تلاوة من سورة الرعد 🤍🌿

#الاثنين
#تلاوة
#سلعة_الله_غالية 🌹

حديث ودّي نبيّن فيه الأحكام ونتكلم شوية عن موضوع المولد ؟!

رايكم شنو 👀


بسم الله

نحن مسلمين
ديانتنا الإسلام .. اللي هي الاستسلام والتسليم لله وحده (في كل الأوامر والنواهي والأحكام بدون استثناء)

ودا مبدأ لو رسخ في أذهاننا ح يسهل علينا تطبيق الشريعة بصورة صحيحة بإذن الله

﴿إِنَّما كانَ قَولَ المُؤمِنينَ إِذا دُعوا إِلَى اللَّهِ وَرَسولِهِ لِيَحكُمَ بَينَهُم أَن يَقولوا سَمِعنا وَأَطَعنا وَأُولئِكَ هُمُ المُفلِحونَ﴾ [النور: ٥١]

دا المفروض يكون مبدأ تعاملنا مع كل شي في الدين ..
ربنا أمر؟ سمعنا وأطعنا
الرسول ﷺ أمر؟ سمعنا وأطعنا
نهوا عن شي؟ سمعنا وأطعنا برضو

طيب سمعنا وأطعنا دي بتكون كيف؟

هل لما تسمعي حكم وتقعدي تغالطي
وتشترطي على الله سبحانه وتعالى انه يقنعك بحكمه دا "سبحانه تعالى عن ذلك"
هل انت كدا سمعت وأطعتِ؟؟ 👀
عشان نعرف الإجابة ح احكي حاجات بسيطة وفيها الإجابة بصورة واضحة

الخمر كانت ما اتحرمت كليًّا في الإسلام لسة ، لأنه بعض الأحكام نزلت بالتدريج
الناس كانوا في جاهلية شديدة وكانوا متعصبين جدًّا
لذلك من حكمة الله سبحانه وتعالى انه بعض الأحكام تنزل كدا

أنس بن مالك رضي الله عنه بحكي عن الموقف اللي نزل فيه تحريم الخمر
قال في معنى حديثه انه هو كان بسقي في جماعة الخمر في بيت أبو طلحة رضي الله عنه

فسمعوا صوت زول بنادي
طلع أنس رضي الله عنه يسمع
فسمعه بقول : ألا إن الخمر قدر حرمت !
عملوا شنو؟
قالوا لالا خلونا نمشي للرسول ﷺ نتأكد أول؟
قالوا نحن ما مقتنعين؟
قالوا طيب خلونا شوية بس نكمل على الأقل الفي يدنا دي؟

حاشاهم رضي الله عنهم أجمعين

كان مبدأهم مبدأ المؤمن الحق ! ♥️

طوالي أبو طلحة أمر أنس بن مالك رضي الله عنهم
انه يكشح الخمر !!
متخيلين !

تكوني بتشربي في أمتع شراب عندك
(والوقت داك مافي خيارات كتير .. ياهو الخمر واللبن ديل أحسن حاجة)
ويجيك مبلغ من عند الرسول ﷺ يأمرك بالتوقف عن شربها للأبد !!

فذكر أَنَسٌ رَضِيَ اللهُ عنه أنَّ الخَمرَ سالت في سِكَك وطُرُق المدينةِ؛ من شِدَّةِ امتِثالِ النَّاسِ لأمرِ اللهِ سُبحانَه ورَسولِه صلَّى اللهُ عليه وسلَّم 🤍

ختي نفسك في الموقف دا وقيسي إيمانك
هل فعلًا كنت ح تعملي كدا ؟؟ 👀


موقف تاني ..

