📝 گەڕانەوە

🖊: پەرەستوو ڕەحمانی (سایدا)


ڕۆژێ لێرە بڕۆین
دوور لە باوەشی بیرەوەرییەکان و
هەناسەی دەلاقەکان
بست، بستی ئەم شارە بپێوین
کۆڵانەکانی ترس و
هەنگاوەکانی مەرگ و
حەسرەتەکانی دوور؛ بە جێ بهێڵین.
لەم ڕێگایە
پێویستی نییە دەستم بگری
من؛ هێمای ڕازاوەی ئاشتیم
تۆ؛ تەنانەت بە دواما ڕێ بکەوە
ئەم بارمتەی زستانە و
تاراوگەی خەونستانە
کە دار و دیوار باوەش بە مەرگا دەکەن و
چرپەی تەنیایی ئاهەنگی ژیانە
بەجێ بهێڵین ...
٭٭٭
من؛ لێوی دەروازەکانی جیهانت بۆ دەکەمەوە
سنوورەکان هەڵدەوەشێنم و
کوێرایی گومانت لا‌دەبەم
تۆ؛ تەنانەت بە دواما ڕێ بکەوە
٭٭٭
لەم ڕێگایە مەترسە
هەموو قەڵاکانی درۆ
لە بەر پێت خاپوور دەبن،
ئەفسانەکان دەسڕێنەوە
ڕاستییەکان کڕنۆشت بۆ دەبەن
بەو شەرتەی عەشقم لە دڵتدا بێ و
باوەشت پڕ لە خۆشەویستیم
لەم ڕێگایە مەترسە؛
سێبەری هەردووکمان یەک پەیکەرە
لە گۆڕەپانی مان و نەماندا ...
٭٭٭
تۆ؛ لە شەڕی تایفەکان و
هێرشی وڵاتی دراوسێ و
هێروشیما و هەڵەبجە نامری
لە تەقینەوەی بۆمب و
ئاگر و لافاو نامری
مەرگی تۆ ئەو کاتەیە
لە دڵی مندا جێگات نەبێ و
چاوم بە دواتا نەفڕێ ...
٭٭٭
وەرە؛
من دەستی تۆ دەگرم
چرکەکان هاوپەیمانی منن لەم کاتەدا و
ڕێگای گەڕانەوە باش دەزانم ...
وەرە؛
من دەستی تۆ دەگرم
تا قامکی سارد و سڕی دوودڵی
ببێتە هەتاوی متمانە و
ڕێگای گەڕانەوە
ڕوونتر بکاتەوە


@Henaristani_Bedengi

📘
#ڕەهێڵەی_یاسا

ژنی وڵاتم
کاتی سەختە ڕەهێڵەی یاسا
لە مەرگی جەستە نەترسا
ڕۆحی خستە خەزا و
لە سەر ئەژنۆی،
"ژنانە" هەستا !
کۆچی کرد
بۆ جێژوانی ڕووبار و زەریا
ئەوینی خستە بناخەی دڵ و
بوو بە "چیا"
بوو بە "چیا" و
لە سەر هەموو سنوورەکان
ڕاوەستا
هەستی دا بە دەست
شەماڵ و شنەبا
بیری پڕ کرد لە لێزمەی،
بارانی بڕوا!
تا دەستی پێ نەگات
ئەوەی کە
ئامانجەکانی مەنع دەکات و
خۆی لە خۆی
دوور دەخات !

پ . ڕ (#سایدا)

@Henaristani_Bedengi

📘

#ڕەهستن*

هیچ دەزانی؟
لە ڕەهستنی هیواکانمان
کانی دزرا و
وەرز زوقم کرا
تا ئێمە قەت یەک نەبین!
لەشمان بوو بە یەخسیری
ڕەشەبای دژ
تا سەری پێناسەمان
لە بیابانی بێ‌چەمەک ون بێ!
ئاوات،
بوو بە زامی سەرجێ و
ئەشق،
لە خەونە ئاڵۆزەکان
دوایی بێ!
تا ئێمە قەت یەک نەبین!
ڕۆژانی دوور
گەیشتنە ئەمڕۆ
ئەوین گۆڕدرا !
دارستان سووتا !
پوازێک بوو بە باخەوان
تا ئێمە قەت یەک نەبین!

