عندما دخلو الى تلك الخرابة العينه
واتو براس الحسين عليه السلام
الى رقيه فقالت


هله بالشال دفو بالجنه ما موجود
مشتاكه الحنانك بويه انه اهوايه

انته ابلا حضن وعليك اطيح اشلون
اشفافك فطروها اووجهك امرايه

كلي اشلون صابو جبهتك بحجار
وهيه الجنة من جبهتك ظوايه

اعله صدرك من كعد هذا الشمر ماخاف
عرش الباري صدرك ما عرف هايه

متيقنه الارض غظبت ارتجت بيه
بس كلتلها حفظ الدين بدمايه

كطعو خنصرك ليش واليا اسباب
وفطرس كال هالخنصر صفه ادوايه

يمن جبريل وملاك السماء اصفوف
وراك اتصلي من تفرش امصلايه

كضيت الدرب من كربله للشام
ترتل عالرمح آيه ابأثر آيه

دخلنه الشام من كد الظلم جن ليل
بس راسك شمس فوك المسنايه

مشدوده اعيوني بس احسن بيك
اصيحلك لچن ما اسمع احجايه

اهنا لا يمكن اهنا جدامي صار
اهنا عطرك اشمه يمشي ويايه

راسك بالطشت جابوه حرت بهاي
شمس وبنص طشت وتلمها الفيايه

خليني اقبلك يحله هسه الموت
اشتسوه العيشه غاب الكمر بسمايه

باقر الافرجي

يقول الراوي
كانت السيده زينب عليها نائمه
وبدأت الشمس تلوح اطرافها
فدخل الامام الحسين عليه السلام
ووجد الشمس تقترب اليها فوقف
وجعل عبائته فيين لها الى ان استيقظت
من نومها
فوقفت على جسد اخيها يوم العاشر
وذكرت ذلك الموقف
وقالت

عمت عيني عليك اموسد التربان
الشمس باكت يخي من وجهك ارسومه

محتركه العبا وشلون افييلك
وجسمك عالثره متسلبه اهدومه

يمن جنت ابعباتك في إليه اتصير
اعله طولك تبقه حد ما تخلص النومه

اشكثر محتاره آنه اشلون اردلك ذيج
وبالحسره وجمرها روحي ملجومه

اليتجيلي منهو اخلاف طولك ذاك
تره تصعب عليه الكعده والكومه

تناشدني رقيه اعليك وحتاريت
شجاوبها وعبرتي ابصدري مكتومه

شكللها بعد ساعه و علينه ايعود
وانته اعله الارض نحرك چفه ادمومه

شكللها يجي وترحين انتي اوياه
وضايع خنصرك بتراب هالحومه

لو احظنها وحجي اوياها بالدمعات
امن الوالد يطفله صرتي محرومه

انته واهل بيتك نور فوك ارماح
جن أنته الكمر وصحابك انجومه

لوداعك اجيت اعذرني خويه ابهاي
تره درب اليسر هل بانت اعلومه

واريد اكصد لخويه الكافل العباس
واقبلهن جفوفه الكلها حنيه

مو قصدي العتب يالغالي لا والله
بس عودني اشكيله عله البيه

اريد اشكيله عن موقف هظمني اهواي
بقه اخلافه الشمر يتبختر اعليه

لا تحجين تره العباس ما موجود
ويكلي اوياي ترحين انتي مسبيه

بهدومي تره الموجود بس دخان
ومن نار الخيم جفيني مجويه

يريت الموت اخذني من كبل ماشوف
رقيه تنسلب من عدها ترجيه

وترف نحر الطفل وسهامهم خشنات
سكوه ابنبله لمن رادله اميه

وجاسم عالارض حنت جفوفه ادماه
وشمعة عرسه بدموع امه مطفيه

وعلي الاكبر جبده امن العطش مفتوت
وامه بالخيم تتنطر الجيه

وسكينه اعله النهر تشبح نظر وتصيح
جمر الخيم يا عم جوه رجليه

واريد اشتم عطر خده واصيح افيش
واحط راسي اعله صدره وابجي انه اشويه


باقر الافرجي

ام البنين ع تخاطب الزهراء في ساعة احتضارها

سامحيني...نادت ام عـباس يـا زهره الزجيه
سامحيني...ما رحت للشام وي زينب سبيه
سامحيني...سامحيني

