هذا الصباح ..


"انت ما بتحبني انا ..أنت بتحب فكرة معينة ختيتها في رأسك عني ،أنت اصلا ما أديت نفسك فرصة تعرفني . "

..
في فيلم وداعا جوليا أكرم كان بحب منى شديد وبخاف عليها ..دي حقيقة غير قابلة للانكار ..بس مشكلتو الوحيدة انو كان بحبها بطريقتو هو ..وبالزاوية اللي هو شايف بيها معنى الحب ده
..
صح منى كذبت كم مره في الفيلم ..والحاجه دي تتحسب عليها ..بس هي م كذبت عشان هي زوله كعبة هي كانت بتكذب لانو أكرم ما مديها الأمان الكافي عشان تعبر عن نفسها ..عن شعورها..عن احتياجاتها ..او عشان تحكي القصة كاملة
..
عشان هي كانت قاعدة براها ..وما عندهم اطفال جاب ليها عصافير وقال ليها جبت ليك العصافير ديل عشان يونسوك ..كان بتشاف انو شعور لطيف منو ..بس بعد زمن لما اختارت انها تطلق سراح العصافير ..زعل منها وقال ليها بتاخدي قرارات عاطفية غبية من غير ما تشاوريني
يعني حتى ما كلف نفسو يسألها عن احساسها والسبب الخلاها تطير العصافير
واصلا من البداية هو ما عارف انو العصافير دي حتسعدها او لا ..بس كان شايف انو دي الطريقة المناسبة والمنطقية من وجهة نظرو
..
اكتر مشاهد اثرتني في الفيلم لما كانت بتمشي الدكتور براها ..لما تبكي براها ..لما تسرح بعيد براها ..كنت بحسها وحيده بالرغم من انها متزوجه ..وعايشه في بيت حلو
وعربيتها في يدها ..بس واضح شديد انها ما مبسوطة
وقتها اتذكرت جملة صحبتي لما قالت لي انا خايفه بعد اتزوج هروب من الوحده ..برضو احس اني وحيدة
..
منى كان عندها energy حلوة ..صوتها حلو ..حركتها في البيت حلوة.. عندها جانب انثوي لطيف..بس لما يجي أكرم البيت بحسها بتتحرك زي الروبوت ..بتعاين ليه بنظره بتاعت خوف..بتتعسم معاه في الكلام واضح شديد انها ما عايشة معاه بهويتها الحقيقية
..
أكرم كان مجرد راجل بأدي ادوارو الروتينية ..بتعامل مع أي حاجه من باب الواجب ..ما حصل سمع منى للنهاية ..او أداها زمن كافي تحكي فيه كاحتياج طبيعي عند اي مره قاعده ف البيت محتاجه فيه لونيس
..
في النهاية لما منى اتشجعت وواجهتو بالحقائق الكانت داساها عنو ..السيناريو كان حقيقي شديد
لما قالت ليه " انت بتكذب على نفسك ..أنت ما بتحبني انا ..أنت بتحب فكرة معينة ختيتها في رأسك عني ، انا ما الزولة الفي راسك ..أنت اصلا ما بتعرفني انت ما عارفني بحب شنو وبكره شنو ..اتعرف علي اكتر يمكن تحبني ."

بس ردة الفعل بتاعتو بكل بساطة قال ليها الصباح لملمي حاجاتك و امشي اهلك واعملي العايزاه هناك ..

وهنا اثبت بالجد انو هو كان بحب منى برسمة معينة راسمها في خيالو ..وما عايز يواجه الحقيقة ويشوه الرسمة دي .. وانو هو شخص نرجسي .
..
السيناريو ده اكتر سيناريو واقعي ..وحاصل في المجتمع السوداني
معظم الطلاقات البتحصل ..بسبب إنو الطرفين ما فاهمين حقيقة بعض ..او احتياجات بعض ..او لغات حب بعض..ماف quality time ..او نقاشات او أرضية مشتركة
..

من وجهة نظري ..

ما تتزوج اذا ما كان عندك الاستعداد انك تشارك شريكك كل حاجة بتحصل في حياتو ..ولو ما كنت مستعد تفهم لغة حبو وتحبو عن طريقها .


