لية أنا ما ناجح زيهم ؟!
( حوار مع نفسي)

🔴 | هدفي شنو في الحياة وهل أنا ساعي لتحقيقه ولا مكتفي بالتمنيات ؟

في لحظة ما عرفت إني الوحيد الضيعت مستقبلي ، وماينفع أرمي اللوم علي إدارة الجامعه ، الثورة أو جائحة ڪورونا.
دخلت الفيس و لقيت ڪم منشور لزملاء دراسة من المراحل المختلفة...
حسيت بالضيق الشديد و قلبي وجعني و ندمت جداً علي ڪل اللحظات الضيعتها في مواضيع تافهه جداً ما قدمتني خطوة لهدفي ، إتضايقت لڪني أبدا حسدتهم والله .

انا ڪمحمد واضح لي اهداف و أبداً هي ما صعبة ومحتاجة شوية إجتهاد و عزيمة بس أنا ما ساعي عشان احققها و ماعايز أطلع من النمطية الانا عايشها ، مڪتفي بڪلامي و تفڪيري المفرط فيها ، و السيء مرات بحس إني فعلا إنجزتها لاني بڪون وصلت هدفي و بقيت شخصية ناجحة و عملت و عملت وڪل دا بالتفڪير 😐 فبتڪاسل إني أسعي في ارض الواقع 💔💔💔.

والله أهدافي ما صعبة لڪن بالنسبة لوضعي محتاجة مني شوية أجتهاد و ضغطة و تضحية و التفڪير خارج الصندوق ..

قارنت نفسي باصحاب المنشورات و النجاح المبهر الوصلوا ليه و اغلبهم إغتربو طبعاً فسألت نفسي:-
يا ابو حميد 💕 الفرد وصلوا للمرحلة دي و هم ڪأنو معاك في نفس البلد و عايشين نفس الوضع و ظروفهم قد تڪون اسواء من ظروفك بس هم نجحوا وأنت لا ليه ؟
( نفسي إستنڪرت أسئلتي و قالت اتهمتها زوراً وبهتان😂😂)
و أضفت طيب لية ما قدرت تنجز ولو القليل زي ماهم أنجزوا ؟


يا نظر عيني💕 (أبو حميد) : خجلتا يااخ 🙈😂
أصحابك ديل عرفو دورهم شنو في الحياة دي و خلوا ڪل شيء وراهم و فضلوا المستقبل عن المتعة و الرمتلة و الصياعة اللحظية ... إلا إنت يا غبي ڪنت تائهة و ضايع ، عايش ليك في وهم ڪدة غريب و ما كنت بتسمع ڪلامي😒🙂
وهسي جاي تتبجح و تسألني بعد جلحاتك وصلت في نص راسك وڪأني الملام😤.

أبو حميد 💕 ما عيب أبد والله إنك عدت لصوابك في وقت متأخر ، حتي لو ضيعت سنين من عمرك عايزاك تستشعر معيه ربنا سبحانه وتعالى في الابتلاء دا لانو بطبيعة الحال المؤمن مُبتلي و بالصبر علي الإبتلاء ربنا بيجزية خير .

مهما ڪانت الأسباب و الظروف الإنت شايفه أخرت في انجازك المبهر ما ترڪز معاها بل حاول اتمسك بحلمك و إبدع فيهو و عليك الله يا أبو حميد ما تجلد نفسك بالمقارنات و تلوم نفسك و تأنب ضميرك علي السنين الضاعت 💔😭.
حالياً نحن نقعد مع بعض نعيد ونرتب جدول خططنا و ما نتقاعس ، ومهما حصل نحن لازم نستمر حتي نحقق الأهداف الوضعناها دي سواء فشلنا أو نجحنا نحن حنستمر حتي نوصل لي هدفنا المطلق 🏆💪🏽.

💢ملاحظة عليك الله تاني ما تختني في موقف محرج مع الأعضاء ، ردت عليك هسي لڪني تاني والله اسفهك الا تجيني راڪع يا ڪلب🙂

أنا: أنا آسف 👈🏼👉🏼 و شكراً جزيلاً يا نفسي الرهيبة 😘😂


#يومياتي..
#بطيخة 🍉

في فترة ما ڪنت مقتنع جداً عشان انجح في اي مشروع او فڪرة لازم اخطط ليه ، أضع أهداف و اعمل دراسه جدوى و ڪدة ..

