يشبه علي اهوايه
عباس ابو الرايه
..................

نفس الشكل يشبه علي بالعركة والهدة
طوله مثل طول الجبل ماواحد ابگدة
والخزرة من عين الگمر كل فارس اتجمدة
الله صنع نور السمة صدگوني من عندة

اية وابن اية
عباس ابو الراية
.......................

وجه الگمر يوسف لون بس يصفن بشكلة
يوسف جمالة معجزة بس الگمر
احلة
عباس ابو فاضل فقط مامنخلق مثلة
رب العرش من خالقة مااعرف اشخلة

نور الله والغاية
عباس ابو الراية
........................

الله بعث حيدر علي وي النبي
ايقاتل
اوية السبط الله بعث عباس ابو فاضل
نفس الوصي بيوم الحرب سيف الابو شايل
جدة الكفل اشرف نبي وعالجد طلع كافل

ناصر للولاية
عباس ابو الراية
.......................

الحرورة البراس الگمر مثل الشمس تچوي
شيخ وابن شيخة البطل شايل طبع بدوي
بالمعركة خيل وزلم بذراعة ظل يطوي
صولاتة صولات الابو بالحومة شمسوي

هالشط گطع ماية
عباس ابو الراية
.......................

عون افتخر خالة البطل والزلمة المجرب
يم الوفي وراعي الخدر كل صعبة ماتصعب
زلمة وابن زلمة صدگ عباس اخو زينب
چن صاعقة الهم نزل واچفوفة ماتتعب

مايخلف احچاية
عباس ابو الراية
.........................

الخادم عمار الساعدي
ونسالكم الدعاء

للعليلة ع

ليلية...بفراشي اظل سهرانة
ليلية...مو من مرض تعبانة
ليلية...الجيت الاهل لهفانة
...............

ليلية سهرانة اظل...من اهلي راحوا للسفر...هالبيت كلش وحشة

ليلية افتر بالغرف...بلكت اگولن عاودوا....ابكل الغرف اتمشة

من البچي جفني ذبل...تعبانة من گد السهر....من الليل حد الغبشة

چن طير مكسور الجنح....ه‍يچ انه احس ابلا هلي...چن طير فاگد عشة

مقهورة....چا بيش اصبر روحي
مقهورة....همة الدوة لجروحي
مقهورة....وحدي بگيت اهنانة
.............
مشتاگة لحضان الابو...ياوسفة عافاني ومشة....وانتظرة كل اشوية

مو گلبي تعبان و خلص...ياناس اريدن والدي.... ياهو يگلة اشبية

ياهو اليوصلة الحچي...گلولة بنتك رادتك....عايفني وانة ابنية

مو راح اموت من القهر....ياريت اشوفنة الابو.... الحسين ابو الحنية

گلولة....عندك عليلة ابدارك
گلولة...تسمع تريد إخبارك
گلولة....منتظرة يم بيبانة
..............
مشتاگة لسكينة اشكثر...ام المحنة هالاخت...ومشتاكة اشوف الأكبر

العبد الله ابو گماط الحلو...مشتاگة اشيلة بهالحظن...ياريحتة چن عنبر

وارقية اشوفنهه اشوكت...محله سوالفهه وعلي...چنت ابسوالفهه انسر

عالباب اتانيهم گمت....وبگل اساميهم صحت....كل خوفي صايبهم شر

كل خوفي....راحوا ولا الگاهم
كل خوفي....طول العمر فرگاهم
كل خوفي....كل اخوتي عطشانة
...................
ظلمة الديار ابلا أهل...والبيت ابد ماينگحم....مطشرة ذيچ اللمة

ماتسوة دنياي وعلي....وانفاسي ضاگت يابشر...دون اهلي ماشم نسمة

ابلاية امي وابلاية ابو ....شلي ابحياتي والعمر...هالموت آلية نعمة

من يمي كل واحد مشة....بالغربة كلهم طولوا....لاعم اجه ولا عمة

لو بيدي....والله وعلي امشيلهم
لو بيدي....عن شدتي احچيلهم
لو بيدي....ماظل ابروحي انة
..................

خايف عليهم هالگلب...چنة يحس كل الاهل....محد يرد بالسفرة

چن اخوتي دمهم نزف....لاالاكبر ولا من عبد....والقاسم اعلة الغبرة

عمي يظل فوگ النهر....واخيام اهلي تحترگ....ومگطوع ابوية نحرة

عماتي چنهن ينسبن....كلهن يصعدن عالهزل....للشام كلهن اسرة

روس اهلي ...وي السباية اخذوهم
روس اهلي....لرض الغرب ودوهم
روس اهلي....من الشمس يسبانة
..................

الخادم عمار الساعدي
ونسالكم الدعاء

للانصار
...............

