يا مولاي اقبلني خادم وي خدامك
لو كل عمري الطم ما وفي ذيج الامك

خليني...تدريني
آنه ما اكدر اعيش ابلا حنينك
خليها...وسويها
روحي محبس سيدي ابخنصر يمينك
اتمنه...يالجنه
تربه اصيرن حتى تسحكني بنينك

وشلون اجازيك...ياللي ظحيت ابردائك لجل ستري
وشلون اجازيك...وانته ظحيت الصدر من اجل صدري

خليني احرك روحي واطفي جمر اخيامك
لو كل عمري الطم ما وفي ذيج الامك

كل عمري...يا ذخري
ما يعادل يوم من يوم السبايه
كل نوحي...وجروحي
عل وكع واعله النهر دكاله ثايه
متعود...عالموعد
حيل احس ابراحه من انصب عزايه

واشلون اجازيك...وعمري ميعادله خيط امن العبايه
واشلون اجازيك...ولجلي قدمت الاهل كلهم ظحايه

لو بس اكدر امسح دمعه من ايتامك
لو كل عمري الطم ما وفي ذيج الامك

وفقني...ونطيني
اعيون الك يا سيدي متروسه دمعه
بحروفك...وطفوفك
بيهن اهوه الحجي وارتاح اسمعه
والحبك...وبدربك
باجر ابيوم الحشر جفك يرفعه

واشلون اجايزك...وانته متفضل عليه ابكله الدارين
واشلون اجازيك...وآنه دنيه وآخره بحماك يحسين

ظحيت ابدمك يالغالي لجل اسلامك
لو كل عمري الطم ما وفي ذيج الامك

بالطافك...ووصافك
احتارت املاك السمه والقلم واللوح
مايوفي...ولا يكفي
عمري لو يخلص لطم لبنك المذبوح
اتقبلها...وسجلها
ناذر الدربك انه يا سيدي الروح

وشلون اجازيك...وآنه ما اسوالي دمعه من رقيه
وشلون اجازيك...ياللي قدمت الاخو بالغاظريه

وجدامك ظلت تتعثر طاح احزامك
لو كل عمري الطم ما وفي ذيج الامك

ابكل مجلس...من اجلس
ادري كل اذنوبي تمحيها اليه
ابحنيتك...وتربيتك
تدري كلي اقصور بس اتحن عليه
اتمنيته...ويا ريته
جمر الخيام اليوج يا ريت بيه

وشلون اجازيك...وروحي لو اشعلها شمعه ما اوفيك
وشلون اجازيك...وانته حتى العرش ظل ينحب اعليك

يا مولاي اتمنه اتصده الكل اسهامك
لو كل عمري الطم ما وفي ذيج الامك

تمام والحمد لله

كلمات باقر الافرجي

ملاحظه)
الافرجي وليس الفريجي

اريدنك تجيني...وتضويها السنيني
تره مشتاكه عيني...يا علي الاكبر

يبني كل اغروب اكعد عيني تشبح للدرب
دكـت الباب انتظرها اتـزيد دكاتـه الكلب
وآنـه ادري مـا تردلي مــايـرد الـبـل تـرب
كلبي مشتاگ اشبديه لاچن افراكك صعب

جمر شوگك جواني...يمن طيفك حياني
يـرددلـك لـسـانـي ...يا علي الاكبر

عطر خدك آنه احسه ويه كل جرت نفس
ياللي صوتك مارفعته يمي من تحجي همس
اظلمت الدنيه بغيابك يالجنت الها شمس
احجي ويه اصورك اشما آنه بالغربه احس

بديت اشتاگ اشوفك...وتلحدني ابجفوفك
يمحلاها طيوفك...يا علي الاكبر

لـمـن ادخـلها غـرفتـك بيها اشمن هيلك
اكـعـد واذكـر جـمـالك وانـتحب وبجيلك
احظن القمصان يمه يمي جن واحجيلك
عن غيابك شنهو سوه بـيه مـنه اشـكيلك

