#شهادة_السيدة_زينب

يا غربتي ......ميته والوادم تضم الماي عني
يا غربتي .....خشبت التابوت چن سوط اعله متني

جزاني موتي
واريد اخوتي
شِوصله صوتي


انه ذيج الخَجِلت حتى الحزن
الخذاها الكافل وردها الهزل

جان اليه اخوان يسوون العتب
وهسه ما ضللالي بس دمعي اليهل

اندارت الدنيا وصرت بين الزلم
امشي محنيه ويعت بيه الحبل

اني اول حرمه يكتلها الغياب
والهجر خلاها كل لحضه تسل

مو ثگيله ... صرت اخف من الخيال نوكل حيلي
مو ثكيله .....وين ابو فاضل اليفزعلي ويجيلي


ويجي المسيه
بعلمنا اليه
ويسبل اديه








اني ميته من شفت خيل وزلم
دارت اعله حسين چن دور الرحه

من تربع عالصدر شمر الخنا
ولزم شيبات الولي بلا مستحه

من ركضت بكربله اوادم وراي
وصحت يا ابا الفضل لاچن ما صحه

من طلعت بليل محنيه وأنوود
ابحث اعله حسين وحسين انمحه


اهلي خلصوا.....لو طبر لو سحگ لو عاصرهم الباب
اهلي خلصوا ......ياهو اليشيل الجنازه مامش احباب

كبر حنيني
منو اليجيني
ويسدها عيني
.
.
.
.

بعازت اخواني يجوني بهل المسه
ارد اگلهم ميته والضحكه وراي

حرب ما عندي ولا عندي سلاح
ليش أهل الشام ما ينطوي ماي

صرت عدهم مثل عبدالله الرضيع
اطوها لا تطوها ما ثبتوا براي

انه خطار العرب تكرم الضيف
ليش بس ال لا هله ترست سماي


عدله ميته .....نفس شلعان الگلب والضيم نفسه
عدله ميته .......واسمي مثل حسين ياهو المر يرفسه


گبل اميره
صرت اسيره
ومتت كسيره
.
.
.
.
تفزع أهل الشام للميت فَزِع
ليش بس اجنازتي بلايه متن

لحجر ضل يبچي عليه وما بچو
كلها تضحك ما شفت واحد يون

حتى ام المغتسل عكست وياي
گالوا اسمي گبالها وگالت وأن

الوكت شد وياي حد الغربه هاي
ليش بس اعليه احسنه سجن

وين اخوتي ......حملي مال وأهل هالديرة شماته
وين اخوتي ..... وين ذاك الوسط عينه حط خواته

غريبه اني
ولا اجاني
الوكت سباني
.
.
.
.
خشن تابوتي مثل سوط الشمر
وحگ ذاك الماله تابوت وجفن

اسهام ضحكات العدو جاسني حيل
وطاحن بنعشي مثل نعش الحسن

وفرحت النسوان چن يوم السبي
الضحك نزل دمعهن من اجن

گالن اعليه الغريبه ام الجروح
وكالن الما عدها اخوه ولا وطن

ها يروحي .....والله لو ميته اويه امي اهوايه احسن
ها يروحي......موتي حتى لو غريبه ضاله المن


بقيت اعاني
الحزن جزاني
التعب خذاني



الشاعر عبدالله الشويلي

على زينب وأهل زينب كلبي ناصب فاتحه

رجعت من السبي محنيه وتنوود
لا نظر لا حيل لا چلمت هله

التطب ديوان مشدوده بحبال
من يكلي شلون توصل كربله

كلها كالت يا خلگ مسبيه هاي
ماكو واحد كال هاي امدلله


صاحت العالم اسيره....وهي اميره وبنت اميره...هذا شلعان الگلب
والله لو ميته احسن الها........ولا الوادم تهد كلها ......تضيّگ اعلها الدرب
اللزمت اجفوف ابو فاضل .....حيره مجتوفه بسلاسل ....ودم ايديها يضل يصب

تطلع الخوية شثگلها من كثر ما صايحة
.
.
.
.

