كَمر وتضــوي يا عباس بس ماي
شكَد استانس من تصيح بس ماي
عيون ما تصب من غبت بس ماي

دم تصب يليث الغاضريه
****************

اشرح وابدي هم الصـــار من وين
وكَلبي يبجي حتى الصخر من وين
هضمني العني يسال هاي من وين

يحيدر عني كَالو خارجيه
****************

الضعن من سار اخوي الكَمر كفلا
وافه وشاهد اعلى النهـــــر كفلا
شمر لا تضــــــــرب الايتام كفلا

احشم كافلي راعي الحميه
*****************

يميل الحمـــل واحتارا بعد لا
الكافل عالضعـن غايب بعد لا
صحت يا شمر ما بسك بعد لا

اخاف تموت لا تضرب رقية
******************

بنت اليرضــــا ربنه مرضاها
يهلها البعد عنكـــم مرضاها
ضلوع حسين شافت مرضاها

بهاي تذكرت باب الزجيه
***************

عيوني الما ترى شخصك ترامن
و صـــــــار الهم البكَلبي ترامن
سهام اعداك يالكافــــــل ترامن

عليه وصوبن كل كتر بيه
*****************

جروح الطــف تالم والعمنها
بنار الخيم ثوبــــي والعمنها
عميه عيوني صارت والعمنها

دخان السره بخيمة رقية
****************

يمن سيفك شطر بالحرب هامات
و اكَولن ها عـدل عباس هامات
اطفالك بالصحــاري بليل هامات

ومشت زينب بعد عينك سبيه
******************

وداعك مو سهل يصعب ولاهان
وعليه الدهــــــر طعناته ولاهان
يبو الاكبر ترى الخـــــدر ولاهان

شمرهم يضرب سكينه ورقية
*******************

بوجودك جان ما واحد يراني
بكثر ما نحت عجـــزانه يراني
الشمر لمن طحت خويه يراني

يكَول اليوم اطلعنج سبيه
****************

يلايم لاون تعـــــرف مالمتنه
العليل من السلاسـل مالمتنه
الارض من طاح اخونه مالمتنه

سبيه اصبحت ما تدري بسبيه
*******************

يكافل بنتي تســال خالي مايه
واشوف الجود طايح خالي مايه
النهر عباس اتركــه خلي مايه

من تروح اخاف اطلع سبيه
******************

كَصد روحي الحزن بعدك وايلهه
وكَلبي ما سله بهجرك ويلهه
أنا أم الاربعه الراحـو ويلهه

حسين الاغله مـن روحي عليه
********************

على دروب المشو لاكَعد واتاني
ولا طارش وصل منهـــم واتاني
سيف الدهـــر كَص بيده واتاني

بعدهـم من مشو للغا ضريه
******************

كل يوم ليمر الجســـــــم ينهال
وهمي من اذكــر الماشين ينهال
أريد تراب كَبري اليوم ينهال

فوكَي ولا أضل بــــلا تجيه
******************

جفوني وألطم أعله الوجه والهام
بقيت مكدره ويالحزن والهـــــام
ادكَن بالصبر شيفيد والهـــــــام

وياهم ريت أروحـــن للمنية
*******************

السمه بعاشور اظلم صار ماصاح
وضامي نذبح طفل حسـين ماصاح
ابدال الماي غيــر السهم ماصاح

يحز نحره ويراويه المنيه
****************

هم اعلى الكَلب ينزل بعد هم
راحوا والدمع يجري بعد هم
اسـال يا دهر كَلي بعد هم

اشوفنهم هلي لو هاي هيه
******************

الك بيت بوسـط كَلبي والك دار
الليالي عكست وخانت والك دار
عفت اللبن لبصــدري والك دار

اضنك مرتوي بسهم المنيه
*****************

الزينب تشهــــــد الدنيه والكوان
ويكَلبي بصوت ضل اصدح والكوان
انشدك يالتضـــــــد زينب والكوان