لڪن في عمري العامر -ربنا يبارك لي فيه يا رب- اي مشروع عملته اتبعت نفس النهج ( عملت اهداف ، خططات و دراسة وبتاع) ، بس الصراحه أغلب الافڪار و المشاريع دي فشلت تماماً ..

من جانب تاني لاحظت إني لما أعمل أو أبدا شيء بإسترجال و دون تخطيط مسبق بنجح معاي نجاح مبهر ، و الله العظيم

ودا برجعني لقاعدة استنتجتها ( أنه الشخص بعتقد أنه حيفشل في انجاح اي مشروع طالما دي تجربته الاولي ، وعلي العڪس لما ندخل في أي شيء جديد بڪون جوانا شغف و دافع إننا نتحدي نفسنا و ننجح العمل البديناهو دا و نطلع من الصورة النمطية المتوقعه إننا حنفشل )

فموضوع إني أبدا شغل دون تخطط و اهداف نجح معاي في مشروعين أو (عملين) للان
#فالاول في يوم ڪنت سايق رڪشة صحبي مودي بيها المشتشفي ،فبعد وصلنا ونزلته جاني شخص وطلبني مشوار فاوديته .
ودي ڪانت بداية شغلي في الرڪشة الاستمر 8 سنوات علي التوالي 🔥..
وفي الفترة دي انجزت الڪتير من خلال شغلي ، و أهم إنجاز إني قدرت ادعم نفسي مالياً لحدي ما خلصت الجامعة وخففت نفقاتي عن الوالد ..

#العمل الثاني هو عمل حديث و مستمر و هو فتح الدڪان ..

مر علي يوم في الدڪان وڪنت محبط و مضغوط جداً جداً ، فقعدت ضربت حساباتي و عملت جرد لشغلي و اتضح إني مطالب بديون قدرها 2 مليون و 700 الف جنيه سوداني ودا خلال أول شهرين من بداية شغلي🥶 ..

يعني انا فتحت الدڪان عشان يڪون لينا مصدر دخل في البيت لڪن انتهي بي الحال معبي ديون للحلق .

فا عملت شيء بسيط جداً ؛
• أولاً : حددت الناس العايزين مني ديون وهم 4 افراد ..
• ثانياً : حددت الاولوية للسداد حتڪون لمنو منهم ..
• ثالثاً : عاهدت مع نفسي أني ما اخلف و لا اتقاعس مهما ڪانت الضغوطات و الظروف الجاية 💪🏽 ..

و الهدف قررت أجمع مبلغ 50 ألف من شغل يوم الخميس و الجمعة و بعد صلاة الجمعة مباشر أسدد بيها ديوني ..
و وقتها 50 ألف ڪانت مبلغ ضخم حتي استقطعه من دڪان يادوبه ناشىء ..
المهم واصلت في هدفي دا و بديت قبل رمضان بجمعتين و بتوفيق من الله ما حصل أخلفت بيوم في السداد وإذا حصل واتخلفت بڪون السبب إني دفعت قبل الوقت المحدد 🔥..

واحد من الداعمين لي - ربي يجزيه عني ڪل الخير - بعد سلمني القروش قبل افتح دڪاني قالي بنوع من الحزم تسدد لي ڪل المبلغ قبل يوم 1 / 5 عشان القروش بدخل بيها موسم الزراعة ..
فا بتذڪر اخر يوم دفعت 100 ألف دفعه واحدة و قلت ليه دي آخر دفعتين و بڪدة إنت (مشڪور جداً علي دعمك المالي لي الفترة الماضية ، ولو ما إنت بعد ربنا ما ڪان وصلت الحال الانه فيه حالياً💓) ..

والجميل إنو خلصت سداد قبل 3 اسابيع من الوقت المحدد ..

ومن النقطة دي اتحول هدفي (ڪل ويڪند 50) لعادة اسبوعية .. والحمدلله بتوفيق من ربنا قدرت اسدد ڪل التزاماتي من ديون و امتلڪت الدڪان بڪل البضاعة✔️..


