قصيده تجليبه بحق{مسلم ابن عقيل}{عليه السلام}
****
ياويلي اعله مسلم ذبحوا اولاده
مصابه الي ذبحهم رجعوا عاده
****
منين القصه ابدي والله ماادري
ماسولف ربعها وينكضي عمري
امن اتذكر ألمها دمعتي تجري
للناطي اعز ماعنده وزياده
****
مصيبه امصيبته هدمت عزم هالروح
الما نايح عليهه ظل يون وينوح
من سطح الاماره امجتف ومذبوح
رماه الناصبي واعوانه واوغاده
****
اولاده اليتامه الشردو من الطف
ماشافت صبر حين البدت تضعف
صارلها الدمع عين وغطه ومعطف
والتربان صارت الهم وساده
****
تدور عالامان وصادفت بس خوف
يادرب التفوته بالخطر محفوف
السبب واضح يناس امبين ومعروف
سَوَّه المايحبهم كلشي اله راده
****
من سجن السجن للونه والحسره
شوفهم زمنهم محنته وغدره
عليهم ناحت اشكد فاطمه الزهره
وهيه ام الحسن عالونه معتاده
****
واظن مسلم نصب مأتم وسط كبره
وعلى ابراهيم ومحمد لطم صدره
يربي الي ذبحهم ينكطع نحره
ذبحهم زيد الونات عالساده
****
مصيبتهم مصيبه ماجرت منها
متحير شسولف ياخلك عنها
ابد مافاركتنا اهاتها وونها
نار مصابها بالكلب وكاده
****
مابطل عزانه والدمع يشهد
عليهم يبقه قام خالد وسرمد
على ابراهيم ياويلي وعلى محمد
تنطي اللي ذكرهم فاطمه مراده
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده ثلاثيه بحق {مسلم ابن عقيل}{عليه السلام}
****
بالكوفه مسلم وحده * بين المخاطر والعده
ويلي اعله بلواه ** ويلي اعله بلواه
****
محتار يمشي الياكتر  ويدكله ياباب
بالغربه ظل الوحده  والوادم اغراب
يدورله عن جلمة هله  يدزله هوه الهاب
وتفضل تصيح بشغف يااغله الاحباب
عالوجنه دمعاته تهل * كل ساعه يزداد الحمل
والاجل يتناه ** ويلي اعله بلواه
****
اليادرب يتعنه اله  مايلكه صاحب
حتى الشوارع غدرته مثل النواصب
الكله تعال وماوفه مارفله شارب
عافه وحيد بغربته يشوف العجايب
ماصحله واحد ينصره * والكل تقرر تغدره
وتحلل دماه ** ويلي اعله بلواه
****
مكسور كلبه وخاطره  ودموعه بالعين
يتمشه بالكوفه بحزن  بين الدرابين
مايدري ابو محمد يحط  اجدامه لاوين
وماحار بمصابه ابد  حاير بالحسين
جاي بضعن عقد الوله * ومابيها ناصر ظل اله
ويقاتل وياه ** ويلي اعله بلواه
****
لفو عليه من كل كتر انصار اميه
بنيران وسهام وحجر  تضرب سويه
لاغيره عدهم لارحم وبلا حميه
من كل مجان اتعنته  ويلي شرزيه
وجروح متروس الجسم * والكل تسب بيه وتذم
وهالوضع اذاه ** ويلي اعله بلواه
****
للقصر مجتوف بحبل  ياوسفه ودوه
ويم اللي ماعنده نسب  ياويلي خلوه
الهاشمي اليعله اعله الفخر  كدامه كعدوه
كطعوله راسه اعله السطح  والجسد شمروه
بلا راس جسمه ينسحل * هاي اللي ماصارت قبل
وجروحه تنعاه ** ويلي اعله بلواه
****
خادم اهل البيت عليهم السلام
الشاعر السيد{هاشم قاسم سعود الداودي}

قصيد تجليبه بحق{مسلم ابن عقيل}{عليه السلام}
****
مسلم بالشدايد ياهو الينحره
عشر جيوش منه ماتهز شعره
****
مثل حيدر علي من يدخل الحومه
شما يشتد امرها عنده محسومه
فوارس يامه يامه منه مهزومه
البواتر والعقول تحيرت بأمره
****
تربات الصميده من يطب ميدان
خوفاً من يمينه تشرد الفرسان
على افعاله ابد مايختلف اثنان
مثل الموت ايده اليمنه واليسره
****
ليهسه بفعاله تسولف الكوفه
وتتغنه السيوف الحره بجفوفه
شما تظلم املها مسلم تشوفه
مره تشوفه ماي ومره جالجمره
****
لجهنم تودي الحيد ضرباته
والميدان ابد ماينسه صولاته
حملات ابو الحمله الوفي حملاته
مثل قدره ابد ماينوصف قدره
****
مثل شمس الصباح المشرقه زوده
من يوعد ابد مايخلف وعوده
