اخر وصيه وتسلب المهجه
نقراهه واحظر سيدي الحجه
نياحه الخيمه وونين شيوصي بزينب حسين
ليلة العاشر
.................................................
طلع يتفگد خيامه ابو اليمه
وصل يم خيمة اخته شو ثكل جدمه
دخل يمهه ودمعته نگّعت هدمه
يشم معصمهه هيه بمنحره تشمه
عليهه صافن ومخنوگ بلكلمه
يبعد عيون زينب إحچي بلخدمه

أدري شتريد تگلي لاتحچي
خلينه نگعد للصبح نبچي
ادري بلصبح زين شيوصي بزينب حسين
ليلة العاشر
....................................................
يرفعة راس اخوتچ والنعم يم عون
وصيتي من وره مايرجع الميمون
اذا گلّچ علي السجاد فرّن كون
الزغار بذمتچ بلخيل ينسحگون
اذا رگظت رقيه اتخيليهه شلون
احفظيهه ولا يلزمهه چف ملعون

لميت الاشواك الوره خيامي
حفاي باچر تشرد ايتامي
واخاف تسحگه رجلين شيوصي بزينب حسين
ليلة العاشر
....................................................
مثل هذا الوكت باجر منو اليمچن
ظلام ولا اكل لا ماي ماعدچن
ابو فاظل بنه هاي الخيم الچن
يحرگهن شمر وبخيمه يجمعچن
اذا گلچن ذبحت حسين لاتحچن
يزينب ماكو رحمه بگلبه يظربچن

سديلي باب الخيمه گعديهن
ماريد حارس ينظر عليهن
احفظيلي النساوين شيوصي بزينب حسين
ليلة العاشر
...................................................
اذا ظاگ الهوه بلخيمه افتحيهه
واطردي الحارس الي جاي يحميهه
لچن عينچ عله ام عبدالله خليهه
تروح اتدور ابنهه وصعبه تلگيهه
اذا نامت رقيه سكنه نيميهه
تلحگج من تجيني لمصرعي ادريهه

طلعت رباب تفرّق علينه
ولا تنطلب ك جاريه سكينه
هذني اصعب ثنين شيوصي بزينب حسين
ليلة العاشر
....................................................
فرق گعدتنه هاذي وگعدة المصرع
اشبعي شوف مني قبل لا اطلع
حبييج هذا باجر جسمه يتگطع
اريد اختي اذا شافتني لاتجزع
رجعتج من مجيئج ليه كون اسرع
سفينة هيبتج لا تغرگ بمدمع

يازينب وداعت ظلع امچ
ماشم هوه أنتي الهوه اشتمچ
اخوه وعشرة سنين شيوصي بزينب حسين
ليلة العاشر
.......................................................
تگله ابشر توصي العالمه التدري
حچتلي امي عله هذا اليوم من زغري
عگب باجر بداية محنتي ويسري
سياط متوني فدوه يابعد عمري
اظل كد الامانه منك لگبري
روحك تنسلب خل ينسلب خدري

بس وحده بلشام اعتذر منهه
موتت رقيه هناك ادفنهه
البقيه برگبتي دين شيوصي بزينب حسين
ليلة العاشر
...................................................
عباس الموّاشي
محرم الحرام 1445

