يا رسول الله الوداع الليلــة
فاطمة تبجي ودمعهه تسيله

تصيح بويه تعذبت
وداعت الله يالرحت

فاطمة تبجي ودمعهه تسيله
******

تسمع ينادي الرسول
بويه يالزهرة البتول
كَلبج اعله اوداعي اريدن يقوه صبره
الليلة اخر ليلة هــاي
خلي اودعنج تعــاي
بويه يالزهــــــــرة الزجيه وداعت الله

انا رايح عنج بهاي المسيــه
للمصايب شدي حيلج يالزجيه

غير الهموم اشفت
وداعت الله يالرحت

فاطمة تبجي ودمعهه تسيله
******

الدنيه ضلمه بلا ضواك
خنكَه لو ماشم هواك
رايح وتاركلي بس همي وغذابي

ليلة وداع وسهـــــــــر
وانته ناوي اعله السفر
شنو بعدك لو رحت يجبر مصابي

بويه بعدك ينكسر مني الضلـــع
يالخذت كلشي وعفت بس الدمع

بصوت الموادع صحت
وداعــــــت الله يالرحت

فاطمة تبجي ودمعهه تسيله
******

هذا وكتك مو امـــان
الخيانه بكل مكان
بويه اخافن ما يحفضون الوصيه

لبابي لو بالخيل اجو
و لوصيتك خالفو
ينكسر ضلعي اذا دفعو عليـــــــه

بكل وقاحه تجاسرو وبكل صلافه
من علي الكــــرار سلبوها الخلافه

بهل بصاب تحيرت
وداعت الله يالرحت

فاطمة تبجي ودمعهه تسيله
******

نودعك اليوم وتروح
تبقى بس دمعة وجروح
يالي اغلى من الهوى الاشتمه انته

من زماني شانتظـــر
خذت وياك العمـــــر
كَلبي كله جــــــــروح بغيابك تركته

كَلبي مجروح بغيابك ما يطيب
وادري ما ترجع تطول بالمغيب

كون تدري شكَد نحت
وداعت الله يالرحت

فاطمة تبجي ودمعهه تسيله
******

من كثر وني الحـــــزين
ما اشوفن دربي وين
عيوني راحت من كثر ما صب دمعهه

ايدي احطها اعله الضلع
ابجي ويسيل الدمع
سنيني بعدك من رحت طفو شمعهـــه

ليلــــة وداعك تمنيت المنيـــه
انته رايح وادري ما ترجع عليه

ابجي اضل بكل وكت
وداعت الله يالرحت

فاطمة تبجي ودمعهه تسيله
******





حسين الفيصلي

يجرحي بطيحت العباس .. هجيت
واشوف أيتامي من الخيم .. هجيت
شو ما جيتي خاف تگول .. هجيت
اودعك لأن راح اطلع سبيه
ــــــــــــــــــــــ

جرح گلبي بغيابك .. أدب الطف
وصلاة وداع اشوفه .. أدب الطف
كفو من ابو فاضل .. أدب الطف
شيل لبسها زلم الغاضريه
ــــــــــــــــــــــ

✍حسين الفيصلي

عراق من التعب جرحك بطولك صار

اعلى گد الخارطة ومحد فزع شـــده

اخوتك يا وسف بارخـص ثمن باعوك

عراق البيك ياهو من الدول عـــــــدة

يا يوسف زمانك لا تأمن إخــــــــوان

بعده البير نفسه البي طحت مــــــده

شد جرحك بچفك لا تگل للغيـــــــــر

رد و خلي كلمن طينته بخـــــــــــده

يالبراسك علي ما تعرف استســـــلام

علي بوكت الشدايد ياهو اليـــــــرده

لا للذله تهتف مثل لا حســــــــــــين

ما دنگت راسك چلمتك وحــــــــــده

وين الگه اليشبهك مثل گاعگ ويـــن

ومثل طيبة ترابك ياهو العنــــــــــده

الما شافك ضوه هذا بضميره الصوچ

لذلك ما يميزك شوكــــــــــه لو وردة
....................