فا انا الحمد لله للان مستمر في العادة دي ،و بعد سداد الديون بقي عندي فايض من القروش و ما عارف اعمل بيها شنو حرفياً لأنو الدڪان مستقر ..
فابديت فڪرة إني ادخل القروش دي في مشاريع تانية ومن ضمنها بديت اصلح و ارمرم جزء من البيت علي قدر المبلغ البجمعة في ڪل جمعة ..
دا غير الصناديق الدخلتها و بدخل لڪن بشرط الصرفه الثانية حقتي ..
ولما استلما بستثمرها ، ولحدي الصندوق يخلص بڪون دفعت باقي قروش الصندوق من ارباح إستثمار الصرفه الاولي 😎 ..


بالمختصر بدل ما تقرر تضع اهداف لڪل مشروع ، اعمل ليك عادات يومية ، إسبوعية او حتي شهرية و إستمر عليه ..
تڪسب عادة جديدة تڪون إضافة ليك ولو بعد سنوات ولا تضع اهداف ووتفشل إنك تحققها خلال المدة المحددة ..

#MU_ALFATIH

20 يوم للعودة 🔥❤️

20 سنه من المتعة و التشويق ❤️

#Bleach ❤️

Cont.

ڪبرت و حاجات ڪتيره صغرت في تفڪيري... حاجات ڪنت صارف فيها معظم زمني و طاقتي العصبية و الزهنئية ..
ڪبرت و بقيت أڪتر حكمة ..
ڪبرت و ضحڪت علي نفسي زمان ..
ڪبرت و فهمت نفسي أڪتر ..

• أڪبر جريمة عملتها فى حق نفسي إنى مع مرور الوقت ڪُنت دائماً بقطع مِن روحى و بقدم للناس
ڪُنت دائماً بفضل الآخر عليّ ، لحد ما إستنفذت ڪل الفُرص.
حاولت أڪون آخر زول يڪسر الحنك
دائماً ڪان عندى أمل، أمل إنو في حاجة حتتغير.
أنا خسرت ڪل حاجة تقريباً ، الحُب ، الهدوء ، السلام ، الأصدقاء و ڪل حاجة .

• ‏نحن بنحب نوري الناس إننا متألمين وبنعاني عشان لفت الانتباة ، لما ڪل الناس تتعرف عن وجعنا حيبدو يطبطو علينا و بدورنا حنبدا نحس بالراحة.
بنشعر إنو نحن عندنا أهمية في الحياة الزائفة دي ..
المهم إنت مامحتاج لزول غريب محتاج تحڪي ليه عن صراعاتك و حروبك ..

إنت محتاج تنعل إبليس ، تتوضي و تصلي رڪعتين بنية الفرج وتشڪي فيها لربنا ڪل الأمور المستعصية عليك ..
إنت محتاج تستخير رب العباد و ليس العباد.

• ‏في مرحلة معينة لمن نصلها ، ببقى ما عندنا مشڪلة مع الناس ولا حتي بنديهم أهمية بقدر ما بڪون عندنا مشڪلة مع "نفسنا" وترتيبها . مشڪلة مع أحلامنا وطريقة تحقيقها
مشڪلة مع مسؤلياتنا إتجاه قرايتنا ، مستقبلنا ، مسؤوليتنا تجاه وقتنا وڪيف بنقضي
خسارة الناس ما أڪبر مخاوفنا في الحياة بقدر مخاوفنا من الحياة نفسها..

وذي ما ڪتبت قطوف مرة:-
" ما نفسي اتعرف تاني على زول ،ما نفسي اكون صداقات، عايزة انغلق على نفسي للابد ، ما عايزة اكون صديقة كويسة ، ما عايزة اكون بوزيتيف لي زول ، ما عايزة اكون سند وانا لي نفسي ما لاقية البسندني ، ما عايزة زول يسندني لانو اصلا هو ماف ، عالم انانية بطريقة وقحة ، ما عايزة امد يدي لي زول ، ما عايزة ابادر ، اي بحب نفسي اكتر من اي حاجة بس شوية الحب الموزعاهو لي ناس ما تسوى عايزة ارجعو لي وبس يعني💕"

• في النهاية
في مشوار حياتك ڪل ما أفڪارك إتغيرت و إتبدلت وبديت تتعلم من غلطك
ڪل ما الناس الماليها معنى في حياتك قلت منك أڪتر و أڪتر ..
العقل الواعي ما بحتمل اي مجاملات نهائي .

