#የቅዱስ_ኤርምያስ_ነቢይ ትንቢት
❬ምዕራፍ 23❭

¹ የማሰማርያዬን በጎች ለሚያጠፉና ለሚበትኑ እረኞች ወዮላቸው! ይላል እግዚአብሔር።

² ስለዚህ የእስራኤል አምላክ እግዚአብሔር ሕዝቤን ስለሚጠብቁ እረኞች እንዲህ ይላል። በጎቼን በትናችኋል አባርራችኋቸውማል አልጎበኛችኋቸውምም፤ እነሆ፥ የሥራችሁን ክፋት እጎበኝባችኋለሁ፥ ይላል እግዚአብሔር።

³ የመንጋዬም ቅሬታ ካባረርኋቸው ምድር ሁሉ ወደ በረታቸው ሰብሰቤ እመልሳቸዋለሁ፤ እነርሱም ያፈራሉ፤ ይበዙማል።

⁴ የሚጠብቋቸውን እረኞች አስነሣላቸዋለሁ። ዳግመኛም አይፈሩምና አይደነግጡም፥ ከእነሱም አንድ አይጎድልም፥ ይላል እግዚአብሔር።

⁵ እነሆ፥ ለዳዊት ጻድቅ ቍጥቋጥ የማስነሣበት ዘመን ይመጣል፥ ይላል እግዚአብሔር፥ እርሱም እንደ ንጉሥ ይነግሣል፥ ይከናወንለታልም፥ በምድርም ፍርድንና ጽድቅን ያደርጋል።

⁶ በዘመኑም ይሁዳ ይድናል እስራኤልም ተዘልሎ ይቀመጣል፥ የሚጠራበትም ስም እግዚአብሔር ጽድቃችን ተብሎ ነው።

⁷ ስለዚህ፥ እነሆ የእስራኤልን ልጆች ከግብጽ ምድር ያወጣ ሕያው እግዚአብሔርን! ዳግመኛ የማይባልበት ዘመን ይመጣል፥ ይላል እግዚአብሔር።

⁸ ነገር ግን የእስራኤልን ቤት ዘር ከሰሜን አገርና ካሰደድኋቸውም አገር ሁሉ ያወጣና የመራ ሕያው እግዚአብሔርን! ይባላል፤ በምድራቸውም ይቀመጣሉ።

⁹ ስለ ነቢያት ልቤ በውስጤ ተሰብሮአል፤ አጥንቶቼም ሁሉ ታውከዋል፤ ከእግዚአብሔር የተነሣ ከቅዱስ ቃሉም የተነሣ የወይን ጠጅ እንዳሸነፈው እንደ ሰካራም ሰው ሆኛለሁ።

¹⁰ ምድር ከአመንዝሮች ተሞልታለችና፥ ከመርገምም የተነሣ ምድር አልቅሳለች፤ የምድረ በዳ ማሰማርያ ደርቆአል፤ አካሄዳቸው ክፉ ነው፥ ብርታታቸውም ቅን አይደለም።

¹¹ ነቢዩና ካህኑም ረክሰዋልና፥ በቤቴም ውስጥ ክፋታቸውን አግኝቻለሁ፥ ይላል እግዚአብሔር።

¹² ስለዚህ መንገዳቸው በጨለማ እንዳለች እንደ ድጥ ስፍራ ትሆንባቸዋለች፥ እነርሱም ፍግምግም ብለው ይወድቁባታል፤ እኔም በምጎበኛቸው ዓመት ክፉ ነገርን አመጣባቸዋለሁና፥ ይላል እግዚአብሔር።

¹³ በሰማርያ ነቢያት ላይ ስንፍናን አይቻለሁ፤ በበኣል ትንቢት ይናገሩ ነበር፥ ሕዝቤንም እስራኤል ያስቱ ነበር።

¹⁴ በኢየሩሳሌምም ነቢያት ላይ የሚያስደነግጥን ነገር አይቻለሁ፤ ያመነዝራሉ በሐሰትም ይሄዳሉ፤ ማንም ከክፋቱ እንዳይመለስ የክፉ አድራጊዎችን እጅ ያበረታሉ፤ ሁሉም እንደ ሰዶም የሚኖሩባትም እንደ ገሞራ ሆኑብኝ።

