#قصيدة_أهلال_ماي
•••
من يهل أهلال ماي___جربة العباس هاي
•••
من يهل أهلال جرحي الكله شيب
وانه بعيوني العطش رف رايه
گمــت أشـوفنه عطش روح الزغار
موضوه آهلالك أشوفه آمرايه
طوحت بيه الخــــــــيم شيخ ورماد
وبينت ملگه الآحچايه أحچايه
أحنه طحنه والحسين أنشال فوگ
وبالسمه العاشور عدنه أقرايه

والطم فك بابنه وجمر ضل بثيابنه
وجمر ضل بثيابنه والطم فك بابنه
وبقى من عباس راي___جربة العباس هاي
•••
ياهلال العطش ماضل بينه حيل
وين مـــاشوفك تسولف بينه
نتوچه عالماكو ومهر أمنه الفرات
بعد شمرة عصه عن أحسينه
والشمر كض أيده ماخلاه يعيش
والعطش چـــتال لمعة عينه
ورجفت أخيمنه عطش بعدالكفيل
وماشربنا چيه رفض يروينه

عدنه جودالغيره آمـن أبوفاضل خيره
آمن أبوفاضل خيره عدنه جود الغيره
والعطش بي مستحاي___جربة العباس هاي
•••
مـــــن أشوفك ألگه بيك الطف دخّـان
والأطفال أمچـتفه ومهضومـــه
هاي صوره ويمها راس حسين أشوف
أشمــا أباوع لسمــــــه مرسومه
ركضت العاشر جرح سيف أعله سيف
من طبرته الروح أحس مثلومه
ولونها حمـــرة المغروب شيب أخوي
أتخضبت حتى السمه من يومه

وعشنه هاي الساعه وصوت كسر أضلاعه
وصوت كسر أضلاعه عشنه هــاي الساعه
والحمل حدب گفاي___جربة العباس هاي
•••
فحطت أجــــروحي بكثر ذاك التراب
الگبعاني وصــــبغ لون الخيمه
انه زينب والنشــــــد عــــني انه وين
راح يعرف شنهي معنى الهيمه
عشت مـــحد عايش الشفته ويعيش
الطــف زلم يراد تحمل ضيمه
دمعه وحـــده أطيح أتبده انه ليش
أذا شفت بسوط طگله أيتيمه

ومن تشگفه أچفوفي أعليها يركض خوفي
أعليها يركض خوفي مـــن تشگفه أچفوفي
والبچيهن كل بچاي___جربة العباس هاي
•••
ياهلال أشما أسـولفلـــك أمـــــــوت
تهل لومـــــاتهل عشنه الغربه
من سبوني اليل أذن ياحـــــــــسين
الحبل بچفوفي ويكبر صعبه
وانه حرمه وصوتي مامر اعله طيف
واني ستري من ستار الكعبه
انه قبلة مستحــــــــه امعلمني ابوي
والصلاه ماتحله ألــــه بتربه

وبوضوء أحزاني يهل دمع اخواني
يهل دمع اخواني وبوضوء احزاني
ومنبر اتخضر خطاي___جربة العباس هاي
•••
خادم أهل البيت،،ع،،
ابوحسين السرگودي...

#زينب
#صار_يومين
•••
صــــار يومين أنه أراقب بالسمه
ردت أشوف آهلالك أشايل ضمه
ونحرك العطشان__ضوه عالتربان
•••
عيوني غارن والعطش بيهن ركد
وبعـد مـــــــــابيهن أشوفنك بعد
شوفي لهلالك توضـــــه واستعد
بالدمـــــــــــــوع المايفارگهن آبد

شفت العطش حتى بضوه أهلالك
ونحرك وطــن فوگ العرش شالك
ورمـــــــح شال أهلالك أمبلل دمه
وردت أشوف اهلالك أشايل ضمه
ورتل القراءن__ضوه عالتربان
•••
شماتطــــول السنه متنگبه بوجع
وحلم عندي حسين لوأسمع رجع
ياغلاتك والأمل چــــــــنه أنگطع
بعيني دمعي يفز ماأدري أشسمع

ياغــالي عـــايش بيه ياغــالي
ولليليه أشوفك طالـــع آهلالي
وبالنعي نتگابل انه أوفاطمـــــــــه
وردت اشوف آهلالك اشايل ضمه
وللحزن أذان__ضوه عالتربان
•••
ياهلال الخـــــوه ياعشرة حــــزن
دمعي يجري أشماعليه ليلك يجن
يم بناتك دمـعي مـــــدفون أبردن
الوحشه تكبر من يمر طاري الدفن

ياوكتي ذاك المحـــــد أيجيبه
موحلـــوه لوطالت ترى الغيبه
أتضعضعت اخــتك وهسه أمهدمه
وردت أشوف آهلالك أشايل ضمه
ياأخوي الچان__ضوه عالتربان
•••
أشما يهل شهــرك أعيشن كربله
وأذكر أيام العشتهـــــــــا آمدلله
رحت عني والألــــم ضل مسئله
مالـه حـــل بس اللطم لايگ ألـه