✍حسين الفيصلي🇮🇶

اللَّهُمَّ إِلَيْكَ أَفْضَتِ الْقُلُوبُ وَ مُدَّتِ الْأَعْنَاقُ وَ شَخَصَتِ الْأَبْصَارُ وَ نُقِلَتِ الْأَقْدَامُ وَ أُنْضِيَتِ الْأَبْدَانُ، اللَّهُمَّ قَدْ صَرَّحَ مَكْنُونُ الشَّنَآنِ وَ جَاشَتْ مَرَاجِلُ الْأَضْغَانِ، اللَّهُمَّ إِنَّا نَشْكُو إِلَيْكَ تَشَتُّتَ أَهْوَائِنَا، وَكَثْرَةَ عَدُوِّنَا وَقِلَّةَ عَدَدِنَا، فَفَرِّجْ عنا يَا رَبِّ بِفَتْحٍ مِنْكَ تُعَجِّلُهُ، وَ نَصْرٍ مِنْكَ تُعِزُّهُ، بِرَحْمَتِكَ يَا أَرْحَمَ الرَّاحِمِينَ، آمِينَ رَبَّ الْعَالَمِينَ"

#اللهم_عجل_لوليك_الفرج

بدنيتي شلون استراح .. راح أبوي وكلشــي راح
التارس الدنيا بحنانــه .. مشه وضل فارغ مكانه
راح ابوي
.........

يا موت أعلى هونك أرحم بحالـــي
ليش استعجليت و ماخذ الغـــــالي
شلون انسى العزيز الصورته أبالــي
صار البيت ضلمه بدونه ضل خالي

تخلص أيامــي بقهر .. ظهري بغيابه انكســـــــر
متت لمن ودعانــــه .. مشه وضل فارغ مكانه
راح ابوي
.........

شكثر أرتاح لمـــــــــن چنت اشوفنه
من اشتاگ حيل بچفي احضننـــــــه
خذا چـــــــــف المنيه شلون ارجعنه
الأعز من روحي راح الليلة اودعنــه

رايح من أيدي الحنين .. ويــن أحصل مثله وين
البويه محلاها بلسانه .. مشه وضل فارغ مكانه
راح ابوي
.........

تصب دموع عيني وليلي ما انامه
الابو ميت بعد شيسوي بأيامـــــه
اندعيت شگد أموتن انا گدامـــــه
عيوني لشوفته ما تغفى محتامه

اليشــع بيــــتي بضواه .. استعجل الموت وخذاه
ريت بعده الموت اجانه .. مشه وضل فارغ مكانه
راح ابوي
.........

ما تنفعني دمعة ولا ثياب الســـــــود
المشه بدرب المنيه لا تظن يعـــــــود
الچان گبال عيني هسه ما موجــــود
شما اهود الگلب ما يرضى بعده يهود

گلبي دوم يحن عليه .. اتمنى ابوس چفوف اديه
آه لمن فارگانــــــــــه .. مشه و ضل فارغ مكانه
راح ابوي
.........

يضل للموت ما ينشف دمع عيني
شلون أنساه يا دنيا شينسينـــــي
أبد ما حسبت يمشي ويخلينــــي
مو من الجرح الغياب ياذينـــــــي

بگلبي جرحك ما يطيب .. وين أشوفك يالحبيب
يا رحيلك عذبانــــــــــه .. مشه وضل فارغ مكانه
راح أبوي
...........








✍ حسين ألفيصلي

لبيك مولاي يبن فاطمة

.......................................

خدمتك نوماسي .. بيك اشيلن راسي
يالي إسمك دموم شاغل بالي

يالصرت عنواني .. واحد بلا ثاني
غالي تبقى و ماكوا غيرك غالي

ما يشفى يحسين جرح مصيبتك
اطالب الثار رفت رايتـــــــــــــك

لبيك مولاي يبن فاطمة

.......................................

بمجلس يوميه .. اعشگ اللطميه
انا ميت واعدل بعاشورك

يا نبض بعروگي .. حسين يا معشوگي
الدنيا ضلمه ونورتها بنورك

كل كربله ليل و جروحك صبح
المثلك شلون بالطف ينذبح

لبيك مولاي يبن فاطمة

.......................................