الهزله جنها الدنيا كلساعه تميل
مايله الهزله اويه زينب مايله

مو فقط ذيج السياط العلمتون
اتلاثه واثمانين واحد شايله

زينب بگد ما مبچيها الافراگ
هاي ميته اعليها وادم گايله

الجان طوله في خواته......گطعوا اجفوفه الشماته .....گَطعَت الماي العذب
كلها تصرخ عمي وينه .....ونبله سدت شوف عينه ....... وسفه باقي للسلب
ياهو يقبلها اعله زينب .......بالسبي يا ناس تنسب ......نار وبدمها تشب

لو تشوف الرمح يهتز گول زينب طايحة
.
.
.
.
انشالت ادلال الاعزاز من المضيف
وانطفه الموگد وشبت نارها

بعد ضيم السبي والسوگ الثگيل
تختنك زينب بشوف اديارها


يوم نظرت بالدمع لام البنين
چنها خيمه اوجت أمن اكتارها

فاگده ويذبح نعيها .. ووين ابو فاضل حچيها ...
الفاگد يموته النِشد
ضايعه وحرگوا خدرها .. والهزل موش لعمرها .. ومو حبل بيها اليشد
زينب المكفولة صارت .. كافلة وكلش احتارت .. بالكمر تحلم يرد

تمشي تتلفت لخوها تگله اختك رايحة
.
.
.
.
رجعت المكسور تنطي الدمعه لون
حمره دمعتها اليموت احسينها


تل مصغر ظهر ناگتها يصير
ومشرعه وبيها ابو فاضل عينها

دمعه دمعه تموت هي الغربه هيج
وتنحني من السوگ المجتفينها

امچتفه وبحه بحچيها .. والحبل شلع اديها.. و السبي يريد ازلمه
وهيه حرمه من ال هاشم .....ضلها ما شافت الوادم....عالدلال امعلمه
أمن البچي وموت السبايه.. ضاله بس العبايه .. ذبلت بگد فاطمه

مثل ما ماتت الزهرة اتموت زينب شابحة
.
.
.
.
وصلت وبيها شكثر نظرات شام
الوين چنتي اسهام بذن الضايعه

الخوية طلعت منها دمعه وعد غريب
امن الگلب لحسين طلعت نابعه

واليزور اگبور لازم عنده ماي
وچلمه من الماي زينب سامعه

الفاتحة العدها چبيرة .. عدها اخو انلم بحصيره..وعدها چف اعله النهر

وصلت بيوم اربعينه .. تعبت الخوه الحنينة .. تمشي صارلها شهر

شافت الطف التغير .. مگبره وبترابة الاحمر .. ضاله اشلاء ونحر

وريحة ارماد المخيم لسه بالطف فايحة


علي هادي الخزعلي
عبدالله الشويلي

ها يداحي أبوابها:الرادود محمد حسين مطرود:موكب شباب القاسم 1445هـ
https://youtube.com/watch?v=rTEl5C9Kj-Y&si=LGqhztgBLi44iUjC

#شور
#شهادة_السيدة_ع

العازه من تموت وبعيد اعله اخوتك
من تشوف الناس كلها تريد موتك
من يدورولك على مغيسل يغسلك
ومحد يصيح عليك الكل تفوتك

فرفحت روحي شكثر محد وصلها
واسمع اتكول الشماته وين اهلها
يا اهل والاعوجيه فرهدتنا
وصارت كبالي هزيله الدنيا كلها

صاحت الناس
وينه عباس
هاي عازه

اختك ام عون
رايده امتون
للجنازه

.
.
.
.
والله لو ميته ويه اخوتي ولا حجيهم
بالجنازه وأسمع تصفگ ايديهم
ليش ماي الله يضمونه عليه
خلصت ايامي ولا خَلَص سبيهم

كلها كالت حيل بيها ما اجوها
هيه هايه الجان ابو فاضل اخوها
مو بعيده ما يدفنوني بارضهم
عدله ميته اني ذيج المرمروها

كان ما كان
عندي خوان
بيها فزعه

صارو ابعاد
ويه الاولاد
ماكو رجعه



.
.
.
.
نسوة أهل الشام التمن يضحكن
منين اجيب امي وخواتي اعليه يبچن
ام المتون النحيله عليه كالن
مثل ما انه سبيه بموتي بفرحن