تحرگني كل مــاشاهد الخيمه
فراگ الاخو انه العشت ضيمه
مــــــــــن دفنتك لسه آنه أمولمه
ردت أشوف أهلالك اشايل ضمه
وللحزن بيبان__ضوه عالتربان
•••
عشت بس عيشة الميت من عشت
آشكثر متمنيه أموتن مـــــــن متت
ياحـــــــــــــسين أشرد أگلك شفت
خوفي تبچي وانه من هاي الخفت

ياسـالفتنه اليفگـــد اعزازه
بس انه عازت خوتي عازه
على حزنك عمري عشته أمحزمه
ردت اشـوف اهلالك اشايل ضمه
ودارت الازمان__وضوه عالتربان
•••
خادم آهل البيت،،ع،،
أبوحسين السرگودي...

قصائد الخدمه المقدسه
👇👇

#يحسين_أحبك
•••
يحسين أحبك وحگ هذا الهدم
ألــه بخدمتك يلـه يحلــــه الأسم
خدمتك تنشكر---بيها لفني العمر
•••
ياسـلام_
على الخدمه والخدم هم بيها.
والخيام_
تعــــــرف المحترگ نار أعليها.

خيم چنها وطن__العيشه بيها أبثمن
            وبكل رساله زمن
طلع منها العشگ__وعهد مانفترگ
          يدين الحب صدگ

ومن يم عزاء حسين كون الختم
ألـــــــه بخدمتك يله يحله الأسم
بحسين طاب الذكر--بيها لفني العمر
•••
واليمـــــوت_
أيعيش أسمه وينحفظ چف يومه.
يبني صـوت_
يوصـل الگبره ســــــــواد أهدومه.

وسواده ألبي فزع__وعلى جلده أنطبع
             طلــع بدره طلــع
الخدم طول العمر__أختلف گبره بعطر
           العمل تلگاه ذخـــر

ومعركة دنيه وألحسين الحسم
ألــه بخدمتك يلــه يحله الأسـم
والخدمه بيرغ نصر--لفني بيها العمر
•••
واليعــيش_
أيموت أسمه الماخــدملك ساعه.
وزنه ريش_
الثگل يم حسين خدمـــه وطاعه.

اليحس آمن الخدم__بحزامه أيصد سهم
              ودمعته أترف خيم
العشگ مـــن ينولد__يخــط أسمك مجد
             بلطمتك تستعـــــد

ويله خلونه نشد أحنه الحزم
أله بخدمتك يله يحله الأسم
وبيها نضفر ضفر--لفني بيهـــا العمر
•••
بالعـزاء_
أنعيش معنى الحزن كون بلـوعه.
وكربلاء_
ألهـا نفــزع كون فــزعـة طـوعـه.

ونواسي كل فاطمه__عاشت الطف أبضمه
              ونعزي حتى السمه
ونعيش معنى الهظم__كل مايمرنا اللطم
               وعنه ندور ونخـم

ونعرف المـجلس بالهوه ألبي نشم
ألــــه بخدمتك يلــــه يحله الأسم
وياه عشره أشكثر--لفني بيها العمر
•••
الثـبات_
ندعي ربنه حسين خلنه بخيره.
لونبات_
لــــــــيلــنه أوديره تذبنه بديره.

حسين يسوه التعـــب__مــــن تنحيلـــه الرگب
                والدمع الأسمه أنصلب
يم بابه كلشي أنرخص__ويعيش ماي الگصص
                 خـــدمتة أثمن فرص

وخليك ويه حسين حرب وسلم
ألــه بخدمتك يلــه يحلــه الأسم
خافن نقصر العذر--لفني بيها العمر
•••
خادم آهل البيت،،ع،،
أبوحسين السرگودي...
•••

#رواية خدمتك...
•••
رواية خدمتك.
سندها دمعتك.
من شلت الأشوك أتخاف باچر
ينجرحـــــــن بناتك يوم عاشر
حسين__حسين
•••
مشهد بي دمعتك مسنده بعين
موكل عين هــيه عين الحسين

من لميت الشوك وخوفك من باچر خوف
وبركضت ذني أبنياتك تسمع چـــــم أوف
أمطبر والتربان بجرحك شنحسبه سيوف
عطشان وبالك مويمك ضــل يمهن شوف

المقاتل ذكـرتك.
سندهــا دمعتك.
رواية خــدمتك.
يبو الأكبر بچت حتى المنابر.
ينجرحـــــن بناتك يوم عاشر.
حسين_حسين
•••
ومن ركضن أشصار أبگلبك أحاه
أساسن بي سهــم ممـرود أويلاه

أبچفك مــــن كضيت الگاع وخنصر مگطوع
مــــلچوم ومـــايلطـــــــم چـفك يراد أضلوع
وتصنت عالصــــوت اليركض يركض مفجوع
ولن تعـرف ركضتها أسكينه ومدمعها أشموع

بعيد وعرفتك.
سندها دمعتك.
رواية خدمتك.
وتنعى أعله الأبو ياگلبي شاچر.
ينجــــــــرحن بناتك يوم عاشر.
حسين__حسين
•••
ومشهد أخـــــــر أبيا حــيل أخليه
السمه وآهل السمه هم ونت أعليه

