مسلم بن عقيل 👆👆👆👆

#قصيده_لشهر_محرم

#نزله_للأنصار

ـــــــــــــــــ ❁ ❁ ❁ ــــــــــــــــــ

اليوم ابن ظاهر اجانه..اليوم يكتب ملحمه
جمّع اصحابه ويكلهم..خــل نواسي فاطمه

ـــــــــــــــــ ❁ ❁ ❁ ــــــــــــــــــ

من حبيب ابن مضاهر جمع اصحابه بعزم
والله منعوف الحسين صاح ونشدة حـزم
تحزمو لرض المعاره هجمو الجيش نهـزم
كـل فرد عادل كتيبه سيف وبچـف انلــزم

اليوم جرد صارمه .. خل نواسي فاطمه

ـــــــــــــــــ ❁ ❁ ❁ ــــــــــــــــــ

هـدو بظهر ابـو فاضل بيهم الگـاع انطوت
غصت بروس العساكر بالدمه اليوم ارتوت
ركض ركضو عالمنايه عالارض لمــن هـوت
ذوله عشاگ الشهاده گلوبهم بالحــب قوت

گلوب عدهم هايمه .. خل نواسي فاطمه

ـــــــــــــــــ ❁ ❁ ❁ ــــــــــــــــــ

صدح صوتك ياحبيب اليوم من ارض الطفوف
مـن هجـم وبكبر سنـه شردت اگبالـه الصفوف
يـا أسد بـرض المعاره والگلب ما مره خـــوف
ماتركت حسين وحده والعده عيونك تشــوف

عالارض سال الدمه .. خل نواسي فاطمه

ـــــــــــــــــ ❁ ❁ ❁ ــــــــــــــــــ

والنعم منكم يخوتي انتم انصار الحسين
مـاتهم بيكـم شدايد بزود انتــم واگـفـين
عابس وجـون الغيـاره عالمنايـه معلمــين
ياوهب وياهم افزع عله اليسره وعاليمين

الگاع رجفت والسمه .. خل نواسي فاطمه

ـــــــــــــــــ ❁ ❁ ❁ ــــــــــــــــــ

كــل فــرد لمـن يقاتل اســد ويطب الحرب
مـن يهــد بيــن العساكر المثل بيـه انظرب
يصرخ بحب ابوليمه والعشگ وسط الگلب
صاحو انصار العقيده وياك نمشي بهالدرب

الجيش كله نهزمه..خل نواسي فاطمه

ـــــــــــــــــ ❁ ❁ ❁ ــــــــــــــــــ

من حبيب ينادي بيهم يلا حي اعله الجهاد
خسفو الگاع بمشيهم صار چـن يوم المعاد
العطـش نـار بگلبهــم والجمر يچوي الفؤاد
والنعم منكم ينــادي انتــم ابطـال الشداد

مايهم بيكم ظمه .. خل نواسي فاطمه

ـــــــــــــــــ ❁ ❁ ❁ ــــــــــــــــــ

كلمات الخادم

عباس فاضل الشمري

للأنصار 👆👆👆👆

#قصيده_لشهر_محرم

#قصائد_العباس_ع

نزله
*لحن هنيالها زينب بيك هنيالها*

ـــــــــــــــــ ❁ ❁ ❁ ــــــــــــــــــ

من شالها .. الرايه وراح .. من شالها

ـــــــــــــــــ ❁ ❁ ❁ ــــــــــــــــــ

لمـن تطب الميدان .. بچفــك الرايــه تـرف
الزلـم تشرد لاويـن .. الجيش كدامك رجف
عالنهر ماظل خيال .. طب النهر منه وغرف
عطشان ذبيت الماي.. يالخوتـك مـا تنوصف

شال النهر بالجربه خله ارجاله
خاطر يروي حسين ويه عياله

من شالها ..
من شالها ..الرايه وراح..من شالها

ـــــــــــــــــ ❁ ❁ ❁ ــــــــــــــــــ

الجيش وياك حتـار .. محد بقـه گلـه شـرد
الشمر گلهـم عبـاس .. اليوگـف گبـاله اسـد
محد وگف كلها تخاف.من نظرته لمن يصد
بـس الغدر حل وياه ..ماگدرو يصدونه ابد

