مطبور راس الدين ويلاه
سافر علي بدمه إلى الله

سافر وخله الفقره للنوح
وعاف الحسن ينشاف مجروح
وحسين من الفرگه مذبوح
وزينب شلون شلون تنساه


هذ المبچي الزلم بالسيف
محد نظرله حتى بالطيف
مفتوح رأسه ألف يا حيف
ماينحمل يا ناس فرگاه



مقتول طاح الشخصه ما مال
وفرحت بقتله أشباه الرجال
الشال خيبر وسفه ينشال
بتابوت ..والدمعات وياه




انهدمت أركان الهدى اليوم
والدنيا لبست ثوب الهموم
معدوم صار الفرح معدوم
راح اويا حيدر وين نلگاه




اليوم ابو اتراب ايدفنه التراب
وللسمه يعله اصياح الاحباب
رمضان هذا يا حزن جاب ؟
يا جرح قاسي بينا خلاه


يا ناس حيدر علي من مات
اتيتمت حتى السماوات
والحزن عم كل المجرات
الما لا يرى هم گام ينعاه




الشاعر عبدالله الشويلي

ربي اخرجني
شاهرا سيفي
من القبور

مئتزر چفني
والطم وابچي
من القبور

اطلع وصدري
للطم ضامي
من القبور

اطلع او انظر للمهدي بالبكاء
واول احجايه احجيها كربلاء
الا من ناصر ينشرها بالسماء
ويكتب الضامي ضل عاري بالعراء

اذا مو بالحياة
اخرج أمن الممات
شاهرا بيدي سيف
عازمٌ عالطغاة
.
.
.
.
المهدي لو ناده
قُتِل جدي
بكربلاء

كون اشگ كبري
رافعا جفي
بكربلاء

منِ اللحد انهض
وانكث اغباري
بكربلاء

عن يمنتي انظر ويساري والأمام
بلكت الزهره واتعرف عالإمام
شاهرا قلبي واتفگد بالوجوه
مو فقط سيفي وادموعي والغرام

درع گدامه صير
خادماً لا نصير
حقق امنيتي هاي
ربي انت القدير
.
.
.
.



الا يا أهل
عالم الدنيا
والسماء

سحقوا جدي
عَطشُوا جدي
والسماء

سُبيّت زينب
سُلِبت زينب
والسماء

مُتكئ جسمه اعله الكعبه بالدموع
دم على اخدوده من عيونه اعله الضلوع
ربي اسالنك بالهيمه والخيام
كون انه حاضر ياربي بالطلوع

وياه بدمعي اليسيل
رتبتي اول ذليل
عادي امسح سيوف
سَهِل المستحيل
.
.
.
.
قائم المهدي
وافترض اني
بلا قيام

ومروا اجنوده
وبالگبر جسمي
بلا قيام

عالم الجنه
ما يلم حزني
بلا قيام

ولو عدل انه اخرجني من الظلام
من ظلم نفسي واعمالي واللئام
قاتلا نفسي الاماره بالذنوب
ربي ساعدني وادرجني ويالامام

ساترا للعيوب
قاتلا للذنوب
نَعْم ربٍ روؤف
يا مطهرِ القلوب
.
.
.
.
إنما الحزنُ
خيمة العاشگ
للطفوف

المحترگ گلبه
تأخذه اجدامه
للطفوف

الما حضر مجلس
ما يشم ريحه
للطفوف

الجفه وي الطف ما يصلح ضل قريب
البعد دم دربك ضل عايش عالنحبيب
عينك اجبرها وبچيها عالامام
ويه محبوبك لتخلي اي حبيب

دمعك لكربلاء
دنيتك هالعزاء
والجرح لو صغير
ينفطم عالبكاء


الشاعر عبدالله الشويلي

#شور_السيدة_زينب

يا راحلين المن تخلوني
من البواچي خلصت عيوني
امنين اجيب الحيل للهزله
ومنين اجيبن حيل لمتوني

ابنادم ابگلبه تطش عازه
لو شاف خيل ادوس بعزازه
معقوله هاي الدنيا تنصفني
وخلت حسين بكربله اجنازه ؟


تهم روحي وحدها والخيل شيردها لو هجمت اعليه
لوعه تجر لوعه وازنود مگطوعه ومن امشي محنيه
مثل الخيم روحي وجت على اجروحي والدم وگف بيه
.
.
.
.
محروگ گلبي وروحي ملچومه
حسين منه انوخذت اهدومه
والگص اصبعه جابلي الهزله
وجه العرش ما ضلت ارسومه

