ታርቀን እናስታጉለው!

በአንድ ትልቅ ደብር ላይ የእርስ በርስ የካህናት ቅራኔ ይፈጠርና ጠቡ እየሰፋ ሄዶ ብዙዎቹ ይኮራረፋሉ
ይህን የተረዱት የደብሩ አስተዳዳሪም ካህናቱን በሙሉ ሰብስበው ለማስታረቅ ስብሰባ ያደርጋሉ
የተጣሉበት ነገር ሲነሣ ነገሩ ነገር እየወለደ ለእርቅ የተጠራው ስብሰባ የጠብ እስኪመስል ድረስ ሁሉም ተበደልሁ የሚል ስለሆነ አጀንዳው እየሰፋ ሄዶ የቅዳሴ ሰዓት ይደርሳል

በዚህ ሰዓት የደብሩ ቄሰ ገበዝ ይነሣና አሁን የቅዳሴ ሰዓት ስለደረሰ ምዕመናኑም ወደ ቤተ መቅደስ እየገቡ ስለሆነ የእርቁን ስብሰባ ለሌላ ቀን እናድርገውና አሁን ወደ ቅዳሴው እንግባ የሚል ሐሳብ ያቀርባል

አብዛኞቹም እሺ እንደሱ ይሻላል በማለት ሐሳቡን ደገፉት
አስተዳዳሪው ግን እውነተኛ አስተዋይ አስተዳዳሪ ነበሩና
አይ ሊቃውንት በፍጹም ይህንን የእርቅ ስብሰባ አቋርጠን ቅዳሴ አንገባም እንዲህ ተጣልተን ከምንቀድስ እኛ ታርቀን ቅዳሴውን እናስታጉለው
እኛ ተስማምተንና ተፋቅረን ቅዳሴው ይቅር ምዕመናን ለምን ቅዳሴ ታጎለ ብለው ከጠየቁን ታርቀን ነው በሏቸው ብለው ለእርቅ ያላቸውን የጸና አቋም አቀረቡ

😍ይህ ንግግር የሁሉንም ኅሊና ነካቸውና ያዙኝ ልቀቁኝ ተበድያለሁ የሚል ካህን ሁሉ እየተነሣ አስቀየመኝ ባለው ካህን ፊት እየወደቀ ማረኝ መባባል ጀመረ
5 ሰዓት የፈጀው የእርቅ ጭቅጭቅ በ5 ደቂቃ ብቻ ፍጻሜውን አገኘ ይባላል

አስተዳዳሪው እውነታቸውን ነው ተኮራርፈን ከምንሰብክ ተቀያይመን ከምንፈምር የጎሪጥ እየተያየን ከምንጸልይ እየተፎካከርን ከምንጸነጽል ታርቀን ብናስታጉለው ይሻል ነበር

ቤተ ክርስቲያኗን የፍቅር አውድማ መሆኗ እስኪያጠራጥር ድረስ በመለያየት የተለከፍነው ሁሉ ምነው እንደነዚያ አስተዳዳሪ ሁሉን ከእርቅ ብንጀምረው ምናችን ይጎዳል!

ይቅር በሉን ብንባባል ምን ይቀነስብናል!

የትኛውንም አገልግሎት በእርቅ ካልጀመርነው መሪ እቅድ ተዘረጋ፣ ማኅበር ተቋቋመ፣ የተማረ ሰው ተሾመ፣ በቋንቋ ተሰበከ፣ ወዘተ መዳረሻው ወደ ላይ ሳይሆን ወደ ታች ነው።

ወደ አባቶች የምክር ጠጠር መወርወር ድፍረት ቢሆንብኝም የቅዱስ ሲኖዶስ እቅዶችና አጀንዳዎች ሁሉ በመስማማት አሸናፊና ተሸናፊ ሳይኖር በፍቅርና በመተራረም ካልሆነ በስተቀር ያው ተኮራርፎ መቀደስን እንደመምረጥ ነው የሚሆነውና ከውሳኔዎች ሁሉ በላይ በዚህ ጉዳይ ላንለያይና ላንወቃቀስ ስህተቱንና ክፍተቱን ተረድተን ተዋደንና ተስማምተን በፍቅር ቋጭተነዋል የሚል የምሥራች ከውሳኔዎች ሁሉ በላይ ነው።