شيب وشبابك ثوار
يابو علي وياك انصار
..................

بالحومة نصگرهم صگر
انراويهم انجوم الظهر
گاع الله نفطرهه فطر...بس اشرنة حسين

گاع الله نربدهه وعلي
روس وايادي تمتلي
انطينة أمر يابو علي....نادولك السبعين

نسوي الطف الك يوم القيامة
نطب ومن نطب ابكل شهامة
تره الصاحب صدگ يوفي الصديجة
والك نهدي العمر باحلة ابتسامة

دمنة ولايبرد حار
يابو علي وياك انصار
..................
ياصاحب النة ويااخو
يااغلة من ام وابو
ياهو اليمس طرفك منو....نگلب عليه الكون

شوف الصحاب امحزمة
تصبح للرچاب الدمة
انبيض وجهه الفاطمة....نوگف درع لام عون

بصمنة ابدم الك حد المنية
گبل دمك دمانة واهلية
يبو الأكبر ولا نترك خيامك
نريد بهالامر نرضي الزجية

نقسم وحگ الكرار
يابو علي وياك انصار
.....................
صحبتنة مابيها دغش
للفزعة واحدنة غبش
مو منة ذاك الي رعش...وازلامك انت اشراس

شايبنة شاب بهالحرب
متعصب ابعصبة ويطب
يگلب معسكرهم گلب.....يستنگي أكبر راس

الك خالق زلم الله تعاله
ابد منهم ولايوجد محاله
زلم عندك وفة وكلهم حمية
فدوا لجلك عمر وابكل بسالة

الاكبار اجولك وازغار
يابو علي وياك انصار
.....................
بالرية مادام الهوة
بيدينة ميطيح اللوة
نفزع فرد فزعة سوة....واعله المناية انفوت

الصحبة لا مو بالعدد
واحدنة منطيك العهد
للموت منعوفك ابد.....ليك اشحلاة الموت

ترة انصارك نطت عهد الشهادة
يمحلة الموت الك مثل الولادة
اجينة الكل نوافيك ابدمانة
يمن حبك يظل رمز السعادة

لو خيرونة نختار
يابو علي وياك انصار
..................
الخادم عمار الساعدي
ونسالكم الدعاء

ساكت يابشر چا ماتشوفة
اكتاب الله احترگ وبكل حروفة
يلي تنادي يحسين
گوموا وانصر الدين
..............
يل تنادي حسين انهض...مو فقط صدرگ تدگة
حسين من أجل الرسالة...واخذ لجل الدين حگة
صير مثل حسين واطلع...جفن عينك لاتطبگة

يحرگ كتاب الله النذل
گوم احچي عن هذا الفعل
مو كافي تسكت يارجل
قصدة هم گلبك يحرگة

متعمد ترة يحرگ دليلك
يلة يارجل گوم اعله حيلك

النبي وصه بالاثنين
يلي تنادي يحسين
................
كافي من السكتة كافي...ليش راضي عالمذلة
هي نفس الشغلة ردت....حسين هم ذبحوه كله
حسين والقران تؤأم....وبالروايات الادلة

حسين وكتاب الله سوة
نفس الفعل والمحتوة
اثنينهم بيهم ضوة
والتركهم عاش ذلة

يل تلطم على حسين ومصابة
انصر خالقك وانصر كتابة
اسمع كلمتي زين
يلي تنادي يحسين
................
الخادم عمار الساعدي

اناشدكم يهلنة
يل كلكم محنة
يهلي الخاطر الله لاتخلوني
..................
يهلي بس حزن شفتةوراكم
الف وسفة الزمن مني خذاكم
عليلة انه أو تركتوني شجاكم
اعتب ياهلي عالطشراكم

عليلتكم نختكم
بس عودوا البنتكم

يالرحتوا ابضعنة
اناشدكم يهلنة
شفت الموت والله من تركتوني
يهلي الخاطر الله لاتخلوني
.................
ابوية بهالسفر يامة رجيتة
لزمت ايدة دخذني أو بوسيتة
اخذ وياه روحي واهل بيتة
اڜكد ابعبد اخوية حلفيتة

صعد بس خواتي
من باقي ابحياتي

مطشر شملنة
اناشدكم يهلنة
فوگ النوگ وسفة ماتصعدوني
يهلي الخاطر الله لاتخلوني
..................
ضعنكم والله تانيتة ولاعاد
عالبيبان اناطركم ولافاد
نحل جسمي المرض والنوب الأبعاد
اتانيكم يخياتي او يالأولاد