جابن احبال السبي وخلنها يمي
بيها دم من جف رقيه وبيها دمي
هو هذا الماله اخوه ماله فزعه
ودفنتي حسره اعله حسره چنها امي


التمن اهواي
بدن الماي
وحيل ضحكن


هلهلن حيل
من أجه الليل
بموتي فرحن



.
.
.
.
هينه ياروحي اكو تابوت اليه
بس اخويه ضل بلا نعش وعزيه
اليطشره الحافر اتلمه حصيره
والتطشره الغربه يطلب اهله جيه

اني مشلوعت گلب من صغري لسه
المثلي يا طف يا هزل يا شام تنسه
والله بس اسايطهم كافي لرحيلي
كالرمح وبراس اخوتي الشام أحسه

الشام جتال
مثل الأحبال
البيها اديه

لسعة الشام
لسعت اخيام
الغاضريه




الشاعر عبدالله الشويلي

#شور #شهادة_السيدة_ع


اني الحبيبه ....وصرت الغريبه


بنص الجنازه واسمع تكول الناس
الميته هاي تصير اخت العباس
بالموت ما مرتاحه جا يمتى ارتاح
اسوالف الشام ثگيله وتشيِّب الراس

تابوتي طب بين الغُرب يالخوان
واتذكرت طبتي بذاك الديوان
كترين متوزعه الخَلگ عالتابوت
ومثل امي ماكو اعليه صايح نسوان



من فزعوا ليه يضحكون اعليه موش شيعوني
ضعفانه هوايه والوادم هايه حيل يسَمعوني
لحگوا يخواني الشام اذاني وناسه يجرحوني
.
.
.
.
كون اليموت ايصير هو الجناز
وشيِّع برَوحه لَوَن ماكو اعزاز
جا شلت روحي حتلو ماكو امتون
بس نعشي هم يبقى لخوتي معتاز

يلْچم امتوني النعش لَمَن ينشال
الما گاله واحد بالسبي هسه انگال
مو عالهزل هسه وسط التابوت
ميته وسمعت الحجي المامر عالبال



يمعدلل العدله ضلت بس هزله ما جابوا ليه
بيه شكد عالو اسمعهم گالو هاي المسبيه
المارحموا جثتك ميرحمون اختك لو مو علويه
.
.
.
.
حَزَت ابنفسي هواي وگفت نسوان
واعليه كالن هاي دخلت ديوان
بتابوت ينشال الغريب البالشام
بس اني تابوتي بقى بلا عوان


ضعفانه، نحلانه صرت چن اخيال
جا ليش نعشي عالارض ما ينشال
شمسويه حتى بموتي يسبيني الشام
وسفه بلسنهم يخوِتي صرت انكال

عطشانه عيوني يالماجيتوني حسره بدلالي
وحْدي وحيرانه لا امي اهنانه لا ابوي الغالي
السجاد امحير بس وَحده شيكدر وادموعه اتلالي
.
.
.
.
بس العليل وياي بعيونه يدير
ما ضل الي لا خاطر ولا تقدير
ضلت بنفسه يموت بالخنگه احذاي
ونفس النعش ينشال ووياي يصير

الغربه توجعني واحس ارض الشام
مو گدري والله وگدِر ذيج الأحلام
جانت بنفسي اندفن وي المذبوح
عاد ابارض كربله اكو اسم اخيام

هيج وكون اني ميته وي اخواني وبنصهم گبري
اتراب من الخيمه ودم اهلي وضيمه يخلون بكتري
بهيده ينزلوني خاف ايلجموني ورايتهم حدري
.
.
.
.
الناس كلمن لونه وانه ابلا لون
اشباقي بيه السوط رايدله امتون
مو ذيج زينب بعد موت العباس
ام المصايب هسه لا مو ام عون

گطعان واهس عيشتي ذيج الخيل
الخلتني اركض لحد ما صار الليل
رجليه فَرَت كربله اذراع اذراع
واسياطهم بمتون أطفالي تشيل