من حلك المنيه يجيب مريوده
ميكوم وعلي بجفوفه اليسطره
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده عكيلي بحق{مسلم ابن عقيل}{عليه السلام}
****
مسلم مبعوث ابن الزهره
****
مسلم زود ومسلم غيره
اختاره حسين ومادز غيره
عَيّش اهل الجور بحيره
ماقصر لمن دك صدره
****
ماهمه الجور واعوانه
كابلهم مسلم بيمانه
وحده وخوف كل عدوانه
ماكدرت الاف تعبره
****
يتباها البتار بجفه
والموت بيمناه تكفه
للويل اليكصدله يزفه
من حيدر ماخذ هالشمره
****
تتراجف من عنده القاده
يسوي بيهم كلشي الراده
من يزعل ويطب هداده
تشرد منه الكل بنظره
****
من دحاي البيبان معلم
ينَدم جيش ومايتندم
عشره عشره يدز لجهنم
يافارس لو هد ينحره
****
اليا ميدان يطب يتصدر
الموت من يصد ليه يتكتر
يصفيها ويرجع يتبختر
وفاي وماينكر عشره
****
شيخ الزلم وشيخ الفُرَّس
والسواه واجب يتدرس
كدام الموت ويتهدرس
شما سولف ماوصف عُشره
****
خادم اهل البيت عليهم السلام
الشاعر السيد{هاشم قاسم سعود الداوودي}

قصيده ميمر بحق {اولاد مسلم}{عليه السلام}
****
وينك يحماي الجار ما تكصد تحامينه
****
يا بالحسن يالما ترد الينخاك
دايم تجاوب حاظر وعد عيناك
واحنه اليتامه ياعلي ونترجاك
بالشدد طحنه وردناك تتعنه وتنجينه
****
ابراهيم ومحمد ياحيدر احنه
من بعد ابونه اعله الخناجر طحنه
وياحاضر الشدات يامه صحنه
والدنه خلانه وراح يابا الحسن تدرينه
****
مسلم ابونه انذبح ياداحي الباب
وعالترب نمنه والله ياابو تراب
ال النبي وصفينه اجناب اغراب
للوادم انكول ايتام محد يحن علينه
****
ياعلي من سجن السجن ودونه
وبسياطهم يامه شكثر ضربونه
اذونه والزهره شكثر اذونه
ايتام واطفال ازغار محد علي يحس بينه
****
لادين عدهم لا شرف لا احساس
ناس شكثر شفنه ومشفنه ابن الناس
نتمنه لو يمنه ابن عمنه العباس
ودمك الغطه المحراب يحلم شخص يدنينه
****
يتعنه للحارث ويكطع ايده
والعالنهر سواه بيه يعيده
والد وخلف هالعزم لوليده
بس الزمن ماينعاد راح الابو وبنينه
****
شفنه الظلم ياباالحسن بانواعه
من الجهل واهله علي واتباعه
الصاحب طبع صعبه يغير اطباعه
وطبع ال اميه الظلام ياباالحسن تاذينه
****
خادم اهل البيت عليهم السلام
الشاعر السيد{هاشم قاسم سعود البلداوي}

قصيده دارمي بحق{مسلم ابن عقيل}{عليه السلام}
****
سجل يراوي اليوم زودي وفعالي
خل يشهد التاريخ موقف نزالي
****
خل يشهد التاريخ عن فعلي هاليوم
مسلم انه وهديت ثائر على الكوم
اسحك سحك عالروس واوصل للنجوم
نص بيميني تموت نص بشمالي
****
إروي التشوفه العين كون على عهدك
لا تكذب اعله الراد عني يشهدك
تربات ابو الحسنين وعلومي عندك
ميهمني اذا مليون فارس اجالي
****
مسلم وحيد ابين كل هاي الالاف
من عنده رجفو خوف بس هو ماخاف
بجفوفه ابو النوماس جتفهم اجتاف
لا جند لا قواد داسو خيالي
****
بالكوفه حل زلزال وانصبغت دموم
وشح الهوه اعله الناس ماتكدر تكوم
والمنها ترفع هام هذا امره محتوم
من جرد الصمصام راعي البساله
****
هاليوم ارد صفين وحدي بجداره
وخيبر اردها اردود بارض المعاره
وبجفي اقلع باب قصر الاماره
وبسيفي انور سود هاي اليالي
****
بيميني اسوي اعجاز والمستحيله
وثاري من ابو سفيان يبرد غليله
الهوايه انه هنا همه القليله
بجدامي ادوس الجيش جاي عله بالي
****
اروي انت للاجيال عني بعداله
كلهم سفير حسين سوه المحاله
فوك النجم علاه راس البساله
وبعيونه شال حسين اغله الغوالي
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده بحق{مسلم ابن عقيل}{عليه السلام}
****
ها يمسلم دخيلك ها يمسلم
