هذي ريشة عباس...كلها حب واحساس
نعمة هيه وتنباس...مو عالارض مرمية


للنهر زينب تعنت...ريشة شافت بيها اثر دم
طاحت اعليها وتنادي...بيها ريحت خوه اشتم
ريشة لو انظرها افرح...كلبي ما يبقاله كل هم
هسه يا وسفه اشوفن...دم اخوية اعليها ملتم

من شفتها اعله الكاع...اتبده كل حيلي وضاع
تنشهگ جن نعناع...مو عالارض مرمية

ريشة بيها آثار ابوية...من يلبسها الكفيلي
لو اشوفنها اعله راسه...يشعر ابراحه دليلي
من عكب ما طاحت ادري...ابد ما يبرد غليلي
طاحت وطايح اماني...ما انامن بعده ليلي

لو شفتها اكبالي...ابكل فخرها اتلالي
شمعة تضوي آمالي...مو عالارض مرمية

ريشة بيه شكعد عجايب...بيها نار وبيها جنة
تنطي للعدوان جمره...وتنطي للفقره محنة
جانت اعله راس اخوية...خيمة تجمع كل شملنة
وسفة من طاحت تريبه...ركضوا اوحركوا خيمنة

ريشة تارسها الهيل...تندثر تحت الخيل
احله من نجمة ابليل...مو عالارض مرمية


شالت الريشة ابدمعها...ومسحت الدم اللي بيها
خوية ما تخطرلي جانت...جثتك انته امطشريها
عالرمح راسك يلالي...وريشتك دمك عليها
اهنانه راية اهنانه جفين...اهنانه جربة امطيحيها

اصفه حتى امن الماي...وحده بس بيها اهواي
التارسه الدنيا افياي...مو عالارض مرمية

ريشة تشبه جف ابويه...من تجي يمه اليتامة
تنطي حنية ابدفوها...يمها تشعر بالسلامة
والله يا وادم عجيبة...يمها تلبد كل حمامة
كل هذا ابريشة وحده...چا شيسوي ابكلامة

اشمحله لو تكلم...ولهوه ايتبسم
الكل جروحي بالسم..مو عالارض مرمية

تم باقر.الافرجي

ها قد أتى النداء...حي على العزاء
اجعلوها كل ارض كربلاء
‏
هل اهلال الدموع...هنيال اليهل دمعه
يذكر طيحت حسين...ايواسي فاطمة البضعه

هنيال اللبس اسود عله حسين ومصابه
ويتذكر كطع نحره وبقه دمه خظابه
وركضوا عالجسد كلهم فرح سلبو ثيابه

يذكر صيحة ايتامه
ونار الحركت اخيامه...حسين

راسه اعله الرمح نابت
ويمه يظحك الشامت...حسين

الجسمُ في العراءْ...باقٍ بلا رداءْ
وعليهِ قد بكت دم السماء
‏
هل اهلال الاحزان...هنيال البده ينحب
وللخدمه يشد حيل...ويتذكر هظم زينب

ويتذكر ركض زينب عله التل ابالمها
ابلا كافل بقت بعد الاهل حركو خيمها
ويتبختر شمر يمها ابحقد سب وشتمها

زينب صاحت ابونه
حسيني لا توجعنه...يخيل

ركضت وبجدم حافي
كافي امن السحك كافي...يخيل

يا سيد الجمال...يا مظهر الجلال
يا عظيمً قد تضرج بالدماء

علك رايه عالبيت...بيها اذكر كمر هاشم
طاح ابلايه جفين...وبعينه السهم نايم

صعبه اعله الغيور الكال انه يا خيتي كافل
راسه اعله الرمح ويعاين الحرگ المحامل
ويسمع صرخة اسكينه يعمي يا ابو فاضل

بسمه لمن اتنخن
راسه اعله الرمح دخن..غيور

دمه غطه كل رمحه
دمعة زينب اتجرحه..غيور

رأس على القنا... قد هيَّج الضنى
منظر ابكى جميع الانبياء

هل اهلال الونين...عريس الدمه حنته
واليشبه رسول الله...تتفطر ضمه شفته

رمله بالدمع ويه الشمع تشعل حزنها
وليله بالخيم تدعي يجي سالم ابنها
شجره ابلا رحم اهل الغدر كسرو غصنها

ام اطفي بالشمعه
بالونه وتهل دمعه...حزن

ام تتنطر الجيه
يرجع جثه مدميه...حزن

شبيهُ احمدا ... قد غاله العدا
واليهِ امهُ تدعي الدعاء

هل اهلال الجروح...وايام السبي اقتربت
اطفال ونسه خوف...من حرك الخيم هجت

يا هظمة طفل كله عطش سهمه يصيبه
وقرآن ابرمح ويه الحرم يمشي عجيبه
وي ذاك العليل امجتف ابحبل المصيبه

