للعليه عليها السلام ..

اخذني الكربله وياك... ارضه ابموتتي هناك
ولا بالغربه من بعدك تخليني

يابويه مو تدري العمر...ما يسوه كلشي ابدونك
وامشي ودوس اعله المرض...والهمه من عيونك
واشلون لو عني ارحلت... والحادي مشه اضعونك
كلبي عصرني وشو خفت...بس لا نوه يذبحونك

بويه بروحتك هاي...وحشه اتصير دنياي
يتيمة الوادم اخلافك تسميني

كلش صعب بويه اليتم...وخلافك آنه اتيتم
عامود للخيمه الابو...وبروحته اتهدم
معناها طاحت خيمتي...وراح استعد للمأتم
غربه يتم بويه ومرض...وبس الدمع يتكلم

تبقه عيني عالباب...يمته اترد الاحباب
ومامش احد اعليكم يدليني

يابويه المن اشتكي...لو جار دهري اعليه
كشخة الطفلة بالابو...وتتباها تمشي ابفيه
خليلي عبد الله ومهد...واتسله بي ليليه
بلكي ينسيني الالم...بعدك يخف اشويه

لو شفته اعله مهده...حزني شويه يهده
وبعد غيابكم صوته يسليني

فدوه يبويه دقترب...اهمس الك بحجايه
عمي الكمر وصي الي...يمي يعوف الرايه
اتعنه اهلها بكل حزن...وعكدها وبجي اهوايه
وطلب الحاجه واندعي... يالشوفتك دوايه

ادعي وصوتي مبحوح...ميردولي بجروح
وانته ترد اليه وتزهر سنيني

يابويه اخذني الكربله... خليني امشي وياكم
طفله وصعب كلش تره...ما ينحمل فرگاكم
وحشه الديار وخاليه...وبكل كتر ذكراكم
وبكل مغربيه احن...وبقه ابحزن انعاكم

اشتاق الصوركم...ياللي اهواي احبكم
ياللي بروحتك ماظن تجيني

تمت باقر الافرجي

المستهل
يحامينه يحامينه
ابو فاضل يحامينه

ابو فاضل يهل وادم
يحامي برايته الخادم
يزوره ومن يرد سالم
ضوه كبته يشافينه

نجي ولحظرته انزوره
يعطر انفاسنه بخوره
يطهر ارواحنه بنوره
نرد والرحمه تملينه

نروح الكبره مشايه
نظل للدوم وفايه
دمع بي نعكد الرايه
خدم نطلب يخلينه

يمن ابعشگه لامونه
جمال الله تره اعيونه
نهيم ابحبه خلونه
فقط حبه يحلينه

عشگ ماكو احد ايفهمه
بس العايش الخدمه
يمن فدوه الحروف اسمه
نهر للدوم يروينه

تمت باقر الافرجي

للعباس ع

حان الوداع...ونكسر بعدك يبو الكلفات ظهري
حان الوداع....ابروحتك اتوچه ضليت اعله صبري

يالوفيت ابخوتك...عمري راح بروحتك
حان الوداع

خويه بسمي من صحت..امشي وتعثر صرت
بس اريد اوصل لعد جسمك وشوفك

المصرعك من وصلت...ريت معمي ولا شفت
جثتك اموذرينها وكطعو جفوفك

جيت اركض للنهر...شفتك وظهري انكسر
ياهظيمه السهم نايم وسط شوفك

ريت هاللحظه متت...خويه آنه اتحيرت
اشلون اشيلك للخيم لا بيه اعوفك

والعقيلة....بالخيم منتظره ترجع يابو فاضل
والعقيلة....صعبه اخبرها بقيتي ابلايه كافل