¹⁵ ስለዚህ እግዚአብሔር እንዲህ ይላል፦ እነሆ፥ ከኢየሩሳሌም ነቢያት ዘንድ ርኵሰት በምድር ሁሉ ላይ ወጥቶአልና እሬትን አበላቸዋለሁ፤ የሐሞትንም ውኃ አጠጣቸዋለሁ።

¹⁶ የሠራዊት ጌታ እግዚአብሔር እንዲህ ይላል፦ ትንቢት የሚናገሩላችሁን የነቢያትን ቃል አትሰሙ፤ ከንቱነትን ያስተምሩአችኋል፤ ከእግዚአብሔር አፍ ሳይሆን ከገዛ ልባቸው የወጣውን ራእይ ይናገራሉ።

¹⁷ ለሚንቁኝ ሁልጊዜ እግዚአብሔር ሰላም ይሆንላችኋል ብሎአል ይላሉ፤ በልቡም እልከኝነት ለሚሄድ ሁሉ ክፉ ነገር አያገኛችሁም ይላሉ።

¹⁸ ቃሉን ያይና ይሰማ ዘንድ በእግዚአብሔር ምክር የቆመ ማን ነውና? ቃሉንስ ያደመጠ የሰማስ ማን ነው?

¹⁹ እነሆ፥ የእግዚአብሔር ዐውሎ ነፋስ፥ እርሱም ቍጣው፥ የሚያገለባብጥ ዐውሎ ነፍስ ወጥቶአል፤ የዓመፀኞችን ራስ ይገለባብጣል።

²⁰ የእግዚአብሔር ቍጣ የልቡን አሳብ ሠርቶ እስኪፈጽም ድረስ አይመለስም፤ በኋለኛው ዘመን ፈጽማችሁ ታስተውሉታላችሁ።

²¹ እኔ ሳልልካቸው እነዚህ ነቢያት ሮጡ፤ እኔም ሳልነግራቸው ትንቢትን ተናገሩ።

²² በምክሬ ግን ቢቆሙ ኖሮ፥ ለሕዝቤ ቃሌን ባሰሙ ነበር፥ ከክፉም መንገዳቸው ከሥራቸውም ክፋት በመለሱአቸው ነበር።

²³ እኔ የቅርብ አምላክ ነኝ እንጂ የሩቅ አምላክ አይደለሁም።

²⁴ ሰው በስውር ቢሸሸግ፥ እኔ አላየውምን? ሰማይንና ምድርንስ የሞላሁ እኔ አይደለሁምን? ይላል እግዚአብሔር።

²⁵ አለምሁ አለምሁ እያሉ በስሜ ሐሰትን የሚናገሩትን የነቢያትን ነገር ሰምቻለሁ።

²⁶ ትንቢትን በሐሰት በሚናገሩ፥ የልባቸውንም ሽንገላ በሚናገሩ በነቢያት ልብ ይህ የሚሆነው እስከ መቼ ነው?

²⁷ አባቶቻቸው ስለ በኣል ስሜን እንደ ረሱ፥ እያንዳንዱ ለባልንጀራው በሚናገራት ሕልማቸው ሕዝቤ ስሜን ለማስረሳት ያስባሉ።

²⁸ የሚያልም ነቢይ ሕልምን ይናገር፤ ቃሌም ያለበት ቃሌን በእውነት ይናገር። ገለባ ከስንዴ ጋር ምን አለው?

²⁹ በውኑ ቃሌ እንደ እሳት፥ ድንጋዩንም እንደሚያደቅቅ መዶሻ አይደለችምን? ይላል እግዚአብሔር።

³⁰ ስለዚህ፥ እነሆ፥ እያንዳንዱ ከባልንጀራው ዘንድ ቃሌን በሚሰርቁ ነቢያት ላይ ነኝ፥ ይላል እግዚአብሔር።

³¹ እነሆ፥ ከምላሳቸው ትንቢትን አውጥተው። እርሱ ይላል በሚሉ ነቢያት ላይ ነኝ፥ ይላል እግዚአብሔር።

³² እነሆ፥ ሐሰትን በሚያልሙ በሚናገሩም በሐሰታቸውና በድፍረታቸውም ሕዝቤን በሚያስቱ በነቢያት ላይ ነኝ፥ ይላል እግዚአብሔር፤ እኔም አልላክኋቸውም አላዘዝኋቸውምም። ለእነዚህም ሕዝብ በማናቸውም አይረቡአቸውም፥ ይላል እግዚአብሔር።

