عله نوحه
لو مشه تموت بحسرته. وتعمه من لوعة جروحه
هالحسن عني لو رحل **من بعده ابقى بلا امل
عالذكره بفراگه اظل **ادري هاي الروحه روحه
لو راح شيخلص ليلي* لو راح يتهدم حيلي
طول الدهر انعاه** ماعيش تدري بلياه
****
تدري بالدنيه وحملها. تكسر ظهور اليتامه
يايتيم المات ابيه.  وعاش بالدنيه بسلامه
يضيع بدروب النياحه.  وتاكل بروحه الندامه
وكل رحم ماعنده البشر **والدنيه مليانه خطر
وگبالك ايمامك قهر  **ميت بطيحت ايمامه
بهاليوم گاصد تفجعنه *بهاليوم ناوي تلوعنه
وعليك اقسم بالله **ماعيش تدري بلياه
****
خلك بدالي انت خلك.  موقف شگد بي صعوبه
نهارك يموت بونينك.  وموتك بأول غروبه
هذا ابويه وهذا حاله. والزمن اعلن حروبه
لو خذته من يبقه الي **بين المصايب انولي
حنيته دنيه وكل هلي **بعيني والكون وشعوبه
هيهات تسكت وناتي *هيهات تهدأ اهاتي
والسم ياكل بحشاه** ماعيش تدري بلياه
****
بالنبي يابين احلفك.  ارحم بحالي وغربتي
عوف ابويه الغالي عوفه.  لا تهد گلبي وعبرتي
لو مشه من يبقه عندي.  والهجر يذبح نظرتي
صعبه اظل بلا ابو **وگبالي شمات وعدو
ساعتها شيفيد العفو**وكلش اطويله سفرتي
وياه خذني وريحني* وياه وجهه يصبرني
يا بين وانعم بحماه **ماعيش تدري بلياه
****
تنكسر عيني برحيله. وعمري يخلص حسره حسره
يرعب الليل وظلامه.  وينجرح لو ماكو گمره
وانه ياويلي عله حالي.  راح اعيش بلايه عمره
وانه الامام المنتظر** من صغري دلالي انكسر
وين انطي وجهي والسفر **قاسي ما يرحمني ادري
يزرع بنص دربي صحره
****
خادم اهل البيت عليهم السلام
الشاعر السيد {هاشم قاسم الداودي}

قصيده بحق الامام{الحسن العسكري}{عليه السلام}
****
ياموت ارحم حالي*وترك ابويه الغالي
مااكدر اعلى غيابه.** مااكدر اعلى غيابه
****
ارحم بحالي يموت وحن عليه
شعندي وياك وأجيت بهال رزيه
بعد من احضانه ماشبعت أديه
اي واحك كل الجره بأمي الزجيه
محتاج انه الحنيته * ماريده يترك بيته
وابقه اون المصابه** مااكدر اعلى اغيابه
****
والحسن هالدنيه مليانه مخاطر
بيها ماريد ابقه وحدي بحزني حاير
المايصير بروحته اعتبره صاير
وحالي حال حسين اظل ابلا مناصر
توكف الدنيا بعيني * ياهو الذي يحميني
والناس جنها ذيابه ** ماكدر اعلى اغيابه
****
وَنّي ووان اليتم وهموم ضيمه
نايباته اجبيره  واحزانه أليمه
خاف من يموت ياخذني غنيمه
واكضي باقي سنين عمري بالهظيمه
نار الحزن حراكه * ماتنطفي بفراكه
الماحسبت حسابه**مااكدر اعلى اغيابه
****
بيش اضمد جروحي من يبتعد عني
وهوا روحي ودنيتي وعيوني ذني
عوفه ياموت واخذ شتريد مني
مااريد اصبح يتيم بصغر سني
تدريه اعز من روحي * موته يزيد جروحي                    تمنيت بيه صوابه ** مااكدر اعلى اغيابه
****
ليش تطعني يموت بظهري غفله
وانه دمع الحزن كله بعيني صله
هالله هالله بيه الطف هالله هالله
حجة الله وراح اودع حجة الله
ياموت غيره شعندي * بفراكه اعيش الوحدي
وانه اعز احبابه** مااكدر اعلى غيابه
****
ابو صالح انه ابنه وكل حياته
انه هوه الذي شايل كل صفاته
ليش اليه يعوف حزنه ونايباته
واكضي كل سنيني بالغربه بمماته
هيهات بعده اتهنه * تتناني بس الونه
والنوح يفتح بابه **مااكدر اعلى غيابه
