🔈#የመምህራንድምጽ

“ የ3 ወራት ደመወዝ አልተከፈለንም ” - የአፋር ክልል መምህራን 

“ ያልተመገበ መምህር ክፍል ግባ ቢባልም ሊገባ አይችልም ” - የኢትዮጵያ መምህራን ማኀበር

በአፋር ክልል ሰመራ ከተማ የሚገኙ መምህራን ደመወዝ እንዳልተከፈላቸው፣ በዚህም ቤተሰብ ራሱ ማስተዳደር እንዳልቻሉ ለቲክቫህ ኢትዮጵያ ገለጹ።

መምህራኑ፣ “ የ3 ወራት ደመወዝ አልተከፈለንም። ታዲያ ቤተሰብስ እንዴት እናስተዳድር? ” ሲሉ በአንክሮ ጠይቀዋል።

ደመወዛቸው እንዲከፈላቸው የሚመለከታቸውን አካላት እንደጠየቁ፣ ሆኖም መፍትሄ እንደሌለ፣ በዚህም ችግር ላይ እንደሆኑ አስረድተዋል።

የኢትዮጵያ መምህራን ማኀበርም ቅሬታው አግባብ መሆኑን ገልጾ፣ “ እንደውም እስከ ርዕሰ መስተዳደሩ ቢሮ ድረስ ጋውናቸውን ለብሰው ሂደው በክልሉ ልዩ ኃይል ነው የተመለሱት ” ብሏል።

የማኀበሩ ምክትል ፕሬዚዳንት አቶ ሽመልስ አበበ ለቲክቫህ በሰጡት ቃል፣ “ ቅሬታቸው የቆዬ ነው። የ3 ወራት ደመወዝ ተባለ እንጂ ከ2012 ዓ/ም ጀምሮ የትምህርት ማሻሻያ፣ የደረጃ እድገት የማይሰጥበት አካባቢ አለ ” ብለዋል።

“ አሁን ላይ ደግሞ ደመወዝ ይቆረጣል። ለድርጅት ተብሎ ሁሉ ደመወዝ የሚቆረጥበት አካባቢ አለ ” ሲሉ ተናግረዋል።

መምህራኑ የ3 ወራት ደመወዝ እንደተቆረጠባቸው፣ በዚህም የክልሉ መምህራን ማኀበር፣ የክልሉ ትምህርት ቢሮ የሚመለከታቸውን አካላት ለማነጋገር  ጥረት እንዳደረጉ የገለጹት አቶ ሽመልስ፣ “ ታች ያለው አመራር የላይኛውን የሚሰማ አይደለም ” ብለዋል።

“ መምህራን ግን ለከፋ የመልካም አስተዳደር ችግር እየተጋለጡ ናቸው፤ እዚያ አካባቢም (ሰመራ) በጣም የከፋ ችግር ነው ያለው ” ሲሉ አክለዋል።

ታዲያ ማኀበሩ ለቅሬታው ምን ምላሽ አገኘ ? ሲል ቲክቫህ ኢትዮጵያ ላቀረበላቸው ጥያቄ በሰጡት ምላሽ፣ “ ቀደም ብለን ለርዕሰ መስተዳደሩ አቶ አወል አርባ ደብዳቤ ፅፈንላቸዋል። እሳቸውም ለታችኛው መዋቅር ችግሮቹ መፍትሄ እንዲሰጣቸው ብለው በደብዳቤ አሳውቀዋል ” ብለዋል።

ሆኖም ከታች ያሉት አመራሮች ጉልበተኛ እንደሆኑ ነው አቶ ሽመልስ ያስረዱት።

“ አንድ መምህር ደመወዙ እየተቆረጠበት፣ ጉልበቱ ሌላ ጋ ከሆነ፣ ያልተመገበ መምህር ክፍል ውስጥ ግባ ቢባልም ሊገባ አይችልም። በጉልበት ቢገባ እንኳ ያስተምራል ወይ ? የሚለው ሌላ ጥያቄ ነው ” ብለዋል።

ይህ ድርጊት መማር ማስተማሩ ላይ በቀጣይ ከፍተኛ ጉዳት እንዳያስከትል ከፍተኛ ስጋት እንዳላቸው ገልጸው፣ “ ምስቅልቅሉ የወጣ አሰራር ነው ያለው ” ሲሉ ወቅሰዋል።