³³ ይህ ሕዝብ ወይም ነቢይ ወይም ካህን የእግዚአብሔር ሸክም ምንድር ነው? ብሎ ቢጠይቅህ፥ አንተ ሸክሙ እናንተ ናችሁ፥ እጥላችሁማለህ፥ ይላል እግዚአብሔር ትላቸዋለህ።

³⁴ የእግዚአብሔር ሸክም የሚለውን ነቢይንና ካህንን ሕዝቡንም ያን ሰውና ቤቱን እቀጣለሁ።

³⁵ አንዱም አንዱ ለባልንጀራው፥ አንዱም አንዱ ለወንድሙ እንዲህ ይበል፦ እግዚአብሔር የመለሰው ምንድር ነው? እግዚአብሔርስ ምን ነገር ተናገረ?

³⁶ ለሰው ሁሉ ቃል ሸክም ይሆንበታልና የእግዚአብሔር ሸክም ይሆንበታልና የእግዚአብሔር ሸክም ብላችሁ ከእንግዲህ ወዲህ አትጥሩ! የሠራዊትን ጌታ የአምላካችንን የእግዚአብሔርን የሕያውን አምላክ ቃል ለውጣችኋልና።

³⁷ ለነቢዩ እግዚአብሔር ምን መለሰልህ? እግዚአብሔርስ የተናገረው ምንድር ነው? ትላለህ።

³⁸ ነገር ግን የእግዚአብሔር ሸክም ብትሉ፥ እግዚአብሔር እንዲህ ይላል፦ እኔ የእግዚአብሔር ሸክም አትበሉ ብዬ ልኬባችኋለሁና፥ እናንተም ይህን ቃል

³⁹ የእግዚአብሔር ሸክም ብላችኋልና ስለዚህ፥ እነሆ ፈጽሜ እረሳችኋለሁ። እናንተንም ለእናንተና ለአባቶቻችሁም የሰጠኋትን ከተማ ከፊቴ እጥላለሁ።

⁴⁰ የዘላለምንም ስድብ ከቶም ተረስቶ የማይጠፋውን የዘላለምን እፍረት አመጣባችኋለሁ።

  _🔥_🔥_🔥_

🟢🟡🔴
ግንቦት 7 | #ቅዱስ_አትናቴዎስ ሐዋርያዊ ዐረፉ፨

አትናቴዎስ ማለት ‹‹ሞት ሕልፈት የሌለበት ሕይወት›› ማለት ነው፡፡ ሐናፊ ከሚባል የእስላም ነገድ የተገኙ እንደሆኑ መጽሐፈ ስንክሳሩ ይጠቅሳል።

በኋላም ለአባቶች ሊቃነ ጳጳሳት 20ኛው የእስክንድርያ ሊቀ ጳጳሳት የሆኑ ታላቅ የቤተ ክርስቲያን ባለውለታ ናቸው፡፡ ቅዱስ አትናቴዎስ ትውልዳቸው ግብፅ እስክንድርያ ሲሆን ወላጆቻቸው ከማያምኑ ከአረማዊያን አሕዛብ ወገን ናቸው፡፡

በወጣትነታቸው ከመሾማቸው በፊት ወደ አባ እንጦንስ ገዳም ሄደው ከእሳቸው ጋር ለተወሰነ ጊዜ አብረው ኖረዋል፡፡ በ325 ዓ.ም በጉባኤ ኒቂያ ላይ መምህራቸውንና ሊቀ ጳጳሳቱን እለእስክንድሮስን ተከትለው ሄደው አርዮስ ከክህደት ትምህርቱ እንዲመለስ 318ቱ ሊቃውንት ቢመክሩትና ቢያስተምሩት አልመለስ ቢላቸው አርዮስን አውግዘውታል፡፡ አፈ ጉባኤውም አቡነ አትናቴዎስ ነበሩ።

