ولادة أمير المؤمنين (عليه السلام )🌹
🌸🌸🌸🌸🌸🌸🌸🌸🌸🌸

يصرخ بحبك ضمري
يا علي انت اميري

علي علي••• ياعلي ياعلي

🌺🌺🌺🌺🌺🌺🌺🌺🌺🌺

بمولدك تزهر ورودي انت ياحيدر ربيعي
اني گاطعلك عهودي للممات وانه شيعي
ابذل بحبك جهودي ياجهودي ما تضعي
بدنيتي سر بوجودي وبالحشر هو شفيعي

بالحشر باچر نصيري
يا علي انت اميري

علي علي••• ياعلي ياعلي

🌺🌺🌺🌺🌺🌺🌺🌺🌺🌺

انت ياحيدر امامي والنواصب يعرفوني
رايد احجيلك غرامي حبك انشاف بعيوني
عاجز بوصفك كلامي من اسولف يسمعوني
ابعث الگبتك سلامي بين بحبك جنوني

قررت هذا مصيري
ياعلي انت اميري

علي علي••• ياعلي ياعلي

🌺🌺🌺🌺🌺🌺🌺🌺🌺🌺🌺

لگبتك مشتاگه روحي شوگها تشوف المناره
انت لطيب جروحي گاصد وناوي الزياره
اسكن بقربك طموحي يهنياله الصار جاره
ينكبح يمك جموحي تسكن الروح بدياره

ياحمامة روحي طيري
ياعـلي انـت اميري

علي علي••• ياعلي ياعلي

🌺🌺🌺🌺🌺🌺🌺🌺🌺🌺

يا اميري وانت والي واليزورك يطفه همه
اكصد واشكيله حالي والجروح تطيب يمه
بالعشگ ذايب يغالي رايد ترابك اشمه
ياولي وحبك منالي انت ماتوصفك كلمه

يا بحور الشعر حيري
ياعلي انت اميري

علي علي••• ياعلي ياعلي

🌺🌺🌺🌺🌺🌺🌺🌺🌺🌺

مولدك قصه عجيبه حيرتني هواي صعبه
جيتك للدنيه هيبه صدعت بالجيه كعبه
عيسى حياك بصليبه راد يطلب بيك قربه
والنبي يشكر حبيبه بشوفتك ينزال تعبه

انولد گلهم سفيري
ياعلي انت اميري

علي علي •••ياعلي ياعلي

🌺🌺🌺🌺🌺🌺🌺🌺🌺🌺

🖊️كلمات
عباس فاضل الشمري

مسلم المطيري

يصرخ بحبك ضميري
ياعلي انت اميري

كلمات الشاعر/ عباس فاضل الشمري

اداء
ملا رعد الفتلاوي وخادمكم
الشاعر عباس فاضل الشمري

اليُتم الحقيقي ، أن يدقّ قلبكَ على كل أوتار
الحياة ، ولا يكون صداه : علي !

انكسر ظهر الشمس لمصاب اخت عباس
وشنـو وضـع الگـمر بـمـصابهـا شـحـاله

نخسف صدر الارض بيها الجبل مدفون
جـبل صبـرچ ثكـيـل ويـا نعـش شـالـه

السلام على جبل الصبر زينب 💔

🖊️عباس فاضل الشمري

السجن بابه انقفل وبابك المفتوح
دگ بــاب المراد الحاجـه يگظيها

نيتك خلها بيضه وطهر الروح
مگضيــه الحوائج يـمه تدريها

🖊️عباس فاضل الشمري

🔻أستشهاد الامام
موسى ابن جعفر عليه السلام 💔

ـــــــــــــــــ ❁ ❁ ❁ ــــــــــــــــــ

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

حراس خلــو عالسجن وانه بظلم سجنوني
ما ادري ليلي من الصبح بس بظلام عيوني
والگيد بجفوفي يحــز شمسوي ويگيدوني
موسى امام الرافظه الكاظم انــه يسموني

يـاناس كل هـذا الضوه ماشوفه
عيني عله شوية شمس ملهوفه

محرومه عيني من ضوه دنيايه
تارك نفس وسط السجن ذكرايه

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

طير انه مكسور الجنح وين اليضمد جروحي
صرخه بدليلي وتنسمع وهمومي تمرد روحي
ادعي بصلاتي للفرج وابچي وازيــد بنــوحي
الجمعه موعدنه گرب ياروحي ســرچ بوحي

الاحباب توكف عالجسر منتظره
يردون من ذاك الوجه بس نظره

بس جثه من راحولك ولاگينك
امگيــد وتنـــزف دمــه چفينك

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

الليل يخلص بالدمع عالخـــد تسيــل دموعي
وعظامي لو لاحت برد صلت عليه ظلوعي
ظيم وقهر انه احملت محــد يهـــدي بروعي
انــه ارهب وما انرهب شجرة امامه فروعي

انطيته علمي للرضا مـــن بعــدي
وانه ابقه بديار الغرب ظل لحدي

وصيتــه بالشيعــه يظل يرعاهم
ويتحمــل انــواع الظلم ويـــاهم

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

ميت انـــه وگيد الظلم طابع اثر من دمي
ماواحد يفك جثتي بگيودي اظلـن مرمي
ماكفت سنين السجن وليل العذاب وهمي
عافوني جثه مگيد ومحد يمـر مـــن يمي

ظليــت وبحــر الشمس عافـوني
بحســرة ضوه ظليتي آ يعيــوني

ماشفتي كل هذا العمر بس ظلمه
چـــان الضوه بزنزانته كــل حلمه

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

مات الحلم بيه اندفن وانـه اندفنت بگبــري
فروني من سجن لسجن ضلو حياره بصبري
مــن شحت ايـام العمر ودريت خلص عمري
كلتلهم الموعد گرب بموتي الفرج انــه ادري

من ابنعش فوگ الجسر شالوني
هاي الابد ماچانت اعله ضنوني

جثــه امــام الرافضـه يشيعونها
بظهر الحماميـل الظهر يـرمونها

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

ياناس من حان الفرج بعدي السجن ظل خالي
كــل ظنكم الموعــد اجـه متانيـن جيت الغالي
رايح انــه ويبقـــه السجن يــردد صدى اقوالي
عنــدي علــم مــن النبــي واســم يظـل بالعالي

معروف مــن خيــر البشــر ابائي
بصبري وصمودي ارعبت اعدائي

غدروني بالسم وبسجن سجنوني
وحرموني من شم الهوه حرموني

واسجيناه ............ واسجيناه

ـــــــــــــــــ ❁ ❁ ❁ ــــــــــــــــــ

🖊️كلمات
عباس فاضل الشمري

واسجيناه واسجيناه
لحن ١

واسجيناه واسجيناه
لحن ٢