لي وين انتظركم
ماخلص سفركم

ردولي الوطنة
اناشدكم يهلنة
چنكم بالسفر كلكم نسيتوني
يهلي الخاطر الله لاتخلوني
....................
دعيت الله اشكثر ليه يردكم
شفت الموت والله من بعدكم
ولاواحد لفاني من ولدكم
لسة أحياء ادعي الله بعدكم


أخاف امن المنية
متردون آلية

ويتكاثر حزنة
اناشدكم يهلنة
ماتنشف بعدكم دمعة اعيوني
يهلي الخاطر الله لاتخلوني
.................
سفرتكم هلي صارت طويلة
ماخلص سفركم مستحيلة
عدكم بالوطن ظلت عليلة
للرجعة انتظر ليلة اعله ليلة

دمعاتي اشيگظهه
والروح ابمرضهه

ياهمكم كتلنة
اناشدكم يهلنة
يم الباب ميتة ايجوز تلگوني
يهلي الخاطر الله لاتخلوني
..................
الخادم عمار الساعدي
ونسالكم الدعاء

انخة بأم عباس تنطي بأيدهه
انت بس مشي عليهه اوليدهه

اية وأم الاية....ارفعلهه الراية
انخة بأم عباس تنطي بأيدهه
................
هاي المربية زلم للسادة
يأخذ الينخاهه بيدة امرادة
هاي خدمة حيدرة واولادة
قائدة ومخلفة بس القادة

اعتنيهه اعناية...ارفعلهه الراية
الله راد اعلة الخلق تخليدهه
انخة بأم عباس تنطي بأيدهه
..............

ياولدهه من صدگ خيالة
امفصلة للعباس بيرغ مالة
مثل ابنهه عالمة او كفالة
حرز شدت للگمر بشمالة

وصتة ابتوصاية....ارفعلهه الراية
واجب اليوم الحشر تخليدهه
انخة بأم عباس تنطي بأيدهه
....................

الحاجة يمهه بفاتحة خلصانة
بالكرم معروفة هالسلطانة
يأخذ امرادة النطقهه السانة
من بعيد تصيح جيتك انة

تحضر الوفاية...ارفعلهه الراية
بالكرم ربنة الجليل ايزيدهه
انخة بأم عباس تنطي بأيدهه
...................
تحضر الخدام أم عصابة
تنخي ابكل مشكلة وطلابة
تموت بحسين وتجي لمصابة
بكل مجالس گاعدة بنص بابة

بكل عزة واقراية...ارفعلهه الراية
والخدم واجب تره تقليدهه
انخة بأم عباس تنطي بأيدهه
..................
بيهه مبخوتة الكرة الأرضية
أبد مو بدوية لا علوية
حرز لينة بكل عزة ولطمية
وابذكرهه كل شدد مگضية

للشدد گضاية ...ارفعلهه الراية
الحاجة يمهه تنكضي ومنعيدهه
انخة بأم عباس تنطي بأيدهه
....................
الخادم عمار الساعدي
ونسالكم الدعاء

مثلج ماكو امرية
ياشيخة أو بدوية
.................
يافاطمة يم الگمر يالبوة الكرار
يالماكو بوصافچ مرة بالتضحية ماصار
يمرضعة أربع ولد كلهم حيود اكبار
يمعزبة بولدچ صدگ لحسين ابو الاحرار

صح كربلائية
ياشيخة أو بدوية
................
يمخلفة اشجع ولد قائدهم العباس
ياعالمة أوياصابرة ياطيبة من الساس
من اشرف انساب العرب يافاطمة عالراس
يامرجعة هاي الخدم بسمچ تصيح الناس

ام للعزوبية
ياشيخة أو بدوية
...................
اشما يثگل اعلينة الزمن لو تثكل الشدات
نتعنة الچ يافاطمة بالصعبة والكلفات
يم البنين ابمجلسج تنحل شكو حاجات
يمجربة بكل الشدد يمخلصة الصعبات

بكل حاجة مدعية
ياشيخة أو بدوية
....................
يم البنين امعتبرة يالفضلج اعله الكون
هاي الخدم وابحضرتج هالليلة بس يدعون
تسهيل أمر هالفاتحة يافاطمة يقرون
قسموا قسم طول العمر لحسينچ يخدمون

كلهم فرد نية
ياشيخة أو بدوية
..................
ياطيبة ياام الخدم يامرجع الخدام
يالبسمچ الكل يندعي كل خادم ولطام
لجل الحسين ومجلسة هوسنة بالاعلام
وابيومچ بهذا العزة امتحزمين احزام

نقرالچ لطمية
ياشيخة أو بدوية
..................
الخادم عمار الساعدي
ونسالكم الدعاء