" ان تحب أحدهم يعني ان تعرفه اكثر من نفسه وان تكون الشاهد الأول على كل ما يحدث معه ❤️" .

#Malaz_Ali

-

" للهم يا أمان الخائفين، أعطنا من الأمان ما يكفي للتغلب على ما نخافه، ومدّنا بالطمأنينة كي نتجاوز الأيام إن ثقلت، وألهمنا صبراً على ما لا نطيق" .

اللهم صلي وسلم ع نبينا محمد وع اله وصحبه اجمعين 💙.

مساء الخير حباً..💕


لُطفا محتاجة دعمكم لي ع حسابي الشخصي ع الفيسبوك🥺

الفترة الجاية ح أركز ع الأكاونت أكتر، المحتوى حيكون مختلف والنشر حيزيد


https://www.facebook.com/profile.php?id=100015292605559&mibextid=ZbWKwL

Dear Diary

I’m no longer impressed by big job titles, social status, or big bank accounts. I’m impressed when someone treats others
with kindness. Not for attention, not to
gain followers, and not for social media.
Just genuine kindness that comes
straight from the heart. ❤️

أحياناً ..

في نهاية اليوم

بتكون شايل إرهاق اليوم كله على اكتافك

وطاقتك بتكون منخفضة خالص

ورغم كدة قد تتفاجئ بإحتياجات بعض الاشخاص حوليك لدعمك النفسي

حتحس بضيق شديد وتعبك قد زيد لأنك انت زاتك في الوقت ده أحوج ما تكون للدعم

من حقك
تقرف !
وتعمل الفون silent
وتتجاهل كل الرسائل والناس وتعزل نفسك وتبطل ترد عليهم وتتجاهلهم
عادي جداً !
اوعك تحس بالذنب انت ما عملت حاجة غلط

ده الصح .. ده المفروض تعمله √
ولو ما عملت كدة وجيت ع نفسك يبقى انت عبيط وظالم نفسك ( مع احترامي ليك)

ولانه من الساهل جداً ندخل في دائرة جلد الذات وندبرِس روحنا فـ حبيت اوضح ليك بس انو نفسك دي فوق كل حاجة 💕.

أعمل البريحك دايماً وسيب التبرير الكتير 💕.

#خلي_بالك_عليك
#تنزيل_صابر.

صباح الخير..

البوست الجديد نزل🌷

تعالو اظهروا لي❤️❤️

https://www.facebook.com/share/p/m8tkyddbEGnhdVDT/?mibextid=oFDknk

"أن يُهديني شخصُ ما
سلسلة على شكل -شمس-
ويُخبرني
-إنني شمسهُ الوحيدة في عالمه المُظلم-
يُمكنُني بعدها أن أتوهج لإعوام❤️"

#بعض_من_اللُطف
#ريما_عباس 🌷

- ايه العُمق ده؟❤️

عاينو أنس سرحان كيف😂؟!

الحلقة دي كانت تحفة شكلها شبه حلاوة نسليهان ..متحمسة احضر حلقتها كلها🥺❤️

واكيد ح انزل ليكم مقاطع منها .

بتكلم مع أهلي قبيل وبسألهم أها الوضع في المدرسة النزحتو فيها كيف وخبركم شنو والفي منو والمافي منو وكدا ..

أها بتكلم مع مرت خالي قلتا ليها يما وين؟
قالت لي نحنا في فصل سابع وأمك في فصل سادس ادعي ليها الله يوفقا بس في الامتحانات🤣❤️
مكالمة استمرّت حوالَيّ ساعة دموعي كانت جارية فيها من الضحك
بعدما عشتا أيام وليالي من الخوف والقلق على أهلي بعد طلعو من قريتنا في الجزيرة_ ام عضام !

قبل المكالمة بي دقايق بسيطة كنتَ شايلة النهار كلو طنطنة وزهج عشان ما عندنا كهربا، فبالتّالي ماف هيتر، فبالتّالي ح نشتغل بي واقود وفي حال الرفاهية=فحم!! ده غير السخانة والكتمة والحَر
بقيت أقول سبحان الله أنا متجرسة كده وناسية أشكر ربنا إني قاعدة لَي في بيت ما مدرسة، بغض النظر عن باقي الحال!
ضحكهم وونستهم دي ذكرتني قبل أيام لمن بتكلم مع أختي بقول ليها أها المطر العليكم ده عملتو فيو شنو
وهم شِبه قاعدين في الشارع!