አባታችን በማርቆስ መንበር 20ኛው ፓትርያርክ ሆነው በሹመት 47 ዓመት ሲኖሩ 15ቱን ዓመት በስደትና በእስራት ነው ያሳለፉት፡፡ አረማውያኑ በኃይል አምስት ጊዜ እንዲሰደዱና ሦስት ጊዜ ከሥልጣናቸው እንዲወርዱ አድርገዋቸዋል።

ከሃዲዮች ከሹመታቸው አውርደው በግዞት በመርከብ ጭነው ወስደው በባሕር ውስጥ ቢጥሏቸውም የታዘዘ መልአክ ከባሕሩ አውጥቶ ቅድስናቸውን ለገዳዮቻቸው መስክሮላቸዋል፡፡

ታላቁ ሊቅ ቅዱስ አትናቴዎስ ሐዋርያ ትምህርተ ሃይማኖትን ያስፋፉ ጸሎተ ሃይማኖትን ያረቀቁልን ናቸው፡፡

ለእኛ ለኢትዮጵያም የመጀመሪያውን ሊቀ ጳጳስ አቡነ ሰላማ ከሣቴ ብርሃንን የሾሙልን እሳቸው ናቸው፡፡

ግንቦት 7 ቀን 374 ዓ.ም ከዚህ ዓለም ድካም ዐርፈው ወደሚናፍቁት አምላካቸው ዘንድ የሄዱበት ዕለት ነው፡፡

T.me/Ewnet1Nat

የበዓል መልእክት፦
፩ኛ ለኢ.ዓ.ብ ቤተሰቦች
፪ኛ በፊት የኢ.ዓ.ብ ቤተሰብ ለነበራችሁ

❶
በስተመጨረሻም በጊዜውም ያለጊዜውም ጸንተን ታምነን እንቁም! ሁሉም ዕጣ ፈንታውን ያገኛል። ግድም የእግዚአብሔር ፈቃድ ይፈጸማል!

ጽኑ! በርቱ! በጸሎትም በጾምም ትጉ!
በሀገር ውስጥም ያላችሁ በውጪውም ያላችሁ ቤተሰቦቻችን ኹሉ አይዟችሁ! ጽናትን ገንዘባችሁ አድርጉ!

አሁን ጊዜው የሚጠይቀው በእምነት መጽናትን ነው። የሚፈትናችሁ ነገር ብቅ ሲል ወደ ፈጣሪያችሁ።

የተገባላችሁን ተስፋ እንዳትተዉ፣ እንዳትጥሉ ተጠንቀቁ!

➋
የደከማችሁ የጠፋችሁ ቀድሞ የእኛ ቤተሰብ የነበራችሁ ደሞ ዛሬ ጊዜው ያው እንደምታዩት ኾኗል። እየተገለጠ ብርሃኑ ብቅ እያለ ስለሆነ እኛ ለምን እንዲህ አደረጋችሁ ብለን የምንወቅሳችሁ ሰዎች አይደለንም።

እኛ የምንሻው ተጸጽታችሁ፣ ንስሐ ገብታችሁ፣ እውነቱን ተረድታችሁ፤ ትላንት ስለተቻችሁን ስለናቃችሁን ብዙ ስላላችሁን እኛ ያንን ቦታ አንሰጠውም። እኛ በዛ ምንም የምንጠቀመው ነገር የለም። እኛ የቂም ሰዎች አይደለንም፤ የክፋት ሰዎች አይደለንም። እግዚአብሔር ያስተማረን ሁሉንም በፍቅር እንድንቀበል ነው።

በንስሐ ብትመለሱ ግን ደስታችን እጥፍ ነው የሚሆነው። በንስሐ ተመለሱ። ጊዜ አታባክኑ፣ ሰዓቱ አልቋል። የምታዩት ነው። አልቋል! ምክራችን ይሄ ነው።

በዚህ በትንሣኤው ዘመን ከተጫናችሁ መጥፎ አካሄድ እንደ ጌታችን መድኃኒታችን ኢየሱስ ክርስቶስ ቸሩ መድኃኔዓለም መቃብራችሁን እየፈነቀላችሁ በንስሐ ወደ እግዚአብሔር ሩጡ፤ ፍጠኑ፤ ጊዜ አታጥፉ። ጊዜ በእግዚአብሔር እጅ ናት ያለችው። እናንተ ቀጠሮ ሰጥታችሁ የምታቆዩት ጊዜ አይደለም ያለው። መሽቷል!

