محرم ١٤٤٢هـ

قصيده نزله اليوم السابع
للأمام العباس عليه السلام

ــــــــــ ❁ ❁ ❁ ـــــــــــ


لمن طبهم العباس ... تشهد كربله بيومه


يـوم السابـع المـشهود
من شال العلم والجود
ذب اعـله النهر لـزنـود
خلاهـا الجثـث نـومـه

لمـن طبـهـم العبــاس ..

ـــــــــــــ ❁ ❁ ❁ ــــــــــــــ

گـالو حيدر الكـرار
ويـاه الـزلـم تحـتار
خـلـه بكـربلـه اثــار
كلها تسولف بيومـه

لمن طبـهم العبـاس ..

ـــــــــــــ ❁ ❁ ❁ ــــــــــــــ

هــذا الكـافـل المعـروف
مايعـرف تعـب لا خـوف
من زغره ولعب بسيوف
ســوه الملعـب الحـومه

لمـن طبـهـم العبــاس ..

ـــــــــــــ ❁ ❁ ❁ ــــــــــــــ

راعي الخوه والغيره
حيرهم صـدك حـيره
حـارو ويـه تـفسيـره
محـد يعـرف اعلومه

لمـن طبـهم العبـاس ..

ـــــــــــــ ❁ ❁ ❁ ــــــــــــــ

تاه اعليهم المشراد
متهـم الگنمر اعداد
صفين وبـدر وتنعاد
فزعهـا الشـمر گومه

لمـن طبـهم العبـاس ..

ـــــــــــــ ❁ ❁ ❁ ــــــــــــــ

لمـن طاحـت الفرسان
يخسف بيهم الميدان
صـار بـكربله العنـوان
سيف وجربه مرسومه

لمـن طبـهـم العبــاس ..

ـــــــــــــ ❁ ❁ ❁ ــــــــــــــ

گطعها الركب والروس
عيشهم رعـب كابـوس
علمـهـم وفــه ودروس
بسمه الخوه موسومه

لمـن طبـهـم العبــاس ..

ـــــــــــــ ❁ ❁ ❁ ــــــــــــــ

ماعرفو شنو الجاهم
ريـح وزلـزل اسماهم
مثله الريشه سواهم
طيـرهم عـله اغيوم

لمـن طبـهم العبـاس ..

ـــــــــــــ ❁ ❁ ❁ ــــــــــــــ

عباس فاضل الشمري

ﷺًالسلام عليــك ياسيدي ومولايﷺً
ﷺًيااباالـﻔــضــــل الـــــعــبـــــاسﷺً

#قصيده_لشهر_محرم

#استشـهاد_القاسم_ع

ـــــــــــــــــ ❁ ❁ ❁ ــــــــــــــــــ

الرحل لا ما يــــــرد
وعيني لامتشاهــده
واني كلبي ينمــــرد
يمــه گلب الوالـــده

ـــــــــــــــــ ❁ ❁ ❁ ــــــــــــــــــ

ابني من يرحل اصدن وجهي ليه
مــن بعيد وشاهدت دارو عليــــه
ارد اروح واكصد الحـومه اعتنيه
واشعــل اشموعـه واحنيها اديـه

رايح بعمـر الــــورد
حزني يايمه ابتــده
واني گلبي ينمـــرد
يمـه گلب الوالـــده

ـــــــــــــــــ ❁ ❁ ❁ ــــــــــــــــــ

يمه ياجاسم تروح وفدوه اكـــول
العمـر نفدي لجــل ابــن البتـــول
تخلص دموعي بغيابك من يطول
تنطفي عيوني ونظرها هـم يزول

عيني يعميها البعد
بعدك انه الفاكــده
وانه گلبي يـــنمرد
يمه گلب الـــوالده

ـــــــــــــــــ ❁ ❁ ❁ ــــــــــــــــــ

كبال عين الوالده يموت الولـــد
ومن يروح الغـالي تدري مايــرد
وشاهدت كدامها يموت الــــورد
بــلاذخر تبــقه وحيده ولا سنـد

