#الاربعين


⚫بيوم الأربعين اول زياره الها
⚫تزور حسين والعباس كافلها

أجت زينب وسوت عل گبر لمه
تحضن بالتراب ونوب تشتمه
إلك رديت صاحت يا أبو اليمه
ولهانه وعليك دموعها اتهلها

تهمل دمعة مفارگ يفيض أحزان
تصرخ يا عزيزي انته بگلب لهفان
لفيتك لا ولد لا والي لا خوان
وبصدري مصايب كود أحملها

مصايب كثره ياخويه شفت بعدك
وآلمهن عليه وچادني فگدك
طريح موذريك وراس ما عندك
برمح مرفوع وي روس اخوتي كلها

محتاره وعيالك بس حرم واطفال
لارض الشام ودونه بلايا رجال
صاحو خارجيه وهاي ما تنگال
عدو الله الشتمني وهو گايلها

يحسين وبناتك على الگبر گعدن
وحده تنوح وحده التلطم ويبچن
بس خويه أخبرك خبر لا تحزن
رقيه الما اجت والموت عاجلها

خطارك رجعت وياي روس حيود
راسك ويه راس البي أثر عامود
أبو فاضل أخيي الشهم راعي الجود
ذاك الكفل والميله يعدلها

خليني أروحن يم گمر هاشم
يم المشرعه العباس اظن نايم
يرد بينه لوطنه وي الحرم لازم
واگله انته الترچبها وتنزلها

صعبه اعليه اعوفك يبن حامي الجار
وهاي اول زياره وروحي شبت نار
وَفّيت ودموعي عليك تجري انهار
يخو زينب الچنت انته المدللها

شهر وزاد عشره الفارگيتك بيه
ثـره گبرك يبو الغيره لنوح اعليه
گوم الظعن إنته الچافله توديه
حرم واطفال چا منهو اليوصلها



#سمير_الصالحي
#النجف_الأشرف

https://www.tg-me.com/AL_Nay_and_Alrthaa

نعي ليلة الأربعين الحسين

من ديوان #مواجع_الطف_جزء_السادس

😭🔥🔥🙅‍♀️

في ليلة اربعين الحسين مولاتي زينب صاحت الهاشميات صاحت الفاطميات توصيهن وصيه اذا باچر وصلن للمكبره شلون حالهن
تدري بيهن فاكدات ومشتاكات وحنينات وخافت عليهم كعدت توصيهن وصااااااااحت صوت بالله يالغواطم

اوصيچن وصيه يالفواطم
من نوصل كبور الهواشم
على روسهم حطن عمايم

•───✧◐◐✧───•

ادري كلوبچن كلش حنينات
بس ارد اوصيچن وصيات
لتقصرن صبـن الدمعات

•───✧◐◐✧───•

مشتااكات ادريچن لهلچن
بس نوصل تشدن حزمچن
كلچن فرد ركضه تركضن

•───✧◐◐✧───•

هيلن اتراب المكبره حيل
وصيحن دكعدو يالمچاتيل
ردن الضعن يومين ونشيل

•───✧◐◐✧───•

تعالن يابناتي وأمشن وياي
التمن عليه وكعدن احذاي
أون الچن وابچن لمچاي

•───✧◐◐✧───•

خافن تسمعن صوت منهم
سكتن وخلني انه يمهم
عدهم نشد وي غاليتهم

•───✧◐◐✧───•

ينشدون خواني عليـه
والضعن ناقص هاشميه
ماشافو اويانه رقيــه

•───✧◐◐✧───•

كل وحده تشكي الهظم يمهم
بلچن يكومون لحرمهم
وبيوتنه نبنيها يمهــم

•───✧◐◐✧───•

حن الكلب واليوم اجينه
لعزازنه نسوي واربعينه
نحسب ليالي و مانسينه

•───✧◐◐✧───•

بقلم المله والشاعره ام علي الأماره
غير مبري الذمه اليحذف اسم الشاعره وينسب الكلام له
العمل مهدات الى مولاي صاحب الزمان عج
🚫لايجوز حذف براء الذمه من النعي

https://www.tg-me.com/AL_Nay_and_Alrthaa

#نعي

جلست عند قبر الحسين وتخاطبه

طلعنه بليل خويه ندور عليك
وعثرنه بلجثث من جبنه طاريك

طلعنه بليل وحده دالي الاخره
بشفايف ذابله ورياك مره
وتكسر بلصدر يحسين عبره
كلنه حسين من نوصل نخبره