بليل الوحشه وماكو أخيامك والخوف أيدور
أدور عنك طفلـــــــه أزغيره أم گلب المكسور
جابت مـاي بچفها المچوي أشحـــاله المجبور
تعثر بالقتلــه ومدمعهــــــــــــــا أيگلك مأجور

رقيه الحضنتك.
سندهــا دمعتك.
رواية خــدمتك.
وتشرب بالنحــــر وتگله تامر.
ينجرحــــن بناتك يوم عاشر.
حسين__حسين
•••
من هاي المشاهد شفنه الأخيام
عزلت للخـــدم من ثوبها أحـزام

وأحنه أتحزمنه أبهل الساعه اليومك نحيه
هـــــاي أدمـــوعـك فزعت بينه وتبارك بيه
وندعيلك ربنه بچف دمعه حــسين أتخليه
مادامه بخير أحنه أشعدنه ابخـيره أنباريه

رزقنه أمحبتك.
سندها دمعتك.
رواية خدمتك.
كون أحـنه أبدالك للحوافر.
وينجرحن بناتك يوم عاشر.
حسين__حسين
•••
خلينه أعلـــــــه بابك نوگف أوگوف
وعزائك ما أنعوفه وعدنه الأچفوف

لاتحرمنه أبداعــت زينب أنموت أبلياك
يومـيه أيچوينه أمــــصابك ونرد ننعاك
مويوم أبعاشـــور أنريده كل يوم أوياك
يانعمــــــــة ربنه أنسبلك ونروي أضماك

بجربت خوتك.
سندها دمعتك.
رواية خدمتك.
وتجبر بينه كل مكسور خاطر.
وينجرحـــــن بناتك يوم عاشر.
حسين__حسين
•••
خادم آهل البيت،،ع،،
أبوحسين السرگودي...

#ضعن_الخدمه
•••
خــــــــــــــــــدام زوارك عمــر عشنه بضعنها
ومـــن خيمتك موكب طلـــــــع ويصير أبنها
ونترس الدنيه أحــــنه أبهله ويغرف حضنها
خدام لحــــــسين الشهم
خدام شدينه الحـــــــزم
خـدام عشنه أبهل الأسم
واليخدمك دوم يعله كلمة أتعيش بحساس
•••
اكتبو عاشت الخدمه ياخدام
واشكرو ربنه عالنعمه ياخدام
وأدعوه أبكل فجر
مــوكب كون الگبر
تحقق للخــدم حلمــه ياخدام

خدام طشنه أعله الدرب
خدام نزرعلــــــــك گلب
ونخضر أوياها
ونعيش بالخدمــه وطن
ومراد من باب الحـــسن
وتتجـازه برباها

نشـم بخدمته الخــوه ياخدام
لان أحزامها أمــــ ـروه ياخدام
واليخدمك دوم يعله كلمة أتعيش بحساس
•••
نخــــدمه والسمه تكبر ياخدام
ونسولفله حچي معتبر ياخدام
ونسبل كل هله
تستاهل كربلـه
ونبيض وجهّ أبوالأكبر ياخـدام

مــــن باب زين ألهم ترى
ونصير بالحــــگ مفخره
وترفرف الــــــرايه
مكتوب بيها الكل عرف
لحسين الخدمــه شرف
متوضيه الأحچايه

ونأذن حـــيّ ع الفزعه ياخادام
حسين بخيمته الجمعه ياخدام
واليخدمك دوم يعله كلمة أتعيش بحساس
•••
ونفــــرح الزاير أبملگه ياخـدام
ونچز الغــربه باالشبگه ياخدام
ونسولفله أبعشگ
أنموت ومانفترگ
سنه ومــانحمل الفرگه ياخدام

ونصير مثل آهل الكهف
چم يوم هم محد عرف
لمـــــن تمـر بينه
وأيام تتنــفــس عـطــر
كل عـــــام ماتقبل عذر
خدام أبواسكينه

ونبدي أرواحـنه أبدربه ياخدام
ونبلــــــل شيبنه أبتربه ياخدام
واليخدمك دوم يعله كلمة أتعيش بحساس
•••
ونروي بخدمته الغيره ياخدام
الزيارة محزمه أبسيره ياخدام
واليتعنه أبجـــــدم
بأول خطوه أنرسم
ديره ترســــــــم الديره ياخدام

وتعـيش تاج أعله الأرض
مادام بينه أحــــنه النبض
متكامــــل أحسينه
أنموت ندعي أحنه السمه
كل عــــــام كون الفاطمه
تبچي المحب عينه

الدرب ضل يعشگ الفقره ياخدام
وعهـــــــــد منطينه لزهره ياخدام
واليخدمك دوم يعله كلمة اتعيش بحساس
•••
خادم آهل البيت،،ع،،
أبوحسين السرگودي...