طفله ابجفها مجويه
سلبو منها ترجيه...ظلم

طفله تطلب الوالد
راسه اعله الرمح كاعد...ظلم

يا طفلة الحسين...ماتت تهل عين
اذ عليها قد بكت كل النساء

باقر الافرجي

احفظ هالدرس زين...من انصار الحسين

لتلزمك كباره ابدرب الحسين
عن موقف حبيب ابموقفك وين
شيخ ابلهفه راح الزينب وصاح
فدوه الشيبه الج والدمعة العين

فدوه ولا تخافين...من انصار الحسين

اخدم بالفعل لا تتبع اللون
جان اسود شكل ابيض فعل جون
علم عينك اعله البجي لحسين
تتزكه ابدمعتك هاي العيون

اتحسبك دمعة العين...من انصار الحسين

اتبع بالعشك خطوات عابس
ابحب حسين كاشخ مو ملابس
شد احزامك وعوف الملامه
ابدرب الخدمة يا محله التنافس

اخدم طول السنين...من انصار الحسين

يالرايد تفوز ابدنيه والدين
اقره عن زهير وافتهم زين
لتغرك مناصب لا ولا المال
بيع الدنيه كلها واتبع حسين

بيها اتنال الاثنين...من انصار الحسين

اقره عن برير اقره ابمشاعر
صاح وياك رغمً عالمخاطر
الحمد لله اجينه واتبعناك
لا متهمني كل هاي البواتر

لو ذبحوني مرتين...من انصار الحسين

لا تيأس لون متروس الذنوب
مثل الحر تعنه الحظرته وتوب
يقبل جيتك الصدره يظمك
وبجفه الحنون ايزيح العيوب

يشفع للمذنبين...من انصار الحسين

تمت باقر الافرجي

بِسْمِ اللهِ الرَّحْمَنِ الرَّحِيمِ

بَعْدَ رجُوْع الإِمَام الحُسَيْن مِن مَصْرَع الإِمَام العَبَّاس كأَنِّي بسَيِّدَتَنَا وَمَوْلاتَنَا العَقيْلَة تقول

ردلي الحسين ابدموعة...يمشي محنيه ضلوعة
وينه عباس اسألت....كلي يا زينب متت
راح عباس
‏
رد اخويه للمخيم يمشي وجدامه اتعثر
ليش هذا الحال كلي تمشي مكسور الظهر
كال اسنديني يزينب ظهري طاح اعله النهر
وآنه من شفته افهمتها راح عباس الكمر

راح ابو الغيره امندينه... عالشريعة اموذرينه
وبغيابه اتعذبت...كلي يا زينب متت
راح عباس

عالوطيه شفته نايم هوه مو طبعه ينام
ابلهفه رحت اركض اشبكه لچن منعتني السهام
وجهه ذاك الجان كمره يختي غطاه الظلام
رغم هذا وما نساجن يعتذر وده سلام

كلي سلملي اعله اخيتي...لا تناطر بعد جيتي
مدمي عالشاطي طحت...كلي يا زينب متت
راح عباس
‏
ذيج عينه الجان بيها شكد سوالف دافية
عالسهم واصوابه هسه ليش صارت غافية
راح وبروحته يختي اخذ حتى العافية
اسنيني ويامي ابرحيله هيج احسن طافية

ابلا يسار ولا يمينه..بالسهم مطفيه عينه
والله حيل اتألمت...كلي يا زينب متت
راح عباس
‏
ريت كبله الموت اجاني ريت حزو ركبتي
ها يملك الموت وينك چا شسوي ابدنيتي
كل هوه الدينا احسه انكطع ميطب ريتي
راح عباس امن دينه شلون تطفه جمرتي

مو فقط كاسرلي ظهري...ابطيحته مخسوف عمري
اخلافه آنه اتكسرت..كلي يا زينب متت
راح عباس

الدنيا ما تسوه يخيتي لو رحل عنها الاخو
الخوه هيه اتريد واحد مثل عباس الكفو
عالشريعة مكطعينه وطلب من عندي العفو
ابو فاضل صح اخويه لچن بي ريحت ابو

عالنهر دكاله ثايه...ابدمه خط للخوه آيه
راح كفالي صحت...كلي يا زينب متت
راح عباس
تم باقر الافرجي

للحومه هالنازل...حيوا ابو فاضل
حي الله عباس

طالع من الخيمه...يرعد مثل الغيمه
وصاح عم الساده

جيت آنه ألعباس...وراس يردم بالراس
شردت كل القاده

ارض الطف احدودي...وبيها اتمشه ابزودي
ابصوت مرعب ناده

لا ما الكم راحه...وآنه راعي الساحه
بيدي جنها اكلاده

(واحجاياته كلها امزامط)

آنه ابن داحي الباب..اليوم اسويها اتراب
ياهو يتدنالي

آنه لا ما مهزوم...أله اخليها الكوم
اتخاف من اخيالي

الموت هو ابسيفي...قائد كلشي ابكيفي
وأفعل التحلالي

زينب هالطلبت ماي..وهذا آنه اسمي السگاي
بس الجود ابالي

(اشهد بيها يا وادي الطف)

