محرم 🔻

حلم اللقاء 💔

للأمام صاحب الزمان روحي له الفداء

ـــــــــــــــــ ❁ ❁ ❁ ــــــــــــــــــ

محبوبي وانه الأهواك وادري انت من ياعتره
لـو جمره يصبـح ملگاك موگد واحب الجمره

محبوبي.محبوبي. محبوبي يبن الزهره

ـــــــــــــــــ ❁ ❁ ❁ ــــــــــــــــــ

طبع اليحب من يشتاگ يگضي العمر يتأمل
الورده مـن دون المـاي تفگـد عطرها وتذبل
ارجـع الـي شگـد تانيـت يـوميـه لله اتوسل
ارفعهـا ايـدي وانـخاهـا ياربـي عجـل عجـل

وعيوني .وعيوني . وعيوني رادت نظره
محبوبي .محبوبي. محبوبي يبن الزهره

ـــــــــــــــــ ❁ ❁ ❁ ــــــــــــــــــ

دگته الگلب صارت بيك ينشدني عنك گلبـي
لـو سولفت بيـك ارتـاح انتـه التخـفف التعبي
كل ظيمي ينزاح وياك مـن اشعر انـته بگربي
لـو دربك يصير النـار مااحيـد ابـد عن دربـي

ودروبي .ودروبي.ودروبي بحبك خطره
محبوبي .محبوبي.محبوبي يبن الزهره

ـــــــــــــــــ ❁ ❁ ❁ ــــــــــــــــــ

مـن تبتعـد بُـعدك غيـم عنـي وانطـرك تمطر
من تيبس بروحي الگاع بس نظره من تزهر
ازرع ورد مـن ذكـراك بمطـرت دعائـك خضر
عطـرك يظـل بيـه يفوح وبـذكرك انـه اتعطر

وبثوبي .وبثوبي. وبثوبي ريحت ذكره
محبوبي .محبوبي.محبوبي يبن الزهره

ـــــــــــــــــ ❁ ❁ ❁ ــــــــــــــــــ

كـل حلمي صايـر ملگاك انـت التطـيب جروحي
والحسره بيـه مـن الشوگ حسره يتيم بروحي
وبچيلـك بگـد المـاي وتعـرف علـيمـن نوحـي
ابچي المصـاب المظلوم مذبوحـك ومذبوحي

ودموعي .ودموعي.ودموعي مثل الجمره
محبوبي .محبوبي .محبوبي يبن الزهره

ـــــــــــــــــ ❁ ❁ ❁ ــــــــــــــــــ

مـاشـفتـك وانـطـر بيـك مثـل الحـلـم بخيالي
كل جمعه ياكلني الشوگ بس ماشكيت بحالـي
بيــه الامـل لا ميمـوت بجيـت حبـيبـي الغالـي
اعـله البشر صعبه يموت بس موتي الك يحلالي

وبموتي .وبموتي. وبموتي لجلك عبره
محبوبي.محبوبي.محبوبي يبن الزهره

ـــــــــــــــــ ❁ ❁ ❁ ــــــــــــــــــ

كلمات ✍️

عباس فاضل الشمري

محرم 🔻

لبوة علي 💔

تقرأ ثگيل. نزله. شور

الحوراء زينب عليها السلام
تخاطب الكفيل عليه السلام

ـــــــــــــــــ ❁ ❁ ❁ ــــــــــــــــــ



وا كفيلاه .. وا كفيلاه .. وا كفيلاه

ـــــــــــــــــ ❁ ❁ ❁ ــــــــــــــــــ

عباس من سوط الشمر ياخويه زرگه متوني
خاف اصرخ وهاي العده من اصرخ يسمعوني
ارد اگصـد الصـوب النهر يـاخويه مـا خلونـي
من سمعو بأسمك صحت يا بو الفضل ضربوني

لمن صحت الحگلي يـا عباس
اعله المتن ضربوني هالارجاس

وا كفيلاه .. وا كفيلاه .. وا كفيلاه

ـــــــــــــــــ ❁ ❁ ❁ ــــــــــــــــــ

انـه العزيزه ام الخدر ترضاها يا خويه انشتم
النسوه بيمن تنطلب نـدري الحرب بين الزلم
انـه بنـت حيدر علي يـاخـويه بعـدك انظلم
لا والي عندي ولاخيم بـس العليل ويه الحرم