أتلفت وبلكت يهد واحد
من الگه بالهيمه طفل شارد
الما شال عينه بوكت محضركم
يا خوتي صار اعله الضعن قائد


وازتني خياله واسهام جتاله من حشمت هاشم
ارماد بعيوني وصاروا يشوفوني بنص الكربله الوادم
يا اهلي هاي اني چم شمر بچاني بسوطه اجه الظالم
.
.
.
.
جا گلبي شيطيبهن جروحه
وحسين كلسا شعوطو روحه
اعمامته من الطعن فلوها
وارسوم صدره بخيل ممسوحه


الله الاحد وشبقى بيه
كلسا تطيح گبالي مچويه
تحترگ روحي وتشتعل بيه
علويه من تبچي اعله علويه


التل كسر ضهري راح ومشه خدري والنار لاحتني
بالامس علويه وهسه أنه مسبيه والناس لچمتني
فوگ الرمح گلبي كله هزل دربي وكلسا حبل عتني
.
.
.
.

بنص الشماته النوگ مشوها
وارماحكم بالسوگ هزوها
حتى العشائر من اجت لينا
نسوانهم من السبي أخذوها

اتلفت ومحد اجه علينا
والجاي والرايح يسب بينا
گمت ادعي عن لا تگعد الناگه
وسوط الشمر يرجع يوازينا


كل الضعن يعرج كل خطوه والله ارتج والناس مرتاحه
شوف العده شكد لح گلبي شكثر صيّح ما سمعوا اصياحه
شكد كبر نوحي وتألمت روحي عاشت عالانياحه
.
.
.
.
مكروده روحي والله مكروده
أيامها الگضتها بس سوده
شلعان گلبي من الصغر لسه
بحبل المصايب ليش مگيوده


الماتو اهله ينوخذ حگه
اليسبونه غربه يموت بالحرگه
حيهم الصاح ومحد يسمعه
بحافر الفرگه دنيته اتسحگه


واليرفع اجفوفه وما واحد ايشوفه من أهله واخوانه
لا يمسح ادموعه خي حضر اضلوعه للباب واحزانه
الروحه موجوعه لا يشعل اشموعه من تبهت ألوانه


الشاعر عبدالله الشويلي

جار رفع منهاج شهر محرم الحرام 👇

نسالكم الدعاء

اول كلمه اگولنها على الساني... حسين حسين
واول خطوه ابوي بدربه مشاني.... حسين حسين
حبيبي ومن عشگته هوايه علاني..... حسين حسين



يا محلى انتقائي..... لحسين انتمائي.... دمي كربلائي..... يعني اني نذر
بعين الحب نظرته..... ورتبني لحسرته.... الضيعني بحضرته... يلگاني شذر

عشگ ضاهر  على عيوني  مثل دمع الحزن
كتبت اسمه  على گلبي    لذا گلبي يون
بخت ساده  الگلب راده   بين اهلي واحن

منجم للمحبه واللطف اسمه... حسين حسين
دمعتي وبسمتي اخذها من رسمه..... حسين حسين
احبه وعالمه ضحكني بچاني..... حسين حسين
.
.
.
.
رتبني واحبه.... رباني اعله دربه.... بس هو اندبه...غيره ما ردت
شمعه بظلمه شفته.... بگلبي وعقلي عشته...للضايع وجدته.... اعليه اتعودت


جوارح روحي قَوااها على خدمت هَلَه
يسألوني شنو دينك واگلهم كربله
العمر يگضي فقط خدمه العمر فدوه اله

انه العبد الحسيني العاشگ اونيني.... حسين حسين
تسوه الدنيا عندي دمعه من عيني... حسين حسين
الشَغل بالي وحياتي حاشا ينساني..... حسين حسين
.
.
.
.
من اقصى المتاهه...... جيته بلا نفاهه..... وللزهره وسماهه... طشاني دمع
بُعده ما اطيقه.... بس هو حقيقه..... ما اترك طريقه....  أنزل، ارتفع

حريتي بسجن حبه تصدر بالگلُب
على كلمن بغض حبي اعلنت انه الحرُب
سواد اعيوني كون ابچي مع دمعي اليصُب