نزل واشمحلاته...ابخوذته وريشاته
وراسه دخن غيره

هذا ياهو اللي غار...يشبه علي الكرار
الجيش ضل ابحيره

ابسيفه هد اعليهم...بس رعب ماليهم
الدنيا جنها اصغيره

لاخذ حكي امربع...ياهو الالكم يفزع
صاح شيخ الديره

(اخذ حكي بيها امربع)

ما تهمه العده...برز ليهم وحده
امسيطر اشمحلاته

الحومه طبها وفرحان...هذا شيخ الفرسان
ودخنن ريشاته

ماكو بيهم زلمه...يوصل يمه بهمه
ويكتل ابخزراته

الحرب اكبر عيده...اليوم امرهم بيده
جن علي صولاته

( صار ابسيفه زلزال الطف)

زاح الجيش الوفاي...وصل يم راگ الماي
سيطر اعله احدوده

مثل الموت الحمر...عالنهر يتبختر
يمشي وشايل جوده

صاح بس جن زلزال...الروس اسويها اتلال
والجثث ممدوده

ياهو اليوصل يمي...وعزم حيدر عزمي
كل زودي من زوده

(ومن القاده متروس الشط)

تم باقر الافرجي

الخميس./٦/٣٠

خليني...ابخيمتك
وفقني...الخدمتك
يا أبا عبد الله
‏
خليني اعيشن عمري بالامك
وبنص روحي اشعل جمرة اخيامك
واشتسوه حياتي وانته ما بيها
تحله ايامي كلها امن ذكر ايامك

عيشني...ابرحمتك
وفقني...الخدمتك
يا أبا عبد الله
‏
كل عمري وسنينه فدوه لعيونك
ارزقني المشي ويه اليحبونك
وعثرني لون امشي ابدرب مابي
وادم تبجي لمن تذكر اضعونك

هيمني...ابحظرتك
وفقني...الخدمتك
يا أبا عبد الله
‏
يا اجمل مدينه احبسني بسوارك
شد روحي علگ بجفوف زوارك
دليني اعله درب الحب مثل عابس
خل اتصير كل ايامي عاشورك

موتني...ابمأتمك
‏وفقني...الخدمتك
يا أبا عبد الله
‏
مو بهدومي اكشخ كشختي بحبك
ريت الموت ياخذني وانه بدربك
يالعطشان لجلي وانته راعي الماي
شكد حنيه شايل سيدي بكلبك

بجيني...الهظمتك
‏وفقني...الخدمتك
يا أبا عبد الله

يا اول عطش عالماي متغلب
حكي لو اضل بردانك امجلب
خل راسي يشيب وآنه بالخدمه
يا محلاها اجيك ابظهري المحدب

غطيني...ابنظرتك
وفقني...الخدمتك
يا أبا عبد الله
‏
حركه انطيني بيها اتذكر اعيالك
من مسبيه تمشي زينب اكبالك
راسك عالرمح وتعاين اليجري
بالسوط وحبل متعذبه اطفالك

جويني...ابجمرتك
وفقني...الخدمتك
يا أبا عبد الله
‏
تم باقر الافرجي

‏
يبن الحسن...جار الزمن
يمتى تجي اتزيح المحن
وكل الارض يا مولاي...قسط وعدل تمليها

اتنطرك يبن الحسن كل جمعة
افرش ورد واشعل الك جم شمعة
ومن ما تجي اطفي الشمع بالدمعة

دمعي يهل...وكلبي يضل
ابنار انتظارك يشتعل
من ابنظرتك ليه...آثامي فدوه امحيها

ادري اشكثر تقصيري جارح كلبك
خالي الوفاض وما الي بس حبك
وفقني فدوه حته اهيم ابدربك

ارزقني عشگ...بي احترگ
خليني ادورنك صدگ
وخليني اخجل مولاي...من عالذنوب انويها

لو انوي اذنب آنه يا محبوبي
خليني اذوبن مستحه امن ذنوبي
فشله امن امامي لو يشوف عيوبي

اذنب لچن...يبن الحسن
‏تحظني ياليحظنك وطن
الدنيا ما تسوه ابلياك..يالذكرك امحليها

اين استقر بيك النوى چا وينك
بالسهله لو يم كربلاء حسينك
تبجي وتون لمصيبته الله يعينك

يالمنتظر...يمته الخبر
اسمع المهدي قد ظهر
أمن يجيب المظطر...هالدعوه دوم ادعيها

يمته تجي ودين الصحيح اتظهره
والكسر ظلع امك اتصلبه ابشجره
وتاخذ ابثار حسينك ودم نحره

اتشيل العلم...وتنصب خيم
بس من ذهب واحنه الخدم
راية جدك يالموعود...السابع سمه اتعليها ‏

تمت باقر الافرجي

(ميمر)

