نزلة لعلي الاكبر عليه السلام…

علي… علي… يا أبن فخر الهواشم
علي… علي… گوم فرحهه الفواطم

"""""""""""""""'""""""
امك انه ..يالظنه… يبني وانتخيتك
هاي الخدر.. تنتظر.. عزمك وحميتك
هذا الدرع ..يالورع ..حامي عن قضيتك
بهمه وعزم .. ياشهم .. هذي من سجيتك

علي… علي… تفنن بضرب الصوارم
علي… علي… گوم فرحهه الفواطم
"""""""""""""""'""""""
گوم استعد .. وارتعد .. وارعب العساچر
خل القلق .. والرهق .. ييـــــــلغ الحناجر
سل اللهب .. وبغضب ..اگـــطع المناحر
صيح انزلي .. تفضلي ..بعدي ياكواسر

علي… علي… روسهم سوهه مساهم
علي… علي… گوم فرحهه الفواطم
"""""""""""""""'""""""
طب كربله… زلزلة… واهتف بمراجل
انا علي… ابن الولي ... والرجل ينازل
من حيدره… عزمي تره… ثاكل الارامل
حد النظر… ولسقر… وجه الجحافل

علي… علي… اليوم تنــعاد الملاحم
علي… علي… گوم فرحهه الفواطم
"""""""""""""""'""""""
بث الرعب… بالحرب… واخلس الفوارس
عيد المجد… للمجد… المنه انـــت دارس
وكت الشدد … يالــولد… ما الك مــنافس
خل همتك… صولتك… ذلهم الاشاوس
علي… علي… والبرزلك رده نـــادم
علي… علي… گوم فرحهه الفواطم

"""""""""""""""'""""""
ضيع المفر… عاليفر… وافعل التريده
عندك وعد... بالعهد… ثابت العقيده
يدعي الك… كل ملك… ربي سدد ايده
انطيهم درس… بالنفس… جدك الصميده

علي… علي… منك اتفوح العزايم
علي… علي… گوم فرحهه الفواطم
"""""""""""""""



الشاعر سيد فليح الموسوي ✏📖
https://www.tg-me.com/F_h_mo

رابط القناة 👇
https://www.tg-me.com/AbuhassanAlmusawi2007

شور ليلة الوداع…

وداعاً ياحسين..وداعاً ياحبيبب.. وداعاً ياغريب ..وداعاً ياسليب
"""""""""""""""""""""""
ينظرهه السمه المحزون فوگ الخد دموعه اتسيل
طول بالــــله اترجـــــاك يحچي وي ظــــلام الليل
گام اتـــفگد الخيمــــات وبــــيده أســـرج القنديل
ويلگط حـــسك سعدان من درب البــــنات ايشيل

وداعاً ياحسين..وداعاً ياحبيبب.. وداعاً ياغريب ..وداعاً ياسليب
"""""""""""""""""""""""
عنده اعلـــوم ابو اليمه يقره بالسمه اخبار
ومن گد الحـــنان البيه گام ايفــكر بتدبار
ودرب الفر بده ينظفه لو شبت لهيب النار
دمعاته تصـــب عالگاع ويدعي يلطف الستار

وداعاً ياحسين..وداعاً ياحبيبب.. وداعاً ياغريب ..وداعاً ياسليب
"""""""""""""""""""""""
يدري عنده علــــــويات ما تتــــــحمل السعدان
وباچر لو ولاهه الخوف حافي تركض النسوان
ظل محتار ابو اليـــــمه ويعايـــن على الميدان
خايف عالحرم وعـــيال من صولتـــهم الفرسان

وداعاً ياحسين..وداعاً ياحبيبب.. وداعاً ياغريب ..وداعاً ياسليب
"""""""""""""""""""""""
يتــــفگد بده اخيـــامه من خيمه لخيمه ايدور
ويوصي الصبر يعــيال باچـــــر يوگع المحذور
ويازيـــــــــنب اريدنچ ذخري لعاشـــر بعاشور
وخدري لو رحت يختي اريدنه يظـــــل مستور

وداعاً ياحسين..وداعاً ياحبيبب.. وداعاً ياغريب ..وداعاً ياسليب
"""""""""""""""""""""""
مر اعلـه الربـــاب وگال بحظني حطي عبدالله
خل اشتم عبيره بشوگ باچــــر تغـــــدر النبله
ادعيله بحـــــــرز لو نام يحرس نزته اسم الله
وادعيلچ بعـــــد ويـــاه الله يعــــــاون الثكلى