وتدري ماترجع بعد
ترحل بعمر النــــده
وانه گلبي ينمــــرد
يمه گلب الــــوالده


ـــــــــــــــــ ❁ ❁ ❁ ــــــــــــــــــ

مـن تشوفك رايح بعمــر الشباب
تحظنك حيل وتشم ريح الثياب
يجوي دلالي يظل هــذا العذاب
تشتعل نــاري ييمــه بهالمصــاب

والسأل عنـه ونشد
گتله جثه هامــــده
وانه گلبي ينمــــرد
يمه گلب الوالــــده

ـــــــــــــــــ ❁ ❁ ❁ ــــــــــــــــــ

دموعي تنزل بعدك ويعله البچـي
اعتاب عندي وبين بعيني الحجي
اعليك ردت بكبري يايمه ارتجــي
منيدي ترحل تالي يمه وماتجــي

ادري يمه ماتــــرد
تذبحك اهل الرده
وانه گلبي ينمـــرد
يمـه گلب الوالــده

ـــــــــــــــــ ❁ ❁ ❁ ــــــــــــــــــ

زفتك يمه السيوف اعلـه التراب
وحنتك بالحومه مـن دم الركاب
اعله المنيه الزفه تتحول مصاب
تنطفي شموعك ييمــه بالشباب

غرفتك تصبح لحد
من التراب توسـده
وانه گلبي ينمــــرد
يمه گلب الوالــــده

ـــــــــــــــــ ❁ ❁ ❁ ــــــــــــــــــ

كلمات

عـباس فـاضـل الـشمـري

#قصيده_لشهر_محرم

#استشـهاد_القاسم_ع

ـــــــــــــــــ ❁ ❁ ❁ ــــــــــــــــــ

ورده وتفارك ماي...انه بغيابك
يايمه من اشتاگ...اشتم ثيابك

لمن مشيت .. انحب بقيت .. انه بغيابك

ـــــــــــــــــ ❁ ❁ ❁ ــــــــــــــــــ

ييمه من رحت هالروح ذبلانه بعطش فرگاك
يوجه الماي لو رديت ترد روحي بخبر ملگاك
كون اندل مكانك وين لا ترجعلي انه اتعناك
يسباح الگلب مااريد حياتي وخل اموت وياك

يايمه يحله الموت..ويه النحبهم
كل العمر وياي .. عايش ذكرهم

لتظن نسيت..انحب بقيت..انه بغيابك

ـــــــــــــــــ ❁ ❁ ❁ ــــــــــــــــــ

يشمس امك نهاري يموت وكل دنياي تصبح ليل
اعيش ايام سوده هواي ودموعي تظــل تسيل
ثگل حملي انه بفرگاك وبعد ماظل ابـد كـل حيل
رحت روحت رياح تهب وشيرجعك يريح الهيل

من ايدي من تروح..شيردك الها
بالرجعه هاي الروح..تفقد املها

لا مااجيت..وانحب بقيت..انه بغيابك

ـــــــــــــــــ ❁ ❁ ❁ ــــــــــــــــــ

يجسـام الــگلب مـالـوم بـعـدك بيـمـن اتصبر
اظـل ارســم عـرس يمـه واظـل عليـك اتحسر
رحت مني شباب زغير وتظل نار الگلب تسعر
مـن بعـدك اظـل وحــدي وانــه بفرگـاك اتحير

والحسره من تغيب.. تترس دليلي
بعدك رموشي تشيب..شيبني ليلي

وشگد بچيت.وانحب بقيت.انه بغيابك

ـــــــــــــــــ ❁ ❁ ❁ ــــــــــــــــــ

يمن عطرك ترس ريتي صورك عاشن ابالي
افز كل ليله واتلمس مكانك يمه ظل خالي
مـايحتـاج اسولفـك بـعـدك تعـرف بـحالي
شنو حـاله اللذي بدنياه يفارگله بشر غالي