نكله الماي هذا وجينه نرويك

حرنه حسين خويه شلون نلكاك
جثيره الموته بطف ظاله وياك
ويا جثه النگظهه نكول لا ذاك
گبل مانمشي ردنه حصل دواك

عسه دمع الحزن يبن امي يشفيك

اجيناك بدمع والحسره ولاه
وگلنه حسين هسه هنا ونلكاه
نعرفه المحبس وماهو عله يمناه
والخنصر بعد مسلوب وياه

وعلامتنه صفت هاي العرف بيك

يخويه تعثرت ببني وكلت لا
اعوف حسين زحمه وبقه ويا
اودع حسين وبني بردتي الكا
اذا خاله يظل ماجيب طروا

وكلتله بردتي يوليدي ارد ليك

هواي الموته يمك ظلمه  وندوس
بس طعنات بيها وسلامه الروس
بس جسمك نعرفه سهام متروس
وراس علرمح مبيوع بفلوس

وصلتك بلدمع يبن امي احاجيك


ابو سلام الجابري

#اللهم_عجل_لوليك_الفرج

https://www.tg-me.com/AL_Nay_and_Alrthaa

#نعي

رجوع الضعن

بحبالي رديت
لفيتك من سبي وبحبالي رديت
لگبرك تعنيت
على ريحة علي لگبرك تعنيت
امشينه للبيت
يبن امي الجبتنه امشينه للبيت


ماشاني سلاب
اجيت اعتذر جي ماشاني سلاب
مو جية اعتاب
جية مستحه مو جية اعتاب
ما ضلت احباب
شيردني الدارنه وما ضلت احباب


لو ونه لو ويل
گضيّت الدرب لو ونه لو ويل
ما نايمة الليل
تشهد روسكم ما نايمه الليل
من ركضة الخيل
بعدني بخوفتي من ركضة الخيل


امولحه العين
من كد البواچي امولحه العين
والحال موزين
اريد توچه جيت الحال موزين
اتوچه يحسين
يبن امي عليك اتوچه يحسين


تچوني يطياب
جيت بهزل تچوني يطياب
بالغيره شرناب
اخوة زينب وبالغيره شرناب
تثنون الارجاب
اذبن روحي لو تنثون الارجاب