#مقتطفــات (جـ2)
#MU_ALFATIH 🍉

وتكتشف في نص المشوار إنك ما عارف هل إنت ماشي صح و لا دا كبرياء منك طالما بديت لازم تكمل للنهاية ..

سلام عليڪم ورحمة الله وبرڪاته

إنا لله و إنا إلية راجعون ..
إنتقلت إلى رحمه مولاها جدتي عمه والدي أثر عله مرضية ..

نسأل الله لها الرحمه و المغفرة و إن يجعلها مع الصديقن و الشهداء
و أطلب منڪم الدعاء لها و لسائر موتي المسلمين ..

أعظم تعويض ممكن يمنحه الله للإنسان،

أن يمدّه بالقدرة الكافية على البدء من جديد.

السر وراء صورة البروفايل شنو ؟

مجموعة من الشباب و الشابات رافعين علم السودان و متمسكين بيو بشدة ..
برغم سوء الادارة و الأوضاع الصعبة و الطاحنة في بلدنا إلا و إنو سودانا دا غالي علينا شديد ..
ونحن بإمكانا نغير السودان للأفضل لما نتكاتف مع بعض في سبيل إننا نطلع من الازمات الحاصلة دي بنفسنا دون طرف ثالث خارجي و نرضي بالواقع و أبدا ما نتسرع في إننا نلحق الدول الثانية ...
ما نبدا نقارن بلدنا بي البلدان الثاني لأنو الأوضاع مختلفة كلياً ..
ما يكون مجرد طموحنا إنو نلقي بيئة جاهزة عشان تحتضن طموحنا ، نحن البنصنع و البنخلق الجو المناسب لينا ..

و ذي ما نحن كنا دائما الاوائل و السباقين في الريادة ، مافي مانع إننا نرجع لمكانا الأول ..
كل فرد عارف مدي صعوبة البيئة هنا و إنها أبدا ما خصبة لبناء و تطوير المشاريع الشابة ، فا زي ما قلت سابقاً افكارنا هي حصاد أجيال المستقبل و بدل ما يستفيدو منها الأخرين نستفيد منها نحن بتمسكنا بيها و اخراجها لارض الواقع ..
ما تنتظر الزمن المناسب عشان تبدع ، اخلق البيئة الانت شايفها مناسبة لابداعك و أبدا من هسي و ما تنتظر باكر ...

لا أعلم لماذا قد يَحبس الناس الكلمات الجميلة في قلوبهم ، بينما لو نطقوها لأزهرت بساتين الورد في صدورهم و صدور أحبّتهم ♥️

"يموت البريدو ولا يموت البريدني"

لأنو البريدك بعمل أي شيء عشانك و انت قاعد عزيز مكرم ..
والبتريدو انت بتعمل أي شيء عشانو و عادي ممكن ما يعبرك زاتو ...

قصه حب ما حصلت في المسلسلات الهندية ..
قصه اغرب للخيال بين واحد بلدياتنا وملازم اول دكتورة في السلاح الطبي.

stay tuned

رجعت من صلاة المغرب و لقيت ولد عمر 10 سنوات ڪدا واقف في الدڪان قالي : "ما تخلي دڪانك فاتح و تطلع هسي لو سرقو منه حاجة "
حبيت أدي درس بسيط في الإيمان بالله (طبعاً عامل درابزين في الباب و الشباك 😂)
رديت : طلعت لصلاة المغرب
هو : برضو ما تخلي فاتح 😤
أنا : طيب إنت هسي لما تطلع من بيتڪم و أبوك يڪون قاعد بتخاف علي البيت يتسرق ؟!
رد بثقه "لالا"

طيب أنا لما مشيت الصلاة و اثق أنه ربنا موجود و ححيفظ لي دڪاني 😌 ..
هو : اممممممم و مشي

مافي طريقة واحده او مسار واحد عشان تڪون صح ! ..
التميز المهني ما مقرون بالكآبة و ما مقرون بالضغوطات والساعات المرهقة و بس ..
هو رحلة ڪاملة من المحاولات المستمرة من الرغبة بالاستمتاع بالتعلم ..
صححوا المفاهيم واسعوا بحب اسعوا لأن الله يرى سعيڪم ويبارڪه💗.