صـعب يـايمـه الـفراگ...وتشب بالروح الشواگ
اضل كل لحظه اشتاگ...يا علي الاكبر

يـلي تـشـبه طـه جـدك بالجمال وبالصفاة
كلشي يا يمه ابرحـيلك مـا احـسن بي حياة
ابكل صباح الخالي منك بي تمنيت المماة
يبـني مـا مـبتسمه لاچن ابـتسم لـلذكريات

أنذبح يايمه حلمي...وعله التربان مرمي
طحت وزداد همي...يا علي الاكبر

تــفـرح الام ابــأبــنهـا الـهـا يصـبح خـيمه
ذاب غصني بعد عينك ورده وبـنص هـيمه
ابـكثر ما ابجي ابغيابك جفني اصبح غيمه
لون طولك ما اشوفه العمري ماحس قيمه

تفرح الام ابأبنها...وتخليه ابحظنها
يـنســيها حزنها...يا علي الاكبر

تمت
والحمد لله

كلمات
ملاحظه)
الافرجي وليس الفريجي

من اعليه يا مولاي نظره
يالبلروح الك مبنيه حظره

كل لحظه اطوفك...وفقني اشوفك

من اعليه مولاي...ابنظره اتزيح همي
ترضه اعليه كونك...هذا اقصه حلمي
ابدفتر خدم عندك...سجل اسمي اسمي
جيت وكلي تقصير...من راسي الجدمي


عايش آنه تحت افياي ظلّك
لا تطردني ياللي ماكو مثلك

تحييني طيوفك...وفقني اشوفك

حاير شرد احاجيك...امغركني بنعمتك
وآنه اشلون جازيت...بس اذنوبي جتك
مو قصد استخف بيك...لا والله وعظمتك
تدري شكثر عاجز...وطمعان برحمتك

يم بابك اجيت وهذا حالي
ابعيني امن الخجل دمعي يلالي

امسحها بجفوفك...وفقني اشوفك

مد جفك عليه...خل تغسل ذنوبي
يالحنيه متروس...وساتر كل عيوبي
اعمه وانته الدكود...تدليني ابدروبي
وبتقصيري انخاك...وتكشفلي كروبي

لا تحرمني يالمهدي حنينك
وحلمي آنه اقبلها يمينك

اشمحلاها حروفك...وفقني اشوفك


جيت ابابك اليوم...ماظنك تردني
طشرني التعب ذاك...بس جفك يلمني
جنة الله حظنك...جيت وبيها ظمني
وين الكه مثيلك...بذنبي وما طردني

آنه شما اعوفك ماعفتني
وشما ابتعد جفك يردني

يالتكرم ضيوفك...وفقني اشوفك

يا مولاي مشكور...يالخيرك ترسني
موش ابعيد ادريك...بس ذنبي بعدني
رغم كل هذا وياي...انته وما عفتني
اه اشكبره كلبك...كلها وما بعتني

رافسها نعمته العاف خيرك
والراح اليدك اباب غيرك

يا محله جروفك...وفقني اشوفك

تم باقر الافرجي

الى مولاي القاسم

تعال وخل اشوفك...تفرحني طيوفك
تره بجيتك تفرحني...بحلم يبني بحلم

تعال الروح عنك يبني هل تسأل
لونك بالحلم تكصدني هم اقبل
تدري روحي لو ما شوفتك تذبل
الدمع بغيابك آيات الحزن رتل

يشمعه بكل حياتي...غيابك بي مماتي
يجاسم يا ضوه العيني...بحلم يبني بحلم

يريت اعيوني معميه يروح امك
ولا عالكاع اشوفن منرمي جسمك
ليش بيا ذنب متحني من دمك
بقيت بدمعتي كل ليله اخط اسمك

بدمع اكظي الليالي...عكب موتك يغالي
الدمع بعدك يسليني...بحلم يبني بحلم

ييمه من كصد عمك ابو الاكبر
يمشي وبالحزن ظل جدمه يتعثر
وشفت وجهه انكلب من الحزن اصفر
اعرفت جسمك بقه فوك الثره اموذر

طحت وحلامي ضاعت...وسنيني بهيمه تاهت
ضلمه يايمه تره اسنيني...بحلم يبني بحلم

ضوه اسنيني انطفه ويه شمعتك
ترد عافيتي يا يمه بنظرتك
والعده حرمتني من شوفت دفنتك
يورده وبالگلب آنه الشتلتك

