"لطافة الصورة جـبرتني أكتب"

سألتني : شو صافن ؟
گلتلها عينچ ترا تجبـرني ما أنفعل
بيها هدوء الصبـح
و بيها صِياح الحِلم

و آني إذا اتقشمرت
يعني إذا ابتعد ، او فرضاً اتقربت
بثنينهم أنكتـل

گالتلي : لا تنفعل
بس خلي بالك لأن
بيدك جگارة طفت ، و انتَ ولا دخّنت

گلتلها : آني اشتعل ..

- منتظر هـادي

توضيـت يمّ السما
و صلّيت بـجروفك

و تيهت كِل التُـرب يمّ بوسة چفوفك

إتمردت ع اللغة
و ضليت أحبّن شكو أخطاء بـ حروفك

گالولي باچر تجي
و ضليت حاير شَهر
شـلبس إذا شوفك

- منتظر هـادي

١٢:٠١ يوم جميل على أرواحكم .. 🤍

واگفلك بگدما طيـحت دمعي
و داعيلك بگدما لـمي ما أدعي

و أنتَ العلمتني الخوف
يَل خليت

"ضلعي يـخاف من ضلعي"

- منتظر هـادي..

سنة ٢٠١٦ انولد عندي شغف و حُب
للموسيقى ، و أغلب وقتي و بكل
حالاتي اسمع موسيقى و استمتع
لكن عمري ما عشت اجواء ولا
تعلقت بـمقطوعة مثل الي رح
تسمعوها ، ادمنتها لدرجة انهُ
هالموسيقى تجبرني أفكّر و أنسى
و أحزن و أقلق و اعيش أكثر من
حالة بنفس الدقيقة

"و عن بحث دام لأكثر من يومين"

استمتعوا .. 🤍

كل يومين ؛ القناة يدخل الها أكثر من 50 شخص جديد ، و يغادر منها نفس العدد تقريباً..

و بنفس الوقت هوايَ رسائل على السايت ، انهُ ليش مختفي و ما تنشر معقولة ما كاتب غير هذولي ..؟

عموماً رح أسولف الكم و أتمنى توصل الكم الفكرة و يكون السبب مقنع ..

كل اسبوع يلاّ انشر بيت او مقطوعة و الأغلب انشرهم و احذف ، و قلة النشر هي بسبب إهمالي للقناة او انشغالي لأن أغلب وقتي يأما أدرس او بعيد عن النت و التواصل ..

مرّات بنفسي انهُ انشر بشكل مستمر مثلاً بين يوم و يوم ، و أنزّل التصاميم الي توصل الي على السايت ، او أوجه المنشورات الي بإسمي بقنوات الناس ..

بس هنا صدگوني لأن احترم تواجدكم ما أوجه او كل شيء اخليه للنشر ، احب تكون القناة خاصة بـمنشوراتي و بمحتوى لائق و بعيد عن التكرار و محتوى مختلف

لأن الأغلب تكون مادتهم مُكرره و ما تستحق النشر "الشخص الي ناشرها أساساً ما مقتنع" و انا من النوع الي يخلي حركة للأحرف يلاّ يكتب ..

فـقلة النشر مو دليل على انهُ مادتي محدودة بالعكس ، و على سبيل الدليل مهند حمود يگول "سرّ الألق بالندرة مو بالكثرة" وصلت الفكرة تقريباً ؟

لذلك اولاً جداً أعتز و أفرح بإهتمامكم بدلاً عنّي ، و افتقادكم الي ..

ثانياً الي يحب يبقى بالقناة رغم عدم الفائدة بهذه الفترة ، أتشرف و أعتز بـتواجده ، و الي ما عاجبه يگدر يغادر بـضغطة زر و اعتبر تواجده سابقاً إضافة چبيرة الي و نورني ..

ثالثاً و أخيراً ؛ اوعدكم الفترة القادمة ابتداءاً من بعد يومين او أكثر ، رح أتواجد و انشر بشكل مستمر و ضام الكم فـيديوهات رح تحبوها ، و وعد ثاني بخلال فترة قليلة تشوفون ضعف الرقم الي موجود اسفل اسم القناة بسبب نشري و اهتمامي لـتواجدكم ..

و آخر شيء بعيداً عن موضوعي ؛ خلوا بـبالكم مهما يعلى قدر الشخص بالتالي هو "إنسان" حاله من حال أي احد

و كلمة للناس الي وكفوا ضدي بيوم من الأيام ؛ الحقيقي ما يطفى حتى إذا جمعت له عتمة العراق ما رح تگدر تعدم وجوده بيوم من الأيام ، و الجميل بالموضوع انهُ إذا وصلت متأخر فـأنت وصلت ، اكو غيرك وصل بظرف أشهر للمكان الي يريده لكن بنفس السنة إختفى لأنه مو حقيقي ، وما أحب أن أنتمي للموجة لأنها تموت يمتى ما رادت الريح ان تهدأ ، و حالياً الريح هي الناس ..🤍

لحّد يشوف روحه على أحد
كل إحنا مصيرنا الفناء ..

و عشرة آلاف شكراً لـتواجدكم ..🤍