بالغدر گطعـوا يسرته ويمينه
والسهم صوب جربته وبعينه

من شالها..
من شالها ..الرايه وراح..من شالها

ـــــــــــــــــ ❁ ❁ ❁ ــــــــــــــــــ

دارو عليك الفرسان .. بس فنهـم يصدونك
لمن شلت بيدك ماي .. چنك علي يشوفونك
رجفت بديهم لسيوف.. مـن باوعو بعيونك
يتشاور عليك الجيش.. واتـفقـو يغـدرونك

انضرب جودك وانسفح كل مايه
من رايتك اخذت فخـر كل رايـه

من شالها ..
من شالها ..الرايه وراح..من شالها

ـــــــــــــــــ ❁ ❁ ❁ ــــــــــــــــــ

رايتك صارت عنوان .. مــن رفرفت فوگ النهر
كل رايه من عدها تغار .. چي لامست چف الگمر
لمـن تــرف چـن زلـزال .. هــز الارض لمـن عبـر
وحدك چنت بالميدان .. بــس ماتهم همــه شكثر

لمن تطب بالروس بس تتخير
يـا رگبه تكطـع يـاراس تتحير

من شالها ..
من شالها ..الرايه وراح..من شالها

ـــــــــــــــــ ❁ ❁ ❁ ــــــــــــــــــ

سيفـه نـزل عزرائيـل .. وينفـذ عليهـم حكم
گللهم اليـوم المــوت .. منه فـلا واحد سلم
بالمعركه وباله يروح .. فكره يظل يـم الخيم
لمن وگع فوگ الگاع .. گالو وگع راعي الشيم

ماتلگـه مثـلــه خيـال وتـريده
ما رادت الرايه تطيح من أيده

من شالها ..
من شالها ..الرايه وراح..من شالها

ـــــــــــــــــ ❁ ❁ ❁ ــــــــــــــــــ

من سولفو عنه هواي..ماينوصف فعله بوصف
من انذكر اسمه الجيش .. كله فرد رجفه رجف
من ينحسب ويه رجال.. مـن ينحسب وحده بألف
سيف ورمح شايل جود .. والرايه بچفوفه تـرف

لمن هجم گالـو جيش طبلنه
من يرفع بچفه السيف ماثنه

من شالها ..
من شالها ..الرايه وراح..من شالها

ـــــــــــــــــ ❁ ❁ ❁ ــــــــــــــــــ

كلمات

خادم خدام الحسين ع
عباس فاضل الشمري

الامام العباس ع 👆👆👆👆

#قصيده_لشهر_محرم

#استشـهاد_القاسم_ع

ـــــــــــــــــ ❁ ❁ ❁ ــــــــــــــــــ

ورده وتفارك ماي...انه بغيابك
يايمه من اشتاگ...اشتم ثيابك

لمن مشيت .. انحب بقيت .. انه بغيابك

ـــــــــــــــــ ❁ ❁ ❁ ــــــــــــــــــ

ييمه من رحت هالروح ذبلانه بعطش فرگاك
يوجه الماي لو رديت ترد روحي بخبر ملگاك
كون اندل مكانك وين لا ترجعلي انه اتعناك
يسباح الگلب مااريد حياتي وخل اموت وياك

يايمه يحله الموت..ويه النحبهم
كل العمر وياي .. عايش ذكرهم

لتظن نسيت..انحب بقيت..انه بغيابك

ـــــــــــــــــ ❁ ❁ ❁ ــــــــــــــــــ

يشمس امك نهاري يموت وكل دنياي تصبح ليل
اعيش ايام سوده هواي ودموعي تظــل تسيل
ثگل حملي انه بفرگاك وبعد ماظل ابـد كـل حيل
رحت روحت رياح تهب وشيرجعك يريح الهيل

