يابو فاضل شرد اسولف
وقبل اجفوفك علي سيد الامم
ابخدمة حسين ابو اليمه
الاول انته وصعدت اعلى القمم
حسين منك ما سمع بس چلمه صار
حافظت إعله الأخوه
مثل ما ذيج الحمامه الحفظت الغار
المهد اخوك اتعنه فطرس
ضل يرتل يمه بسمك
حسين كله ابشر يفطرس
من سمع بحروف اسمك
يالعشگة حسين خليته اويروحك
والتأذي حسينك اتحسها اوتلوحك
ياهو مثلك
حسين بيده الكون كله
ابطيحتك ظهره انحنه
حسين كظ خاصرته يمك
هلت ادموعه اعله خده
وظل يشمك
وطريق الخوه مُعدم
بس رسمته ابفيض دمك
الروح ترتاح اعله شوفك
جن حديقه وييده زارعها الحسين
انته يا اجمل شهيد
اصعدت لله ابلايه ادين
تارس الدنيا مواقف
جن نجم والدنيا ليل
انته يا عطر المراجل
ابلا عطر ينذم تره وما ينفع الهيل
زينب اختك
تمشي وي دم ابوريدك
اشكثر ما شايل ترافه
ايعشعش الطير اعله ايدك
فقط انته البلمهد
حافظ دروسه
راهب وما ينسه ابد
راهب طقوسه
ياللي ويه حسين صاير
عصه وابجف موسه
والوفه يمك تحفه
وبده ايدك ناقوسه