وداعاً ياحسين..وداعاً ياحبيبب.. وداعاً ياغريب ..وداعاً ليب
"""""""""""""""""""""""
يا زينـــــب امـــانه صاح ظلت عنـــدچ ارقيه
لو عنهه الحــــنان ايغيب منچ حطــــي حنيه
ولبسيهه تراچــــــي دوم متعوده اعله ترچيه
وياهه احضرهن الشدات كلما تنشــــــد اعليه

وداعاً ياحسين..وداعاً ياحبيبب.. وداعاً ياغريب ..وداعاً ياسليب
"""""""""""""""""""""""




الشاعر سيد فليح الموسوي ✏📖
https://www.tg-me.com/F_h_mo

رابط القناة 👇
https://www.tg-me.com/AbuhassanAlmusawi2007

عندما رأيت هذه الصورة على وسائل التواصل وعدت صاحبها ان اكتب له قصيده هذا مقطع منها فأرجو من اصدقائي مشاركة المنشور حتى تصل اليه هذه الابيات...
ها يبدلة عرسي ياقاط الغرام
عندي حيل انتي عزيزه مدللة
من ألبسچ انه احس طبعي عجييب
اتنومس واشعر بغيره ومرجـله
حگي اتسودن وعوفنـهه الديار
قبلي جن قيس ابعشگ فارگ هله
انه اشم عطر السواتر كله بيچ
انه ونتي وياهه تربطنه صله
كحيله يابدلة عشگ حلوة الصفات
عيونچ اوساع وجميلة امكحله
اشتم بعطرچ عـلى الساتر حنين
وحب يسع كل العراق بأكمله
لو لبستچ چني زفوني عريس
ونتي يابدلة عروس مأصله
وامي اتهلهل تصيح بعالي صوت
ابني حب الرادهه وجابوهه اله

حمل هم
شكثر گلبك يبو اليمه/ حمل هم
تطيح وياهو لعيالــك /حمى الهم
يهد الحـــيل بالــــغربه/ حـملهم
هضم زينب اشد لو هم رقيه…
سيد فليح الموسوي

ظل ماي
انظلمتو وما توصل بشر / ظلماي
زحف جتني رقية بليل / ظلماي
تگلي بجربة العباس / ظل ماي
يعمه من العطش نيران بيه...

رعد الجريخي

موشح لاول يوم محرم

هل محرم گوم وانشر رايتك
بسمك اتنادي يمهدي شيعتك
////////////////////
بسمك اتنادي يمولانه العـــجل
انت مصباح الهدى وانت الامل
يله سر بينه يــبن خـــير العمل
حان موعدهه بشائر ثورتك
////////////////////
حان موعد ثورة الحق المبين
وينـــــك انت يا إمام الثائرين
راية العــباس تنــتظرك سنين
واحنه ملهوفين كلنه لشوفتك
////////////////////
واحنه ملهوفين مل منه الصبر
گوم يامـــهدينه عجــــل بالامر
علينه مولاي الظلم صار اشكثر
والعدل ضاع ونتاني فزعتك
////////////////////
والعدل ضاع وكثر عدنه الفساد
وانظر الحكّام جــارت عل العباد
وانتـــــشر بيهه الظلم كل البلاد
وعينهه العالم بقت يم دولتك
////////////////////
عيون كل العالم لصــوب العراق
ويانه تنتظره بشغف يوم التلاق
گـــوم واعلن ثورتك ضد النفاق
وزلـزل عروش الطغاة بيمنتك
////////////////////
ثارك ايــــناديك من طــف كربله
چــم يزيد الجــار بالـــحقد انمله
وچم شمر بيه الوكت چم حرمله
شلون تقبلهه يمهدي غيرتك
////////////////////