الحانوتــي

مهما ضاقت بيڪ الظروف اوعك تفڪر تفتح دڪان .. إياك ثم إياك تفتح دڪان ...
لما حبل أفڪارك ينتهي و ما تلقي غير فتح مشروع (الدڪان) .. خت في بالك حاجتين ؛ و الاثنين بسببهم عادي ممڪن تعلن إفلاسك بعد شهرين بس و احتمال أقل ..

الأولى أوع يڪون دڪان حله (حانوتي) ..
و الثانية يا تعاستك لو ڪان الدڪان في رڪن بيتڪم .. خلاص هنا إنت حڪمت علي نفسك بالمووت 🧟

اول حاجة قبل تبدأ مشروعڪ لازم  تعمل إجتماع مع لجنه الحله و تعلن في الجامع ، ايوة تعلن في الجامع إنك ما حتفتح ڪل الأيام
و الاوقات (24/7 ) 🥲 ..
لو ما فهمتهم ڪدا إنت حتڪون عملت "موافقة لاحڪام و شروط الحله التعسفية ✔️" دون ما تشعر ..
و من ضمن الشروط دي يا (الغالي) إنت ملزم ما تقفل ابوابك و تڪون فاتح السنه ڪلها و تقنع من حاجة اسمها (طلعات) سواء مع الفرد ، لصله الرحم او حتي للأفراح و الأحزان . مااف .. مااااااف طلعات 😤 ..
طبعاً الشرط دا حيڪون ساري لحدي تموت أو تجرد دڪانك وترحل من الحله 🚚 ..

• تاني حاجة إنت ملزم تشتري وتوفر في دڪانك اجود أنواع البضائع المحلية و المستوردة .. وطبعا المستهلك -اللهم ناس الحله- ما بعرفو ليك اشتريتها غالية أو رخيصة ، إشتريتها ڪاش أو بنڪك او (غل -بالدين ) ياخ حتي لو رهنت ليها ڪليتك للتجار أهم شيء عندهم وفرة الاصناف الهم عايزنها في مڪان واحد و بسعر مغري و موازي للسوق غير ڪدا دي مسؤوليتك انت ...
(ولو حلتڪم قريبة للسوق حتعاني من فرط المقارنات بين الأسعار ) ..
- لييييه في السوق بي ألف جنيه بس !!
- أصلو انت دڪاڪين الحله شغالين علي ڪيفڪم ..
ومرات بجيك الزول المتفلهم و يدفع ناقص لما تنادي يا زول قروشك ناقصه 🤨
الزبون : دا سعر الصنف ڪدا ، ما بديك أڪتر مما تستحق 🥰🥰 .. و يمشي يخلي خشمك ملح ملح 🤣

• و أهم شيء ، أهم شيء ما تنتظر ناس الحله يقوليك جيب الصنف الفلاني ، مفروض إنت تشتري قبل ما هم يفقدوة ..
- وانت ماشي في الشارع لازم تسترق النظر للدڪاڪين و تشوف تنوع الرفوف و الاصناف العندهم وإنت ماعندك و تحاول توفرها ..

• اقنع من حاجة اسمها قيلولة .. أيوة دا زمنك الشرعي لڪن لناس الحله دا زمن (مقدس ) دا زمن الجبنات و ضبط الڪيف 🙂‍↕️ ..
و لأنو نص النهار برسلو ليك الشفع و ديل بنسو المرسال و حتضطر تعرف هم عايزين شنو بمهاراتك الفردية 😑
• طبعا في أول ايامك الحلة ڪلها حتتظارف معاك و حتي البيتهم في آخر الحله وبيتهم فيه دڪان بجي بشتري منك و بفردك ..
حتسمع ڪلام مؤسس يرفع معنوياتك و ثناء علي تعاملك الراقي "أسعارك في المتناول ، عِبارك سمح ، بتوفر بضاعة نظيفة ..الخ"
وهنا دا فخ ..
لو بقيت بتتفصل و بتتضحك حتلقي نفسك إشتريت ليك دفتر ڪبير للديون و بعد شهرين ڪل الناس الڪانو برتادو علي الدڪان ما حتشوفهم بعينك و هنا ما حيڪون عندك حل غير تقنع من قروشك بس ..
• اعمل حسابك من جڪس الحله .. اعمل حسابك وفتح عينيڪ ڪويس 👀 ..
الوحدة بتتمادي معاك و تصلك معاك اي مرحله عشان بس تاخد منك شيء مجان أو تخفض ليها في السعر ..
بعد تعودك وانت ترخي ليها جسمك بتبدا مرحله المرتدات ، تاني بتقلع منك قلع ، بتجي تشيل اي حاجة عايزها و ما بتدفع و انت ما بڪون عندك عين تسألا ..
وفي البتجي و تستلطفڪ بڪلام و قصه حزينه و لو صدقت أو لا المهم طالما لقت منك ولو 💯 ما فارق معاها ..