عائشة رضي الله عنها بنحكي عن نساء الأنصار لما نزلت عليهم آية الحجاب (وليضربن بخمرهن على جيوبهن)
قالت : شققن مروطهن فاختمرن بها

مقصود بيها الإزار
يعني اي واحدة منهم
قطعت قطعة من إزارها
وغطت بيه رأسها ووجهها وما أمر الله به أن يستر

لاحظوا انه الناس ديل ما كان عندهم تعري زي هسي
يعني اصلا كان لبسهم بستر جوء كبير من الجسد

لكن لما نزلت الآية وسمعوها عملوا شنو؟
هل قالوا لبسنا ساتر كفاية؟
هل قالوا الإيمان في القلب ونحن نيتنا بيضاء؟
هل قالوا نعيش شبابنا وبعدين نلبس؟
هل قالوا اي حجة اصلا؟

حاشا وكلا

كان ردهم : سمعنا وأطعنا ♥️

نقطة مهمة برضو
الفقر الوقت داك كان في الغالبية

طيب هل كان حجة ليهم؟
قالوا لمن ربنا يرزقنا مال نمشي نشتري ثياب نستتر بيها زي ما أمرنا؟؟

لا ؛ قالت : شققن مروطهن 🤍
قادرين تتخيلوا لياتو درجة الناس ديل كانوا بمتثلوا سريع لأوامر ربنا وما بماطلوا في الاستجابة !!

طيب نقطة أخيرة في موضوع الاستجابة والامتثال دا ..

ربنا قال

﴿وَيَقولونَ آمَنّا بِاللَّهِ وَبِالرَّسولِ وَأَطَعنا ثُمَّ يَتَوَلّى فَريقٌ مِنهُم مِن بَعدِ ذلِكَ وَما أُولئِكَ بِالمُؤمِنينَ۝وَإِذا دُعوا إِلَى اللَّهِ وَرَسولِهِ لِيَحكُمَ بَينَهُم إِذا فَريقٌ مِنهُم مُعرِضونَ۝وَإِن يَكُن لَهُمُ الحَقُّ يَأتوا إِلَيهِ مُذعِنينَ۝أَفي قُلوبِهِم مَرَضٌ أَمِ ارتابوا أَم يَخافونَ أَن يَحيفَ اللَّهُ عَلَيهِم وَرَسولُهُ بَل أُولئِكَ هُمُ الظّالِمونَ﴾ [النور: ٤٧-٥٠]

الآيات واضحة صح؟ 👀

علامة من علامات النفاق كونك تماطلي في تنفيذ الأحكام
وعلامة من علامات النفاق انك تستجيبي للأحكام حسب هواك .. لو نفع معاك تعملي ولو ما نفع تقعدي تفتشي في الحجج
دا ما بقدر عليه ، ودا بالنية ، ودا بعدين ، ودا ما بعرف شنو ... الخ

انت مؤمنة

ما ليك إلا : سمعت وأطعت ♥️

والعاقبة شنو ؟!

﴿وَمَن يُطِعِ اللَّهَ وَرَسولَهُ وَيَخشَ اللَّهَ وَيَتَّقهِ فَأُولئِكَ هُمُ الفائِزونَ﴾ [النور: ٥٢] ♥️

➖➖➖➖➖

نتكلم في قسم تاني

وبعدين نوضح علاقة الكلام دا بموضوع الاحتفال بالمولد ..

البدعة

الناس عمومًا بقوا عندهم نفور من الكلمة
الواحد لما تقول ليه بدعة يقول ليك بالله انت تبع الجماعة ديك 👀

فعايزين نعرف بدعة يعني شنو اصلا

المبدأ انه "العبادات توقيفية"

يعني مافي عبادة بدون وجود دليل شرعي صحيح عليها

"الأصل في العبادات الحظر والمنع ، فلا يجوز لأحد أن يتعبد لله بشيء لم يشرعه الله : إما في كتابه أو في سنة رسوله صلى الله عليه وسلم ، ومتى شك الإنسان في شيء من الأعمال هل هو عبادة أو لا فالأصل أنه ليس بعبادة حتى يقوم دليل على أنه عبادة" ابن عثيمين

يبقى اي عبادة في الدنيا
هي ما صحيحة مالم يثبت عليها دليل

وبرضو ..
كيفية أداء العبادة
وقتها ، عددها ، مكانها ، زمنها
الخ

دي كلها لابد من وجود دليل صحيح عليها
وإلا فهي بدعة

الدليل شنو على الكلام دا؟
قال ﷺ { من أحدث في أمرنا هذا ما ليس منه فهو ردّ }

يقول الله عز وجل { اليوم أكملت لكن دينكم وأتممت عليكم نعمتي ورضيت لكم الإسلام دينًا }

ويقول الرسول ﷺ { ما بقي شيء يقرب من الجنة ويباعد من النار إلا وقد بين لكم }

الكلام دا معناه شنو

معناه الزول البجيب عبادة من راسه .. أو يغير في عبادة موجودة
بغير دليل شرعي صحيح

دا واحد من اثنين

إما هو ما مقتنع بالآية السابقة 👆🏻
وفي الحالة دي .. دا كفر صريح ، لأنه جحد بآية من القرآن ..