(شرَّدونا من بيوتنا في الخرطوم، نزحنا الجزيرة
وبيوتنا الفي الجزيرة؟؟ حليلا بارد زيرها ..!💔)
المهم
قالت لي بي كل الرضا
الحممممممدلله يا صفية تخيلي الزاوية الأنا قاعدة فيها الموية ما قاعدة تدفّق فيها لمن المطرة تصب لكن باقي الناس المعاي في الأوضة بتبشتنو واللهِ
بتقول في الكلام ده وهي المطرة بتكون صابة في أولادها من تبدا لامِن تقيف!
الموقفين ديل خلوني أعيد النظر في الضجر العندنا ده
نحنا حقيقي جاحدين نعمة وما حاسين بي الخير العندنا

مهما كان وضعك صعب
في ناس وضعهم أصعب منك وبرضو رضيانين
مهما كنتَ تعبان
في ناس أشد منك تعب لكن رضيانين
اتذكرتا صحبتي لمن المطرة ملت ليهم بيتهم وشغالين اليوم كلو يغرفو في الموية بي الجرادل والطشاتة
يضحكو هي واختها قالت ليها عاد واللهِ ناس أوروبا فايتة عليهم جنس فعاليات، هسي هم هناك شدة ما زهجانين وقاطعين موضوع بمشو يعملو زي فعالياتنا دي بالقروش🤣


فياخوَنَّا السعادة واللهِ أبدًا ما إنك تكون كل حاجاتك متاحة ليك ومكتملة
السعادة حاجات ناقصة بتكَمِّلا بي رِضَاك♥️



#على_الهامش :

اتذكرت الآيه الكريم:
"و لسوف يعطيك ربُّك فترضى"

انَّ ذَروة عطاء الله للعبد ليست السعاده ؛ لأنَّ السعاده شعور مؤقت زائل ، و لكن ذَروة عطاء الله للعبد هي الرِضا خاصةً في مواطِن الإبتلاءات 🌸

لذلك الله تعالى لم يقُل (يُعطيكَ) (فتسعد) بل .. قال (يعطيك) (فترضى)♥️.



#صفِيَّة_مُصطفى.

جاني الإشعار ده قبل شوية فجأة ..


إلا أتذكر كدة😂 🤷🏻‍♀

-
" ‏اللهم عز شأني وارفع مكاني واحفظ لساني عن العالمين وسخر لي ملائكة السماء وجنود الأرض، اللهم غير حالي لأفضل حال وارزقني رزقًا واسعًا مباركًا فيه."

اللهم صلي على نبينا محمد وع اله وصحبه
اجمعين🩵.

" حاسة ربنا ما عايزني للدنيا ..! "

..


لي حكاية أربعة سنة بكتب في الGolden list بتاعتي كل سنة اول هدف أحفظ جزء عم ..

بتعدي السنة من بدايتها لنهايتها بحقق كل الأهداف الفيها ..

ما عدا اني أحفظ جزء عم !!

لأني ما بسعى فيه اساسًا

2023 بعد خلصت جامعة طوالي نزلت شغل كمتعاونة في مدرسة .. بحيث ازيد فرصتي في التوظيف ..

التعيين كان شهر ١ اتاجل لغاية نهاية رمضان

مع نهاية رمضان جات الحرب !!

قفلت المدرسة وفقدت فرصتي فأني أتوظف بعد كل الجهد الجبار و "الشطارة " والفلاحة بتاعتي ..

إعتبرتها إشارة لإني أبدا في المجال البحبهُ بعيدًا عن الأكاديميات

وفعلاً بديت بزنسس في مجال العناية بالشعر ♡

كان ماشي حلو وبادي يكبر ♡♡

وهووب مدني تسقط وأفقد الإمدادات البتجيني منها من مواد وغيره

خططي للمرة التانية تبوظ !

صحبتي رسلت لي تيسير ارح نحفظ قرآن

ودي ما اول مرة تفتح لي الموضوع !!