بعد العزيز شلون..تكضي الحياة
ما يحله ابد وياه .. بس الممات

موت اشتهيت.وانحب بقيت.انه بغيابك

ـــــــــــــــــ ❁ ❁ ❁ ــــــــــــــــــ

انه الميته بكياني الروح مخنوگه بنفس ريتي
رحتي منــي وخذت وياك مـن امشيت عافيتي
شلون اگدر اطب للبيت تره يمــه انهدم بيتــي
اريدك انتــه تدفني واريــد اوصيلك اوصيتي

ردتك تهيل تراب .. بيدك عليه
تاليها انت تروح..من بين اديه

تدفني ريت.وانحب بقيت.انه بغيابك

ـــــــــــــــــ ❁ ❁ ❁ ــــــــــــــــــ

كلمات

عباس فاضل الشمري

ورده وتفارك ماي انه بغيابك




عباس فاضل الشمري

محرم ١٤٤٢هـ

قصيده للدمعه
زينب ع تخاطب الشمس
ـــــــــــــــــ ❁ ❁ ❁ ــــــــــــــــــ



ياشمس شمسويه بيه
انــه وسكينـه ورقيـه

انـچـويـنه ..

ـــــــــــــــــ ❁ ❁ ❁ ــــــــــــــــــ

ياشمـس بــس العبـايـه السـاتـرتني
ومن ادوس الگاع جمره چن چوتني
اتگلي غطينـي يعمـه سكنـه اجتني
والسـوالـف عـــن رقـيه العـذبـتـني

امشي مچتوفه وسبيه
انـه وسـكيـنه. ورقـيـه

انـچـويـنه

ـــــــــــــــــ ❁ ❁ ❁ ــــــــــــــــــ

ياشمس دم اعلـه متني عفته يابس
ومن تدوس الگاع رجلي بيها ماحس
شويه خفي حسين مسلوب الملابس
ميـت ويمشـي برمـح لعيـاله حـارس

وعينه بس تنظر اليه
انـه وسكينـه ورقيـه

انـچـويـنه

ـــــــــــــــــ ❁ ❁ ❁ ــــــــــــــــــ

يلفـح بوجهي الهـوه تحـركني هبته
وبالعبايـه عـن وجـه سكنـه حجبتـه
وبنتـك ارقيـه التظمهـا بگلبك انتـه
اتگلي ياعمه انچويت وتبچي سكته

والشمس حرگت اديه
انـه وسكيـنه ورقيـه

انـچـويـنه

ـــــــــــــــــ ❁ ❁ ❁ ــــــــــــــــــ

وچن شفت غيمه اجتني من سمايه
وركـزت لمـن شـفـتهـا ولنـهـا رايـه
گالـت العباس دزنـي وجـت ورايـه
روحي گلتلهـا الگمر وصليله هايـه

وسولفيله الصار بيه
انـه وسكينه ورقيه

انـچـويـنه

ـــــــــــــــــ ❁ ❁ ❁ ــــــــــــــــــ

شحال راسك عالرمح رحله وبعيده
بالنحر من الشمس تجوي الحديده
ودمه ليصب انگطـع نـاشف وريده
مـن يهزك خويه چـن هـزت رعيده

تمطر بغيضك عليه
انه وسكينه ورقيه

انـچـويـنه

ـــــــــــــــــ ❁ ❁ ❁ ــــــــــــــــــ

هـذا حالـي يـاشمس بعـد الهـواشم
تمشي بالهيمه صـفت كــل الفواطم
والأجـن ويـاه يمـشـن هـسـه نـايـم
ولاكتر مـن جسمه والله باقي سالم