اتريد ترضي الزهراء...اخدم حسين ابنيه

بالك اتماشي الما يحب الخدمة
وخاوي اليحب ادموع عينه ولطمة
ابدرب ابو الاكبر يا حلات اللمة

اشمحلها لو تحجي الناس...سهرتهم احسينيه

لتغرك الدنيا تره مكضيه
وهنياله اليكضي العمر لطميه
يكسب رضه الزهره اليصفي النيه

بالمحشر اتنادي اعليك...يا اهلاً ابهل جيه

بالخدمة لتخلي الشهره كل همك
هو المهم يقبل حسينك بسمك
صيتك اشما يكبر ويظهر نجمك

يتهدم ابلايه حسين... احفظها هاي اوصيه

لا تطعن ابخادم ولو بالچلمه
احذر تره جرح الحسين اتلجمه
كل ابو من تحجي اعله ابنه اتألمه

وشحال لو جان حسين...الكله وفه وحنيه

اخدم حسينك وعيف القيل وقال
عالنيه ويحاسب تره موش افعال
لا ولد ينفع باجر اشينفع مال

بس خدمة حسين هناك...بالمحشر الهويه


تمت باقر الافرجي

نزله للإمام الحسين عليه السلام
🍃🍃🍃🍃🍃🍃🍃🍃🍃🍃🍃
يا اول عشگ...يا حبي الصدگ
ما عوفك يالغالي ما عوفك
🍃🍃🍃🍃🍃🍃🍃🍃🍃🍃🍃
يا اول يا آخر يا حبي الصدگ
يالبسمك تحلالي سالوفة عشگ
اتمنه لو حبك يحرگني حرگ
يالكلبي ابطاري اسمك نبضاته تدگ

ما عوفك ابد...لا والله عهد
ماعوفك يالغالي ماعوفك
🍃🍃🍃🍃🍃🍃🍃🍃🍃🍃🍃
يالخيرك غطاني وتارسني ترس
يالحبك يحييني وبكلبي انغرس
معشوگي ومحبوبي واغله امن النفس
اشما اردد بحروفك بالراحه أحس

تبقه انته النبع...للدين وشرع
ماعوفك يالغالي ماعوفك
🍃🍃🍃🍃🍃🍃🍃🍃🍃🍃🍃
يالرسمك بعيوني وبرموش غطيت
يالاسمك بضلوعي شلته وضميت
وبريتي بس عطرك لوحيد شميت
يحسيني يالاول بالكون حبيت

يالحبك سند..لو حلت شدد
ماعوفك يالغالي ماعوفك
🍃🍃🍃🍃🍃🍃🍃🍃🍃🍃🍃
يا بسمة كل عمري ويا اصل الضوه
قرآني وأيماني يالذكرك دوه
لو ما بي من عطرك ما اشم الهوه
ولغيرك دلالي ما رف وهوه

ما اهوه ابد...غيرك يالعمد
ماعوفك يالغالي ماعوفك
🍃🍃🍃🍃🍃🍃🍃🍃🍃🍃🍃
بجفوفك حنيه متروسه وخجل
يم بابك تتحقق احلام وأمل
كل واحد ما حبك ميفيده عمل
والينكر افظالك ما عنده عقل

اليلطملك صدر...بالجنه الحشر
ماعوفك يالغالي ماعوفك
🍃🍃🍃
🍃🍃🍃🍃🍃🍃🍃🍃

تمت
كلمات باقر الافرجي

ملاحظه)
الافرجي وليس الفريجي

رغم درب السبي...مشه ضعن النبي
عزمنه . صبرنه. امن خويه ماطاح

زينب الحره ابدمعها...وكفت اتحاجي اخوها
خوية أمن يابو فاضل...اختك الما طيحوها
رغم سوط اللي اعله متني...دمعتي ما شاهدوها
ونتي ابصدري اكتمتها...رغم ما امي اشتموها
واسمع الشامت يكلهم...هذي المدللها ابوها
ابعبره مخنوكه نخيتك...من اديه جتفوها

نبجي ابدمع خافت...لا يسمع الشامت
عزمنه . صبرنه. امن خويه ماطاح

هوس ابراسك يخويه... حتى ابجي وهو يسمع
بس وحكك جني شمعه...عيني ضلت سكته تدمع
ابجي واحجي ويه دمعي... بالك اليم غربه تلمع
ما اريد الغربه تحجي ...شفنه دمع الحره يطلع
الزيد الحسره ابدليلي...وكلبي بهمومه ايتصدع
يظحك الشمر ويكلهم...هاي خوها اللي تكطع

لبسنه يا كمر...ثياب العز فخر
عزمنه . صبرنه. امن خويه ماطاح

خوية وارقية العزيزه...تدري بعدك ما رعوها
والشمر لمن فهمها...من رقية اتريد ابوها
ابراس ابوها يمها هوس...طفله وشكد روعوها
قافلة حزني يكافل... ابيا طريقة استقبلوها
بالطبول اوبالهلاهل...هل شماته حاوطوها
هذا كله وما جزعنه...ولاكو چلمة اللي اسمعوها