اساسيه للعباس سلام الله عليه


كل مقتل نشوف اهل المنابر شي يگولونه
(آجرك الله) اسبل اديه وغمض عيونه
يمك يبو فاظل بچت هاي العباره
المطفيه عينه وگطعوا ايمينه ويساره
يتهيأ شلون
...................................................
يلوگفتك بلطف جبل * نظراتك التزرع أمل
بگلوب الاعيال
صاعد مهر رجلك تخط* شارط عله الدنيه شرط
بس آني خيال
علمشرعه من تنحدر* مو ماي لا تقهر شمر
ياسيد الابطال
(لمته النهر احمر جره؟) *(من طبله سبع الگنطره)
تحچيهه الاجيال
من صدك تطيح ؟ حسبوا تطوّل كربله هوايه
من شافوا الجود يبجي عليك ودمعته مايه
مطرت سيوف المشرعه عليك بغزاره
المطفيه عينه وگطعوا يمينه ويساره
يتهيأ شلون
.....................................................
موقف سلب فكر الدهر* كل آدمي جسمه اقشعر
ومتيه الراي
صعبه احتظارك ينقري *من النبي للعسكري
مامروا بهاي
حتظروا عله القبله وطحت * مستقبل حسينك نمت
ومحزم بماي
ظل بوريدك چم نبُض *والكعبه اجت يمك ركض
كعدت يمولاي
(بان النقص)وين؟ هوه الحسين شگد عدد جيشه
يلوحدك جيش گالوهه لمن مالت الريشه
تدري الحسين بطيحتك صار احتظاره
المطفيه عينه وگطعوا يمينه ويساره
يتهيأ شلون
...................................................
كل ناعي مر بمقتلك *إلا وذهب صوته وهِلك
من يذكر البيك
أسبل اديه ماتنحچي *تموت الزچيه من البچي
بلمجلس عليك
يلمصرعك خله الخدم *تلطم نظرهه تعيش الم
سهم الي ماذيك
رميات ابو النبله بحقد *رامي عله رجليك بقصد
توگع يتانيك
يلطيحتك لون استثنائي انته حته بلطيحه
گاظيهه (مولاي) هلمره ياخويه افزع تصيحه
من كتله (خليني) انكسر بان انكساره
المطفيه عينه وكطعوا يمينه ويساره
يتهيأ شلون
......................................................
روحه اطلعت يمك كعد *رادك تگوم وياه سند
شماته شمات
خليت الحسين احتظر *شالك وگع ظهره انكسر
خلصهه آهات
طير انذبح يمك رفس *حط اذنه يم ثغرك نفس
ماكو الكمر مات
سيفه تراه الگوّمه * يتوچه رد لمخيمه
للفاطميات
تلگّنه بلباب سألنه ساكت منحني بظيمه
يم خيمتك راح جر العمود وطيح الخيمه
هيأن نفسچن للسبي هاي الاشاره
المطفيه عينه وكطعوا يمينه ويساره
يتهيأ شلون
...................................................
سألت سؤال اختك صعب *وحسين ماعنده گلب
يحچي كلمتين
ماعفت الاكبر علثره *جسام هذا بمنحره
تشم النساوين
عبدالله مذبوح ورجع * ادري بابو فاظل وگع
ماجبته چاوين
يگلهه يزينب صيّحي *من سكنه گلي مستحي
خليني يحسين
لوسالم الماي ميت يردّ وينتچي عليه
تدرين عباس خلاني ماامشي عله رجليه
يهمس بذاني زينب اتقبلي اعتذاره
المطفيه عينه وكطعوا يمينه ويساره
يتهيأ شلون
................................................
اصل الاخوه انت فقط *چانت قبل (جوه)النقط
صعدت الاحروف
منك بده حزام الظهر * اليفگد اخو يفگد نظر
بعيونه ميشوف
چفك نتيجة طيحته * جف زينب امسى بغيبته
علناگه مجتوف
المايمسح آثار الجدم * ماتفرح اخته لو لزم
بيده اربع سيوف

وين ام البنين التاريخ ظل بس ينشد عليهه
يتشرف يريد يقبّل تراب الجوه رجليهه
ام الكتب (فگد الاخو )هوه الخساره
المطفيه عينه وكطعوا يمينه ويساره
يتهيأ شلون
................................................
عباس الموّاشي

محرم الحرام 1445

يجي يوم    يمولاي    مشي لأرض المدينه
       
          ......................................
يجي  يوم  بصفر  ياسيدي  تلكانه  قسمين
مشي لأرض المدينه ونص مشي تتعنه لحسين
اليكَول  بعيده  عاقل  لاكن  تعذره  المجانين
لون بلصين اكو(خطوه ) شرط نتعنه للصين

  مجانين     دوانه      فقط هذا مشينه
      ............................................
مشاريع الزياره هوايه لاكن وحده منهه
يبو ال (اهلا وسهلا ) سُفرِتك سولفنه عنهه
شرط من كربله لكبرك شكو نعمه بمتنهه
يزاير زاد ابو محمد وأبو الأكبر عسنهه

المعازيب     قريبا    تصيّح  مرّوا بينه
     .........................................
وحك نارك هذيج الماطفت وانته بظلامه
زراكَ البسمه ابيض نكَلبه من الخدامه
غيوم من الطبخ فوك العرب نترك علامه
واكيد الشيعي يتفنن اذا يخدم امامه

تسافر     هلغيوم    وشمس تطلع علينه
  ................................................