وفضلت ساعة تحكي لي عن البنات الاستغلوا فترة الحرب في حفظ القرآن ♡♡

كالعادة قولت ليها اوكي تمام وما اشتغلت بيها

تفكيري كلو كان في جهة معينة وساعية فيها هي بس !

لملمتا شمل نفسي وبديت لاين تاني في نفس المجال لكن أقل كُلفة ..

كوستي اتحاصرت والناس نزحت

وللمرة الثالثة خططتي تبوظ !

وبرضو تجي أختي تاني تفتح لي الموضوع ..

قولت ليها بكل برود امشوا انتوا انا " ما ماشة !"

وتدور حياتي وتلف وانا ساعية في جهه وربنا عايز لي جهه معينة انا ما عايزة امشيها ..

لسبب انا زاتي ما عارفة غير انه نفسي الامارة بالسوء كانت ماسكة الشفت بكلو .

وتاني صحبتي ترسل لي

" تيسير في مركز جنبنا ارح نمشي "

قولت ليها سمح وحماسي ما بتجاوز ال10% !

وسبحان الله

صحيت يوم لبست عبايتي ومشيت سجلت برااااي صحبتي المتفقة معاها وتشيل وتلز فيني زاتها ما مشت معاي وجات براها برضو!🤣

مشيت وانا والله ما قولت بستمر نهااااي ..

صحبتي نزلت معاي واهو نشجع بعض ♡♡

كل يوم شايلين مرايتنا ومصاحفنا و نطاقش نمشي ..

وكل ما ازاول منو ونفسي تلزني بلقى سبب جاريني من رجلي جايبني لغاية المركز !!

في يوم بتكلم مع صحبتي برا البلد

قالت لي اها اخباار شغلك شنو وحياتك كيف ؟

بضحكة كدة قولت ليها شكلو ربنا ما عايزني اعمل اي حاجة لدنيتي

الفترة دي شكلها فترة الأخرة بس حاساهو بقول لي .. تيسير ركزي في اخرتك شوية اسعي فيها شوية زي ما بتسعي لدنيتك .. اعملي لحياتك الجاية ♡

اليلة بكتب ليكم الكلام ده وانا أتممت حفظ جزء عمَّ بحمدلله وتوفيقه وحده ..

ربنا وفقني وحققت الهدف اللي بيتكتب كل سنة في اول اللستة وما بيتحقق ..!!

اترددتا في البداية أكتب الكلام وما بحب أحكي عن عباداتي أبدًا..بخاف من الرياء و الذي منه .

بس عسى ولعل البوست يصادف واحدة الدنيا بتتقفل ليها في وشها كل شوية وما قادرة تفهم تبدا من وين وتعمل شنو ؟

الرسالة واضحة بس ركزي فيها ♡

ربنا قفل ليك ابواب الدنيا عشان تشتغلي على ابواب الأخرة

خططك بتبوظ ..

عشان خطة ربنا ليك ما للحياة دي خالص

جهدك ده وسعيك ده وظفي للحياة التانية

الكاريير اللي مفروض تشتغلي عليه المرة دي مختلف ..

حانشتغل ونجاهد عشان حياتنا الحقيقية ..

عشان يوم القيامة ناخذ الجايزة ونصل للإستاندر الحقيقي

وننال رفعه ومكانه ومقام عظيم

"مع السفرة ؛ الكرام البررة "

عشان أهلنا يفخروا بينا وهم لابسين تاج الوقار 👑

ده وقت حفظ القرآن ♡

ده وقت الكاريير الحقيقي للحياة الحقيقية ..

والجائزة الأعظم على الإطلاق !♡

جنة عرضها السموات والأرض ♡🌷


#تيسير_أحمد.

مره وأنا مسافره بي عربيه وانا بكره شدييييد اقعد في اي مكان غير جمب الشباك ، لقيت كل الشبابيك محجوزه ، قعدت وصريت وشي في النص وقلت يارب خليني اقعد جمب الشباك. 😂 وكنت صادقه شديد وانا بدعي برغم انه العربيه اتحركت، في ثواني جا زول قال لي انه لو ممكن نبدل علشان المكان ورا ضيق عليو وانا قاعده قدام وماف شي قدامي ، من غير ما اساله مكانك وين كنت عارفه انه جمب الشباك وطوالي قمت وقد كان 😂❤️
ضحكت وعاينت فوق وقلت لي ربنا شكرآ. كده ميه ميه 👌

برغم انه الموقف ده بسيط وممكن ما عنده معنى لي ناس كتار الا انه مافي غير المواقف الصغيره دي ، بتخليني احس بالامتنان والشكر والمحبه العظيمه لي ربنا ، اللي ما داير مني غير اذكره وهو طوالي بزبط لي الامور 😁.