باجر بالحشر وي ال اميه
****************

زينب من علي ورثت علمها
حرة وبالصبر طلعت علمها
بالطف شامخ يرفرف علمها

زينب تشهدلها الغاضريه
****************

فراكَك مو سهل يصب علي مر
وشكَد ضيم بفـــراكَك علي مر
اليضدك يا علي تجاسر علي مر

ويكَلي اليوم اطلعنج سبيه
*****************

من صغري بطريق العدل جديت
وجد بخدمة اهــــل البيت جديت
نعــــم مديت اديه اعترف جديت

شفاعة حيدره حامي الحميه
******************

العمر خلصان احسه والكفلني
اخوي حسين غايب والكفلني
متت مــــن فاركَتهم والكفلني

رماد الخيم من شبت عليه
*****************

مشيت وأنا اصيحح بصوت ... ها وين
وها ناح الكَلـــــب بجفاك ... ها وين
إذا عالفـــــركَه يا عباس ... ها وين

المــوت ارحملي من بعدك عليه
*******************

الصبر مليتــــــــــه يا زينب ... تراني
مـــــــــا جان البعــد قصدي ... تراني
عذرتيني لــــــــــــون عينج ... تراني

يختي مــــــكَطعات اثنين أديه
******************

لونك ما رحت للنهــــــــــر ... ياريت
وعلي بعدك ليالي الســـود ... ياريت
اون ومـــــن ونيني الناس ... ياريت

تبطل ونتي بس ألمنيه
***************

تنازع روحي بس حسرات ... والجود
رت اوفيلج المعـــــــروف ... والجود
يختي شلــون ا رد للخيم ... والجود

بلا ماي وصعب عتبج عليه
****************

يسيف الحــز وريدك ريت ... حزناي
بعــــد عني ألهنه والضيم ... حزناي
يضل عباس طـــول العمر ... حزناي

بعدك ما يمــر أي فرح بيه
*****************

خادم اهل البيت (ع)
حســـــين الفيصلي

الليلة أفراح ومسرة بمولدك
يالحسن جيناك كلنه نعايدك

جبنه باقات الــــورود
إلك يا نبض الوجود
يلحسن جيناك كلنه نعايدك
*********************

بسمك نردد نظل بكــــل زمـــــان = يالحسن يالحسن
يالي عطرك أحله من عطر الجنان = يالحسن يالحسن
بحبك الليلة نجمعنه أعله الحنان = يالحسن يالحسن

حبنه صار بلا حدود
إلك يا نبض الوجود
يالحسن جيناك كلنه نعايدك
*********************

حبك بوســـط الكَلب لا ما يزول = يالحسن يالحسن
والله محتار بمحبتك شارد اكَول = يالحسن يالحسن
مــــا يهمنه بحبك شكَال العذول = يالحسن يالحسن

حبنه ما ينقص يزود
إلك يا نبض الوجود
يالحسن جيناك كلنه نعايدك
********************

يبو محمد يحله هاليلة الفــرح = يالحسن يالحسن
عقلي هايم بيك وبحبك سـرح = يالحسن يالحسن
بنبض دكَات الكَلب حبك صبح = يالحسن يالحسن

بتشرت جنان الخلود
إلك يا نبض الوجود
يالحسن جيناك كلنه نعايدك
*********************

انته حبنه وغير حـــــبك ما نريد = يالحسن يالحسن
تدري حبك عدنه صاير أحله عيد = يالحسن يالحسن
ننزع ثياب الحــــزن نلبس جديد = يالحسن يالحسن

ما نريد الهم يعود
إلك يا نبض الوجود
يالحسن جيناك كلنه نعايدك
*********************





خادم أهل البيت ع
حسين ألفيصلي

كـــــــل الحگ الچ يا زينب تونين ..

غابت فاطمة واليوم ابو الحسنين ..

الله يساعدچ يا زينب الكبــــــرى ..

مـن شاهتي ابوچ وشفتي الطبره ..

اخـــــــر ليلة هاي ورايح الكَبره ..

تره لوحدچ يزينب باچـر تضلين ..

تره لوحدچ يزينب لو رحـل عنچ ..