لا ما همنه الالم...الخدر عدنه الاهم
عزمنه . صبرنه. امن خويه ماطاح

كلشي سلبوا خوية لاچن...ماكو واحد مس عبينه
ما تركنه الشيله لحظه...رغم ما جتفوا ادينه
امن المدينه اطلعنه خويه...وانته حداي الظعينه
وبعدك اليحدي شمرهم...يصرخ اويظحك علينه
وجندي منهم ضل يسولف...وهو فرحان ابجينه
عالنهر طاح الكفلهم...ابلا يساره ولا يمينه

صح رحت اميسره...بس آنه مخدره
عزمنه . صبرنه. امن خويه ماطاح

خوية سهله ذني كلهن...بس الاصعبهن عليه
الكلش اذتني ابغيابك...چلمة اليا خارجيه
وآنه جبريل ابعظمته...ينحنيلي ابكل مسيه
صعبه من ادخل قصرهم...امجتفه اخذوني وسبيه
خويه بيتونه ابخرابه...ماتت اكبالي رقيه
لمن الظالم اجاها...بالطشت جتها المنيه


طبينه للقصر...مامسوا الخدر
عزمنه . صبرنه. امن خويه ماطاح

تمت والحمد لله
باقر الافرجي

يمته انتوب...كافي اذنوب
اذينه المهدي اهواي
◾◽◾◽◾◽◾◽◾◽
اكعد لحظة وأسأل روحك اشويه
لون المهدي اجاني ابعينه صد ليه
الصدك يلكاه لو بس الجذب بيه
مخلص بالعمل لو ماكو كل نيه

شكد آثام...جنها اسهام
اذينه المهدي اهواي
◾◽◾◽◾◽◾◽◾◽
اكعد ويه روحك واحجي هالجلمه
ابكلب المهدي من اذنوبي جم لجمه
لون يسألني ليش آه اشكثر زحمه
شلون ابيا وجه اكصد واجي يمه

ابلا رحمه...شكد زحمه
اذينه المهدي اهواي
◾◽◾◽◾◽◾◽◾◽
فكر لو امامك يوكف اكبالك
ويكلك ليش متعدلهن افعالك
وليش اتميل ويه كل هوه احوالك
لون اتحبني خل تتصدق اقوالك

اكصد ليك...بيدي اشريك
اذينه المهدي اهواي
◾◽◾◽◾◽◾◽◾◽
اتخيل لو اجه ويعدد انصاره
ويبعدك لأن ما تحفظن اسراره
يصد عنك يبعدك هو من داره
تطلع منكسر والدمعه تتجاره

وين اتروح...كافي اجروح
اذينه المهدي اهواي
◾◽◾◽◾◽◾◽◾◽
چا يمته العمر ينزعهن اذنوبه
والمهدي ابصدق اعلن اله توبه
اليعشك من صدك ما ينسه محبوبه
وبكل ليله دمعه ايغطي مكتوبه

كل تقصير...جرح ايصير
اذينه المهدي اهواي
◾◽◾◽◾◽◾◽◾◽
اتوجهله ابصدق وهمل دموع العين
اجيت ابلا عمل بس عندي حب حسين
لو صديت وجهك آنه اروحن وين
باب الرحمة انته وسيد الكونين

غايب ليش...وحنه انعيش
اذينه المهدي اهواي
◾◽◾◽◾◽◾◽◾◽
تم باقر الافرجي

خدمتك هيه النجاة...بالحياة وبالمماة
اسال الله الثباة...ياحبيبي ياحسين
◾◽◾◽◾◽◾◽◾◽
وبـطـريـقـك اســال اللـه الادامــه
بالحشر افضل وسم هاي الخدامه
بـيـوم يُــدعـا كــلُ واحــد بـإمـامه
حسين امامي هالجواب افضل كرامه

الما يحبك يالحبيب...بالحشر ضنه يخيب
الكل جرح انته طيب...ياحبيبي يا حسين
◾◽◾◽◾◽◾◽◾◽
آنه شلي ابعمري لو ما بي خدمتك
الكـون عـايش سيدي كله بسفرتك
الارض تـفتر بالعكس لو ما رحمتك
الجنـه هـيه منوره من ضي جبهتك

الجنه من نورك تنور...بخنصرك فاحت عطور
كل ملك بيها يدور...ياحبيبي ياحسين
◾◽◾◽◾◽◾◽◾◽
اشـعر بـجـنه لـون احـظـر مجالس
ثــوب اسـود بالـطـم لـو آنـه لابس
ثوب من ياقوت جن لبسني عابس
تعمه عيني لو دموعي بيها حابس