جثه متگطعه ورميه
انـه وسكينه ورقيـه

انـچـويـنه

ـــــــــــــــــ ❁ ❁ ❁ ــــــــــــــــــ

ياشمس لـو منـچ انـه اطفـه والله
ماخجلتي مـن ابونه مـن امنه بـله
جـاوبينـي بكـل صـراحه يـله يـله
لا هو تقصير ونسيتي ولاهي غفله

حسين مرمي عالوطيه
انـه وسكيـنـه ورقيـه

انـچـويـنه

ـــــــــــــــــ ❁ ❁ ❁ ــــــــــــــــــ

يا شمس نفرض فرض مره اشتكالچ
تخيـلي حـرچ يحـرگ بوجنـة عيالچ
ويشتكي مـن الحراره ويبچي جالچ
بس اريده حچايه تشرح شنهو حالچ

والله چا گلتي خطيه
انـه وسكيـنه ورقيـه

انـچـويـنه

ـــــــــــــــــ ❁ ❁ ❁ ــــــــــــــــــ

عباس فاضل الشمري

محرم ١٤٤٢هـ

قصائد السبي للحوراء عليها السلام

ـــــــــــــــــ ❁ ❁ ❁ ــــــــــــــــــ

بغربتي شفت المنيه .. صاحو بصوت السبيه

عالوجن انزل يدمعي .. زينب انـه الهاشميه

ـــــــــــــــــ ❁ ❁ ❁ ــــــــــــــــــ

انه بموقف صعب .. وگفت بنص حرب
وبقيت بوجهي ادير وبيه حيره

صعب درب اليسر .. ويباريني الشمـر
ويصيح اعليه ياوسفه الاسيره

اصد صوب النهر واسچب دمعتي
لبـو فاضـل ردت اشـرح غـربـتي
وحيده بلا ولـي صـارت رجعـتي
وحسرتي . وحسرتي

ابقصتي من وين ابدي
بـلا اخو رديت وحدي

وانه چانت امنياتي
نندفن احنـه سويه

ـــــــــــــــــ ❁ ❁ ❁ ــــــــــــــــــ

شفت حـرگ الخيم .. وعشـت قصـة الــم
انكسر گلبي ونزل دمعي بعيوني

عله وجهي طحت .. انسمع صوتي وصحت
يخويه افزع الـي مـن يسروني

يوسفه ويه الغرب ياخويه امشي
وگـع مـن الدمـع بعيـونـي رمشي
وانـه بعـد الاهـل مـاظلي كـلشي
ينعشي . ينعشي

يمته توصلي وتجيني
انـه مـا اريـداً سنيني

ومـاردتها كـل حياتي
ريـتك تعـجـل عـليـه

ـــــــــــــــــ ❁ ❁ ❁ ــــــــــــــــــ

گلتهـا بيـا زمـن .. زراگ اعلـه المـتن
شكثر كلبي انجرح صرنه سبايه

وعلي زاد الحمل .. چَتف ايدي بحبل
وسترنـه مـن النظر بـس العبايه

وحيده بغربـتي عافونـي اخوتي
يروحي مـن بعـد احبابي مـوتي
صحتلك ماتجي وسمعته صوتي

يـموتي . يـموتي

مـرلي محتاجتـلك انـي
واحسب الجيتك ثواني

گمـت اتـرجـه بممـاتـي
ريـتـه حـان بـهالمسـيه

ـــــــــــــــــ ❁ ❁ ❁ ــــــــــــــــــ

يـمر مشـهد ذبـح .. وگـمر فوگ الرمـح
وچفوف امگطعات اعله الشريعه

خلص مني الصبر .. وتهت عگب الگمر
ضعت خويه بغيابك والله ضيعه

افـز بليلي واصـرخ خويه بسمك
ويريت يظل سنه بعيوني حلمك
ردت مـن الحـلم يـاخذني يـمك