من ايدي من تروح..شيردك الها
بالرجعه هاي الروح..تفقد املها

لا مااجيت..وانحب بقيت..انه بغيابك

ـــــــــــــــــ ❁ ❁ ❁ ــــــــــــــــــ

يجسـام الــگلب مـالـوم بـعـدك بيـمـن اتصبر
اظـل ارســم عـرس يمـه واظـل عليـك اتحسر
رحت مني شباب زغير وتظل نار الگلب تسعر
مـن بعـدك اظـل وحــدي وانــه بفرگـاك اتحير

والحسره من تغيب.. تترس دليلي
بعدك رموشي تشيب..شيبني ليلي

وشگد بچيت.وانحب بقيت.انه بغيابك

ـــــــــــــــــ ❁ ❁ ❁ ــــــــــــــــــ

يمن عطرك ترس ريتي صورك عاشن ابالي
افز كل ليله واتلمس مكانك يمه ظل خالي
مـايحتـاج اسولفـك بـعـدك تعـرف بـحالي
شنو حـاله اللذي بدنياه يفارگله بشر غالي

بعد العزيز شلون..تكضي الحياة
ما يحله ابد وياه .. بس الممات

موت اشتهيت.وانحب بقيت.انه بغيابك

ـــــــــــــــــ ❁ ❁ ❁ ــــــــــــــــــ

انه الميته بكياني الروح مخنوگه بنفس ريتي
رحتي منــي وخذت وياك مـن امشيت عافيتي
شلون اگدر اطب للبيت تره يمــه انهدم بيتــي
اريدك انتــه تدفني واريــد اوصيلك اوصيتي

ردتك تهيل تراب .. بيدك عليه
تاليها انت تروح..من بين اديه

تدفني ريت.وانحب بقيت.انه بغيابك

ـــــــــــــــــ ❁ ❁ ❁ ــــــــــــــــــ

كلمات

عباس فاضل الشمري

ورده وتفارك ماي انه بغيابك




عباس فاضل الشمري

للقاسم ع 👆👆👆👆👆

#قصيده_لشهر_محرم

#استشـهاد_القاسم_ع

ـــــــــــــــــ ❁ ❁ ❁ ــــــــــــــــــ

الرحل لا ما يــــــرد
وعيني لامتشاهــده
واني كلبي ينمــــرد
يمــه گلب الوالـــده

ـــــــــــــــــ ❁ ❁ ❁ ــــــــــــــــــ

ابني من يرحل اصدن وجهي ليه
مــن بعيد وشاهدت دارو عليــــه
ارد اروح واكصد الحـومه اعتنيه
واشعــل اشموعـه واحنيها اديـه

رايح بعمـر الــــورد
حزني يايمه ابتــده
واني گلبي ينمـــرد
يمـه گلب الوالـــده

ـــــــــــــــــ ❁ ❁ ❁ ــــــــــــــــــ

يمه ياجاسم تروح وفدوه اكـــول
العمـر نفدي لجــل ابــن البتـــول
تخلص دموعي بغيابك من يطول
تنطفي عيوني ونظرها هـم يزول

عيني يعميها البعد
بعدك انه الفاكــده
وانه گلبي يـــنمرد
يمه گلب الـــوالده

ـــــــــــــــــ ❁ ❁ ❁ ــــــــــــــــــ

كبال عين الوالده يموت الولـــد
ومن يروح الغـالي تدري مايــرد
وشاهدت كدامها يموت الــــورد
بــلاذخر تبــقه وحيده ولا سنـد

وتدري ماترجع بعد
ترحل بعمر النــــده
وانه گلبي ينمــــرد
يمه گلب الــــوالده


ـــــــــــــــــ ❁ ❁ ❁ ــــــــــــــــــ

مـن تشوفك رايح بعمــر الشباب
تحظنك حيل وتشم ريح الثياب
يجوي دلالي يظل هــذا العذاب
تشتعل نــاري ييمــه بهالمصــاب

والسأل عنـه ونشد
گتله جثه هامــــده
وانه گلبي ينمــــرد
يمه گلب الوالــــده

ـــــــــــــــــ ❁ ❁ ❁ ــــــــــــــــــ

دموعي تنزل بعدك ويعله البچـي
اعتاب عندي وبين بعيني الحجي
اعليك ردت بكبري يايمه ارتجــي
منيدي ترحل تالي يمه وماتجــي