تحله بسمك دمعتي...وتعله بسمك ونتي
بـيها اظـمن جـنتي...يا حبيبي يا حسين
◾◽◾◽◾◽◾◽◾◽
يـمن مـهبط للمـلائك صـار كبرك
مـا احـس آنـه بـشر لـو مـا اذكرك
شنـهو عمره الما يحبك والينكرك
وانته النه يا امامي امظحي عمرك

لو اظحيلك عمر...وكسر بالطمي الصدر
ما اوفيلك كسر...يا حبيبي ياحسين
◾◽◾◽◾◽◾◽◾◽
يـمن كـبرك صار للوالاك جنه
‏وعـطر شـباجك ابد ماكو احله منه
‏والتنخه بيك لا ميخيب ضنه
‏انته اسمك ينكط احساس ومحنه
‏
كلبي ما يسمح يصير...غيرك ابنصه امير
رددتـها مـن صـغير...يا حبيبي ياحسين
◾◽◾◽◾◽◾◽◾◽
ذكر اسمك يا حسين افضل عباده
الما يحبك باجر اشينفع عناده
والله متفيد الصلاة ابلا شهاده
ابطيحتك حتى العرش اعلن حداده

انته مفتاح القبول...الما يحبنك جهول
باقي حبك ما يزول...يا حبيبي يا حسين
◾◽◾◽◾◽◾◽◾◽
تمت
والحمد لله

كلمات
باقر الافرجي

للعليله عليها السلام

يا بويه خليني اوياك...يالشوفتك عافيتي
لو ناوي عن بيتي اتروح...يصبح كبر جن بيتي

وقت السفر حان...وبكلبي نيران
خليني اوياك
◾◽◾◽◾◽◾◽◾◽
ليش بويه مالي محمل...وي محاملهن خواتي
ما اتعبك يشهد الله... ابسرعه البسها عباتي
مالي طاقه عله اوداعك..سوده تصبح كل حياتي
ما اموت ابعلتي آنه...ابغيبتك والله مماتي

ليش امن اصد آنه اعليك...وجهك تديره ابدمعه
حس كلبي حان الفراک...ابهل روحه ما من رجعه

ما لي انه امچان...وبكلبي نيران
خليني اوياك ‏◾◽◾◽◾◽◾◽◾◽
لو عفتني وليلي خيم...بويه والتم ابضلامه
وآنه متعوده اعله حظنك..اشلون اكدر بعد انامه
اكظي ليلي ابجي سكته...حسرتي حسرة يتامه
والله حيره ابقه اكلك...مدري اكلك بالسلامه

ازغيره مو مال افراك...والدمعه تاكل خدي
اشعنده الزمن بويه وياي..فجأه خذك من عندي

دمعاتي نهران...وبكلبي نيران
خليني اوياك
◾◽◾◽◾◽◾◽◾◽ ‏
بويه بعدك لسه يمي...ليش احسن شاب رمشي
ريت ميته ولا اشوفن...هالضعن من يبدي يمشي
عني كلكلم لو مشيتوا..ياهو يحمل بعد نعشي
كون اموتن عله احظانك...ما اريد ابعمري كلشي

جسمي ما ضل بي حيل..ماي وتبده بصحره
وحشه العمر بويه ايصير...ليل ما بي گمره

ضل جفني سهران...وبكلبي نيران
خليني اوياك
◾◽◾◽◾◽◾◽◾◽ ‏
اهواي راح اشتاك اشوفك...انتظر جيتك اليه
تنلجم روحه اليفارك...اتخنكه حيل المغربيه
الدكت الباب اعيونه تربي...بَلكي منهم تصح جيه
الوحده تكتل وآنه طفله...وصار حزني يحدي بيه

اكعد انه ابتالي الليل...ابدي ابدمعتي ارسمك
بمناشغي وبالونات....بالحسره اضل اشمك

متروسه احزان...وبكلبي نيران
خليني اوياك
◾◽◾◽◾◽◾◽◾◽ ‏
انطيني حظنك خل اشمه...باجر اتطشره الحوافر
انطيني خدك خل ابوسه...العل رمح ينشال باجر
خل عباتك تبقه يمي...ايفرهدوها ابيوم عاشر
والله صعبه تبقه وحدك...عالخيم تهجم عساكر

اتمنه اروحن وياك... بالعاشر ارويك الماي
وتمدد اويه طولك...حتى اصيرله افياي

يالحظنك اوطان...وبكلبي نيران
خليني اوياك ◾◽◾◽◾◽◾◽◾◽ ‏
تمت باقر الافرجي

ذبلني انتظارك...يمته يهل نهارك
يا مهدي يا مهدي

اشما طال العشك هالوادم اتمله
فقط حبك اشما يعتك يصير احله
ويمر الليل كلمن يحجي وي خله
وآنه اشعل شمعتي وخلي احسبله

واسئلها بنحيبي...چا وينه حبيبي
يا مهدي يا مهدي
‏
معروف اليحب اهواي يتبهذل
يظل محتار يدك بيبان يتوسل
بس أنته اليحبك يصبح امدلل
يمته ابشوفتك عيناي تتكحل