ام الـوفـه تـطـلب عـذر مـن الـزجيه
عـذرنـي يـا ام الـحـسن لا مـو بديه
اتمنيت اجيج وجدمي بي آثار چويه
واتـمـنه نـيـران الـخيم مستعره بيه

صح الكمر...يم النهر...گطعوله جفين
كلشي فده...كون العده...ما تذبح حسين

سامحيني...ما متت عطشانه برظ الغاظريه
سامحيني...ما رحت للشام وي زينب سبيه

امصاب الحسين اكثر ألم آ يالحبيبه
اتمنيت اكون ابكربله ابيوم المصيبه
ويا ريت أقـبل مـنحره مـثـل الغريبه
آنه وسكينه انطيح يم جثته السليبه

سلبو ملبسه...وي محبسه...اه المصابه
نحر انكطع...خنصر وكع...ضاع ابترابه

سامحيني...صدري ما رضته خيول اعوجيه
سامحيني...ما رحت للشام وي زينب سبيه

ظـحيت انـه ابولد اربعه لابنج يزهره
بس ابقه اشعر بالندم واشعر مقصره
كـون آنـه اروح الـكربله واخدم الحره
ولـمتـون زينب كون متني اللي انذره

سوط الشمر...لم الخدر...لوع متنها
وعله الهزل...تجري وتهل...دمعة حزنها

سامحيني...ما خذوني اميسره ومجتوفه اديه
سامحيني...ما رحـت للـشام وي زيـنب سبيه

اتـمـنيـت اكـون ابـكربـلـه وبلليل الآلام
من هجمو اعله العايله وحركوها الخيام
وي زيـنـب انـلـم الـحـرم ونـلـم الايـتام
ومو عالترب بحظاني ريت الحره وتنام

نوم الهنه...احجي انه...اوياها بهداوه
حركو عبي...ابنات النبي...وبكل قساوه

سامحيني...ما نمت عالكاع مثل الهاشميه
سامحيني...ما رحت للشام وي زينب سبيه

اتمنيت اموت اميسره ابذيج الخرابه
واحـضـن رقـيـه مـن تنـادي بابه بابه
والظالم الراس الولي بالطشت جابه
مكطوع نحره والجبين الحجر صابه

ضليت اون..عل تندفن...بالغربه وتموت
ونت على...راس العلى...وبعالي الصوت

سامحيني...عني ما كالو غريبه وخارجيه
سامحيني..ما رحت للشام وي زينب سبيه

مـا قـصـريـتـي لا ابــد نــادت الـزهـره
هاي آنه جيت وبيدي هاليمنه ويالسره
خـليـني اقـبـل راسـج انـتي الما مقصره
انتي الوفه ونبع الوفه واصل الوفه ودره

وبكربله...الاهل العلى...انطيتي بنينج
وفيتي العهد...وعله الوعد ...آنه الاجيتج

سامحيني...ما حـظنتج ألـم بــسـمـار بيه
سامحيني...ما رحت للشام وي زينب سبيه

تمت
كلمات باقر الافرجي


https://www.tg-me.com/BaqerAlAfraji

كلماتي باقر الافرجي انطوني رايكم

الى امير الحق علي عليه السلام

يا نبأء الله العظيم...يا صراط المسقيم
انته يالحُبك نعيم...يا حبيبي يا علي

علي يا نور وابد ماكو بكمالك
آية الكرسي تعرفنه جلالك
والجمال انوجد مولاي بجمالك
لمن اتصلي يمحبوبي اشحلاتك