پ . ڕ (#سایدا)

*شین بوون

@Henaristani_Bedengi

📘

#ڕێبوار

لە دوایین
وێستگەی ماڵاوایی،
لەشم نیا سەر شانم و
ڕۆیشتم بەرەو تەنیایی!
جێگای بێ گوڵاڵە و
بێ زایەڵەی نوور و بێ سنوور!
ڕۆحم لە گەڵما نەبوو!
ئەوم لە نیشتمان بە جێ هێشتبوو!
تا هەر بەربەیان
دەلاقەی بیرەوەریەکانم بکاتەوە و
لە سەر دیوارەکانی شار،
هەستم بنووسێتەوە!
خەمەکانم
بە دەنگی پێکەنین و
هەنگاوی منداڵیم بسڕێتەوە!

***

ڕۆحم لە نیشتمان
بەجێ‌هێشتبوو
تا هەر ئێواران
یادی جێژوانم
وەکوو باڵندەیەک
بۆ ئامێزی دڵم بنێرێتەوە!
بەڵکوو ڕۆژێ،
لە کازیوەی ئەم خەیاڵە
بە جانتای پڕ تاسە و
شەمەندەفەری چارەنووس بێت و
من و لەشی ماندووم،
بۆ هەتا هەتایی
بەرەو نیشتمان بباتەوە!

پ . ڕ (#سایدا)

@Henaristani_Bedengi

سوێندی زەریا بوو
بۆنی یەک دڵۆپی نادا
دروشمی مانەوە بوو
کۆچی دەپێوا
لە کونگرەکاندا
ژن
ژیان
ئازادی
‌هاووووووووار دەکرد
لە تەنیایی‌دا بەردی لێ ئەدا...

پ .ڕ (#سایدا)


@Henaristani_Bedengi

📘

#دواهەمین_ماڵاوایی

نازانی!
بە دوای دواهەمین
ماڵاوایی تۆ
هەموو وەرزەکان پاییزن!
دارستانی لە خەونی نهێنی
پەلکەی سپی زستان ئەچنێ و
تامی ترێ لە دەستی هاوین ناگرێ!
شەوی چلەی لە بیر نایەت و
چاوی لە ڕێگات ئەفڕێ!
نازانی!
بە دوای دواهەمین
ماڵاوایی تۆ
بەژنی هیواکانم
ناگاتە باڵای دیواری حەوشێ!
شۆڕەبی سەری هەڵێناوە و
بەرهەمی خەونی
لە مانگی ئەوبەر سنوور دەنێ!
لە ژووری ماڵم
تەنیایی، بە دوو دەستی زاماری
ئەژنۆی لە باوەشە و
قاپی وێنەکانی تۆی
بە فرمێسکی ئەسڕێ!
بەڵام بزانە!
بە دوای دواهەمین
ماڵاوایی تۆ
دڵم بوو بە کتێبێ،
هەزار لاپەڕەی مێژوو
چیرۆکی خەمی دایکی
لە سینگدایە!
تاکوو پاش بێ‌گەڕانەوەی تۆ و
مەرگی من!
هەر لاپەڕەم
وەک بەیاخی سەر کێل
بە چوار لا بگڕێ!
نەزری دایکانی چاوەڕوان
وەکوو من بگێڕێ!
بەڵکوو نیشتمان
بۆ جارێکی دیکە،
هەمووتان لە ئامێز بگرێ!