أو هو ما مصدق انه الرسول ﷺ وصل لينا الرسالة كاملة

ودا برضو كفر بإرساله ﷺ
يعني في الحالتين موضوع مستعصي 👀💔

طيب مرات بقولوا انه الزول دا عمل الحاجة دي وهو نيته خير

يا حبيبتي أصلا البدع دي غالبًا لما تتعمل نيتها خير
يعني الزول لما يذكر ربنا في وقت معين بعدد معين وبطريقة معينة (ويكون مافي دليل على عمله) هل هو نيته شر؟
لا، هو نيته انه يقرب من ربنا

لكن القاعدة انه
النية الصالحة لا تصلح العمل الفاسد

يبقى نيتك ما ح تشفع ليك لو كان عملك غير موجود في الشريعة

اتفقنا على النقطة دي خلاص صح ؟! 🫱🏻‍🫲🏻👀♥️

➖➖➖➖➖

طيب علاقة النقطتين ديل بموضوع الاحتفال بالمولد شنو ؟! 👀

كلمة العيد جاية من الإعادة

يعني حاجة بتتكرر بصورة دورية ومنتظمة

والعيد أمر شرعي ، شرعه لينا ربنا سبحانه وتعالى

طيب الأعياد الشرعها لينا شنو؟

عيدين
الفطر والأضحى ♥️
بس؟
ايوة نعم

طيب وعيد الميلاد؟ ورأس السنة؟ واليوم الوطني؟ والذكرى السنوية للزواج؟ والمولد؟

زي ما اتفقنا قبيل 👀

أي عبادة نرجع نشوف هل في عليها دليل ولا لا
طيب هل في دليل على كل الأعياد دي؟

مافي أكيد ")
يبقى شنو
الاحتفال بيها لا يجوز

وبس نسأل سؤال بسيط جدًّا

قبل كدا حصل سمعنا بالرسول ﷺ أو الصحابة رضي الله عنهم أو التابعين ... الخ
احتفل بواحد من الأعياد دي؟ 👀

حصل ؟!

طيب نحن جِبنا الكلام دا من وين ؟!
بدعة = ابتداع واختراع


طيب هسي أنا عرفت انه المولد بدعة ولا يجوز الاحتفال بيه

لكن نحن بنعمله عادة ساي وما قصدنا انه نبتدع في الدين

قبييييل قلنا شنو ؟! 👀

*النية الصالحة لا تصلح العمل الفاسد* 🫱🏻‍🫲🏻
المولد يُعتبر عيد لأنه بتعاد كل سنة بصورة دورية .. ونحن اتفقنا انه أي عيد غير العيدين فهو ما صحيح وما يجوز الاحتفال بيه ..

➖➖➖

نرجع نقول تاني
﴿إِنَّما كانَ قَولَ المُؤمِنينَ إِذا دُعوا إِلَى اللَّهِ وَرَسولِهِ لِيَحكُمَ بَينَهُم أَن يَقولوا سَمِعنا وَأَطَعنا وَأُولئِكَ هُمُ المُفلِحونَ﴾ ♥️
دليل إيمانك انك لما تعرفي الحق تتبعيه بدون جدال
ما ضروري تقتنعي ولا ضروري الكلام يبقى على هواك
مش في عليه دليل شرعي؟ مش الدليل صحيح؟
معناها شنو؟ = سمعنا وأطعنا ♥️

يا جماعة أصلًا حلاوة الإيمان في انك تسلّمي لله في كل صغيرة وكبيرة

لو أنا قعدت أجادل في الحكم دا
وأنقص في دا
وأزيد في دا
وأعترض على دا

أنا كيف أكون عبد لله؟؟

ياخ ولدك وبنتك لو جادلوك في أمر ساي ضغطك برتفع

لله المثل الأعلى
كيف بنقدر نقوي عيننا ونحاجج الله ةنسأله ليه كتب علينا كدا

سبحانه وتعالى حليم علينا ♥️
لو ما كدا كان بي سوءنا دا بقينا في حال تاني من زمان .. 💔

➖➖➖
نقطة أخيرة ان شاء الله ..