فوك الهزل خويه شكثر تعبانه
طول الدرب راسك يظل ويانه

وا كفيلاه .. وا كفيلاه .. وا كفيلاه

ـــــــــــــــــ ❁ ❁ ❁ ــــــــــــــــــ

ياخويه وانته اعله النهر من شوفتك منعونه
صاحـو سبيات اسمعت بعـدك تـره يسمونه
شدونه ياخويه بحبل ترضه العـده يجتفونه
عينك يشع منها الضوه شفنه الغضب بعيونه

بالنظره چن تگلي ها يازينب
يمچ كفيلچ منهـو الـچ يتگرب

وا كفيلاه .. وا كفيلاه .. وا كفيلاه

ـــــــــــــــــ ❁ ❁ ❁ ــــــــــــــــــ

ياخويه تعرج ناگتي جابولي وين الهزله
تبلل ظهرها من الدمع عيني العليك تهله
گدامي خويه تشاورو. واحـد للاخر گـله
تعرفها هاي اخت الگمر. هيبتها هيبة دله

يدروني انـه بـكل وكـت مهيـوبه
يا خويه من بعدك صرت متعبوبه

وا كفيلاه .. وا كفيلاه .. وا كفيلاه

ـــــــــــــــــ ❁ ❁ ❁ ــــــــــــــــــ

لمن دخلنه اعله القصر شفت الحرم مرتعبه
اوگف يخويه بنص زلـم تدريه كلش صعبه
ادري اليسيـر بهـالـدرب لازم يـكـمل يـدربه
والثوره خاطر تكتمل معناها القـي الخطبه

من سولفت گامو علي يشوفوني
زينب أَنـه واخت الگـمر يدروني

وا كفيلاه .. وا كفيلاه .. وا كفيلاه

ـــــــــــــــــ ❁ ❁ ❁ ــــــــــــــــــ

ياخويه ما شوفك بـعد تدري شكثر مشتاگه
تـدرينـي مـا احمل بُعـد نـار الگلـب حـراگه
مثل الغصن من ينجبر ويترك غصب اوراگه
مجبوره مـن عفتك انه گلي شوكت نتلاگه

بس ارد اشوفك مره آ يهلالي
يموت الگلب لمن يفارگ غالي

وا كفيلاه .. وا كفيلاه .. وا كفيلاه


ـــــــــــــــــ ❁ ❁ ❁ ــــــــــــــــــ



كلمات ✍️

عباس فاضل الشمري

محرم 🔻

درب اليسر 💔

الحوراء عليها السلام

ـــــــــــــــــ ❁ ❁ ❁ ــــــــــــــــــ

بغربتي شفت المنيه .. صاحو بصوت السبيه

عالوجن انزل يدمعي .. زينب انـه الهاشميه

ـــــــــــــــــ ❁ ❁ ❁ ــــــــــــــــــ

انه بموقف صعب .. وگفت بنص حرب
وبقيت بوجهي ادير وبيه حيره

صعب درب اليسر .. ويباريني الشمـر
ويصيح اعليه ياوسفه الاسيره

اصد صوب النهر واسچب دمعتي
لبـو فاضـل ردت اشـرح غـربـتي
وحيده بلا ولـي صـارت رجعـتي

وحسرتي . وحسرتي

ابقصتي من وين ابدي
بـلا اخو رديت وحدي

وانه چانت امنياتي
نندفن احنـه سويه

ـــــــــــــــــ ❁ ❁ ❁ ــــــــــــــــــ

شفت حـرگ الخيم .. وعشـت قصـة الــم
انكسر گلبي ونزل دمعي بعيوني

عله وجهي طحت .. انسمع صوتي وصحت
يخويه افزع الـي مـن يسروني

يوسفه ويه الغرب ياخويه امشي
وگـع مـن الدمـع بعيـونـي رمشي
وانـه بعـد الاهـل مـاظلي كـلشي

ينعشي . ينعشي

يمته توصلي وتجيني
انـه مـا اريـداً سنيني

ومـاردتها كـل حياتي
ريـتك تعـجـل عـليـه

ـــــــــــــــــ ❁ ❁ ❁ ــــــــــــــــــ

گلتهـا بيـا زمـن .. زراگ اعلـه المـتن
شكثر كلبي انجرح صرنه سبايه

وعلي زاد الحمل .. چَتف ايدي بحبل
وسترنـه مـن النظر بـس العبايه

وحيده بغربـتي عافونـي اخوتي
يروحي مـن بعـد احبابي مـوتي
صحتلك ماتجي وسمعته صوتي

يـموتي . يـموتي

مـرلي محتاجتـلك انـي
واحسب الجيتك ثواني

گمـت اتـرجـه بممـاتـي
ريـتـه حـان بـهالمسـيه

ـــــــــــــــــ ❁ ❁ ❁ ــــــــــــــــــ

يـمر مشـهد ذبـح .. وگـمر فوگ الرمـح
وچفوف امگطعات اعله الشريعه

خلص مني الصبر .. وتهت عگب الگمر
ضعت خويه بغيابك والله ضيعه

افـز بليلي واصـرخ خويه بسمك
ويريت يظل سنه بعيوني حلمك
ردت مـن الحـلم يـاخذني يـمك

