በአዲስ አበባ የሚገኙ 35 ትምህርት ቤቶች ለ2017 የትምህርት ዘመን ምዝገባ እንዳያካሒዱ ዕገዳ ተጣለባቸው።

በከተማዋ የሚገኙ 35 የቅድመ አንደኛ እና አንደኛ ደረጃ ትምህርት ቤቶች ለ2017 የትምህርት ዘመን ምዝገባ እንዳያካሒዱ ማገዱን የአዲስ አበባ ከተማ አስተዳደር የትምህርትና ስልጠና ጥራት ቁጥጥር ባለስልጣን አሳውቋል።

ትምህርት ቤቶቹ በዋናነት በትምህርት ፖሊሲ ጥሰት፣ በትምህርት ስታንዳርዱ መሰረት ከ75 በመቶ በታች ያመጡ እንዲሁም የትምህርት ጊዜ ሰሌዳን በአግባቡ አለመጠቀም የታየባቸው በመሆኑ ዕግዱ እንደተጣለባቸው ባለስልጣኑ ገልጿል።

ዕግዱ ከተጣለባቸው ትምህርት ቤቶች መካከል የጊብሰን ትምህርት ቤቶች፣ የቅዱስ ሚካኤል አምስት ትምህርት ቤቶች እና የካ አፖሎ ትምህርት ቤት እንደሚገኙበት የባለስልጣኑ ዋና ሥራ አስኪያጅ ዳኛው ገብሩ ተናግረዋል።

ዕገዳ በተጣለባቸው ትምህርት ቤቶች ይማሩ የነበሩ ተማሪዎች በመኖረያ አቅሪያቢያቸው በሚገኙ የግል እና የመንግሥት ትምህርት ቤቶች ያለምንም ተጨማሪ ክፍያ እንዲስተናግዱ ይደረጋል ብለዋል።

ሌሎች 41 ትምህርት ቤቶች በራሳቸው ጊዜ መቀጠል ስላልቻሉ ፈቃዳቸው መሰረዙን የገለፁት ኃላፊው፤ የ150 ትምህርት ቤቶች ጉዳይ በሒደት ላይ እንደሆነና ወደፊት እንደሚገለፅ ተናግረዋል።

በ2017 የትምህርት ዘመን በአዲስ አበባ ተማሪዎችን መዝግበው እንዲያስተምሩ ፈቃድ የተሰጣቸው ትምህርት ቤቶች 1,332 መሆናቸውን ጠቁመዋል።

@tikvahuniversity

የፕሬዝዳንት ሳህለወርቅ ዘውዴ ̔ፕሬዝዳንሻል ሜንተርሽፕ̔ ሰልጣኞች በአዲስ አበባ ሳይንስና ቴክኖሎጂ ዩኒቨርሲቲ ተመረቁ፡፡

የሜንተርሽፕ ፕሮግራሙ በአምስት ዩኒቨርሲቲዎች ማለትም በወልቂጤ ዩኒቨርሲቲ፣ በአዲስ አበባ ሳይንስና ቴክኖሎጂ ዩኒቨርሲቲ፣ በሐረማያ ዩኒቨርሲቲ፣ በደብረብርሃን ዩኒቨርሲቲ እና በደባርቅ ዩኒቨርሲቲ ለሚገኙ ሴት ተማሪዎች የተለያዩ ክህሎቶች ማሳደጊያ የማማከር ስልጠናዎችን ሲሰጥ ቆይቷል፡፡

ከአምስቱ ዩኒቨርሲቲዎች በተለያየ ዙር ስልጠናውን ሲከታተሉ የነበሩ ተማሪዎች የምርቃት እና የፕሮጀክቱ ማጠቃለያ መርሐግብር ተካሄዷል፡፡

በአጠቃላይ በአምስቱ ዩኒቨርሲቲዎች ቁጥራቸው 500 የሚሆኑ የፕሬዝዳንሻል ሜንተርሺፕ ስልጠና (Presidential Mentorship Program) ሲከታተሉ የቆዩ ተማሪዎች ተመርቀዋል፡፡

ፕሮግራሙ በ Institute of International Education አማካኝነት በአመራር ብቁ የሆኑ ሴቶችን ለማፍራት ከአራት ዓመት በፊት የተጀመረ መርሐግብር ነው፡፡ #AASTU

@tikvahuniveristy

መንገሻ አየነ (ዶ/ር) የባህርዳር ዩኒቨርሲቲ ተጠባባቂ ፕሬዝዳንት ሆነው ተመደቡ፡፡

መንገሻ አየነ (ዶ/ር) ከሰኔ 12/2016 ዓ.ም ጀምሮ የባህርዳር ዩኒቨርሲቲ ተጠባባቂ ፕሬዝዳንት ሆነው መመደባቸውን ሰኔ 10/2016 ዓ.ም በትምህርት ሚኒስትሩ ብርሃኑ ነጋ (ፕ/ር) ተፈርሞ የወጣ የምደባ ደብዳቤ ያሳያል፡፡

የባህርዳር ዩኒቨርሲቲ ፕሬዝዳንት የነበሩት ፍሬው ተገኝ (ዶ/ር) የኢትዮጵያ ግብርና ትራንስፎርሜሽን ኢንስቲትዩት ምክትል ዋና ዳይሬክተር ሆነው መሾማቸውን ተከትሎ፤ ፕ/ር እሰይ ከበደ የባህርዳር ዩኒቨርሲቲ ፕሬዝዳንት ሆነው በመወከል ሲሰሩ ቆይተዋል፡፡

አዲስ የተመደቡት የባህርዳር ዩኒቨርሲቲ ተጠባባቂ ፕሬዝዳንት መንገሻ አየነ (ዶ/ር) ፤ ከመስከረም 2014 ዓ.ም ጀምሮ የወሎ ዩኒቨርሲቲ ፕሬዝዳንት ሆነው ሲያገለግሉ ቆይተዋል፡፡

@tikvahuniversity