وياهـــــو الي يلومچ لو كثر ونچ ..

على وداعة شبجيتي ليوم انشدنچ ..

ما صبت دمع بس دم تسيل العين ..

بيا حال جرحك من اشــــــــــوفنه ..

ورت العمر كَبلك كــــــــون اودعنه ..

إذا عني ارحلت يعني اكَطع الضنه ..

تره غيابك يطول مو سنه وسنتين ..

شفته بحاله صعبه ومنخطف لونه ..

على فراش المنيه مغمـض عيونه ..

بفكَد الزهره كَلبي نجـــرح تدرونه ..

وهسه الغالي راح وبالكَلب جرحين ..

بويه شلـــون بعدك تغمض عيوني ..

وشكَـــل للناس عنك من يسالوني ..

شاكَلهم راح ابوي وخابت ضنوني ..

هــــــذا الما حسبته وحققاه البين ..

حلفت الدار بعــــــــدك ما اطبنهه ..

ضلمه بغيبتك بعيوني اشـــوفنهه ..

عيوني شلون تصبر من اصدنهــه ..

رحتو بعيد عني يا هــلي الطيبين ..






🖋حسين ألفيصلي

فارگيناهم يدنيه و كلشي ضاع
عنه راحوا يا حسافه بلا وداع

چانو بهاي المجالس يحضرون
شما بچينه الهم بعد ما يرجعون

كلشي ضاع .. كلشي ضاع
----------------------------

فراگهم يصعب علينه وتدمع العين
راحوا وضلت صورهم عالحياطين
ما نصدگه الگال عنهم همه ميتين
ندري ما مات اليضحي بدمه لحسين

من تصب شتنفع دموع العيون
شما بچينه الهم بعد ما يرجعون

كلشي ضاع .. كلشي ضاع
----------------------------

بعيد صاروا يا زمن ناس النودهم
عيونه شگد تبچي ضلت من بعدهم
واحنه نعرف بالدمع لا ما يردهم
أرواحنا وياهم مشت سكنت لحدهم

النامو أبين المگابر ما يجون
شما بچينه الهم بعد ما يرجعون

كلشي ضاع .. كلشي ضاع
----------------------------

ذكريات الهم بقت تجرح يليل
يا دمعنه الما نشف يجري ويسل
فراگهم جدا صعب اذانه حيل
بحقهم شما نبچي نشعر شي قليل

ليش يا دنيا النحبهم يبعدون
شما بچينه الهم بعد ما يرجعون

كلشي ضاع .. كلشي ضاع
----------------------------

يا ألم جرح الغياب شگد صعب
شيحمل فراگ الحبايب يا گلب
رجعة ماكو حته ننظر للدرب
راحوا وعافو فقط دمع اليصب

ماتت الفرحة بسفرهم والضنون
شما بچينه الهم بعد ما يرجعون

كلشي ضاع .. كلشي ضاع
----------------------------

الفرگه تجرح بس ولكن بالأخير
نگول هنياله السكن يم الأمير
الجاورك يا أبا الحسن لا ما يحير
ما تعوفه البيك رايد يستجير

للي ينخونك يحيدر أنت عون
شما بچينه الهم بعد ما يرجعون

كلشي ضاع .. كلشي ضاع
----------------------------












حسين الفيصلي

حيدر غـــــاب يا كَـلبي علي وين
الحجر من سمع ونأتي علي وين
شكَل لأيتامــــك التسال علي وين

اگلهم راح حماي ألحميه
...........................

على المطبور فوگ الراس والهام
ادگــــــــــن بالصبر شيفيد والهام
بعد عينك لفاني الحـــــزن والهام

وبقيت محيره بهاي المسيه
................................






✍ حسين ألفيصلي

لو خلص عمري وگرب مني الأجل
ونزلوني بحفرتي وما ضــــل أمل
مــــن يسألوني العمر خلصته وين
آنا بس دمعة وقصيدة أعله الحسين
........................