اشـمـك . اشـمـك

بـريّـتـي خليـها شمه
من عطر نحرك اضمه

والحلم ماريده يگضي
وايـدك تـفـارگ اديــه

ـــــــــــــــــ ❁ ❁ ❁ ــــــــــــــــــ

دمع عيني اليهل .. خنگ روحي الحبل
يحز چفي وردت واحد يفگني

تره بگلبي حچي .. وحفر خدي البچي
بچيت انه شكثر لمـن شبگني

وهضيمه بيـاوكت انـه العقيله
يچتفوني بحبل واركب هزيله
وانـه درب اليسر مابـيه حيـله

طويلـه . طويلـه

رحلتي ومتروسه الام
مچتفه ودونـي للشام

واعرف تگـلي ارجعي
دمعتي ظـلت جـريـه

ـــــــــــــــــ ❁ ❁ ❁ ــــــــــــــــــ

متت يوم اهدعش .. وشلت روحي بنعش
صدگ امشي ولكن روحي ميته

اخذ روحي النهـر .. الـي جـربـه وگـمـر
وعدني ومـارجع منتظره جيته

يرد جايب نهر ويـرش خيامه
مثل ماي المطر يروي اليتامه
وگلت الهم يـرد هسه بسلامه

وسهامه . وسهامه

منعته يـردلي ويجيني
وراح اظل انه بحنيني

لشوفته يومـيه ادعـي
وادري لا ميــرد اليــه

ـــــــــــــــــ ❁ ❁ ❁ ــــــــــــــــــ

عباس فاضل الشمري

محرم ١٤٤٢ هـ

استشهاد الامام زين العابدين ع
ـــــــــــــــــ ❁ ❁ ❁ ــــــــــــــــــ



مظلوم مظلوم .. زيـن العابدين
مظلوم مظلوم .. ياابن الحسين

ـــــــــــــــــ ❁ ❁ ❁ ــــــــــــــــــ

ابتدت مـن كربله . ويـه ضعن العايله .
قصة عذبك

ضلوع ابوك مرضرضه . بالمرض عمرك گضه.
يخلص شبابك

ويـه اخوتك تفترگ . مـن لخيم ريحه حرگ .

تبقه بثيابك

عالولي من تنتحب .ترحل ويبقه الگلب .
يبچي لمصابك

هااليوم هااليوم .. ترحل ياحنين
مظـلوم مظـلوم .. زيـن العابدين

ـــــــــــــــــ ❁ ❁ ❁ ــــــــــــــــــ

والله صعبه مصيبتك . شلون تذكر عمتك .
لا والي عدها

وانت وياها عليل . واليسر دربه طويل .
تصبح سندها

تنتحب كل العمر . آه يـا جـرح الـيسر .
روحك مردها

المنيه اليوم اجت . روحك الها استقبلت .
لا ما تـردها

مهظوم مهظوم .. من جور السنين
مظـلوم مظلوم .. زيــن العـابديـن

ـــــــــــــــــ ❁ ❁ ❁ ــــــــــــــــــ

ترحل اليله بحزن .بعدك دموعك بقن .
بمسجد صلاتك

سجدتك صارت مَثل .بيها دمعاتك تهل .
اجمل صفاتك

تشبه باسمك علي . هيبتك من الوالي .
عايش حياتك

دنيتك خلصت الم . ينحب اليوم العلم .
ساعه وفاتك

مـالوم مـالـوم .. محرابك حزين
مظلوم مظلوم .. زيـن الـعابدين

ـــــــــــــــــ ❁ ❁ ❁ ــــــــــــــــــ

شيعتك ظلت تون . شافت بفگدك محن .
تصعب عليها

فرگتك صعبه شكثر .ترحل الليله بقهر .
من بين اديها

يترك امصابك جرح . يشبه احزان الرمح .
تذكر وليها

تعيش من بعدك هظم . منظر أيتام وخيم .
يرجع عليها

ملجوم ملجوم .. گلب العاشكين
مظلوم مظلوم .. زيـن العـابدين

ـــــــــــــــــ ❁ ❁ ❁ ـــــــــــــــــ

كلمات

عباس فاضل الشمري