يالحبك تجاره...الما بيها خساره
يا مهدي يا مهدي

الك مشتاگ تدري بكلبي يالمهدي
اجيتك منكسر غيرك انه شعندي
اجيت بحبك وحسره ودمع خدي
ابابك آنه واكف وكفت امجدي

يالبسمك ندائي...متخيب رجائي
يا مهدي يا مهدي
‏
‏
خريف الشوگ ذبل روحي يا مولاي
يمته افتح عيوني وبيها اشوفك جاي
وتمسح راسي وتنشف دمع عيناي
من انصاري انته ادكلي ومشي وياي

ابعرش الباري اسمك...خليني اخدمك
يا مهدي يا مهدي

يتيم ومنكسر مديت الك ايدي
تعيد الناس وآنه بشوفتك عيدي
قريب انته علي اقرب من اوريدي
كتبت اسمك حرز علكته انه بجيدي

يالاسمك اماني...من ضلمة زماني
يا مهدي يا مهدي
‏
ويـن الـكه يبو صالح يـشبهـونك
الشمس تسجد خجل يم لمعة اعيونك
هاي ايتام كل جمعة ينطرونك
ابدمعه وحسره يالغايب يندبونك

الندبه ابدمعه نقره...من اعلينه نظره
يا مهدي يا مهدي


‏
تم باقر الافرجي

يا ابا الحسن...حبك وطن
بي ندخل الجنة عدن

الحبك ابد ما يحتار...عالصراط انته اتعبره

انته الامير ابأمر رب القدرة
نفس المحمد آية الله الكبره
معرفته معرفتك جعلها وسره
بيك اتمم الدين ونعمته وأمره

انته النبأ...وسورة سبأ
كل شي انوجد بيك ابتدأ

كل الملك والأفلاك...بجفك تسير امره

بيك اودع الباري العلم والحكمة
كل نبي من عندك اخذ كل علمة
ابلا واسطه يحب الجلاله يكلمة
وبجفك التدبير كله مسلمة

بحبك نحس...جن وأنس
سجدة الك حتى الشمس

عالعرش اسمك مذكور...الرب بعظمته ايذكره

اسمك ذخر يابا الحسن للشيعة
امرك فرض واجب علينه انطيعة
انته الامير والك تحله البيعة
نفخر بحبك سيدي ونذيعة

حبك سند...يوم الوعد
ما ننسه ذكرك للابد

اسمك حرز دنيا ودين...لا ما ينمحي ذكره

يا ابا الحسن نجيته بسمك ذلنون
واملاك يم العرش بسمك يدعون
لولاك ما ينخلق كلشي ولا يكون
منك والك ياسيدي كل هالكون

يا قل هوه...انته الضوه
بالمحشر بيديك اللوه

عالشيعه يرف يا مولاي...لا تنساني بالنظره


يم بابك اتزاحمة املاك الكون
يطوفون بيتك يا علي ويلبون
منك علم كل جمعة هم يزدادون
كل العمل توقيعه بيدك يدرون

فوك العرش...اسمك نقش
وحبك نهر بي ننتعش

باء البسملة ندريك...وبلياك ما نقره

تم باقر الافرجي

هالليلة جيت المجلسك يا صاحب الزمان
يالماكو غيرك روحي يمه تشعر ابأمان

يمته نتلاگه...روحي مشتاگه .
يا صاحب الزمان
‏
البشر لو يختنك ياناس...وسهم الضيم اذا صابه
يحس اهمومه كلها اتروح...من يتلاكه بحبابه
بس محبوبي ما معلوم...بيته واكصد البابه
طفل وبليل راد امه...هذا حالي بغيابه

تحظر مأتمنه انه عندي علم بيك
يالمهدي جيت المأتمك بالكت الاكيك

الحسره حراگه...روحي مشتاگه
يا صاحب الزمان


يبو صالح اجيت اليوم...ودمعات الخجل تجوه
اجيتك والندم مولاي...جمره بروحي وتجوه
نخيتك يا ضوه اسنيني...وانته الما ترد نخوه
صد اعليه يالموعود...انه ابلياك ما اسوه

اين استقر بيك النوى وينك يمهدي
اسمك كتبته ابدمعتي التجري اعله خدي

ابگلبي وشواگه...روحي مشتاگه
يا صاحب الزمان

آسف سيدي وندمان... أذنب مستغل عطفك
ابجفك الله حط كلشي...لا تحرمني من لطفك
انه الغركان بذنوبي...فدوه انقذني مد جفك
كحل ناظري بنورك...ابطبرة حيدره انحلفك

بحيدر علي الكرار اجيت وذاكه جرحه
مد جفك اعليه ابعطف راسي امسحه

طول افراگه...روحي مشتاگه
يا صاحب الزمان

كل جمعة التمر بيه...اشعل بسمك اشموعي
ابكلشي اتسولف الوادم...بحبك آنه موضوعي
حبيبك طول اغيابه...اعله خدي كتبت ادموعي
ساهر ليلي وكتبلك...ونار الشوگ بضلوعي