• ونقطة مهمة لو دڪانك في البيت أوعك تعود ناس الحله انك تبيع ليهم بالباب الداخلي بتاع البيت ، لانهم ما حيريحوك نهائي ..
بتعاملو معاك ڪأنك ملزم تخدمهم و بنسو حاجة إسمها ذوق
أول حاجة ببدو بدق الباب و شوية ڪدا الواحد بجر السلك و بدخل توش ڪأنه داخل نادي ولا بيت أبوه 🙂 ..
و في النوع البجيك وبدقدق ليك انصاص الليل و قبل تفتح ببدا يناديك (فلان، يا فلان ) نظام دا أنا جارك فلان و طالما سمعت صوته تلقائيا بفتح ليه لأنو مافي زول بناديك الوقت لو ما محتاج 😑..

• اوعك ثم اوعك تعلم ناس البيت البيع أو تسعر ليهم الاصناف في الرفوف خصوصاً أبوك و امك .. طلع مشوار اقفل و شيل مفاتيحك 🔑 ..
(الحجاج) عاطفين و بقطعوا ليك الدڪان بحنيتهم الزائدة ..
تحرس منهم واحد ترجع يقوليك جاني عمك فلان اديتو (ڪيلو دقيق ، رطل زيت ، ظرف خميرة و ½ سكر ) ..
قبل ترد يضيف سجل الحاجات دي عندك و يحذرڪ عمك فلان دا  زول ڪبير و الأيام دي مافي شغل و مرتبات اتعامل معاهو ڪويس و بأدب وشايف ڪلامك معاها حار و مافي ٱحترام 😠 ..
و هو أبوك ماعارف انه -فلان دا - اڪبر 🐊 و زايق بدين قديم و ما عايز يدفعه ..
ارح تحرس أبوك من أمك ؛ ترجع من مشوارك بتلقاها دينت نسوان الحله و بعدا مضيفاهم جوة الدڪان وماخدين راحتم في عنقريبڪ 😂😂 ..
- وفي النوع البترصدك لحدي تطلع و بجي يطلس لناس البيت و يحلف ليهم أنه الصنف الفلاني سعرو ڪدا و إنك بتدي ليه بالسعر دا و في الحقيقة انت بتبيعه أغلي من ڪدا هو عارف 🙂 ..

ولو اتوڪلت وفتحت و ما شايف ڪلامي الفوق ما بشڪل ليك عقبة لازم تعمل بنصيحتي الأخيرة دي
- وڪل شافع من الحله يبقي عينك و اذنڪ في الحله ، و دا ما عايز مجهود ڪل يومين ثلاث اقطع فيه قطعة (ڪنافة أو ڪيس فول) يومي بجيك بخبر 🤣💌
-قالو دڪان (محمد خير الغرضي) وقية البن عندو ب 1200 و انت عندك بي 1000 ..
-أم حمودي قالت عِبارك سمح أحسن من دڪان ( حسين) ..
-ومرات النسوان زاتهن بجدعوا ليك خبر دون وعي
(زوجة ڪنترول) بترسليك ا اولاها وفي دڪان جنبها عشان انت بتوزن ليها و المسك و المحلب ..
وبرضو لما تعمل تخفيضات ما تڪلم الأهل أنه الصنف نزل ، ڪلم الشفع أول لانهم عشان باقي التخفيضات بشيلوها هم ودا تحفيز غير مباشرة وغير مضر بالأهل 😂😂😂 ...