حسين ألفيصلي

رتفع صوت اليتامه
يحيدر بالسلامة

حيل أثر عليهم هذا الغياب
بحزن يالمرتضى وگفو على الباب

يحيدر بالسلامة
.....................

ابابك كل يتيم بصدره ونه
اذا ترحل يحيدر ياهو النه
انهض يا علي ونضر دمعنه
اجينه لشوفتك لمن سمعنه

گالوا حيدر أعلى الهامه منصاب
بحزن يالمرتضى وگفو على الباب

يحيدر بالسلامة
.....................

الك فدوه العمر يا حيدر يروح
مو بيك وعساهن بينه الجروح
تركت شچم گلب بفراگك ينوح
اليتامه تصيح ارجع بويه لتروح

رايح يا علي ويطول الغياب
بحزن يالمرتضى وگفو على الباب

يحيدر بالسلامة
......................

ارجع يا علي يا بويه لتغيب
نداوي جروح رأسك بلكت اطيب
بدمك ليش شفنه مخضب الشيب
مثل عطفك بعد هل دنيه متجيب

مثلك لليتامه منين ينجاب
بحزن يالمرتضى وگفو على الباب

يحيدر بالسلامة
.....................

إذا رايح يحيدر وين نلگاك
اجينه وبالدمع نتوادع وياك
فراگك مو سهل هيهات ننساك
اجينه بصوت نصرخ الله وياك

عجيبه القلع خيبر طمه التراب
بحزن يالمرتضى وگفو على الباب

يحيدر بالسلامة
.....................

يتامه شگد يحيدر هل اجت ليك
ولو جرح البراسك حيل ماذيك
رايح ما ترد يا وسفه ندريك
بدمعنه الليلة اجينه نقبل ايديك

بوجوه اليتامه مبين عتاب
بحزن يالمرتضى وگفو على الباب

يحيدر بالسلامة
.....................









📝 حسين ألفيصلي

ظمي دمعاتچ يزينب للسبي
من تصعدين أعله تل الزينبي

بويه بعيونچ دمع ماريد أشوف
تفيدچ دموعچ يزينب بالطفوف

من تصعدين أعله تل الزينبي
.......................................

بويه زينب خلي اوصيچ بوصيه
من اروحن لا يهل دمعچ عليه
عفيه زينب بنت أبوها ألهاشميه
تنفعچ الدمعات بأرض الغاضريه

لا تونين أعلى فگدي بهل غياب
باچر تشوفين أشكال العذاب

اهلچ تموت وتشيعها السيوف
تفيدچ دموعچ يزينب بالطفوف

من تصعدين أعله تل الزينبي
........................................

بويه من ارحل يزينب لا تونين
بآچر بطف كربله لوحدچ تضلين
لو نظرتي من الظهر مذبوح لحسين
و الكفيل أعله النهـر ما عنده چفين

بوحدچ تضلين زينب حايره
والعساكر عالمخيم دايره

الكفل ضعنچ تنگطع منه الچفوف
تفيدچ دموعچ يزينب بالطفوف

من تصعدين أعله تل الزينبي
.......................................

راح اسولفلچ واخبرچ عاليصير
كافلچ من ينذبح گلبچ يحير
لوحدچ تبقين ما عندچ نصير
زينب لحزنچ فلا يوجد نضير

انتي ودموعچ يزينب والسهر
ظلمه بآچر ليلچ يغيب الگمر

لگمر بالعاشر يصيبه الخسوف
تفيدچ دموعچ يزينب بالطفوف

من تصعدين أعله تل الزينبي
........................................

سهل هذا الي حصل والبيه صار
أظلم بطف كربله يصير النهار
بآچر هناك الخيم مشتعله نار
و عالجمر تركض تشوفين الزغار

من تشب النار تحرگ چم طفل
ضيم لتشوفينه ابد ما ينحمل

الضماير ميته بالطف ما تشوف
تفيدچ دموعچ يزينب بالطفوف

من تصعدين أعله تل الزينبي
........................................