الشاعر سيد فليح الموسوي

https://www.tg-me.com/AbuhassanAlmusawi2007

قصيدة موشح للعليلة عليها السلام

ويلي صاحت فاطم وهلت دمع
فراگ ويه العله صعـــبة يجتمع
////////////////////
فراگ ويه العـــلة يانــاس اجرعت
خلاف ابوي اصواب ايوب انصبت
منين اجيب الصبر عالفرگة اتعبت
نار بيه وصرت چن خيط بشمع
////////////////////
نار بيه ولا خبر منــهم وصـــل
ليش عفتوني وحيـــدة يالاهل
فراگكم ويه المرض بيه شعمل
بلا طعم صارت حياتي بلانفع
////////////////////
بلا طعم هالعــــيشه وصوابي كلف
دمــــعي عالوجنات ابدا ً ما يــجف
شلون اوصف حزني ابد ماينوصف
صــعبه عالطفلة بأبوهه تنــفجع
////////////////////
صعـــبة عالطــفلة العليلة تبتلي
بفرگة ياريت الخبر يوصل هلي
ليش خــلاني ورحل عني الولي
ادري بي صوتي ابد ماينسمع
////////////////////
لصدر ابوي هواي مشـــتاگ الحظن
وكل خواتي كون تحظرني من اون
وايــــدي ال كاروك عــبدالله تــحن
ويــلي عالاكبر تره مـحني الضلع
////////////////////
ويلي عالـــعباس مــشتاگه واصيح
ها يعـــمي الرايــة ها بالك تطـــيح
ريت ابوس اچفوفك انه واستريح
عليك يل الكفال گلبي منصدع
////////////////////

الشاعر سيد فليح الموسوي

https://www.tg-me.com/AbuhassanAlmusawi2007

قصيدة موشح لام البنين عليها السلام

مدرسة أم البنين أم الوفه
منهه نتـعلم فنون العاطفه
////////////////////
منهه نتـــعلم عقــــيدة وانتــماء
والعشگ لحسين والحب والولاء
مفخرة ام اﻻربعة وكلهه عـــطاء
واحنه من سيرتهه ننهل معرفه
////////////////////
ذابت بحب النبــي وآل الرسول
وهمهه كله راضيه عـنهه البتول
وعاشت بنكران ذات ام الشبول
بيهه معروفه الجليلة هالصفه
////////////////////
من عشگهه غيرت حتى الاسم
ما أريد احســــين گالت ينلچم
لو سمع اسم امه خافن ينهضم
بيهه فرحان ابو اليمه واحتفه
////////////////////
ربت اليــوث اربعه لـطف كربله
ذخر ابو اليمه تگول وفدوه اله
بيكم الـــنوماس يــولادي حله
بدمكم اواسي الحبيب المصطفى
////////////////////
وصت العباس سبع الگنطره
يمه اريدك بالشدايد مفخره
ابذل الچـفين يمنه وميسره
يبني لعلومك الطيبه لاهفه
////////////////////
ربـــنه خصهه بالكــرامه ومنزله
باب للحاجه اصبحت والمعضله
والگـــصدهه ينــول كل المسأله
ويبره كل معلول ويحصل شفه
////////////////////

الشاعر سيد فليح الموسوي
https://www.tg-me.com/AbuhassanAlmusawi2007

قصيدة لعلي الاكبر عليه السلام…

ذكرياتي… من تعب عمري بقت .. ذكرياتي
امنياتي… بريــح الموادع طفــت .. امنياتي
ياعلي الاكبر ذبل عودي منتظره الاجل
من تعب عمري بقت .. ذكرياتي
:::::::::::::::::::::::::::::::::::::::
ياحلم وردي بحياتــي وچنت انظرلك بعيد
وياهوا بريـــّـــــــات امك ذايب بدم الوريد
شلون اصدگهه الحقيقة ميت اعتقدك تريد
وانه چنت ابني الاماني وانسج بحلمي السعيد

يازماني.. چبدي المتيم مردته ..يازماني
گمت اعاني..من علي الاكبر اخذته..گمت اعاني
لو شحم عيني جبل ذاب وي دمعي الهمل
من تعب عمري بقت .. ذكرياتي
::::::::::::::::::::::::::::::::::::::::::
ذكرى ذكرى لملمتهن وياهن انه احچي وانوح
يمه اشوفك تبتسملي اتقبل اچفوفي وتروح
وابقه اشمنهن اديه عطر من عدهن يفوح
يالغبت عن عيني ردلي هاك اخذ من روحي روح
رد يغايب… گلبي فر ناده بونينه… رد يغايب
للنوايـــب… ظلت الام الحنينه… للنوايب
قهر وآهات وزعل. ظيم وآﻻم وعلل
من تعب عمري بقت .. ذكرياتي
::::::::::::::::::::::::::::::::::::::::
اذكر امن اتصيح يمه عمري يانبع الحنان
وتاخذ امن اتراب رجلي اتگلي اشم عطر الجنان
قلق لو مر بحياتـي حظينچ اتگول الامان
هذا حظن امك يتاني وينك انت بيامكان
ها يغالي… منين اجه طف كربله..ها يغالي
هذا حالي… گلبي آهات امتله… هذا حالي
عقلي يايمه انذهل روحي ساورهه الوجل
من تعب عمري بقت .. ذكرياتي
::::::::::::::::::::::::::::::::::::::::::
منين اجتني كربلائك عليك مكتوبة الطفوف
ياشبه طه بجماله ياگــــــمر لاحك خسوف
راح ارد لذكرياتي بحظرة ارسومك اطوف
سيرت ليك المشـــاعر دير بالك عالضيوف
دمع عيني… حفّر الخد والوجن ..دمع عيني
من ونيني… هم شفت ثكلى تون ..من ونيني
شراح اگله لو سأل باقي ينتظرك أمل
من تعب عمري بقت .. ذكرياتي
:::::::::::::::::::::::::::::::::::::::::
يبني من جابوك ليه حيلي يايمه انهدم
ردت اشبگنك منعي بيك نابت چم سهم
مو جرح واحد واشـده گلي اخفف ياألم
طبره اشوفنهه اعله طبره گلبي نصين انجسم
ها ياﻻكبر… صعب يايمه التجافي… ها ياﻻكبر
بلكي تگدر ..تحچي وي امك يغافي...بلكي تگدر
ارجع وداوي العلل شوف گلبي شگد حمل
من تعب عمري بقت .. ذكرياتي
::::::::::::::::::::::::::::::::::::::::::