قصائد مولاتي ام البنين،،ع،،
👇👇

#أخر_طيف
•••
أم البنين أتگول ياوحـشة الدار
الغالي مـــن أيروح دورله تذكار
والمغرب آبلاراي__يخنگني حتى الماي
ياوحــشة الدار ياوحــشة الدار
•••
يخنگني المغـــرب لوسلم
ويادمــــــع الغالي المايلم
أتضيعني وتلگاني بحرگه
مـوبس أني البيت أتألـــم

بيت من كل كتر تدخل تلگه فرگه
وبنزيز أجــروحـك أتخضرله ملگه
الهــــوه لوحرك الباب أتحسها دگه
تركــض آبلاوعـي وآبلاوعـي تلگه

حتى الهوه ياناس لو حـــــــرك الباب
أبروحي فز الصوت چن دگت أحباب
وعالحاله عشت أهواي__يخنگني حتى الماي
ياوحشة الدار ياوحشة الدار
•••
وأنه الـــمــــاأنــدل أوأنــدل
دورته ولاگـاني المــــــــقتل
وتلمس بچفـــوفي أحروفه
ومن الفرگه أعـيوني التذبل

اليل تيهـته أشأنامــــــــــــن كلهــــا گعده
أشحالــه هسه حـسين بس لاباقي وحده
عطش بس لاعطـش شــو بدموعي شده
بقــى الوحــــــــــده لو بقه العباس عنده

گمــــــت أنشد أنه الطير ماشفت الأعزاز
ويصفگ أبجنحه الطير چن ماشي جناز
خبرني گتله أبهاي__يخنگني حتى الماي
ياوحشة الدار ياوحشة الدار
•••
مـــحــــــتاره أبروحي المحتاره
بالــــــــغالي المحـــتاجه أخباره
وينه الگــاه الـغـــايب عـــــــني
يشوف الوحشه أمخيمه أبداره

وانه أدورلــــــي صــــــبر للفـراگه ردته
ويانغـيط الوحشه حتى بروحي عشته
اليل غطـاني بضلامــــــه أشكبره بخته
ألچـــــــم ويگلي چــــني حسين شفته

تسهيل أمر باليل أقرالــــــــــه وأقراه
ويمرني طيف حسين وحچيله فرگاه
ولن طيفه يحچي اوياي__ويخنگني حتى الماي
ياوحشة الدار ياوحشة الدار
•••
وتلاگينه أبطـــــيف وگلي
الموت أمــــحزم بيه ضلي
وانه المذبوح اويه أحبابي
جــرح العاشرصــار أبحلي

باچــــر أنلاگي المنايه وتربي عيني
باچر أكبر عطش يوصلني ويجيني
باچر العـــــــــباس بي تضلم سنيني
مويمينه أطــــــيح لا عيني ويميني

باچر نجيچ أبطيف ونتوادع أوياچ
يم البنين الخير عاش أعله طرواچ
انتي الوفه بدنياي__ويخنگني حتى الماي
ياوحشة الدار ياوحشة الدار
•••
وضلـــيت أتنطـــر ياساعه
حــــسين أيلاگيني أوداعه
وكون انه الميته وماشوفه
ودلالي ألزمـــــــنه أضلاعه

ومن تلاگينه أشكــبرها الفيه چــــانت
طيف بي بس الهلــــه بكل كلمه دارت
ودعوني وراحـــــو ودمعــــاتي شابت
يالمشيتو أوداعت الله أجروحي گالت

وحرورت أخــــــــــر طيف ضلت بالعيون
وحمل الأفراگ أيريد كل ساعه أله أمتون
وبين وفه الوفا
__ويخنگني حتى الماي
ياوحشة الدار ياوحشة الدار
•••
خادم آهل البيت،،ع،،
أبوحسين السرگودي...

#سلام_أم_البنين
•••
شكثر شايل حنين---سلام أم البنين
     السلام عليك ياآبا عبدلله
•••
كفت أردان المحنه وشوگهـــــــــــا أتشيله الطيور
تشد بجــــــــــــــــناح اليمرها أتگله لاتنساني زور
حــــــــــــسين أليه بالنيابه ودور عالگبه أنت دور
راح يعــرف بي سلامـي مـــــــــن سلام النور نور
يخير البالسنين---سلام أم البنين
   السلام عليك ياآبا عبدالله
•••
راح تلگه الهـــــــــــــوه غير البسمه هــذا اليطوف
هوه بيه كل رحمــة الله مــــــن تشمه آهنا تشوف
سر جمال الگبه ياخــــــــذ گلبك ومـــــاتلگه خوف
وتشرب آمن الحضره روحـك خدمة المروْ ضيوف
رزق خدمة حسين---سلام أم البنين
  السلام عليك ياآبا عبدالله
•••
راح كلشي أتعــــوفه تگدر  بس گبر أبني الحبيب
حسين مــن تشتمه تلگه هـــوه لجــروحك طبيب
حسين من أتخدمه روحك تفخر أسنين المشيب
أنت كل مـاتكبر أنت أتعــــرفه ليش أصبح سليب
ستر بهدومه دين---سلام أم البنين
   السلام عليك ياآباعبدالله
•••
ودنگ أودگ باب صـحنه وگله للمشتاگه هـــاي
الماي مخلــــوط بدمـعها ماتشربه أبوحده ماي
هدمت كل گبر ألها وأنت تعلــــــــــــم بيها هاي
وتقره تسهيل أمر دمعه حسين كلي وكل هواي
ألك صورة يقين---سلام أم البنين
    السلام عليك ياآباعبدالله
•••
وزورلي التل الفجعني وأخـــــذ روحي الكربله
مـــن تشوف أجـــــدام يمه أجدام حره أمعدله
سلــــــــم وأخفيلي صوتك وأقره بس البسمله
ياتعب حـــيل الحــــزينه أشكثر ركضت بالفله
ويرد صوت الحزين---سلام أم البنين
     السلام عليك ياآباعبدالله
•••
وبالأخير أوياك مـــــرلي بالرفــع راسي وغبش
بالأخو الربيته بيدي أخـــو مـــــايعــرف دغش
الگمر يعرف شنهو دمـعي بس للحسين أنفرش
گلـــــــــه لاينساني أريده هـــوه اليشيع النعش
ولو ماعنده أدين---سلام أم البنين
  السلام عليك ياآباعبدالله
•••
خادم آهل البيت،،ع،،
أبوحسين السرگودي…