مسلم امعدل ياناس بالحرب مابي لولة
..................
من دخل مسلم الكوفة....چن علي ابشخصيتة
ابن عم حسين هذا....ياهو ينكر صيتة
تگرمت كل العساكر....بس لبس خاچيتة
صعد عالمهرة ودخلهه...وهوس ابچفيتة

هذا ابن العباس هم نفس زودة أو طولة
مسلم امعدل ياناس بالحرب مابي لولة
...............
مسلم ابچفة اليسطرة....وچهه بيدة يديرة
واليگض راسة بأصبعة...ذبة لاخر ديرة
بالزلم يطبر ابواهس....چن علي ابتطبيرة
حوك مسلم بالمعارچ...زلمة ماكو غيرة

ويحود بيهم كل صوب بالجيش لاعب جولة
مسلم امعدل ياناس بالحرب مابي لولة
..................
حيل ذواق ابضربتة....من يطر كل هامة
ياحلاتة أو ياكشختة....لو يشد الثامة
يدبچ اعلة الگاع مسلم...اشكد ثگيلة اجدامة
تعب الجيش ابنزالة....أو ماتعب صمصامة

لو يخزر ابعينة الجيش كلهم إلة يركعولة
مسلم امعدل ياناس بالحرب مابي لولة
...................
خيل وازلام ابنظرتة....ماتقاوم عينة
بكيفة يختار اليكفخة...يصيد وينة الوينة
روحهم يسلتهه بيدة...ياكبر چفينة
يگطع ابروس الاعادي....ويسحگ ابرجلينة

دخيلك يمسلم فد صوت كل الزلم گلولة
مسلم امعدل ياناس بالحرب مابي لولة
...................
والله كشخة بهالحرايب....طالع اعلة السادة
ابيت حيدر رابي هو....علي يربي القادة
هالحرب مال الهواشم....همة عدهم عادة
من يطر الزلمة سيفة...ابلانقص وازيادة

طوعة تگلة حياك ذبت وراه هلهولة
مسلم امعدل ياناس بالحرب مابي لولة
...................
الخادم عمار الساعدي
ونسالكم الدعاء

عندك خوش اصحاب
شايبهم چن شاب
خيال املازم خيال...مثل ارجالك ماكو ارجال
عندك خوش اصحاب
..................
وياك الربع متحزمة بالضيج
مثل الماي الك ويبلل الريج
وابوكت الحرب واحدنة خريج
مثل الريح الك بالمعركة انهيج

هيهات انعوفك هيهات
درع انصير الهالخيمات

يابن داحي الباب
عندك خوش اصحاب
...................
تأمرنة أمر منطينك العين
بالشدات تعرف صاحبك زين
وياك إبيسر وابعسر يحسين
لو نتذبح احنة وياك باقين

نتذبح لجل الثقلان
وياك اوية القرأن

من عالم الاصلاب
عندك خوش اصحاب
...................
عندك بالحرايب خوش صحبان
نسوي الطف الك قد كان ماكان
لأانت نعوفك ولا القران
احنة المامثلنة اجيب نسوان

والمات ابحبك مبخوت
والغيرك ماننطي الصوت

ليك اتروح ارگاب
عندك خوش اصحاب
.....................
صحبانك فدوتك كلهه يرحون
يم الخيمة بالبيرغ يهوسون
خل ترتاح نص الخيمة ام عون
عندك يابو الأكبر صحبة متخون

مو منة الراح وخلاك
خل تسمعنة اليوم اعداك

مو منة الچذاب
عندك خوش اصحاب
.......................
لو كل روسنة تتعلة برماح
مانبخل عليك ابهاي الارواح
عابس مانلومة بالعشگ طاح
للجنة قصدنة أو بيهه نرتاح

وياك ابجنة فردوس
منطين ابوگفتنة ادروس

خل تسمع الالباب
عندك خوش اصحاب
...................
الخادم عمار الساعدي
ونسالكم الدعاء

للعباس ع على طور محمد الحلفي مصحفنه خط احمر

الكافل دخل...هذا ابن اللا فتة
وين المفر...لو ادخن ريشتة
..................
رب الزلم....سيفة بالچف قابضة
طب وعلي....منو زلمة ايعارضة
ابنص كربلة...شكو فارس ركضة
كافل غصب...عالرضة والمارضة

قافل صدگ... ياهو يفتح شفرتة
الكافل دخل...هذا ابن اللا فتة
....................
يرعد رعد....اقوى من الصاعقة
طولة ابكبر...هالجبال الشاهقة
ياسطرتة.... ماكو الهه سابقة
روح الزلم...من ضربتة زاهقة

خيل أو زلم....بيهه ظلت شارتة
الكافل دخل.... هذا ابن اللا فتة
.....................
الجيش ابرعب...لو يحرك اصبعة
ابجفة أو علي...شكو راس امگطعة
روس الزلم....ترس بيهه المشرعة
يگطف بشر....للسماء السابعة