شاعر اهل البيت سيد فليح الموسوي

للتواصل على هذا المعرف
https://www.tg-me.com/F_H_MO

https://www.tg-me.com/AbuhassanAlmusawi2007

قصيدة زنجيل دگه وحدة للامام المهدي عليه السلام…

ياحبيبي يا حسين ..نور عيني ياحسين
""""""""""""""""""
كلنه يالمهدي طلعنه بموكب وننعه الحسين
نواسي قائمنه ونگله انصارك احنه انت وين
ندري بالخدمة عقيدة وهيه درب الثائرين
نظرة من عندك علينه غيرك شعدنه يقين
ياحبيبي يا حسين ..نور عيني ياحسين
""""""""""""""""""
هذي انصارك يمهدي عرفت الخدمة انتماء
هيبة الخادم خدمته وفخره لحسين الولاء
ندري بيك ويانه ندري تستمع منه النداء
وندري بالزهرة الزچيه تحضر ويانه العزاء
ياحبيبي يا حسين ..نور عيني ياحسين
""""""""""""""""""
كلنه للخدمة فزعنه وبعزم يبن الحسن
والذنوب هواي عدنه لجل كلهن ينمحن
غير اعماله وخدمته شياخذ المات وچفن
باچر يحصل اليريدة هناك يلگاه الثمن
ياحبيبي يا حسين ..نور عيني ياحسين
""""""""""""""""""
شيب وي شبان هبت كلهه متوشحه بسواد
تشهد النه انريد منك باچر بيوم الميعاد
احنه ماعدنه وسيله غير هالخدمة ومراد
وندري باچر يفزع النه حسين يم رب العباد
ياحبيبي يا حسين ..نور عيني ياحسين
""""""""""""""""""
منزلة عدهم چبيرة ندري باچر هالخدم
بخدمة احسين اليقصر مايحصل بس ندم
واحنه يالمهدي رفعنه رايه للخدمة وعلم
حب ابو اليمه بدمانه نقسم بأعظم قسم
ياحبيبي يا حسين ..نور عيني ياحسين
""""""""""""""""""

الشاعر سيد فليح الموسوي
https://www.tg-me.com/AbuhassanAlmusawi2007

قصيدة شور لام البنين عليها السلام… لسان حالها تواسي زينب

ياأيه وحجاب الســتر
اقماري فدوة للخدر
وياچ كــــون بكربله
بمتوني ضربات الشمر
""""""""""""""""""
زينب تگـــلهه فدوتچ
اولادي يمه الاربعه
واسيني بيهه مصيبتي
حسين ومصابه ومصرعه
گلبي اعله ابو اليمه نزف
وفراگه ابد مايجرعه
وياچ ياريت احضرت
بلــيل الوداع انودعه

واتعذر انه بحـضرته
ودموعي اطشهه بخيمته
ولو عــندي ميه من الولد
كلــــــهم افدّيــــهم نـذز
""""""""""""""""""
گالولي يا زينب صدگ
عبدالله مذبوح بسهم
عطشان من دمه ارتوه
وگطّع اكماطه من الألم
وشگال گلبه والده
حيله يگـــــلولي انهدم
لو يمه اواسي محنته
وچفوفي هم اترسهه دم