وعد علخارطه مال العرب دربك نظيفه
طريقك (ياحسن) اسمه ويظل فاتح مظيفه
نجيلك موكب القاسم وراه موكب شريفه
وشسع نعل اليزور يظمه بمجان السقيفه

 ويقبلون        جدمنه      النواصب تعتنينه
  .................................................
قريبه ومابقه هوايه عله هاي الزياره
قريب المنتظر واحنه جهزنه وبنتظاره
يجي الزاير  بُعد فرسخ يشاهدهه المناره
اكو بشرة فرح تشبه بعد هاي البشاره؟

   ابد لا     وحقك     عله طلعة ولينه
...................................................
شحلات المجلس بصحنك يبو محمد نعقده
نكَف هيئه  وره  هيئه  ونصيح  بأحلى  رده
ننادي (يمه ذكريني) سوه المجلس نشدّه
بسلام الله عله رمله والف لعنه عله جعده

هتافات    تبجيك      عليهه شكد بجينه
    ................................................
                   عباس الموّاشي

أجمل ليالي وايام
مو من عمرنه * رُفعة قدرنه * موظع فخرنه
الخدمة الحسينيه بلأربعينيه
..........................................................
عشرين يوم بكل سنه ماي الوجه بيهن
يعقوب ويتاني بشغف يوسف نتانيهن
نص المواكب مو خيم حته احنه نبنيهن
صارت قصور اعله الدرب من خير راعيهن

واحد (صُفَر) هلحزام
چفّيه سوده * وعيونه جوده * واحدنه زوده
زود الأخذ ميه بلأربعينيه
.................................................
منّ الصبح للمغرب الخادم فرد وگفه
من يعطش الزاير ركُض واحدنه يتحفّه
(هاجر) قياساً بلخَدم رگظه بلا لهفه
يُحرم تبوس الچف لچن زاير نحب چفّه

تراب التسحگه زوار
ننطي دروسه* لا ما ندوسه * ننزل نبوسه
خدمتنه فطريّه بلأربعينيه
........................................................
واحدنه كل مغرب تظلّ عياله تانيته
لو ماأخذ زوار ابد مايدخل البيته
يادمعة ام بيته التصب ودموع ذريته
ب(فقه النسه) بيت وبلا زاير نزل صيته

ماعدنه أحنه نسوان
مو حيدريه* مو فاطميه * مو زينبيه
كل حرمه مسبيه بلأربعينيه
....................................................
أجمل قصائد بلدرب مفتوحه للزاير
(جابر يجابر مادريت بكربله شصاير)
لو (جينه ننشد كربله) الكاتبهه چف (زاير)
(السماعه) تخجل من قصيده أُم لحن طاير

الرايح مشي للحسين
جنّه طريقه * يسمع حقيقه * بلايه موسيقى
شمحله التراثيه بلأربعينيه
..........................................................
هلرحمه بس عدنه اصبحت والغير ماعنده
كبرت علاقات الخدم مده بعد مده
بهذا الدرب صارت عوائل عائله وحده
نشوف الطفل ثاني سنه بدرب المشي (ورده)

(إنا جعلنا) هلناس
(شعوب وقبائل) *هوه الله گايل * صيرو عوائل
آيه وقصدهه هيه بلأربعينيه
.........................................................
زينب قبل لاتوصل إحنه نوصل بهمّه
زايرهه ومعزبهه بلطف كلهه ملتمه
يسقط وقار الشيعي كون مخظب بدمّه
من تشمر الحره نفسهه فوگ ابو اليمه

يجرحنه مشهد النوگ
ننزف مشاعر * تيبس حناجر * يعين الله جابر
حسّاهه مرميه بلأربعينيه
.....................................................
عباس الموّاشي
محرم الحرام 1445