اركض محنيه دم برجليه الطف كله انياحه
عثره تجر عثره مدري شكم مره فريت الساحه
عمري بس لجمه صار اسمي الهضمه ما شفت الراحه

عبدالله الشويلي

#شهادة_السيدة_ع

فتحت عزا أو رئيسية


الدنيا عدها سجن
وافراج اجاها الگبر
اليخلص عمرها تون
ما يسوه عدها العمر

الغربه من اتموت وحدك وماكو يمك اي عرف
وتنتظر جيت اخوتك وروحك عليهم ترف
هاي زينب توها ماتت والنزف نفسه النزف
لا أهل يمها وگرايب ولا علم يمها يرف

وصت اكتبوا بدمع
يا أبا الفضل عالجفن
ميته وبعدها تحن
ما يسوه عدها العمر

.
.
.
.
الدنيا سجن ام عون صارت و الفرج بس اللحِد
امنيتي اسمع مره وحده تجتمع يمها الولد
وأبو فاضل يوصل الها ويكسر بسهمه البعد
والتغسلها امها فاطم والحسن عايش يرد

وحسين اخوها يجي
وما منذبح منحره
لو شافته محتزن
ما سوه عدها العمر
.
.
.
.
اهوايه ماتت هالحنينه ما طلع هذا عمر
موته وكت الركضه صارت وموته من راح الخدُر
وموته من شافت اخوها بالحجر ضل ينشمر
وموته من نظرت رقيه على الرأس وتحتضر

الموته الجبيره لَمَن
طبت لذاك القصر
الماعدها اخ وابن
ما يسوه عدها العمر
.
.
.
.
شتنسه زينب يا مصيبه بحسره گضتها الحياة
كربله وماي وعطاشه كل شريط الذكريات
الحادي عالهزله اخذها الجسم اخوها والفرات
والنسه الوياهه تعبت والله يدري شباچيات

الشافت طفل منذبح
من الأذن للاذن
تبچي دمه بلا إذِن
ما يسوه عدها العمر
.
.
.
.
وداعت الله من يگلها وينحب عليها ويون
حتى هاي الموته تقهر والدفن مو اي دفن
ماكو تشيع وبواچي الشام گللها وأن
بالسبي حبل الچتفها وهسه چاتفها الحزن

يا يمه محد صرخ
ولا دمعه نزلت ترا
وكلمت عدوها وأن
ما يسوه عدها العمر

الشاعر عبدالله الشويلي

#شهادة_الامام_الكاظم_ع


التقن ....سلسلة موسى وحبل ام الخدر
التقن .... بظلمة الطاموره والملگه جمر

اتلاگن الاه والدمع
وانشرح كل الوضع
التقن......التقن


كاظم الغيض آخر رمق گدامه عرضت صورة
اتلاگه الحبل بالسلسله واهتزت الطامورة
بهذا اللقاء كلشي نروى وكلمن حجه عن دوره
من الشام اجه حبل اليسر بس جيّيته مكسوره

كله دم ..... من الجفوف القبلتها ام الحسن
كله دم .... وصل من الشام ما حَده زمن

لونه احمر بس يشع
وانشرح كل الوضع
التقت ....التقت
.
.
.
.
السلسلة تبدي بشرح كل الجره بالعتمه
كالت متن موسى نزف حد ما سبحت بدمه
والسندي شداني لَمَن وَصَل حديدي لعظمه
ومن گال أخ من الوجع شَتِمو جده وامه


لو سجد ..... انْضب أكثر على جسمه والعنق
لو سجد ....على تربه والله احس بي ينشنق

وعلى وجهه يندفع
وانشرح كل الوضع
التقن ......التقن
.
.
.
.
للسلسله يروي الحبل ويگلها شدوا بيه
كل الاطفال البلضعن والنوگ والمسبيه
وبجف رقيه شكد بتت وصفت شكد عليه
گالتلي يا حبل اتعض اني ترا علويه