يريت الموت اجاني...الحزن بعدك خذاني
اشهيت انته التناديني..بحلم يبني بحلم

داسو حنتك يوليدي بالحافر
واعليهم اصد ودمعي متناثر
حالي بغيبتك ظل يكسر الخاطر
بقيت اخلافك آنه الموت اناطر

تره بُعدك هظيمه...بقيت بلايه خيمه
منو الهجرك ينسيني...حلم يبني بحلم


تمت باقر الافرجي

ملاحظه
الافرجي وليس الفريجي

شور

يا جسام...ارجع ليه يالغالي

ارجع يبني اتنطر..وبيدي شايله الحنه
شمعتك بالدمع يبني...راح اشعلها والونه
ارجع خله كلبي ايهيد..يمه اعليك من حزنه
وين الكه مثيلك وين...بي اشتم عطر جنه

يا جسام...بعدك موتي يحلالي

آنه بطيحتك تدري...اتبدت يبني ايامي
عرسك حلمي ما ادري...هيج اتصير احلامي
يبني نزفت أمنيتي...ويه نحرك الدامي
عمري كله اتنطر...طولك يزهي كدامي

يا جسام..خابت يبني آمالي

حكي من انوح اعليك...وين الكاهن ارسومك
ترد روحي ينور العين...لون اشتمهن اهدومك
عساني انعمي ولا اشوف...حنت جفك ادمومك
يشمعة عمري يا ريته...يومي من قبل يومك

يا جسام...بس ادموعي التلالي

ليش بسرعه عني اتروح...آنه بعازتك يبني
بعدك يا عزيز الروح...دمعاتي التسليني
ميته بس جسد ظليت...ظلمه بعدك اسنيني
اشما اغفه يبعد امك...يجي طيفك يصحيني

يا جسام...جمره صار دلالي

اشعل شمعتك كل ليوم...بس الدمعه تطفيها
اسوي حنتك بالنوح...امبارك يبني احجيها
طولك ذاك اتخيله...غرفتك لو اطب بيها
عيني اشتاكت اتشوفك...تعال اتصدق اعليها

يا جسام...باقي رسمك ابالي

باقر الافرجي

ملاحظه الافرجي
مو الفريجي

يا هلال...شوفتك تلجم جروحي
يا هلال...ابطلعتك يتعاله نوحي

شوفتك تلجمني...ابخوتي اتذكرني
ياهلال يا هلال

طلعتك ترسم صور....خيم محترگه ونحر...كطيع
وطفل مذبوح ابسهم...ولطفال ابلا خيم...تظيع
حسين كطعو منحره...وجفه ظايع خنصره..وصريع

من اشوفك يضيع الحچي
بس ونيني يضل والبچي

يا هلال...بشوفتك انصب عزيه
يا هلال...واذكر ايام الرزيه

جيتك تجرحني...ابخوتي اتذكرني
ياهلال يا هلال

بشوفتك اشبع بجي...وعالجدار آنه انتجي..واصيح
آه منج كربله...بيج ابن عقد الوله...ذبيح
والكفيل بلايه جف...احساس من نحره نزف..طريح

وبغيابه دمعتي اتهمل
وايتبختر عليه النذل

يا هلال...روحي مشتاگه الكفيلي
يا هلال...افراگه ذوبلي دليلي

فركته اتألمني...بأخوتي اتذكرني
ياهلال يا هلال

شنسه يهلال القهر...حسين رد محني الظهر...ينوح
طاح عامود الخيم...وعينه مطفيه بسهم...جروح
حيلي طاح اعله النهر...ويه عباس الگمر...يروح

من نظرته بهمومه ايعثر
كلبي فز ودمعتي نهر

يا هلال...شنسه من ذيج المصيبه
يا هلال...اوداع محبوب وحبيبه

يومك اليذبحني...بخوتي اتذكرني
ياهلال يا هلال

شنسه يهلال الألم...طفله منها تجري دم...أذن
هاي يم جسم الابو...راح من عدها الدفو...وتحن
وذيج تتحسر بكت...جفها بالنار انجوت..تون

