የህግና ገቨርናንስ ኮሌጅ አመታዊ የምርምር ጉባኤ አካሄደ።
//
ሚያዚያ 30/2016 ዓም

በሀዋሳ ዩኒቨርሲቲ የህግና ገቨርናንስ ኮሌጅ ከምርምርና ቴክ/ሽ/ም/ፕሬዚደንት ጽ/ቤት ጋር በመተባበር በ2015 ዓ.ም በኮሌጁ ተመራማሪዎች የተሰሩ የምርምር ስራዎችን ለመገምገም ያለመ ጉባኤ በአፍሪካ ህብረት አዳራሽ አካሂዷል።

የኮሌጁ ምር/ቴ/ሽ/ተባባሪ ዲን ዶ/ር አዲስወርቅ ጥላሁን የመድረኩን አላማ ባስረዱበት ንግግራቸው እንደገለጹት በ2015 በጀት ዓመት በኮሌጁ መምህራን የተሰሩ አራት የዲሲፕሊነሪ ምርምሮች በኮሌጁ አካዳሚክ አባላት ግምገማና ውይይት ይካሄድበታል ብለዋል። ዶ/ር አዲስወርቅ አክለውም ምርምር የሚሰራበት አላማ አዲስ እውቀትን ለመፍጠር ወይም ነባሩን እውቀት ለማሳደግ በተጨማሪም የማህበረሰቡን ችግሮች ለመፍታት መሆኑን አንስተው ይህንን አላማ ታሳቢ በማድረግ በዩኒቨርሲቲው የገንዘብ ድጋፍ አግኝተው ወደ ስራ የገቡ ጥናቶች ሰባት የኮሌጁን ተመራማሪዎች ማሳተፋቸውን ገልጸዋል።

የኮሌጁ ፕላንና ዳታ ማኔጅመንት አስተባባሪ አቶ ከድር ዳሮ በበኩላቸው  በመድረኩ የተሰሩት የምርምር ስራዎች የምርምር ስነ ምግባርን ተከትለው መሰራታቸው፣ ደረጃቸውን ማሟላታቸው፣ የሚጠበቅባቸውን ውጤት ማምጣታቸውና ምን አዲስ ግኝቶችን አስተዋወቁ የሚሉትን ነጥቦች እንደሚገመገሙበትና ጥያቄዎች እንዲሁም ግብረመልሶች እንደሚሰጡበት ተናግረዋል። በየአመቱ በኮሌጁ መምህራንና ተመራማሪዎች የሚሰሩ የምርምር ስራዎች በቁጥርም ሆነ በጥራት መሻሻሎችን እያስመዘገቡ መሆኑን  ያነሱት አስተባባሪው ለዚሁ ለውጥ መመዝገብ የምርምር ግምገማዎችና በአካዳሚክ አባላት መካከል የሚደረጉ ገንቢ ውይይቶች አይነተኛ ሚና መጫወታቸውን ገልጸዋል።
                   

https://www.tg-me.com/hugadssachannel

የሴኔት ሥራ አስፈፃሚ ኮሚቴ በተለያዩ አጀንዳዎች ላይ ተወያየ::
//
ሚያዚያ 30, 2016 ዓም

የሀዋሳ ዩኒቨርሲቲ ሥራ አስፈፃሚ ኮሚቴ የ2016 ዓም የተማሪዎች ምረቃ ቀን እና ሌሎች አጀንዳዎች ላይ ዛሬ ባካሄደው መደበኛ ስብሰባ ውሳኔዎችን አሳልፏል::

ኮሚቴው ከትምህርት ሚኒስቴር በተቀመጠው የፈተናዎች መርሃግብር አንፃር በዩኒቨርሲቲው ዘንድሮ የሚመረቁ ተማሪዎች የመውጫ ፈተናቸውን እንዳጠናቀቁ ሐሙስ ሰኔ 27 ቀን 2016 ዓም ምረቃ ሊደረግ እንደሚችል ውሳኔ ላይ ደርሷል::

ከዚሁ ጋር ተያይዞ የመውጫ ፈተና ዝግጅትን በተመለከተ ሁሉም ኮሌጆችና የቴክኖሎጂ ኢንስቲትዩት እስካሁን የተሰሩ ሥራዎችን ሪፖርት ለኮሚቴው ያቀረቡ ሲሆን በሂደቱም የተገኙ ግብረ መልሶች: የታዩ ክፍተቶች: ያጋጠሙ ተግዳሮቶችና የተወሰዱ የማስተካከያ እርምጃዎች ላይ ሰፊ የልምድ ልውውጥና ውይይት ተደርጓል::

የዩኒቨርሲቲው ፕሬዚደንት ዶ/ር አያኖ በራሶ በውይይቶቹ ማጠቃለያ ላይ ለተማሪዎች የመውጫ ፈተና ዝግጅት በቀረው ግዜ ሁሉም የሚመለከታቸው ክፍሎች ቀሪ ስራዎቻቸውን እንዲያጠናቅቁ እና ተማሪዎችን በሂደቱ ላይ በንቃት እንዲያሳትፉ መመሪያ ሰጥተዋል::

                    

https://www.tg-me.com/hugadssachannel