دائما بتجي في بالي لما اتخيل الله سبحانه وتعالى ،
ما بكون قادره اتخيل طبعا ملامح او شكل بس بتخيل انه ربنا عن حاجة عظيمه شديد، والله بعظمته دايما بينظر لي بعين الرحمة لما اغلط او امشي في طريق ما ياهو، بتخيل انه دايما بياخد بيدي ويعدل لي طريقي ، برغم اني ممكن اكون ما شايفاو لكن حاسه تمامآ بانه اللي بيحصل لي دايمآ هو تيسير وتسهيل من الله❤️

من فتره طويله بطلت اشيل هم كبير للدنيا ، بس شايله هم وآآحد انه يارب قصاد الحاجات دي كلها انا مفروض مني اعمل شنو ؟!

غير الطاعه والعباده، لاني مؤمنه تماما انه الحاجات دي فايدتها برضو لينا نحن تمامآ وااي عباده ربنا أمر بيها لي مصلحتنا الشخصيه !

، ف بعض النظر عن العبادات ، انا نفسي جدآ اقدم لي ربنا ، نفسي الخير والعطاء والسند ده والطاقه الحلوه دي اقدر اقدم قصادها شي ، نفسي اكون سبب لي غيري انه يحس بالحُب والامان والخير وانه لسا الدنيا حِلوه ، لاني مؤمنه بانه اي شعور ربنا اداني ليها ، اي الهام، اي طاقه ما علشان تقيف عندي ، علشان عندي بيها دور مفروض اوصلها لي ناس تانين وهم برضو يوصلوها لي غيرهم وبكده عمره الخير والمحبه والسعاده ما حتنقطع من العالم ..

بكتب الكلام ده وانا بعيده تمامآ عن المثاليه، عندي مشاكلي وعيوبي ونفسياتي وتقصيري في حاجات كتيره ..

بس دي حقيقيه امنيتي في الحياه ، مش في مقوله بتقول ليك كن سببآ في جعل شخص يؤمن بوجود الخير في العالم

خلونا نكون أسباب سعاده لي غيرنا ، باللي في يدنا وبنقدر عليه..

علشان بكره في زول حيبقى ليك سبب سعاده، وخيرك حيرجع ليك مضاعف.

لو انت/ي جاتك طاقه حلوه من البوست ده وحسيت انك بتقدر تقدم حاجة ، اكتبها لي في الكومنتات ، خدمة-حاجة نفسيه-معنويه، او حتى اخد قرار بينك وبين نفسك انك تسعِد شخص خلال اليوم بابسط شي، ويمكن تكون سبب لي زول يفرح الليلة ❤️.



#سآرا_ناصر

تقول:

إنقطعت عن القيام لستة أشهر، فلما عُدت لقيامي استجاب لي في نفس الليلة

الله يريد سماع صوتي فقط،
أي كرم هذا !❤️


#ليلة_الجمعة
صلو على الحبيبﷺ

-
" ‏اللهم إني اسألك علم الخائفين منك، وخوف العالمين بك، ويقين المتوكلين عليك، وتوكل
الموقنين بك، وإنابة المخبتين إليك، وإخبات المنيبين إليك، وشكر الصابرين لك، وصبر
الشاكرين لك، و محبّتك التي تقرّبني لجنّتك."

اللهم صلي على نبينا محمد وع اله وصحبه
اجمعين🩵.

" الفترة دي حاسة انو الناس اغلبها مهمومة وتعبانة نفسياً ، في تعب عموماً وانطفاء كدة غريب ، حتى انا ما قادرة اعمل شي لنفسي ولا للحوليني .. بس بدعي انو ربنا يخفف علينا كلنا وتعدي الفترة دي بخيرها وشرها💕."

