دڵ ئەوا کەوتوەتە زیندانی غەم و قوربانتم
تایێکی زوڵفت بنێرە بەڵکە بۆم دەربێتەوە..


#وەفایی

دەردی دووری کوشتمی..
لێمت نەپرسی دەفعەیێ..

کەی بە دیدارێ
لە پاش ئەم مەرگە ئەحیامان ئەکەی؟


#زاری

هەموو شەو چاوەڕێم بەڵکم بەمەخفی یاری جانی بێ
لە تاریکی شەوا شوعلەی چرا موشکیل نیهانی بێ..


#سالم
واتە: هەموو شەوێك چاوەرێم یاری گیانی بە گیانم بە دزیەوە بێت بۆ لام و کەس پێنەزانێ، بەڵام زەحمەتە گڕ و بڵێسەی چرا لە تاریکی شەودا بشاردرێتەوە.

گوتت ها زوڵف و کافر بووم
گوتت ها ڕووم و چاتر بووم

کە من هەر بێمە سەر ڕێی تۆ
دەبێ تۆ بۆچ لە من لا دەی؟


#وەفایی

عومرێکە لیباسی غەمی دوریتە لە بەرما
گۆڕین و دڕینی نیە ئەم کۆنە کراسەت..



#صابری

تۆم ئەوێ وەک گوڵ لە باخی ماڵی مندا هەڵبدەی
نەک گوڵی سەر مێزی ئیمرۆ ببیت و پێخوستی سبەی..


#ئەحمەد_هەردی

چ عومرێکە بەبێ تۆ ڕائەبوورێ
ئەگەرچی هەم وەلێ مانم نەمانە..


#زاری

ئەگەر ڕۆژە بتی من هەر بتێ بێ
سەرەوژێرە کە تۆ وەک ڕۆژ هەڵاتی..


#مەحوی

شنەی با باسی جوانیی ئەو بە گوێی مندا ئەچرپێنێ
هەموو دەرکەوتنی شۆخێ دڵی من دائەخورپێنێ..


#ئەحمەد_هەردی

مەنعی سووتانم مەکەن ئەمڕۆ لە شەوقی ڕوومەتی
چۆن نەسووتێم من بە ئاگر ئەو بە بارێ نەوتەوە..


#تاهیر_بەگی_جاف

لە پەندی ئەهلی دانش گوێم گرانە
کە مەنعم کا لە زاری یا لە زاری..


#زێوەر
زاری یەکەم: دەم
زاری دووەم: گریان

چاوت ئەستێرەی دەریازی
هەڵیان دێنی چەن بە نازی
بە کوشتنم ئاواتخوازی
کۆڵوانەکەی کۆڵی تۆ
چارۆکەکەی کۆڵی تۆ
عەترم پێیە و بۆم هێناوی
بەدیاری دەیدەم بە تۆ
سوێندم خواردووە و ماچی دەکەم
تەختی نێو چاوانی تۆ

#حەسەن_زیرەک

پارچەشیعرێکی ناسکی #قانع بۆ دڵدارەکەی:

چاوەکەم مەغرووری هەروا یان خەتای نازارییه
نازه وا ئاڵوزه چاوت یا لەسەر خوونخوارییه

خەم لە من دێوانەتر بوو شۆڕشی دڵمی کە دی
دەردی دڵ دەردی گرانه و عیلەتێکی سارییه

ئاوڕی شان و بەرۆکی خۆم ئەدەم شەیدا ئەبم
چون بە ئەشکی خوێنی جەرگم قرمز و گوڵنارییه

ناتوانێ پێ لە ئەشکی خۆی بنێ تێپەر بکا
مەشرەبی عاشق لەسەر ڕەسم و مەقامی هارییه

من بەشوێن دڵما گەرام شوێنی بە خوێن دۆزیمەوه
چۆن لە ڕاوچی گوم ئەبێ سەیدێ کە خوێنی جارییه

قانعی بۆیه له هیجرا خەو لە چاوی ناکەوێ
قاعیدەی حەسحەس وەهایه کەوتە شەو بێدارییه

پەلەت بێ چاوەڕێتم زوو وه‌ره‌
بەس خۆت بخافڵێنه‌..

هه‌زار جار هێمنیش بم
بۆ ویسالت چۆن په‌له‌م نابێ..


#هێمن

چاوەکەم دوور بێ لە ڕووت
وا چاوەکانم ژان ئەکەن..

هەر لە سورمەى خاکى ڕێگات
ئارەزووى دەرمان ئەکەن..


#ئەحمەد_موختار_جاف