مصطفى صادق اللامي

#اللهم_عجل_لوليك_الفرج

https://www.tg-me.com/AL_Nay_and_Alrthaa

قصيده الحبيب الحسين (أمنية الخادم)
تقرأ بطور الثكيل
وتقرأ طور مربعه

ــــــــــــــــــــــــــــــــــــــــــــــ ــــــــــــــ
المستهل 👇👇👇👇

ريت صدري بدال صدرك عل وطيه
وريت داسني الخيـــول الأعوجيه
ــــــــــــــــــــــــــــــــــــــــــــــ ــــــ
ريت صدري اترضرض وحافر يدوسه
وريت صارت هل خيول عليه هوسه
شلون نحرك ينذبح والنبي يبوسه
ريـــت وبدالك اصيــر انــه رميــــه
ــــــــــــــــــــــــــــــــــــــــــــــ ــــــ
كون نحري المنذبح ونشال عالي
كون سيف الگطعك گطع وصالي
كون سالم تبقى يااغلى الغوالي
بدال روحك ريت لافتني المنيه
ــــــــــــــــــــــــــــــــــــــــــــــ ــــــ
ياسهم گطع جبدتك حيل ماذيك
بيه خليهن سهامك حتى احس بيك
والعطش فطر دليلك أثر اعليك
ياهو مثلك حمل كل هاي الأذيــه
ــــــــــــــــــــــــــــــــــــــــــــــ ــــــــ
شيبك البالدم حسافه مخظبينه
ويـــــاجبينك بالحجاره صايبينه
وذاك طــولك بالرمال أمظيعينه
مصيبتك مــن تنذكر توجع رقيه
ــــــــــــــــــــــــــــــــــــــــــــــ ــــــ
فوگ كل جروحك اعيالك سبايه
فاگدينك وفگدو صاحب الرايه
فارگو كل الأهل ضلـــو ضحايه
وزينب اختك بالكفاله هاشميه
ــــــــــــــــــــــــــــــــــــــــــــــ ــــــ
بالقلم المتواضع لخادمه الحبيب الملا أم سيف الدين غير مبري الذمه من يحذف الاسم وينسب الكلام له اهدي ثواب هذه العمل الى مولاي صاحب الزمان

https://www.tg-me.com/AL_Nay_and_Alrthaa

قم جدد الحزن في العشرين من صفر


قم جدد الحزن في العشرين من صفر ففيـــــــه ردت رؤوس الآل للحفر

يا زائري بقعة أطفالهم ذبحــــــــــت فيها خذوا تربها كحلاً إلى البصــــر

وا لهفتا لبنات الطهر حين رنــــــــت إلى مصارع قتلاهن والحفـــــــــــــر

رمين بالنفس من فوق النياق علـــى تلك القبور بصوت هائل ذعـــــــــر

وابكوه يلثم أطفالاً ويرشفــــــــــها مودعاً ودموع العين كالمـــــــــــــــطر

وتلك تصرخ واجداه وأبتـــــــــــــاه وتلك تصرخ وايتماه في الصـــــــغر

فلو تروا أم كلثوم منــــــــــــــــاشدةً ولهىً وتلثم ترب ألطف كالعطــــــــر

يا دفني الرأس عند الجثة احتفظـــوا بالله لا تنثروا ترباً على قمــــــــــــــر

لا تدفنوا الرأس إلا عند مرقـــــــــده فأنه روضة الفردوس والزهـــــــــــر

لا تغسلوا الدم من إطراف لحيتــــــه خلوا عليها خضاب الشيب والكـــــــبر

لا تخرجوا أسهماً في جسمه نشـــبت خوفاً يفور دمٌ يطفو على البشــــــــــر

رشوا على قبره ماءً فصاحــــــــــبه معطش بللوا أحشاه بالقطـــــــــــــــــر

لا تدفنوا الطفل إلا عند والـــــــــــده فانه لا يطيق اليتم في الصـــــــــــــغر