ይመስለኛል የሁሉም አማኝና አገልጋይ ምኞት ሲኖዶሳዊ ውሳኔዎችን ከመስማት ሁሉ በላይ የአባቶች አንድነትና ፍቅር ነው የሚያስጨንቀው
ፍቅርና አንድነት፣ ትህትናና መከባበር ከውሳኔዎች ሁሉ በላይ ናቸውና እግዚአብሔር የአንድነትና የፍቅር ዘመንን ያሳየን

እኛም ምዕመናንና አገልጋዮች ሁላችንም አባቶቻችን የሁላችንም እኩል አባት ናቸውና የየትኛውም አባት ክብር የእኛ ክብር ነው የማንም አባት መነቀፍና መዘለፍ የእኛ ውርደት ስለሆነ በአባቶች መካከል አንዱን ከመውቀስና ሌላውን ከማንገሥ በአንዱ ከመፍረድና በሌላው ከመደሰት ተቆጥበን አንድነታቸውን እየናፈቅንና እየተመኘን ስለ አንድነታቸውና ስለ ፍቅራቸው እንጸልይ።
@Nigatu5
@Nigatu5
@Nigatu5

#ቅዱስሲኖዶስ

" በጦርነትና በግጭት የመጣ ሰላም፣ የተገነባ ሀገር የለም !! ... ችግሩ በእርቅ እንዲፈታ ለሁሉም ወገኖቻችን የሰላም ጥሪ እናቀርባለን " - ቅዱስ ሲኖዶስ

የጥቅምት 2017 ዓ/ም የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ ምልዓተ ጉባኤ ስብሰባ ተጠናቋል።

ምልዓተ ጉባኤው ከጥቅምት 11 እስከ ጥቅምት 20 ቀን 2017 ዓ.ም. ድረስ መደበኛ ስብሰባውን ሲካሄድ ሰንብቷል፡፡

ቅዱስ ሲኖዶስ በመንፈሳዊ፣ በማኅበራዊና ሀገራዊ ጉዳዮች ላይ ተወያይቶ ውሳኔ ማሳለፉ ተገልጿል።

የስብሰባውን መጠናቀቅ ተከትሎ በቅዱስ ሲኖዶስ መግለጫ ተሰጥቷል።

ከመግለጫው የተወሰደ ፦

" በተለያዩ የሀገራችን አካባቢዎች እየተከሰተ ባለው የሰላም እጦት፣ የእርስ በርስ ግጭት ምክንያት የሰው ሕይወት እየተቀጠፈ፣ አካል እየጎደለ፣ ማኅበራዊ ትሥሥር እየተናደ፣ ሰብአዊ ክብር እየተጎዳ፣ መብት እየተጣሰ፣ በዜጎች ላይ ሥጋትና አለመረጋጋት እየበዛ ሀብትና ንብረት እየወደመ ስለሆነ ጉዳዩ አስቸኳይ መፍትሔ የሚያስፈልገው መሆኑ አጠያያቂ አይደለም፡፡ 

ስለሆነም በጦርነትና በግጭት የመጣ ሰላም፣ የተገነባ ሀገር የለምና በሀገራችን እያጋጠመ ያለውን ችግር ለመፍታት ካለፈው በመማር በጥበብ፣ በማስተዋልና በሰለጠነ አካሄድ በሰላማዊ መንገድ በመወያየት ችግሩ በእርቅ እንዲፈታ ለሁሉም ወገኖቻችን ቅዱስ ሲኖዶስ የሰላም ጥሪውን በአጽንኦት ያቀርባል፡፡ "

(ብፁዕ ወቅዱስ አቡነ ማትያስ ቀዳማዊ ፓትርያርክ ርእሰ ሊቃነ ጳጳሳት ዘኢትዮጵያ ሊቀ ጳጳስ ዘአክሱም ወዕጨጌ ዘመንበረ ተክለ ሃይማኖት)