من اشوفن راية .. لو سمعت قراية
گلبي بالگوه تكضه ضلوعي

القاري لمن يقره .. اختنگ بالعبره
ادگ صدري وتبقى تجري دموعي

اعميها العيون لو ماكوا دمـــــــع
من أسمع الخيل تسحگ ع الضلع

لبيك مولاي يبن فاطمة

.......................................


انا شمسويلك .. عود بس ابچيلك
ملك بين الوادم مخليني

لاني مثلك ضامي .. لا جمر بجدامي
نار ذيچ الخيم ما چاويني

يا كربله حسين شاف شچم جرح
حتى البالگماط بالطف ينذبـــــــح

لبيك مولاي يبن فاطمة

.......................................

وحق دمع رقيه .. و شيلت المسبيه
ما طفت يحسين جمرة ثارك

بينه حزنك دايم .. لحد ظهور القائم
هاي صيحة و رددتها انصارك

خدام الحسين ونضل للأبـــــــد
بسمك بقى يصيح حتى البالمهد

لبيك مولاي يبن فاطمة

.......................................

يالمتت بالهيمه .. أتمنى اصيرن غيمه
فوگك اعصر روحي واروي شفافك

آه من الحافر .. و شمس يوم العاشر
شحال زينب يا حسين خلافك

من غارت الخيل ما خلت خدر
حفاي الأيتام تسحگ عالجمـــر

لبيك مولاي يبن فاطمة

.......................................








✍ حسين الفيصلي

تبدي باجر قصة أحزاني الأليمــــــــه
بشمس يوم العاشر ابقى بلايه خيمه

للنهر اركض واطيح
آه يا عباس اصيح
يا هضيمه

................

آه يا باجر صعـــــــب .. حرمه والوادم غرب
والله حيــــره
ماكوا خيمه ولا فياي .. واسمع الصايح وراي
يا اسيـــــــره
بحيره كاتلني القهـــر .. ما رضوا صوب النهر
واجهي اديره

تسألوا بيناتهم بس بشماتـــــه
وين ذاك الجان متكفل خواته

بعدك شلون استريح
آه يا عباس اصيح
يا هضيمه

................

الجود طاح ورايتك .. يالجبتني بغيرتــــــــــك
حامي خدري
دنيتي وعذالي هم .. بعيني اشوف الحومه دم
دمعي يجري
من فگتك يا گمـــر .. مثل الحسين انكســــــــر
خويه ظهري

طيحتك يابو الفضل كسرت گفاي
كون اعرف ما ترد ما ردنه مــــاي

گلبي مكسور وجريح
آه يا عباس اصيح
يا هضيمه

................

خاف اگول وتنهضم .. طولي شافته الزلم
وانا آية
شگد تمنيتك عدل .. انه مو مالت هـــزل
لو سبايه
بكربله السبعين ألف .. غربة ما بيهم عرف
بالنهاية

اخيامي حرگوها ونويت أعلى السبي
خويه ضلت بس على الله وعل عبي

شما يهب من يمي ريح
آه يا عباس اصيح
يا هضيمه

................

بدنيتي شلون استراح .. رحت مني وكلشي راح
من إديه
يابو فاضـــل يالحنين .. بعد مثلك الگه ويــــــن
رد عليه
گلبي ضل يحن عليك .. خويه ما خلوني اجيك
تدري بيه

عيني بعدك ما غفت ليل الطويل
تعب اجدامي السبي وما بيه حيل

دمعي لفراگك يسيح
آه يا عباس اصيح
يا هضيمه
................

گلبي من همومي شاب .. حار يا خويه التراب
بالخرابه
خلوا بچفيني گيد .. شلون اطب مجلس يزيد
بت نجابه
بعيني يالكافل شفت .. رأس الحسين بطشت
يا عذابه

رأس الحسين بطشت شفته وبچيت
من الهضم عباس يا خويه نحنيت

أنضر بنحر الذبيح
آه يا عباس اصيح
يا هضيمه

................