****
خلاف عينه ابقه هايم بالبراري
وحلمي يتطشر على رمال الصحاري
انه ادري والمصيبه هوا داري
ياحزن من بعده كاعد بنتظاري
واضح واشوفه كبالي*غيره فلا يبرالي
ماينحمل عذابه**مااكدر اعلى غيابه
****
خادم اهل البيت عليهم السلام
الشاعر السيد{هاشم قاسم الداودي}

قصيده تجليبه ولائيه{سامراء}
****
على عناد النواصب والوهابيه
سامره تظل للموت شيعيه
****
نموت وعن دربها مايمنعونه
يخوفونه بمنيه وموت يلكونه
جرذان الصحاري مايخوفونه
احنه اولاد حيدر هيه من هيه
****
ننسه ارواحنه والها مننساها
بأعز ماعدنه واكثر بعد نفداها
نكص جفوف كلمن راد يدناها
هيهات الشمر ياخذها مسبيه
****
منارتها تظل تتحده كل حاقد
والناصبها واللي الها مارايد
هيبتها تظل بكل زمن شاهد
عفيفه وطاهره مخدره وعلويه
****
معزتها تزيد وابد ماتنقص
الفكر بيها سوء بيوم يتربص
والمدفون بيها منحره ينكص
من عدنه اغله هي ومن هوه الريه
****
مثل امنه وابونه واكثر واكثر
مايغله عليها كطعة المنحر
كلمن مايواصلها وكطع يخسر
يقدسها الاله وهاي مرويه
****
يودها الله شكثر جاليش ماودها
ومن عزاز كلبي شلون ماعدها
اتمنه اكضي باقي عمري بسدها
الجنه اضمنها انه مليون بالميه
****
خادم اهل البيت عليهم السلام
الشاعر السيد{هاشم قاسم الداودي}

قصيده موشح بمناسبة استشهاد{فاطمه الزهراء}{عليها السلام}
****
للزجيه يكون ابجي عيوني
على همها دموعي ميكفوني
****
مصابها ماخله حيل ولاصبر
شلون انه بدونها اكضي العمر
مني اخذها الموت وتراب الكبر
الجانت ام بيتي وشمعتي وعوني
****
والله لو بيدي اموت وياها
العمر مايسوه ترا بلياها
مستحيله ام الحسن انساها
لو نساء العالمين انطوني
****
نايم وصاحي افكر بيها
وكلبي يوكف من يمر طاريها
ليلي ونهاري انوح عليها
مصابها وفراكها اذوني
****
انه للفرسان ابد ماهابها
كاسر خشوم الطغات وبابها
بالهوه اتعثر صرت بغيابها
ابجي وعيون السمه يبجوني
****
شلون انسه شلون خدها المنسطر
وعصرة الباب وضلعها المنكسر
بعيني شفت شلون جانت تنعصر
من وكت وناتها شيبوني
****
ياهو اليسد ياهو خلوة فاطمه
من مشت دنيانه صارت مظلمه
للسمه صعدت باعظم مَضْلَمَه
غفل صعدت ياوسف من دوني
****
راحت وخلتني وحدي بهالزمن
كلبي يتكلب على نار المحن
جفوني ذبلت من دموعي والوسن
واثر هالنايبه بان بلوني
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده بحق السيده{فاطمه الزهراء}{عليها السلام}
****
اسمع اشصار يخويه اسمع اشصار
اعله ام الاطهار يخويه اعله ام الاطهار
****
راح اسولفلك يخويه وكلبي ملهوب
عن مصيبه وعن جرح ماجان محسوب
ٱمن الالم خله الزجيه تون وتلوب
مثل شمعه تبجي سكته بين الدروب
ليل ونهار يخويه ليل ونهار
****
راح ياعباس اسولف كلشي هاليوم
من بعد مامات جدنه شسوت الكوم
سوه ياعباس اجونه بحقد مسموم
بغير اذن طبو علينه زمرت الشوم
وماكو اعذار يخويه ماكو اعذار
****
امي خلف الباب لاذت خويه عباس
خافت تعاين عليها عيون الارجاس
لاجن اتعناها يركض ارذل الناس
وبيها ظل يعصر نظرته وشيب الراس
يطللب بثار يخويه يطلب بثار
****
امي آخ تصيح ضلعي انكسر نصين
وهوَّ ياعباس يدفع بيده الاثنين
الزهره تبجي هو يضحك شفته بالعين