لا تدفنوا عنهم العباس مبتعــــــــــداً فالرأس عن جسمه حتــى اليدين بري

لا تحسبوا كر بلا قفراء موحشـــــــةً أضحت تفوق رياض الخلد بالزهـــــر

يا راجعين السبايا قاصدين إلــــــــى ارض المدينة ذاك المربع الخضــــــــر

خذوا لكم من دم الأحباب تحفتكـــــم وخاطبوا الجد هذي تحفة الســــــــــفر

يا أم كلثوم قدي الجيب صــــــارخةً على أخيك وفوق المرقد أعتفــــــــري

قولوا لعابده أن لا يفارقــــــــــــــــه فكر بلا منزل الأحزان والضــــــــــجر

يا كر بلا أي جسم في ثراك ثـــــوى لو تعلمين لنلت العرش في الـــــــــقدر

زاروكِ يوماً فأمسى زائروك لـــهم شأن تفوق من حاج ومعتمـــــــــــــــر

يا مؤمنون أكثروا للحزن وانتحبوا عليهم مدة الآصال والســــــــــــــــــحر

حطوا عزاه وقولوا رأس سيدنـــــا قد رد في العشرين من صفـــــــــــــــر

وابكوه يرنو شطوط الماء ومهجته في حرة لم يطقها طاقة البشــــــــــــــر

كل الكواكــــــب في الأفلاك آمنةً والكسف والخسف حظ الشمس والقمر

يا عترة المصطفى المختار يا عددي ومن بدولتهم عزي ومفتـــــــــــــخري

أنتم أولوا الفضل إذ جئتم على قدرٍ كما أتى ربه موسى علـــــــــــــــى قدر

صلى عليكم إلهي حيث خصــــكم بعصمةٍ من جميع الإثم والكـــــــــــــدر



السيد هاشم الستري البحران

قصائد في خدمة الرواديد
#أربعينية
#خذها_يا_زائر
الرادود #عباس_فهدا
#هيئة_أبناء_البتول_ع
#بيروت_1443
كلمات #المنذري

( على لحن محتاج ٱزورك / للإمام علي الرضا عليه السلام )

عندي أمانة خذها يا زائر ْ
إحمِل إليهِ قلبي المسافر ْ
.........................................
نارُ الفراقِ نارُ ٱشتياقي
نحوَ العراقِ خذها يا زائر ْ

قُل للمشاةِ قربَ الفراتِ
لي أمنياتي خذها يا زائر ْ

طالَ ٱنتظاري ليلي نهاري
كأس ٱنكساري خذها يا زائر ْ

صِفرُ اليدينِ دونَ الحسينِ
روحي وعيني خذها يا زائر ْ

قف مِن بعيدِ وٱسمع نهيدي
شكوى المريدِ خذها يا زائر ْ

سِر في الشوارع ْ جُد بالمدامع ْ
روحي تنازع ْ خذها يا زائر ْ

عندي رسالة شرحٌ لحالة
تُبكي الجبالا خذها يا زائر ْ

حجّي الأخيرِ زحفُ المسيرِ
شكوى الفقيرِ خذها يا زائر ْ

شكوى حنيني للأربعينِ
طولَ السنينِ خذها يا زائر ْ



المنذري
https://www.tg-me.com/AL_Nay_and_Alrthaa

#تراث #نعي مفجع 😭

رجوع الركب من الشام الى كربلاء وحال الفاطميات

. على قبر الحسين (روحي فداه) :

هوت عالگبر و المدمع تهله
او تسولفله ابفجع زجر او خوله
لفينه امن اليسر ليكم تـگله
گوم انصب لعيالک امخيم

سدرنه امن اليسر للغاضريه
يخويه اضيوف عندک هالمسيه 😭
يبو السجاد اجیناک ابشچیه
لبونه ایـزيد بالديوان شـتم

يخويه هاي ما چانت على البال
اطب المجلسه او بزنودي الحبال
راسک بالطشت و تشوفه العـيال
بيده العود و يوسم المبسم

صاحت يلحرم گومن امشنه
لعد اللي تچفلنه امن اهلنه
نریده ایگوم و يردنه الوطنه
او مثل ما جابنه بينه ايتوزم


.على قبر العباس (روحي فداه) :

زينب و الحرم كلهن تعنن
الشاطي العلگمی او عالگبر گعدن
گامن ونة الثكله يونن
او حمام الدوح من عدهن تعلم

يبو فاضل تصیح ابگلب مالوم
لفينه امن اليسر يم گبرك اليوم
شسولفلك يخويه اشسووا الگوم
اعادي و العدو هـيهات يرحم

یخویه اگعد يراعي العلم و الجود
او شوف امتونه امن اسياطهم سود
وشوف امن الحبال اشحال الازنود
بگت لليوم مـنها ينضح الدم

يخويه اگعد آوردنه الوطن جدنه
حرم و ایتام مانسدر وحدنه
اشنگله لليجي او عنک نشدنه
ابو فاضل على الشاطي تخذم

.على قبر علي الاكبر (روحي فداه):