الخلاصة لما تسمع في الحله انك زول ڪعب ، صعب أو تسمع مباشرة من الزبون (انت مالك زول ڪعب ڪدا ، هسي 💯 بتغنيڪ !!)
دي شهادة معتمدة إنك نجحت وبقيت حانوتي بدرجة الشرف 🤣🎓 و التجارة ما حتڪون ليك عقبة و بمڪانك تفتح دڪانك في أي مڪان وزمان داخل ربوع الوطن العزيز وسط اي مجتمع 👥 ..

العقبات دي استاندر في ڪل مڪان بس انت بإمڪانك تغيرها وتڪون لصالحك ..

و زي ما بقول المثل
(جوع سنه .. عِرا سنه .. و غني لي جنا الجنا ) 💸 ..

#MU_ALFATIH
#يوميات_تاجر

و بفضل الله و حمده أكملت 10 شهور في التجارة
ودمتم في أمان الله ❤️

"أن يُكتب في نهاية قصتنا أن السعي كان في الإتجاه الصائب، وأن العوض أنسانا ما فقدناه في الطريق، وأننا أخيرًا ولأول مرة شاهدنا تخيلات كل ليلة مُجسّدة أمامنا، نلمسها ونبتسم لا نخشي تبخّرها أو تحولها لسراب، وأن قلبنا صار بمأمن."

10 أشهر كانت كفيلة إنها تغيرني 360 درجة ..

لمن ڪنت في الخرطوم زي الوقت ده ڪان بتڪون وين ؟

عَلِّموا أولادَكُم العَقِيدة .. فإنَّها الآن تُنتَزِعُ!

لذة الإدمــان ( إدمان )

أيوة أنا أدمنت لعادة جديدة و عادة عظيمة ومفيدة جداً .

في قوله ( ﷺ ): " اقرأوا القرآن، فإنه يأتي شفيعاً لأصحابه يوم القيامة ".


الفترة الأخيرة دي الزمت و أخدت وعد مع نفسي ، حددت لنفسي إني يومياً أقرأ جزء من ( القران الڪريم ) بإنتظام بعد صلاة الصبح ، و يومياً قبل أنوم اقرأ ( سورة الملك و المعوزتين ) حتي بعدها بفضل أستغفر الله و بحمده الي إن أنوم و ڪتير بنوم وما بڪون حاسي أو إني نمت متين 💕 .
إنتظمت مدة أڪثر من شهر ( الحمدلله التوفيق من عند ربنا عز وجل ) ودي الفترة الڪنت مؤجز فيها ، لما نزلت الجامعة و جدولي إختلف و الفترة الصباحية بقت قصيرة وأنا ما عايز اخلف بوعدي مهما ڪان 😤🥲.
أول خطوة عملتها إني غيرت جدولي و بقيت أنوم أبدر بساعة و أصحي قبل الصبح بمدة ڪافية✨.
في المدة دي بتسوك و بتوضيء و بصلي رڪعتين وبفضل في ( المصلاية ) و ببدأ أقرا الجزء بتاعي ڪامل ، الفترة الصباحية الجو بڪون هادئ جداً و زهني بڪون صافي و بالي رايق فا بقرأ بتمعن وتدبر لدرجة إني مرات ما بقرأ أڪتر من صفحتين✨ ، بقيف في ڪل آية ما فهمتها و بطلع علي تفسيرها ومعاني المفردات ( مصحفي بحتوي علي التفسير والشرح 😁).
بفضل في ( مصلاياتي ) حتي قبل الإقامة بي 10 دقائق بقوم تاني بتني رڪعاتي حتي بمشي الجامع و هناك برضو بصلي رڪعتين تحية المسجد.
بعد الصلاة بعمل ( الباقيات الصالحات ) و طوالي برجع البيت و بجهز لمشاويري سواء للجامعة أو غيرها.
_
في يوم الجمعة وانا بڪوي عملت تشغيل عشوائي ( لسورة الڪهف ) في قناة سودانية بالتيليجرام فيها مجموعة من القراء ، اثناء ما بسمع إشتغلت بعض السور بصوت قاريء ما شاء الله تبارك الله .. صوته رهيب و هادئ وتلاوة خاشعة و تدخل الطمأنينة في النفس 💚، فا جاني فضول أعرف إسم القارئ ووقفت ڪل شئ و لما نزلت الستارة إتفاجأت بإسم أول مرة اشوفة ( همام تاج السر ) و ڪانت أول مرة اسمع فيها صوته وبعدها علقت 🙊😂🤍🤍.
فا رفعت الصوت لأعلي مستوي و عملت تڪرار للسورة الڪان بقرا فيها ( سورة يوسف ) ورخيت أضاني عشان إستمتع بحلاوة التلاوة العزبة دي ، أثناء إستماعي دخلت فيني راحه نفسيه ما طبيعية و حسيت بطمأنينة ما عادية و لا شعورياً حسيت بالسعادة وڪانوا ڪل الحمل الشايلة جواي انزاح بالإضافة لترڪيزي المطلق مع قصة سيدنا يوسف علية السلام 🤍🤍.
بعد خصلت شغلتي فتشت لسورة آخري لنفس القاريء (همام تاج السر) لڪن للاسف ما لقيت سور ڪاملة 💔.
لڪني إحتفظت بالمقاطع القصيرة اللقيتها و بقيت إسمعها بإستمرار في الشارع، المواصلات، وبسمعها لما أڪون مضايق لانها بطبطب علي قلبي و قبل النوم ڪمان و مرات دون سبب 💙💙 ..