كوم خويه امروتك....عمري راح بروحتك
حان الوداع

انته يا نبع الوفه...ابخوتك كلبي اكتفه
ياللي ظحيت العمر لجلي وسنينك

طولك الجنه نهر...ليش ياخويه كصر
امكطعينك بالسيوف الله اليعينك

ادري كلبك چن جمر...لان زينب تنتظر
واليتامه بالخيم منتظره وينك

ابكلشي وجهك مختلف...كمر بس ناله الخسف
دمه وتراب التغطي ارموش عينك

خويه عباس...اعيون زينب عالدرب منتظره جيتك
خويه عباس...كوم ويايه نفرح كلب اخيتك

وبدمعها نطرتك....عمري راح بروحتك
حان الوداع

يالوكفت اعله النهر...لچن شبعته قهر
من كلت لا ما اشربه حسين ضامي

ما تغرني ابرودتك...ولا تهمتني شوفتك
آنه بس عندي الاهم يشرب امامي

طاح جفك والعلم...صحت عندي آنه الأهم
جودي يوصل بالسلامة يم خيامي

طحت وبعينك سهم...اتوجهت صوب الخيم
صحت اعذروني وبعثت الكم سلامي

يا هظيمه....بطيحتك تتشمت العدوان بيه
يا هظيمه.... راح اروح وعالظهر حطيت اديه

احزامي طاح ابطيحتك...عمري راح بروحتك
حان الوداع


الجيش صاح ابكل فخر...طاح عباس الكمر
حسين ضل الوحده وراح اليعينه

اخوك ضل الوحده...ياهو غيرك يسنده
والشمر رايد يحز منه وتينه

من طحت فوك الثره....الشمر صاح ابعسكره
يلا اهجمو طاح حماي الضعينه

وحدي ضليت...والشماته اتصيح راح امن يده عباس
وحدي ضليت.خويه بعدك كوه صرت اسحبها الانفاس

ابروحي چمرة غيبتك....عمري راح بروحتك
حان الوداع

وسفه يا شبل الأسد...راسك انصاب ابعمد
وانته ليث الموزمه وسيد الحرايب

ياكفيل ام الخدر...اجفوفك انكطعة غدر
ياللي سيفك اربك ابطال الكتايب

ابطيحتك خويه الكمر...اتبده عمري اعله النهر
احزامي طاح اشتدت اعليه المصايب

حيلي يا خويه انهدم...اشلون اردن للخيم
وانته يا ابو الفضل نايم عالترايب

والله صعبه....شلون اردن وانته نايم عالشريعة
والله صعبه...لو اكل الزينب اجفوفه كطيعة

اعليها صعبه فركتك...عمري راح بروحتك
حان الوداع

تم باقر الافرجي

حان موعد خدمته...كوم علك رايته
ودوم ابجي امصيبته...حسيناً وحسينا

محرم جايك اتحزم يخادم للخدامه
يهنياله التسجل خادم ابدفتر امامه
وابو اليمه ينادي ابجنته ابيوم القيامه
ينادي يالخدم يالله ادخلوها ابسلامه

يالتبجي اعله النحر...وراسه ابرمحه استقر
الجنه ادخلها ابفخر....حسيناً وحسينا

محرم قادم ابحسره وعوف اهل الملامه
يفوز ابجنه بالمحشر صدره البي علامه
سولف دوم بس بحسين عيش انته بهيامه
عظيمه كلمة الخادم تنول افضل كرامه

خادم اصبح اله...اشمعظم هالمنزله
والدمعه الهامله... حسيناً وحسينا

محرم قادم وانهظ تحزم بالمدامع
علك رايه فوك البيت وظهرها المواجع
تطهر بسم ابو اليمه كل هاي المسامع
الطم حيل لمصابه وذكرها الفواجع

بسمه يحله التعب...اترابه اغله امن الذهب
دمعي ابخدي كتب.... حسيناً وحسينا

بده موسم الدمعه وكوم لا تبرد يخادم
تره ابكل مأتم اعله حسين بي موجده فاطم
تسجل كلمن ايهل دمعه وبلوعاته لاطم
عله الظل عالترب وعظامه ماضل بيها سالم

دوم ابجي الطيحته...ابنار حركو خيمته
وسلبو كل عيلته... حسيناً وحسينا

الامام الصادق الوصه يودام بالشعائر
وبد لا تنسه ابو الاكبر بقه تحت الحوافر
وخيم محتركه ولاطفال سحكتها العساكر
وعله التل العقيله نادت ابدمع النواظر

