محرم🔻

دموع الخيام 💔

الأمام العباس عليه السلام

ـــــــــــــــــ ❁ ❁ ❁ ــــــــــــــــــ



ياخيمه وين اليوصلچ
والكـافـل يشـم الهـوه

ـــــــــــــــــ ❁ ❁ ❁ ــــــــــــــــــ

مچتـوفـه اخياته بحبـل
صـارو زلـم بـعـد الگـمـر
ياخيمـه ضـربوچ بسـهم
مـن صوبچ صـاب الستر
مـن واگـف ابـابـچ عـدل
حتى الهوه اليوصل يفر
حتى الضـوه لامـا يطب
صار الشمس هـو البـدر
لمــن اجــت ليـه العــده
گـلولـي طـايـح عـالنهـر

والحرگ چن عطره فاح
گـالـو الـعبـاس طـــاح

ـــــــــــــــــ ❁ ❁ ❁ ــــــــــــــــــ

ياخيمه مـن دگـچ تـره
گلـچ بـخيـتي اتكـفـلي
ماعدها غير الله وخيم
يستر خـدر حـيدر علي
بـاچـر تــظـل ابكـربـلـه
بس الحرم مامش ولي
ياخيمه مـن نار الحرگ
حتـى بــتـراب اتبـلـلي
والهزله مـن تعرج غدا
ياهـو اليعـدل محمـلي

والكفل ياخيمه راح
گـالو الـعباس طـاح

ـــــــــــــــــ ❁ ❁ ❁ ــــــــــــــــــ

چانـت تـرفـرف رايــته
محـد الـج عيــنه تصـد
ويسولف بجوده الطفل
يـدرونه ما يخلف وعـد
ونـعذره گـالـو مـايجـي
چي منهـشم راسه بعمد
لمـن اجـت خيـل العـده
كـل واحـد بـديـره شـرد
يـاخيـمه والبيـنـه جـره
عنـه شسـولـفـلـچ بـعـد

روس گدامي برماح
گـالو الـعبـاس طاح

ـــــــــــــــــ ❁ ❁ ❁ ــــــــــــــــــ

مـن ايـدي راح ومـارجع
وبروحي ماتطفه الخيم
مـا انسه چويات الجمر
كلما مشت رجلي انلچم
مـا ردتـه بالدنيه الضوه
كون انطفه حتى النجم
ياخيمتي ويـاچ احترگ
مـن فارگت راعي العـلم
ويبچـي حـالـي بفـرگتـه
موبس بشر حتى الصنم

والحجر لمصابي ناح
گـالـو الـعبـاس طاح

ـــــــــــــــــ ❁ ❁ ❁ ــــــــــــــــــ

ياخيمه مشوني بدرب
مـاشفتـه بعيوني ابـد
واليحدي بالناگ العدو
والكافل انصـاب بعمد
والدنيـه اذتـني شكثر
بيـامـي مـا خـلت ورد
مني انگطع حتى الهوه
مـا اريـدن اشتـمه بعـد
شلي بنفس مابي عطر
ريحـة جفـوف ولازنـد

جفه اليداوي الجراح
گـالـو الـعبـاس طـاح

ـــــــــــــــــ ❁ ❁ ❁ ــــــــــــــــــ

ودونــه لـلشـام بـضـعـن
طبـيـنـه لديـــار الـغـرب
ياخيـمـه مـن ذاك البشر
شفنه المصايب والعجب
لاغــيــره لا ذرة شــرف
لاشيـمـه لا چنـهم عـرب
حتـى بـقوانيـن السـبـي
راس بـرمح مـايـنضـرب
وتـبـاوع النـاس بحـقـد
بالنظـره شربـونه شـرب

والنـظـر النــه مبــاح
گـالـو الـعبـاس طـاح

ـــــــــــــــــ ❁ ❁ ❁ ــــــــــــــــــ

ياخيمـه شحچيـلچ بعـد
والمجلس يشيـب الطفل
طبينه وچــفوفي تصـب
دم ويـحــز بيـها الحـبل
لحضه ولون جابو طشت
كشـفـتـه ودمـوعي تـهـل
شـفـت الحسـين بنظرتـه
مبين عله ارسومه الزعل
حسيتـه يـنشـدنـي عـلـه
اخبـار اليـتـامـه والاهــل

يدري ابد ما نستراح
گـالـو الـعبـاس طاح

ـــــــــــــــــ ❁ ❁ ❁ ــــــــــــــــــ

عباس فاضل الشمري

محرم🔻

عتاب السهام 💔

الامام العباس عليه السلام


ــــــــــــ ❁ ❁ ❁ ــــــــــــــ


سهم عينك .. نشف بعيني الدمع

سهم عينك .. يرسم بگلبي الوَجَع

صوبك فــوگ الـنـهر
بعـيـنك يطفي النظر

سـهم عـينك ..