بينه اكرم يهزبر بينه اكرم
من دخل دخلة اسد * شمل اميه طشره
صاحت القاده بدمعها ** بشاربك احنه تره
****
دخل والسيف بيمينه ونار زوده ٱتوجرت
مسرفن ردان المنيه وهيه بيه اتوزرت
السمه حي الله صاحت لبو محمد كبرت
زعزع الكون ونظامه وشمس ربنا ٱتكورت
صُفرت وجوه العده * وهو مسلم وحده
ها يمسلم دخيلك**ها يمسلم
****
عينه عين الموت هيه ابد ما تخطأ محال
من يعاين لليريده يگف كلبه ٱبلا نزال
ما تِثَني ٱيمينه واحد من يطب سوح القتال
غيرة الله بجفه شايل يمحي لو راد الجبال
من ينادي ياعلي * ٱبغيرته الكل تصطلي
ها يمسلم دخيلك**ها يمسلم
****
هاشمي وطب المعاره مايهاب ابطالها
ٱيضَيّع ٱمن ٱيطب عليها ٱيمينها ٱمن ٱشمالها
هيه مهره وابو محمد حيدها وخيالها
بكيفه وبإيده امرها وبيده شد ٱحبالها
زود راعي المرجله * كل شي مال ٱيعدله
ها يمسلم دخيلك**ها يمسلم
****
شافته ازلام آل اميه وبقت بيه مسودنين
عشره عشره يطك سويه هو وحده ٱبلا معين
لا تعب لا مل تشوفه لا نكض حيله ويلين
كلها صاحت هذا مسلم لو امير المؤمنين
عالثره مثل النجم * طشر عقول الزلم
ها يمسلم دخيلك**ها يمسلم
****
قاده وجنود انحنتله وليش ٱله ماينحنون
صبغ لون الكاع حمره ٱبدمهم وداس الظنون
لا ابن لا ابو خله وقاتل الاب والبنون
ٱصغار وكبار اعتنوله بي غدو يتوسلون
نادته بدمع اليصب * كافي ياشيخ الحرب
ها يمسلم دخيلك**ها يمسلم
****
زلزل الكوفه بأهلها وغرّكت بدمومها
لعنة الله ٱعليها حلت غصت بزردومها
والهوه جمره تحوّل كِسَر شيل خشومها
والقيامه ٱعليها حلت هيه هاي علومها
بجدمه يسحكهم سحك * زلمة الله من صدك
ها يمسلم دخيلك**ها يمسلم
****
كَحَّل عيون السفاره وَفَّه ليها وصانها
دين عنده والامانه لا ابد ما خانها
والبساله ٱبزوده صارت من ذهب عنوانها
فرهد احلام آل اميه وبجه دم اعوانها
كتبت حروفه الزمن * للوفه اجمل وطن
ها يمسلم دخيلك**ها يمسلم
****
خادم اهل البيت عليهم السلام
الشاعر السيد{هاشم قاسم سعود الداودي}

قصيدة عكيلي بحق{مسلم ابن عقيل}{عليه السلام}
****
مسلم لمن طب للكوفه
****
مسلم هالحيد من ادخلها
ميلها بزوده وزلزلها
غيرة حيدر ويمثلها
مسلم كل اعيون اتشوفه
****
طبها الحيد ورافع راسه
ما خاف الطاغي وحراسه
عدوانه اتخاف من انفاسه
ضرباته امن ايهد معروفه
****
ضلت هالوادم تترقب
تعرف مسلم لمن يغضب
نيران ابيمناه وتلهب
المو من سيفه ايموت ابخوفه
****
تربات الكرار تعرفه
الوادم وعليهم مايخفه
مايعرف دلاله الرجفه
هي الترجف من حروفه
****
ميزلزل شعره امن ايمانه
الضده شما حشد عدوانه
هو وانصاره واعوانه
يزلزل لو طب كل صفوفه
****
ليهسه التاريخ ابعزمه
يتفاخر من ايمر اسمه
ضحه لأجل الدين بدمه
ينباها الزود من يطوفه
****
زعزع حيل الموت بحيله
كل زود الزوده ينخيله
ياويله الضده ياويله
ملك الموت تكول اجفوفه
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده فائزي بحق{الانصار}{عليهم السلام}
****
ذباها لعمامه النفل من حركته وكام
ابنه مضاهر واعتنه بهمه للخيام
****
ناده حبيب اعله الزلم يهل الحميه
شيب ولشبان اطلعو وكوموا اليه
ماريد واحد مايجي وميرد عليه
وكلكم سوه يهل الوفه رفعوها الاعلام
****
ادري اني واعرفكم شنو ودريكم شلون
انصار وكت لموزمه تكرون لعيون
ناديت من عدكم ردت كلكم تسمعون
من زينب لحره شسمع نافع الضرغام
****
نافع سمع ام الخدر تحجي وي لحسين
ودكله باجر لو اجه ياكرة العين
خو ما تعوفك صحبتك ياخويه للبين
وانتَ تظل الوحدك مابين الالام
****
يعني كلب زينب بعد لي هسه مرعوب