ولاجنهن ابد شهرين      مرّن  مرّة  اليومين
انامن نومة المصيوب   اكول شقدمت لحسين
................................................
بشهر رمضان مره تمرظت ماكوم
عفت ذاك الأجر بعدين اقظي الصوم
لجن من هل محرم كلت اعوف النوم
صراع ويه المرظ إلاّ اخدم المظلوم

ثوابي بخدمة العطشان     أكثر من شهر رمظان
إذا فعلي ذنب ماتوب      اكول شقدمت لحسين
....................................................
أمس اقره لبو الأكبر هلاليه
وكفت اليوم اقراله وداعيه
رواديده امس يقرون لطميه
صدك يهلال زينب بيك مسبيه

الحناجر تقره هالايام    زينب ردّت من الشام
المُهر ردّ بسرج مكَلوب   اكول شقدمت لحسين
.................................................
الي ستين يوم بكل سنه خدمه
وكل يوم بسنه بحساب ابو اليمه
عُمُر شيعة علي ستين وتختمه
يبو الاكبر اريد تظربه لتقسمه

اذا قسمته اظل مخواف   دخل يطلع ثلث تالاف
وبعد ستميه يالمحبوب    اكول شقدمت لحسين
.................................................
من درب المشي حافظ اكو جلمات
هلا بالزاير تفظل تعال وبات
مواكبنه صفت مابيهه بس رايات
احس عمري انطوه من اطوي الافراشات

من اشوفن موكبي مزدود   اكولن هم عدل وتعود
يخوتي هالسنه مغلوب      اكول شقدمت لحسين
..............................................
خذتني الفرحه رايح هلسنه مشاي
قياسا بلمشوا قبلي اختلاف هواي
فرق بين المشه براحه وزحف عناي
خل نشوفه ياسين شيكول بهاي

عنك مامنعنه الخوف     كطعوا من ادينه اجفوف
البساتين شتظم ادروب   اكول شقدمت لحسين
................................................
باجر نجتمع كل احنه يوم الدين
وراح يبين اخلاص الخدامه وين
اذا واحد مع واحد تظل اثنين
ماينساله خادم بالقيامه حسين

خَدَم نلكه بجداره تفوز     خَدَم جم دمعه تبقه تعوز
شيجيني بدفتري مكتوب   اكول شقدمت لحسين
....................................................
عباس الموٌاشي

ويلي علزهره المظلومه
عاشت وماتت مهظومه
.............................................
حياة الزهره من چان النبي يمهه
إذا يشتاگ للجنه يجي يشمهه
ماي بنص چفوفه چان لازمهه
يسيّر يمهه لمّن تكثر اهمومه
ويلي علزهره المظلومه
عاشت وماتت مهظومه
.............................................
ماهانت عله الدنيه إبتسامتهه
خذت من عدهه ابوهه الچان خيمتهه
ياوكت الزچيه تجري دمعتهه
بوجه حيدر تعاين ويلي مصدومه
ويلي علزهره المظلومه
عاشت وماتت مهظومه
..............................................
الفگد غالي تِهَون مصابه جيرانه
ويعذرونه اذا تتزايد احزانه
عكسهه صار إسكتي صوتچ آذانه
بواچي اليل تسلب راحة النومه
ويلي علزهره المظلومه
عاشت وماتت مهظومه
..............................................
شافوا نوح فاطم يعله مايگطع
حرگوا باب بيت الزهره من يقنع ؟
حس بيهه النذل كل حيله ظل يدفع
بلباب وظلوع الزهره مهشومه
ويلي علزهره المظلومه
عاشت وماتت مهظومه
...............................................
أثاري النار أحمر خلّت البسمار
حديد محومر بصدر الزچيه صار
تتنخه بأبوهه وشتّم المختار
إقشعر جلد التشيّع ها يمحشومه
ويلي علزهره المظلومه
عاشت وماتت مهظومه
..............................................
درت طاح الطفل بس نهظت الزهره
تلگّتهه عله خدهه ياوسف سطره
نزل سوط عله اديهه اليمنى واليسرى
بطرف سيفه طعنهه طعنه مشأومه
ويلي علزهره المظلومه
عاشت وماتت مهظومه
................................................
ثواني الحادثه بس الجروح أكثر
ماتت فاطمه والونْ بده بحيدر
يخلص الليل صافن بيهه يتذكر
وعله الحايط حبيبه معلًگه هدومه
ويلي علزهره المظلومه
عاشت وماتت مهظومه
..........................................
عباس الموّاشي