በቃ! ያለፈው ክፋቱ ይበቃዋል። አዎ ወደ እውነቱ ወደ ብርሃኑ ብትመለሱ እንመክራለን።
▰
የአባቶች የ2016 ዓ.ም የትንሣኤ በዓል መግለጫ (26/8/16)

እግዚአብሔር ቃሉን አክባሪ ነው።

እኛ ስላልታመንን፣ ተስፋ ስለቆረጥን፣ ስለወደቅን፣ በትካዜ ስለተዋጥን፣ ለጊዜው ጠላት በሚሠራው ሴራ የተሳካለት መስሎን እጅግ በኅሊና በአካል ብንቆስልም እግዚአብሔር አምላካችን ለቃሉ የታመነ ነው። የማይዘገይ መሆኑን አውቀን ልንጸና፣ ልንጽናና እንደገናም በንስሐ ራሳችንን ልናድስ ይገባል።

▰
የአባቶች የ2016 ዓ.ም የትንሣኤ በዓል መግለጫ (26/8/16)

"ነጭ ነጯን ውሸት - ከዘመድኩን"

የውሸት አባት፣ ጸላዔ ሠናያት ዲያብሎስ የእግዚአብሔርን እውነት ለመገዳደር የማይፈነቅለው ጉድ የለም። በየትኛውም ክርስቲያናዊ ሕይወት ፈተናው የሚስተዋል ቢሆንም በኢትዮጵያ ትንሣኤ ዙሪያ ግን ከሚያደርገው ዘመቻ ይህንን መጥቀስ ይቻላል፦

1. ቢቻል ሙሉ በሙሉ ማስካድ፦ እውነቱን በሙሉ ውሸት ማስባል
▸ ይሄ ደረጃ የእውቀት ክፍተትን እና ሥጋዊ መለኪያን በመጠቀም ሰዉን ዝግ ልቡና እንዲኖረው የሚያደርግ ነው።

2. ካልሆነ እውነቱን የሚመስል ግን እውነት ያልሆነ እንቅስቃሴ ማስጀመር፦ ጥቂት መረዳትና ልቦና ያላቸው በመጀመርያው ስለማይወድቁ፥ ልክ ስልክ "ሃይ ኮፒ" ተብሎ ሐሰተኛውን ከትክክለኛው ለመለየት በሚያዳግት መልኩ እንደሚሠራው ስለ ትንሣኤው የሚያወሩ ሐሰተኞችን መፈልፈል ነው።

3. "መምህር፣ አገልጋይ፣ አባት" ተብዬዎችን በመጠቀም የተስፋው ቃል ላይ ጥርጣሬና ጥላቻ መዝራት

▸ ከላይ ያሉት ሁለቱ ካልተሳኩ ከቤ/ክ በላይ ክብርና ዝናን የተቆጣጠሩ ሰዎችን በመጠቀም ሰውን አምላኪውን ወገን ማሸፈት ነው።

ሀገር ውስጥ ያሉ 'መምህራን' ጭምር "ትንቢት አትስሙ፣ መልእክት አትቀበሉ" የሚሉን ሲሆኑ መልሰው ራሳቸው "ከአባቶች የተላከ መልእክት ነው" ብለው ላኪውን እንዳንጠይቅ ሲያደርጉ ታዝበናል።

"የአባቶች ትንቢት መልእክቱ ንስሐ ግቡ ብቻ ነው" ያሉን መምህራን "የኢትዮጵያ የዓለም ብርሃንም እኮ ከዚህ ሌላ አላለም" ሲባሉ በነሱ በኩል ባለመተላለፉ የከፋቸውም አይጠፉም።

ነፍስን ከማዳን እና ባዶ ዝናን ከማዳን የቱ ዋጋ አለው?

📌 ከ"በረኸኞቹ" የተላከ መልእክት ሲል የነበረው ማነው?

📌 "በ2015 ዓ.ም ዘመነ ሉቃስ ንጉሡ ይመጣል" ሲለን የነበረውስ ማነው?

📌 "ታቦተ ኢየሱስ ባለበት ቦታ ትተርፋላችሁ" ያለንስ?