مامطمئنه اخت الكمر من عدنه فدنوب
بخيمتها ضلت بت علي محتاره وتلوب
كل ظنها باجر نتركه بالحومه ينضام
****
كل الزلم خذها ومشه يم خيمة ام عون
ناده يبت المصطفى لحسينج يهون
هاي المناحر للسبط فدوه يروحون
وحسين عدنه لمصطفى ويمثل الاسلام
****
من الشهد احله وعلي عدنه المنيه
وي ابن حماي الحمه وابن الزجيه
خل يطمئن كلبج تره بهاي المسيه
منعوف اخيج وحده يطرز سهام
****
كلها يزينب أمني ولاتشغلي البال
منخون ابد هذا العهد موش احنه الانذال
لنسوي شي مامر كبل وتذكره الاجيال
خل بينه ظنج يطمئن ياحره وينام
****
وياكم الاخر نفس يابنت الاطهار
وعنه اذا صار الحرب تلفيج الاخبار
انصار اجينه بكل عزم متهمنه الاخطار
للموت ياحرة علي مندك الهام
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده ثلاثيه بحق{الانصار}{عليهم السلام}
****
هاي احنه الانصار ياشبل الاطهار
والله محد يوصلك * كل احنه فدوه نروح الك
ياشبل الاطهار ** ياشبل الاطهار
****
يحسين والله انبايعك كلنه اعتنينه
عن علم حب ومعرفه يمك اجينه
غايتنه مو دنيه وطمع تدري انتَ بينه
ياشبل حماي الحمه وعزة نبينه
هذا النشيد انردده * غصباً عله خشوم العده
ياشبل الاطهار ** ياشبل الاطهار
****
هل خبر لينه من وصل جينالك انصار
لبّينه كلنه دعوتك ياابو الاحرار
شيب وشباب اتعنتك وتعنت صغار
العاف امه والعاف الولد والودع الدار
سيف بيمنك ياشهم * للموت لا ما ننهزم
ياشبل الاطهار ** ياشبل الاطهار
****
بالجيش مانهتم ابد واعداده والخيل
وحكك يبن حيدر علي نشوفهم الويل
باجر اذا طر الفجر ويصبّح الليل
من دمهم انسوي نهر وانعدل الميل
وعليهم انسد الهوه * ودمهم نسيله بنينوى
ياشبل الاطهار ** ياشبل الاطهار
****
باجر نسطر ملحمه اتخلدها الاجيال
كول وفعل غيره وعزم مو حجي وينكال
واحدنه لو يخزر جبل من ساسه ينشال
باجر نسد عين الشمس من رووس الانذال
والجيش كله انطشره * شي ينهزم شي عالثره
ياشبل الاطهار ** ياشبل الاطهار
****
والاجل نعرف من يمر بس مره وحده
يحسين لو حان الامر محد يرده
هالروح تصعد والجسد للترب رده
صفحة حياته تنطوي وكلشي يهده
ملك المنيه من يمر * بس مره وحده بالعمر
ياشبل الاطهار ** ياشبل الاطهار
****
مولاي احنه وعزتك لو الف مره
نموت ونرد يبن الطُهر يومك ننصره
مو طبره وحده ننطبر لو الف طبره
هيهات منعوفك ابد وامك الزهره
يحسين بشر عيلتك * كَلها بمواقف صحبتك
ياشبل الاطهار ** ياشبل الاطهار
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده بحق {الانصار}{عليهم السلام}
****
انصار الحسين  للطف اجينه
وفايه والبين  يشهد علينه
محشر نسوي الحومه * لو حلت الملزومه
بالغاضريه**بالغاضريه
****
زلم حيدر علي حماي الحميه
زلم كول وفعل احنه الرافضيه
من نهد تخاف من عدنه المنيه
ونكلب الدنيا كلب عالناصبيه
واحدنه هداد  لوطب معاره
ميهاب الاعداد  فخر الغياره
عند العده معلومه * لوحلت الملزومه
بالغاضريه**بالغاضريه
****
جيش اميه من نهد كله نبيده
ونعتني للبي زمط نكطع وريده
نسوي بالطف معركة خيبر جديده
وعمر للخيمه نجيبه مجتفه ايده
شمر ابن الارجاس * عبد الرئاسه
اكبال اخت عباس * نسحكله راسه
يمنه تضيع علومه * لو حلت الملزومه
بالغاضريه**بالغاضريه
****
الموت واحدنه يعده بالف فارس
وزودنه يتدرس بكل المدارس
بالولاء علينه لاواحد ينافس
جبيرينه وزغيرنه بحسين عابس
تخوفن الازلام * تالي عمرنه
لا والبالخيام * تحلم تمرنه
وحك فاطمه المظلومه * لو حلت الملزمه
بالغاضريه**بالغاضريه
****
كلشي النريده نسوي بالعساكر