عفية الگمر...غير لبوة الجابتة
الكافل دخل....هذا ابن اللا فتة
..................
حتى النهر...من دماهم صابغة
كلش جسر...ياشجاع ايراوغة
كل كربلة....من زلمهم فارغة
يم الخيم...ظل يهوس ابيرغة

من الزغر....هالحرايب لعبتة
الكافل دخل....هذا ابن اللا فتة
....................
يم الخيم....قاري لمة الفاتحة
طاحن زلم....مثل طحنات الرحة
فر كربلة....مثل فرت المسبحة
شيخ الخيم....چف ايديه الرابحة

مثل الصگر ...مايثني ابصيدتة
الكافل دخل.....هذا أبن اللا فتة
...................
الخادم عمار الساعدي
ونسالكم الدعاء

ياسلام الله....على ابو فاضل
ياسلام الله.... على ابو فاضل
...................
دگ صدر يم المخيم
غيم وهم سيفة غيم....دگ رجل بالثاية

بيرغ العباس رفرف
والزلم عگرهه بالطف....يدبچ بهالراية

منة جلد الگاع گزبر
ياكل اليابس والأخضر....سوة بيهه اسواية

واگف بهالحومة بالنص
يفرز ابعينة أو يگنص....گانص الرماية

صرح ابصوتة....هذا انه الكافل
ياسلام الله.... على ابو فاضل
...................
ابعينة بس ازلام يلگط
بيدة يلزم روس يعگط....يوجع ابكفخاتة

بالحرايب وجهه يزهي
كيفة يأمر كيفة ينهي....شاهدة صولاتة

خلة كل الجيش يركض
شيخ وابديوانة يفرض...هالعرك مالاتة

طبع عندة مال بدوي
راسة كلش حار يچوي....دخنن ريشاتة

چن گمر نورة....لمن يقاتل
ياسلام الله... على ابو فاضل
......................
الجيش يم الماي ينگز
خيل عن الزلم يفرز....طشر الخيالة

وادم ايذبهه اعله وادم
كفو من ليث الهواشم....رجفوا امن اخيالة

اسرع امن الضوه يچفت
بيدة هالارواح يسلت....مارحم زلزالة


وين من الجيش يلبد
هذا زلمة المنه يشرد.....ظل وراه ثعوالة

محد اگبالة.....يگدر اينازل
ياسلام الله....على ابو فاضل
.....................
مهرتة بهالحرب تردح
من تصول اوياه تفرح...لو ندس بعنانهه

صولة العباس تكتل
وين منة القادة تختل....طب يگص السانهه

نظرة العباس تخلس
والزلم خلاهه هندس....صفرة كل الوانهه

عينة من كل صوب تفتر
بالنهر غط المعسكر....ظل يطگ فرسانهه

والنهر كله....بجربتة شايل
ياسلام الله....على ابو فاضل
.....................
سيفة بالميدان يلعب
ابو فاضل أخو زينب....والله لاعب جولة

ابن حلال المشاكل
مثل نزلة علي نازل....كلهم يشهدولة

من فقارة الخيل رعشت
والرماة ابلحظة طشت ....وحدة ماگدرولة

الماي بالعاشر تورط
ابو فاضل تارس الشط.....يسوة الف هلهولة


صاحب الراية....والله يستاهل
ياسلام الله... على ابو فاضل
..................
الخادم عمار الساعدي
ونسالكم الدعاء

گلبي شيب...يابو فاضل
انه زينب ...يابو فاضل
................
انه احلفك يابو فاضل بالاخوة
يل گضينة كل عمرنة عشرة حلوة
انه دونك كل حياتي والله بلوة
من المخيم للشريعة امشي گوة

گوم الية...يابو فاضل
رد علية....يابو فاضل
...................
ياهو غيرك ياكفيلي عون آلية
من زغرنة وانت عينك بس علية
چانت ايدك ماتفارگ هاي ادية
انة زينب من ابونة هالوصية

دللتني....يابو فاضل
بس عفتني...يابو فاضل
................
ياما شلتك بين ادية وعله متني
اغلة من عون ابحياتي يالعفتني
انه امك وانه واختك دللتني
من حنانك يابو فاضل شربتني

تمشي عني...يابو فاضل
موتتني....يابو فاضل
...................
والله غيرك يابو فاضل محد النه
راحت أيام المعزة والمحنة
والله دونك بالصحاري كلنه تهنة
انسلبنة واحترگنة وانهبنة

وين أولي....يابو فاضل
ذبحوا اهلي...يابو فاضل
..................
دونك انت باچر اصعد عالهزيله
وسفة اعوفك عالشريعة اشگد ثگيلة
مانسيتك الله يشهد مستحيلة
عيني تبقة الحد مماتي دم تسيلة