پ . ڕ (#سایدا)

@Henaristani_Bedengi

📘

#دەرگام_لێ‌_کەرەوە

ئەی خەیاڵی
هەزار وەرزی بێ بەهار!
دەرگام لێ کەرەوە
دڵ، شەکەت لە هات و نەهات!
سەری سپاردووە
بە دەرگات!
ڕێبواری بێ کاروانم و
ونە مەنزڵگام
دەرگام لێ کەرەوە !
لێقەوماوێکی مێژوو تاڵی بێ‌نیشانم !
هێمای ڕۆژانی کۆن و
سەرهەڵدانی بێ‌ناوم
دەرگام لێ‌کەرەوە!
منم کۆیلەی تەنیایی و
عەزرەتی ئازادی
کە لە یاسای بێ‌ڕەسەنی
"جیهان"
ژینم داوە بە دەست
پیاوسالارانی، پیاوسالار !
تا بە دەستی خۆیان
لەت لەتی کەن و
لە مەڵبەندی بەتاڵ
زیندوو بینن بە چاڵ !
دەرگام لێ‌کەرەوە!
ئامێزی ژووری تۆ
جێژوانی هەستی منە
خۆڵەمێشی قەقنەسی منە!
ئاوێنەی هەزاران ئافرەت
وەکوو منە!
دەرگام لێ‌کەرەوە!
ئەی پایتەختی میری من!
ئەی خەیاڵ!

پ . ڕ (#سایدا)

@Henaristani_Bedengi

📘

#شەقام

لە دوای تۆ "دڵخۆشی" !
ڕۆژێک خۆرئاوا
هەموو کۆڵانەکانی شار
بوون بە کێلی دامرکاو !
لە سەر شەقامی ژاکاو !
شەقام !
بە شەرمەساری
لە سێبەری شەوی بێ‌هەتایی
سەر خۆی هەڵگرت
بەرەو ڕێگای بەڵێنی
تاکوو ڕۆژێک
بتهێنێتەوە بە نهێنی !
بەڵام ئەویش
بوو بە حەزی بێ‌گەڕانەوە !
لە لاپەڕی سنووری حەسانەوە !
وەکوو تراویلکەیەک
لە ئەوبەری حەسارەوە !

پ . ڕ (#سایدا)


@Henaristani_Bedengi

📘

#گیرۆدەی_ئەوین

ئەی لێواری
بێ‌هاوتای ترس و
سنووری گومان!
چاوانی پڕ خەمت
کڵەی شایی کێشە و
تەمی سەر جامی دڵت،
بە جارێ بسڕێوە!
جارێکی‌تر لە ڕێگای چاکترین
مرۆڤانی خودا
لە دایک بەو
بە هەناسەی
عاریفێک دێوانە
وەرە عاقڵ بە!
ڕەنگە لە نێو ڕووناکی جیهان!
لەوبەری کازیوەی بیر و
ئاسۆی تاوان
بۆ ساتێک
گیرۆدەی ئەوین بی!!

پ . ڕ (#سایدا)


@Henaristani_Bedengi

هاوڕێیان
بیسەری
دەنگی
دارستان و
سروشت و
بارانی پاییزی
و..بن
@Henaristani_Bedengi

▫️
دەزانم لە دڵی تۆش
قەت نامرم ئەی هاوپەیمانی
سەنگەری یاد...

@Henaristani_Bedengi

📘

#تراژێدیا

لە دەلاقەی خەیاڵ
سەرت هێنایە دەر
بە بزەی پڕ متمانە
سڵاوم کردی!
بۆ یەکەم جار
لە ئاسمانی چاوانت
هەسارەت هێنابوو
مانگی "مانەوە"
لە سەر سینگت بوو
پرسیارم کرد
سازی ترس شکاوە؟!
یان شاری لۆمە
لە سێبەری خۆی خنکاوە؟!
یان مەرگی خۆت
قەڵەم لێ داوە؟!
وڵامت دامێ:
"نە ! لە بیرت نەماوە؟
ساڵانێکه مردووین و
لە قەبر نووستووین!
ئێرە تێنووسی
ژنە شاعیرێکە،
لە دوورە وڵاتێ
ئەو پەڕی سنووری هەناسەبڕی
کە من و تۆ
بێ ترس و دابڕان
لە شێعری تراژێدیای
بە یەک گەیشتن ! "

پ . ڕ (#سایدا)


@Henaristani_Bedengi