بالجدم نسحك فخرهم والحوافر
واليكول حسين ماعنده مناصر
وياه موعد النه من نتلاكه باجر
يطلع للانصار * من تطلعلهم
من اجل ابو الاحرار * ينظر فعلهم
زلمه اليظل بهدومه ** لو حلت الملزومه
بالغاضريه**بالغاضريه
****
الريح متهز الجبل لا لا محاله
شامخ يظل دومه متباهي بخصاله
احنه زلم النيبه والعز والبساله
بايعينه حسين ونقدس خياله
لا والسموات * ننهي امرهم
بهاي الفلوات * نضيع خبرهم
ماتشفعلهم لومه * لو حلت الملزومه
بالغاضريه**بالغاضريه
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده عكيلي بحق {الانصار}{عليهم السلام}
****
لحسين انصار اتعنينه
****
يازينب وقعنه بدمنه
بايعناه ومحد همنه
بحبه بهاليوم اتحزمنه
وكدها احنه وزين تعرفينه
****
ارتاحي وخل افكارج تهده
محد يكدر يوصل حده
يازينب هالكون انهده
وفايه وزين تعرفينه
****
نقسم هذا الجيش انبيده
ومن دمهم نصبغ هالبيده
وعليهم صفين انعيده
ونرَجع بالطف سنينه
****
من راسه ماتلمس شعره
يالحره ونقسم بالزهره
بهاي الصحره الجيش انكبره
وبعينج باجر شوفينه
****
مجربين بيوم الملزومه
بركان من انهد للحومه
توصلج واحدنه علومه
ابن الزهره من يهد بينه
****
مانخضع زينب للباطل
احنه ومانسكت عالعايل
انكلبها الحومه من نقاتل
وناخذ منه التمنينه
****
منطخلهم زينب هامه
والجيش نطشر ازلامه
نحرك من نصول احلامه
وقط اعداده ماتثنينه
****
خادم اهل البيت عليهم السلام
الشاعر السيد {هاشم قاسم سعود الداودي}

قصيده موشح ولائي
****
حسين يامولاي ياشبل الطهر
الك ناذر كل حياتي ٱمن الزغر
****
عليك خلصت العمر ابجي وانوح
على حالك يبو اليمه والجروح
ساكن ابالي وابد لاماتروح
اي وحك الجتفوها باليسر
****
بمجلسك احظر واجي يبن النبي
جدمي لو يتعب اله احبي حبي
غايتي وعشكي وسلوتي ومطلبي
واسمك بورقة حياتي ٱجمل سطر
****
مثل وحشة نقط ومضيعه الحروف
بدونك اكضي العمر اعمه ومااشوف
وبضريحك سيدي لو مااطوف
سنه وشيلوني ميت للكبر
****
انت اعز من عندي واغله من هلي
بيك صيتي وقدري اعرف يعتلي
نظره من عندك الي يابو علي
تكفي وتعيشني سلطان العمر
****
بحبلك اتمسك يبن خير العمل
وخادمك ابقه يمولاي واظل
خدمتك مستقبلي وهيه الامل
هيه هيه المنجيه من كل عسر
****
واحك دم النزف منك عالثره
وبضلوعك سيدي المتكسره
خدمتك جنه يضنوة حيدره
والتجاره الرابحه وبلا خُسُر
****
بيها يامولاي روحي هايمه
والي تشهد يابو اليمه فاطمه
ومو دمع ابجي عله مصابك دمه
مايهموني الشماته والكفر
****
تبقه نهر الكوثر اليروي ضماي
ارضاك عني سيدي هذا مناي
شما يسولف عاذلي ويحجي وراي
مااعوفن خدمتك وانسه الامر
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده تجليبه ولائيه
****
الى كلمن يريد حسين منذكره
وننسه احنه عزانه عليه ونهجره
****
خل يسمعنه زين ويكطع الظنه
نحب حسين حب ماينشبع منه
عشكنه مصيبته والنوح والونه
وابو اليمه هوانه نشمه من كبره
****
اعمى من يزيد الكلبه ميشوفه
احلى من الصبح ابن النبي حروفه
للاحرار كعبه تعتني تطوفه
الكرامه بلا ضيائه تنكلب صحره
****
الحياة بلا حسين اي معنى ماالها
ويصير بلا عقل هالناس عاقلها
ودمع زينب علي وجفوف كافلها
حب مابي دغش حباً على الفطره
****
مانلكه اليشبهه ويشبه اوصافه
الخاطرنه انذبح ومفطره شفافه
عشرتنه ويه حزنه نهر وضفافه
وبس ابن الحرام الينكر العشره
****
نايبته ابد مايوم ننساها
بجت عين العرش لهموم بلواها
على جثته البقت متغطيه بدماها
ليل نهار ماتنشف تره العبره
****
انه الناذر اعز ماعندي لحسيني
روحي وكلبي نوحي ودمعتي وعيني