وينك يبو الفضل....بعدك ما احتمل
رد ولم الشمل.... حسيناً وحسينا

تمت باقر الافرجي

لعلي الاكبر عليه السلام

يابو علي وينه علي...وياك شو مرد الي
كلبي اشتعل نار
جاوبها والدمعه تصب...يا ليله ضل اعله الترب
وذاك الرمل حار

رد ابو الاكبر ولكن ظهره محني
صاح ياليلة عفت عالغبره ابني
بشوفته ضلعي انحنه وزداد حزني
كومي يا ليلة بحزن وياي وني

اليشبه محمد عالثره...چثته طريحه مطبره
وحاطته الأخطار
فكد الابن كلش صعب...يا ليله ضل اعله الترب
وذاك الرمل حار

رد ابو اليمه لچن چدمه ايتعثر
وآنه منها وعرفت طايح الاكبر
الفاكد ابنه ينعرف وجها يتغير
يركض الشيب بلحيته ابسرعه يكبر

ناداني يا ليله بحزن...فوك الرمل شفته يون
وتحيطه الاشرار
وعينه تصد اعله الدرب...يا ليله ضل اعله الترب
وذاك الرمل حار

بالدمع اركض ياليله اوصلت يمه
حرت يا ليله ابجروحه اشلون الزمه
ابكل كتر طبره ورمح متروس جسمه
ردت ويايه اجيبه وخفت الچمه

طولي اويه اطوله اتمددت...ريت آنه هالحظه متت
ولا شايف الصار
مكطوع سباح الكلب...يا ليله ضل اعله الترب
وذاك الرمل حار

المصرع اوليدي اخذني خل اشمه
اختنك صدري ورايده من عطره نسمه
واستمع منه اخير الچلمه يمه
ارد اكلمنه ابحنان الصدري اضمه

خليني اشوفن صورته...فدوه اروح الهيبته
منه الضوه يغار
متوسد ابنص الحرب...يا ليله ضل اعله الترب
وذاك الرمل حار

آنه من شفته ياليله انحنه ظهري
صحت عالدنيا العفه ودموعي تجري
العيشه بعدك حيل صعبه يبني تدري
مره اطيحن مره اكوم اختنك صدري

روحي شكثر متألمه...جسمه بقه ينزف دمه
امن جروحه الكبار
فوك الرمل دمه يصب......يا ليله ضل اعله الترب
وذاك الرمل حار

تمت باقر الافرجي

العلي الاكبر نزله

علي الاكبر والنعم..بده يطشر بالزلم
علي الاكبر والنعم..بده يطشر بالزلم

نزل للحومه ينادي آنه جدي حيدره
اليوم اراويكم مراجل عمي سبع الكنطره
اليوم اصفنها العساكر مثل صفت مسطره
عالركاب السيف يلعب روسكم تلزم سره

طلع چن طلعة نجم..بده يطشر بالزلم
علي الاكبر والنعم..بده يطشر بالزلم

نزل والسيف بيمنته مثل حيدر من نزل
ترعد الدنيا وينادي الجيش چا شنهو الحصل
هذا ملك الموت اجانه لو علي الاكبر حمل
مالت الحومه بدخوله اعيونه تتجادح زعل

سيفه بيمينه الشهم..بده يطشر بالزلم
علي الاكبر والنعم..بده يطشر بالزلم

الخيل والخياله شردت صنته صارت كربله
الحومه وحده ايصول بيها ياهو يكدر يوصله
يمشي بيها ويتبختر هيه ضلت بس اله
جن بلاء فوك العساكر الله ليهم نزله

ابجيشهم لا ما يهم...بده يطشر بالزلم
علي الاكبر والنعم..بده يطشر بالزلم

اطبك السبعه اعله اسبعه آنه ابن الساده
سيفي ما يقبل ابجندي يريد روس القاده
ياهو يوصل للمخيم هذا ياهو اتماده
اليوم امحي نسله كله حتى نسل اجداده

ايطشر بسيفه ويلم...بده يطشر بالزلم
علي الاكبر والنعم..بده يطشر بالزلم

كالاسد وحده يتمشه بحومته حيد وكلف
ابن غانم خوش زلمه عدهم انعد ابألف
من برز يم علي الاكبر رجع راسه ابلا جتف
لو خزر بعيونه واحد دم البجسمه يجف