اشـمـك . اشـمـك

بـريّـتـي خليـها شمه
من عطر نحرك اضمه

والحلم ماريده يگضي
وايـدك تـفـارگ اديــه

ـــــــــــــــــ ❁ ❁ ❁ ــــــــــــــــــ

دمع عيني اليهل .. خنگ روحي الحبل
يحز چفي وردت واحد يفگني

تره بگلبي حچي .. وحفر خدي البچي
بچيت انه شكثر لمـن شبگني

وهضيمه بيـاوكت انـه العقيله
يچتفوني بحبل واركب هزيله
وانـه درب اليسر مابـيه حيـله

طويلـه . طويلـه

رحلتي ومتروسه الام
مچتفه ودونـي للشام

واعرف تگـلي ارجعي
دمعتي ظـلت جـريـه

ـــــــــــــــــ ❁ ❁ ❁ ــــــــــــــــــ

متت يوم اهدعش .. وشلت روحي بنعش
صدگ امشي ولكن روحي ميته

اخذ روحي النهـر .. الـي جـربـه وگـمـر
وعدني ومـارجع منتظره جيته

يرد جايب نهر ويـرش خيامه
مثل ماي المطر يروي اليتامه
وگلت الهم يـرد هسه بسلامه

وسهامه . وسهامه

منعته يـردلي ويجيني
وراح اظل انه بحنيني

لشوفته يومـيه ادعـي
وادري لا ميــرد اليــه

ـــــــــــــــــ ❁ ❁ ❁ ــــــــــــــــــ

كلمات ✍️

عباس فاضل الشمري

محرم 🔻

خنگة يتيمه 💔

حميده بنت مسلم ع
تخاطب والدها ..

ـــــــــــــــــ ❁ ❁ ❁ ــــــــــــــــــ



مخنوگه ريتي والله مخنوگه
بـويـه وگليبي ذايب بـشـوگه

يغالي. يغالي. مشتاگه تشوفك عيني
الليالي. الليالي. مارحـمة زغـر سنيني

يـغالـي ... يـغالـي

ـــــــــــــــــ ❁ ❁ ❁ ــــــــــــــــــ

شـايـف خنـگته المذبـوح اول متطـلع روحـه
هيج انـه مختنگه عليه مـن فرگتك مجروحه
مثـل الحمـامـه التنـعاف مفرفـحـه ومذبوحه
ماميته بـس عدها جناح مـايگدر اعله الروحه

هيچ انه حالي عليه مامرتاحه
شنهو حاله الطير دون جناحه
بكل سهوله يلوحه چف ذباحه

خنگتك. خنگتك. مـاخـلت نسمه بريـتي
بدليلي. حسرتك. شم عطرك بس امنيتي

يـغالـي ... يـغالـي

ـــــــــــــــــ ❁ ❁ ❁ ــــــــــــــــــ

لمن يسألوني عليك يغورگ دمعها عيوني
يابويه مااعرف وين ما اجاوب النشدوني
صدولي بويه بنظرات شو جنهم يواسوني
ماميت وانـه ادريك بـس بالنظر يتمـوني


چن يتيمه بنظـره صـدو ليها
مو دموع عيوني خل ابچيها
فرگتك بـس الدمـع يحچيها

فرگتك. فرگتك . خلتني بظيم وهمها
خيالي. وشوفتك .نظرات ابالي يضمها

يـغالـي ... يـغالـي

ـــــــــــــــــ ❁ ❁ ❁ ــــــــــــــــــ

انه اليتيمه المرتين يتمني دهري بناره
مره بطلعتي بلياه ومره بوصول اخباره
يوميه يخنگني الليل وبفرگته محتاره
مثل الجمر بعدك صار يحرگني كام بناره


وانت عايش چنهم يخبروني
ماتشوفك چنها هاي عيوني
نظرتك من عدها ليحرموني

نظرتك. نظرتك . بعيوني تباوع مره
بقالي. بروحتك . دمعات واه وحسره


يـغالـي ... يـغالـي

ـــــــــــــــــ ❁ ❁ ❁ ــــــــــــــــــ

يالبعـدك ابعـد الـماي اتـروه بـس انظـرلك
والكوفه مـا انـدل ويـن يابـويه مـا انـدلك
من سلمت ويدفعوك تدري الحسين شگلك
بالجنه مسلم مثواك چان الحچي يوصلك