فارگيتك....يابو فاضل
مانسيتك... يابو فاضل
................
الخادم عمار الساعدي
ونسالكم الدعاء

ياجاسم الله وياك...ماضيعت ذاك ارباك

يمعرس بگاع المنية...جاسم
فرحانة كل الهاشمية...جاسم
ماضيعت ذاك ارباك
..................
احلى من الگمر طالع يبعد امك
ياجاسم ييمة واشحلات اسمك
زفك للعرس عماتك أو عمك
بخرتك بدية وبخرت هدمك

يامحلة درعك والطاس...ويحني بيدك عباس

والنسوة اجت اتهني بيه...جاسم
يمعرس بگاع المنية....جاسم
................
يم الخيمة اجولك هوسوا ربعك
چنك ذاك ابوك ابسيفك أو درعك
والخدر تهلهل تشعل ابشمعك
ها يالهاشمي من النبي فرعك

ياشمعتي بهذا البيت...عريس اشوفك ياريت

فرحانة الك حتى الزجية...جاسم
يمعرس بگاع المنية...جاسم
...............
امهنة ابزفتك ياجاسمي امهنة
بيدك والله حلوة ولايگة الحنة
چنت بهذا يومك يامة اتمنة
عرسك بالأرض يوليدي والجنة

كل الملائك هنوك....وي الهواشم زفوك

يمضحي بسنينك هدية....جاسم
يمعرس بگاع المنية....جاسم
................
فرحانة ابزفافك كل بني هاشم
يايوسف زماني واجمل الوادم
لجلك جهزت صينية ياجاسم
يومك يبقى هذا الطلعة القائم

تبقة مثل للشبان....تتباهه بيك العرسان

يالناصرت الله أو نبية....جاسم
يمعرس بگاع المنية....جاسم
.................
يم الله اونبية كحلت عيني
ياتعبي وثمرتي أو وردة اسنيني
ادري بفاطمة باچر تجازيني
ماقصرت انت وكلشي منطيني

يوليدي الله يخليك.... بالجنة باچر الگيك

بالجنة نتلاگة سوية....جاسم
يمعرس بگاع المنية....جاسم
................
الخادم عمار الساعدي
ونسالكم الدعاء

فنكم علية اكدرون.... جدي محمد تدرون
هذا انه الأكبر انه... هذا انه الأكبر انه
.....................

هذا انه اسمي الاكبر
بية مراجل حيدر
لو ضعف هذا العسكر
من سيفي الا يشردون... جدي محمد تدرون
هذا انه الأكبر انه... هذا انه الأكبر انه
......................

حگي اذا اتباهه
بوصافي نسخة طه
هاي الأرض واسماهه
بأخلاقي انه يشهدون.. جدي محمد تدرون
هذا انه الأكبر انه.. هذا انه الأكبر انه
...........................

عرج الهواشم بية
صولاتي كرارية
والخزرة عباسية
ابخزراتي وين تفرون.. جدي محمد تدرون
هذا انه الأكبر انه.. هذا انه الأكبر انه
..........................

لبس الهواشم لابس
اخضر احرگة ابيابس
فارس اردمة ابفارس
بخيولكم ماتبقون... جدي محمد تدرون
هذا انه الأكبر انه... هذا انه الأكبر انه
.........................

روس الحياية اندلهه
اوصلهه يعني اوصلهه
الحية الچبيرة اكتلهه
اشلع جلدهه اتشوفون.. جدي محمد تدرون
هذا انه الأكبر انه... هذا انه الأكبر انه
...........................

من سيفي وين اليلبد
بالروس اخليه يحصد
عالگاع ادبچ واربد
چني علي تتخيلون... جدي محمد تدرون
هذا انه الأكبر انه... هذا انه الأكبر انه
..........................

عالمهرة اطب واتقدم
والراسة يطلع يندم
من جسمة يبست الدم
نشفتة ماظل بي لون... جدي محمد تدرون
هذا انه الأكبر انه... هذا انه الأكبر انه
...........................