مخلوق للشم مو نبل
نحرك يعبد الله الطفل
مطلوب بيش وينچتل
وگلب ابو اليمه يستعر
""""""""""""""""""
گوليلي يا زينب بعد
گلب ابو اليمه شجرحه
والليلو عالخد من دمع
يبلل الشيب ابمستحه
نجوم الهواشم من هوت
شوصوهه خيل الجامحه
خلينه نتگابل سوه
نبچي ونشد النايحه

كل هذا عينه شافته
حسين شبقت من چبدته
على انصاره صد وعيلته
ودمعه عليهم ينهمر
""""""""""""""""""
عوفي الولِد يم الخدر
اعله احسين خل نبچي سوه
واحچيلي يبنيتي القصص
اشصار وجراله بنينوى
انا ادري نـــبلة حرمله
لا الهه طــــب ولا دوه
لمن سحبهه من الگفه
گليبه على السن التوه

وگالولي بي گبل الذبح
الف وتسعمية جرح
من جسمه سالم مايصح
بس خنصر وهم منبتر
""""""""""""""""""
وهسه يزينب سولفي
من طاح الحسين شجره
ياهو ال على صدره صعد
بركَبّه داس الخاصره
هذا الشمر عنده حقد
وبسيفه گاصد منحره
يشفي غليله من الولي
بثــــنعش طبره طبّره

صاح وتجوهر معدنه
ذباح ابو اليمه انه
من الطاغية ايريد الثنه
يتباهى ويريد الشكر
""""""""""""""""""

الشاعر سيد فليح الموسوي
https://www.tg-me.com/AbuhassanAlmusawi2007

افلح من صل على محمد وال محمد

اللهم صل ع محمد وال محمد

قصيدة موشح نجفي لمسلم بن عقيل وطوعه عليهما السلام…

قصة بالكوفه اصبحت مشهوره
طوعه وي مسلم تظل اسـطوره
""""""""""""""""""
طوعه وي مسلم مثال ال كل وفي
بـــيهــم الزهره تبـــاهي وتـــحتفي
واضح الحــب لبو اليمه ومو خفي
والولاء ال عدهم اجمل صوره
""""""""""""""""""
الولاء ال عـــــدهم بكامل يقين
وعبره تحمل بالوفه جوهر ثمين
ثوره للاجيال منــهجهه الحسين
البيهم الامة اقتدت منصوره
""""""""""""""""""
طوعه للنـسوان صارت مفخره
خلـــــد التــاريخ موقفهه انبره
من مثـــلهه قــل ولا شفنه مره
تنحچي صارت قصص مأثوره
""""""""""""""""""
تنحــچي بكل جيــــل قصتهم سوه
وفه واخلاص وشــــجاعه المحتوى
طوعه عدهه احسين اعز من الهوى
ومــسلم التـــاريخ يــذكر دوره
""""""""""""""""""
بصرخة الحق طوعه صاحت بالشدد
گوم يا مســــلم يـــــــــنادي المعتقد
الـــيوم يومــــــك وانت وفاي العهد
كل محب لازم يگوم بدوره
""""""""""""""""""
صاح ابو طــــاهر يطوعه ادللي
هاشمي وعزمي عزم عمي علي
هذا يومي والـــحرب تشهد الي
اله اخليهه الجثث منثوره
""""""""""""""""""
فارس وجــــيدوم مسلم بالحرب
ناوي اعليهه الـــــــشهادة بهالدرب
گال لجل احسين اركب كل صعب
ومن على قصر الامارة ايزوره
""""""""""""""""""




الشاعر سيد فليح الموسوي
https://www.tg-me.com/AbuhassanAlmusawi2007

قصيدة للانصار والحشد المقدس رئيسية او نزلة …

حيا الله انصار الوفه مــنهم تأسس
انصار لحسين بأسم حـــشدٌ مقدس
عقل العدا احتار من عشگ الانصار
من عشگ الانصار عقل العدا احتار
""""""""""""""""""
حيا الله انصار الوفه أنصار ابو اليمه
حگ بعشگهم يفتخر ويسولف الزلمه
سبعين بس لو سلفو تسمع فرد چلمه
يحسين الك فدوه العمر گالوهه وبهمه

طشو عشگهم بالارض من عنده خضر
بكل قطره من دمهم نبت مو ميه اكثر
هاك اسمع اخبار من عشگ الانصار
من عشگ الانصار عقل العدا احتار