حاليًا اتفقنا على انه الاحتفال بالمولد بدعة
حاليًا حتى الاحتفال نفسه بقى جواه بدع كتيرة تانية ") 💔

زي ذكر الله بأذكار ما ورد في الدين (الطريقة والأعداد والألفاظ)
والرقص والدق على الطبول

وبقى في معاصي كمان
موسيقى وغناء 💔
اختلاط وتبرج 💔

والطامة الكبرى
حاجات شركية كتيييرة
أقرب وأكتر واحدة بتحصل منها
التبرّك بالشيوخ ، الحضرة ، دعاء الشيوخ .. الخ


أنا قلت نقطة أخيرة صح؟ 👀
بس اتذكرت شي مهم لازم أقوله ^^

أهل السيرة والتاريخ اختلفوا في تحديد يوم مولد الرسول ﷺ
وفي أقوال كتيرة جدًّا (ارجعوا لموقع الإسلاك سؤال وجواب اقروها)
فعلى أي أساس نحن حددنا يوم ١٢ للاحتفال السنوي 👀
هل بقينا شاطرين اكتر من العلماء ديل؟

الصحيح الثابت عند الجمهور انه يوم ١٢ ربيع دا
هو يوم وفاته ﷺ 💔

فبياتو منطق نحن بنحتفل -إن كان الاحتفال صحيح أصلًا- في يوم أليم زي دا 💔

يوم متأكدين انه نحن فقدناه فيه 💔
وما عارفين هل هو اتولد فيه ولا لا !

آجارنا الله في فقداننا أعظم نعمة ، رسولنا ﷺ 💧

تقريبًا والله أعلم كدا قلت كل الكلام العايزة أقوله

فلو واحدة لسة عندها حاجة عايزة تقولها سواء نقطة نسيتها أو نقطة ما وقعت ليها ترسل 🌸🫱🏻‍🫲🏻

الله يعيننا جميعًا على امتثال أوامره واجتناب نواهيه ويرزقنا التسليم التام له ♥️

المولد النبوي
شيخ محمد سيد حاج رحمه الله

"وصبرًا فالأماني مُقبلات
تكادُ تكون عن قرب تكادُ". 🤍

#أذكار_الصباح

تُعلن مقرأة سُدم عن وجود مقاعد شاغرة لطلاب -الذكور- في مسار الحفظ الحر لعام ١٤٤٦هـ
" المقاعد محدودة "


رابط التسجيل :✨
https://docs.google.com/forms/d/e/1FAIpQLSdYFibsd_G5lrdXHortm9VUG7ipHbsW-w67wM-SIOdFi4W2eA/viewform?usp=send_form

سُنّة مهجورة! 🌸

#الثلاثاء
#إحياء_سنة
#سلعة_الله_غالية 🌹

خاتمات شندي

قرّاءَنا جُزيتمُ
فضلًا وأجرًا سرمدا 🌸🍃💦

#الأربعاء
#نشيد
#سلعة_الله_غالية 🌹

عليك بتقوى الله إن كنت غافلًا
يأتيك بالأرزاق من حيث لا تدري

فكيف تخاف الفقر والله رازق
فقد رزق الطير والحوت في البحر

ومن ظن أن الرزق يأتي بقوة
ما أكل العصفور شيئاً مع النسر 🤍

اسم الله الرازق الرزاق 🤍

على سيرة المقاطع والمحاضرات ..

بتذكر زمان كنت بكره السماع شديد وبملّ منه
مستعدة أعمل اي نشاط بس سماع المحاضرات والدروس لا !

فمرة واحدة صحبتي اقترحت علي سلسلة دروس اسمعها ، لقيتها طويلة وكل حلقة أطول من الثانية :")

جيت سألتها سمعتيهم كيف؟ ما بقدر اسمع دا كله

قالت لي حتى أنا ما كنت بقدر ، لكن اتعودت من سماع تسجيلات مادة الجراحة (كانت طويلة) وبقيت بقدر أسمع عادي -اللهم بارك-

فكرت في كلامها ولقيت انه فعلًا نحن مستعدين نقعد في محاضرات الكلية (مهما كانت مملة وصعبة) عادي ٣ ساعات وكم محاضرة في اليوم ، وكم يوم في الأسبوع
يعني الحصيلة في الأسبوع عادي جدًّا بتكون ٢٤ ساعة كاملة !