هذا الصباح ..❤️


كنتَ بحضر في فيديو في فيسبوك فقام فتح معاي الفيديو الـ تحتو تلقائيًا..

كان فيو مذيعة بتسأل في مجموعة من الممثلات تقريبًا، في مهرجان ولا حاجة بالشكل ده

فكانت بتسألهم أسئلة من نوع
"شنو أغلى حاجة لابساها حاليًا في الآوت فيت بتاعك"؟!

لفتتني إجابة واحدة فيهم لما المذيعة سألتها
المذيعة: أغلى حاجة؟!
ردت عليها البت: أنا!!

ما تتخيلو ياخوانَّا قعدت أعيد في اللقطة دي تحديدًا كم مرة!
رغم إنهم اخدو الموضوع بي ضحكة وبعدها جاوَبت عادي على السؤال وقالت ليها الفستان تقريبًا!
لكن كل شوية برجع ١٠ ثواني بي الفيديو عشان اسمع
_أغلى حاجة؟؟
=أنا

بقيت أفكِّر لو فعلًا بنعامِل نفسنا كأغلى حاجة عندنا كان وصلنا بي روحنا دي وين!

أنا أغلى حاجة في حياتي
ح ابدا اهتم بي نفسي، من وإلى!
من أكبر شي لي أصغر التفاصيل
أنا قبل كل شي وقبل كل زول
لو أنا بقيت كويسة من جواي ح أقدر اقدّم أكتر
ولو بقيت أحسن نفسيًا ح اخدم روحي واخدم الناس اللي حولي أكتر
لو أنا أغلى حاجة في حياتي ح ابدا أشوف الحاجات البتخليني دايمًا ماشة لي قدّام واعملها
وبالمقابل، أي شي أو أي زول بخلّينا نستنزف طاقتنا وجُهدنا وتفكيرنا أكيد ما حيكون ليو مكانة في حياتنا ولا يومنا

لو بَس نعيش يوم واحد بي مبدأ
(أنا أغلى حاجة)
ونبدا ندّي روحنا زي ما بندّي الناس
ونسامح روحنا على أغلاطنا زي ما بنسامح الناس
ونخدم روحنا دي زي ما بنخدم الناس
كان بقينا في حتة تانية
كان بقينا كويسين، نفسيًا ومادِّيًا وكلّو

مشكلتنا دايمًا خاتّين روحنا في آخر القائمة، وكمان لو القائمة طويلة، والورقة ما شالتنا خلاص معليش يا روحنا نشوفك يوم تاني
مشكلتنا دايمًا بِنَرتا ونراعي للناس وننسى إننا محتاجين نرتا لي روحنا دي حبة ونراعي ليها!

القصة أبدًا ما أنانيّة،
الأنانية حاجة، وتقديرك لي روحك واهتمامك بيها حاجة تانية
ليه ما بنعرف نقول لأ... لمن نكون فعلًا ما قادرين
ليه بنخجل نعتذر... لمن يكون ما عندنا طريقة؟!
وليه بنقول هسي كدي نقضي حاجة فلان... روحنا دي بنجي ليها وقت تاني... فلان أهم!

لو ما اتعلَّمتي تراعي لي روحك
ماف زول ح يراعي ليك
ولو ما اتعلمتي تخففي عن نفسك وتشيلي بس البتقدري عليو
ح تلقي كل الناس محمّلة عليك عشان انتي (شيّالة التّقيلة)

وأبشرك
في اللحظة اللي ح تنهاري أو تتعبي فيها وتكوني خايرة القُوَى وفعلًا ما قادرة
ما ح تلقي زول بطبطب عليك ويقول ليك معليش
ح تنهال عليك نظرات العِتَاب ويجيك اللوم مدفّق سيل!
عشان انتي من البداية عوّدتيهم إنك ما بتتعبي وراحتك وصحتك ما مهمة ولا أولوية في الوقت الحالي!!

اتعلّمي تدّي روحك، اتعلّمي تقدّري نفسك وتهتمي بيها وتشيليها في عيونك
ح تلقي كل الناس بتقدِّرِك وشايلاك في عيونا

وأخيرًا..


انتي أغلى حاجة...♥️


#صفِيّة_مُصطفى