“ የታችኛው አመራር ለትምህርት የማያስብ፣ ለጊዜው ለፓለቲካ ተቆጥሮ የማሰጠውን አጀንዳ ብቻ ትኩረት አድርጎ የሚሰራ፣ መደማመጥ የሌለበት፣ ለትውልድ የማያስብ አመራር እያየሁ ነው ” ነው ያሉት።

በአማራ ክልል ያለው የመምህራን ቅሬታ በቀጣይ ይቀርባል።

#TikvahEthiopiaFamilyAA

@tikvahethiopia

🔈#የሰራተኞችድምጽ

" የደመወዝ ጥያቄ እንዳንጠይቅ በፖሊስ መደብደባችንን እና መታሰራችን የኢትዮጵያ ህዝብ ይወቅልን !! " - የሾኔ የመጀመሪያ ደረጃ ሆስፒታል ጤና ባለሙያዎች እና ሰራተኞች

" ከግንቦት ወር ጀምሮ ደመወዝ አልተከፈለንም " ያሉ የሾኔ የመጀመሪያ ደረጃ ሆስፒታል የጤና ባለሙያዎችና ሰራተኞች ያሉበትን ችግር እና ቅሬታቸውን ለመግለጽ ወደዞን መምሪያ በመሄድ ላይ ሳሉ በፖሊስ ተደብድበው መመለሳቸውን ለቲክቫህ ኢትዮጵያ ተናግረዋል።

" ሰራተኞቹ ደመወዝ እና ጥቅማጥቅም ካየን ይሄው ሶስተኛ ወራችን ቢሆንም የሆስፒታሉ አመራሮችም ሆኑ ዞኑ ለጥያቄያችን ምላሽ መስጠት እንኳን አልፈለጉም " ብለዋል።

" ይህንም ተከትሎ ለሆስፒታሉ አመራር ከዚህ በላይ መታገስም ሆነ ችግሩን መቋቋም እንደማንችል በደብዳቤ አሳዉቀን ሁኔታውን በተጨማሪ ለሀድያ ዞን አስተዳደር ለማሳወቅ ስናቀና የዞኑ  ፖሊስ ደብድቦ መልሶናል " ሲሉ ተናግረዋል።

" በህዝብ ትራንስፖርት ተሳፍረን ስንሄድ የዞኑ ፖሊስ ዱራሜ ላይ አስቁሞ በሀይል በማስወረድና በመደብደብ  ወደመጣንበት እንድንመለስ አደረገን " የሚሉት ሰራተኞቹ ወደ ሾኔ ሲመለሱ መሪዎች ናቸው የተባሉ ጥቂት ሰዎች ለሰአታት ታስረው መፈታታቸው ገልጸዋል።

" ከችግራችን በላይ እየደረሰብን ያለውን ግፍ የኢትዮጵያ ህዝብ ይስማልን " ያሉት የሆስፒታሉ ሰራተኞች " በዚህ አመት ከተከለከልነው ደሞዝ ባለፈም በ2015 ዓ/ም ያልተከፈለ  ውዝፍ ገንዘብ ነበረን " ብለዋል።

ቲክቫህ ኢትዮጵያ የሰራተኞችን የደረሰባቸውን ነገር እና ቅሬታቸውን ይዞ የሾኔ የመጀመሪያ ሆስፒታል ሜዲካል ዳይሬክተእ ዶ/ር መሀመድን አህመድ አነጋግሯል።

እሳቸውም ሰራተኞቹ በደብዳቤ ስራ ማቆማቸውን ገልጸው ወደስራ መመለስ የሚፈልግ ደብዳቤ በማስገባት ስራ መጀመር እንደሚችልና የአንድ ወር ደመወዝም እንደሚከፈለው ገልጸዋል።

ሌሎች ቀሪ ክፍያዎችን በተመለከተ ወደፊት ለመክፈል መታቀዱን የገለጹት ኃላፊው ይህም ጉዳይ በክልልና በከተማ አስተዳደሩ የተያዘ መሆኑን ገልጸዋል።

ከዚህ ቀደምም የዚህ ሆስፒታል የጤና ባለሙያዎች እና ሰራተኞች ከደመወዝ እና ከጥቅማጥቅም ጋር በተያያዘ እየደረሰባቸው ስላለው ችግር ማሳወቃቸው አይዘነጋም።

#TikvahEthiopiaFamilyHW

@tikvahethiopia