شكد ترف .....چفها ذاك اللزم خنصر منگطع
شكد ترف ....من نزل منها عَلي ذاك الدمع

بچفها اني منطبع
وانشرح كل الوضع
التقن التقن
.
.
.
.
كال الحبل اصعب جرح حين الجتفت الحره
وجروني وحسين التفت اوگعَت دموعه الحمره
ومحنيه شفت ام الحسن مسكور ضلع الزهره
الله يساعد هالمره للطف اجت منعصره


دورت ..... على ابنها المنذبح واتصيح يمه
دورت ..... وشافت بذيح الحوافر اثر دمه

أيدها فوگ الضلع
وانشرح كل الوضع
التقن .......التقن
.
.
.
.
تذكر الحبل الجامعه وعنق الامام وتعبه
ومن أُمر سهل الساعدي يرفعها عن الرگبه
وحللها ابن سعد وخرج اعله امتونه كل دم گلبه
وگله خُزينا امنِ النظر والناس صارت گربه


يا سهل .....اعطي حامل روسنا بعض الدراهم
يا سهل ....قد خُزينا أمنِ النظر ويانه ساهم

الناس صارت تنجمع
وانشرح كل الوضع
التقن ....التقن


الشاعر عبدالله الشويلي

كلبي ناصب فاتحة - عبد الحسين الزيرجاوي - استشهاد السيدة زينب ع كلمات عبدالله الشويلي وعلي هادي الخزعلي
https://youtube.com/watch?v=yUo0LZM53sI&si=EpK7Y94gXiZya2kq

#ولادة_علي_الاكبر

قمر ليلى الأكبر منطق الحب لونه
قمر ليلى الأكبر يا جمال عيونه
قمر ليلى الاكبر زاهر ايسمونه


اجه الأكبر والابو متفائل
وهلا بنصفي الثاني كال الكافل
الثكال اتجيب للدنيا الثكال
گطع اگماطه يريد ايقاتل

بالصغر....طگ عرج ....بالزعل محلاته
منتظر .....كربله....اول احجايته

دخن رأسه...چنه الكافل

.
.
.
.
قمر ليلى الأكبر طِلبه من الزهره
قمر ليلى الأكبر شايل اجمل نظره
قمر ليلى الأكبر احلى من الگمره


اشرقت شمس الفرح عالساده
اجه للدنيا ختام القاده
بعالي صوتك صلي يالتسمع نداي
الما يصلي ما يحصل امراده


لم تضع ....بالارض .....حرمه مثل الأكبر
بالدرع ....نومته ....اسد والله وأكثر

ذاك گماطه ....بيده تگطع
.
.
.
.
قمر ليلى الأكبر علي شمحلات اسمه
قمر ليلى الأكبر امرايه وجه الامه
قمر ليلى الأكبر علينا يمطر همه

العرب ما جابت ولد بوصافه
بعلي الأكبر الله خله الطافه
حَلف الرمله بعلي تنگلب ماي
بعد ما ترمش عيونه الشافه

صَوِره ......خالِقه.........بأرق بأجمل صوره
بي شبه ....للنبي .....وطلع كله احروره

من گالو طف ....دخن كله
.
.
.
.
قمر ليلى الأكبر وقمر هاشم هوه
قمر ليلى الأكبر عزم زود ونخوه
قمر ليلى الأكبر منخلق مو توه



منخلق وي النبي وانواره
يعني ابو الدنيا البشر خطاره
ثكيل وتخف الأرض يم رجله
هو والعباس نفس الشاره

بالوصف .....للنبي .....وبالبطوله العمه
الملك .....نادته .... ياعلي بالخدمه

نام بجيده.....نهر الكوثر


ابو رضا عبدالله الشويلي

يالاسمك خادم لحسين افهم هالفكره
ليغرك هذا الإعلام باوع للزهره

لتفكر بالناس ودوم
فكر توصل للمعصوم
افهم هالفكره ....افهم هالفكره




لا تفكر بسم شخصك شلون يالخادم توصله
سهل توصل بس الاصعب رضى الزهراء ما تحصله
والنكر اصل الخِدامه ترا باجر ينكر أصله

افهم يالبعيد القصد
الاعلام مابي أي امجد
وجِه النيه الفاطمه
والخُلد بالزهره الخُلد