(في مثلِ هذا اليوم )اجه معنى واسم مصيبه
يصادف جُحود الله بحرگ بيت النبي حبيبه
واليأمن العقاب يسيئ الأدب عُجاب
سنة هدعش عذاب علزچيه
..........................................
بهاي السنه مولد هلال الحزن
سمّوا رسول الله بگلب مطمأن
وره شهر صارت لغتهم (وأن)
فعلا تنفّذ مقتل اُم وأبن
هاي نواة الشرذمه الملعونه
هاي عقول من البغض مجنونه
هاي بدايه للقتل وافنونه

اكبر تجّرأ بلكره الارظيه من بشرهه
مابين باب وحايط الزهره انكسر ظهرهه
منا بده الأنين على مدى السنين
من طيحة الجنين علوطيه
...................................................
إلكم تفاصيل المصيبه الجرت
(لاذت وره الباب)الزچيه وحچت
صار النذل قوس عله باب البخت
صوبهه بسمار بصدرهه نبت
گال احس گلبي انكسر واهملهه
گال اجه ابالي علي واني الهه
گال صناديد العرب كاتلهه

ياويلي ثارات ابنَ ودّ بلزهره طلّعوهه
يگول النذل أعصُرهه واسمع تنتخي بأبوهه
فرصه انتهز جبان وتصاعد الدخان
ظامن اكو آمان بلوصيه
...............................................
موقف علي خلّه أسم للصبر
من يلگه بابه صايره بس جمر
والمحسن الماله ذنب منعصر
وقرط الزچيه عله الأرض منتثر
شاف مصيبة زينب المرعوبه
شاف شريكة روحه شو مصيوبه
شاف شكو خطوة غظب محسوبه

رجّع فقاره واكتفه بخالد جثه عله صدره
من هلدقيقه حيدره غيم ومشه عله شعره
صوت وصدى زفير وبناظره يدير
صار الأسد كسير كل مسيه
............................................

مگابلهه بلحجره وحچيهم دمع
مارادت اتگله انكسرلي ظلع
يدري بمنيتهه علي ومنفجع
اخر ليالي بهلوجه يجتمع
ليش عمرهه ثمنطعش وشّافت
ليش بوِلِدهه چم جرح هلعافت
ليش نِذَر حيدر لونهه تعافت

چنه نِذَر لو فاطمه الله رزقهه گومه
ياربي مرّظني شهر ونفس الشهر اصومه
ماعندي كل حلول بس ترجع البتول
فرگتهه مو تطول للمنيه
................................................
حگه علي يبچي عليهه دمه
بيت وصفت اركانه متهدمه
يدخل قبل تستقبله فاطمه
هسه يطب يلگاهه متألمه
چان ظحكته ومرهم لألامه
چان بديهه تنبني احلامه
چان تشدّه وهسه راخي احزامه

منظر حسن وحسين ابد لا مايصح مثيله
يقبّلون إديهه وبرجلهه تقبّل العقيله
أمهم صفت خيال وتطشرت عيال
ماكو بعد مجال للسويّه
................................................
عباس الموّاشي

إنته التعلّمنه الصَبُر ليش الجَزعْ يصيبك
عابُر جِدار المُغتسل ياسيدي نحيبك
مَهلَك يمولاي مايرجعْ بهاي حبيبك
....................................................
تندمت وتألمت من سؤالي
علجواب الصادم شلون اجالي
من سمعت المرتضى صوته عالي

عتابه بچّه المغتسل
وبوكتهه مُحتمل
يموت حيدر كل أمل مابقالي

وظعه تغيّر واختلف بلمغتسل اشوفه
چفوف الطوت خيبر عجب ترجف غدت جفوفه
من ديرت الماي مايرجع بهاي حبيبك
.......................................................
يگلي يسماء الصبر هلمسيه
گال إبچي براحِتك علزچيه
عن غسلهه توقّفن ليش اديه