ما انامن اذا مو صورته گبالي.... حسين حسين
على بابه البخيت امعلگ آمالي..... حسين حسين
غيره بهل الأرض لا ما الي ثاني..... حسين حسين
.
.
.
.
واهس عمري هوه ....جرحي بذكره يقوه .....غالي ودونه شسوه ....عبده من الصغر

بذني عيوني شلته .....وبلهفه عشگته .....حسين اسمه وكتبته....بگلبي المنكسر

اول خطوه الي بعمري مشيت الكربله
واخر شهگه الي بعمري بثواب القافله
أنه الما عايش ايامي كتلني حرمله

بثواب الخيمه روحي والله محترگه ....حسين حسين
مثل رِيت العليله ريتي مختنگه .....حسين حسين
مثل جون بخدمته رتب الواني ....حسين حسين
.
.
.
.
والزهره الزجيه....ناذر كلشي بيه ....للضل دون أخيه ... للهم والعطش
الدنيا بدونه صحره ...كل لحظه اشكره ......وبدموعي انصره .. .ضل إبلا نعش

بثوابه عيوني اوزعها واضل بلا نظر
عيونه التعبت وذبلت تحط بيه قهر
لان حبيبت ابو سكينه عصرت الحب سهر


الشمس شرقت عَليه بفضله واحسانه ....حسين حسين
چنت انه وصرت بالخدمه هذا آنه .....حسين حسين
ألف شكرا اله محبوبي سواني .....حسين حسين






الشاعر عبدالله الشويلي

#استقبال_محرم

على استعداد   حواسي الخمسه ودمعات العين
على استعداد   محرم جاي وارد ابچي حسين

بالخِدمه محزم الگلب
مقَدِس كل دمعي اليصب


وقف للخِدامه ونذر عافيتي   حسين
الهوى المو حسيني نشاز بريتي  حسين
حرز رسمه ضاوي اعله حايط بيتي حسين
خِدَمته بدرايه وعلم وبنِيتي  حسين

اجه شهر الدمعات...... وانه محضر الرايات.... حسيناه
وسواد الثوب ايلوگ.... الي وگلبي محروگ.... حسيناه
البچه دمعه بعاشور..... انكتب اسمه وماجور.. حسيناه

مثل كل عام..... احضر روحي ورايات الشوگ
مثل كل عام..... اواسي الزهره بگلبي المحروگ

للضل نايم عالترب
مقَدِس كل دمعي اليصب
.
.
.
.
الكِنس بابه يعله ويحصل رِفعه  حسين
وقصر عد نبينا تصير الدمعه  حسين
الحِرس على القضيه تحرسه البضعه  حسين
اليون اعله ابنها انينه تسمعه  حسين


وحگ ضلع الزهراء..... حسيناً ما ننساه... حسيناه
اله بكلشي تذكار..... نحبه ازغار اكبار.... حسيناه
بخت يقبلني كون... عبد عد الميمون..... حسيناه

احبه اهواي.....شخص سواني من الخِدمه انسان
احبه اهواي..... صرت تذكار وچنت النسيان

وهي الخدمه اجمل حرب
مقَدِس كل دمعي اليصب
.
.
.
.

 امد جفي سائل واگله انطيني حسين
اريداً مدامع تكفي لعيني   حسين
  اسير واجيتك حزن غذيني حسين
  الى الخيمه اخذني دمع بَديني حسين


لَوَن مرني ذكراه..... حواسي تصيح الله..........حسيناه
أنه العبد المجنون..... واحب ذوله اليبچون.... حسيناه
صبي چنت ومجروح... ورضعت الحب والنوح.. حسيناه

سلامُ الله.... على كل مجلس لحسين يصير
سلام الله.... على اللطامه وأهل التطبير

من دونه مضيع الدرب
مقَدِس كل دمعي اليصب
.
.
.
.