بيرغ شلت للسادة
هاليوم اذل القادة
كرار اعيد امجادة
والنصر لية مضمون... جدي محمد تدرون
هذا انه الأكبر انه... هذا انه الأكبر انه
.........................
الخادم عمار الساعدي
ونسالكم الدعاء

علي فات....بالحرب يتباهه
بالذراع....رايتة شداهه
علي جدة علي....علي جدة علي
.............
علي كر عالزلم كرات حيدر
على المهرة وينادي انه الأكبر
دخلهه وچن دخلهه الموت الاحمر

نطق بس الاسم...يحي الله علي
قبض روح الزلم....يحي الله علي
مثل جدة ونعم....يحي الله علي

بيهم علي غاط
زامطهم ازماط
وخيطهم اخياط...على الجد صولته

حيد وابن حيد
مايخطي بالايد
يعرف شنو ايصيد....ميخطي ابصيدتة

شبل حيد....صولتة اشمحلاهه
علي فات... بالحرب يتباهه
.............
علي ابنص المعسكر گام يگنص
يگل العمة انه وياك بالنص
دفنة واحد من الجيش ينبص

الزلم يمة انچفت...يحي الله علي
الة الكل دنگت....يحي الله علي
الوجوه اتصوفرت... يحي الله علي

ما شالتة الگاع
طگ روس الاسباع
بتارة لماع....يموت صارمة

مثل الشلع باب
سواهه عطاب
يگطف بالرگاب....يصعد للسمة

والخيول....بالأرض غطاهه
علي فات... بالحرب يتباهه
علي جدة علي...علي جدة علي
................
علي بعيونة يخزر صار يفرز
الجبير البيهم من يشوفة ينگز
كلهه اتشرادت يازلمة يبرز

علي كلش نشط...يحي الله علي
گظة الوادم عگط...يحي الله علي
خبطهه الكل خبط...يحي الله علي

سيفة اله ايلوگ
ساگ الزلم سوگ
شگاگ الحلوگ.....يسد أكبر حلگ

يستنگي الاكبار
من يدخل اعصار
چن عمة هم حار....عليه شايل خلگ

صدگ حود....هالزلم حاداهه
علي فات.... بالحرب يتباهه
علي جدة علي...علي جدة علي
...............
علي ايحب الحرايب والهه يغبش
علي يطگ بالرگاب ابسيفة ويطش
وحگ الله الزلم خلاهه ترعش

يوگع ما وگع....يحي الله علي
ببن غانم سمع.... يحي الله علي
لزم راسة اوگطع...يحي الله علي

ماينطي عطوات
ذن عندة سهلات
ابن الكلافات....ترة العم دربة

سيفة صدگ حاد
للمالة رداد
بيهم علي هاد....يموت اليگربة

على الگاع....چم عگل ذباهه
علي فات...بالحرب يتباهه
علي جدة علي...علي جدة علي
..................
الخادم عمار الساعدي
ونسالكم الدعاء

ليلة الوداع
...............

عيني ماتگدر تنام
جاي اودع هالخيام
هذا اخر ليل آلية
خلوا نتوادع سوية
باچر ارحل والسلام
..................

ابخيمة خيمة انه افتر...افگد اولادي اوبناتي
شوية اگعد يم عيالي...انهض وامشي الخواتي
ياطفل گاعد اشبگة...الغافي ابوسنة ابشفاتي
واحد ابواحد اودعة...ارد اوصي امخدراتي

ليلة اوداع اوحنين
وحگ رب العالمين
امشي باچر للمنية....خلوا نتوادع سوية
.................

ليلة اوداع أو مصيبة...كلمن يودع خليلة
ابعيني انظر ابني الأكبر...ومرة انظر لامة ليلة
احچي وي امه واگلهه ..باچر ابنچ اندعيلة
ابني باچر مايردلچ...عمرة بس باقيلة ليلة

من يرد باچر عليچ
والله متگطع يچيج
شبعي منه هالمسية....خلوا نتوادع سوية
....................
رملة باچر حنة ابنچ...تنعجن من دم مصابة
زفتة بالحومة تصبح...والدمة يغطي ثيابة
جاسم العريس ابنچ...تنگطع زهرة شبابة
گومي حضني ابنج يرملة...باچر تحضنه الترابة

باچر اتزفة السهام
عالترب جاسم ينام
تحضر ابزفتة الزچية...خلوا نتوادع سوية
.................
يارباب وشرد اگلچ...عن عبد لمن احملة
يعطش ومن امشي الهم...بالوريد اتصيبة نبلة
يفتح اگماطة ويفرفح...وبرگبتة الترفة اقبلة
باچر أحزن من اشوفة...ياطفل مذبوح قبلة

باچر الموقف فضيع
بيدي مچتول الرضيع
يشمر ابروحة علية....خلوا نتوادع سوية
....................

يابو فاضل ها يغالي...عالنهر الله يعينك
ينكسر ظهري المصابك...من اشوفن ماكو ادينك
بالعمود الهامة تنطگ...وبسهم مغلوگة عينك
من اشوف الراية طاحت...يعني گول احنة انتهينة

باچر ابقى ابلا عضيد
منكسر ظهري أو وحيد
جودك اعلة الشط رمية...خلوا نتوادع سوية
.................
خوية زينب اه يزينب ...خوية لهنانة المصيبة
وذرة وذرة اهناك اظلن...وجثتي تبقى سليية
تحترگ باچر خيمنة ...صبري ياخيتي الحبيبة
صبري باچر من يجونچ...وانتي مهمومة او غريبة

ديري بالج عالعيال
من يلفوچ ابحبال
وارد اوصيج ابرقية...خلوا نتوادع سوية
....................