خل ثغيبي ينسمع
شلون عن نوحي امتنع
أيدي مرّة علظلع شوغه بيّه

ماأدري مكسورة ظلع چفّي لچم ظلعهه
شيظل بعد بيه وشفت ميته ونزل دمعهه
وتأذّت هواي مايرجع بهاي حبيبك
......................................................
ظمّت اللام شكثر ماشِكَتهنْ
خافت عليه انجرح. هل خِفَتْهن
هسّه علصخره آنه. شاهدِتْهن

بچفهه سوط وملتوي
چفّ الاخر بي چوي
گلبي مو ذاك القوي الينظر إلهن

مدنگه قبل ومعصّبه هسه علي فهمهه
السطره عله عين ام الحسن چانت قبل تظمهه
سطْرتني دنياي مايرجع بهاي حبيبك
........................................................
(مهلك)ايگولوهه لل جرحه يهده
اليحتظر من جرحه ابد لايشدّه
غير فاطم حيدره شنهو عنده

عيوني غيمه وشوفي قلْ
مو مره مسميهه ( اهل)
تالي وسط المغتسل حيلي افگده

من عندي يترخّص إذا واحد فگد حبيبه
(الرّاح شيجيبه)جُملِتي ماترهم لمصيبه
خل يقره ويّاي مايرجع بهاي حبيبك
.................................................
شوفة عيونچ بعد شحچي عنهه
چفّنتْ روحي وبُقه بس دفنهه
شطلّعْ چفوف ام حسن من چفنهه ؟

ال(يُمّه) وبصوت الحسن
ذبحت ازرار الچفن
ميته بس لحسين اظن هذا ونهه

يسما وحق روح النبي لو ما (وحي) فزعْلي
ظاگ الهوه وصرت احتضر بس النفَس رجعلي
صوت السمه جاي مايرجع بهاي حبيبك
...........................................................
معنى (حيل الله) تره هوّه حيدر
وحدي احمل فاطمه ماظن اگدر
صيحي سلمان بعجل صيحي ابو ذر

ماگلت (عينوني) ابد
رايد الليله المدد
منكسر ظهر الأسد أمشي واعثر

يسما مثل فرض الفجر خل چلمتي عله بالچ
كل مالگيتيني انتحب لاينطرح سؤالچ
خل أفگد الراي مايرجع بهاي حبيبك
........................................................
عباس الموّاشي

مقسومه السنه فارغ صحنهه ماتخلص محنهه
الله اليعلم اليله بحزنهه
.......................................
منتظره تجيهه هلسنه الخدام
خدام وغياره
لن أبن الشمر صوته يرن بلشام
ممنوعه الزياره
يگول اخر زياره الكم إجيتوا العام
طفيت المناره

لازالت سبيه رد حكم ال اميه
الحكم ألنه غريبه مو وطنهه
................................................................
گلب أم وحنين بنص گبر مسجون
وتحن لولدهه
من سمعت خَدمهه هلسنه يرجعون
دمعتهه عله خدهه
نفس ليل هدعش هاي السنة عله ام عون
من ظلت وحدهه

چن اتگول إرجعوا وبكربله إدعوا
أُمكم تنكشف هلغمه عنهه
........................................................
مو خوف السكوت عله الوظع هيهات
بس حكمة مراجع
ولد زينب لجل زينب تطيح اموات
ماعدهه كل مانع
المواكب للصحن غصبا تطب جوگات
والعالم ايباوع

مرجعنه وحكمته مانكسر كلمته
علامه للظهور الشام اظنهه
.....................................................
يلمعيش النواصب يوم الاستشهاد
بس يومچ قلقهم
مجاعه الشام وابابچ چثير الزاد
من خيرچ رزقهم
يحسبون لرجب وايامچ التنعاد
بس يبقه فرقهم

يسترزق بكترچ من يشبع يغدرچ
ينعمه بلا شكُر واچفوا صحنهه
..............................................
يمولاتي اطمأني صحنچ المزدود
هم عندچ بديله
بصف صحن الحُسين وتلّچ الموجود
انفتح صحن العقيله
يلم أهل العراق بأكمله ويزود
وزياره ثگيله