كلمات باقر الافرجي

الفرجي وليس الافريجي

فرض الحب الك يحسين صليت
من بروحي دك صوت النَوَاقيس

يالحبك ربيع الكلبي قرآن
والقرآن ينغث منه البليس

مو شغلت تعصب آنه وهواك
يم السنسله اشعدها الدنابيس

ابذكرك كلشي نشتم بي عطر ياس
وبمعناه تاهت هل قواميس

اليخدمك سيدي ابمعرفه واخلاص
يم الله إيتسجل اسمه قديس

الما حبك تره متفيده الاعمال
هو الاعمه شتفيده الفوانيس

الما حبك شجر لا ثمر لا لون
حطب للنار منها ونبتدي انقيس

ما انساك ذكره ابال شياب
عزيز انته خبر عد الجواسيس

خذت طبع الشمع معلوك الك دوم
يم المكبره ويم العراريس

يالمحليني رايه وبيد عباس
اقتحم حبك تره كل الاحاسيس

اليدك بابك يرد مغفور الذنوب
لو شمسوي مرفوعه المقاييس

ابرمشة عين ياخذ حاجته الظيف
ضل مبهوت يمك عرش بالقيس

✍️ باقر الافرجي

علي حتى اليضدك يعله بيك الصيت
لو مَلكهوه ما يتعله صيت ادلال

العمر كله تخيط همه اليفدكون
عمرهم كله جابوا بس طبع محچال

بيد ابليس همه وما بيدهم راي
طوعاً من مشوله ابلايه شد احبال

علي ابستان الاسلام اصبحت فلاح
وبلا مستحه اكبالك خذو السلال

تبقى الاول اشما رادو ايجذبون
الجذب حبله كصير اشما تماده وطال

عكل لبسو وكالو احنه صرنه شيوخ
وهيه الشيخه موقف موش لبس عكال

علي من اليضدك كل عمل مرفوض
ما محسوب عيد ابلايه شوف هلال

كلتلهم علي اعلى البشر بهواي
شو يمنه النزل ردو عليّ جهال

كلتلهم تره مو كل النزل مذموم
يحله ابنزلته يالوادم الشلال

✍️باقر الافرجي

يمن وحشه بغيابك صارت اسنيني
شمسك يمته تضوي بكل روازيني

مثل مديون آنه بشوكي صرت اعليك
حسبه اتجيبني وحسبه التوديني

طفل فاكدله ام اتعوضه يا العاب
غيرك يابو صالح ما يسليني

مثل فلاح والكل ملكه وصلت كاع
هيج واكثر ابجفك تداريني

صحره الدنيا وآنه اللي صرت رحال
وحبك بوَصَلة عالصح يدليني

مثل كاغد وسط صحره وخذاه الريح
تبعدني الذنوب وانته تحميني

يشعلني التعب حد ما اصير ارماد
بس طرواك يالموعود يطفيني

حسره بروحي عاچر تسمع ادلّلول
سكته اتهل مثل طبع الشمع عيني

العاشگ يحتيي لمن يجي المرسال
مراسيلك يمهدي يمتى تحييني

اشكثر وادم شفت وعيوني عطشانات
مامش غير وجهك شوفه ترويني

تم باقر الافرجي

روحين...بالجنه التقن هاي المسيه
روحين...عباس الكمر والهاشميه

بالجنه التقن روحين بالجنه
زينب والكمر وتعالت الونه
وتشبك زينب العباس وتحظنه

ابدمعات والمها تشتكيله
آنه ام الخدر آنه العقيله
اشلون اصعد عله ناكه هزيله

نورين...بجوّه العرش رب البريه
روحين...عباس الكمر والهاشميه

عذريني يخيتي ما اوچدنج
سَهم ابعيني ما اكدر اشوفنج
ولا عندي الجفوف البيها اشبكنج

احس مدغيره والجسم نحلان
وجهج چنه ورده ليش ذبلان
واشتم بالعبا ريحت الدخان

بحسين...احلفج سامحيني والزجيه
روحين...عباس الكمر والهاشميه

لا ما قصرت يا صحاب النخوه
ثايه اعله النهر دكيت للخوه
ياخويه الوفه من مايك اتروه

وين الگه اخو هاليشبهك وين
ولخدر الهواشم ظحه جفين
ومكسور الظهر من اجله الحسين

جفين...ألآل المصطفى انطيت الهديه
روحين...عباس الكمر والهاشميه

لجلج فدوه كل أيامي وسنيني
خجلان آنه منج ياضوه العيني
منج اعتذر يالحره اعذريني

ماي المشرعه ما وصل لطناب
وسكينه الحبيبه اتنام بتراب
وعليها ابحزن دلالي هالذاب

حزنين...حزن اسكينه والحزن الرقيه
روحين...عباس الكمر والهاشميه

خلافك ليلي ما اكدر انامنه
وبغيابك صرت للموت اتمنه
وتلاكينه يخوي اليوم بالجنه

آنه اليوم مشتاكه الحنانك
يالماكو شخص عوض مكانك
يمن عطر الوفه تارس كيانك

هالحين...خليني الزمنك بديه
روحين... عباس الكمر والهاشميه

تمت والحمد لله
كلمات
باقر الافرجي

حنيت...حنيت...الوجه الگمر عباس والضيه
حنيت...حنيت...لسـوالـفه الـمتروسـه حنيه

زينب آنه الابد ماكو امن اخوها
هم اخو هم كافل وهم صار ابوها
شايل ابجفه حنان امي ودفوها
وردة اسنـيني ابـغيابـه ذبـلوها

حنيت...حنيت...لعيون اخويه وطوله ولفيه
حنيت...حنيت...لسـوالفه الـمتروسه حنيه

ايفوح عطر الطيب منه ومن كلامه
وإعله سالفته الحنينه الليل انامه
ما نمـت ليلي بعد راعي الشهامه
ابـلا أمـان اشلـون ترتاح الحمامه

حنيت....حنيت ... حسره والم وبونه مخفيه
حنيت...حنيت...لـسوالفه المتروسه حنيه

يا اخت مثلي اخوها دللاها
يكطع انفاس الهوه لو زعلاها
ينحني يمها ابخجل لو كلماها
وبلسانه چلمة اختي يا حلاها

حنيت...حنيت...بصوته الحنين ايصيحن اعليه
حنيت...حنيت...لسـوالـفه الـمتروسـه حنيه

عـيني مـشتاگه الـوكفـته والصلاته
ومن يناجي الباري ياناس اشحلاته
وجـم نـبي عـباس حـاملهن صفاته
ويـنزل ابـحاجه الملك يعكد عباته

حنيت...حنيت..لحادي الظعينه من يمر بيه
حنيت...حنيت...لسـوالـفه الـمتروسـه حنيه


كـل عـطـش يـم النـهـر يشـعر ابذله
بـس عـطش عـباس عـالماي ايتعله
مـا اشـربـك كـبل اخويه حسين كله
ابوجه شاطي العلكمي سطره تركله

حنيت...حنيت...والدربه عيني ظلت اربيه
حنيت...حنيت...لسـوالـفه الـمتروسـه حنيه


ابـزود اخـويه جـان ما ينجاب اسمي
ابطيحت ازنوده وسف شتموها امي
مـن بعـد مـا جـان راعي الغيره يمي
الشـمر يحـديها الـظعـينه آ يـهظمي