قصائد مولاتي فاطمه العليله،،ع،،
👇👇

العليله
#حتى_بسؤالي
•••
حـتى أبسؤالي--الغالي غـــــالي--ألگالـــــــه عشره
وحشه بغربتي--وحيره بدمعتي--والدمــــعه ذكره
      وتبدت أسنيني_والفرگه تاذيني
                    والدمــعه ذكره
•••
من رحتو الهسه--عمري بجرح يمسه--ينشـدني عنكم.
وتبـده ولگاكــم--وأتمـــــــــنه وياكـم--موبيدي أحبكم.

دلوني وين أبياكتر يالــرحــتو أمـــــس عني
كل ساعه أموتن بالغرب كل ساعـه شو چني
مـــن رحتو البيت أنفجـع شيحمله طف وني

وضل حالي چنه--أدموعه حنه--يابـويه ويـــــنك
وبغروبي هضمه--وبجرحي لچمه--لوبيدي أعينك

وضليت أحـومن--وعثر وگومـــن--وبروحي جمره
          لا لا تخليني _والفرگه تاذيني
                     والدمــعه ذكره
•••
أبنومتي أطـيوفي--چن رجفت أچفوفي--ضل خوفي بيه ياطيفي ألك ضامي--والدمـــعه بحلامي--عـــشت المسيه

والمرض بيه والبعـد هــنه الخذن حيلي
وتشوغ روحي والأم كل ساعه يحچيلي
وانه ألتفت لفتت جــمر والفرگه توميلي

ودورتك ألنه--ياكـل أهـــــــلنه--وعيوني تربي
فزعت ضوانه--فـــارغ مچانه--مـــلاني دربي

يالبيك أشوفــن--خليني أطــوفن--وجـهك ونضره
      وتتنطرك عيني_والفرگه تاذيني
                     والدمــعه ذكره
•••
من فرغت أسنيني--أخيالك يدليني--كل مـــــــا أذكرك
بين حزن روحي-- وشيطيب أجروحي--لومرني عطرك

بصـورك آشگد دورت يالحضنك أيلمني
من أذكر أنه باالمرض من تگعد اتشمني
ياوجـــع روحي المابرد بالفـرگه عذبني

وبحيلي عله--دمعــــي أشأگله--لورادك أنتـه
حتى بصلاتي--تنگع عباتي--آمنتمرني سكته

ياحيلي فزعه--الگل دمـــعه ركعه--بعيوني حضره
        يابويه حاچيني_والفرگه تاذيني
                         والدمــعه ذكره
•••
ولوسولف أسرارك--تنعالي أحس دارك--وتفجعلي وضعي
ويلمــني هالطاري--وتغرگ دمـــع داري--مــــن أبدي انعي

وتوچه ويلمني التعـب وأدري التعـب حيره
ودالي وكتي أبكل صـبح من كل جرح ديره
ياراي بيه آشچـم وطــــــــن ضلت تصاويره

ويلمني ضيمي--وياروحي هيمي--يالبيچ أهمن
راح وتركـني--وحــــزني لحگني--شگـدر أضمن

وتوگع حـضاره--مـــــن كل مــــناره--وتبده حسره
       والحيره تچويني_والفرگه تاذيني
                         والدمــعه ذكره
•••
يالبيك أشد جرحي--ويتوضه فيّ صبحي--يالروحي يمك
وركضلك أبحـــــركه--وتلاگــه بالفــــــرگه--امنيتي أشمك

ياواهس أشايل حلــــم من تنذبح ضامي
يلوني يومك وارســـم ويتفرهد أصيامي
وگدامي بس طفك طلع كل ساعه گدامي

ولگالي خيمه--وتاخذني غيمه--تمطرلي
دمعي
بلكت ألحگ--ياحـــيلي أسبگ--طفولي شمعي

وراحت رحلتي--ياروحي متي--گطعولـــــي نحره
        والحزن سابيني_والفرگه تاذيني
                       والدمــعه ذكره
•••
خادم آهل البيت،،ع،،
أبوحسين السرگودي...