مابين الغوالي تشيعچ خيالي
بين الحرمين اهنا دفنهه
...................................................
يمولاتي النعش يمشي عله روس الناس
ومغطه بعباتچ
مثل دوية نحل نسمع زفير انفاس
في ليلة وفاتچ
من صحن الحسين يطب صحن عباس
هذي امنياتچ

وبراية القُبّه يلف نعشچ يكعبه
جنازه چفوف ابو فاضل خذنهه
ً..................................................
عباس الموّاشي

لسان حال علي بن سويد عندما زار الامام عليه السلام وهوه في ذالك السجن

(زيارة سجين)
.................
اروحن فدوه لسمه جازفت رغم الخطورة
مواجهته حلم وتحقق وطبيت ازوره
اظل لو ادري بلجمعه واشيعه
ولاعيني تشاهد ذاكَ وظعه اويلاه
................................................
بألف يابلحسن يلزهره خلوني
اطبن للسجن من ايدي گادوني
سجن بس بلأسم ياناس صدكوني
طاموره بطن طاموره نزلوني
مو راسي بمشيتي يدگن متوني
يشيعه موسى شفته شلون إسألوني

ظلام ومااشوفه والهوه بصدري تدارك
صحت وينك يبعد اهلي وظوه وجهه المبارك
يكلي ياعلي راسك ارفعه
ولاعيني تشاهد ذاك وظعه اويلاه
........................................................
بساط الكاظم الجواه سجاده
عباته ململمه مخليهه الاوساده
تمر والخبزه مال شعير كل زاده
يكلي ياعلي علينه الظلم عاده
الشمر كص راس ابو السجاد واولاده
واجه السندي يبرد كلبه بلساده

اتفقنه اني والسندي يجي يثگّل عليه
حديده والمقابل يمتنع شتم الزجيه
بعد ماعندي مهجه وصعبه اسمعه
ولاعيني تشاهد ذاك وظعه اويلاه
........................................
يكلي مااريدك تنقهر وِاسمع
ابن شاهك عليه من الصبح يفزع
انه مو من حديدي هذا اتلوع
يجي بسوطه عله جسمي وكون يتكطع
الف مره عله صدري بكعدته تربع
قبل يومي يريد رويحتي تطلع

اذا يلگاني راكع اندفع والحيره حيره
اطيحن واليجي بالي فقط بدر العشيره
وگع من مهره بس شلون وگعه
ولاعيني تشاهد ذاك وظعه اويلاه
...............................................
يكلي هلعذاب البسجن شفته
عشُر من كربله لو اني قارنته
بنفس حبل العليل تجتفت عمته
انه من اعطش شفاهي الماي ظايگته
لچن جدي الحسين تفطرت شفته
تره معصومه ماعطشت مثل بنته

عدل ميت اردلهه وتجي تحظن ابوهه
رقيه حظنت الراس اوره ساعه ادفنوهه
عله حسين السجن يوميه ينعه
ولاعيني تشاهد ذاك وظعه اويلاه
.......................................................
بست ايده دخيلك وظعك تدهور
علكيفك ويه روحك يبن ابو الاكبر
اجيتك حته اعرف ياوكت تظهر
يكلي امشي للشيعه ولتتأخر
عله جسر الرصافه الموعد تقرر
بشاره الجمعه يطلع موسى ابن جعفر

فرحنه فرحة العينه انطفت شوگ عله ابنه
يجي يوسف صدك ياربي بس حقق حلمنه
اصابعنه گظت وينج يجُمعه
ولاعيني تشاهد ذاك وظعه اويلاه
.......................................................
كعدنه عللسجر نتنطر الرحمه
واشوف الشيعه خلفي كلهه ملتمه
انه الجبت البشاره وصدمتي صدمه
اجتنه جنازه راعيهه يخر دمه
منو اليعرف اخوته لو ولِد عمه ؟
لكيناه وحده ميت كلشي مايمه

عليّه صفنت الشيعه بدمعهم عاتبوني
اثاري يقصد اطلع يعني ميت شيعوني
بهذيج الساعه لو جلدي انزعه
ولاعيني تشاهد ذاك وظعه اويلاه
....................................................
(زيارة سجين ) عباس الموّاشي