ـــــــــــــــــ ❁ ❁ ❁ ــــــــــــــــــ

خـويـه ماشـفت الاعادي من اجتنـي
تركض وهجمـت عـلـيـه وسـلـبـتنـي
الـكربـله يـاخـويه ريـتك ماجـبـتـنـي
كـل سـهـامـك خويه چـنها صوبـتني

ماشـفـتـني .. اركض واعـثر واطيح
ماشـفـتـني .. عالـنـهـر نـايم طـريـح

ينكـسـر گلـب الـسـهـام
صـارت الدنـيـه ظـــلام

ســهــم عــينـك


ـــــــــــــــــ ❁ ❁ ❁ ــــــــــــــــــ

اسـمع بصوتك يجيني مـن مكانك
مـاردت عـيـشـة حياتـي بلا امانك
الـسـهـم گام يتروه مـن حـنـانـك
بالكرم من حاتم اعله هوايه شانك

يابوفاضل .. اتعزب الكلمن يجـيك
يابوفاضل .. والكرم لايـگ عـلـيـك

الـسـهم تـعـتـبـره ضـيــف
يگـعـد وعـيــنـك مـضـيـف

ســهــم عــيــنك


ـــــــــــــــــ ❁ ❁ ❁ ــــــــــــــــــ

صوبك بالعـين سـهمك هز كـيانـي
ريت اخـذتنـي المـنـيه گـبلك انـي
سـهمك وبالعين من صابك عمـاني
گـتله ياسـهم الـغدر هـذا مـكـانـي

بعـين اخويه ..اشعر يسود الامان
بعين اخويه ..من يصد بيها حنان

شـال اخـيتـه بعـيـنه
وحده بـيـهـا سـكـينه

ســهــم عــيــنك

ـــــــــــــــــ ❁ ❁ ❁ ــــــــــــــــــ

الـسـهم ولصاب جودك ما اهمله
هذا هـمين بدلـيلي مـسوي علـه
شرد اعاتب يابوفاضل شرد اگله
يظلم بعيني نهاري وشمسه تعله

دنيه ظلمه..والشمس وسط السمه
دنيه ظلمه..بـعد ابن حامي الحمه

بعيني ما اشوف الدرب
جرحـك بـنـص الـگلـب

ســهـم عــيـنـك



ـــــــــــــــــ ❁ ❁ ❁ ــــــــــــــــــ

ضربة الـعامود كسرت مني جناح
واستمع يمه يتعله صوت الصياح
من ظهر مهره يتوسد فوگ لرماح
مايشوف بعينه ظلمه عالوجه طاح

طفت عـينه.. وعيني طفاها السهم
طفت عـينه.. وماشهد حرگ الخيم

عـيـنك وعـيني ظـلام
وتـنطفي عـينك حرام

ســهــم عــيـنك

ـــــــــــــــــ ❁ ❁ ❁ ــــــــــــــــــ

🖊️كلمات

عباس فاضل الشمري

خادمكم سيد حسين الموسوي الناصري

🎤عباس صباح
✍️عباس فاضل الشمري

محرم 🔻

گلبي يحن 💔

الأمام العباس عليه السلام

ـــــــــــــــــ ❁ ❁ ❁ ــــــــــــــــــ

گلبي يحن آنه تره اشتاكيتلك
ياخويه يم المشرعه تعنيتلك

شفتك يخويـه وادري بيـه تناطر
كبالك وكفت وحالي يكسر خاطر
گلبـي يحـن آنـه تـره اشتاكيتـلك

ـــــــــــــــــ ❁ ❁ ❁ ــــــــــــــــــ

لمن وصلت المشرعه ياريت ما شايفته
كل حزني يمك يالگمر انه بقهر سولفته
يالنايم بعينك سهم لوبيدي چا طــلعته
خطارك ومترده ابد حته السهم ضيفته

حيلي انهدم خويه وتكسر ظهري
كلمــا اگوم اوگـع گمت مـن قهري

لمــن اجيتك خويـه بيـك شصاير
كبالك وكفت وحالي يكسر خاطر
گلبـي يحـن انـه تـره اشتاكيتـلك

ـــــــــــــــــ ❁ ❁ ❁ ــــــــــــــــــ

لمن اجيت الوحدي بـس ارد اشوفك مـره
تدريني ماشوفك بعد بعيوني ظلت حسره
نـار البعد مـن فرگتك بگليبي سـوت جمره
واطفيها اريد بشوفتك نـار البقت متوجره

من شوفتك باجر تره يحرموني
تشبع نظــر منـك تريد عـيــوني

كون من اشوفك بيك يروه الناظر
كبالك وكفت وحالي يكسر خـاطر
گلبـي يحـن انـه تـره اشتاكيتـلك

ـــــــــــــــــ ❁ ❁ ❁ ــــــــــــــــــ

ورده وچنت الهـا عطر بـس ذبلتني الفرگه
انته الهوه ومن تنگطع الدنيه تصبح خنگه
عندي طلب واحد انه منك ردت بس شبگه
خاف من اشبگنك تشم ريحه خيم محتركه