#العليله
#حديث_الغربه
•••
حديث الغربه وين رحل عنه الأبو
بقت منتظره عين يردلهـــــا الأخو
وفاطمة محتاره---ياهو اليجيب أخباره
•••
ضلـت أعله الباب تربي والحـزن لازم سره
تنتظر والشوگ إخـــذها وبالملاگه أمبخره
العطله شنهي تسولـــــف وأبدمعها أموزره
والمتاني أيردله غالي متاني جبرة خاطره

بطه ياروحـي ليش بده الخوف أوقلق
وحزنها أوياها صار إكـو شـــــــي أتفق
والأبو وحشه أدياره---ياهو اليجيب أخباره
•••
وفاطمه أتبلل صبرهــــا مــن كثر هل الدمــع
بنتظارك كلشي يوگف وتخلص اعيونك شمع
بيت چان عيونه تضحك هـسه صــايرمنفجع
بيت چـــأن حسين حرزه فجئه وندار الوضع

البيت آبلايه بيت صفـه بس الحزن
وعليه ألهم يطـــوف وعليلتكم تون
ألهم ثچيله أسراره---ياهو اليجيب أخباره
•••
والتريده أيعـــــــــــود ليك وأنت تنتظره شهر
لحظه لحظه أيبوگ مــــــنك أخ ياچف السهر
وتذبل أسنينك الچانت خضره ويمسها الخطر
ياعافيه بفگد التحبه الجــــدم كل خطوه عثر

وتعيش آبلايه روح وتبين منكسر
ويضل ليلك خميچ ولاينفع عـــذر
الغالي أجه خطاره---ياهو اليجيب أخباره
•••
ومــن يدگ الباب ضيف ولنه عالغالي سئل
شلون من توگف بحيره وينكسر بيك الأمل
وچان رحمة الله بيتك مايرد چــــف بفشل
سافر أتگله ويگلك يمته يرجـــــــع محتمل

ويشوفك من تلوب ودمـــــع عينك يصب
بسؤاله آشگد شجون انگطع حچي الدرب
والهوه أتچوه بناره---ياهو اليجيب أخباره
•••
وفوگ علتي الگاع طاحـــت ونفجع ضيف الأجه
والنهار أنخطف لونه أعـــرفت عــــــــودي مانجه
مـــــــن شفت خطـــار أبوي بعينه دمعه ملجلجه
أتراب من الطف وصلني وجاس جرحي وغمجه

أنمرد گلبي الينوح وتهاوه أچم جرح
ركض بيه المشيب رفـع شيبي برمح
منها ودعيت الثاره---ياهو اليجيب أخباره
•••
خادم إهل البيت--ع--
ابوحسين السرگودي...

قصائد مولاي مسلم ابن عقيل ومولاتي حميدة بنت مسلم ابن عقيل عليهم السلام
👇👇

#رسالة_حميده
•••
هـــايه حميده أوأخــــر رساله
كتبت قصـيدة أتجاوب سؤاله
بدمع اليطيح--رسمة ضريح
         بضرف الرساله
•••
وبدت بأول رسالتهـــا
الوجع كاتب قصيدتها
أحــــبك بويه يامسلم
غميچه أحـا يحسرتها
آهنانه أجروحك أتعيش ماشفت اليودعــك
برسالة فرگتك صـــــوت أسمعه وماأسمعك
اليموت آبلايه تشييع بخــبر مــوته يشيعك
اليصفن بريده مــات أحتماله
كتبت قصيدة أتجاوب سؤاله
المدمع يصيح--رسمة ضريح
        بضرف الرساله
•••
عرفت الصــوت من يمك
سلامــك مـــــر ببن عمك
بصوتك ياعطش موجود
أعطش لـــــو گلت أسمك
ضمني الصدره الحسين وخـــــلاني أشوفك
وأنت أبالي موجـــــــود أبالي أنت وأطوفك
ومسح راسي وأحاچيك علىِ لاتبدي خوفك
ليضن وحيده گلبك بدالــــــه
كتبت قصيده أتجاوب سؤاله
بوجهّ الصريح--رسمة ضريح
       بضرف الرساله
•••
دلاالك بيــه مـــسترسل
مثل كلمــة وقراها الكل
بالحسين أنه هم شفتك
اليتم مـــرتين بيه أيحل
عشته أبشهـــــر مرتين يتمي أبياهي ألزمه
مــــن وصـــــلت للحبال دلاالك گمت أكلمه
الحياة أبغير أبو أتصير عمر بس كله ضلمه
الضلمه الأكيده التفگد دلاالـه
كتبت قصيده أتجاوب سؤاله
بااليل الذبيح--رسمة ضريح
       بضرف الرساله
•••
قصيدة شعــــــــري تتكلم
الصـــــــــــوره البيها تتألم
المايعرف حچي المجروح
يهتم ساعــــــــــه مــايهتم
فراگك بويه كل ساع يسافــــر بيه دمعه
يتبده النـده الطاح الــــورد بس اليسمعه
اليفگد غالي ويروح دمعته أتصير شمعه
الميتله عيده يدفـــن وصــاله
كتبت قصيده أتجاوب سؤاله
أبياچف جريح--رسمة ضريح
      بضرف الرساله
•••
سبوني والحـــــــــبل معضد
ومــحد مـــــــــــابقى مــحد
الجثث مطحونه فوگ الگاع
على الصار الدمــــــــع يشهد
وأطيحن والرمل حــار أشيلگه الماله تچوه
ولمن حيلي ونخــــــــاك وتفرفح بيه نخوه
ويميد أيده الهوه الهاب وگلتلك بويه تگوه
اليمشيله بيده يلگـــه أكتماله
كتبت قصيدة أتجاوب سؤاله
البدم سبيح--رسمة ضريح
      بضرف الرساله
•••
خادم آهل البيت،،ع،،
أبوحسين السرگودي...