والاشد منها سمعته يكلها للبين
وطكها بسمار يخويه وطكها بسمار
****
يابو فاضل من المها هوت عالكاع
وضاع صبري من شفتها والعمر ضاع
لارحم لا غيره عدهم اهل الاطماع
صارو اعله ام الترافه كلهم سباع
حركو الدار يخويه حركو الدار
****
تسهر ومدمعها اذكر جمر سجام
ٱمن ابن صهاك وزمرته ٱشّافت الام
من هضمهم من ظلمهم كبرت اعوام
من وجعها جانت امي ليله متنام
تشتعل نار يخويه تشتعل نار
****
ماتت وعالخد طبع سطرات وجفوف
دمع المصيبه الاليمه خويه مذروف
بعد ابوها عاشت امي برعب وبخوف
تخيل انته كوه كامت تمشي وتشوف
بليل الاخطار يخويه بليل الاخطار
****
انه من يوم المصيبه عيني عالباب
وليل ونهار ٱعله امي دمعي سجاب
ابد ما انسه الفجيعه وفعل الاصحاب
يابو فاضل ولو أمي ولية ذياب
كلهم ٱشرار يخويه كلهم ٱشرار
****
خادم اهل البيت عليهم السلام
الشاعر السيد{هاشم قاسم الداودي البداوي}

قصيده بحق الامام {السيد محمد ابن علي الهادي} {عليهما السلام}
****
ياخويه موتك من خذك   مافكر شلون
ابقه انه عايش والنفس   بالكبر مدفون
ياخويه ياخويه مافكر شلون
****
مافكر الموت الذي   سل منك الروح
كل كبريائي بطيحتك   تمليه الجروح
لو ميت انه ولاشفت   كدامي مطروح
روحي وحبيبي وهالمسه    للمكبره يروح
لو بيدي ولله اندفن   يالغالي وياك
يم راسك ابجي بحسرتي   وانعه اعله الفراك
ياخويه ياخويه مافكر شلون
****
ياسيد محمد لظل    بعدك يمظلوم
ياخويه والموت الخذك    مركز للهموم
كون اشك كلبي بموتتك   موبس الهدوم
وعيوني تبجي الفركتك    حسرات ودموم
وين الكه مثلك بالبشر    مو بس وفي حنين
جاوبني يبن المرتضى   واحجيلي منين
ياخويه ياخويه مافكر شلون
****
مو كتلي اظل طول العمر   يمك يصنديد
وما اغفه ليلي لو صرت   عن عيني ابعيد
شو رحت وحدك للكبر   وبكيت انه وحيد
ميرجعك دمع اليصب    وعتابي شيفيد
تخنكني حسرة فركتك   كل مغربيه
لا بل على فراكك اون   صبح ومسيه
ياخويه ياخويه مافكر شلون
****
ظهري انكسر يابو الوفه   واتهدم الحيل
ياخويه ومصابك صرت   اتنفس الويل
ياطعم بشفاف الحلو  ياريحة الهيل
بلا وجهك الجنه كمر   شيخلص الليل
بين الاخذ روحك ردت   ياخذني للبين
هو اليافاركله اخو    شيسوي بالعين
ياخويه ياخويه مافكر شلون
****
بس افتح عيونك الي   وعاين على الحال
وحك عمك اللي تشبهه  بيه الحمل مال
صوت اسمعت باذني همس   تدري شحجه وكال
يالعسكري انفتحت الك  كل بوب الاهوال
يالحسن انسه كال الي   كل ذيج الايام
محمد مشه وانت استعد   للهم والالام
ياخويه ياخويه مافكر شلون
****
مو هينه اشوفك عالثره   يا اغلى الاحباب
يالجنت تسكن بالكلب   ساكن بالتراب
يمحمد ارحم حالتي   ذاب الكلب ذاب
موصدك كلي اللي جره   جذاب المصاب
ماكول جلمة اخ بعد   صدكني للموت
والبيت اشوفه بموتتك مو بيت تابوت
ياخويه ياخويه مافكر شلون
****
ماادري يطلبنه الاجل   ياخويه يادين
عينه على اعزاز الكلب   ويدور الزين
محتار اروح الياكتر   يابو الوفه وين
عباسي انت ولو رحت  شيظل للحسين
يالجنت كلشي بدنيتي  واغلى من الانفاس
بعيوني وحشة بت علي الفاركها عباس
ياخويه ياخويه مافكر شلون
****
خادم اهل البيت عليهم السلام
الشاعر السيد{هاشم قاسم الداودي البلداوي}