يخاف حتى البلحلم....بده يطشر بالزلم
علي الاكبر والنعم..بده يطشر بالزلم

تمت باقر الافرجي

خادم خادم خادم...هنياله اليتسمه
خادم خادم خادم...كوم وشد الهمه
====================
اخدم بخلاص وهمه
الزهره اتحب هاي اللمه
وتتفاخر بيكم

الدمعه التنزل تحسبها
ودكت صدرك تكتبها
ولدي اتناديكم

البالمجلس وزع مايه
ولشايل بيده الرايه
الزهره اتحييكم

وهيه اتسجل بسمه...كوم وشد الهمه
====================

عيش ويحسين ابروحك
وخل تنزف لجله اجروحك
وآه اعله امصابه

بالخدمه اثبت إيمانك
وذرف دمعه اويه احزانك
واسجد يم بابه

بس هو اليسوه انحبه
هنياله الباقي بدربه
اتسجل بكتابه

حب حسين النعمه...كوم وشد الهمه
====================

شمحلات الحب بالفطره
ويستاهل ابن الزهره
اتضحيله اسنينك

لا تبخل هل دمعاتك
واسي حسين ابجمراتك
لا تخفي ونينك

اشمحلاتك لمن تحظر
لابس اسود تتحسر
وتبجي اعله حسينك

لحسين انطي الكلمه... كوم وشد الهمه
====================

لا تملي الدنيا اعيونك
خادم لو ميسمونك
الدنيا ومفنيه

لتهمك كل هالوادم
لحسين اتسجل خادم
راعي الحنيه

هنياله اليخلص عمره
بالمجلس لو بالحظره
يا محله النيه

تحله ابذكره النسمه...كوم وشد الهمه
====================

الدنيا وكل اللي بيها
بس حسيني محليها
شتفيد الوادم

حسين الواحد فوك الكل
منمل من عنده ولنچل
كلبك بي هايم

حسين اسمه ابداخل نبضك
وشكد مبخوت وحضك
تتسجل خادم

المجلس اكبر رحمه....كوم وشد الهمه
====================

كوم الطم وهمل دمعه
حسين اليستاهل فزعه
ضحالك روحه

من تحظر هذا المأتم
وتذكر زينب تتألم
وتذكرها اجروحه

دوم اتذكر ايامه
وطفاله وحرك اخيامه
وجثته المطروحه

لجلك ضحه ابدمه...كوم وشد الهمه
====================

تم باقر الافرجي

اطلب حاجتي منك يبو اليمه
توفقني اعله دربك امشي والخدمة
====================
اجيتك سيدي واطلب طلب منك
لا تحرمني عطفك وبتعد عنك
بدموع الخجل بحساسي اكلمنك
ادري ما ترد واحد يبو الرحمه
====================
شلي ابدنيتي لو ما طعم حبك
يطشرني الوكت ويلمني بس دربك
رحمه اعله اليحبك نزلك ربك
ابسمه كلبي يشع حبك مثل نجمه
====================
اهيم ابعالم اجروحك وخط شعري
عله اجروح العطش شفتك نهر يجري
اول چلمتي بسمك بده عمري
الحمد لله اعله حبك يا ولي النعمه
====================
الوذن بيك لو جارت علي دنياي
يالبكل شده حاظر سيدي وياي
عجيبه شلون تعطش ياحياة الماي
يمن فوك العرش نور ارسم رسمه
====================
الوذ ابحظرتك لو جارت ايامي
اصيرن خادمك يا سيدي احلامي
يمن ابلا رضاتك ينفي اسلامي
مسلم ما اصيرن لو نفيت اسمه
====================
انه شلي ابحياتي وانته ما بيها
وعيني الما بجتلك الله يعميها
وروحي الما تهيم ابحبك افنيها
يمن بالساني اسمك احله كل چلمه
====================
تم باقر الافرجي

شور

يمحبوبي اشكبر حظي وعشكتك
بدمع حبي عله ارموشي رسمتك
عليك الزهره خليني بخدمتك

يا محله طعم حبك
عيشني بتعب دربك
يالمحلي سنيني

بيدك سلمت روحي
وتحله بسمك اجروحي
حبك هو ديني

حسين

كلبي صرت مفتاحه
وتعبك احس بي راحه
خليني دوم ابابك

يمك اهشم بصدري
اتمنه يخلص عمري
بسجدة عشك بعتابك


حسين آه حسين آه

خليني اعيشن دوم وياك ابجرح
عيشني لجمة راسك الفوك الرمح
وشوفة اخيك عالنهر من منطرح