وره العَشره ابدي احضر الرايه    حسين
وتحل الزياره واجي مشايه  حسين
واذبها بحرگتي عالمسانيه  حسين
بمنامي وصحوتي اسوي اقرايه  حسين


البدايه بسم الله..... المدد من الزهراه.... حسيناه
هديه هالخطوات..... الى راعي الثارات..... حسيناه
بكائي وي اليمشون..... اواسي الحره ام عون..... حسيناه


الدرب محلاه..... يخلصِ بسرعه رغم الايام
الدرب محلاه.... مصادر قوتي مابي آلااام

ما شايف شي بي صعب
مقَدِس كل دمعي اليصب
.
.
.
.
احلفه برضيعه يزيد أحزاني حسين
شغل حيزي كله وملك وجداني حسين
امير اعله گلبي وعلى ايماني حسين
اشكره لانه عليه بجاني حسين


أخذ بيدي المذبوح ....دوه جروحي المجروح ....حسيناه
شهيد الحب حسين ....احصل مثله وين.....حسيناه
حبيبي وفوگ الرأس ....احبه بكد عباس .....حسيناه


ذبيح الله .....اشكره اهوايه خلاني انعاه
ذبيح الله...وحق اضلوع أمه ما أنساه

بعاشوره الگه القرب
مقدس كل دمعي اليصب



الشاعر عبدالله الشويلي

#استقبال_محرم_او_ليلة_الخدمة_او_المشاية

يا ابو علي الله اليشهد
ارگاب الزلم  يمك تنمد

خطينا بدمنا احجايه
لو نلطم لو مشايه


العمر  نذر  بس للخدمه
انعرف  ترا  بدمعه الزلمه
الجرح  الك وانت تلچمه
بخيمه وماي

يبو  علي ومامش رجعه
العمر. وقف بس للدمعه
لَوَن  سمش  كل الوسعه
انت افياي

اتخدمك ارض وسمه  وفاطمه  محَزِمه  هالخدم
دمك رسم ملحمه   قائمه   بالضمه  وكلها دم

دمك ذبح  سيف الظالم
حگها تجن  بيك الوادم

للدنيا نوضح هايه
لو نلطم لو مشايه
.
.
.
.
وهب  طلب  رزقه من الله
ونزلت  اله  يبو عبد الله
وعلى الخيم  عباس صله
بحب وشوك

الخَدَم طلب عدها  الدمعه
لكي  تجي و ترضه البضعه
اضافه  الى  هاي الجَمعه
بدم محروگ


مجلسك خيمت شرف  وانعرف  وانوصف  بالستر
اسمك محطت عشگ  للصدگ  نحترگ   من يمر

خنگه الهوى  بدون عيونك
صرنا زلم  من ماعونك

سجلنا ويالوفايه
لو نلطم لو مشايه

.
.
.
.
الگلب  نِبض  دگ دمامه
اكو علم  مثل القامه
انرفع  يرف  بيد ازلامه
وياك وياك

سمه  الخَدم  حاء احروفك
الهوى  اختنك  يم اجفوفك
لذا  بقى   لسه يطوفك
وضل بحماك

فيّ عرب رسمك نزل  كله امل  ما رحل  من كسر
انت اجمل من النهر  والقمر   يابحر   بالقدَر

ديرت وفه  ابين عيونك
أحسبنا خدم  عد ميمونك

صح احنا وياك اهوايه
لو نلطم لو مشايه
.
.
.
.
المشي  اجه  وكلها تناصر
فَزِعنه  اله   فزعَت  عاشر
بخت  دوه  اتراب الزاير
نقدسه اهواي

التعب   حلو  وبي روحيه
يرد   فرد  نحضر ميه
يبو  علي   وروح ارقيه
الكل  مشاي

من كل مدينه نهب   يا عذب  لليحب   مو تعب
راحتنا نتعب الك  والهلك   نوصلك  يالذهب

تعب المشي   كلش يحله
خير وهلا  طول الرحله

ما توگع منا الرايه
لو نلطم لو مشايه

.
.
.
.
اجت  زلم  مثل العابس
عزم  همم  غيره  اتنافس
انطوه  الدرب  كله بواهس
هالخدام


واجت  نِسه  تواسي ضعونك
  البشر فده  لذيج عيونك
ولا  فرغ  ضل ماعونك
من العام

تارسنا زاد وهلا    لكربله   مدلله  هالخدم
بثوبك تغطي البرَد  بالشدد  يا احد  بالهمم

قوتنا من  جف الكافل
دمعه وعلم كلمن شايل

يالغالي وانت الغايه
لو نلطم لو مشايه










الشاعر عبدالله الشويلي

(ليلة العاشر /او الحادي العشر)
لسان حال الزهراء لولدها الحسين

شعدها الخيل وياك
داسن حتى الواك

يا يمه شعدهن ويجسمك
اطشرك وترد اتلمك



ركضن فوگك ركضت خايف ماهمهن گلبي
شالن منك مدري اشالن وراسك ضل مسبي
صحت  اعليهن بِعدن عنه لطشرن تعبي