/ ሙሉ መግለጫ ከላይ ተያይዟል /

@Nigatu5
@Nigatu5
@Nigatu5

የቅዱስ ሲኖዶስ መግለጫ
በስመ አብ ወወልድ ወመንፈስ ቅዱስ አሐዱ አምላክ አሜን፡፡
ከኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ የተሰጠ መግለጫ፡፡
በመንፈስ ቅዱስ የሚመራው የኢትዮጵያ ኦርቶዶክስ ተዋሕዶ ቤተ ክርስቲያን ቅዱስ ሲኖዶስ ምልዓተ ጉባኤ በዓመት ሁለት ጊዜ እንዲሆን በፍትሕ መንፈሳዊ አንቀጽ 5 ቁጥር 164 በተደነገገው መሠረት ምልዓተ ጉባኤው ከጥቅምት 11 እስከ ጥቅምት 20 ቀን 2017 ዓ.ም. ድረስ መደበኛ ስብሰባውን ሲያካሂድ ሰንብቷል፡፡
ምልዓተ ጉባኤው ልዑል እግዚአብሔርን አጋዥና መሪ በማድረግ ስለ ቤተ ክርስቲያናችን መንፈሳዊና ማኅበራዊ አገልግሎት፣ ስለምጣኔ ሀብት እድገት፣ በሀገራችን እየተከሰቱ ስላሉት ውስጣዊና ውጫዊ ፈተናዎች፣ ስለ ሀገር ሰላምና አንድነት፣ ስለ ቤተ ክርስቲያን አስተዳደርና ሐዋርያዊ ተልእኮ ስለ ሰው ልጅ ሁሉ ደኅንነት በስፋት በመወያየት ለቤተ ክርስቲያንና ለሀገር ጠቃሚ የሆኑ ውሳኔዎችን
አሳልፏል፡፡
በዚሁ መሠረት፡-
1. ከጥቅምት 4 ቀን እስከ ጥቅምት 9 ቀን 2017 ዓ.ም. ድረስ የተካሄደው ዓለም አቀፍ ጉባኤ ከኢትዮጵያ ኦርቶዶክስ ተዋሕዶ ቤተ ክርስቲያን መንበረ ፓትርያርክ 43ኛው አጠቃላይ የሰበካ መንፈሳዊ ዓለም አቀፍ ስብሰባ ተሳታፊዎች የቀረበው ቃለ ጉባኤና የአቋም መግለጫ በሁሉም የኢትዮጵያ ኦርቶዶክስ ተዋሕዶ ቤተ ክርስቲያን አህጉረ ስብከት የበጀት ዓመቱ የሥራ መመሪያ እንዲሆን ቅዱስ ሲኖዶስ ውሳኔ አስተላልፏል፡፡
2. በተለያዩ የሀገራችን አካባቢዎች እየተከሰተ ባለው የሰላም እጦት፣ የእርስ በርስ ግጭት ምክንያት የሰው ሕይወት እየተቀጠፈ፣ አካል እየጎደለ፣ ማኅበራዊ ትሥሥር እየተናደ፣ ሰብአዊ ክብር እየተጎዳ፣ መብት እየተጣሰ፣ በዜጎች ላይ ሥጋትና አለመረጋጋት እየበዛ ሀብትና ንብረት እየወደመ ስለሆነ ጉዳዩ አስቸኳይ መፍትሔ የሚያስፈልገው መሆኑ አጠያያቂ አይደለም፡፡ ስለሆነም በጦርነትና በግጭት የመጣ ሰላም፣ የተገነባ ሀገር የለምና በሀገራችን እያጋጠመ ያለውን ችግር ለመፍታት ካለፈው በመማር በጥበብ፣ በማስተዋልና በሰለጠነ አካሄድ በሰላማዊ መንገድ በመወያየት ችግሩ በእርቅ እንዲፈታ ለሁሉም ወገኖቻችን ቅዱስ ሲኖዶስ የሰላም ጥሪውን በአጽንኦት ያቀርባል፡፡
3. በአዲስ አበባ ሀገረ ስብከትና በሥሩ ባሉ ገዳማትና አድባራት ውስጥ እየቀረቡ ያሉ መጠነ ሰፊ የአስተዳደር ችግሮች እንዲፈቱ ለማድረግ ከመንበረ ፓትርያርክ ጠቅላይ ጽ/ቤት ጀምሮ በአዲስ አበባ ሀገረ ስብከት ጽ/ቤት፣ በክፍላተ ከተሞችና ችግር አለባቸው ተብለው በጥናት በሚለዩት አጥቢያ አብያተ ክርስቲያናት ላይ የማጣራት ሥራ እንዲሠራና ውጤቱ ለውሳኔ እንዲቀርብ በሦስት ብፁዓን ሊቃነ ጳጳሳት የሚመራ ኮሚቴ ቅዱስ ሲኖዶስ ሰይሟል፡፡