× | ግንቦት 2016 ዓ.ም
  www.tg-me.com/Ewnet1Nat

🟢 🟡 🔴
ግንቦት 11 | #_ቅዱስ_ያሬድ ተሰወረ።

ቅዱስ ያሬድ የተወለደው በ505 ዓ/ም አክሱም አካባቢ ሲሆን እናቱ ክርስቲና (ታኡክልያ) አባቱ ደግሞ ይስሐቅ (አብድዩ) ይባላሉ።

ሊቁ በሕጻንነቱ ትምህርት አልገባው ብሎ ይቸገር ነበር። ትምህርት እንቢ ያለው ሰነፍ ስለ ነበር አይደለም። በጥበበ እግዚአብሔር እንጂ።

ጾምና ጸሎትን ያዘወትር ነበር። ልቡናው ደግሞ በእመቤታችንና በልጇ ፍቅር የታሠረ ነበር። አንድ ቀን ግን መምህሩ የነገሩት ቀለም አልያዝህ አለው። ሲፈትኑትም ባለመመለሱ ተገረፈ።

ዱላው በጣም ስለ ተሰማው ቅዱሱ ከመምህሩ ኮብልሎ ማይ ኪራሕ አካባቢ ሲደርስ ደክሞት አርፎ እግዚአብሔር ትጋትንና ተስፋ አለመቁረጥን ከትል አስተማረው።

ከዚህ በኋላ ቅዱስ ያሬድ ወደ መምህሩ ተመልሶ ይቅርታ ጠይቆ ትምህርት ጀመረ። ሊቁም ትጋትንና ጸሎትን ከሰጊድ ጋር አበዛ።

ያን ጊዜ ሰማያዊ ዜማ አልተገለጠም ነበርና በጸሎት ላይ ሳለ ተደሞ መጣበት። ሦስት መላእክት በሦስት ወፎች አምሳል መጥተው አነጋገሩት። ድንገትም ነጥቀው ወደ ሰማያት አደረሱት።

ሊቁ በሰማያት ልዩ ምሥጢር፣ ልዩ ምስጋናና ልዩ ዜማን አዳመጠ። ይህንን ምስጋና ብዙ ቅዱሳን ቢሰሙትም ቅዱስ ያሬድ ግን ይዞት እንዲወርድ ተፈቀደለት።

ሊቁ ወደ ምድር ተመልሶ በታላቅ ተመስጦ አክሱም ጽዮን ውስጥ በሃሌታ አመሰገነ። ቅዱስ ያሬድ ለተወሰነ ጊዜ በአክሱምና ደብረ ዳሞ ሲያገለግል ቆይቶ ከመሬት ክንድ ከስንዝር ከፍ ብሎ ለእመቤታችን አንቀጸ ብርሃንን ደርሶላት ከሃገሩ ወጣ።

በ576 ዓ/ም በተወለደ በ71 ዓመቱ በዚህች ቀን ተሰውሯል።

የቅዱሱ ጸሎትና በረከት ሃገራችንን ከክፉው ሁሉ ይጠብቅልን።       
#_እንኳን_አደረሳችሁ
            ▸ www.tg-me.com/Ewnet1Nat ◂

#ሰላም_ለአጽፋረ_እግርከ
ከዋክብተ ጽባሕ ጽዱላት፥
እስከ ምዕራብ እግር አብርሃ
መልዕልተ አጻብዕ ሰማያት፥
#ከመ_ተሰወርከ_ያሬድ
እምቅድመ ዐይኑ ለሞት፥
አድኅነነ በጸሎትከ እምዕለት እኪት፥
ወባልሓነ እምኵሉ መንሱት።

❮ ትርጉም ❯ #የሚያበሩ_የንጋት_ከዋክብት_ለኾኑ #የእግርኽ_ጥፍሮች_ሰላምታ_ይገባል፤

ጣቶችኽ ሰማያት ላይ እስከ ምዕራብ ድረስ ይበራሉና፤ #ቅዱስ_ያሬድ ከሞት ፊት እንደተሰወርኽ በጸሎትኽ ከክፉ ቀን አድነን፤ ከፈተናም ሁሉ ሰውረን።

#መልክዐ_ቅዱስ_ያሬድ።