✍ حسين الفيصلي

من الطفوله أمي توصيني
و للحسينية أذكر تودينـي

ثوب أسود تلبسني .. تگلي أريدك يبني
خادم تصير
..............

شهر الدمع كلما يهــــــــــل تخنگها أمي العبره
تلبسني أسود كل سنة وهل حب كبر عالفطره
شدت بديه أذكر علگ جايبته من الحضــــــره
تگلي أريدك كل وكت تبچي و تواسي الزهـره

محــــد يفيدك افتهم زين
بالك ييمه تعوف الحسين

يا يمه أسمع مني .. تگلي أريدك يبني
خادم تصير
..............

لحسين أريد بكل وكــــــت دمعك يضل يتجاره
گلبك مثل نار الخيــــــــــم ما تطفئ أريدن ناره
لا تنسى من طاح الگمــــــــر زينب بقت محتاره
ويحسين أريدك تنحسب چن واحد امن أنصاره

كون أعلى زينب عينك تروح
ياهو مثلها تحمل جـــــــروح

عاهدني كون تحبني .. تگلي أريدك يبني
خادم تصير
..............

جرح الطفوف من الزغر يا يمه عايش بيه
بعيوني ما يبقى دمع من أذكر المسبيــــــه
ويلاه يا سوط الشمر شمسوي بالعلويـــــه
آه أعلى زينب بالمشي من التعب محنيـــه

فوگ الهزل من دارت العين
تنظر لهلها وهم ميتيـــــــن

للموت اضل بحزني .. تگلي أريدك يبني
خادم تصير
................

يا يمه أحس من المهد هل عشگ ساكن بيه
عن سري اسألنچ أضن دافنته بحسينيـــــــه
هل دنيا ما تسوى وعلي لو ما بچي ولطميه
لو ما على الضامي انذبـــــح المن أون ليليه

شتسوى الحياة بدون الدموع
لو ما أون عالراسه مگطــــوع

انا اسأل و جاوبني .. تگلي أريدك يبني
خادم تصير
..............

عن فضلچ شما قدمت ما أضن اوافيچ اگدر
هذا بسبب دعواچ الي خادم صرت للمنبـــــر
يشملچ الله برحمته بجاه الضلع و المنحـــــر
من گلتي أذكر كلمتچ اليحب علي ما يخســر

مثلچ صرت يا نور العيـــون
اهوه الحسين بحبه مجنون

هذا العشگ جنني .. تگلي أريدك يبني
خادم تصير
..............








✍ حسين الفيصلي

حسين يا أبا عبد الله
..........................

سامعها من ناس اشكثر .. لا واحد ولا عشـــــــره
گالولي كــل حب يبتدي .. طبع العشگ من نضـره
بس انا ما شفتك ابـــــد .. و حبيتك أعلى الفطره
سألوني ياهو الي تحب .. گلتلهم ابن الزهـــــــره

حسين يا أبا عبد الله
..........................

گلبي مثــــــل شدت علگ .. بحضرتك شديتـــــه
متعني جايبني الهــــــوى .. وبابك خجل دگيتــه
عشگك على الكل يختلف .. مبچيني بس حبيته
كل نسمه عطرك من يهب .. أرتاح اذا شميتــــــه

حسين يا أبا عبد الله
..........................

حــب جاذبيتك بالعشگ .. خله البشر مجنونـــه
بـــس اليحبه الله افتهم .. سر حبك و مضمونه
معروفه مــن طبع البشر .. كل خادم يذلونــــــه
بس انته اليخدمك ملك .. والوادم يقدرونــــــه

حسين يا أبا عبد الله
..........................

يا ابو ارقيه شگد سمح .. ما تزعل انته اعلينه
عــــن الطريق شما نزل .. بدربك ادلينـــــــــــه
ياهو اليشبهك يا نهـــر .. ميت ضمه وتروينــه
هو انته منــــك ينشبع .. يالخيرك مغطينـــــه

حسين يا أبا عبد الله
..........................

هلال المحرم هل وصل .. أيامه ماهي هوايـــــه
تآمرنه واحنه بخدمتك .. يا سيد الوفايـــــــــــه
تحضرنه الأيام العزه .. نسوي عليك قرايــــــه
بس انت غايتنا وتضل .. ما عدنا غيرك غايـــــه

حسين يا أبا عبد الله
..........................