شلي لو جفيته بعمري وسنيني
اظل مثل الليالي الضيعت كمره
****
حياتي شتسوه لو الحسين مابيها
وبعد يادمعه العيوني تسليها
ابيع الدنيا كلها وخدمته اشريها
تسوه الجنه عندي شوفة الحضره
****
الف نار بدليلي عليه تتسجر
اعز من عندي هوه وطيحة الاكبر
مو جسمه عسى جسمي الي يتوذر
وصدري الينسحك بالخيل موصدره
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده بحق الامام {القاسم}{عليه السلام}
****
ياجاسم ارجع للخيم   ياكورت العين
بيك انه اشم عطر الحسن. يابعد الحسين
ارجع ينور عيوني*بيك العده يفجعوني
بيك انه اشم عطر الحسن. يابعد الحسين
****
ماريد اشوفك يولدي. بالحومه مذبوح
بس جسد نايم عالثره  ومفارك الروح
عالترب دمك انظره. يلغالي مسفوح
لاموحلو غصن الورد. يغفه على الجروح
يااغلى من ضي عيني*موتك سبي يسبيني
وجهك يذكرني بوجه  يسوه الف بين
بيك انه اشم عطر الحسن. يابعد الحسين
****
بالخيم ابقى يولدي   لتزيد الاحزان
مابيه اتحمل بعد.  دلالي وجعان
بيه الف نار اموجره. بعيني بركان
يكسرلي موتك خاطري ويشعلني نيران
انتَ الاعز من كلشي*لا مااعوفك تمشي

امك تروح الياكتر  من تنذبح وين
بيك انه اشم عطر الحسن. يابعد الحسين
****
ودعك يمي المجتبى.  يبني يجسام
تجازيك امي فاطمه. ارجع للخيام
امنيته جانت والدك   من تمشي الايام
ثةب العريس يلبسك مو ثوب السهام
خليجي هسه يشوفك*شلون السيوف تحوفك
وكل اهل بيته اعلى الثره   نامو مطاعين 
بيك انه اشم عطر الحسن. يابعد الحسين
****
ماقصرت لا يولدي   ارجع يسلواي
وفيت الي يبن الحسن  شكراً يوفاي
تحملت كلشي بهالمسه مااكدر الهاي
طولك ينام اعلى الترب  دامي يضنواي
ياجاسم ارجع الامك* لاتفجع اكثر عمك
كلبي وكلب امك سوا. ينهظم يازين
بيك انه اشم عطر الحسن. يابعد الحسين
****
ماريد مثل ابني علي.  يذبحونك اعداك
ماظل بعد عندي صبر  واصبر على جفاك
وشلت جلمات النعي  جابيش انعاك
يادمعه اصب من تنذبح. ويهلن دماك
عندي بغلاة الاكبر*ماريد اشوفك تنطر
والبقه مني طيحتك   يوليه الونين
بيك انه اشم عطر الحسن. يابعد الحسين
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده بحق{القاسم ابن الحسن}{عليه السلام}
****
يوليدي يبن الطاهره ياجاسم
كوم اعله عمك ناصره ياجاسم
****
من شفته يجاسم يبني يتلفت
كلبي من الالم حسيته يتفتت
بحلك النايبه شمل الوفه اتشتت
وجيش ابن الرذيله بمحنته اتشمت
واحبابه صرعه اعله الثره ياجاسم
كوم اعله عمك ناصره ياجاسم
****
يمسح دم صحبته وناسه وخوانه
وعينه بدمعة الحرمان غركانه
اخاف يموت عمك يمه بحزانه
بسبع بحور ماتطفه نيرانه
مكسور كلبه وخاطره ياجاسم
كوم اعله عمك ناصره ياجاسم
****
النايبته الكلب ياجاسم اتفطر
خلاني اجر انفاسي مااكدر
من شفته يسولف وي علي الاكبر
كعد يمه ويريد يكوم مايكدر
وبجفه يمسح منحره ياجاسم
كوم اعله عمك ناصره ياجاسم
****
دك صدرك ييمه وكله عد عيناك
وامنيتي اموتن كله تحت لواك
مثل ابنك انه ودمي فده الدماك
وشمحله الشهاده ياامامي وياك
كله انه ليث الزمجره ياجاسم
كوم اعله عمك ناصره ياجاسم
****
لو ردك اليه حسين بالحسره
كله امي تكول الخاطر الزهره
عليك مصاب اخوك ومحنته وكبره
لتردني يعمي كله هالمره
بالخيمه امي مناطره ياجاسم
كوم اعله عمك ناصره ياجاسم
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده بحق الامام {قاسم ابن الحسن}{عليهما السلام}
****
من وكع جاسم عالترب  وللسمه طلعت روحه
الحسين يم راسه كعد  يبجي ويشم بجروحه
يمسح دمومه وينعاه * ماتنسمع منه الاه