جم طفل بالحوافر منسحگ
وجم طفل بالمخيم محترگ

يا هلال..بشوفتك شفت العجايب
يا هلال...وعالترب شفت الحبايب

كافي لتعذبني...بخوتي اتذكرني
يا هلال يا هلال

اه يهلال الرعب...لسه دمعاتي تصب...عجيب
اه جم طفل احترگ...واه جم صدر انسحگ..سليب
لسه آثار السبي...ولسه دخان العبي...رهيب

انذبحت بشوفتك ظحكتي
وركظة اعله الوجن دمعتي

يا هلال...كافي لتهيج عذابي
يا هلال...ولا تزيدلي مصابي

بطلعتك ترعبني...بخوتي اتذكرني
يا هلال يا هلال

من اشوفك اختنگ...واشم دخان الحرگ...عبي
واذكر آنه عله الهزل...من رحت ويه النذل...سبي
وطفله ماتت بالغرب...اتصيح ماليها الرعب...ابي

آنه بنتك رقيه ابي
زغيره ورحت للسبي

يا هلال...اه من ذيج الخرابه
يا هلال...راس ابوها طشت جابه

بسك اتعذبني...بخوتي اتذكرني
يا هلال يا هلال

تم باقر الافرجي

الافرجي
وليس الافريجي

ميمر

بس مجلس حسين اللي
من هل مرض يحمينه

يالخايف وما تحظر بالهل عزاء
ما يدخل المجلس خطر هالوباء
حسين وذكر اسمه وقايه وشفاء
والله الجعل تربته هيه الدواء

فطرس تعناله وطاب...معقوله ما يشفينه

هالمجلس المهدي يجي ويحظره
وشلون يبقه المرض لو شم عطره
ايزول الوباء ابسر وجود الزهره
وكلمن لطم كورونا لا متضره

بالمأتم الزهره اتكون...يا وبا يكصد لينه

كلمن تخلف عايش بأوهامه
يا مرض يكدر يوصل اللطامه
يبقه برعب لو شاف دم الهامه
الشيعي الحقيقي ما يعوف إمامه

لجل ابو اليمه المظلوم...خل المرض يلفينه

افضل وقايه امن المرض هالخدمه
ايزول الخطر عن التمسك بسمه
حسين الامان اوسر زوال الازمه
التحبه بس هذي صدگ يفتهمه

الما يفهم شراد حسين...ما مفتهم من دينه

هذي المجالس نعمه من رب الرباب
ادخلو بسلاماً كبر ابن داحي الباب
مرفوعه يم حسين كل لاسباب
واليدخل المأتم ابد ما ينصاب

وشلون ينصاب الصاح...حسين اليضل والينه

تم باقر الافرجي

ملاحظه الافرجي
وليس الافريجي

للانصار صلوات الله عليهم

الخيمته راحو...وبالدمع صاحو
ما نعوفك يا حسين اشهد علينه
والحمد لله الك احنه انتمينه

الخيمة حسين الولي راحو سوه
بدينه يم اجدامك الحلوه ضوه
وبلايه حبك ما نعيش انته الهوه
اوين مثلك نلكه يا سر قل هوه

الخدمتك احنه...الباري خالقنه
وانفخت هالروح يا مولاي بينه
والحمد لله الك احنه انتمينه

ياهو غيرك يستحق هذا العشگ
ياهوه اعذيبي بدونك نختنگ
كلشي بالدنيه وهم وانته الصدگ
ويا بختنه لون لجلك ننسحگ

الله كرمنه...لجلك اوجدنه
النصرتك بارينه هالفضل علينه
والحمد لله الك احنه انتمينه

مبخوت كلمن ينحسب مجنونك
هالروح فدوه النظره من اعيونك
هالدنيا ما تسوه تره من دونك
بس انته تنزل دمعة اليحجونك

محبتك نعمه...يا ابو اليمه
للنجاة انته ربان السفينه
والحمد لله الك احنه انتمينه

جينه عطاشه سيدي وانته العذب
وياهو غيرك نظرته تمحي الذنب
لو انته لو انته نحب لو ما نحب
بالذر تعاهدنه وابد ما ننسحب