لكن نجي نقول نسمع درس عن التوحيد ، عن أسماء الله الحسنى ، عن سيرة الرسول ﷺ وأصحابه ... الخ
الدرس مدته كم؟
ساعة واحدة

ساعة!! ليه ساعة كاملة؟؟
نحن ما عندنا زمن نسمع دا كله !!
حاصل ولا ما حاصل؟ 👀💔

ومستعدين نقعد في جَبَنة ساعتين واكتر عادي
مستعدين نلف في السوق برجولنا ٣ ساعات
نمسك التلفون ٥ ٦ ساعات

بس درس زي ديل نستفيد منه؟ لالالالا ما عندنا زمن ! 💔

كمقترح ..
ممكن نعامل الدروس والدورات دي زي الجامعة
مثلًا تعملي قروب انت وصحباتك يكون معاكم مشرفة حازمة ، ويكون في عقاب ويكون في حوافز
ونقسم الدروس ونعمل جداول مرتبة ، مثلًا السلسلة دي ح نخلصها في شهر ، ويكون في جدول ماشين عليه ، وهكذا

زمنك في المواصلات ، في النظافة ، في المطبخ ، قبل ما تنومي ، دي كلها ساعات ممكن تسمعي فيها وتستفيدي منها

وقبل دا كله ، المسألة توفيق محض من الله عز وجل 🤍

الله يصلح قلوبنا ويجعلها خصبة للعلم النافع ويوفقنا فيه 🤍.

قال ﷺ:
{إنّما العلمُ بالتعلّم}


وقال الشافعي:

بقدر الكدِّ تكتسب المعالي
ومن طلب العلا سهِر الليالي

تروم العز ثم تنام ليلًا
يغوص البحر من طلبَ اللآلي

ومن رام العُلا من غير كدِّ
أضاع العمر في طلبِ المُحالِ

 

‏"وما يزالُ عبدي يتقرّب إليّ بالنوافل، حتى أُحِبَّهُ".

تخيلي أن يحبّك الله !! 🤍

#صيام_الخميس 🌸

السلام عليكم ورحمة الله وبركاته 💞

تُعلن مقرأة سدم عن افتتاح تسجيل الطالبات في مسار اتقان ( تصحيح التلاوة ) 🔆


"العدد محدود "

الرابط في الاسفل

https://docs.google.com/forms/d/1WsGrRX7tMKIEiIKfZl-Tb6-EfnOOnjsoi2JKTkqrD4I/edit

‏«مهما يطولُ بنا الظلام فإنهُ
يُجلى بأنوارِ الصباح ويُهزمُ»🤍.

#أذكار_الصباح

(فَعَسَىٰ أَنْ تَكْرَهُوا شَيْئًا وَيَجْعَلَ اللَّهُ فِيهِ خَيْرًا كَثِيرًا)


ليس خيراً واحداً ، بل خيراً كثيراً
ابتسم في وجه البلاء فربّما حمل لك العطاء .. وقل الحمد لله.


#الخميس
#ليدبروا_آياته
#سلعة_الله_غالية 🌹

السلام عليكم ورحمة الله وبركاته
بسم الله الرحمن الرحيم
نبدأ مستعينين بالله متوكلين عليه
لأول مرة في المشروع
دورة لحفظ الأجزاء 10 الأولى من القرآن الكريم
برواية حفص عن عاصم
للإنضمام للدورة
الدخول على الرابط التالي:
https://chat.whatsapp.com/CV6e2UBm2d85jUy0oxCDFj

السلام عليكم ورحمة الله وبركاته

حبيباتي الغاليات .. جميع الدورات "الاون لاين" هنا أنقلها لكنّ للفائدة لا أكثر
فليس عندي معلومات ولا تفاصيل غير المرفقة مع الإعلان 🌿

فأستسمحكنّ عذرًا لا أستطيع الرد على جميع الرسائل في الخاص.

⭕التسجيل في الدورات يكون فقط على الروابط المرفقة
لا أستطيع إضافة أي واحدة ، خصوصًا بعد اكتمال العدد.