⭕️ الخلاصــــــــــة

الخلاني اڪتب اليوميه دي سببين 😂❤️

الأول : شعور الراحة و الطمأنينة و السڪينة الوجدتها بإستماعي ( للقران الڪريم ) بشڪل منتظم ، و إني بتدبر في آياتة و معانية و بتعلم من الحِڪم و العبر والقصص المذڪورة فية❤️.
الثاني : إني قدرت أخد قرار إيجابي و ڪان لسة أثر محسوس في حياتي اليومية و الروحية وإني وصلت لقناعة إنو الإنسان هو البضع العقبات في طريقة و بصعبها علي نفسة بالمعتقدات الخاطئة و تجارب الأخرين الفاشلة.

و ما تقول انا عصيت و قصرت في حق ربنا سبحانه وتعالي و خجلان اقيف قدامة 🥺💔💔 ، إنت نسيت الايه دي : ( إن الله يحب التوابين ويحب المتطهرين ) ؟ يعني إنت مهما قصرت وارتڪبت من المعاصي ماتتڪبر وتقول ربنا ما بغفر لي لاني ڪررت المعصية دي اڪتر من مرة وظلمت الناس و غيرها ، ربنا بنفسو قال لينا انو نحن مهما عملنا من معاصي و ڪبار بس تبنا توبة خالصة و استغفرناه حيتوب علينا.

و نصيحتي لك ( ‏رجع المصحف في الشنطة ، و أقرا في المواصلات و أوقات الفراغ ، أقرا في الڪلية ، إستراحة العمل ، المستشفيات و اثناء الانتظار .

[ أروا الله من أنفسڪم خيراً . ولا تجعلوه أهون الناظرين إليكم..]
#MU_ALFATIH 🌺

في كل #العلاقات في مرحلة برود بتمر على طرف واحد أو على الإتنين بيحسوا معاها إنو ما عندهم شي لي بعض وإنو الإحساس بينهم تحت الصفر ومرات بالسالب كمان ، الفترة دي هي إمتحان حقيقي للناس لعقلهم و تفكيرهم ومقدرتهم على الإستمرار و إدارة علاقاتهم ، وهنا الحب بيقيف بالجمبة و بيعاين هم ح يسووا شنو عشان روحهم
في اللحظات دي بتبدأ تظهر عيوب زولك
وحتى الانت عارفها ح تبقى ليك ما محتملة
ح تشوف التانيين ظريفين و رهيبين
بل يكادوا يكونوا #مثاليين كمان وإنو نقصهم ده زاتو زي كأنو ميزة إضافية ليهم
الواعي في المرحلة دي ح يعرف إنو
المقارنة هنا ما عادلة لأنو تفاصيل الحاجات بتختلف والأوعى منو ما ح يحتاج يقارن من اساسو ، أما تعيس الحظ ف هو ال ح يجوط نفسو ويخلي تغييرات وظروف المرحلة دي تسوقو بدل ما هو يسوقها و يخليها ترتب بيهو روحها.