هالعهد بالذر...يا ابو الاكبر
للعهد وفايه يا رحيت نبينه
والحمد لله الك احنه انتمينه

حبيب وجون صاحو ويه عابس
وايدوهم كلمن ال بالخيمه جالس
انته الاول يا حسين ابلا منافس
موش عابس وَحَده كلنه عوابس

كعبه ونطوفك...انلبي بحروفك
نسعي ما بين الصفه ومروه اجينه
والحمد لله الك احنه انتمينه

يا طريق الحق ابد لا ما نعوفك
جينه واقبلنه عبيد انقبل جفوفك
نور ساطع للسمه كلها تشوفك
والجلاله اعله العرش كاتب حروفك

الباري هالكاتب...نصرتك واجب
تبقه دنيا وآخره انته ولينه
والحمد لله الك احنه انتمينه

تمت والحمد لله

باقر الافرجي

الافرجي وليس الفريجي

ما ادري شجاني يا خلگ محتار
ليش بوسط عيني الدموع ادور

وليش بكلبي جمره ما اظن تبرد
وليش بصدري حسره بلا سبب وتفور

بقيت ابين ليش وليش واجاني الصوت
چا ما تدري مو جايك شهر عاشور


كلمات
باقر الافرجي

للخدمه الحسينيه

اشمحله هاي النعمه ...الله انطاني خدمه
————————————————
اشتسوه الدنيه يا ناس...الخدمه لو ما بيها
چـلمـه وبحـلـكي ادور...ابـدمـعتي احـجيها
الخدمـه امـي وتدرون...ابعيني انه مخليها
چـنـة الله اعـله الـكـاع...حـكـي لـو اسميها

شمحله لو اوزع ماي بالمأتم
عمري لو يخلص نوح ما اهتم

شنهو هاي الرحمه...الله انطاني خدمه
————————————————
حسين مثل القرآن...حرز هو البيتي
حتى اشمن عطره...الله خالق ريتي
أنقبل خادم كون...هذي كل امنيتي
الحمد لله صارت...ابمجلسه تربيتي

شلون ما اهمل عين وتحسر
لجلي كلشي ظحه والمنحر

فدوه اروحن لسمه...الله انطاني خدمه
————————————————
آنـه عندي الخدمه... هوه الكل انـفاسي
تـعب بس بي راحه...بهالتعب وهـواسي
حسين حبه الطاهر...مالي كل احساسي
بخدمته كـل الـخير...دوم رافــع راسـي

الخدمه لو بس تنشال ادريها
الدنيه كل خير ايصير ما بيها

هيه احله نسمه...الله انطاني خدمه
————————————————
احـن مــن گلـب امي...حسين هو عليه
ولـو نـدبــت بـأسـمـه...انـتـرس حـنـيـه
هوه وخالي امن حسين...ما تقبله الريه
الدنيا ومـا بيها اتصير...يم نظرته شويه

حسين يبقه الاول محبوبي
هو شمعه ايضوي بدروبي

تضوي ظي نجمه...الله انطاني خدمه
————————————————
بخدمته آنه ارضيت...من قبل تكويني
آنـه حُـب الـحسين...طاعتي وكل ديني
الله انطاني جفيين...الطم اعله حسيني
حسين مات وعطشان...خاطر ايرويني

شلون ما افدي حسين بسنيني
وهـو حـتى الـطـفال مـنـطيني

ضحه لجلي بدمه...الله انطاني خدمه
————————————————

والله شـيخ الـعقال...الينحسب مجنونه
كل ذنب يفنه ايروح...بنظره من اعيونه
بالحـشر تـوكف زود...كل اللي خدمونه
ايسجل اسـمه عابس...اليفتخر بـجنونه

حسين مصباح اينور بالمحشر
بـجـفه يـروي الخـدام بـالكوثر

ابالي تبقه كلمه...الله انطاني خدمه
————————————————
تمت
باقر الفرجي

وليس الفريجي

آنه متهمني الملامه ولا حجيها
هل مجالس راحتي لمن اجيها
خل تلوم اللايمه...راحتي في مأتمه
واحسيناه
———————————————-
خلهم اشما لامو آنه ابقه اخدمه
والله حكهم ما يشمون الاشمه
مجلس حسين التعطر بالائمه
وآنه احسن جنتي هاي يمه يمه