****
من وكع بالحومه  غركان بدمومه
جسام ياويلي  متغيره رسومه
جاسم جماله اعله الترب متطشر
الجنه كمر ارباطعش متوذر
مو ذاكه شكله البي طلع متغير
وبحالته حسين شكثر متحير
هالبلوه زادت بلواه * ما تنسمع منه الاه
****
من شافته عيونه  لاشكله لا لونه
متغطي بجروحه  ومغَمُضه جفونه
مِسَكّت الموت ابن الحسن انفاسه
وسيوف اميه مكطعات احساسه
الجان امس عطره ايذَكِره بنوماسه
من جدمه شاف الدم يسيل الراسه
عالترب مدد وياه * ما تنسمع منه الاه
****
من طفو شموعه  الحسين بدموعه
مايدري وين يروح  حاير بموضوعه
حيرة علي الاكبر تِحَير بأمره
يعاينله الحسين ويهل العبره
مصاب العزيز اعله العزيز شكبره
ذاك الجبل صار الخيال يعثره
مصاب ابن اخوه الخلاه * ما تنسمع منه الاه
***
الامه وسهامه زيدت الامه
جسام واحزانه شيشيله لخيامه
وبالخيمه امه تنتظر شيكلها
مصابه يخاف اعله امه لايجتلها
يكعد وينهض والدموع يهلها
وهموم ابو اليمه سمه شيحملها
الماشاف فرحه بدنياه * ما تنسمع منه الاه
****
والعسكر كباله  يشمت بحاله
وحسين ابو اليمه  وناته جتاله
عاذل يكصده ويذب يمه حجايه
واخر يكله حسين مو بس هايه
هذا قليل وانتظر الهوايه
ياابن علي الي جاي راس الرايه
ويسرة اخوك ويمناه * ماتنسمع منه الاه
****
ناده على الكافل  ودمع الالم هامل
جسام للخيمه  شيله يبو فاضل
ياكمر هاشم حيل ماظل بيه
منه المصابك عفت ليه شويه
ماخله كلشي هالمصاب عليه
رمله تتاني اعله الجمر هالجيه
وتحنّي جفه من دماه * ماتنسمع منه الاه
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده دارمي بحق الامام{القاسم ابن الحسن}{عليهما السلام}
****
جاسم يجاسم كوم   يبن الحميه
بالحومه وحده حسين   بين ال اميه
****
كوم اعله عمك كوم   شوف الجراله
من اهله والصحبان محد بقاله
ترضاها يانوماس يبو البساله
تولي عزيز الله  هالبربريه
****
سبعين الف ملعون  جاسم ينطروه
يتعنه للميدان خاطر يذبحوه
يوذرونه ويسلبوه  وراسه يكطعوه
ضامي وغريب حسين  سوده عليه
****
عمك يبعد الروح  بالحومه وحده
غير الدمع جسام  ماباقي عنده
يوليدي محد ضال  يمه ويسنده
ويلي اعله ابو السجاد  هاي المسيه
****
متحير المظلوم  بين العساكر
عمك ابو الاحرار  ماعنده ناصر
وتسحكه متحزمات  يبني الحوافر
منتظره  منه يطيح  فوك الوطيه
****
ماارضه والله عليك  لو ماتنصره
ياريتك تصد ليه  وعينك تنظره
واكف كبال الجيش  وايده اعله خصره
لو شافته الزهراء  شتسوي هيه
****
متكدر ومهظوم  ودموعه عالخد
حيل الي جان عليه ياجاسم انهد
غير انتَ والعباس  ماعنده احد
يوليدي كوم عليه  ونفذ الوصيه
****
ياشمعة الشبان  ياكل حياتي
يبني عليك رباي  كله وغلاتي
يوليدي روح وياه  وعوف امنياتي
وزَفِتَك خلها تصير  يوم المنيه
****
خليني اسمع بيك  يابدري الازهر
للحومه ياجيدوم  كالبها محشر
وجبد الحسن ادريك  يوليدي تكدر
بموتك اظل للموت  انصب عزيه
****
خادم اهل البيت عليهم السلام
الشاعر السيد{هاشم قاسم سعود الداودي}

قصيده بحق {القاسم ابن الحسن}{عليهما السلام}
****
يمته الاحلام يبني تتحقق واشوفنك عَريس
يمته الاحلام  منها تالي الليل مادور ونيس
وخاطر امك ينجبر ** من بعد تعب العمر
****
زغير انتَ وبالمهد   عيني متشوفك ولد
زلمه يوليدي تشوفك مالي عيني
اشبر بطولك جنت   وليلي مانامه صرت
اخذ مني رباك حيلي وكل سنيني
ابد ماحس بتعب  رغم مالوني شحب
جنت من تغفه اغطيك ابديني
الصفنه تاخذني وترد  بخنجر ويمه ورد
والظنون القاسيه تذبح حنيني
هاي الظنون  من تمر بيه احس تترسني خوف