ولحظة حركة خيامك
وبالبر فرت ايتامك
من الخيل هجت

روحي بجمره الجمها
جثتك محد ايلمها
ابلايه افياي ظلت

حسين

ذوقني جمر احزانك
من باليسر احبابك
وكل الخيم مستعره

لمصابك افدي اعيوني
ومن عابس آنه اجنوني
ومنك اريد النظره

حسين آه حسين آه

ظايع آنه وخدمتك هيه الوطن
تحت خيمة مجلسك يحله السكن
يا آماني من متاهات الزمن

بدمعات وخجل جيتك
خليني اعله تربيتك
وين انطي الوجه وين

كل عمري مشه بخيرك
لا تتركني يم غيرك
ادخيلك سيدي حسين

حسين

ارزقني منك فطره
ابجي بصدك وبحسره
يالما ترد الفقره

متهمني هاي الوادم
بس كون اصيرن خادم
وعليك انوح ابعبره

حسين آه حسين آه

كلبي طير ابحظرتك مكسور جنحه
كون دوم ابمجلسك ملجوم جرحه
يمن بالطف ظهرة ابحله للوحه

لوحة حب الآهيه
بدم وخيمه مرويه
كلشي الربك انطيت

كال حسين كتله ابشر
هاك اطفالي والخنصر
وبكل غالي ضحيت

حسين

يالماكو مثلك محبوب
يم بابه متضل اذنوب
فدوه الك ايامي

حتى الهوه يحتاچك
شد روحي يم شباچك
يالخدمتك احلامي

حسين آه حسين آه

سيدي لجلك فقط تحله المدامع
دوم خليني اعيشن بالمواجع
يمن طاري اسمك ايطهر المسامع

يامحله الحچي بأسمك
لا تبعدني من يمك
جيت ابحاجتي هاي

يالبس انته تفهمني
خليني اعله كد حزني
لترجعني مولاي

حسين

عيشني بس بالدمعة
ذوبني مثل الشمعة
يم خيمتك خليني

يالما فهمنه سرك
تحييني شمة كبرك
يالمستحيل اتردني

حسين آه حسين آه

تمت والحمد لله

باقر الافرجي

الخدمة

خدمته علي نعمه خدمته
رحمته تضل خيمه رحمته
==================
احنه ابكل سنه وعام
انجدد عهد خدام
نرفع راية حسين
ونذكر حرك الخيام
موسم خدمه ونشد
بسم الزهره الحزام
يرتب هذا مجلس
ذاك ايعين لطام

عشكته حرف اسمه عشكته
رحمته تضل خيمه رحمته
==================
امحرم هل اعلينه
خل انحظر ادينه
وكل الوكت لحسين
بالدنيا اشعلينه
بس حسين الاول
يستاهل بجينه
يامحله المجالس
بسمه لو حجينه

نظرته مثل نسمه نظرته
رحمته تضل خيمه رحمته
==================
محرم لينه قادم
خادم وصه خادم
لا تنسه المجالس
ابقه بيها هايم
نظل ابدرب الحسين
حزن نحيي المئاتم
ابد ما ننسه عاشور
لحد طلعة القائم

طلعته مثل نجمه طلعته
رحمته تضل خيمه رحمته
==================
يخادم هذا شهره
ثوب الخدمه حظره
ونصبها العزيه
بكلبك خلي جمره
هنياله التوفق
وحصل منه نظره
دك حيل اعله صدرك
وذكر كطع نحره

نذرته العمر يمه نذرته
رحمته تضل خيمه رحمته
==================
يخادم صفي كلبك
وكله حسين احبك
سلمٌ لمن سالم
وضد العلن حربك
بس حسين يسوه
حزنك تره وتعبك
صيح ابحسره مولاي
خليني اعله ادربك