بآچر اهلچ عالترب كلهم ضحايه
ويا ألم گلبچ بداية بلا نهايه
من بعد درب الخدر درب السبايه
بالطفوف النار تحرگ چم عبايه

بويه ما اگدر شاگلچ يصعب الحال
عالهزل يا زينب بچفينچ احبال

تبقى آلام ومحن بيكم تطوف
تفيدچ دموعچ يزينب بالطفوف

من تصعدين أعله تل الزينبي
.......................................











📝 حسين ألفيصلي

(قصيدة تطبير)

بحب المرتضى مهما تلوم الناس

ما نعتــرف بيها برايـــة العباس

مجانين الولاية ونطبر أعلى الراس

مثل هامت علي أعلى الراس نتطبر

شيعه احنى وحيدر والينه
خســـــــران الراد يعادينه
حيدر ... حيدر ... حيدر ... حيدر
ــــــــــــــــــــــــــــــــــــــــــــــــــ

صاح جبريل بحزن هز السمـــــه

طبرو الكـــــــــــرار حماي الحمه

وسفه طايح يا علي و تنزف دمه

شلــون اطيح يالقالع حصن خيبر

طاح الكرار بمحـــــــرابه
ينزف والدم صار خضابه
حيدر ... حيدر ... حيدر ... حيدر
ــــــــــــــــــــــــــــــــــــــــــــــــــ

ما يهمونه اليضدون الوالـــــي

والله نقهرهــــــم اذا نهتف علي

يبقه هــذا الصوت بسمك يعتلي

هذا الصوت يبقى يصيح للمحشر

مطبور الوالي أعلى الهامه
ضلت تتصارخ ايتامـــــــه
حيدر ... حيدر ... حيدر ... حيدر
ــــــــــــــــــــــــــــــــــــــــــــــــــ

العاف نورك يا علي و تابع ظلام

يخســر هناك ويعض اصبع ندام

لا صلاة تنفعه باجــــــر لا صيام

يا كرار والله الخالفك يخســــــر

خسران الما حب الوالي
منعـــــوفك عيدر للتالي
حيدر ... حيدر ... حيدر ... حيدر
ــــــــــــــــــــــــــــــــــــــــــــــــــ

بهذا الشهر ماتم حيدر صيامـه

طاح المرتضى مطبور عالهامه

ضل يصب دمعهه وتصرخ ايتامه

سيف الصوبك ياريته يتكســــــر

من صابك حيدر مولانه
ياريت نشـــــلت ذرعانه
حيدر ... حيدر ... حيدر ... حيدر
ــــــــــــــــــــــــــــــــــــــــــــــــــ

تضل هاي الشعائر سيدي بكل حين

ما نخلف عهد وياك يا ابو حسين

بدم الهامـــه الك يا حيدر موقعين

العاندنه خاســـــــر كلشي ما يكَدر

نموت وحيدر منعوفه
كَلــوب الحبت ملهوفه
حيدر ... حيدر ... حيدر ... حيدر ــــــــــــــــــــــــــــــــــــــــــــــــــ








حسين ألفيصلي

لا تذكر فرح وتگول اجاك العيد
طاري العيد ماريد اسمع بذكره
انا فاگد وطن مات أمس بالتفجير
وناصب چادره من زاخو للبصرة
ما افصل ملابس فصلت تابوت
العراق الله يرحمه أنطاك كل عمره
تگلي العيد الجالك انسه طاري الموت
وطاري الحزن بسك بعد لتذكره
دعاين بالشوارع شوف ليموتون
مو گاع الوطن بالدم صفت حمره
النجف غصت جثث گد ما دفنه عزاز
حتى الفاتحة ضيلنه ما نقره
من گد ما ضحايا انطينه للإرهاب
أعله كبر الخارطة صار الوطن گبره
شوكت تصفه ونعيش بگاعك مامنين
و يزول الظلام وتشرق الگمره




✏حسين ألفيصلي

ونيني الفاگـد أمه مايونه
على الراحوا يدنيه مايونه
أسألچ يالمگابــــــر مايونه
تگول ستشهدو ما بعد جيه
.................................

حسين ألفيصلي