هاي الظنون  تشمر احلامي الحنينه للسيوف
خايفه ابقه من تمر ** من بعد تعب العمر
****
من اصد وجهك اطمأن   وخوفي كله يستجن
ومن جديد ارجع والملم امنياتي
شاب اشوفك جالبدر  النور يم وجهك صفر
وانسه تعبي الراح كله ونايباتي
لابس ثياب العرس  وحسنك مغطي الشمس
والعروس مكبعتها انه بعباتي
بيدي اعجن حنتك  واطش روحي بزفتك
ومن يهنوني بزفافك ياحلاتي
ويدخل العيد  يبني بيت الحسن من بعد الصيام
ويدخل العيد  يطش فوك عيوني ياجاسم سلام
وتكصد الفرحه بعذر **من بعد تعب العمر
****
الام يبعد امك تره  عرس ابنها تناطره
وعلى نار الشوك يوليدي تتاني
يشغل حسابه الفكر  ولاتظنها تستقر
اليوم عرس ظناها تحسب بالثواني
عطر جيته من تشم  الجان ماعندك علم
عدها هذا اليوم اعز كل الاماني
اخ لو صارت صدك  صفحة الهم تحترك
وتندفن الاحزان بحروف التهاني
ا يجسام  يوم يوم انطر واتاني يالحنين
ا  يجسام  وكلشي اخذت مني يوليدي السنين
وامسح دموع الصبر ** من بعد تعب العمر
****
يبني عودك من ثمر  نامت عيون السهر
وكلت يوم المنى ساعاته قريبه
يااعز من كلشي الي   همي كله ينجلي
من ازفك بيدي يبني للحبيبه
حضرت كلشي اله  حتى جلمات الهله
مااخلي بنفسي كلشي الكلشي اجيبه
الياس جبته والشمع  كلي يقبل ياشرع
حلمي والاشواك تتحول مصيبه
الف ياحيف  الحسبيته مستحيل ومايصير
الف ياحيف  زغير حلمي والقدر كلش جبير
كبال عيني ينطبر ** من بعد تعب العمر
****
من سره بينه الضعن  ولوعة فراك الحسن
المتني يبني الجروح القديمه
جرح ابوك المابره   البي لهسه امرمره
وكلبي مابطل نحيب اعله الظليمه
وضلع امك فاطمه   النزل دموعي دمه
وعلي المات بلا ذنب بابشع جريمه
ردت ابالي الصور  وكلبي جسام انعصر
والهوه مثل الجمر اصبح نسيمه
جرح الاحزان صار مو دم ينزف اعله همومي نار
جرح الاحزان  ياحسافه المااريده علينه صار
عسري ماشاف اليسر**من بعد تعب العمر
****
خادم اهل البيت عليهم السلام
الشاعر السيد {هاشم قاسم سعود الداودي}

قصيده ثلاثيه بحق{القاسم ابن الحسن} {عليهما السلام}
****
ضاعت الاحلام * يبني يجسام
ماردت اشوفك منذبح * دامي اعله وجهك منطرح
يبني يجسام
****
انه امك الضحت الك يوليدي السنين
اتعب واكولن هالتعب فدوه للحنين
ردتك ييمه للكُبُر تجايه ومعين
تجازيني ماردتك ابد يايمه بونين
وداعت ابوك المنظلم * ماتكفي بعدك انهظم
يبني يجسام
****
ادري اليعرس يولدي يزفونه شبان
وخوانه واعمامه وهله ولمة الصحبان
ليش انتَ ساعة زفتك يايمه حرمان
وشوباشك سهام العده وفرشتك تربان
بشواكي موتك مايحس * اتعنالك بيوم العرس
يبني يجسام
****
ماحسبيتك يالوفي تخليني وتروح
حسبت تمليني فرح مو انملي جروح
ياجاسم العدها ولد عالغبره مذبوح
بالدمع تتغسل تره وتتجفن بنوح
يااغله من عندي الي * هديتني وجدك علي
يبني يجسام
****
رد ليه يمه الخاطري ومشيني وياك
للموت خل نكصد سوه مكدر بلياك
لا دمعي بغيابك يجف لا اكدر انساك
لا ادري بغيابك شَوِن لا ادري شنعاك
موتك اخذ مني العمر * وتركني باحضان الجمر
يبني يجسام
****
يالعطر انفاسك صبح يالطولك فياي
ياكحل عيني وهيبتي وعزتي وحماي
مارتك تذبني جرح وتضيع دواي
عافيتي انتَ وفركتك سلمتني للداي
للحومه وديتك سمه * رديت سابح بالدمه
يبني يجسام
****
بلا وجهك شيكضي العمر ياسلوة العين
وين انطي وجهي بروحتك يايوسفي وين
لا زفه لاثوب العرس لا احني الايدين
بالدنيه ردت انظل سوه مو تمشي للبين
فراك الابن مثل الاجل * مايترك الواحد امل
يبني يجسام
****
خادم اهل البيت عليهم السلام
الشاعر السيد{هاشم قاسم سعود الداودي}