ادري يمه ماتــــرد
تذبحك اهل الرده
وانه گلبي ينمـــرد
يمـه گلب الوالــده

ـــــــــــــــــ ❁ ❁ ❁ ــــــــــــــــــ

زفتك يمه السيوف اعلـه التراب
وحنتك بالحومه مـن دم الركاب
اعله المنيه الزفه تتحول مصاب
تنطفي شموعك ييمــه بالشباب

غرفتك تصبح لحد
من التراب توسـده
وانه گلبي ينمــــرد
يمه گلب الوالــــده

ـــــــــــــــــ ❁ ❁ ❁ ــــــــــــــــــ

كلمات

عـباس فـاضـل الـشمـري

للقاسم ع 👆👆👆👆👆

#قصيده_لشهر_محرم

#قصائد_الأكبر_ع

ـــــــــــــــــ ❁ ❁ ❁ ــــــــــــــــــ

برحيلك گلبي يتفطر
بدونك تدري ما اگدر

شتظن انساك .. اموت وياك
بدونك تدري مااگدر

ـــــــــــــــــ ❁ ❁ ❁ ــــــــــــــــــ

يزهرة عمري ويامي يروحي ويانظر عيني
يحلمي واجمل احلامي وحـدي لا تخليني
بعد عينك ينورالعين اموت وانـت تدريني
يشمة كل هوه بريتي يفرحة عمري وسنيني

صعب فرگاك .. اموت وياك
بدونك تدري مااگدر

ـــــــــــــــــ ❁ ❁ ❁ ــــــــــــــــــ

احس بنار البصدرك و د ليلك يلتهب ضامي
دعيت الله ترد ليــه واشوفك انــه بحلامي
يتعبي ويا ابن روحي اجيت اشكيلك الامي
ياالاكبر عمري ما اريـده اريدك انتـه گدامي

ردت ملگاك .. اموت وياك
بدونك تدري مااگدر

ـــــــــــــــــ ❁ ❁ ❁ ــــــــــــــــــ

فگدتك يابعد امك خذاك الموت من ايدي
تمنيت شكثر ياناس اريدن شوفت وليدي
غيابك هيج احزاني ييمه وشوفتك عيدي
اصبر روحي بالگوه اكل للروح بس هيدي

اظل انعاك .. اموت وياك
بدونك تدري مااگدر

ـــــــــــــــــ ❁ ❁ ❁ ــــــــــــــــــ

يشيخ الروح يـاهيبه يچلمات الهـلا التنكال
اسولفلك عله احزان وادموعي تسولف حال
يغالي ولاتظـن انساك يساكن بالگلب والبال
بعــدك مـا ردت كلشي لادنيـه ردت لا مــال

بعد عيناك .. اموت وياك
بدونك تدري مااگدر

ـــــــــــــــــ ❁ ❁ ❁ ــــــــــــــــــ

تريد المـاي يوليدي تريــد شفـاك ترويها
تــرد وتگلـه تــدريني اذا تروينـي افنيها
تروح شلون يايمــه وحيده امـك تخليها
يخيمه بروحي محتركه نارك من يطفيها

كمت انخاك..اموت وياك
بدونك تدري ما اگدر

ـــــــــــــــــ ❁ ❁ ❁ ــــــــــــــــــ

حزينه الروح بغيابك يتارك بالكلب حسره
يهنيال البشر لو مات عزيزة ينزله بالحفره
اريدك يمــه بچفوفك تهيـل ترابي وتنثره
خاطر بالگبــر ويــاي چفـك يندفن عطـره

واشم ذكراك .. اموت وياك
بدونك تدري ما اگدر


ـــــــــــــــــ ❁ ❁ ❁ ــــــــــــــــــ

كلمات
خادم خدام الحسين ع
عباس فاضل الشمري

برحيلك كلبي يتفطر





عباس فاضل الشمري