گامن من ابو فاضل للاكبر
دارن عالگبر و النوح گبر
تگله امه او گلبها ابنار يسعر
ما تگعد يبعد الخال و العم

يبني امن اليسر ليكم لفينه
دگوم اوشوفنه ابيا حال اجينه
تريد اظعونه اترد للمدينه
يلكبر گوم للمشـه تولم

.على قبر القاسم بن الحسن (روحي فداهم) :

او عجن بالبچه اعليه الفواطم
گامن من علي الاكبر الجاسم
تگله امـه ينور العين نايم
هظيمه اعلى الولد لو ذلة الام

يجاسم يسر بالشامات چنه
اولیک امن اليسر عود ظعنه
نريد انروح يوليدي الوطنه
او تبارینه نریدک یلمشيم

.ام الرضيع (روحي فداهم)

لفت تبچي الرباب الزين العباد
تگله ويـن گبر ابني يسجاد
ورم صدري على ابني و الوجع زاد
او گلبي من كثر صبري تورم


ارید اگعد عـلى گبره و انوحه
و بفيض الدموع اغسل اجروحه
بـلچن لو سمعني اتعود روحه
او يعود الفرح ليه او يذهب الهم

الشاعر المرحوم
السيد عبد الحسين الشرع


#اللهم_عجل_لوليك_الفرج


https://www.tg-me.com/AL_Nay_and_Alrthaa

#جديد
#أربعين_الإمام_الحسين عليه السلام
وزن : التجليبه ( المربوعه)
.
.
رده اشلـون ردت زينب الحــــوره
من فوگ الجمل طاحت على گبره
_
رده اشلــــون ردت يـــم أهاليـــها
من عگب السبي واللي جرى اعليها
محنيــه تـــون يـــم گبـــر واليـــها
وبدمـــوع النواظر بَللــــت گبره
_
رده اشـلون ردت والگلب محـــروگ
تحچيله السبي وسفرتهن اعله النوگ
وآلام الخرابه ويّــه ضيــم السـوگ
شحچیلك يخويه وسفرتي گشره
_
شحچیلك يخويــه وما بگالي حال
هزله النوگ خويه والطريج أهزال
وكل لحظه ابضرب يحديني الجمّال
وشحچیلك بعد عن حال هالسفره
_
ما يِكْفيني يوم او لا شهر شهرين
حتى أرويلك الصار وجرى يحسين
لا عدلين بعـدك خويـــه لا ميتيــن
اهوايه اجروح يا روح الگلب مُره
_
اهوايه اجروح لکن فرگتك أصعب
ومو راسي يخويه هالگلب شيّــب
يمـــك ريــته گبــري آه يمتـــرّب 
او لا أرجع وحيده وحسرتي حسره
_
#فاطمة_كريم
٢٠٢٤ م

    
انه اروحي تسافر بشوك وحنين
والك  تهتف  ياحبيبي  ياحسين
                

                 
انه روحي اتعلمت منك صفات
لجل  عزتها تضحي بها لحياة
انت اسست الحياة من الممات
يا البنحرك ركعيت  الظالمين

                 
انه  امنت  بمصاب  تسمه   عاشور
بيه تحطم كل ظلم  من دم النحور
امنت دم الشهاده يحطم الجور
و لذلك ما اعوفك  يا حسين

                 
انت يومك نادر  بكل الوجود
لان  تضحيتك تعدت كل حدود
اليجود بنفسه يوصل غاية الجود
شلون وانت نطيت كل غالي وثمين

                  
انه اجيلك زحف واترك مبتغاي
ياللي اسمك مله كل شبر بسماي
يالرويت الدين  وانت بلايا  ماي
بيك  حتما يرتفع عالي الجبين

                   
الرادو يمنعونه عنك بالعذاب
طلع مسعاهم نسج من السراب
نكلهم بكربلا تلكون  الجواب
شوفو انصار الحسين القادمين



محمد دعبل النوري
 
https://www.tg-me.com/AL_Nay_and_Alrthaa