حنيت...حنيت...بس ادري ما يرجع بعد ليه
حنيت...حنيت...لسـوالـفه الـمتروسـه حنيه

تمت والحمد لله
كلمات
باقر الافرجي

ها يملك الموت رايد روحي
وبس جسد ضليت آنه ونوحي
روحي يم المشرعه...يم اخوي ومصرعه
———————————————
خل اسولفلك يعزريل اعله حالي
حسين رد محني الظهر دمعه يلالي
هنا احسن روحي طلعت وي سؤالي
وينه عباس وحزن بان ابخيالي

اتخوصر حسين اووكف يم الخيام
الكمر طاح وغطته غيوم الظلام

صاح ويهل مدمعه...يم اخوي ومصرعه
———————————————
خل اسلولفك عله ايامي القديمه
لو تأذيني شمس يصبحلي خيمه
ولو احسن بالعطش يجمعلي غيمه
والحياة بلا وجوده جنها هيمه

ما اسولف لو ردتها حاجتي
بكثر ما يهواني يفهم نظرتي

وفي طيب مرضعه...يم اخوي ومصرعه
———————————————
آنه زينب من بعد ما راحت امي
ابد ما حسيت چي عباس يمي
بي دفوا امي وحنان ايشدلي عزمي
من انامن فوك جتفه ايزيح همي

من اشوف اعيونه احسن بالامان
ايفوح عطر الخوه منه بكل مكان

الوفه ابجفه يوزعه...يم اخوي ومصرعه
———————————————
كلبي دك الطول اخويه وبشتياكه
الجان ويه الغيم بجفوفه ايتلاكه
ويا حلاته من يكود ابجفه ناكه
وبدليلي جمره تلهب عله افراكه

ضحه روحه من تبدت جربته
صاح بسمي النبله لمن صابته

طاح اديه امكطعه...يوم اخوي اومصرعه
———————————————
يهنياله اليموت ابنص العزاز
واليحبه بالدمع يمشيله جناز
لا تعاتب عالفكد لو شال عگاز
يضل الشوفته كل ليله محتاز

يا حلات الموت لو يم اخوتي
اوبنياح ايشيعون اجنازتي

الصوتهم آنه اسمعه...يم اخوي ومصرعه
———————————————
اشمنتظر يا موت ماكو اليعتنيلي
يلا ريحني الحنين اهدملي حيلي
عكب فكد اعزازي جمرات ابدليلي
عله اصورهم كاضيه ابآهات ليلي

وآنه بفراش المنيه وأنتظر
بيد اخوتي اتوسد ابذاك الكبر

الشمل كلي اشيجمعه...يم اخوي ومصرعه

———————————————
تمت باقر الافرجي

شبيهة فاطمه زينب تعرفوني
حجاب الباري آنه يالتجهلوني

كمر هاشم كفيلي...كمر هاشم

زينب اسمي والزهراء امي اتكون
وابويه حيدره المالي ضواه الكون
خيالي الجان ما تنظر عليه اعيون
اطبن للقصر مسبيه آنه اشلون

اسرافيل ابعظمته يوكف ابابي
وقسم جبريل كله بعفة احجابي

كمر هاشم كفيلي...كمر هاشم

المَلَك يستأذن ويدخلي للصيوان
وصيوان النبوه بي تشب نيران
وانه بنت النبا المعروف بالقران
يطكني السوط وآنه آية الرحمان

يشتموني وهلي هم آية التطهير
يتنخه المَلَك بيهم لونه ايطير

كمر هاشم كفيلي...كمر هاشم

ابويه ابروحه جان يعزب الجوعان
ابطريق الحق ضوه ويدلي بالعميان
اويجازونه ابذبح ابنه البقه عطشان
وبناته اميسرات ايجولن البلدان

ابويه البلحرب فرسان التهابه
ابنه اعله الثره متسلبه اثيابه

كمر هاشم كفيلي...كمر هاشم

زينب آنه اخت اليزدهر عباس
اخويه الينبع ابعفه وترف وحساس
يم الشجره ما ينطق اسم للفاس
بعد اغيابه تتفرج عليه الناس

جان ابطوله من الحر يفييلي
هسه الحر اخذ من عندي كل حيلي

كمر هاشم كفيلي...كمر هاشم

بخواني الضعن مهيوب من يمشي
بس سهم القدر ضيعني من كلشي
مصايب فكد اخوتي شيبت رمشي
شحلات اخواني لو شالوا الي نعشي

غريبه وما اليه اليوم جنازه
ما يسوه العمر لو غابو اعزازه

كمر هاشم كفيلي...كمر هاشم

تمت باقر الافرجي