ابدمع الخجل خطيت الك مولاي شعري
اسمك ذكرته وعالورق دمعاتي تجري

يمته الملاگة...روحي مشتاگه
يا صاحب الزمان

اجيت ابخاطري المكسور...وانته الخاطر اتجبره
منذور العمر مولاي...الك ونطيني بس نظره
كل اسنيني متعادل...دمعة عينك الحمره
يمته اتعود يالمهدي ...واسمع صيحة البشره

يمتة تصير الصيحة مولاي ابظهورك
هاي السمه وكل الأرض يمليها نورك

ورايه خفاگه...روحي مشتاگه
يا صاحب الزمان
‏
تم باقر الافرجي

بسم الله الرحمن الرحیم
یَسرُّني و يَسعِدُني ويُشَرِفُني مُسبقاً أن أتقدمَ الیکم أحبتي جميعاً بالتهنئةِ قبلَ أن تبدأ لكم عواصف الرسائل والتواصل، بالتهاني و التبريكات،ف لِأفوز بلحظةِ صفاءٍ وهدوءٍ لقلوبٍ من أحبهم وأدعو لهم من كل قلبى بأن يختم الله لكم شهر رمضان بالرحمة والغفران وتقبل الله صيامكم وقيامكم وصالح أعمالكم وجعلنا واياكم من عتقائهِ من النار وجعل ختام صومكم عبادة والعيدَ لكم فرحةً وسعادةً .....
وأقولُ لكم من كل قلبي
أسأل الله أن يُبلِغكُم عيد الفطر المبارك ..
و أنتم وأُسَرِكم واولادكم واحبائكم كافةً في أتم الصحةِ
وافضلِ الحالِ وكل عام وانتم الى الله اقرب وربنا يسعد أيامكم ...

حبك نعمه حبك نعمه...يا ابو الاكبر حبك نعمه

نحيه انموت ونبقه وياك
ما تسوه الدنيا ابلياك
بالمحشر فاز الوالاك
بلساني اسمك اجمل چلمه

دمك طاح وأحيه الدين
انس وجن صاحو يحسين
يالتستاهل دمع العين
لولاك الوادم بالظلمه

تحيه بذكرك هاي الروح
امن اسمك عطر الجنه يفوح
اترابك بي يشفه المجروح
يا مولاي وسيد الرحمه

يالحبك اصل الايمان
الما حبك عايش وهمان
الما يمشي بدربك خسران
خسران الما شدلك عزمه

الجنه بحبك مضمونه
الما شافك عميه اعيونه
ونتشرف لو سمونه
زلم المجلس زلم الخدمه

دوم ابحبك نتفاخر
بالدنيا وهم بالمحشر
وفقنه وما نتغير
نبقه ابدربك يابو اليمه

تم باقر الافرجي

ابلايك العمر صحره
عاشك آنه بالفطره

خليني الك خادم...يا مولاي


انه شلي بعمر لو خالي من ذكرك
يمن جنة عدن عاشت على عطرك
دين الباري طاح وشاله دم نحرك
كمن زار العرش كلمن گصد كبرك

حبك شمعة اسنيني
يالعطفك يغطيني

تشفه بسمك اجروحي....يا مولاي

احبك من گلب ولسان عالفطره
يمن علم الخضر يمك صبح قطره
مثل فطرس اجيتك خاطري اتجبره
يهنياله اليحصل منك النظره

تايه واتنه دليني
غيرك لا ميعنيني

بعيونك دفو الجنه...يا مولاي


يأجمل صوره بيده الباري راسمها
ابفضلك عيسى أمته ابمهده كلمها
الرسل والأنبياء علمك يعلمها
بسعاده يعيش البيدك روحه سلمها

رحمة الله بعيونك
هنيال اليحبونك

مفتاح الظفر حبك...يا مولاي

يعطشان ورويت الدنيا بحساسك
يقرآن ويرتل عالرمح راسك
عطر الجنه يا مولاي بنفاسك
يشمس الله عجيبه السيف من جاسك

ما يكفيله دم عيني
اشما اعطش ترويني

كلبك كله حنيه...يا مولاي

اجيت الليله يمك نوخت ضعني
يبو كلب الحنين الما يصد عني
رغم تقصيري ادري ما ترجعني
شما ابعد عليك ابعطفك اتردني

وفقني اضل خادم
لا متهمني هل وادم

حبك وحده يكفيني...يا مولاي

غير امحبتك مولاي انه اشعندي
اجيت ابكسرتي ودمعاتي البخدي
طلب عندي وكفت ابابك امجدي
ثبتني اعله نهج القائم المهدي

ابابك آنه اترجه
ترزقني رضه الحجه

اتكحل عيني من نوره...يا مولاي

باقر الافرجي