""""""""""""""""""
حيا الله ابن ظاهر برز بيده حــمل رايه
راية النصره الرفرفت رسمت عشگ ايــه
من طاح دمه اعله الارض كـثرت الوفايه
امثاله كثرو بالحشد ثاري العــشگ دايه

من يوم طفهه كربلا دمهم تحشد
بالفتوه اشــرق كالبدر نور وتوقد
شـــــع النه انوار من عشگ الانصار
من عشگ الانصار عقل العدا احتار
""""""""""""""""""
من حب زهير وموقفه والشاكري عابس
طلعت شباب من الحشد بالمرجله اتنافس
والطف اثاري مدرسه بيهه المحب دارس
من واهس الحر والعزم كلهه خذت واهس

نور الطفوف بهالوكت عل الأمة ازهر
چم جون عدنه چم وهب عاد وتكرر
شگد يحمل اسرار من عشگ الانصار
من عشگ الانصار عقل العدا احتار
""""""""""""""""""
من عشگه مسلم والوفه من عشگه ابن كاهل
الحباب والحارث اجو لحسين يستاهل
عدهم الغيرة مأصلة اﻻستاذ ابو فاضل
منهم افواج اتخرجت وينه الذي ينازل

أروع ملاحم سطرو أروع بطولات
هيهات گــــالو ننحني للذلة هيهات
هم نفس الادوار من عشگ الانصار
من عشگ الانصار عقل العدا احتار
""""""""""""""""""
اصحاب ابو اليمه درع صاروله بالحومه
بوكت الصلاة من قررو يرمو نبل گومه
وبصدره هم جندي الحشد صايرله مرسومه
اتلگه الرصاص ابمنحره وهم شگهن اهدومه

ام وهب ودت الولد گوم ابني قاتل
وام الشهيد اتلگـــته ابزفه وهلاهل
نفس الزمن دار من عشگ الانصار
من عشگ الانصار عقل العدا احتا
""""""""""""""""""
""""""""""""""""""




الشاعر سيد فليح الموسوي
https://www.tg-me.com/AbuhassanAlmusawi2007

يالزجية ،، ضيفي لأحزانج حزن
يالزجية ،، هلي دمعج عالوجن


😭😭😭😭😭😭😭


الشاعر سيد فليح الموسوي
صوت خادمكم أبو منتظر الإمارة

ذكرياتي 💔💔💔

✍️ سيد فليح الموسوي
🎙️ قيصر ابو منتظر الإمارة

نزلة تقرأ في كل ايام محرم

نعمة الله نعمة الله
مجلس احسين وحضوره نعمة الله
""""""""""""""""""
مجلس احسين وحضوره نعمة من رب السمه
الباري خصنه الشيعه بيهه وهاي اعظم مكرمه
جائزه اليحضر يحصل ربنه بيده ايسلمه
وينكتب اسمه بسجلهه ام المصيبه فاطمه
نعمة الله نعمة الله
الفايز بحب الزچيه نعمة الله
""""""""""""""""""
نعمة الله هالمجالس مايــعادلهه ثمن
والحضر كلهن ذنوبه يعتبرهن انمحن
المجلس ايحضره محمد والزچيه ام الحسن
وحيدره حاضر يشيعي يحسب ادموع الجرن
نعمة الله نعمة الله
اليبچي لحسين ومصابه نعمة الله
""""""""""""""""""
بينه واعدهه الزچيه المصطفى وگال الرسول
شيعه باچر يخلق الله وياچ تبچي يالبتول
لجل هذا احنه اجتمعنه ونرجو من الله القبول
ونرتجي منه الشفاعه حسين ابن فحل الفحول
نعمة الله نعمة الله
حسين باچر يشفع النه نعمة الله
""""""""""""""""""
مدرسه هاي المجالس بيهه انواع العلم
منهه نتعلم عقيدة وبيهه نتعلم حلم
منهه يتخرج حسيني الدارس ونعم الاسم
حسين وقعله بكتابه وعلي يختم الختم
نعمة الله نعمة الله
الخادم اكتابه بيمينه نعمة الله
""""""""""""""""""
باب للحاجات صارت بيهه حل كل معضله
حسين باب الله الوسيعه ومجلسه هو الصله
هلهه بالمجلس دموعك واطلب انت المسأله
ابشر ايگلك امامك هالطلب يا مسهله
نعمة الله نعمة الله
شتطلب اتحصل مرادك نعمة الله
""""""""""""""""""

الشاعر سيد فليح الموسوي
https://www.tg-me.com/AbuhassanAlmusawi2007