الخيمه مـن بعدك تـره حرگوها
وسكينه ياخويه العده ضربوها

جيت اشتكيلك خويه ظيم العاشر
كبالك وكفت وحالي يكسر خــاطر
گلبـي يحـن انـه تـره اشتاكيتـلك

ـــــــــــــــــ ❁ ❁ ❁ ــــــــــــــــــ

يالتفهم عيوني چنت واحچيلك انه بنظره
شوچنك گبالي حرت مخنوگ احس بعبره
گنك تگلي بنظرتج مرسومه چانت حسره
اعرف تفسرهن صعب وعيوني چانت حمره

من البچي متغيره هاي عيوني
بس ردت اگلك باچر يسلبوني

وجسمك يظل فوگ الترب متناثر
كبالك وكفت وحالي يكسر خاطر
گلبـي يحـن انـه تـره اشتاكيتـلك

ـــــــــــــــــ ❁ ❁ ❁ ــــــــــــــــــ

لو بيدي ياخويه الامر تدريني ابد ماعفتك
يالنايم بحضن النهر بحضني شكثر نومتك
ربيتك انــه مـن الزغر خويـه وعلي علمتك
ادري الامر جدا صعب خويه وأنـه عاذرتك

ماتگدر تگـوم وتهــد تحميني
مچتوفه من بعدك أنه جفيني

شمخلي بظلوعك يخويـه الحافر
كبالك وكفت وحالي يكسر خاطر
گلبـي يحـن انـه تـره اشتاكيتـلك

ـــــــــــــــــ ❁ ❁ ❁ ــــــــــــــــــ

🖊️كلمات

عباس فاضل الشمري

محرم 🔻

خيمة هلي 💔

الأمام العباس عليه السلام

ـــــــــــــــــ ❁ ❁ ❁ ــــــــــــــــــ

عباس ياخيـمـة هلـي
يحزام ضهري وكافلي

من تحضن جروف النهر
معنـاهـا زيـنـب تـنولـي

ـــــــــــــــــ ❁ ❁ ❁ ــــــــــــــــــ

عباس هاليوم الگـلب
تلچمني كلـش دكـته

تدري شيگلي من يدگ
عبـاس مـيـرد لـخـتـه

يرسملي واحد عالترب
ويگلي چـن هـذا انته

خليـك لاتـبعد علـي
والله الگـلب عذبـته

من ايدي لو راح الكمر
معنـاهـا زيـنب تـنولي

ـــــــــــــــــ ❁ ❁ ❁ ــــــــــــــــــ

بعيوني من شفت العلم
لمـن كصدت المـشرعه

شفتك وگفت اعله النهر
صوتك يخـويـه نسمعه

گلتهـم اطـفال وحـرم
مـن العطش مـتروعه

لو ماخذت ماي ورحت
الـمـاي اسـدن منبـعـه

لو ماتـرد وكـت الظهر
معنـاهـا زيـنب تـنولي

ـــــــــــــــــ ❁ ❁ ❁ ــــــــــــــــــ

ياخويه سولف قصتك
ليش العـده مگطعينك

لمن وصـلت الجثتـك
شـو ماشفت جفيـنك

لاتوگع اختك تنهضم
تكسر ظهر لحسينك

مـن روحتـك لا ماترد
اعرفها نظـرت عيـنك

لمن تطيح مـن المهر
معناهـا زيـنب تـنولي

ـــــــــــــــــ ❁ ❁ ❁ ــــــــــــــــــ

ياخويه امشي وي غرب
وادريـك مـا تـرضـاهـا

للشام من طب الضعن
سـكنـه مـنـو تـلگـاهـا

تنشدني عنك كل وكت
تـدريـك مـا تـنـسـاهـا

وشلـون اقنـعـها تـرد
وراسك يسيـر وياها

لو صارن عيونك حمر
معنـاهـا زينب تـنولي

ـــــــــــــــــ ❁ ❁ ❁ ــــــــــــــــــ

بالغربه امشي وحدي
ومحـد يهـم الحـالي

من الهضم نار اشتعل
مـا تنـطـفـي بدلالـي

ياخويه كتالك سهم
وانـه النـظر كـتالـي

تاكلـنه العيون بحقد
وبس راسك اليبرالي

ومن يكثر اعلينه النظر
معنـاهـا زيـنب تـنولـي

ـــــــــــــــــ ❁ ❁ ❁ ــــــــــــــــــ

ياريت احاچيك وتـرد
تسمعني من احجيلك

يـم الرمح اوگف گمت
ياخويه جيت اشكيلك

من دارو اعليه العـده
ناديتك انـه ادخيلك

ما تگدر اتكوم وتـجي
ولا اگدر انـه امشيلك

يابو الفضل من تعتذر
معنـاهـا زينب تـنولـي

ـــــــــــــــــ ❁ ❁ ❁ ــــــــــــــــــ

🖊️كلمات

عباس فاضل الشمري