صحت بقُوتي وما سمعني
وانت اتاشر وخرن عني
بالممشه يِرِجَن كاع الله
ليش بدم وجهك متنحي


تروح وترجع بيك
والشوك ايأذيك

بكل كاع الطف نثرن دمك
اطشرك واترد اتلمك
.
.
.
.
اوگع فوك الصحره التچوي كلما تمشي الخيل
ويوگع گلبي بين ضلوعي وگعَت دمعه بليل
محد حَس بيّه وگال امه داسن فوگك حيل

بثواب الله توزع جسمك
من شعرك يايمه لجدمك
بچفي جِبت الماي البارد
اشرب يالشالع گلب امك


عطشان الدلال
واشرب محد كال

ليش الوادم نهبت هِدمك
اطشرك وترد اتلمك
.
.
.
.
آثار الحافر بالوائك مو بس جسمك ذاك
كل ما تتوجع من عنده اتوجع وياك
منْ گد ما داس عله ضلوعك وي كاعك ساواك

ومن الدوس اتخرب لونك
ما جِبتك حتى يطشرونك
شيضل بگلبي يالغالي
وبگلبك حيل ايدوسونك


احجي بدمع العين
والكم هذا حسين

البطف والطف ايلجمك
اطشرك وترد تلمك
.
.
.
.
أصْطفن عشره بصف عشره وسَدَن وجه الگاع
أطشر عطرك من جاسنك ياعود النعناع
ومو بهداي الركضه بسرعه سَوَن بيك اوداع


للخيمه عشره يودنك
والعشره الإخره يرجعنك
فتحن ميدان اعله ارسومك
وتعبن من گد ما داسنك


طگ ضلعك والصوت
بنص الخيمه يفوت

والوادم من شافت حلمك
اطشرك واترد اتلمك
.
.
.
.
منِ الرملّه تسوي اوساده يا ابن الاحضان
مذبوح وضل يرجف جسمك من ركضت نسوان
والخيل الغارت عالنسوه هم فتحن ميدان

وانسحگت بالهيمه اطفالك
وردت داست فوگ اخيالك
تلم عيالك بنتي الطاحت
لو ياروحي تلم بوصالك


يمه ضلوعك وين
حاجيني يحسين

شبيها الخيل؟ الورده تشمك
اطشرك وترد تلمك


عبدالله الشويلي

#ليلة_ام_البنين_ع

الليله بالطيف  يا حيف  شفت خيل وزلم
دارت على حسين  ميتين  اهله بهل الحلم

                  وبس النساوين
                  محد للحسين

بالحلم سافرت ورحت يم الحسين وبيته
مهموم شفته عالمهر لازم بحرگه الحيته
للخيم من طب و طلع تنگط دمع خاجيته
عطشان واتراب الحرب لا ما يچلب ابريته

ما فكرت غاد  بولاد  فدوه الاربعه
لحسين وام عون مِن كون اطيح امگطعه


             من فدوه لبنين
              محد للحسين
            
.
.
.
.
بحرگه يقاتل بالزلم يطلب بثار إخوانه
كل ما يشد المعركه ما يثبت ابميدانه
يترك الساحه ومن بُعِد يتباوع النسوانه
وصلت الحاله أمنِ التعب مابي يحرك السانه

يفرك بالايدين   ميتين  اهله وصحبته
شما  صد للخيام واحتام   تِبيِّض لحيته

                  كسره اهله ميتين
.                  محد للحسين
.
.
.
التمت اعليه الخلگ شفته ينازع وحده
يا ناس بثناء الحرب وطاحت احجاره بخده
بس رفع وجه للسمه صاب المثلث جبده
وليه انوله بطف كربله  ومحد يجي ويسنده

فوگ المهر نام  وازلام  ترميه بحجر
ضل يضعف الصوت ويموت بحسين النظر

              كال الگمر وين
              محد للحسين
.
.
.
.
خضب بحرگه لحيته يا ناس من دم گلبه
طايح يدور اعله الخيم وكل اليفوت ايضربه
ومن خَرَب اجبينه الحجر اتمدد وتيهه دربه
ماكو مجال ايشم هوى ملتمه كلها بگربه