حظرته الكلب حلمه حظرته
رحمته تضل خيمه رحمته
==================
اسمع لايمي زين
ليش الطم وهل عين
صرت آنه اجمل انسان
عاش ابخير الحسين
دربه اشلون اعوفه
وهو بركبتي دين
ضحه كلشي لله
واحد ماله اثنين

عظمته تضل قمه عظمته
رحمته تضل خيمه رحمته
==================
باقر الافرجي

للقاسم عليه السلام

يفدوه الجماله
بدر وبكماله
اعله طوله وخياله.....سلامات

هذا ياهو للي طلع...بدر بالخيمه سطع
كلشي بالدنيا ركع...الكشخته ولطوله

الشمس صايبها الخجل....ابطلعته كلشي انذهل
بـدر وجـها وكتـمل....كلها بي مذهوله

سل سيفه وللحومه جاسم هالنزل
جن حيدر صولاته وعليهم حمل
والعسكر بفنونه وحملاته انذهل

جميل ابقتاله
نجم ويتلاله
اعله طوله وخياله.....سلامات

هيبه ما بين الزلم...وجهه يسطع جن نجم
وامه نادت والنعم....امن الحسن ووليده

كلشي لجله مستعد....جنه حيدر من يهد
اليوصله لا مايرد... إله راسه ابأيده

طبلهم يم سيفه هالموت استقر
ودكلهم بالحومه ناقوس الخطر
اشجعهم كص راسه وداه السقر

يكلشي حلاله
وجميل ابخصاله
اعله طوله وخياله.....سلامات

هله بتربات الحسن...حيد متهمه المحن
حرب عالباطل علن....جنه سورة زلزله

طلع زلزلها الارض...شيخ وبكيفه الفرض
الزلم كضتها ركض....يفر بيهم كربله

متحزم ومسيطر هو اعله الامر
ما ردن لا والله إلا ومنتصر
والعمي وعيونه منذور العمر

والعمر حلاله
ناذره العياله
اعله طوله وخياله.....سلامات

طلع بعيونه الزعل...الجيش مرعوب وسأل
هذا جاسم لو زحل...نزل لينه وغاضب

الجيش شافه ونبهر... هذا جاسم لو كمر
اليوم ماكو اي مفر...الحسن جنه يحارب

ما واحد من عدهم قاوم ظربته
وتصدر بالساحه وتمشي چلمته
يتبختر عالعسكر هيبه ابمشيته

يمحله فعاله
يحسن الدلاله
اعله طوله وخياله.....سلامات

صاح والعكسر جفل...اليوم اسويكم وصل
ابزود جدي الفحل...عزم حيدر بيه

عمي فدوه الناظره...العرس عفته الخاطره
وروحي لجله حاظره...المهم يرضه اعليه


فدوه العمي اسنيني وتباها ابهايه
يستاهل روحي المشه الكون ابرايه
آنه اول عريس الحنه امن دمايه

يأكبر رساله
ولدهر بجاله
اعله طوله وخياله.....سلامات


تمت باقر الافرجي

كوم يا عباس انه زينب تره
امدلله جنت وصفيت اميسره

كوم يا كافالي زينب باليسر
واليتامه شما بجت جف تنسطر
ويضرب ابسوطه الشمر من كل كتر
وانت يا صانديد جثه اموذره

راسك ابجف الحقود اعله الرمح
اشما يزجرونه الك ينزف جرح
آنه كبلك خويه يا ريت انذبح
ولا اشوفن جثتك متطبره

يالجنت تزعل إذا مسني الهوه
بجمرة الخيمه تره جفي انجوه
والشمر يحدي يشيل اللوه
والعايله بعدك صفت متحيره

يابو فاضل فدوه رد عوف النهر
بشوفتك خل يرتوي خويه النظر
ريت السهم صوبني كبلك يالكمر
ريت عميه ولا اشوفك عالثره

خويه شحجيلك بعد عاللي سده
جثت حسينك بقت متوسده
وسحكو اضلوعه تره بخيل العده
امن الكفه بسيفه الشمر حز منحره

خويه من عدهم ابد محد سلم
حتى عبد الله الطفل صابه السهم
عاليتامه والنسه حركو خيم
العايله بالصحره خويه امطشره

باقر الافرجي