تحظر الزهره وتسجل باليعزون
وتمسح بجفها دموع اللي يلطمون

تحظر امه فاطمه...راحتي في مأتمه
واحسيناه
———————————————-
مجلسه خيمه وتلمنه تحت فيها
والله اعمه الما يشاهد هذا ظيها
قافلة نور ابو اليمه اليحدي بيها
الحمد لله لان صرنه خدم ليها

نعمة الله اعله البشر هاي المجالس
ينجح اليفمها ويسجلونه عابس

والحسين ايوسمه...راحتي في مأتمه
واحسيناه
———————————————-
اشتسوه الجفوف لون ما لطمة للحسين
والله يعميها لون ما تهمل العين
وهل مجالس نعمه نزلت للمحبين
لجل ابو اليمه انوجدنه يالموالين

ما اعيش ابلا لطم هاي المجالس
بلايه ماي شلون ترتاح النوارس

ذكره حسن الخاتمه...راحتي في مأتمه
واحسيناه
———————————————-
آنه كل اجروحي متروسه منابر
تنعه للسحكو ظلوعه بالحوافر
الله يا هالناس بالتنزيل ذاكر
انها تقوى اليعظمها الشعائر

بالروايت انذكر ها يالمحبين
تطفي نار اجهنم الدمعه للحسين

وبخدمته المكرمه...راحتي في مأتمه
واحسيناه
———————————————-
عمر لو مابي مئاتم ماله قيمه
رزق هالخدمه الهي اعليه ديمه
الدنيا وبلايه مجالس والله هيمه
مجلس حسين الفقط باقيلي خيمه

خيمه بيها شكد دفو وشكد محنه
من تطب ليها تحس روحك ابجنه

هذا ابن حامي الحمه...راحتي في مأتمه
واحسيناه
———————————————-
واللي مقبول وتسجل بالخدامه
يعني الله اعليه راضي وي امامه
بعد ميهمني حجي اهل الملامه
همه ما يدرون بالخدمه الكرامه

ياهو غير حسين نتفخر نخدمه
واليخدمه بكل صدق الله يكرمه

نعمه من رب السمه...راحتي في مأتمه
واحسيناه
———————————————-
تمت والحمد لله

باقر الافرجي
ملاحظه)
الافرجي وليس الفريجي

يالسجاد اشكبر احزانك
شفت اعله التربان اخوانك

وبن الزهره...كطعو نحره
يالسجاد اشكبر احزانك

شكثر احزان ومصايب شوفك دهرك
آه شكد جبير ويا عظم صبرك
وبطيحة ابو اليمه انحنه ظهرك
وعله كطع النحر لا ما طفه جمرك

سحكو جثمانه العدوان
وشبت بخيامك نيران

سحكو صدره...كطعو نحره
يالسجاد اشكبر احزانك

يزين العابدين اشكد شفت احزان
طاح اعله النهر مدمي گمر عدنان
وحسين الرجع محني الظهر حزنان
وعمتك زينب اتون ابكلب لهفان

طاح وكطعو منه ازنوده
سهم ابعينه وسهم ابجوده

بروحك حسره...كطعو نحره
يالسجاد اشكبر احزانك

اشكبر صبرك وجاسم جثته مرميه
ابدمعة امه شمعة عرسه مطفيه
وعلي الاكبر اعليه امه محنيه
وتدعي بخيمته يارب يرد ليه

ابني وشمعة كل اسنيني
يرجع ويفرحها العيني

بذيج الصحره...كطعو نحره
يالسجاد اشكبر احزانك

عليكم هالعده وبلا رحم هجمت
يمولاي الخيم بالنار من شبت
اطفال ابرعب للصحره هل هجت
وعله جمر الخيم مذهوله من سحكت