4. የኦሲኤን ቴሌቪዥን ስርጭት የተቋረጠ በመሆነ በአዲስ መልክ ሁሉንም የአፋን ኦሮሞ ቋንቋ ተናጋሪዎች ማህበረሰብ ባቀፈ መልኩ አገልግሎት እንዲሰጥ የኢትዮጵያ ኦርቶዶክስ ተዋሕዶ ቤተ ክርስቲያን የአፋን ኦሮሞ ኔትወርክ በሚል ስያሜ በጠቅላይ ቤተ ክህነት በኩል ውል ተፈርሞ በአዲስ መልክ የሳተላይት ግዥ እንዲፈጸም ሆኖ አስተዳደሩን በተመለከተ ከኢትዮጵያ ኦርቶዶክስ ተዋሕዶ ቤተ ክርስቲያን መገናኛ ብዙኃን ድርጅት ጋር በአንድ ሊቀ ጳጳስና ቦርድ ራሱን በቻለ ሥራ አስኪያጅ እየተመራ አገልግሎቱ ከነበረው በተሻለ ሁኔታ ተጠናክሮ እንዲቀጥል ቅዱስ
ሲኖዶስ ወስኗል፡፡
5. የሰዋስወ ብርሃን ቅዱስ ጳውሎስ መንፈሳዊ ኮሌጅ ለደቀ መዛሙርት የሚሰጠው የምስክር ወረቀት አድቫንስ ዲፕሎማና ዲግሪ እንዲሆን ሥርዓተ ትምህርቱ ለሚሰጠው የትምህርት ማስረጃ በሚመጥን መልኩ ተሟልቶ፣ ሊኖረው የሚገባው የሰው ኃይል በየዘርፉ ተጠናክሮ ወደ ትግበራ እንዲገባ ቅዱስ ሲኖዶስ ወስኗል፣
6. የመንበረ ጸባዖት ቅድስት ሥላሴ ካቴድራል በሥነ ሕንጻና በኪነ ጥበብ በዓለም ደረጃ ከፍተኛ አድናቆትና ክብር የሚሰጠው ከመሆኑ በተጨማሪ በመዐርገ ጵጵስና ፕትርክና የሚሾሙ አባቶች ሥርዓተ ሲመት የሚፈጸምበት፣ ጥንታዊና ታሪካዊ ካቴድራል መሆኑን ታሳቢ በማድረግ ለዕድሳት ሥራው የገንዘብ ድጋፍ እንዲደረግለት ቅዱስ ሲኖዶስ ወስኗል፤ በተጨማሪም ምእመናን እስከ አሁን እንደሚያደርጉት ሁሉ ለእድሳት ሥራው አስፈላጊውን ድጋፍ እንዲያደርጉ ቅዱስ ሲኖዶስ
ያሳስባል፡፡
7. የኢትዮጵያ ኦርቶዶክስ ተዋሕዶ ቤተ ክርስቲያን የሀገራዊ ምክክር ኮሚሽን ዐቢይ ኮሚቴ ሥራውን አጠናክሮ እንዲቀጥልና በንቃት እንዲሳተፍ ሁሉንም አህጉረ ስብከት ባቀፈ ሁኔታ የአጀንዳ መረጣና ተሳታፊ የመለየት ሥራ እንዲከናወን ሆኖ ዐቢይ ኮሚቴው የሥራ ዕቅዱንና አፈጻጸሙን ለቋሚ ሲኖዶስ እያቀረበ በማስወሰን እንዲሠራ ቅዱስ ሲኖዶስ ወስኗል፡፡
በአጠቃላይ ቅዱስ ሲኖዶስ በመንፈስ ቅዱስ እየተመራ ላለፉት ተከታታይ ቀናት በመንፈሳዊ፣ በማኀበራዊና ሀገራዊ ጉዳዮች ላይ ተወያይቶ ተገቢውን ውሳኔ በማስተላለፍ መደበኛ ስብሰባውን በዛሬው ዕለት በጸሎት አጠናቅቋል፡፡ መሐሪና ሁሉን ቻይ የሆነ እግዚአብሔር አምላካችን ለሀገራችን፣ ለሕዝባችን፣ ለዓለሙ ሁሉ ሰላሙን፣ ፍቅሩንና አንድነቱን ይስጥልን፡፡
እግዚአብሔር ኢትዮጵያንና ሕዝቦቿን ይባርክ
ወስብሐት ለእግዚአብሔር አሜን
አባ ማትያስ ቀዳማዊ ፓትርያርክ
ርእሰ ሊቃነ ጳጳሳት ዘኢትዮጵያ
ሊቀ ጳጳስ ዘአክሱም
ወዕጨጌ ዘመንበረ ተክለ ሃይማኖት
ጥቅምት ፳፩ ቀን ፳፻፲፯ ዓ.ም.
ኢትዮጵያ አዲስ አበባ
@EotcLibilery
@EotcLibilery
@EotcLibilery