✍ حسين الفيصلي

للحسين بالعمــــر ضحينــــــه
.............................

هذا وهمان اليفكر ما نسوي قرايـــــــه
انت هم فديوم سامع نهر زاعل مايـــه
الگال ما نحظر مجالس خله هو ورايه
هي هاي الدنيا كلها الخاطرة مسويـــه

هويناه والله يعلــــم بينــــــه
للحسين بالعمــــر ضحينــــــه
.............................

مثل عند الناس كلها الوادم يعرفونــــــه
مو ابو الحكمه المجرب چانو يسألونـــه
كربله لكلمن مريض ترابها يوصفونــــــه
التطيب الأعمى حتما هم تطيب كرونه

من الأمراض مجلسه يشافينه
للحسين بالعمــــر ضحينــــــه
.............................

حسين نتنفس محبتك لا تظن نشتم هوه
الما يشم من كربلائك هو و الميت ســــوه
بعالم الذر وهوينه وصرنه نعشگ نينــــوه
يا مرض يمنعنه وانت ندري بترابـك دوه

بالاخطار ابد ما همينــــــــــــه
للحسين بالعمــــر ضحينــــــه
.............................

تريدنا نقيم المجالس فاطمة توصينه
حسين ما نگدر نعوفه بمجلسه تربينه
أنصار يا زهراء احنا و عالعهد ضلينــه
ويا نضل ما دام لسه عرق ينبض بينه

روافض تــــدري ما ذلينـــــــه
للحسين بالعمــــر ضحينــــــه
.............................

ما نعوف الخدمة لحظه اي نضل خدامه
الما نذر لحسين عمره شنو نفع أيامــــــه
الفكر نعوف المجالس عايش باوهامــــه
وإحنا من هسه للعاشر حضرينه القامــه

قهرناه كلمـــــن يعادينــــــــــه
للحسين بالعمــــر ضحينــــــه
.............................







✍ حسين الفيصلي

بالظعن تردون ويــــــن .. بعد ما تغفالي عيـــن

بليلي لحظة شلون انام .. و انا فارگت الحسين

............

اهلي راحوا وحدي بالغربة اتركوني
ليش ما فكروا بيه وما خذونـــــــي
و الله يا دنيا بعد ما اظن يجونـــي
ما رجع منهم خبر بس لا نسونــــي

دمعتي بعيني و انوح .. انترس گلبي جروح

انتظركـــــم عالدروب .. لو بطيتو وين اروح

............

أركض و خلف الضعن تانوني أصيــــح
ساعة اگومن چي عليله و ساعة اطيح
أتمنى اموتن بلكي من همي أستريـــح
اركض أعله الباب كلما مرها ريـــــــــح

جرحي كلما يلنچم .. ريت سفرتكم حلــم

لو عطركم مني راح .. شلون أتنفس ششم

............

الفارگ أحبابه يحس دنيا گبر
من بعدكم طعم ما ظل بالعمر
الفرگه حيل تريد وانا بلا صبر
كسرة الخاطر أبد ما تنجبـــــر

متت لحظات الوداع .. عمري أحس من يدي ضاع

گلت وياكـــــم أروح .. وين ما عد الله گـــــــــــاع

............

چن ضعنكم عني رايد يرتحـــل
لو مشيتوا من بعدكم وين أظل
بويه تدرون الهجر ما ينحمــــل
عاد خلو وياي عبد الله الطفــل

بحضني اخلــي من انام .. بروحي ظل شگد كلام

احچيله جايب عمه ماي .. ما اسولف ع السهـــام

............

من بعدكم راح أظل بحسرتـــــي
بعد ياهو البيده يمسح دمعتـــي
بعيني كلش ظلمه صارت دنيتي
يالتركتوني وحيده بدنيتــــــــي

عالهجر ما بيــه حيل .. جسمي تعبان وعليـــــل

من بعدكم حيلي راح .. دمعي عالخد ضل يسيل

............









✍ حسين الفيصلي