علي يا نور الإله...بالاراضي وبسماه
علي يالحبك صلا...يا حبيبي يا علي

سيدي واعله البشر بارينه علاك
وبسمك اتسبح بقت كل هاي الافلاك
كل ملك ما يمشي خطوه وحده لولاك
يا علي هو العلي سبحانه سماك

ابجفك اترد الشمس...لان منك تقتبس
نورك الما ينحبس...ياحبيبي يا علي

بيك ربنه تمم اعلينه الهدايه
الحمد لله يا امامي عالولايه
يا بدايه ابلا حدود ولا نهايه
يا امير اعله الخليقه واعظم آيه

يا ولي الاولياء...يا عماد الاتقياء
ياوصي الاصياء...يا حبيبي يا علي

انته باء البسمله وكل البدايات
انته يا قرآن ناطق أجمل آيات
نورك الشع ومله هاي السماوات
ذكرك ايطهر النفوس افضل عبادات

جنة الله اعله الارض...حبك اعلينه فرض
ياشفاء الكل مرض...ياحبيبي ياعلي

ياعلي كلها وهم وانته الحقيقه
علمك الماكو ابد واحد يطيقه
الما يحبك تايه امظيع طريقه
وولايتك للجنه مولاي الوثيقه

يا امير المؤمنين...يا امام المتقين
حبك الكهف الحصين...يا حبيبي يا علي

تمت

كلمات باقر الافرجي

يانهر المحنه...يالحبك جمعنه
يم بابك اجينه اليوم يا فجر اليتامه

ياعلي يابا الحسن هاليوم اجينه
يعطاي والك مدينه ادينه
يحاوطنه الالم ولتف علينه
يمن بسمك تعطر كل حجينه

يم بابك كعدنه...ماظنك تردنه
يا خيمتنه وبجالك نعيش احنه بكرامه

ياطبيب الكل علل ظايع دواها
وانته محور للارض منك مداها
والكواكب منك اكتسبت ضواها
شيعتك هاليوم الك مدت يداها

يالحبك سفينه...لترجع ادينه
يمك يا ضوه العينين نشعر بالسلامه

حجة الباري ويفوز الوصل بابك
يمن املاك السمه اتقبل عتابك
احله من عطر الورد ريحة ترابك
يدخل الجنه التسجل في كتابك

يالحبك مناره...يا مأوه الحياره
جبرائيل يم بابك يضل يبدي احترامه

حاربت كل العده لأجل الرساله
انته قرآن ونطق بأمر الجلاله
حامل اوصاف الجليل وكل جماله
والنكر حبك مشه بدرب الظلاله


ايتامك اجينه...نظره يا ولينه
حبيناك احنه وما تهمنه كل ملامه

كل دعاء مقبول يا حامي الحميه
لو ذكرنه اسمك الرب البريه
احنه تنوسل بجاهك هالمسيه
يا الهي عجل الطلعه البهيه

انكحل بي نظرنه...ونخلص من المنه
وبجفه تلوح الرايه هاي اجمل علامه

تمت

باقر الافرجي

يا ابا الحسن نورك ظهر وتجلى للطور
غيرك ابد ماكو ولي يا منبع النور

انته الولي...نورك جلي...يا ابالحسن يا علي


شحجي عنك يا والينه...شحجي يالحبك سفينه
ونفس انته اللي بينه....يا علي
فاز هاليعلن ولائه...وحامل بجفه لوائه
وبسمك ايردد ندائه...يا علي
بسمك القران صرح...بالغدير الهادي وضح
واليحبك كال يفلح...يا علي


الجفك رفع طه النبي واضح المضمون
كلمن يحبك يا علي بحسابه مامون

انته الولي...نورك جلي...يا ابا الحسن ياعلي

مثلك انه وين الكه...والجليل انطاك ملكه
ابجفك التدبير فلكه...ياعلي
وانته للاملاك ناصر...انسالو ورادو مناصر
بسمك انرفعت حناجر...يا علي
وجه الباري سؤاله...احتارو اكبال الجلاله
وانته وضحت الدلاله...يا علي