#حيّ_الله_دمعچ_حميد
•••
حيّ الله دمـعچ حميده___حي الله
والشيب كاتبلچ قصيدة___حي الله
وألچ تبچي أحروفي--- من تسلم أچفوفي
                  حيّ الله         
•••
أنتي أهم وأكـبر رساله.
من مسح راسچ الحسين أبچفوفه.
أنتي من أشرف سلاله.
الوصفـــچ لازم يحجبهن حــــروفه.

يادمعة زمـاني°°ناذرلـــــــچ كلامي
حزنچ حزماني°°يامسكي وختامي
گيدچ عـذباني°°ياجـرحي بسلامي

والحيل مـن يمچ أريدة___حيّ الله
والشيب كاتبلچ قصيدة___حيّ الله
يروي دمعچ شوفي---من تسلم أچفوفي
                 حيّ الله
•••
گيدة وحــده أبناتي.
گيد أبو مــــو شمر بس بچتني حاله.
شفت عازتها بحياتي.
آهنانه حزنچ شفته بس طارف خياله.

بخيال المصيبه°°عـشت أنه أبدمعتي
ياجرحي وطبيبه°°طگــــوچ أوگعتي
بالطف الرهيبه°°يابويه أنتي صحتي

والأبو صــــحتي أريدة___حيّ الله
والشيب كاتبلچ قصيدة___حيّ الله
شكثر عشت بخوفي---من تسلم أچفوفي
                     حيّ الله
•••
مـــــــــن أكتبنچ سبيه.
أركض أنه ويلتفت بحساسي جرحي.
حتى لو مچتوفه أديه.
أذا مــــــافگيت أديچ أيموت صبحي.

والحزنچ أنوحـــن°°ياجمـره أعله چفي
وبروحــي أصيحن°°يانار أنه أطــــــفي
بدمـوعي اليطيحن°°أگولــــن مـــاتكفي

والدمع شگ بيده جيده___حيّ الله
الشيب كاتبلــچ قصيدة___حيّ الله
والدمع معروفي---من تسلم أچفوفي
                 حيّ الله
•••
أرسم أبالي مشيتي.
حـــــافيه ومچتــوفه للگوفه سبيه.
والدمع بلل لحيتي.
الگـبر أبوچ أشگـلتي أبذيچ المسيه.

هـــم گلتيله أجيتك°°ياعــزي ودلالي
طگـوني ونخــيتك°°وسبــوني يغالي
ولگيت أنه بوصيتك°°أصبر عالجرالي

وأمشي بدروب البعيده___حيّ الله
الشيب كاتبلــچ قصيدة___حيّ الله
بويه مر بطيوفي---من تسلم أچفوفي
                حيّ الله
•••
وسولفت أنه ويروحي.
حــافيه والنار مــــاترحــــــم جـــدمها.
سالفه أيفسرها نوحي.
مــــن أشوف اليتم مـــــــافارگ أسمها.

يالعشتي بحياتچ°°ياجــــرح اليلچمچ
ماطاحت عباتچ°°حتى أمگبعه أسمچ
أغمــرينه بثباتچ°°دعــــاء أنأمنه يمچ

بداعت الضلت وحيدة___حيّ الله
الشيب كاتبلچ قصيدة___حيّ الله
وبأمانچ طوفي---من تسلم أچفوفي
                حيّ الله
•••

قصائد سادتي أنصار الامام الحسين طيب الله ذكرهم وثراهم
👇👇

#عيد_الانصار
•••
عيد الأنصار ترى أطبول الحرب
اليوم بيهــــــم تفتخر كل الكتب
•••
عقدو النيه بصلاة الحــــب ترى
اباب خيمتهم رسالــــــة مفخره
حسين حگ الله وعلينه أناصره
أبعالم الذر الـــــــه باصمله الگلب
•••
وأستعدينه ألــــه وعشنه السنين
ونقره تسهيل أمــــــر ياأم البنين
دوم خلينه نسولـــــــف بالحسين
أبذكره كون أنموت بس ماننطلب
•••
دوم خـــــلينه نصف مــثل المشط
مـــــاتهــزنه الكلمــه كون وننخبط
شرط حب حسين لا..فوگ الشرط
صعب دربه وأحنه ميهمنه الصعب
•••
وأجه اليوم الچـــنه بيه ننذر شمع
وشيبنه وسيوفنه انخلقـــــن درع
للحسين أنختمـــــــــن أبثار الضلع
الحگ رساله أوسفه بالحگ ننغلب
•••
اليوم نروي أنشوف العالـــم درس
اليوم ناخذ ثار ضــــل أبذمة أمس
اليوم للحگ يشرق حسين الشمس
وكربله مـــــــــاي المواقف تنشرب
•••
خادم آهل البيت،،ع،،
أبوحسين السرگودي...