صح باب الشهره مفتوح بس باب الزهره
ما ينسد بوجه الصار خادم للعتره

لتضل عن فاطم محروم
فكر تصول للمعصوم
افهم هالفكره ..افهم هالفكره
.
.
.
.
نعلت الله اعله الحداثة الغيرت طعم المجالس
بعض الاسماء الثگيله الخفه صارت عدها واهس
ما تنافس عالقضية علترند صارت تنافس

ياهو اليجيب اكثر عدد
معناها للساحه صعد
والما يشوفونه المَلا
بمقياسهم هذا كعد

الله يرحم حمزه الجان تنصتله الوسعه
ميدور تصوير وصوت كل همه الدمعه

وبجف الزهراء ملزوم
فكر توصل للمعصوم
افهم هالفكره......افهم هالفكره
.
.
.
.
بحجة الافراح وادم للطرب ركضت جدمها
ومو مهم لحنه يخالف المهم زاهر اسمها
هاي وادم ما تفكر الزهره هاي شكبر همها

من نسكت ايزيد الوجع
ومن نحجي شو محد سمع
اليستر الله بهل الوكت
غيِّر مبادئنا الطمع

واليطلب مال من الناس هذا يضل حاير
أجره بهل الدنيا مدفوع ليطالب باجر

يوگف يا وادم مصدوم
فكر توصل للمعصوم
افهم هالفكره....افهم هالفكره
.
.
.
.
يالتسيئ الهالشعائر ترا ابو صالح يراقب
غيره عنده عالقضيه لا تظنه ما يحاسب
احذر احذر لا يعثرك ابسبب هاي الشوائب

لا ترمي بفعالك سهم
اعله المهدي وازيد الالم
فكر بمامك واتعض
اشوكت تصحى من الوهم

ما عايز والله اجروح مهموم المهدي
ولتضل اتبرر يفلان عذرك ما يجدي

منقذنا منك ملچوم
فكر توصل للمعصوم
افهم هالفكره.....افهم هالفكره



الشاعر عبدالله الشويلي

يا حبيبي || الملا رائد البديري || المشاية الكاظميه ||
https://youtube.com/watch?v=Q5QcmmBAzts&si=ln0KP6qKsj3-ea00

#شور


وگف گلبي
يهل زينب الحگولي وگف كلبي
وگف گلبي
مو خِواني وادم غربه البگربي

الهزل ماخذني ما ادري يروح الوين
وموش حسين رد وياي راس حسين
عفت ذاك الكافلني اعله الوجه مكلوب
بس ذوله البقو  وياي ما ميتين

مخنوگه وأجرن بالنفس گوه
وهذا الشمر باليني وعلي بلوه
كلساه جاب راس حسين كدامي
ويكلي هنا يزينب باوعي الخوه
.
.
.
ذبل عودي
جزه الخمسين عمري والسبي يكتل
ذبل عودي
وهاي النوگ يهلي بالمشي اتعلعل

ضعن كله عبي وما بينا الليقاتل
صلفه الوادم و اني بلا كافل
هلي وريچي نشف ومن كثر المناشغ
من طاحو اخوتي اتمرجل العايل

ضيعني الوكت ركضني محنيه
چا تالي العمر عالهزله مسبيه
المثل زينب مره ترتاح مو تركض
هلي وجروح گلبي الف وتسعميه
.
.
.
.
يعوفوني
ابد ما حسبت وحدي يعوفوني
يعوفوني
ورماد اخيامي يترس ريتي وعيوني

حيره وكلشي اشوفه اعليه متزاحم
أطر عالخيل ما ادري على الوادم
عطشانه وبعد ما اشوف البصفي
تمايلت وطحت يم حنت القاسم


جبيره كربله واتلفت ابوحدي
حتى العدل بالطف ضاع من عندي
الِم بحسين مدري أطفاله الممنهم
حرت ابدي بعياله مدري بي ابدي
.
.
.
.
شطيبني
ولا يبرد گلب زينب يهل زينب
شطيبني
يضل طول العمر مخنوگ المسلب