كبل الخلق اسمك علي مذكور مذكور
وعله العرش يا سيدي مخطوط بالنور

انته الولي...نورك جلي...يا ابا الحسن يا علي

علي ياهو اللي ابصفاته...اتصدق الربه بصلاته
ونذر للطه حياته...يا علي
بكعبة الباري الولاده....وذكر أسمه أفضل عباده
وبس إلك تحله السياده....يا علي
حبك ينور كياني...ذكرك يطهر لساني
واحد انته بلايه ثاني...ياعلي

حبك الي خيمه وعشت بيها بكرامه
وكل شيعي اصبح نورك بكصته علامه

انته الولي....نورك جلي...يا ابا الحسن يا علي


شحجي عن فضلك وسره...ابجفك الكون وتدبره
والملائك تمشي بمره...يا علي
بالعرش مكتوب إسمك...بالگمر منقوش رسمك
ابلا وساطه الله يكلمك....يا علي
والخليل افضلك انته...نجه من ناره وحسرته
ندب بسمك وانته عنته...يا علي

يونس ندب بسمك نخه وبعالي الصوت
علي علي علي علي انقذني من حوت

انته الولي...نورك جلي..يا ابا الحسن يا علي

للسمه انته عمدها...والشمس بيدك تردها
لأن بنوارك تمدها...يا علي
الليل كله ما تنامه...خيمه انته اعله اليتامه
منبع واصل الكرامه...يا علي
خيبر ابجفك قلعته...والرسول الهادي انته
ابسيفك الطه نصرته...يا علي

سيف الله سيفك يا علي وحافظ السره
تنصر الدين المصطفى وتحامي ظهره

انته الولي...نورك جلي...يا ابا الحسن يا علي

نورك الضوه الخليقه...وهم كلها انته الحقيقه
علمك المحد يطيقه...ياعلي
عشكك امحلي حياتي...وبيك يا محلاها ذاتي
ظامن ابحبك نجاتي...ياعلي
بسمك اشمحله السوالف...يا امان الكلشي خايف
كلها طاحت وانته واكف...يا علي

راسك لمن صابه ابغدر سيف المرادي
تهدمة واللهِ اركان الرشادي

انته الولي...نورك جلي...يا ابالحسن يا عل

كلمات باقر الافرجي
.

وحك الباري والمرسول...خاتم
علي الحبك الوصل الفوز..خاتم
انته اتصدقت مولاي...خاتم
وابركوعك يا أبو النفس الابيه

باقر الافرجي

علي
يا فجر اليتامه شحجي مدحي ايضل كصير
علي
والماعرف شخصك لا يسولف عالظمير
علي
وبجفك الدنيه وما ملكت الا الحصير
ياحميتك
بجفك الخبزة عيالك بيها تچسم
خاطر اتوكل الفقير
تيهيت اشأحجي عنك
بالكرم مالك نظير
اشكد يداري الفقره جفك
انته يالخلكك حرير
جفك اصبح عاليتامه خيمه متروسه حنين
آه يا نبع التواضع انته يا كهف الحصين
تكعد اويه الفقره ماجنك امير المؤمنين
ولو يمر عطشان يمك
ماي لشفافه تصير
تنكط انسانيه گصتك
واصبحت الها امير
كلك احساس ومشاعر
ابكثر ما شايل ترافه
ابحظنك أتلوذ الحمامه
ولو تجوع اطيور تندل
بابك بسرعه تجيك
يمك اتحس بسلامه
بيك يا مولاي حارت
ما توصفك هالعقول
فقط انته اليشبع الجوع بكلامه
ابظلك الايتام عاشت بالكرامه
هذا كله وبالحرايب
خزرة اعيونك قيامه


قلمي

باقر الافرجي