#انصار_الحسين
•••
دم الاحرار على الگاع يسولـــف دمهـم
وحيل الحسين رمل صار ترى بمقتلهم
              أنصار الحسين
•••
مجلس ألهـــــــم أسس بذيچ المسيه
حــــسين فــــارگ صحبته بالغاضريه
وضلت أدمـــــــــوعه على خده جريه
والنعـــــــم منهم زلـــــم كلهــم حميه
والحزن عاش ترى أوياه بقى أيون ألهم
وحيل الحسين رمل صــــار ترى بمقتلهم
              أنصار الحسين
•••
ياجرحهم أثر بروحـــــــــــــــه العفيفه
وشيبت مــــــن راحو ألحيته الشريفه
وجرحه سولف ويه دمعاته أعله كيفه
أبو اليمه أتغـــــــــــير ومحزن مضيفه
والجرح صـاح بچه وناح على قائدهم
وحيل الحسين رمل صار ترى بمقتلهم
             أنصار الحسين
•••
أبواليمــه أيصيحهــم وأدموعه تسوه
أصاحب مثل أصحابي مالگالي تچوه
راحو وخلو أجــروحي بلچمـــه تروه
أخلافهم صوبي النوايب جتني عنوه
الفاگد أعزاز يضل دوم جــرح عازتهم
وحيل الحسين رمل صار ترى بمقتلهم
                 أنصار الحسين
•••
والمفارگ ينولد كـل ساعه جــــرحه
وليل أضلــم من تشاهد ذاكه صبحه
ياخيمهـم مــــن يطبها شبيها مسحه
من حزن حتى الرمل حيرني شرحه
وسولف أهواي الأن راي وطن خيمتهم
وحيل الحسين رمل صـار ترى بمقتلهم
                أنصار الحسين
•••
خذو من عافيته حگه أيشوف ربعه
عالرمـــل شايف جثثهم كلها صرعه
الياكتر مـــــــــن يلتفت ويريد ينعه
همه طـــــــاحو ونكسر منانه ضلعه
ودمع الانصار وگع حار خيم طيحتهم
وحيل الحسين رمل صار ترى بمقتلهم
              أنصار الحسين
•••
خادم آهل البيت،،ع،،
أبوحسين السرگودي...

#هله_بربع_الحسين
•••
الفخر سولف-- على أنصارك
•••
أنت گايلها ورسالـــــــــه للفهــــــــــم معناها
أفضل آمن أصحابي ماكو وحگي بيها أتباها
كربلــــــه شهگت عطرهـــــم والعـــزم شالها
هـلـــــه بربع حسين صاحــت والوفه حياها
النصر بيهم --ضـــوه أبدارك
الفخر سولف-- على أنصارك
•••
وگفو أوياك أعلــــــه كلـهن يامنارة عالـم
أحزامــــك الشديته بيهـم كعبه عدالوادم
خضرو سور آبصلاتك  والسهم ضل واهم
وهمه مـــــــادنگو لحضـه لاگو أكبر ضالم
نشم بيهـــــم--ترى أخبارك
الفخر سولـف-- على أنصارك
•••
وزرعو الطف أعـله كبره حسين هوه الغالي
أنموت كل ساعــه بهواه وأسمه يبقه العالي
نذر وبعاشور أحــــنه الأول أومـــــــــو تالي
والتنشده أيگول عشگ حـسين صار أهلالي
العشگ أسمك-- وگف شارك
الفخر سولف-- على أنصارك
•••
وكتبو أنعـــــــيش بخـلوده والوفه راويها
والخـــــــيم بينه أتباها أشحده اليمر بيها
وبضهر عاشور دمــــــــنه أيطيح مانطيها
ذوله الأنصار وفعلهم يارسالـــــه أحچيها

خــــــذو ثارك--قـــــبل ثارك
الفخر سولــف-- على أنصارك
•••
وشالهم چف من ضواك وضل يسولف بيهم
وكل سنه بعــــــــــاشور نورك هوه اليعليهم
يكبر الحطهـــــــــــم أبراسه والقره ماضيهم
همه أول بالخدامــــــــــه بكل دعاء ندعيهم

الخدم دربك--صبح جارك
الفخر سولف-- على أنصارك
•••
خادم آهل البيت،،ع،،
أبوحسين السرگودي

قصائد مولاي قمر العشيره،،ع،،
👇👇