گالولـي ميـت وانـه انطـر حلمـه
شلون اصدگ خل اشوفن جسمه
شنهو دفعه لهسه عطـره اشتمه

دفعتك. دفعتك. من عدها تموت احلامي
غربتي. وغربتك. وايامـك چنـها ايـامـي

يـغالـي ... يـغالـي

ـــــــــــــــــ ❁ ❁ ❁ ــــــــــــــــــ

والله كرهت حتى الباب چي من نسده اندفعه
يذكـرني گالـو دفعوك مـن عينـي تنزل دمعه
ومن دمعتي منـي اطيـح اذكر هذيج الوگعه
صح انـت توگع للگاع بس عالي مثل السبعه

بـعلو السمه وماگـدرو يلوحونك
حسرة غدر مرسومه بين عيونك
ياهـو الانشـده مـايگول شلـونك

وگفتك. وگفتك. مچتوف بنصهم حاير
يبويه. وطفلك. هـم توگف مثلك باجر

يـغالـي ... يـغالـي

ـــــــــــــــــ ❁ ❁ ❁ ــــــــــــــــــ

متيَسره وامشي وانعاك ماهم جمر وحروره
بالكوفه گالـو موجود گبـرك واجينه انزوره
مخنوگه والله من الشوگ للملگه ارسم صوره
طول الدرب فكـري وياك وانـه بحبل مجروره

ومن ادوس الجمره ماتچويني
همـي يمـك منهـو الـيوديـني
مـانسيتك وادري مـاناسيني

ذكرتك. ذكرتك. كل خطوه وياهم امشي
بخيالي. ورسمتك. خليتك صوره برمشي


يـغالـي ... يـغالـي

ـــــــــــــــــ ❁ ❁ ❁ ــــــــــــــــــ

كلمات

عباس فاضل الشمري

محرم 🔻

غربة السفير 💔

مسلم بن عقيل عليه السلام

ـــــــــــــــــ ❁ ❁ ❁ ــــــــــــــــــ

مسلم جرحه ماطاب .. لمـن فـارگ احباب
هــاي الــدار الــنــه •• بـس ما بيها اهلنـه
مـن شردت جموعـه .. غريب انه يطوعــه

ـــــــــــــــــ ❁ ❁ ❁ ــــــــــــــــــ

الكوفه من طبلها ناده. عمي حيدر
جيـت لدياره واعرفه. بشده يحظر
التفت ظليت وحدي . والجـمع فــر
بالذهب باعوني وسفه. اختاروالشر

مسلم هــل دموعه
غريب انـه يطوعه

لمـن فـارگ احباب

ـــــــــــــــــ ❁ ❁ ❁ ــــــــــــــــــ

بالغـرب انه صفيت. وحدي ظليت
لاهل عندي واروح. وادخل البيت
ريت للكوفه يطوعه. انـه مـاجيت
نفـذت هـاي المهمــه.والــها اديت

مــا أعلن خضوعه
غريب انـه يطوعه
لمـن فـارگ احباب

ـــــــــــــــــ ❁ ❁ ❁ ــــــــــــــــــ

الخبر كل همي يوصل. يم امامي
رايــد الطـارش يودي. ويا سلامي
ويحمــل بگلبـه رساله.عـن هيامي
للحسين يروح يحمل. نص كلامي

خــل يعلن رجوعه
غريب انـه يطوعه
لمـن فـارگ احباب

ـــــــــــــــــ ❁ ❁ ❁ ــــــــــــــــــ

بالاســر انـــه ابديهم . هذا مو خوف
والله ادريها الخيانـه .تشتت صفوف
الغـدر واضـح عليهم. وعيني تشوف
ادري طبع الكوفه هذا. والله معروف

رفض الهـم ركوعه
غريب انــه يطوعه
لمـن فـارگ احباب

ـــــــــــــــــ ❁ ❁ ❁ ــــــــــــــــــ

انه اريدن بس يطوعه. يعدي ليلــي
للصـباح وباجـر اعـلن . عـن رحـيلي
نار بالروح اني احسها . وبــدلــيـلـي
واصرخت ياعمي وينك.مـاتـجــيـلي

طفت دربي شموعه
غريـب انــه يطوعه
لمـن فـارگ احبـاب

ـــــــــــــــــ ❁ ❁ ❁ ــــــــــــــــــ

كلمات

عباس فاضل الشمري