الخادم عمار الساعدي
ونسالكم الدعاء

زينب تنعى الحسين.ع
.................

خوية ابجسمك اشصاير
لاعب بيك هالحافر
اه يحسين يبن امي
.................

ياخو ام عون حاچيني
جسمك وين دليني
ريت الموت يلفيني...ولاشوفك على الغبره

الحر امغير ارسومك
ياهو امفرهد اهدومك
عاري وتنزف ادمومك....وكل اضلوعك مكسره

الحافر چم ضلع كاسر
خوية ابجسمك اشصاير
اه يحسين يبن امي
....................

انت حسين معقولة
طولك ذاك مو طولة
جيت اعليك مذهولة...من اخيامي للتله

خوية اشصاير ابحالك
شربة ماي جبنالك
يضرب بيك چتالك....جيتي اعليك مو سهله

شافوا طولي بالعاشر
خويه ابجسمك اشصاير
اه يحسين يبن امي
....................

يابن والدي اشلونك
ليش امغمض اعيونك
الخيل امكسرة اسنونك...ماچنك هذاك انته

شفتك حيل ذبلانه
كلش خوية عطشانه
يامظلوم هاي انه....سهم ابظهرك الزمته

من ظهرك سهم عابر
خويه ابجسمك اشصاير
اه يحسين يبن امي
......................
حاچيني يخال ابني
بأمي اعليك جاوبني
دهري أبيش طالبني....من اخواني محرومة

حاچي زينبك فدوة
يابو گعدة الحلوة
الدنية ابدونك اشتسوة....اگعد كافي هالنومة

حالك يكسر الخاطر
خوية ابجسمك اشصاير
اه يحسين يبن امي
...................
گوم وياي يبن امي
راح الجيش لخيمي
لا لتروح من يمي....خوية حسين گومنه

بالبر تاهت ايتامك
گوم احترگن اخيامك
ضربوا متني گدامك....محد مايساعدنه

گلبي من القهر فاير
خوية ابجسمك اشصاير
اه يحسين يبن امي
.......................

الخادم عمار الساعدي
ونسالكم الدعاء

الى عبد الله الرضيع ع
...............

يبني تعباني ارباك تعبني
لحظة وعني غايب ياعبد يبني
يوليدي...يعبد الله
يوليدي..يعبد الله
..................

يبني مالي غيرك بالعمر ثاني
حيل اذاني ذبحك يمة اذاني
شوف امك رباب ابمهدك اتاني
نايم عالترابة وعايف احضاني

رد لامك يعبد الله..شنهي غيبتك بلة
شيبني الزمن يوليدي شيبني
يبني تعباني ارباك تعبني
يوليدي...يعبد الله
....................

اگعد يمة يمي وخل الوليلك
چنت كل ساعة تضحك من اناغيلك
هسه الوحشة تكتل بيمن احچيلك
لو بيدي العمر من عمري انطيلك

صعبة فرگتك صعبة..بعدك ماي ماشربة
ذبحك ياعبد اي والله عذبني
يبني تعباني ارباك تعبني
يوليدي... يعبد الله
....................

خذك مني ابوك وگال يروونك
تاليهه ابسهم غادر يفطمونك
ليش ابنص رگبتك ذولة يرمونك
حسبالي نمت من غمضت اعيونك

چنك غارگ ابنومك...ثاري تنزف ادمومك
شربني الزمان اللوعة شربني
يبني تعباني ارباك تعبني
يوليدي....يعبد الله
.........................

شحچيلك ييمة عن تعب گلبي
مو ذنبي تركتك والله مو ذنبي
من ذبحوا وريدك فرهدوا تعبي
بعدك موتي اريدة ادعي من ربي

شلي ابعيشتي دونك...وانه امفارگة اعيونك
دولبني زماني اهواي دولبني
يبني تعباني ارباك تعبني
يوليدي...يعبد الله
.....................

لو ميتة ابدالك ادعي يايمة
ظلمة دنيتي لمن غبت ظلمة
بيدي اگماطك اني يابس ابدمة
ياماي أو تبدة الماي شيلمة

انظر مهدك الخالي...غالي وفارگ الغالي
صوبني صدگ حرملة صوبني
يبني تعباني ارباك تعبني
يوليدي...يعبد الله
......................

الخادم عمار الساعدي
ونسالكم الدعاء