“ መሬት እንቁ የሆነበት ዘመን ስለሆነ ሁሉም አሰፍስፎ ዓይኑ ቤተ ክርስቲያን ላይ ሆኗል ” - ብፁዕ አቡነ ሄኖክ

በኢትዮጵያ ኦርቶዶክስ ተዋህዶ ቤተክርስቲያን የአዲስ አበባ ሀገረ ስብከት ሊቀ ጳጳስ ብፁዕ አቡነ ሄኖክ በየካ ክፍለ ከተማ የኮተቤ ደብረ ልዑል ዳግማዊ ቁልቢ ቅዱስ ገብርኤል ቤተ ክርስቲያንን እድሳት መርቀዋል።

የቤተ ክርስቲያኗ ዋና አስተዳዳሪ መላከ ፀሐይ ቆሞስ አባ ገብረ ኢየሱስ፣ ለአስፋልት ንጣፉ ቁፋሮው ስራ በአንድ ወር እንደተጠናቀቀ ገልጸዋል።

በቅጥር ግቢ የአስፋልትና የቴራዞ ንጣፍ፣ የምዕመናን እድሳት ማረፊያ እድሳትና የመሳሰሉት ተግባራት መከናወናቸው አስረድተዋል።

ብፁዕ አቡነ ሄኖክ በበኩላቸው፣ " ከደብሩ በሚስማማ ምድራዊ ገነት በሚመስል መልኩ ቅጥር ግቢው እንደለማ በመግለጽ የእንኳን ደስ አላችሁ " ብለዋል። 

ኢትዮጵያዊያን የሚሰሯቸው ህንፃዎች ከ30 ዓመታት በላይ የሚያስቆጥሩ መሆናቸውን መስክረው፣ የሰው ልጅ ግን እየተዘነጋ መሆኑን አስምረውበታል።

“ ህንጻ መስራቱ ለትውልድ የሚተላለፍ ሆኖ ነገር ግን ህንፃ ሥላሴ ደግሞ (ካህናቱ፣ አገልጋዮቹ፣ ምዕመናኑ) የሚበላ፣ የሚላስ ነገር በማጣት እየተቸገሩ መሆኑን ዘንግተናል ብዬ አስባለሁ ” ነው ያሉት።

ብፁዕነታቸው አክለው፣ “ ትልቁን ህንፃ እንሰራለን ህንፃ ሥላሴ (የሰው ልጅ) ግን ወደ መዘንጋት የደረሰ ይመስለኛል ” ሲሉ ተናግረዋል።

“ 50፣ 50 ማድረግ ብንችል ! በጎን ልማቱን የማፋጠን ሥራ፣ ሥራ አጥ የሆኑ ልጆቻችን ሥራ የሚያገኙበትን ሥራ መስራት ትችላለች ቤተክርስቲያኗ ” ብለዋል።

“ ቤተ ክርስቲያኒቱ ብዙ አቅም አላት። ያንን አቅም የማስተዳደር፣ የማሰባሰብ፣ ባለሃብቶችን ጋብዛ ባላት መሬት ላይ ልማት እንዲያለሙ በማድረግ ገቢ የመፍጠር ሥራን ጎን በጎን ደግሞ ብትሰራ ጥሩ ነው ” ሲሉ አስገንዝበዋል።

“ እንደ አዲስ አበባ ሀገረ ስብከት የመሬት አስተዳደር በኩል የወጣ አንድ ፕሮጀክት አለ ” ብለው፣ በዚያ መሠረት አባላት ወደ ልማት እንዲየመሩ ስልጠና በመስጠት የማንቃት ስራ መስራት እንደሚገባ አሳስበዋል።

መንግስት የልማት ሥራ እየሰራ መሆኑን የጠቀሱት ብፁዕነታቸው፣ “ ቤተ ክርስቲያንም ጎን በጎን ተሯሩጣ ልማትን ካላለማች ቆሞ ቀር ትሆናለች፣ ትወቀሳለች ” ብለዋል።

አክለው፣ “ ያላትም መሬት ደግሞ እንዳይወሰድ ስጋት አለን። ባላት መሬት ላይ ልማት ልታለማ ይገባል ” ነው ይሉት።

“ መሬት እንቁ የሆነበት ዘመን ስለሆነ ሁሉም አሰፍስፎ ዓይኑ ቤተ ክርስቲያን ላይ ሆኗል። እኛ ተኝተን ሌሎች መጥተው እንዳይወስዱብን ነቅተን በንቃት፣ በብልሃት እና በጥበብ ወደ ልማት መግባት ከእኛ ይጠበቃል ” ሲሉ አሳስበዋል።

#TikvahEthiopiaFamilyAA

@tikvahethiopia