الجرح البيه ما ينلم ولا يشفى
نار الطف طفت بس ناري ما تطفى
مو طعنت رمح واكعد واداويها
أنه الشافت رقيه اعله الرمل تغفى

أنه الشافت القاسم سابح بدمه
الصاحت ويه ليلى يالولد يمه
خبزه بحلگ جايع ضل اسم زينب
أنه الشافت حسين وطلعت سهمه

الشاعر عبدالله الشويلي

ياغربتي || الرادود مرتضى العسكري || الذاكر محمد حسن البديري
https://youtube.com/watch?v=rAQcTnfz-m8&si=rVyU7vWz08NxEPRn

#اربعين_السيدة
واا اسفي واا أسفي يا عمه


غربتج تاكل بروحي وصفت شيب اعله راسي
انه المهدي يعمه اني مشي جِيتِج اواسي
انه المُتعب انه الحاير انه التوجعني ناسي

جايج ومحترگ
بيّه مات الخلگ
اربعينج يعمه فتح جم جرح

عَبره بيّه بكثر
سحگتج عالجمر
الدنيا برياگي وكفت يمعه رمح

من حسرِتي بخدودي دم
صحنج فرغ مثل الخيم
زوارج العنج بطوو
تذبحهم اشواگ الألم

وااا أسفي وااا أسفي يا عمه
.
.
.
.
جِزَتني الدنيا واحلامي وبقى حلم المصايب
حلم عمري على دربج ينصبوها المواكب
وتجي مشايه خدامج على درب الخرايب

بدمع تمشي الخَدم
يرِف بديها العلم
وصحنج اترسه وأدام مثل كربله

وتلطم اعله الخدر
الراح وي الشمر
وقافله ترِد لهلها وتجي قافله


العايش اهات الضعن
بهمومه واحزانه انسجن
والماله بالدنيا وطن
لو زارج يحصل وطن

وااا أسفي وااا أسفي يا عمه
.
.
.
.
انه الماتو هَله وخلصوا وبقت روحه حزينه
انه الما لمته الدنيا ولا صحره ومدينه
انه الشايل گلب شايل عذابات الضعينه

ابدي من يا جرح
وانتهي بيا رمح
الدنيا ديوان احسها وسهلها كلف

مو دمع دمعي دم
وشيطفي الخيم
بروحي مستعره نار وابد ما تخِف

راسم على عيوني نحر
اسمج محطات القهر
وبوابة الشام الجرح
شما اباوع اتصد بالنظر

وااا أسفي وااا أسفي يا عمه
.
.
.
.
اخلص من هوى العاشر وتجي أبالي الهزيله
يعمه طولي ضل محني مثل طول العليله
شرب حيلي دمع جدي بوگعته الخَذَت حيله

عن جَواده وگع
للاهل ما رجع
عالارض جدي طاح وحوافر ترض

فزعت اربع فرق
بصدره سَوت نفق
والرماح اعله صدره تصلي الفرض

دارت على حسين الزلم
گدامه ذبحوا جم حلم
حار الرمل يا عَمتي
وجروحه ابد ما تلتحم


وااا أسفي وااا أسفي يا عمه
.
.
.
.
غريب بوَحَدِي ابچي على حسين وخيامه
نزع ثوب الفرح كلبي ولبس ثوب النِدامه
بكل جرة نفس لجمه ولا شفت السلامه


أصبح بكربله
وامسي بالقافله
الغَيبه كلها اخلص وقتها بچي

وسفه بنت النبي
بالغُرب تنسبي
شرد اسولف يعمه شيكَفي الحچي

بوابة الشام اشكثر
خَلت ندامه بالعمر
والكوفه يا عمه وعلي
بالگلب خَلَتلي جمر

وااا أسفي وااا أسفي ياعمه



عبد الله الشويلي

دولة الخدام _ محمد الحسيني
https://youtube.com/watch?v=f4s1tUbq9_U&si=Dfc5PeWePJR_ayrZ

فكر توصل للمعصوم |حسين جبار الهلالي| شهر شعبان المبارك
https://youtube.com/watch?v=BIBKFuojp2g&si=xToYuRmT6H6Kfg9Z