مولاي الله يساعد كلبك
روس احبابك تمشي بدربك

وانته اتنظره...كطعو نحره
يالسجاد اشكبر احزانك

آه اشكد شفت احزان يا مولاي
حسين اعله الثره جسمه بلايه افياي
وعبد الله انذبح ما ظاگ قطرة ماي
وعيال السبوها والشمر حداي

وانته مكيد تمشي وياهم
وطفالك تسمع مبجاهم

بكلبك جمره...كطعو نحره
يالسجاد اشكبر احزانك


تمت

باقر الافرجي

الافرجي وليس الفريجي

قصيده للمشايه

جيت للغالي...لا ما بالي
الكارونه

جيت امشي الكربله ابهاي المسيه
كل مرض ميردني لا والله ونبيه
اشلون امرض والزچيه اتصد عليه
ابحظرته متظل ابد كل عله بيه

حسين يالوادم...يحفظ الخادم
بعيونه

لو دخلت الموكب واشرب ابچايه
وامسح ابوجهي لون الكالي رايه
كل مرض ينزاح هاي افضل وقايه
زاد ابو اليمه فقط هو دوايه

حسين يحميني...زاده يشفيني
اتعرفونه

اشلون ما امشي انه وانصب مواكب
وزينب الحره تره الجيتي تراقب
والله ميهمني بُعد لو بالكواكب
هم اجي مشاي واكصد للحبايب

اليخلص الخدمه...لجل ابو اليمه
ايحرسونه

آنه متهمني الملامه وحجي هالناس
احتيي لو بس اشمن عطر عباس
وهو يروي للعطش من جربته حساس
ابقه مشاي اعله دربه الآخر انفاس

ليه اتعنه...مرقده جنه
ايوصفونه

اشلون يلفيني المرض والزهره وياي
أطمن نادتني تبقه انته بحماي
اموصيه جبرائيل بجناحاته الفياي
وشايل اسرافيل جربه ايوزع الماي

اليعتني زاير...ما يظل حاير
يحمونه

الروح تطهر لون تشتم عبيره
والله خسران التعنه الباب غيره
الدنيا يم بابه صفت والله زغيره
تارس الدنيا ضوه وماليها خيره

كلها يم بابه...اتقبل اعتابه
ايزورونه


تم باقر الافرجي


الافرجي وليس الافريجي

الزهراء ص...تخاطب والدها ص

يا بويه لتسافر...عن عيني وتهاجر
ومكسورة الخاطر...يالحبيب

لتسافر بويه مروتك
آنه بعدني بعازتك
وطولك بعدني بحاجته
ايعذبني دهري ابروحتك

يطفه ضوه داري...ودمعي يضل جاري
تلهب تضل ناري...يالحبيب

آنه العزيزه فاطمه
لو غبت كلبي اتألمه
وبغيبتك يا والدي
دنيايه تصبح مظلمه

لا لا تخليني...آنه ودمع عيني
تذبل تره اسنيني...يالحبيب

يا بويه يا سيد المله
بوجودك آنه امدلله
اخلافك يكسرون الظلع
ودموعي تبقه هامله

ظلعي يكسرونه...وابني يطيحونه
ورده ويذلونه...يالحبيب

يابويه بغيابك تره
ابقه وحيده امساهره
وبيت الحزن اسكن انه
والموتي ابقه امناطره

ما انام انه ليلي...اغيابك هدم حيلي
ياهو اليتجيلي...يالحبيب

من الدمع شاب الرمش
ياريته وي نعشك نعش
وياك اخذني يا أبه
خل نترك الدنيا ونمش

دنيايه ما تسوه...غيابك الي بلوه
وكليبي يتجوه...يالحبيب

يا بويه لو بس تبتعد
الكسر الظلع آنه استعد
ويسطرني هالظالم تره
وداري يحركوها ابحقد

وحيدر يجتفونه...للبيعه يردونه
ايبايع يجبرونه...يالحبيب

بعدك يخاتم للرسل
يهجم على بابي النذل
جبريل جان ايقبله
ليش ابحقدهم يشتعل

املاك السمه كلها...البابي تقبلها
الظالم يجي ايوجها...يالحبيب

تمت والحمد لله

باقر الافرجي

https://youtu.be/4lkuvvZqfrg


اشتركو بقناته صوت راقي