ايدور الهوى ادوار  چن نار  بعروگ الگلب
مابي يشيل ايد  ويريد  يندل الدرب

                وسفه على الزين
               محد للحسين


.
.
.
.
فجأه واجت حرمه أتعدي صعدت على التل گوه
صاحت يخوي الحگ الي وصار الاخو يتلوه
كام وعلى اسهامه وكع مو سهل صوت الخوه
الما يرمي برماحه عدل بجسم الحسين اتقوه


يجَر النَفس حيل   والخيل  اجت تركض اله
يحاول ولا گام  بسهام  يرميه حرمله
 
             ضل شابح العين
               محد للحسين
.
.
.
.
باوعِت زينب حايره عين اله وعين البيته
ودرت الوجه لحسين انه وجوه الخيول الگيته
من راحن اتقدم شمر گضه وعلي من الحيته
اتربع بصدره وحَضرِتي درت الوجه خليته

فجأه وشفت راس  ياناس مرفوع برمح
ما ركزت بيه  ادريه  حسين المنذبح

        ضل ينزف الدين
         محد للحسين

الشاعر عبدالله الشويلي

#ليلة_القاسم_ع
طلع شباب أمن الخيم وجهه مثل وجه الحسن
لمن نزل للمعركه الخيل بزلمها اترادمن

العرب كالت قديما ( أن من جد وجد)
(وزلم مو من زلم طلعت) (ولا شجاعه اويه العدد)
وكسرت القاعدة هاشم وكل اسد خلف اسد
والشجاعه عدها ثبتت والحرب طعم الشهد

وهذا الشي اثبت صاير
و اتوضح يوم العاشر
من هد جاسم بلثامه

عَصرَت رمله لهدومه
انعصرت بجفوفه الحومه
ماكو اليوگف كدامه

فحطت الخيل اويه الزلم وركضن لحد ما فرفحن
وجسام كل ما يلتفت الخيل بزلمها اترادمن
.
.
.
.
كل طفل كاروك عنده هذا موجود الطبع
عكس كل الناس رمله جانت اتنومه بدرع
وحجلته مهره زغيره وجفه ماخذ عالقلع
الضوء عنده السيف الأبيض يبچي من طاري الشمع

ابن الما خاسر سيفه
الينطي عيونه لضيفه
دگ صدره لعمه وگله

ما دورت اعله الراحه
اسمحلي اطبگ هالساحه
واسحل هالعسكر كله

شاف الحسن چبده انمرد بعيون الحسين البچن
ومن وافق العم عالحرب الخيل بزلمها اترادمن
.
.
.
.
الجاذبيه كلها تختل على المهره لو صعد
وجهه أبوه..صوته محمد يا جماله الماله حد
ما اجه بهل الدنيا واحد شما تعب يحلى بعد
ويشبه العباس لكن اليچهبه ما شرد

وطبها الاحلى امنِ الكوثر
وصفنت لرسومه العسكر
مِن الجندي للقائد

يذب سيفه الشاف عيونه
وييحير برسمه ولونه
ما نلگه بحربه الشارد

والما يصلي اعله النبي اعيونه يا ناس انعمن
شما طار شعره ويه الهوى الخيل بزلمها اترادمن
.
.
.
.
صاح أنه نجل ابو محمد بكيفي أخذ عالحرب
الحومه بيها اربع محاور والا من كلهن اطب
الساحه ورقه انتو كتابه وسيفي يشطبكم شطب
احنا گطاعت مناحر ماگطعنا أبدًا درب


طبها ودماها العسكر
وصار الشط بس لون احمر
يشمر خيل وخياله

زفه العركه ويا كيفه
طش روس الوادم سيفه
زلمه ومحد يدناله
الما تكدر اعليها الزلم يكدر عليها بكل زمن
من يگطع بروس الزلم الخيل بزلمها اترادمن

.
.
.
.
لان دگ صدره لعمه ما لبس جاسم درع
الشسْعِ البرجله يوادم اغلى من ذاك الجمع
انه ما شايف مقاتل مُتْرِب أوجه يشع
اليريده يصير حتما واليعارض ينقلع

مهره الطف وخَيّلها
وضل يهدها ويسحلها
رجفهم مثل السعفه

حسين انطه الضوء الاخضر
وضهر الميدان اتكسر
گلبه امجمر ما يطفه

ما يكتل القائد ابد الا الشوارب ينمحن
ومن فرض رايه اعله الزلم الخيل بزلمها اترادمن

الشاعر عبدالله الشويلي